Неделя 6 по Пятидесятнице. ВСЕНОЩНОЕ БДЕНИЕ. УТРЕНЯ. ЧАС ПЕРВЫЙ. Вмц. Евфимии. Равноап. Ольги ГЛАС 5
24 ию́ля 2022 гóда. Недéля 6 по Пятидеся́тнице, Вмц. Евфúмiи всехвáльной. Равноап. Ѻ́льги, вел. княгúни Россíйской, во Святóм Крещéнiи Елéны. Глас 5. Всeнóщное бдéнiе для домáшнего (келéйнаго) совершéнiя. Слýжба мiрскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 7
Iрмóс: Превозноси́мый отцéв Госпóдь/ плáмень угаси́, óтроки ороси́, соглáсно пою́щiя:// Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Плóтiю облóжься я́коже на ýдице льщéнiя,/ Божéственною Твоéю си́лою змíя низвлéкл еси́// возводя́ вопiю́щiя: Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Земли́ непрохóдное осуществовáвый составлéнiе,/ во грóбе покрывáется плóтiю Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спасú нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Пресвятáя Богорóдице, спасú нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебé Пресвятéй:// И҆́же Еди́н благословéн Бог отéц нáших.
Хор: Пресвятáя Богорóдице, спасú нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
Глас 8
Хор: Святáя великомýченице Евфúмiе, молú Бóга о нас.
Чтец: Кровьми́ плáмень прéлести погаси́ла еси́, Богомýдрая страстотéрпице, вря́щими, // тéмже погаси́ пещь смирéннаго моегó телесé моли́тв твои́х одождéньми.
Хор: Святáя великомýченице Евфúмiе, молú Бóга о нас.
Чтец: Увы́, душé моя́ всеокая́нная, согрешáющи и не кáющися,/ кáко Судiи́ стрáшному надéешися предстáти?/ Потщи́ся Гóсподу возопи́ти:// Бóже, очи́сти мя.
Хор: Святáя великомýченице Евфúмiе, молú Бóга о нас.
Чтец: Отрокóм трiéм подóбящися, попрáла еси́ огнь, Богомýдрая отрокови́це,/ тéмже нестерпи́маго огня́ и плáмене мя вéчнаго избáви,// прибегáющаго в покрóв твой.
Хор: Пресвятáя Богорóдице, спасú нас.
Чтец: Во всегó человéка облéкся Всенепорóчный, кромé грехá,/ из чрéва Твоегó, Чи́стая, прóйде Плотонóсец,// Егóже моли́, вéрою Тя чтýщiя спасти́.
Глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Подóбно Iуди́фи сотвори́ла еси́, посредé куми́рских тели́щ вшéдши,/ тех начáльника сокруши́ла еси́ и демоночéтцы посрами́ла еси́,/ вся же лю́ди научи́ла еси́ в чистотé вопи́ти Хрiстý:// благословéн еси́, Гóсподи, на Престóле Слáвы Цáрствiя Твоегó.
Хор: Святáя равноапóстольная княгúне Ѻ́льго, молú Бóга о нас.
Чтец: Похвáльными цвéты, áки цáрскiй венéц, богомýдрей твоéй главé/ в пáмять твою́ прино́сим, ю́же Хрiстóс нетлéнiем венчá, О́льго досточýдная,/ моли́ся за твоé стáдо, избáвитися от вся́каго зла вопiю́щим:// благословéн еси́, Гóсподи, на Престóле Слáвы Цáрствiя Твоегó.
Слáва Ѻтцý и Сы́ну и Святóму Дýху.
Тропáрь: Ливáнскую ли гóру наречéм тя?/ На тя бо росá Небéсная сни́де./ Или́ Фисóн рекý, добрéйший сапфи́р, кáмень честны́й, Влади́мира имýщую,/ и҆́мже просвети́ся Россíйская земля́?/ Но моли́теся за ны взывáюще:// благословéн еси́, Гóсподи, на Престóле Слáвы Цáрствiя Твоегó.
И҆ ны́не и прúсно и во вéки векóв. Амúнь.
