Неделя 6 по Пятидесятнице. ВСЕНОЩНОЕ БДЕНИЕ. Великая вечерня. Вмц.Евфимии всехвальной.Равноап. Ольги
24 ию́ля 2022 гóда. Недéля 6 по Пятидеся́тнице, Вмц. Евфúмiи всехвáльной. Равноап. Ѻ́льги, вел. княгúни Россíйской, во Святóм Крещéнiи Елéны. Глас 5. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáкже канóна и пéрваго чáса. Вся слýжба прáздника по Октóиху и Минéе. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святы́й Крéпкiй, Святый Безсмéртный, помилуй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Гóсподи, поми́луй, (12 раз.)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стихú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýіа, аллилýіа, аллилýіа, слáва Тебé Бóже. (3 раза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Пeрвая кафисма
Читаем либо кафúсму 1-ю (1-ю cтатiю(«Блажен муж» - 1-й антiфон.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрiстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поем стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýіа, аллилýіа, аллилýіа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýіа, аллилýіа, аллилýіа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýіа, аллилýіа, аллилýіа.
Чтец (или хор): Блажéни вси надéющiися Нань.
Хор: Аллилýіа, аллилýіа, аллилýіа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýіа, аллилýіа, аллилýіа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýіа, аллилýіа, аллилýіа.
Чтец: Слáва Ѻтцý и Сы́ну и Святóму Дýху.
Хор: Аллилýіа, аллилýіа, аллилýіа.
Хор: И ны́не и при́сно и во вéки векóв, ами́нь.
Хор: Аллилýіа, аллилýіа, аллилýіа.
Аллилýіа, аллилýіа, аллилýіа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 5
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[в приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою́,// исповéдатися úмени Твоемý.
Стiхúры воскрéсные, глас 5: Честны́м Твои́м Крестóм, Хрїстé,/ дiáвола посрами́л еси́,/ и Воскресéнiем Твои́м жало грехóвное притупи́л еси́,/ и спасл еси́ ны от врат смéртных:// слáвим Тя, Единорóдне.
Менé ждут прáведницы,// дóндеже воздáси мне.
Стiхúра: Воскресéнiе дая́й рóду человéческому,/ я́ко овчá на заколéнiе ведéся,/ устраши́шася сегó кня́зи áдстiи,/ и взя́шася вратá плачéвная./ Вни́де бо Царь слáвы Хрїстóс,/ глагóля сýщим во ýзах, изыди́те:// и сýщим во тьме, откры́йтеся.
На 8. Стiх: Из глубины́ воззвáх к Тебé, Гóсподи,// Гóсподи, услы́ши глас мой.
Стiхúра: Вéлiе чýдо,/ неви́димых Содéтель, за человеколю́бiе плóтiю пострадáв,/ воскрéсе Безсмéртный./ Прiиди́те отéчествiя язы́к, Томý поклони́мся:/ благоутрóбiем бо Егó от прéлести избáвльшеся,// в Трiéх Ипостáсех Еди́наго Бóга пéти навыкóхом.
Да бýдут ýши Твоú// внéмлюще глáсу молéнiя моегó.
И҆́ны стiхúры анатóлiевы: Вечéрнее поклонéнiе/ принóсим Тебé, Невечéрнему Свéту,/ на конéц векóв, я́ко в зерцáле плóтiю возсiя́вшему мíрови,/ и дáже до áда низшéдшему,/ и тáмо сýщую тьму разруши́вшему,/ и свет Воскресéнiя язы́ком показáвшему:// Светодáвче Гóсподи, слáва Тебé.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúры Вмц. Евфúмiи, глас 8: Ѻ, преслáвнаго чудесé!/ Госпóдня áгница,/ Тогó вóльной подобя́щися мéртвости/ болéзньми страдáнiя,/ лежáщи во грóбе,/ крове излiя́нiе источáет си́лою Дýха,/ ю́же почерпáюще душáм на очищéнiе,// вся́ческих хвалý принóсим Бóгу всегдá.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: Ѻ, преслáвнаго чудесé!