Неделя вторая Великаго поста. ВСЕНОЩНОЕ БДЕНИЕ. Глас 6. УТРЕНЯ (продолжение) ЕВАНГЕЛИЕ. КАНОН
20 мáрта 2022 гóда. Недéля вторáя Велúкaго постá. Святúтеля Григóрия Палáмы. Глас 6. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Начало зри здесь ( великая вечерня) и здесь ( утреня)
КАФИЗМА ТРЕТЬЯ
(3-я cтатия или 3-я слава)
[Псалом 21]Бóже, Бóже мой, вонми ми, вскýю остáвил мя еси? Далéче от спасéния моегó словесá грехопадéний моих. Бóже мой, воззову во дни, и не услышиши, и в нощи, и не в безýмие мне. Ты же во Святéм живéши, хвалó Изрáилева. На Тя уповáша отцы нáши, уповáша и избáвил еси я. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéние человéков и уничижéние людéй. Вси видящии мя поругáша ми ся, глагóлаша устнáми, покивáша главóю: уповá на Гóспода, да избáвит eгó, да спасéт eгó, яко хóщет eгó. Яко Ты еси истóргий мя из чрéва, уповáние моé от сосцý мáтере моея. К Тебé привéржен есмь от ложéсн, от чрéва мáтере моея Бог мой еси Ты. Да не отстýпиши от менé, яко скорбь близ, яко несть помогáяй ми. Обыдóша мя тельцы мнóзи, юнцы тýчнии одержáша мя. Отверзóша на мя устá своя, яко лев восхищáяй и рыкáяй. Яко водá излияхся, и разсыпашася вся кóсти моя, бысть сéрдце моé яко воск, тáяй посредé чрéва моегó. Изсше яко скудéль крéпость моя, и язык мой прильпé гортáни моему, и в персть смéрти свел мя еси. Яко обыдóша мя пси мнóзи, сонм лукáвых одержáша мя, ископáша рýце мои и нóзе мои. Исчетóша вся кóсти моя, тии же смотриша и презрéша мя. Разделиша ризы моя себé, и о одéжди моéй метáша жрéбий. Ты же, Гóсподи, не удали пóмощь Твою от менé, на заступлéние моé вонми. Избáви от оружия дýшу мою, и из руки пéсии единорóдную мою. Спаси мя от уст львóвых и от рог единорóжь смирéние моé. Повéм имя Твоé брáтии моéй, посредé цéркве воспою Тя. Боящиися Гóспода, восхвалите Егó, все сéмя Иáковле, прослáвите Егó, да убоится же от Негó все сéмя Изрáилево. Яко не уничижи, нижé негодовá молитвы нищаго, нижé отврати лицé Своé от менé, и егдá воззвáх к Немý, услыша мя. От Тебé похвалá моя, в цéркви велицей исповéмся Тебé, молитвы моя воздáм пред боящимися Егó. Ядят убóзии и насытятся, и восхвáлят Гóспода взыскáющии Егó, живá бýдут сердцá их в век вéка. Помянýтся и обратятся ко Гóсподу вси концы земли, и поклóнятся пред Ним вся отéчествия язы́к. Яко Госпóдне есть цáрствие, и Той обладáет языки. Ядóша и поклонишася вси тýчнии земли, пред Ним припадýт вси низходящии в зéмлю, и душá моя Томý живéт. И сéмя моé порабóтает Емý, возвестит Гóсподеви род грядýщий. И возвестят прáвду Егó людем рóждшымся, яже сотвори Госпóдь.
[Псалом 22]Госпóдь пасéт мя, и ничтóже мя лишит. На мéсте злáчне, тáмо всели мя, на водé покóйне воспитá мя. Дýшу мою обрати, настáви мя на стези прáвды, имене рáди Своегó. Аще бо и пойдý посредé сéни смéртныя, не убоюся зла, яко Ты со мнóю еси, жезл Твой и пáлица Твоя, та мя утéшиста. Уготóвал еси предо мнóю трапéзу сопротив стужáющым мне, умáстил еси елéом главý мою, и чáша Твоя упоявáющи мя, яко держáвна. И милость Твоя поженéт мя вся дни животá моегó, и éже вселити ми ся в дом Госпóдень, в долготý дний.
[Псалом 23]Госпóдня земля, и исполнéние ея, вселéнная и вси живýщии на ней. Той на морях основáл ю есть, и на рекáх уготóвал ю есть. Кто взы́дет на гóру Госпóдню? или кто стáнет на мéсте святéм Егó? Неповинен рукáма и чист сéрдцем, иже не прият всýе дýшу свою, и не клятся лéстию искреннему своемý. Сей приимет благословéние от Гóспода, и милостыню от Бóга, Спáса своегó. Сей род ищущих Гóспода, ищущих лицé Бóга Иáковля. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь крéпок и силен, Госпóдь силен в брáни. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (12 раз)
Хор (по кафúсме седáльны воскрéсные, глас 6): Живóт во грóбе возлежáше, и печáть на кáмени надлежáше:/ я́ко царя́ спя́ща вóини стрежáху Христá,// и враги́ Своя́ неви́димо порази́вый, воскрéсе Госпóдь.
Стих: Исповéмся Тебé Гóсподи всем сéрдцем моúм,/ повéм вся чудесá Твоя́.
Преднаписýет Иóна гроб твой,/ и сказýет Симеóн востáние Божéственное, безсмéртне Гóсподи:/ сошéл бо еси́ я́ко мертв во гроб, разруши́вый áдова вратá./ Воскрéсл же еси́ кромé тлéния, я́ко Влады́ка,/ во Спасéние мира, Христé Бóже наш,// просвети́вый сýщия во тьме.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Богорóдичен: Богорóдице Дéво, моли́ Сы́на Твоегó,/ вóлею пригвождéннаго на Крестé,/ и воскрéсшаго из мéртвых Христá Бóга нáшего,// спасти́ся душáм нáшим.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýиа (трúжды)
Благословéн Госпóдь от Сиóна, живы́й во Иерусали́ме.
Аллилýиа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýиа (трúжды)
Исповéдайтеся Бóгу Небéсному, я́ко в век ми́лость Егó.
Аллилýиа (трúжды)
ТРОПАРИ ВОСКРЕСНЫЕ, глас 5
Благословéн есú, Гóсподи,/ научú мя оправдáнием Твоúм.
Áнгельский собóр удиви́ся,/ зря́ Тебé в мéртвых вмени́вшася,/ смéртную же, Спáсе, крéпость разори́ша,/ и с Собóю Адáма воздви́гша,// и от áда вся свобóждша.
Благословéн есú, Гóсподи,/ научú мя оправдáнием Твоúм.
Почтó ми́ра с ми́лостивными слезáми,/ о учени́цы растворя́ете?/ Блистáяйся во грóбе Áнгел/ миронóсицам вещáше:/ ви́дите вы грóб и уразумéйте,// Спас бо воскрéсе от грóба.
Благословéн есú, Гóсподи,/ научú мя оправдáнием Твоúм.
Зелó рáно миронóсицы течáху/ ко грóбу Твоемý рыдáющия,/ но предстá к ним Áнгел, и речé:/ рыдáния врéмя престá, не плáчите,// воскресéние же апóстолом рцы́те.
Благословéн есú, Гóсподи,/ научú мя оправдáнием Твоúм.
Миронóсицы жены́, с ми́ры пришéдша/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми Живáго помышля́ете?// Я́ко Бог бо воскрéсе от грóба.
Чтец: Слáва Отцý и Сыну и Святóму Дýху.
Поклони́мся Отцý,/ и Егó Сы́нови, и Святóму Дýху,/ Святéй Трóице во еди́ном существé, с Серафи́мы зовýще:/ Свят, Свят, Свят еси́, Гóсподи.
И ныне и прúсно и во вéки векóв. Амúнь.
Жизнодáвца рóждши,/ грехá, Дéво, Адáма избáвила еси́,/ рáдость же Éве в печáли мéсто подалá еси́;/ пáдшия же от жи́зни/ к сей напрáви,// из Тебé воплоти́выйся Бог и Человéк.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (12 раз)
ИПАКОИ
Глас 6: Вóльною и животворя́щею Твоéю смéртию, Христé,/ вратá áдова сокруши́в, я́ко Бог,/ отвéрзл еси́ нам дрéвний рай, и воскрéс из мéртвых,// избáвил еси́ от тлéния живóт наш.
СТЕПЕННА, ГЛАС 5
1 АНТИФОН
Хор: На нéбо óчи мои́ возвожý, к Тебé, Слóве:// ущéдри мя, да живý Тебé. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Отцу и Сыну и Святóму Духу.
Святóму Дýху, вся́кая всеспаси́тельная винá,/ áще кóему сей по достоя́нию дхнет,// скóро взéмлет от земны́х: восперя́ет, возращáет, устроя́ет горé.
И ныне и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нию дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас проти́ву возмóгл бы врáжиим брáнем одолéти:// побеждáющии бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и́мам от врагá избы́ти, грехолюби́в сый! (Двáжды)
Слáва Отцý и Сыну и Святóму Дýху.
Святы́м Дýхом обожéние всем,/ благоволéние, рáзум, мир и благословéние:// равнодéтелен бо есть Отцý и Слóву.
И ныне и присно и во вéки векóв. Аминь.
Святы́м Дýхом обожéние всем,/ благоволéние, рáзум, мир и благословéние:// равнодéтелен бо есть Отцý и Слóву.
3 АНТИФОН
Надéющиися на Гóспода врагóм стрáшни, и всем ди́вни:// горé бо зрят. (Двáжды)
В беззакóния рук свои́х, прáведных жрéбий,// помóщника Тя имéя Спáсе, не простирáет. (Двáжды)
Слáва Отцý и Сыну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнием дóльным.
И ныне и присно и во вéки векóв. Аминь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнием дóльным.
ПРОКИМЕН
Чтец: Проки́мен, глас шесты́й. Гóсподи, воздви́гни си́лу Твою́, и прииди́ во éже спасти́ нас.
Хор: Гóсподи, воздвúгни сúлу Твою́,/ и приидú во éже спастú нас.
Чтец: Пасы́й Изрáиля вонми́, наставля́яй я́ко овчá Иóсифа.
Хор: Гóсподи, воздвúгни сúлу Твою́,/ и приидú во éже спастú нас.
Чтец: Гóсподи, воздви́гни си́лу Твою́.
Хор: И приидú во éже спастú нас.
Чтец: Гóсподу помóлимся.
Хор: Гóсподи, поми́луй.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Чтец: Вся́кое дыхáние да хвáлит Гóспода.
Хор: Всякое дыхáние да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнии си́лы Егó.
Хор: Всякое дыхáние да хвáлит Гóспода.
Чтец:Вся́кое дыхáние.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелия чтéние
Хор: Слáва Тебé, Гóсподи, слáва Тебé.
(Лк.зач.114): Во врéмя óно, воскрéс Иисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéния вхóдят в сердцá вáша? Ви́дите рýце Мои́ и нóзе Мои́, я́ко Сам Аз есмь: осяжи́те Мя и ви́дите: я́ко дух плóти и кóсти не и́мать, я́коже Менé ви́дите имýща. И сиé рек, показá им рýце и нóзе. Ещé же не вéрующим им от рáдости и чудя́щимся, речé им: и́мате ли что снéдно зде? Они же дáша Ему ры́бы печены́ часть и от пчел сот. И взем пред ни́ми ядé. Речé же им: сия́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáния. И речé им, я́ко тáко пи́сано есть, и тáко подобáше пострадáти Христý, и воскрéснути от мéртвых в трéтий день, и проповéдатися во и́мя Егó покая́нию и отпущéнию грехóв во всех язы́цех, начéнше от Иерусали́ма. Вы же естé свидéтелие сим. И се Аз послю́ обетовáние Отцá Моегó на вы: вы же седи́те во грáде Иерусали́мсте, дóндеже облечéтеся си́лою свы́ше. Извéд же их вон до Вифáнии, и воздви́г рýце Свои́, и благослови́ их. И бысть егдá благословля́ше их, отступи́ от них, и возношáшеся на нéбо. И ти́и поклони́шася Емý, и возврати́шася во Иерусали́м с рáдостию вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебé, Гóсподи, слáва Тебé.
Воскресéние Христóво ви́девше, поклони́мся Святóму Гóсподу Иисýсу, еди́ному безгрéшному, Крестý Твоемý покланя́емся, Христé, и святóе Воскресéние Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé именýем. Прииди́те вси вéрнии, поклони́мся Святóму Христóву Воскресéнию: се бо прии́де Крестóм рáдость всемý миру. Всегдá благословя́ще Гóспода, поéм Воскресéние Егó:/ распя́тие бо претерпéв, смéртию смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóние моé. Наипáче омы́й мя от беззакóния моегó, и от грехá моегó очи́сти мя. Яко беззакóние моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóниих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлие, возрáдуются кóсти смирéнныя. Отврати́ лицé Твоé от грех мои́х, и вся беззакóния моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вии к Тебé обратятся. Избáви мя от кровéй, Бóже, Бóже спасéния моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою. Яко áще бы восхотéл еси жéртвы, дал бых ýбо, всесожжéния не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы.
Слáва Отцу и Сыну и Святóму Духу.
глас 8: Покая́ния отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостию.
И ныне и прúсно и во вéки векóв, амúнь.
На спасéния стези́ настáви мя Богорóдице,/ стýдными бо окаля́х дýшу грехми́,/ и в лéности все житиé моé ижди́х:/ но Твои́ми моли́твами// избáви мя от вся́кия нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóние моé.
Стихúра прáздника, глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбия Твоегó,/ я́ко Дави́д вопию́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном Триóди (о блудном сыне, глас 8) и канóном Триóди, (свт. Григóрия, глас 4)
ПЕСНЬ 1
Ирмóс: Я́ко по сýху пешешéствовав Изрáиль,/ по бéздне стопáми,/ гони́теля фараóна/ ви́дя потопля́ема,// Бóгу побéдную песнь пои́м, вопия́ше.
Хор (припéв): Слáва, Гóсподи, Святóму Воскресéнию Твоемý.
Чтец (тропáрь): Распростéртыма длáньма на крестé,/ отéческаго испóлнил еси́ благоволéния, благи́й Иисýсе, вся́ческая.// тéмже побéдную песнь Тебé вси пои́м.
Хор: Слáва, Гóсподи, Святóму Воскресéнию Твоемý.
Чтец: Стрáхом к Тебé, я́ко рабы́ня, смерть/ повелéна приступи́ Влады́це животá,// тóю подаю́щему нам безконéчный живóт и воскресéние.
Хор: Пресвятáя Богорóдице, спасú нас.
Богорóдичен: Своегó приéмши Содéтеля, я́ко Сам восхотé,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася еси́, Влады́чица.
Канон Триоди (о блудном сыне), глас 8
Хор: Помúлуй мя, Бóже, помúлуй мя.
Чтец: Восприéмше тéплыми слезáми, блýднаго глас,/ Тебé Отцý всех и Бóгу припáдаем, вопию́ще:/ я́ко согреши́хом от Тебé удали́вшеся, и блудý рабóтавше,// приими́ нáше покая́ние.
Хор: Помúлуй мя, Бóже, помúлуй мя.
Чтец: Цáрское преоби́дев благорóдие,/ éже даровáл еси́ мне, менé рáди Слóве, Человéк бы́вый:/ лю́те осуди́хся угоди́ти свиния́м, грехóвным вкýсом,// но пощади́ мя Спáсе, милосéрдием Твои́м.
Хор: Помúлуй мя, Бóже, помúлуй мя.
Чтец: На колéну пáдающа мя,/ я́коже пéрвее блýднаго Влады́ко Гóсподи,/ Ты притéк приими́, и рукáма объéм,/ подáждь ми óбразы Твоегó спасéния,/ вмéсто наéмника Человеколю́бче,// пáки Твоегó сы́на сотворя́я.
Хор: Пресвятáя Богорóдице, спасú нас.
Богорóдичен: Богоявлéния Тобóю сподóбися Богорáдованная, человéческое естествó:/ еди́на бо ходáтаица Дéво, былá еси́ Бóгу и человéком./ Тем я́ко Бóжию Тя Роди́тельницу вси достóйно слáвим.
Канон Триоди (свт. Григóрия), глас 4
Хор: Святúтелю óтче Григóрие, молú Бóга о нас.
Чтец: Ри́торов божéственнии, и богослóвов изря́днии, и язы́цы боговещáннии,/ прииди́те сни́дитеся в соединéние,// воспéти по достоя́нию духори́тора, божéственнаго Григóрия. (двáжды)
Хор: Святúтелю óтче Григóрие, молú Бóга о нас.
Чтец: Столп вéры, Цéркве побóрник,/ вели́кий Григóрий да восхвáлится мнóю,/ всеизря́дный пáстырь Фессалони́тский,// красотá чи́на иерáршескаго вои́стинну. (двáжды)
Слáва Отцý и Сыну и Святóму Дýху.
Тропáрь: От младéнства возжелáл еси́ лýчшее житиé,/ и совершéнное óтче от ю́ности возлюби́л еси́ мудровáние,/ и купнонрáвен, и единомýдрен показáлся еси́// тезоимéнствующаго тебé óтче Григóрие.
И ныне и прúсно и во вéки векóв, амúнь.
Богорóдичен: Бýди ми Всенепорóчная животá путь,/ наставля́ющий мя к Божéственным селéнием:/ прельсти́хся бо, и к прóпастем злóбы поползнýхся,// от ни́хже мя возведи́ ходáтайством Твои́м.
Катавáсия (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéние.
ПЕСНЬ 3
Ирмóс: Несть свят,/ я́коже Ты, Гóсподи Бóже мой,/ вознесы́й рог вéрных Твои́х, Блáже,/ и утверди́вый нас на кáмени// исповéдания Твоегó.
Хор: Слáва, Гóсподи, Святóму Воскресéнию Твоемý.
Чтец: Бóга распинáема плóтию зря́щи тварь, растаявáшеся стрáхом:// но содержи́тельною длáнию нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнию Твоемý.
Чтец: Смéртию смерть разорéна лежи́т окая́нная без дыхáния:/ Животá бо не терпя́щи божéственнаго приражéния,// умерщвля́ется крéпкий, и дáруется всем воскресéние.
Хор: Пресвятáя Богорóдице, спасú нас.
Богорóдичен: Божéственнаго рождествá Твоегó, Чи́стая,/ вся́кий естествá чин превосхóдит чýдо:/ Бóга бо преестéственне зачалá еси́ во чрéве,// и рóждши пребывáеши при́сно Дéва.
Глас 8
Хор: Помúлуй мя, Бóже, помúлуй мя.
Чтец: Убоя́вся мои́х дел, и далéчнаго отшéствия,/ и расточéннаго Твоегó богáтства,/ егóже ижди́х в блýдных стремлéниих,/ в покая́нии к Тебé зовý, Отцý и Бóгу моемý:// согреши́х, спаси́ мя.
Хор: Помúлуй мя, Бóже, помúлуй мя.
Чтец: На земли́ согрешáя, небесé убоя́хся:/ си́це бо ми бýдет суд тогдá препирáяй,/ егдá вся́ческая предстáнут Слóве,// прáведным судóм Твои́м суди́мая.
Хор: Помúлуй мя, Бóже, помúлуй мя.
Чтец: Мрáчная и сквéрная мя помышлéния питáху,/ егдá от Тебé Спáсе, далéче бых блýдный,/ ны́не же зовý Ти: согреши́х, согреши́х, спаси́// тéпле прибегáющаго милосéрдию Твоемý.
Хор: Пресвятáя Богорóдице, спасú нас.
Чтец: Обожи́ся Дéво Адáмово смешéние:/ из чрéва бо Твоегó Бог плотонóсец яви́ся,/ И́мже воззвáни бы́хом от дрéвняго осуждéния,// солгáни надéждею дрéвле обожéния.
Глас 4
Хор: Святúтелю óтче Григóрие, молú Бóга о нас.
Чтец: Струи́ Божéственных учéний твои́х сохраня́ющии,/ вся́кия кóзни злослáвных избегáем,/ и вся избивáем твои́ми свящéнными списáньми// полки́ сих Григóрие. (двáжды)
Хор: Святúтелю óтче Григóрие, молú Бóга о нас.
Чтец: Премýдрости бýия злослáвных разруши́л еси́ блажéнне,/ премýдрость Бóжию ипостáсную имéя в сéрдце твоéм,// éюже с шýмом порази́л еси́ гнилáя сих шатáния. (двáжды)
Слáва Отцý и Сыну и Святóму Дýху.
Тропáрь: Умертви́в плóти тлéемыя вся́кое сладострáстие премýдре,/ пóстнически оживи́л еси́ души́ твоея́ движéния,// и сию́ Божéственный оргáн Богослóвия показáл еси́.
И ныне и прúсно и во вéки векóв, амúнь.
Богорóдичен: В рáзуме умá и произволéнии,/ стýдное же и блýдное житиé прилéжно возлюби́х,/ но любóвию Божéственною мя свяжи́,// моли́твами Твои́ми, Дéво Богоневéстная.
Катавáсия (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшия, духóвно утверди́,/ в честнéм вхождéнии Твоéм// венцéв слáвы сподóби.
Гóсподи, помилуй. (3 раза)
Кондáк Триóди, глaс 4: Ны́не врéмя дéлательное яви́ся, при двéрех суд,/ востáнем ýбо постя́щеся,/ принесéм слéзы умилéния,/ ми́лостынями, зовýще:/ согреши́хом пáче пескá морскáго./ Но ослáби Содéтелю всех,// я́ко да прии́мем нетлéнныя венцы́.
Седáлен Триóди, глaс 4: Прéлесть попали́л еси́ злослáвных премýдре,/ вéру изъясни́л еси́ правослáвных дóбре,/ и мир просвети́л еси́./ Отонýдуже победонóсный победи́тель показáлся еси́,/ столп Цéркве, и́стинный иерáрх,/ моля́ся не престáй Христý,// спасти́ся всем нам. (двáжды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Богорóдичен Триóди, глас 4: Скóро приими́ Влады́чице молéния нáша,/ и сия́ принеси́ Сы́ну Твоему́ и Бóгу,/ Госпожé Всенепорóчная:/ погаси́ обстоя́ния злослáвных языковрéдных,/ укроти́ кóзни, и низложи́ дéрзость/ вооружáющихся безбóжных// Пречи́стая, на рабы́ Твоя́.
ПЕСНЬ 4
Ирмóс: Христóс моя́ си́ла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чи́ста, о Гóсподе прáзднующи.
Хор: Слáва, Гóсподи, Святóму Воскресéнию Твоемý.
Чтец: Дрéво процвелó есть, Христé, и́стинныя жи́зни:/ крест бо водрузи́ся,/ и напоéн быв крóвию и водóю от нетлéннаго Твоегó ребрá,// живóт нам прозябé.
Хор: Слáва, Гóсподи, Святóму Воскресéнию Твоемý.
Чтец: Не ктомý змий мне лóжне обожéние подлагáет:/ Христóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасú нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на земли́ и на небеси́, Приснодéво, тáинства.
Глас 8
Хор: Помúлуй мя, Бóже, помúлуй мя.
Чтец: Отметáтельное отéческих ми повелéний богáтство,/ éже ми даровáл еси́, в сладострáстии ижди́в,/ бых Божéственных даровáний нищ окая́нный./ Тéмже кáющася со исповéданием// не омерзи́ менé Влады́ко Гóсподи.
Хор: Помúлуй мя, Бóже, помúлуй мя.
Чтец: Боголéпно восприи́м нищетý менé,/ далéче Тебé дрéвле бы́вшаго,/ Собóю к Себé присвоя́еши,/ и освящáеши мя к весéлию Человеколю́бче:/ тéло Твоé Божéственное Слóве,// воззвáние моé, весéлия творя́.
Хор: Помúлуй мя, Бóже, помúлуй мя.
Чтец: Да далéче слезáми непрестáнными,/ вéчныя мýки избáвимся,/ ю́же уготóва Бог лукáвым духовóм,/ я́ко блýдный, вопиéм: согреши́хом Ти Óтче,// но приими́ вся прибегáющия ны к Твоéй ми́лости.
Хор: Пресвятáя Богорóдице, спасú нас.
Чтец: Собезначáльное Отцý Слóво сый и Дýху,/ от Неискусомýжныя Дéвы раждáется кромé закóна:/ пребы́в ýбо éже бе, пребы́в же пáки éже от нас прия́т./ Во двою́ бо естествý еди́н Сын есть,// во обою́ храня́ естéственное.
Глас 4
Хор: Святúтелю óтче Григóрие, молú Бóга о нас.
Чтец: Отвéрз устá твоя́ óтче премýдре,/ Божéственную премýдрость проповéдал еси́,/ éйже поучáлся еси́ в сéрдце твоéм при́сно,// и Варлаáма сýетнаго несмы́сленна и безýмна показáл еси́. (двáжды)
Хор: Святúтелю óтче Григóрие, молú Бóга о нас.
Чтец: Зашéл еси́ сладчáйший в зéмлю, сóлнце закóном естествá,/ возсия́еши же ýтро со Христóм сóлнце невечéрнее,// вся назирáя моли́твами твои́ми. (двáжды)
Слáва Отцý и Сыну и Святóму Дýху.
Тропáрь: Яви́ благодáть тебé блажéнне Бóжий,/ похвалý и утверждéние превéлие правослáвных,/ и пáстыря благáго, и богослóва вторáго,// и стáда бóдраго храни́теля.
И ныне и прúсно и во вéки векóв, амúнь.
Богорóдичен: Ушесá мне отвéрзи душéвныя Мáти Бóжия,/ роди́вшая прéжде ушесá Отвéрзшаго глухóму,// и Божéственным внимáти словесéм, и исполня́ти сподóби.
Катавáсия (глас 4): Седя́й в Слáве/ на Престóле Божествá/ во óблаце лéгце,/ прии́ди Иисýс Пребожéственный,/ Нетлéнною Длáнию/ и спасé зовýщия:// слáва, Христé, си́ле Твоéй.
ПЕСНЬ 5
Ирмóс: Бóжиим свéтом Твои́м, Блáже,/ ýтренюющих Ти дýши любóвию озари́, молю́ся,/ Тя вéдети, Слóве Бóжий,/ и́стиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнию Твоемý.
Чтец: Уступáют мне херуви́ми ны́не,/ и плáменное орýжие, Влады́ко, плещи́ мне даéт,/ Тя ви́девше, Слóве Бóжий, и́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнию Твоемý.
Чтец: Не ктомý бою́ся, éже в зéмлю, Влады́ко Христé, возвращéния:/ Ты бо от земли́ мя возвéл еси́ забвéнна,/ благоутрóбия рáди мнóгаго,// к высотé нетлéния воскресéнием Твои́м.
Хор: Пресвятáя Богорóдице, спасú нас.
Богорóдичен: И́же Богорóдицу Тя от души́, Влады́чице ми́ра благáя,/ исповéдающих спаси́:/ Тебé бо предстáтельство непобори́мое и́мамы,// и́стинную Богороди́тельницу.
Глас 8
Хор: Помúлуй мя, Бóже, помúлуй мя.
Чтец: Богáтства и даровáний Божéственных лиши́хся,/ и в странý приидóх благи́х живóтных глáдом тáя,/ но Ты мя Óтче я́ко Благи́й,/ дрéвния слáвы и слáдости,// благосéрдия рáди Твоегó, испóлни.
Хор: Помúлуй мя, Бóже, помúлуй мя.
Чтец: Пóмысл блýднаго, в блудé житиé ижди́вша прии́мше,/ Отцý ми́лостивому притецéм,/ несумнéнною вéрою, и сокрушéнием сéрдца,// я́ко да согрешéний оставлéние прии́мем.
Хор: Помúлуй мя, Бóже, помúлуй мя.
Чтец: Не косни́ душé моя́, в дáльней странé пребывáющи,/ но тецы́ вскóре, Бóгу и Отцý исповéдающися,/ да прии́меши разрешéние,// и́хже зле содéлала еси́ житиé изнури́вши.
Хор: Пресвятáя Богорóдице, спасú нас.
Чтец: Свéтлый Тя óблак, нося́й Сóлнце прáвды,/ в Тебé носи́мое, Пречи́стая Дéво вéмы,/ неразýмия тьму и́дольскую отгоня́ющее,// и рáзумом и́стинным просвещáющее.
Глас 4
Хор: Святúтелю óтче Григóрие, молú Бóга о нас.
Чтец: Серпóм словéс твои́х, и свящéнными списáньми/ посéкл еси́ éреси тернови́дныя,/ и плéвел лóжная прозябéния,/ правослáвия же благочести́вая положи́л еси́ сéмена,// священноначáльне Григóрие. (двáжды)
Хор: Святúтелю óтче Григóрие, молú Бóга о нас.
Чтец: Словесá твоя́ всемýдре, и честнáя списáния/ суть росá Небéсная,/ мед кáменный, хлеб áнгельский притекáющим,/ питиé, брáшно, слáдость,// наслаждéние, Григóрие, и истóчник живы́я воды́. (двáжды)
Слáва Отцý и Сыну и Святóму Дýху.
Тропáрь: Óбщаго тя учи́теля познавáет земля́ и мóре,/ столп свящéнный правослáвия,/ и оружеполóжницу Божéственных догмáт честнýю,/ премýдраго богослóва свящéннаго,// сожи́теля, сопричáстника, апóстолом единонрáвнаго.
И ныне и прúсно и во вéки векóв, амúнь.
Богорóдичен: Струя́ми умилéния,/ сквéрны сéрдца моегó Непорóчная отмы́й Дéво,/ и покая́ния óбразы мне дáруй,/ Твои́ми к щéдрому Бóгу свящéнными молéнии,// Егóже неизречéнно родилá еси́.
Катавáсия (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ безлéтнаго Сы́на,/ всем воспевáющим Тя// мир подавáющая.
ПЕСНЬ 6
Ирмóс: Житéйское мóре,/ воздвизáемое зря напáстей бýрею,/ к ти́хому пристáнищу Твоемý притéк, вопию́ Ти:/ возведи́ от тли живóт мой,// Многоми́лостиве.
Хор: Слáва, Гóсподи, Святóму Воскресéнию Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копиéм же прободáемь в ребрó,// адáмово рукописáние растерзáв, мир свободи́л еси́.
Хор: Слáва, Гóсподи, Святóму Воскресéнию Твоемý.
Чтец: Адáм низведéся, лéстию запя́т быв, ко áдове прóпасти:/ но и́же естествóм Бог же и ми́лостив,/ сшел еси́ на взыскáние,// и на рáму понéс, совоскреси́л еси́.
Хор: Пресвятáя Богорóдице, спасú нас.
Богорóдичен: Пречи́стая Влады́чице,/ рóждшая человéком кóрмчию Гóспода,/ страстéй мои́х непостоя́нное и лю́тое утоли́ смущéние,// и тишинý подáждь сéрдцу моемý.
Глас 8
Хор: Помúлуй мя, Бóже, помúлуй мя.
Чтец: Юнéйший бых сын Твой,/ и богáтство Твоé зле ижди́х,/ удалéнием злáго жития́,/ и благи́х Твои́х лишáяся Человеколю́бче,/ прихождý Тебé Отцý и Бóгу моемý,// и прошý прощéния.
Хор: Помúлуй мя, Бóже, помúлуй мя.
Чтец: Стрáнничество безчеловéчное получи́х,/ и пасти́ свинии́ осуждéн бых,/ я́ко моé расточи́х богáтство,/ éже ми́лостивно вскóре подáл еси́,/ и бых от всех наг,// но Ты я́ко Бог мой ущéдри.
Хор: Помúлуй мя, Бóже, помúлуй мя.
Чтец: Не и́мам дерзновéния Человеколю́бче, воззрéти и ви́дети,/ согреши́в на Нéбо, безмéрную высотý,/ ни нарещи́ся сын Твой, блýдный,// но ущéдри мя тýне, имéяй безмéрную ми́лость.
Хор: Пресвятáя Богорóдице, спасú нас.
Чтец: Несказáнное Твоé Рождествó,/ и неизречéнный рождествá Твоегó óбраз Деви́це,/ я́ко Бóга вы́ше умá раждáеши,/ дéвство несквéрное имýщи:// тем Тя вси и́стинную Богорóдицу достóйно слáвим.
Глас 4
Хор: Святúтелю óтче Григóрие, молú Бóга о нас.
Чтец: Растерзáся сýетное шатáние,/ и язы́к Варлаáма безýмнаго,/ словесы́ и велéнии, и рáзума остротóю// премýдраго царя́, и твоéю, Григóрие. (двáжды)
Хор: Святúтелю óтче Григóрие, молú Бóга о нас.
Чтец: Божéственную цевни́цу Дýха,/ трубý я́ве проповéдающую Божéственныя тáйны,// Фессалони́тскаго председáтеля, Богослóвский язы́к, пéсньми почти́м. (двáжды)
Слáва Отцý и Сыну и Святóму Дýху.
Тропáрь: Лю́дем иногдá предводи́тель,/ я́ко столп óгненный, вéры враги́ попали́л еси́,/ вéрных же состоя́ния просвети́л еси́,// богомýдре óтче Григóрие.
И ныне и прúсно и во вéки векóв, амúнь.
Богорóдичен: Бýди ми Всечи́стая Влады́чице,/ тишинá и пристáнище утешéния,/ преводя́щее к Божéственному пристáнищу невлáемому,// бýрю страстéй мои́х укроти́вши.
Катавáсия (глас 4): Божéственное сиé и всечестнóе/ совершáюще прáзднество,/ Богомýдрии, Богомáтере,/ прииди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Кондáк Триóди (свт. Григóрия), глас 8: Премýдрости свящéнный и Божéственный оргáн,/ богослóвия свéтлую соглáсно трубý,/ воспевáем тя Григóрие богоглагóльниче,/ но я́ко ум Умý пéрвому предстоя́й,/ к Немý ум наш óтче настáви, да зовéм:// рáдуйся проповéдниче благодáти.
Продолжение здесь