Богорóдичен: Кивóт позлащéн Тя Дýхом именýем,/ спáсшую мир от потóпа разýмнаго, Дéво,/ спаси́ нас, на Тя бо надéемся, и к Тебé прибегáем,/ отча́янныя в пучи́не от грех и напáстей избáви вопiю́щiя:// благословéн еси́, Гóсподи, на Престóле Слáвы Цáрствiя Твоегó.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Тебé, Вседéтелю,/ в пещи́ óтроцы, всеми́рный лик сплéтше, поя́ху:/ делá вся́кая, Гóспода пóйте// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты о вóльней спаси́тельныя стрáсти помоли́лся еси́ чáши, я́коже невóльней:// два хотéнiя, двемá бо по коемýждо нóсиши существóма, Хрiстé, во вéки.
Хор: Слáва, Гóсподи, Святóму Воскресéнiю Твоемý.
Чтец: Твои́м вседéтельным схождéнiем ад, Хрiстé, порýганный/ изблевá вся, я́же дрéвле лéстiю умерщвлéнныя,// Тебé превознося́щiя во вся вéки.
Хор: Пресвятáя Богорóдице, спаси нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Глас 5
Хор: Пресвятáя Богорóдице, спасú нас.
Чтец: Престá ны́не я́же прáотчая печáль,/ рáдость приéмши Ти Богомáтерни./ Тéмже непрестáнно поéм Тя, Дéво,// и превознóсим во вся вéки.
Хор: Пресвятáя Богорóдице, спасú нас.
Чтец: Поéт с нáми безплóтных собóр, Дéво/ Рождествó Твоé непостижи́мое,/ еди́н лик состáвльше любóвiю,// и превознося́ще Егó во вéки.
Глас 8
Хор: Святáя великомýченице Евфúмiе, молú Бóга о нас.
Чтец: Украси́вшися, слáвная, мýками телéсными,/ Слóву крáсному чи́сто обручи́лася еси́, соблю́дшему тя нетлéнну./ Тéмже истлéвша мя страстьми́ вся́кими, крáсна покажи́ и҆́скренним покая́нiем,// я́ко да при́сно тя ублажý, я́ко благýю предстáтельницу.
Хор: Святáя великомýченице Евфúмiе, молú Бóга о нас.
Чтец: Сви́ток Бóжiй бысть сéрдце твоé, нося́ зако́н Бо́жiй, напи́сан Дýхом,/ и сви́ток ввéрила еси́ правослáвiя, мýченице честнáя./ Тéмже молю́: лукáвое письмó, деви́це, зол мои́х раздрáвши,/ в кни́зе написáти мя моли́, чи́стая, спасéнных.
Хор: Святáя великомýченице Евфúмiе, молú Бóга о нас.
Чтец: Закóном умéрши естествá, пáче естествá, крóви от умерщвлéна источáеши тéла,/ жи́зни нáшея борцá си́ми, честнáя, умертви́вши/ и вéрным живонóсное здрáвiе дáрующи./ Сегó рáди вопiю́ ти:// умерщвлéнную дýшу мою́ воскреси́.
Хор: Пресвятáя Богорóдице, спасú нас.
Чтец: Тя, Чи́стую и непорóчную, Девó, желáющи,/ непорóчно и дýшу и тéло соблюдé, страстéй разгорéнiя терпéнiем опáльши,/ искушéнiе же мнóгих претерпéвши мук,// и ны́не в небéсных селéнiих ликýет, с Тобóю веселя́щися во вся вéки.
Глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Крепкá, я́ко льви́ца, си́лою Святáго Дýха оболчéна,/ еди́на устреми́ся всю́ду истерзáти куми́ры, и ди́вно на Небеси́ и на земли́:/ кáко женá прéжде Бóга познавáет,/ éюже испéрва всемý рóду падéнiе бысть?/ Тóю же ны́не спасéни поéм:/ о пролiя́вый мýдрость на всех дéлех Твои́х Бóже,// Тя превознóсим во вéки.
Хор: Святáя равноапóстольная княгúне Ѻ́льго, молú Бóга о нас.
Чтец: Премýдрость Бóжiя прéжде о тебé написáла есть:/ се еси́ дóбрая моя́ и прекрáсная, и порóка несть в тебé./ Блеск лицá твоегó я́ко ми́ра обоня́нiе, назнáменоваше твоé, Ѻ́льго, крещéнiе,/ éже посредé куми́рскiя лéсти на тебé обоня́ Хрiстóс,// и всех нас от смрáда дéмонскаго к покая́нiю ми́лостiю Своéю привéл есть.
Благословúм Ѻтцá, и Сы́на, и Святáго Дýха, Гóспода.
Тропáрь: Помяни́ менé, госпожé Ѻ́льго, убóгаго твоегó рабá,/ окрáденаго от врагá и согреши́вшаго пáче человéк,/ и помоли́ся Хрiстý подáти ми прощéнiе о всех согрешéнiих,/ я́же нечýвственно содéях, окая́нный, да покая́нiем вопiю́:/ о пролiя́вый мýдрость на всех дéлех Твои́х, Бóже,// Тя превознóсим во вéки.
И҆ ны́не и прúсно и во вéки векóв. Амúнь.
Богорóдичен: Не прéзри, Дéво, Твои́х раб мольбы́,/ о Тебé бо хвáлимся, Твоé мáлое стáдо мы есмы́,/ потщи́ся в заступлéнiе нáше, и изми́ ны от враг нáших,/ ущéдри знáющiя Тя Мáтерь Бóжiю и Сы́ну Твоемý вопiю́щiя:/ о пролiя́вый мýдрость на всех дéлех Твои́х Бóже,// Тя превознóсим во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Ѻ́троки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Исáiе, ликýй,/ Дéва имé во чрéве/ и роди́ Сы́на Емманýила,/ Бóга же и Человéка,/ Востóк и҆́мя Емý,/ Егó же величáюще,// Дéву ублажáем.
Хор: Слáва, Гóсподи, Святóму Воскресéнiю Твоемý.
Чтец: Пáдшаго человéка воспрiя́л еси́, Влады́ко Хрiстé, из ложéсн Деви́ческих/ всемý совокýплься, грехý же ни еди́ному причáщься:// всегó от истлéнiя Ты свободи́л еси́ пречи́стыми Твои́ми страстьми́.
Хор: Слáва, Гóсподи, Святóму Воскресéнiю Твоемý.
Чтец: Боготóчною крóвiю истощéнною, Влады́ко Хрiстé,/ от Твои́х пречи́стых ребр и животворя́щих,/ жéртва ýбо престá и҆́дольская,// вся же земля́ Тебé хвалéнiя жéртву принóсит.
Хор: Пресвятáя Богорóдице, спаси нас.
Богорóдичен: Не Бóга безплóтна, нижé пáки человéка прóста/ произведé Чи́стая Отрокови́ца, и Несквéрная:/ но Человéка совершéнна, и нелóжно совершéнна Бóга.// Егóже величáем со Отцéм же и Дýхом.
Глас 5
Хор: Пресвятáя Богорóдице, спасú нас.
Чтец: От чи́стых кровéй Твои́х/ усыри́ся плоть преестéственно/ всех Содéтелю, Единорóдному Сы́ну Роди́телеву,// не от мýжа, без сéмене же ýмна и одушевлéнна, Богорóдице Приснодéво.
Хор: Пресвятáя Богорóдице, спасú нас.
Чтец: Обходи́мое устáвила еси́ смéрти неудержи́мое стремлéнiе,/ рóждши плóтiю вои́стинну пáче умá Жизнь вéчную:/ Éйже прилóжься усты́ гóрькими ад упраздни́ся,// Пресвятáя Мáти Дéво.
Глас 8
Хор: Святáя великомýченице Евфúмiе, молú Бóга о нас.
Чтец: Да Твою́ добрóту свéтлую, прехвáльная, ýзрит, Влады́ко,/ добрóту презрé телесé и ми́ра, любóвiю зовýщи:/ Женишé, Слóво Ѻ́тчее, лицé Твоé покажи́ ми многорачи́тельное,// егóже Божéственными добрóтами уя́звлена есмь.
Хор: Святáя великомýченице Евфúмiе, молú Бóга о нас.
Чтец: У́треневала еси́ ко И҆́же из чрéва Ѻ́тча прéжде денни́цы Возсiя́вшему/ и свет былá еси́, сóлнца мнóжае облистáющи./ Тéмже мя просвети́, вопiю́, Евфи́мiе слáвная,// помрачéннаго дéмонскими лукáвыми прилóги.
Хор: Святáя великомýченице Евфúмiе, молú Бóга о нас.
Чтец: Трéпетен бывáю, прiéм во умé стрáшное суди́ще:/ дея́нiя бо стяжáх, вводя́щая мя в лю́тыя мýки./ Я́же мýки гóрькiя, мýченице, претерпéвшая твоегó рáди Рачи́теля,// осуждéнiя мя гóрькаго свободи́.
Хор: Пресвятáя Богорóдице, спасú нас.