/ Кáко ýбо мéртвым естествóм,/ прехвáльная стоя́ше страстонóсица днесь,/ Божéственный сви́ток держáщи,/ сопроти́вным егó не даю́щи,/ отцéм же вверя́юще./ О мýченице слáвная, вселéнныя похвалó,/ спасáй ны́не моли́твами твои́ми// незы́блему Цéрковь Хрїстóву.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Божéственных отéц собрáнiе,/ вéры предéл, на твоя́ пéрси полагáет:/ егóже ýбо, преслáвная прiéмши,/ я́ко храня́щи Божéственную вéру непоколеби́му,/ и побеждáющи вся́ку éресь,/ посрамля́ющи лжеслáвныя застýпники.// Тéмже тя чтим и ублажáем.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúры Равноап. Ѻ́льги, глас 4: Я́ко сóлнце, возсiя́ нам/ преслáвная пáмять твоя́, Ѻ́льго Богомýдрая, / мáти князéй Россíйских,/ Хрїстóва мизи́ница, / апóстольским учéнiем воспитáна, / возмоглá еси́ на куми́ры, / пáче же на дiáвола, / си́лою Святáго Дýха просвещáема, / от тьмы неразýмiя всю странý/ и лю́ди к Бóгу привелá еси́,// Егóже моли́ о творя́щих твою́ пáмять.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: В рáзуме духóвном,/ и҆́мже посрами́ла еси́ врагá прельсти́вшаго Éву,/ и сегó орýжiе сломи́ла еси́,/ богосаждéнный рай церкóвный создалá еси́,/ в нéмже дрéво живóтное, Крест, водрузи́ла еси́,/ и трапéзу Бóжiя брáшна имýщи,/ истóчник неисчерпáемый крóве Хрїстóвы,/ егóже пи́вши нетлéнна пребывáеши,// за вся ны моля́щися при́сно.
Яко утвердúся мúлость Егó на нас,// и úстина Госпóдня пребывáет во век.
Стiхúра: Духóвно возвесели́теся, россíйстии концы́,/ пáмять чтýще Ѻ́льги Богомýдрыя:/ моли́тся бо вы́ну ко Хрїстý/ с чудотвóрцами и мýчениками,/ помóщницу имýщи святýю Богорóдицу,/ избáвитися от бед и печáлей,/ вéрою пою́щим ю́// и клáняющимся рáце нетлéннаго ея́ тéла.
Слáва Ѻтцý и Сы́ну и Святóму Дýху.
Стiхúра Вмц. Евфúмiи, глас 6: Ѻдеснýю Спáса предстá дéва,/ и страстонóсица, и мýченица Евфи́мiя,/ оде́яна добродéтельми побéдными,/ и преукрáшена елéем чистоты́ и крóвiю страдáнiя,/ и вопiю́щи к Немý, рáдостно свещý держáщи:/ в воню́ благоухáнiя Твоегó текóх, Хрїстé Бóже,/ я́ко уя́звена Твоéю любóвiю аз,/ не отлучи́ менé, Женишé Небéсный.// Тоя́ моли́твами посли́ нам, Всеси́льне Спáсе, ми́лости Твоя́.
и ны́не и прúсно и во вéки векóв, амúнь.
Догмáтик. Глас 5: В Чермнéм мóри,/ Неискусобрáчныя Невéсты óбраз написáся иногдá:/ тáмо Моисéй, раздели́тель воды́:/ зде же Гаврiи́л, служи́тель чудесé./ Тогдá глубинý шéствова немóкренно Iзрáиль;/ ны́не же Хрїстá роди́ безсéменно Дéва./ Мóре по прошéствiи Iзрáилеве пребы́сть непрохóдно;/ Непорóчная по Рождествé Эмманýилеве пребы́сть Нетлéнна./ Сый, и прéжде Сый,/ явлéйся, я́ко Человéк,// Бóже поми́луй нас.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сына и Святáго Дýха, Бóга. Достóин еси во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Ѻтцý и Сыну и҆ Святóму Дýху, и҆ ны́не и присно и҆ во вéки векóв, ами́нь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Вмц. Евфúмiи, глас 8: Пéсньми да почти́тся му́ченица Хрїстóва:/ подобáет бо вои́стинну ей хвалáм сослóвiе,/ яко исплéтши венéц своему́ верху́./ Сiя́ бо вои́стинну неуклóнна и твердá,/ мнóгих мучи́телей сурóвства низложи́./ Те́мже и зовя́ше, рáдостно стрáждущи:// Ты ми бу́ди, Гóсподи, пóмощь, и не остáви менé.
Рáдуйся, предéле вéры./ Рáдуйся, законоположéнiе святы́х отéц, богоневéсто./ Рáдуйся, твéрдое храни́ло нам вéрным./ Рáдуйся, слáво Цéркве Хрїстóвы./ Рáдуйся, дев стóлпе одушевлéнный,/ рáдуйся, ми́рная мирополóжница слáвная,/ ея́же рáди ве́рным источáеши исцелéнiя,// му́ченице прехвáльная.
Слáва Ѻтцý и Сы́ну и Святóму Дýху.
Глас 1: Днесь ли́цы отéчестiи, всехвáльная,/ собрáвшеся Хрїстá рáди,/ сви́ток тебé принóсят правослáвныя вéры,/ егóже прiи́мши в честны́я твоя́ ру́ки,/ храни́ши до скончáнiя./ Тéмже и человéк ликостоя́нiя сошéдшеся,/ твоé страдáнiе почитáем, вопiю́ще благочéстно:/ рáдуйся, всехвáльная,/ я́же жéнское естествó в му́жеское преложи́вши ополчéнiе./ Рáдуйся, прехвáльная, я́же правослáвную и отцы́ прéданую вéру невреждéну сохрáньши.// Рáдуйся, моля́щаяся о душáх нáших.
И ны́не и прúсно и во вéки векóв, амúнь.
Богорóдичен, глас 1: Се испóлнися Исáiино проречéнiе,/ Дéва бо родилá еси́,/ и по Рождествé я́ко прéжде Рождествá пребыла́ еси́:/ Бог бо бе Рождéйся,/ тéмже и естествá новопресечé./ Но о Богомáти!/ Молéнiя Твои́х рабóв,/ в Твоéм хрáме приноси́мая Тебé не прéзри,/ но я́ко Благоутрóбнаго Твои́ма рукáма нося́щи,// на Твоя́ рабы́ умилосéрдися,/ и моли́ спасти́ся душáм нáшим.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 5): Тебé, Воплощéннаго Спáса Хрїстá,/ и Небéс неразлучи́вшася,/ во глáсех пéнiй величáем,/ я́ко Крест и смерть прiя́л еси́ за род наш,/ я́ко Человеколю́бец Госпóдь,/ испровéргiй áдова вратá,/ триднéвно воскрéсл еси́,// спасáя дýши нáша.
Стiх: Госпóдь воцарúся, в лéпоту облечéся.
Прободéным Твои́м рéбром, Жизнодáвче,/ тóки оставлéнiя всем источи́л еси́,/ жи́зни и спасéнiя:/ плóтiю же смерть воспрiя́л еси́,/ безсмéртiе нам дáруя./ Всели́в же ся во гроб нас свободи́л еси́,/ совоскреси́в с Собóю слáвно, я́ко Бог./ Сегó рáди вопiéм:// Человеколю́бче Гóсподи, слáва Тебé.
Стiх: И҆́бо утвердú вселéнную,/ я́же не подвúжется.
Стрáнно Твоé распя́тiе,/ и éже во ад сошéствiе, Человеколю́бче, есть:/ плени́в бо егó, и дрéвнiя ю́зники совоскреси́в с Собóю слáвно, я́ко Бог,/ рай отвéрз, воспрiя́ти сегó сподóбил еси́./ Тéмже и нам, слáвящим Твоé триднéвное Востáнiе,/ дáруй очищéнiе грехóв:/ рая́ жи́тели сподобля́я,// я́ко Еди́н Благоутрóбен.
Стiх: Дóму Твоемý подобáет святы́ня, Гóсподи,/ в долготý днiй.
Нас рáди плóтiю страсть прiи́мый,/ и триднéвен из мéртвых воскресы́й,/ плотскíя нáша стрáсти исцели́,/ и возстáви от прегрешéнiй лю́тых,// Человеколю́бче, и спаси́ нас.
Слáва Ѻтцý и Сы́ну и Святóму Дýху.
Стiхúра Вмц. Евфúмiи, глас 6: Одéяна добродéтельми,/ и просвещéна пóмыслом,/ ми́ро проливáющи в сердцá вéрных,/ от востóк возсiя́вши я́ко звездá свéтлая,/ и собóр сотвóрши,/ Святáго Дýха пришéствiем Божéственных отéц,/ не престáй о нас моля́щи ко Хрїстý,/ Евфи́мiе всехвáльная,// спасти́ся душáм нáшим.
И ны́не и прúсно и во вéки векóв, амúнь.
Богорóдичен воскрéсный, глас 6 (по гласу «Славы»): Творéц и Избáвитель мой, Пречи́стая,/ Хрїстóс Госпóдь из Твои́х ложéсн прошéд,/ в мя Оболкíйся,/ пéрвыя кля́твы Адáма свободи́./ Тéмже Ти, Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся Áнгельски, рáдуйся, Влады́чице,/ Предстáтельство и Покрóве,// и Спасéнiе душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[в приходской практитке пропускается]/Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню