[НЕПОРОЧНЫ]Избраннии стихи из псалма 118: (глас 5 всегда): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
Пение Непорочных на воскресной утрене назначается Уставом до отдания Воздвижения (21 сентября), кроме совпадения с воскресным днем полиелейного или бденного праздника. 118-й псалом (17-я кафизма) поется на 5-й глас, независимо от недельного гласа, и сразу после него тропари «Ангельский собор…». В приходской практике вместо Непорочных на воскресных всенощных бдениях обычно поется полиелей.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Отцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ны́не и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душé, воздви́гнемся,// гряди́ тáмо, отню́дуже пóмощь и҆́дет. (Двáжды)
Деснáя Твоя́ рукá, и менé, Хрiстé, касáющися,// от лéсти вся́кiя да сохрани́т. (Двáжды)
Слáва Ѻтцý и Сы́ну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
И ны́не и прúсно и во вéки векóв. Амúнь.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ вни́дем Госпóдня:// рáдости мнóгiя испóлнен быв, моли́твы возсылáю. (Двáжды)
В домý Дави́дове стрáшная совершáются:// огнь бо тáмо паля́ всяк срáмный ум. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
И ны́не и прúсно и во вéки векóв. Амúнь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
ПРОКИМЕН
Чтец: Прокíмен, глас пя́тый. Воскресни́, Гóсподи Бóже мой, да вознесéтся рукá Твоя́, я́ко Ты цáрствуеши во вéки. (Пс.9:33)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебé, Гóсподи, всем сéрдцем мои́м, повéм вся чудесá Твоя́. (Пс.9:2)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскресни́, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе
Хор: Слáва Тебé, Гóсподи, слáва Тебé.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и҆́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и҆́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрiстý, и воскрéснути от мéртвых в трéтiй день, и проповéдатися во и҆́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Ѻтцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И҆ бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Хор: Святáя великомýченице Евфúмiе, молú Бóга о нас.
Чтец: Чи́стыми лучáми Дýха облистáющи, и мрáчную прéлести тьму разори́вши,/ нощь разреши́ безмéрных зол мои́х, и просвещéнiе ми подáждь,// мýченице страстотéрпице прехвáльная.
Хор: Святáя великомýченице Евфúмiе, молú Бóга о нас.
Чтец: Болéзни плотскíя дóблественне претерпéла еси́,/ и к неболéзненному рáдостно наслаждéнiю, мýченице, преминýла еси́./ Тéмже молю́ тя:// души́ моея́ болéзнь твои́ми моли́твами претвори́, и ко спасéнiю настáви.
Хор: Святáя великомýченице Евфúмiе, молú Бóга о нас.
Чтец: Невéсто честнáя и чи́стая и несквéрная Царя́ Хрiстá,/ злы́я сквéрны души́ моея́ очи́сти, болéзнь мою́ исцели́,/ неисцéльныя стрáсти уврачýй сéрдца моегó,// я́ко да восхвалю́ тя спасáемый.
Хор: Пресвятáя Богорóдице, спасú нас.
Чтец: Я́же от земли́ до небéс дося́жущи лéствица Небéсная,/ по нéйже Бог Слóво к человéком сни́де, Благословéнная Чи́стая,// несказáнно чýдо, недомы́сленно видéнiе, спасáй к Тебé прибегáющiя.
Канон cв. кн. Ольги, глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Вели́чiе нáше и похвалá ты еси́, Ѻ́льго Богомýдрая:/ тобóю бо от и҆́дольскiя лéсти свободи́хомся./ Ны́не моли́ся за род и рóды, и҆́хже Бóгу привелá еси́,// пою́щи Хрiстá, я́ко прослáвися.
Хор: Святáя равноапóстольная княгúне Ѻ́льго, молú Бóга о нас.
Чтец: Величáваго дiáвола из Россíи прогнáла еси́,/ нечести́выя куми́ры отню́д сокруши́вши,/ вся лю́ди от беззакóнiя свободи́ла еси́,// мýдростiю научáющи, пéти Хрiстá, я́ко прослáвися.
Богорóдичен: Исáiя Тя жезл нарицáет, Пречи́стая,/ Дави́д же Тя - престóл Госпóдень,/ Аввакýм - приосенéнную гóру, купинý же Тя - Моисéй,// мы же Тя Мáтерь Бóжiю нарицáем.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Водрузи́вый на ничесóмже зéмлю повелéнiем Твои́м,/ и повéсивый неодержи́мо тяготéющую/ на недви́жимем, Хрiстé, кáмени зáповедей Твои́х,// Цéрковь Твою́ утверди́, Еди́не Блáже и Человеколю́бче.
Чтец: Желчь ýбо и҆́же из кáмене мед ссáвшiи,/ в пусты́ни чудодéйствовавшему Тебé принесóша, Хрiстé:/ óцет же за мáнну воз благодея́нiе Ти воздáша// óтроцы Iзрáилевы неблагодáрнiи.
Чтец: И҆́же дрéвле светови́дным óблаком покрывáеми,/ Живóт во грóбе Хрiстá положи́ша:/ но самовлáстно воскрéс, всем вéрным подадé// тáйно осеня́ющее свы́ше Дýха сiя́нiе.
Хор: Пресвятáя Богорóдице, спасú нас.
Богорóдичен: Ты Мáти Бóжiя несочетáнно родилá еси́,/ И҆́же от Нетлéнна Отцá возсiя́вшаго, кромé болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Пресвятáя Богорóдице, спасú нас.
Чтец:Лéствица, Éюже к нам сни́де Вы́шнiй,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблагíй ми́рови бесéдовати благоволи́.
Хор: Пресвятáя Богорóдице, спасú нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц прiéм яви́ся.
Глас 8
Хор: Святáя великомýченице Евфúмiе, молú Бóга о нас.
Хор: Святáя великомýченице Евфúмiе, молú Бóга о нас.
Чтец: Дýшу мою́ недýгующую тлетвóрными страстьми́,/ и к стремни́нам прéлести попóлзшуюся, мýченице прехвáльная,// осенéнiи Божéственными исцели́, и утверди́ не побеждáтися.
Хор: Пресвятáя Богорóдице, спасú нас.
Чтец: Рáдуйся, еди́на рóждши вся́ческих Гóспода,/ рáдуйся, жизнь исходáтаившая,/ рáдуйся, приосенéнная и несекóмая горó,// вéрных утверждéнiе, еди́на Всенепорóчная.
Глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Держáвною рукóю, и мýдрыми словесы́, и си́льным слóвом/ учи́ла еси́ твоегó сы́на закóну Хрiстóву/ и лю́дем возбрани́ла еси́ жрéти и҆́долом, Ѻ́льго преслáвная,// в пáмять твою́ ны́не сошéдшеся, тебé прославля́ем.
Хор: Святáя равноапóстольная княгúне Ѻ́льго, молú Бóга о нас.
Тропáрь: Весь похвáльный глас и мольбý ти, Ѻ́льго, принóсим,/ тобóю бо Бóга познáхом, Емýже ны́не предстои́ши,/ проси́ ми́ра отéчеству, и на погáныя побéды, и душáм нáшим оставлéнiя грехóв,// пою́щим тя, присноблажéнная.
И҆ ны́не и прúсно и во вéки векóв. Амúнь.