Чтец: Просвети́, двéре свéта, óчи сéрдца моегó, молю́ся,/ я́ко да не уснý в смéрть безбóжных дея́нiй, да вéрою Тя воспoю́,// да величáю Тя, Áнгелов похвалó, и мýченик свящéнных честнóе сослóвiе.
Глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Весели́ся, Éво прароди́тельнице, и҆̀же бо, тя прельсти́в, из Едéма изведé,/ ны́не же попрáн есть твои́м исчáдiем./ Се бо Ѻ́льга живóтное дрéво, Крест Хрiстóв в Россíи водрузи́,/ и҆̀мже всем вéрным рай отвéрзеся,/ мы же хвáлящеся, я́ко тоя́ рáди Бóга познáхом,// со Влади́миром сiю́ величáем.
Хор: Святáя равноапóстольная княгúне Ѻ́льго, молú Бóга о нас.
Чтец: Женý по естествý нарицáем тя, но пáче си́лы жéнскiя подви́глася еси́./ Тьмы твоегó злáта истощи́ла еси́,/ да Хрiстóв закóн и учи́теля приобря́щеши,/ и҆́мже просвети́ла еси́ зéмлю Россíйскую,/ мы же тобóю хвáлящеся, я́ко тебé рáди Бóга познáхом,// с мýченики тя величáем.
Слáва Ѻтцý и Сы́ну и Святóму Дýху.
Тропáрь: Закóна настáвнице чи́стая, и учи́тельнице вéры Хрiстóвы,/ прiими́ похвалý от раб недостóйных, и моли́тву о нас сотвори́ к Бóгу,/ чéстно творя́щих твою́ пáмять,/ да от напáстей, и бед, и печáлей, и лю́тых грехóв свободи́мся,/ ещé же и мук ждýщих нас избáви, мóлимся ти,// тебé непрестáнно величáющiи.
И҆ ны́не и прúсно и во вéки векóв. Амúнь.
Богорóдичен: Се Цéрковь, се дверь, се Божiя горá святáя,/ се жезл, и сосýд злат, се истóчник печáтан,/ се рай святы́й нóваго Адáма,/ се престóл стрáшный,/ се Мáти Бóжiя Пречи́стая,// Застýпница всех нас, пою́щих Ю́.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный шестóй: Показýя, я́ко человéк еси́ Спáсе, по существý,/ посредé став воскрéс от грóба,/ и брáшна сопричасти́лся еси́,/ учи́л еси́ крещéнiю покая́нiя./ Áбiе же к Небéсному вознéслся еси́ Ѻтцý,/ и ученикóм Утéшителя послáти обещáл еси́, Пребожéственный Богочеловéче.// Слáва Твоемý востáнiю.
Слáва Ѻтцý и Сы́ну и Святóму Дýху.
Светúлен Вмц. Евфúмiи: Стрáнно, и преслáвно, и вели́кое чудодéйство, лю́дiе, прослáвите вси:/ я́ко по смéрти сви́ток всесвéтлая Евфи́мiа прiéмши сохрани́// и победонóсцы показá правослáвныя отцы́ в Халкидóнстем грáде.
И҆ ны́не и прúсно и во вéки векóв. Амúнь.
Богорóдичен воскрéсный: Творéц создáнiя, и Бог всех,/ плоть человéческую прiя́т от пречи́стых кровéй Твои́х, всесвятáя Дéво,/ и истлéвшее моé все естествó новосодéла,/ пáки я́коже прéжде рождествá остáвль по рождествé./ Тéмже Тя вéрно вси восхваля́ем, зовýще:// рáдуйся, Влады́чице ми́ра.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнiи Твои́ Áнгели:/ не чýвствоваша, когдá воскрéсл еси́, стрегýщiи Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлiю ми́лость.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и҆́стиннаго триднéвнаго Твоегó погребéнiя:/ и предвари́л еси́ в Галiлéи, в пещéре стрегóмый./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, жены́ текóша на гроб,/ ви́дети Тя, Хрiстá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáнiя,/ я́же подъя́л еси́, Спáсе Долготерпели́вый:/ я́ко от сéмене Дави́дова я́звы претерпéл еси́,/ я́ко Сын же Бóжiй, мир свободи́л еси́./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Вмц. Еvфúмiи, глас 3: Страстотéрпческое торжествó вéрнiи,/ богомýдренне совершáемо ви́дяще, чýдному в совéтех Бóгу нáшему,/ благодáрственно пéнiе воспои́м./ И҆́бо неви́димую держáву сопроти́вныя си́лы/ в жéнском естествé победи́/ и Божéственную Свою́ си́лу/ в нéмощи соверши́в дóбрыя мýченицы,// тоя́ моли́твами спасáет дýши нáша.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: И҆́стины чáшу от свои́х кровéй страдáльческих/ прехвáльная мýченица Хрiстóва почéрпши/ и сiю́ всегдá предлагáющи Цéркви,/ в нéйже церкóвный Питáтель/ премýдрости глáсом созывáет, глагóлющи:/ почерпи́те пи́во воскресéнiя свидéтельное,/ невéрных отгони́тельное,/ и страстéй очисти́тельное,/ благочести́вым же душáм храни́тельно,/ Спáсу зовýщим:/ напои́вый нас потóком пи́щи духóвныя,// спаси́ дýши нáша.
Дúвен Бог во святы́х Своúх,/ Бог Iзрáилев.
Стiхúра: И҆́же крóвiю Хрiстóвою дýшу знаменáвшiи в день избавлéнiя,/ кровь святýю, от мýченическаго истóчника кипя́щу нам с весéлiем духóвным прорóчески почерпéм,/ животóчных страстéй Спáсовых и присносýщныя слáвы образодéтельно./ Тéмже емý возопiи́м:/ прославля́емый во святы́х Твои́х Гóсподи,/ прехвáльныя Твоея́ страстотéрпицы моли́твами,// спаси́ дýши нáша.
В цéрквах благословúте Бóга,/ Гóспода от истóчник Iзрáилевых.
Стiхúра Вмц. Еvфúмiи, глас 8: Всяк язы́к да подви́жется к похвалéнiю прехвáльныя Евфи́мiи,/ весь род и вóзраст всяк,/ ю́ноши и дéвы, Хрiстóву дéву и мýченицу похвалáми венчáем:/ закóнно бо мýжествовавши/ и слáбость жéнскую отвéргши/ страдáльческими болéзньми мучи́теля врагá низложи́,/ небéсным же и Божéственным венцéм украси́вшися,/ мóлится Женихý и Бóгу// даровáти нам вéлiю ми́лость.
Слáва Ѻтцý и Сы́ну и Святóму Дýху.
Стiхúра евáнгельская шестая, глас 6: И҆́стинный мир Ты, Хрiстé, к человéком Бóжiй,/ мир Твой дая́, по востáнiи ученикóм,/ пристрáшны показáл еси́ я́,/ мня́щiя дух ви́дети:/ но ути́шил еси́ мятéж души́ их,/ показáвый рýце и нóзе Твои́./ Обáче не вéрующим ещé,/ брáшен причащéнiем, и учéнiй воспоминáнiем,/ отвéрзл еси́ их ум, éже разумéти Писáнiя:/ и҆́мже и Ѻ́тческое обетовáнiе обещáв, и благослови́в я́,/ отступи́л еси́ на нéбо./ Тéмже с ни́ми покланя́емся Тебé,// Гóсподи, слáва Тебé.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéнiе нáше, воспои́м, вéрнiи, и поклони́мся; я́ко благоволи́ Плóтiю взы́ти на Крест, и смерть претерпéти,/ и воскреси́ти умéршiя слáвным воскресéнiем Свои́м.
Слáва Отцý и Сы́ну и Святóму Дýху.
Тропáрь Вмц. Еvфúмiи, глас 4: Áгница Твоя́, Iисýсе, Еvфи́мiя зовéт вéлiим глáсом: Тебé, Женишé мой, люблю́, и Тебé и҆́щущи страдáльчествую, и҆ сраспинáюся, и҆ спогребáюся крещéнiю Твоемý, и҆ страждý Тебé рáди, я́ко да цáрствую в Тебé, и҆ умирáю за Тя, да и҆ живý с Тобóю, но, я́ко жéртву непорóчную, прiими́ мя, с любóвiю пожéршуюся Тебé. Тоя́ моли́твами, я́ко Ми́лостив, спаси́ дýши нáша.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 5: Ко áду, Спáсе мой, сошéл еси́, и вратá сокруши́вый я́ко всеси́лен, умéрших, я́ко Создáтель, совоскреси́л еси́, и смéрти жáло сокруши́л еси́, и Адáм от кля́твы избáвлен бысть, Человеколю́бче; тéмже вси зовéм: спаси́ нас, Гóсподи.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу