Неделя вторая Великаго поста. ВСЕНОЩНОЕ БДЕНИЕ. Глас 6. УТРЕНЯ. КАНОН (завершение) ЧАС ПЕРВЫЙ.
20 мáрта 2022 гóда. Недéля вторáя Велúкaго постá. Святúтеля Григóрия Палáмы. Глас 6. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь (продолжéние ýтрени с канóном)
Кондáк Триóди (свт. Григóрия), глас 8: Премýдрости свящéнный и Божéственный оргáн,/ богослóвия свéтлую соглáсно трубý,/ воспевáем тя Григóрие богоглагóльниче,/ но я́ко ум Умý пéрвому предстоя́й,/ к Немý ум наш óтче настáви, да зовéм:// рáдуйся проповéдниче благодáти.
И́кос: Áнгел яви́лся еси́ на земли́, неизречéнная Бóжия человéком возвещáя./ Безплóтных бо глáсы, от человéческих сый, и плóтию употребля́яся, удиви́л еси́ нас,/ и вопи́ти тебé богоглагóливе увещáл еси́ сия́:/ рáдуйся, и́мже тьма сокры́ся; рáдуйся, и́мже свет взы́де./ Рáдуйся, несоздáннаго Божествá áнгеле;/ рáдуйся, создáннаго и бýяго вои́стинну обличи́телю./ Рáдуйся, высотý невосходи́мую, Божéственное естество́ реки́й;/ рáдуйся, глубинý неудóбь ви́димую, дéйство реки́й;/ рáдуйся, я́ко слáву Бóжию дóбре рекл еси́;/ рáдуйся, я́ко мнéния злодéев отрéкл еси́./ Рáдуйся свети́льниче, показáвый Сóлнце;/ рáдуйся чáше, пития́ Божéственнаго подáтельнице./ Рáдуйся, и́мже и́стина просиявáет;/ рáдуйся, и́мже помрачи́ся лжа.// Рáдуйся, проповéдниче благодáти.
ПЕСНЬ 7
Ирмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéние Бóжие мучи́теля увещá вопи́ти:// благословéн еси́, Бóже отéц нáших.
Хор: Слáва, Гóсподи, Святóму Воскресéнию Твоемý.
Чтец: Рыдáющее во стрáсти Твоéй со́лнце, во мрак облечéся,/ и во дни по всей, Влады́ко, земли́ свет помéрче, вопия́:// благословéн еси́ Бо́же отéц нáших.
Хор: Слáва, Гóсподи, Святóму Воскресéнию Твоемý.
Чтец: Облеко́шася Христé схождéнием Твои́м во свет преиспо́дняя,/ прáотец же весéлия испо́лнь, яви́ся ликовству́я, взыгрáся, вопия́:// благословéн еси́, Бо́же отéц нáших.
Хор: Пресвятáя Богорóдице, спасú нас.
Богорóдичен: Тобо́ю, Мáти Дéво,/ свет возсия́ всей вселéнней свéтлый:/ Зижди́теля бо Ты всех родилá еси́ Бо́га,/ Его́же проси́, Всечи́стая,// нам низпослáти вéрным вéлию ми́лость.
Глас 8
Хор: Помúлуй мя, Бóже, помúлуй мя.
Чтец: Дерзновéния не и́мам,/ éже нарещи́ся сын Твой, Óтче Человеколю́бче,/ я́ко еди́наго от нае́мник Твои́х бы́ти молю́ся,/ не гнушáйся мене́ зову́ща:// оте́ц нáших Бо́же благослове́н еси́.
Хор: Помúлуй мя, Бóже, помúлуй мя.
Чтец: Оскверни́вше пе́рвым житие́м жизнь,/ и погуби́вше благоро́дие пе́рвое,/ притеце́м Еди́ному Отцý и Бо́гу нáшему,// покая́нием те́плым прия́ти спасе́ние.
Хор: Помúлуй мя, Бóже, помúлуй мя.
Чтец: Же́сток граждани́н, ему́же рабо́тати окая́нный осуди́хся:/ глад же, его́же подъя́х, свиния́м угождáя, кре́пок и нестерпи́мь,// но обрáщься прошý, Спáсе, поми́луй мя.
Хор: Пресвятáя Богорóдице, спасú нас.
Чтец: Умерщвле́нное естество́ оживи́ла еси́,/ еди́на Живо́т ро́ждшая Де́во Богоро́дице:/ те́мже Тя спасе́ние ве́рнии све́мы,// оте́ц нáших Бо́га пло́тию ро́ждшую.
Глас 4
Хор: Святúтелю óтче Григóрие, молú Бóга о нас.
Чтец: Словесе́м бесе́дующии, и списáнием твои́м Григо́рие,/ рáзуму поучáются Бо́жию,/ и по́лны явля́ются премýдрости Бо́жия духо́вныя,// и несоздáнную благодáть, и де́йство Бо́жие богосло́вствуют. (двáжды)
Хор: Святúтелю óтче Григóрие, молú Бóга о нас.
Чтец: Меч и стре́лы злосла́вных сокруши́л еси́,/ и го́рдость Варлаа́мову, и вся́кую си́лу ерети́ческую,/ я́ко тка́ние паучи́ны расточи́л еси́,// а́ки ка́мень превели́кий иера́рше. (двáжды)
Слáва Отцý и Сыну и Святóму Дýху.
Тропáрь: Запечатле́ся твои́ми словесы́ и догма́ты ве́ра благочести́вых,/ и де́рзость е́реси ста Григо́рие,// и низложе́ние правосла́вия преста́, и кре́пость злосла́вных.
И ныне и прúсно и во вéки векóв, амúнь.
Богорóдичен: Струи́ Тя исто́чника, усо́хшии страсте́й боле́зньми, ве́дуще вои́стинну,/ почерпа́ем спасе́ние, и Боже́ственныя струи́, и взыва́ем:// благослове́н Всечи́стая, плод Твоего́ чре́ва.
Катавáсия (глас 4): Не послужи́ша тва́ри Богомýдрии,/ па́че Созда́вшаго,/ но, о́гненное преще́ние мýжески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
ПЕСНЬ 8
Ирмóс: Из плáмене преподóбным рóсу источи́л еси́/ и прáведнаго жéртву водóю попали́л еси́:/ вся бо твори́ши, Христé, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнию Твоемý.
Чтец: Иуде́йския дре́вле пророкоуби́йцы лю́ди,/ богоуби́йцы за́висть ны́не соде́ла,/ Тебе́ на крест возне́сшия, Сло́ве Бо́жий:// Его́же превозно́сим во вся ве́ки.
Хор: Слáва, Гóсподи, Святóму Воскресéнию Твоемý.
Чтец: Небе́снаго крýга не оста́вил еси́,/ и во ад соше́д, всего́ совоздви́гл еси́/ лежа́щаго во гно́ищи, Христе́, челове́ка,// Тя превознося́ща во вся ве́ки.
Хор: Пресвятáя Богорóдице, спасú нас.
Богорóдичен: От Све́та Светода́вца Сло́ва зачала́ еси́,/ и ро́ждши неизрече́нно Сего́, просла́вилася еси́:/ Дух бо в Тя, Отрокови́це, Бо́жий всели́ся.// Те́мже Тя пое́м во вся ве́ки.
Глас 8
Хор: Помúлуй мя, Бóже, помúлуй мя.
Чтец: Безме́рнаго Влады́ко, и мно́гаго милосе́рдия Твоего́,/ ве́мы бога́тство в Тя ве́ровавшии./ Те́мже Ти припа́даем с блýдным вси те́пле:/ приими́ согреши́вшия, и к Тебе́ прибе́гшия:/ несть бо, несть грех Ще́дре,// Твое́ человеколю́бие победи́ти моги́й.
Хор: Помúлуй мя, Бóже, помúлуй мя.
Чтец: Милосе́рдия ра́ди Влады́ко Себе́ смири́в,/ па́дшим Твои́м сыно́м прибли́жился еси́:/ Сам бо Человеколю́бче срел еси́ па́дших,/ и облобыза́еши, и спасе́ние да́руеши:/ а́ще кто и до́лу па́днет,// ми́лостив сый не гне́ваешися, я́ко Человеколю́бец.
Хор: Помúлуй мя, Бóже, помúлуй мя.
Чтец: Стра́шнейший суд мене́ усря́щет о Влады́ко,/ я́ко Тя человеколю́бца и незло́бива зря,/ не притека́ю к Тебе́, блýднаго зовы́й гла́сом,/ но в ле́ности житие́ препровожда́ю:/ Ты ýбо ми́лостив бýди ми,// и осужде́ния о́наго исхити́ Ще́дре, покая́ния ра́ди.
Хор: Пресвятáя Богорóдице, спасú нас.
Чтец: От мно́гих мя Всенепоро́чная напа́стей преклоне́на,/ и печа́лей бýрею потопля́ема/ приста́нище спасе́ния, Твое́ю моли́твою Пречи́стая изба́ви,/ и от всех исхити́вши спаси́:/ да Тя досто́йно я́ко те́плую предста́тельницу,// сла́влю Богоро́дицу во вся ве́ки.
Глас 4
Хор: Святúтелю óтче Григóрие, молú Бóга о нас.
Чтец: Предстои́ши ны́не престо́лу Всеще́драго,/ я́ко богосло́вов подо́бный,/ и сим единонра́вный всемýдре Григо́рие,/ Фессалони́тский председа́телю, иера́рхов добро́то,/ све́тло украси́вся сла́вою священнонача́лия,// Бо́гу и ны́не служа́. (двáжды)
Хор: Святúтелю óтче Григóрие, молú Бóга о нас.
Чтец: Ве́дый чи́стое твоего́ помышле́ния Бог,/ и пре́жде чре́ва, и пре́жде зача́тия,/ ве́рному возглаго́ла боже́ственному царю́ я́ве,/ Це́ркве необори́маго бы́ти тя побо́рника:/ те́мже пра́вильным изве́ством,// ми́ром запечатле́н еси́ священнонача́льства. (двáжды)
Благословúм Отцá, и Сы́на, и Святáго Дýха, Гóспода.
Тропáрь: Побежда́ется я́ве и бе́дствует/ собра́ние Поликинди́на дла́нию твое́ю,/ и мýдрыми твои́ми глаго́лы,/ пресла́вне Григо́рие, Фессалони́тский председа́телю:/ и я́ко исчеза́ет дым, исчезе́ гнило́е безýмие,// твои́м громогла́сным и Богосло́вным язы́ком.
И ныне и прúсно и во вéки векóв, амúнь.
Богорóдичен: Сло́во Бо́жие в Тебе́ Де́во,/ челове́ческое естество́ погружа́емое страстьми́,/ возобрази́ кра́йнею благосты́нею:/ и все обнови́ и посвяти́:/ те́мже Тобо́ю спасе́ни,// Тя славосло́вим во вся веки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсия (глас 4): Óтроки благочести́выя в пе́щи/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувúм/ и Слáвнейшую без сравнéния Серафúм,/ без истлéния Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéние рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чие Си́льный,/ и свя́то И́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слию сéрдца их.
Низложи́ си́льныя со престóл, и вознесé смирéнныя;/ áлчущия испóлни благ, и богатя́щияся отпусти́ тщи.
Восприя́т Изрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Ирмóс: Бóга/ челове́ком невозмóжно ви́дети,/ на Негóже не сме́ют чи́ни Áнгельстии взирáти;/ Тобóю бо, Всечи́стая, яви́ся челове́ком/ Слóво воплоще́нно,/ Его́же величáюще,// с Небе́сными вóи Тя ублажáем.
Хор: Слáва, Гóсподи, Святóму Воскресéнию Твоемý.
Чтец: Страсте́й неприча́стен Ты пребы́л еси́, Сло́ве Бо́жий,/ пло́тию приобщи́вся страсте́м:/ но реши́ши от страсте́й челове́ка,/ страсте́м быв страсть, Спа́се наш:// еди́н бо еси́ безстра́стен, и всеси́лен.
Хор: Слáва, Гóсподи, Святóму Воскресéнию Твоемý.
Чтец: Тлю сме́ртную прие́м, тле́ния соблю́л еси́ те́ло Твое́ невку́сно,/ Твоя́ же животворя́щая и боже́ственная, Влады́ко, душа́, во а́де не оста́влена бысть:// но я́коже от сна воскре́с, нас совоздви́гл еси́.
Хор: Пресвятáя Богорóдице, спасú нас.
Богорóдичен: Бо́га Отца́, Сы́на собезначальна,/ вси человецы устнами у́бо чистыми сла́вим,/ неизреченную же и преславную Ду́ха Всесвятаго силу чтим:// едина бо еси́ всесильная Троица неразлучная.
Глас 8
Хор: Помúлуй мя, Бóже, помúлуй мя.
Чтец: Ра́дости и весе́лия ны́не,/ мене́ ра́ди закла́вшемуся Твоемý тельцý,/ испо́лни сего́ от Тебе́/ ча́ющую мою́ дýшу Бо́же:/ заблужде́на приими́ мя,/ и умерщвле́на к жи́зни возведи́,/ и в Боже́ственную оде́жду спасе́ния,// в нетле́ние мя облецы́.
Хор: Помúлуй мя, Бóже, помúлуй мя.
Чтец: Дýши удале́ныя от Бо́га,/ и Боже́ственных дарова́ний лише́ныя,/ прииди́те те́пле,/ и блýднаго обраще́ние восприи́мше зове́м:/ Óтче Благи́й, И́же на Небесе́х,/ согреши́хом Ти вси, очи́сти и спаси́// прибега́ющия к ми́лости Твое́й.
Хор: Помúлуй мя, Бóже, помúлуй мя.
Чтец: Я́ко имы́й милосе́рдия мно́жество мно́гое,/ не гнуша́йся мене́ Го́споди Го́споди,/ во мно́гих сласте́х бога́тство ижди́вша,/ и прибега́юща ны́не, и зовýща блýднаго гла́сом:/ согреши́х Ти, спаси́// прибега́ющаго к ми́лости Твое́й.
Хор: Пресвятáя Богорóдице, спасú нас.
Чтец: Спасе́ния приста́нище и наставле́ние,/ и предста́тельницу Тя и́мам раб Твой,/ лю́тых всех препя́тий,/ я́ко блага́я к Бо́гу мольба́ми Твои́ми Влады́чице да изба́влюся,/ я́ко на Тя всю мою́ наде́жду возложи́х любо́вию,// да ве́рою велича́ю Тя.
Глас 4
Хор: Святúтелю óтче Григóрие, молú Бóга о нас.
Чтец: Зерца́ло Бо́жие был еси Григо́рие:/ е́же бо по о́бразу нескве́рное соблю́л еси́,/ ум же влады́ку на стра́сти плотски́я му́жески поста́вив,/ е́же по подо́бию восприя́л еси́.// Отону́дуже дом был еси́ Святы́я Тро́ицы светле́йший. (двáжды)
Хор: Святúтелю óтче Григóрие, молú Бóга о нас.
Чтец: Царь благочести́вый крила́таго тя воздухохо́дна показýет, семý спобо́рствующа,/ я́ко всего́ испо́лнена Боже́ственнаго Дýха,/ на суемýдреннаго неи́стовствующаго Варлаа́ма,/ глаго́лющаго на высотý непра́ведная Бо́гу,// его́же пра́ведно победи́л еси́. (двáжды)
Слáва Отцý и Сыну и Святóму Дýху.
Тропáрь: Весь быв премýдрости лýчшия испо́лнен пресла́вне,/ свет ми́рови просвети́л еси́,/ правосла́вия источи́в догма́ты:/ дрýжеством бо изря́днаго любомýдрия премýдре,/ Боже́ственный страх во чре́ве зача́л еси́,// и словеса́ Дýха породи́л еси́.
И ныне и прúсно и во вéки векóв, амúнь.
Богорóдичен: Песнь Тебе́ ве́рнии согла́сно прино́сим благодаре́ния:/ Ты бо дре́внюю разруши́ла еси́ на́шу кля́тву Богороди́тельнице,/ и благослове́ние вси Боже́ственное прие́млем,/ спасе́ние, просвеще́ние, и ми́лость Тобо́ю,// и ра́дость ве́чную.
Катавáсия (глас 4): Всяк земноро́дный/ да взыгра́ется, Дýхом просвеща́емь,/ да торжествýет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,// Богоро́дице, Чи́стая Присноде́во.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрий воскрéсный шестый: Показýя, я́ко челове́к еси́ Спа́се, по существý,/ посреде́ став воскре́с от гро́ба,/ и бра́шна сопричасти́лся еси́,/ учи́л еси́ креще́нию покая́ния./ А́бие же к Небе́сному возне́слся еси́ Отцý,/ и ученико́м Уте́шителя посла́ти обеща́л еси́, Пребоже́ственный Богочелове́че.// Сла́ва Твоемý воста́нию.
Слáва Отцу и Сыну и Святóму Духу.
Светúлен Триóди: Ра́дуйся отце́в похвало́, богосло́вов уста́,/ безмо́лвия селе́ние, премýдрости до́ме,/ учи́телей кра́йность, пучи́но сло́ва./ Ра́дуйся дея́ния орга́не, виде́ния кра́йность,/ и исцели́телю недýгов челове́ческих.// Ра́дуйся Дýха хра́ме, и уме́рый и живы́й о́тче.
И ныне и присно и во вéки векóв. Аминь.
Богорóдичен Триóди: Влады́чице, всех Влады́чице, и всех вы́шшая,/ всех же превосходя́щая го́рних во́инств,/ простри́ руку́ держа́вну, и сохрани́ мир,/ свяще́нники благослови́ Тебе́ священноде́йствующия,/ мона́хи же прости́, моля́щия Тебе́./ Лю́ди вся умири́, и сýщия в пала́те:/ во́инство же укрепи́ во вре́мя бра́ни:/ сей град соблюди́, свята́я Богоро́дице./ И ны́не нас сподо́би ви́дети Небе́сное Ца́рство, и ра́йскую дверь,/ егда́ ся́дет Судия́ суди́ти вселе́нней,// во второ́м и стра́шном суди́лищи, Влады́чице а́нгелов.
ХВАЛИТНЫ
Хор, глас 6: Вся́кое дыхáние да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике ропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и́дет. Хвали́те Гóспода от земли́, зми́еве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрие и вси скóти, гáди и пти́цы пернáты. Цáрие зéмстии и вси лю́дие, кня́зи и вси судии́ зéмстии, ю́ноши и дéвы, стáрцы с ю́нотами да восхвáлят и́мя Госпóдне, я́ко вознесéся и́мя Тогó Еди́наго, исповéдание Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Изрáилевым, лю́дем, приближáющымся Емý.
[В приходской практике ропускается до стихир]Воспóйте Гóсподеви песнь нóву, хвалéние Егó в цéркви преподóбных. Да возвеселится Изрáиль о сотвóршем Егó, и сынове Сиóни возрáдуются о Царé своéм. Да восхвáлят имя Егó в лице, в тимпáне и псалтири да поют Емý. Яко благоволит Госпóдь в людех Своих, и вознесéт крóткия во спасéние. Восхвáлятся преподóбнии во слáве и возрáдуются на лóжах своих. Возношéния Бóжия в гортáни их, и мечи обоюду остри в рукáх их: сотворити отмщéние во языцех, обличéния в людех, связáти цари их пýты, и слáвныя их ручными окóвы желéзными,
На 8.Чтец, стих: Сотворúти в них суд напúсан:/ слáва сия бýдет всем преподóбным Егó.
Стихúры воскрéсные, глас 6: Крест Твой, Го́споди,/ жизнь и воскресе́ние лю́дем Твои́м есть,/ и наде́ющеся нань,// Тебе́ воскре́сшаго Бо́га на́шего пое́м: поми́луй нас.
Хвалúте Бóга во святых Егó,/ хвалúте Егó в утвержéнии сúлы Егó.
Стихúра: Погребе́ние Твое́, Влады́ко,/ рай отве́рзе ро́ду челове́ческому:/ и от истле́ния изба́вльшеся,// Тебе́ воскре́сшаго Бо́га на́шего пое́м: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествия Егó.
Стихúра: Со Отце́м и Ду́хом Христа́ воспои́м,/ воскре́сшаго из ме́ртвых,/ и к Нему́ вопии́м:// Ты Живо́т еси́ наш и Воскресе́ние, поми́луй нас.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Тридне́вен воскре́сл еси́, Христе, от гро́ба/ я́коже пи́сано есть,/ совоздви́гнувый пра́отца на́шего./ Те́мже Тя и сла́вит род челове́ческий,// и воспева́ет Твое́ воскресе́ние.
На 4. Хвалúте Егó в тимпáне и лúце, хвалúте Егó во стрýнах и оргáне.
Стихúра: Го́споди, ве́лие и стра́шно есть/ Твоего́ воскресе́ния та́инство:/ та́ко бо произше́л еси́ от гро́ба,/ я́ко жени́х от черто́га,/ сме́ртию смерть разруши́вый,/ да Ада́ма свободи́ши./ Те́мже на Небесе́х А́нгели ликовству́ют,/ и на земли́ челове́цы сла́вят,// е́же на нас бы́вшее благоутро́бие Твое́, Человеколю́бче.
Хвалúте Егó в кимвáлех доброглáсных, хвалúте Егó в кимвáлех восклицáния. Всякое дыхáние да хвáлит Гóспода.
Стихúры Триóди, глас 1: Блаже́нную в ми́ре жизнь соверши́в,/ и ны́не блаже́нных сра́дуешися собо́ром,/ и на земли́ кро́тких, я́ко кро́ткий живе́ши иера́рше Григо́рие:/ благода́тию же чуде́с богате́еши от Бо́га,// ю́же подае́ши чту́щим тя.
Уста́ пра́веднаго поуча́тся прему́дрости,/ и язы́к его́ возглаго́лет суд.
Стихúра: Правосла́вия догма́ты насади́л еси́,/ злосла́вия блаже́нне отсека́я те́рние,/ и ве́ры се́мя умножа́я до́бре,/ одожде́нием слове́с твои́х,/ стокра́тный клас, я́ко де́ятельный земледе́латель// Бо́гу прине́сл еси́.
Услы́шите сия́ вси язы́цы,/ внуши́те вси живу́щии по вселе́нней.
Стихúра: Непоро́чнаго твоего́ жития́ блаже́нне све́тлости/ удиви́шася а́нгел и челове́к собо́ри,/ и́бо произволе́нием тве́рдый страда́лец и по́стник яви́лся еси́,/ и иера́рх, и досто́йный служи́тель Бо́жий,// и друг и́скренний.
Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.
Стихúра, глас 6: Во тьме согреше́ний ходя́щим,/ свет возсия́л еси́ Христе́ вре́менем воздержа́ния,/ и благоуха́нный день стра́сти Твоея́/ покажи́ нам, да вопие́м Тебе́:// воста́ни Бо́же, поми́луй нас.
Слáва Отцý и Сыну и Святóму Дýху.
Глас 6: Во тьме согреше́ний ходя́щим,/ свет возсия́л еси́ Христе́ вре́менем воздержа́ния,/ и благоуха́нный день стра́сти Твоея́/ покажи́ нам, да вопие́м Тебе́:// воста́ни Бо́же, поми́луй нас.
И ныне и прúсно и во вéки векóв. Амúнь.
Глас 2: Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вый та́ко, сла́ва Тебе́.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на земли́ мир, в человéцех благоволéние. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кия рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Иисýсе Христé, и Святы́й Дýше. Гóсподи Бóже, Áгнче Бóжий, Сы́не Отéчь, взéмляй грех мира, помилуй нас. Взéмляй грехи мира, приими́ молитву нáшу. Седя́й одеснýю Отцá, помилуй нас. Яко Ты еси Един Свят; Ты еси Един Госпóдь, Иисýс Христóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн еси, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн еси́, Гóсподи, научи́ мя оправдáнием Твои́м.
Благословéн еси́, Влады́ко, вразуми́ мя оправдáнием Твои́м.
Благословéн еси́, Святы́й, просвети́ мя оправдáнии Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцели́ дýшу мою́, я́ко согреши́х Тебé. Гóсподи, к Тебé прибегóх, научи мя твори́ти вóлю Твою́, яко Ты еси Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкий, Святы́й Безсмéртный, помилуй нас. (3 раза)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Тропáрь воскрéсный, глас 2: Воскре́с из гро́ба и у́зы растерза́л еси́ а́да,/ разруши́л еси́ осужде́ние сме́рти, Го́споди,/ вся от сете́й врага́ изба́вивый;/ яви́вый же Себе́ апо́столом Твои́м,/ посла́л еси́ я на про́поведь,/ и те́ми мир Твой по́дал еси́ вселе́нней,// Еди́не Многоми́лостиве.
Гóсподи помилуй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи помилуй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утверди́, Бóже, святýю правослáвную вéру, правослáвных христиáн во век вéка.
Честнéйшую Херуви́м и слáвнейшую без сравнéния Серафи́м, без истлéния Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благослови́.
ОТПУСТ
Христóс, и́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцу и Сыну и Святóму Духу, и ныне и присно и во вéки векóв. Аминь.
Стихúра евáнгельская, глас 6: И́стинный мир Ты, Христе́, к челове́ком Бо́жий,/ мир Твой дая́, по воста́нии ученико́м,/ пристра́шны показа́л еси́ я́,/ мня́щия дух ви́дети:/ но ути́шил еси́ мяте́ж души́ их,/ показа́вый ру́це и но́зе Твои́./ Оба́че не ве́рующим еще́,/ бра́шен причаще́нием, и уче́ний воспомина́нием,/ отве́рзл еси́ их ум, е́же разуме́ти Писа́ния:/ и́мже и О́тческое обетова́ние обеща́в, и благослови́в я́,/ отступи́л еси́ на не́бо./ Те́мже с ни́ми покланя́емся Тебе́,/ Го́споди, сла́ва Тебе́.
ПЕРВЫЙ ЧАС
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 5
Глагóлы моя внуши, Гóсподи, разумéй звáние моé. Вонми глáсу молéния моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотяй беззакóния, Ты еси: не приселится к Тебé лукáвнуяй, нижé пребýдут беззакóнницы пред очима Твоима: возненавидел еси вся дéлающыя беззакóние. Погубиши вся глагóлющыя лжу: мýжа кровéй и льстива гнушáется Госпóдь. Аз же мнóжеством милости Твоея, вниду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их истины, сéрдце их сýетно, гроб отвéрст гортáнь их: язы́ки своими льщáху. Суди им, Бóже, да отпадýт от мы́слей своих, по мнóжеству нечéстия их изрини я, яко преогорчиша Тя, Гóсподи. И да возвеселятся вси уповáющии на Тя, во век возрáдуются, и вселишися в них, и похвáлятся о Тебé лю́бящии имя Твоé. Яко Ты благословиши прáведника, Гóсподи: яко орýжием благоволéния венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися земли и вселéнней, и от вéка и до вéка Ты еси. Не отврати человéка во смирéние, и рекл еси: обратитеся, сы́нове человéчестии. Яко ты́сяща лет пред очима Твоима, Гóсподи, яко день вчерáшний, иже мимоиде, и стрáжа нощнáя. Уничижéния их лéта бýдут. Утро яко травá мимоидет, ýтро процветéт и прéйдет: на вéчер отпадéт ожестéет и изсхнет. Яко исчéзохом гнéвом Твоим, и яростию Твоéю смутихомся. Положил еси беззакóния нáша пред Тобóю: век наш в просвещéние лицá Твоегó. Яко вси дние нáши оскудéша, и гнéвом Твоим исчезóхом, лéта нáша яко паучина поучáхуся. Дние лет нáших, в нихже сéдмьдесят лет, áще же в силах, óсмьдесят лет, и мнóжае их труд и болéзнь: яко прииде крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчести? Десницу Твою́ тáко скажи ми, и оковáнныя сéрдцем в мýдрости. Обратися, Гóсподи, докóле? И умолéн бýди на рабы́ Твоя. Испóлнихомся заýтра милости Твоея́, Гóсподи, и возрáдовахомся, и возвеселихомся, во вся дни нáша возвеселихомся, за дни в няже смирил ны еси, лéта в няже видехом злáя. И призри на рабы́ Твоя, и на делá Твоя, и настáви сыны их. И буди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Милость и суд воспою́ Тебé, Гóсподи. Пою́ и разумéю в пути непорóчне, когдá приидеши ко мне? Прехождáх в незлóбии сéрдца моегó посредé дóму моегó. Не предлагáх пред очима моима вещь законопрестýпную: творя́щыя преступлéние возненавидех. Не прильпé мне сéрдце строптиво, уклоня́ющагося от менé лукáваго не познáх. Оклеветáющаго тай искренняго своегó, сегó изгоня́х: гóрдым óком, и несы́тым сéрдцем, с сим не ядя́х. Óчи мои на вéрныя земли, посаждáти я́ со мнóю: ходя́й по пути непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очима моима. Во ýтрия избивáх вся грéшныя земли, еже потребити от грáда Госпóдня вся дéлающыя беззакóние.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 6: Áнгельския Си́лы на грóбе Твоéм, и стрегýщии омертвéша; и стоя́ше Мари́я во грóбе, и́щущи Пречи́стаго Тéла Твоегó. Плени́л еси́ ад, не искуси́вся от негó; срéтил еси́ Дéву, дáруяй живóт. Воскресы́й из мéртвых, Гóсподи, слáва Тебé.
Слáва Отцý и Сыну и Святóму Дýху.
Тропáрь Триóди (Святúтеля Григóрия), глас 8: Правослáвия свети́льниче, Цéркве утверждéние и учи́телю, монáхов добрóто, богослóвов побóрниче непребори́мый, Григóрие чудотвóрче, Фессалони́тская похвалó, проповéдниче благодáти, моли́ся вы́ну спасти́ся душáм нáшим.
И ныне и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, яко возсия́ла еси Сóлнце Прáвды. Рай, яко прозяблá еси цвет нетлéния. Дéву, яко пребылá еси нетлéнна. Чистую Мáтерь, яко имéла еси на святы́х Твоих объятиях Сына, всех Бóга. Тогó моли спастися душáм нáшим.
Стопы́ моя напрáви по словеси Твоему и да не обладáет мнóю вся́кое беззакóние. Избáви мя от клеветы́ человéческия, и сохраню́ зáповеди Твоя. Лицé Твоé просвети на рабá Твоегó и научи мя оправдáнием Твоим.
Да испóлнятся устá моя хвалéния Твоегó, Гóсподи, яко да воспою́ слáву Твою́, весь день великолéпие Твоé.
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДАК
Кондáк Триóди, глас 4: Ны́не врéмя дéлательное яви́ся, при двéрех суд, востáнем ýбо постя́щеся, принесéм слéзы умилéния, ми́лостынями, зовýще: согреши́хом пáче пескá морскáго. Но ослáби Содéтелю всех, я́ко да прии́мем нетлéнныя венцы́.
Гóсподи, помилуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Христé, Свéте Истинный, просвещáяй и освящáяй всякаго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы нáша к дéланию зáповедей Твоих, молитвами Пречистыя Твоея́ Мáтере, и всех Твоих святых, аминь.
КОНДАК, ГЛАС 8
Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
Гóсподи, Иисýсе Христé, Сыне Бóжий, молитвами Пречи́стыя Твоея́ Мáтере, святы́х слáвных и всехвáльных Апóстол, святых и прáведных богоотéц Иоаки́ма и Анны, и всех святых, поми́луй и спаси́ нас, яко Благ и Человеколю́бец. Аминь.
С утрá чти часы и обéдницу