Богорóдичен: Прiя́телище яви́лася еси́, Дéво, Непристýпнаго Бóга,/ тем тя пою́т непрестáнно Áнгельстiи чи́ни, повинýющеся Влады́це,/ Ты бо родилá еси́ Слóво Ѻ́тчее, Собезначáльное, без отцá:// о чýдо! Святы́й бо Дух осени́ Тя.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Вмц. Еvфúмiи, глас 6: Пóдвиги во страдáльчестве, пóдвиги в вéре/ положи́ла еси́ тéпле за Хрiстá, Женихá твоегó./ Но и ны́не я́коже éреси и врагóв шатáнiе/ под нóги вóинству нáшему покори́ти моли́ Богорóдицею,/ я́же от шестисóт три́десяти Богонóсных отéц/ предéл прiéмшая// и храня́щая, всехвáльная.
И҆́кос: Что твои́х страдáнiй, или́ что исправлéнiй,/ или́ что твоегó дéвства, или́ житiя́ непорóчнаго твоегó?/ Ты бо возвесели́ла еси́ Ѻтцá, я́ко Сы́ну уневéстившися/ и Дýху Святóму себé украси́вши./ Кто довлéет к сим? Кто глагóлати ны́не возмóжет,/ коли́ки тя осiявáют добродéтели незаходи́мы?/ Я́ко от востóка бо грóбу возсiя́вшу,/ всем сiя́еши, и лучи́ пущáеши на земли́ и в мóри,/ и во всю подсóлнечную, освещáеши и благоухáеши концы́./ Тéмже и сви́ток, ввéренный от шести́сот и три́десятих Богонóсных отéц,// предéл прiéмши, сохрани́ла еси́, всехвáльная.
Кондáк Равноап. Ѻ́льги, глас 4: Воспоéм днесь благодéтеля всех Бóга,/ прослáвльшаго в Россíи Ѻ́льгу Богомýдрую,/ да моли́твами ея́/ подáст душáм нáшим// грехóв оставлéнiе.
Седáлен Вмц. Еvфúмiи, глас 8: Кровéй твои́х струя́ми, мýченице Хрiстóва,/ потóп нечести́вым при́сно дéйствуеши, всехвáльная,/ тýчами же благодáтными словéсныя ни́вы напая́ющи всегдá,/ в ни́хже возрасти́ла еси́ клас вéры./ Тем преслáвно и по смéрти яви́лася еси́ óблак,/ источáющ живóтное свидéтельство, страстотéрпице прехвáльная,/ моли́ся Хрiстý Бóгу, согрешéнiй оставлéнiе даровáти// чтýщим любóвiю святýю пáмять твою́. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен Вмц. Еvфúмiи, глас 8: Рýце Твои́ Божéственнiи,/ и҆́миже Создáтеля понеслá еси́, Дéво Пресвятáя, воплóщшагося благосты́нею,/ простéрши умоли́ Егó избáвити нас от искушéнiй, и страстéй, и бед,/ хвáлящих Тя любóвiю и вопiю́щих:/ слáва Всéльшемуся в Тя, слáва Прошéдшему из Тебé,// слáва Избáвльшему нас рождествóм Твои́м.
Чтец: Крест за дрéво разýмное,/ за слáдкую же пи́щу желчь, Спáсе мой, прiя́л еси́,// за тлéнiе же смéрти кровь Твою́ Божéственную излiя́л еси́.
Хор: Пресвятáя Богорóдице, спасú нас.
Богорóдичен: Кромé ýбо сочетáнiя зачалá еси́ нетлéнно во чрéве,/ и без болéзни родилá еси́,// и по Рождествé, Дéва, Бóга плóтiю рóждши, сохрани́лася еси́.
Глас 5
Хор: Пресвятáя Богорóдице, спасú нас.
Чтец: Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéнiя плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасú нас.
Чтец: Создáвый от не сýщих вся́ческая,/ от Тебé, Чи́стыя, создáтися я́ко Благодéтель, благоволи́,// на Спасéнiе вéрою и любóвiю Тя пою́щих, Всенепорóчная.
Глас 8
Хор: Святáя великомýченице Евфúмiе, молú Бóга о нас.
Хор: Святáя равноапóстольная княгúне Ѻ́льго, молú Бóга о нас.
Чтец: Дух Бóжiй почи́ на тебé, я́ко на Деввóре прорóчице дрéвле,/ И҆́мже просвети́вшися, укрепля́ющи Влади́мира разýмнаго,/ Сисáру дiáвола низложи́ла еси́ в сéти егó Крещéнiем,// я́ко и Вараком в потóце Ки́ссове прéжде.
Хор: Святáя равноапóстольная княгúне Ѻ́льго, молú Бóга о нас.
Чтец: Быстринé подóбящися, Ѻ́льго Богомýдрая,/ сокрушéнным сéрдцем ста, моля́щися к Бóгу,/ избáвила еси́ род твои́х людéй от оскорблéнiя куми́рскаго,/ и от пленéнiя врáжiя свободи́ла еси́,// Хрiстá призывáющи на пóмощь нáшу.
Слáва Ѻтцý и Сы́ну и Святóму Дýху.
Тропáрь: В нарóчитый день святáго твоегó преставлéнiя, рáдостно прáзднуем,/ песнь молéбную Хрiстý возсылáюще,/ нетлéнным венцéм венчáвшему тя, Ѻ́льго Богомýдрая:// проси́ нам оставлéнiя грехóв, слáвящим тя вéрно.
И҆ ны́не и прúсно и во вéки векóв. Амúнь.
Богорóдичен: Тя, от кóрене Iессéева процвéтшую,/ Исáiя я́коже проречé, Хрiстá - Цвет прозя́бшую,/ и Первоначáльнаго плóтiю носи́вшую и Жезл Бóжiя Дýха,// хвáлим Тя, я́ко Бóжiю Мáтерь, и Чи́стую Дéву.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Одея́йся Свéтом, я́ко ри́зою,/ к Тебé ýтреннюю, и Тебé зовý:/ дýшу мою́ просвети́ омрачéнную, Хрiстé,// я́ко Еди́н Благоутрóбен.
Чтец: Ты мя преоблéкл еси́ в нетлéнiе, Хрiстé,/ тли смéртныя неистлéнно плóтiю вкуш,// и возсiя́в из грóба триднéвен.
Хор: Пресвятáя Богорóдице, спасú нас.
Богорóдичен: Ты прáвду же и избавлéнiе нам рóждши Хрiстá без сéмене,// свобóдно содéяла еси́ от кля́твы, Богорóдице, естествó прáотца.
Глас 5
Хор: Пресвятáя Богорóдице, спасú нас.
Чтец: Вси прорóцы Тя я́ве предвозвести́ша/ хотя́щую бы́ти Бóжiю Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасú нас.
Чтец: Свéтел óблак Тя живóтныя вóды,/ нам тýчу нетлéнiя Хрiстá одожди́вшiй отчáянным,// Чи́стая, познавáем.
Глас 8
Хор: Святáя великомýченице Евфúмiе, молú Бóга о нас.
Чтец: Я́коже посредé звезд, сóлнце многосвéтло, мýченице, просiя́ла еси́/ сýщим с тобóю мýчеником и мир страдáнiем озари́ла еси́./ Но молю́ ти ся:// омрачéнное моé сéрдце страстéй мглóю, просвети́.
Хор: Святáя великомýченице Евфúмiе, молú Бóга о нас.
Чтец: Неусы́пною моли́твою успи́, всехвáльная, душетлéнныя сéрдца моегó стрáсти,/ и бóдрость Божéственную подáждь ми, лежáщему на одрé уны́нiя,// лéности же сну порабощéну.
Хор: Святáя великомýченице Евфúмiе, молú Бóга о нас.
Чтец: Ловéц лукáвых мя сéти запя́ша, я́коже пти́цу, / и лю́те уязви́хся, и рукáми злы́ми ны́не держи́м есмь, // избрáнная Госпóдня голуби́це, помози́ ми и от сих злóбы исхити́.
Хор: Пресвятáя Богорóдице, спасú нас.
Чтец: Мáтернее дерзновéнiе, éже к Сы́ну Твоемý, имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тя и еди́ну, хрiстiáне, ко Влады́це очищéнiе ми́лостивно предлагáем.
Глас 5
Хор: Святáя равноапóстольная княгúне Ѻ́льго, молú Бóга о нас.
Хор: Святáя равноапóстольная княгúне Ѻ́льго, молú Бóга о нас.
Чтец: Ѻ тебé поя́ше Соломóн прéжде: / вне виногрáда цáрская мáслина процветé; / ты бо святы́й грезн Крещéнiем в Россíи насади́ла еси́, // творя́щи плод покая́нiя, о нéмже Сам Хрiстóс весели́тся.
Слáва Ѻтцý и Сы́ну и Святóму Дýху.
Тропáрь: Умилосéрдися, Влады́ко, на новопросвещéнныя лю́ди Твоя́,/ не предáждь нас в руки погáных, за мнóжество беззакóнiй нáших,// но моли́твами настáвницы нáшея Ѻ́льги избáви ны от вся́кiя напáсти.
И҆ ны́не и прúсно и во вéки векóв. Амúнь.
Богорóдичен: Кропи́те вси, я́коже пи́шется, óблацы весéлiя земны́м:/ Бóжiй бо Дéтищ Хрiстóс, очищáяй мiр от грехóв,// воплоти́ся от Дéвы, и дан бысть нам.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ безлéтнаго Сы́на,/ всем воспевáющим Тя// мир подавáющая.
ПЕСНЬ 6
Ирмóс: Неи́стовствующееся бýрею душетлéнною,/ Влады́ко Хрiстé, страстéй мóре укроти́,// и от тли возведи́ мя, я́ко Благоутрóбен.
Хор: Святáя великомýченице Евфúмiе, молú Бóга о нас.
Чтец: Повинýвшися и҆́гу Божéственному,/ покори́ла еси́ гóрдаго врагá, ногáми же сокруши́ла еси́,/ от негóже ýбо исхити́, мýченице страстотéрпице,// притекáющаго к покрóву твоемý.
Хор: Святáя великомýченице Евфúмiе, молú Бóга о нас.
Чтец: Прошлá еси́, мýченице, лю́тое мук волнéнiе/ и ко пристáнищу жи́зни прáве дости́гла еси́.// Тéмже в пучи́не сластéй житiя́ обуревáема спаси́ мя.
Хор: Пресвятáя Богорóдице, спасú нас.
Чтец: Да избáвимся от лют прегрешéнiй моли́твами Твои́ми, Богороди́тельнице Чи́стая,/ и да улучи́м, Пречи́стая, Бóжiе сiя́нiе// из Тебé неизречéнно воплощéннаго Сы́на Бóжiя.
Глас 5
Хор: Святáя равноапóстольная княгúне Ѻ́льго, молú Бóга о нас.
Чтец: Рéвность Святáго Дýха в сéрдцы прiéмши,/ отéческое зловéрiе возненави́дела еси́,/ и, Хрiстá и҆́стиннаго Бóга взыскáвши, чáдо свéта яви́лася еси́,// и с пéрвенцы святы́х на Небесéх ликýеши.
Хор: Святáя равноапóстольная княгúне Ѻ́льго, молú Бóга о нас.
Чтец: Нóвая учени́ца Хрiстóва в Россíи яви́лася еси́, обходя́щи грáды и сéла,/ куми́ры сокрушáющи и лю́ди учáщи еди́ному Бóгу покланя́тися,// Егóже моли́ за пою́щiя тя.
Слáва Ѻтцý и Сы́ну и Святóму Дýху.
Тропáрь: О, Богоблажéнная Ѻ́льго, помоли́ся за твоя́ чáда к Бóгу:/ мир неподви́жимый отéчеству нáшему испроси́// и нам отпущéнiе грехóв, при́сно тя прославля́ющим.