Неделя вторая Великаго поста. ВСЕНОЩНОЕ БДЕНИЕ. Святителя Григория Паламы. Глас 6. УТРЕНЯ
20 мáрта 2022 гóда. Недéля вторáя Велúкaго постá. Святúтеля Григóрия Палáмы. Глас 6. Воскрéсная прáздничная слýжба для домáшнего (келéйного) совершéния. Слýжба мирскúм чúном.
УТРЕНЯ
Начáло зри здесь ( великая вечерня)
ШЕСТОПСАЛМИЕ
Слáва в вы́шних Бóгу, и на земли́ мир, в человéцех благоволéние. (трúжды) Гóсподи, устнé мои́ отвéрзеши, и устá моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющии ми? Мнóзи востаю́т на мя, мнóзи глагóлют души́ моéй: несть спасéния eмý в Бóзе eгó. Ты же, Гóсподи, Застýпник мой еси, слáва моя́ и вознося́й главý мою́. Глáсом моим ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскресни́, Гóсподи, спаси́ мя, Бóже мой, я́ко Ты порази́л еси́ вся враждýющыя ми всýе: зýбы грéшников сокруши́л еси́. Госпóдне есть спасéние, и на лю́дех Твои́х благословéние Твоé.
Аз уснýх, и спах, востáх, яко Госпóдь застýпит мя.
Псалом 37
Гóсподи, да не я́ростию Твоéю обличи́ши менé, нижé гнéвом Твои́м накáжеши менé. Яко стрéлы Твоя́ унзóша во мне, и утвердил еси на мне рýку Твою́. Несть исцелéния в плóти моéй от лицá гнéва Твоегó, несть мира в костéх моих от лицá грех моих. Яко беззакóния моя́ превзыдóша главý мою́, я́ко брéмя тя́жкое отяготéша на мне. Возсмердéша и согниша рáны моя́ от лицá безýмия моегó. Пострадáх и слякóхся до концá, весь день сéтуя хождáх. Яко ля́двия моя́ напóлнишася поругáний, и несть исцелéния в плóти моéй. Озлóблен бых и смирихся до зелá, рыкáх от воздыхáния сéрдца моегó. Гóсподи, пред Тобóю все желáние моé и воздыхáние моé от Тебé не утаися. Сéрдце моé смятéся, остáви мя сила моя́, и свет óчию моéю, и той несть со мнóю. Дрýзи мои и искреннии мои пря́мо мне приближишася и стáша, и ближнии мои отдалéче менé стáша и нуждáхуся ищущии дýшу мою́, и ищущии злáя мне глагóлаху сýетная и льстивным весь день поучáхуся. Аз же я́ко глух не слы́шах и я́ко нем не отверзáяй уст своих. И бых я́ко человéк не слы́шай и не имы́й во устéх своих обличéния. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдá порáдуют ми ся врази мои: и внегдá подвижáтися ногáм моим, на мя велерéчеваша. Яко аз на рáны готóв, и болéзнь моя предо мнóю есть вы́ну. Яко беззакóние моé аз возвещý и попекýся о гресé моéм. Врази же мои живýт и укрепишася пáче менé, и умнóжишася ненавидящии мя без прáвды. Воздаю́щии ми злáя возблагáя оболгáху мя, занé гоня́х благосты́ню. Не остáви менé, Гóсподи Бóже мой, не отступи́ от менé. Вонми́ в пóмощь мою́, Гóсподи спасéния моегó.
Не остáви менé, Гóсподи Бóже мой, не отступи́ от менé. Вонми́ в пóмощь мою́, Гóсподи спасéния моегó.
Псалом 62
Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и́мени Твоéм воздежý рýце мои́. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был еси́ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прия́т десни́ца Твоя́. Ти́и же всýе искáша дýшу мою́, вни́дут в преиспóдняя земли́, предадя́тся в рýки орýжия, чáсти ли́совом бýдут. Царь же возвесели́тся о Бóзе, похвáлится всяк клены́йся Им, я́ко загради́шася устá глагóлющих непрáведная.
На ýтренних поучáхся в Тя. Яко был еси́ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прия́т десни́ца Твоя́.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Псалом 87
Гóсподи Бóже спасéния моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнию моемý, я́ко испóлнися зол душá моя́, и живóт мой аду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннии спя́щии во грóбе, и́хже не помянýл еси́ ктомý, и ти́и от руки́ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл еси́ на мя. Удáлил еси́ знáемых мои́х от менé, положи́ша мя мéрзость себé: прéдан бых и не исхождáх. Очи мои́ изнемогóсте от нищеты́, воззвáх к Тебé, Гóсподи, весь день, воздéх к Тебé рýце мои́. Едá мéртвыми твориши чудесá? Или́ врáчеве воскреся́т, и исповéдятся Тебé? Едá повéсть кто во грóбе ми́лость Твою́, и и́стину Твою́ в поги́бели? Едá познáна бýдут во тьме чудесá Твоя́, и прáвда Твоя́ в земли́ забвéнней? И аз к Тебé, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицé Твоé от менé? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твои́, устрашéния Твоя́ возмути́ша мя, обыдóша мя я́ко водá, весь день одержáша мя вкýпе. Удáлил еси́ от менé дрýга и и́скренняго, и знáемых моих от страстéй.
Гóсподи Бóже спасéния моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнию моемý.
Псалом 102
Благослови, душé моя, Гóспода, и вся внýтренняя моя имя святóе Егó. Благослови, душé моя, Гóспода, и не забывáй всех воздаяний Егó, очищáющаго вся беззакóния твоя, исцеляющаго вся недýги твоя, избавляющаго от истлéния живóт твой, венчáющаго тя милостию и щедрóтами, исполняющаго во благих желáние твоé: обнови́тся яко óрля юность твоя. Творя́й милостыни Госпóдь, и судьбý всем обидимым. Сказá пути Своя Моисéови, сыновóм Изрáилевым хотéния Своя: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнием нáшим сотвори́л есть нам, нижé по грехóм нáшым воздáл есть нам. Яко по высотé небéсней от земли́, утверди́л есть Госпóдь ми́лость Свою́ на боя́щихся Егó. Ели́ко отстоя́т востóцы от зáпад, удáлил есть от нас беззакóния нáша. Якоже щéдрит отéц сы́ны, ущéдри Госпóдь боя́щихся Егó. Яко Той познá создáние нáше, помянý, я́ко персть есмы́. Человéк, яко травá дни́е eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Его на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небеси́ уготóва Престóл Свой, и Цáрство Егó всéми обладáет. Благослови́те Гóспода вси Ангели Егó, си́льнии крéпостию, творя́щии слóво Егó, услышати глас словéс Егó. Благослови́те Гóспода вся Си́лы Егó, слýги Егó, творя́щии вóлю Егó. Благослови́те Гóспода вся делá Егó, на вся́ком мéсте владычества Егó, благослови́, душé моя́, Гóспода.
На всяком мéсте влады́чества Егó, благослови́, душé моя, Гóспода.
Псалом 142
Гóсподи, услы́ши моли́тву мою́, внуши́ молéние моé во и́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны́ во мне дух мой, во мне смятéся сéрдце моé. Помянýх дни дрéвния, поучи́хся во всех дéлех Твои́х, в творéниих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. Изми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благи́й настáвит мя на зéмлю прáву. Имене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостию Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благи́й настáвит мя на зéмлю прáву.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сыну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 6
Чтец: Бог Госпóдь, и яви́ся нам, благословéн Гряды́й во Имя Госпóдне.
Чтец: Исповéдайтеся Гóсподеви, я́ко благ, я́ко в век ми́лость Егó.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Обышéдше обыдóша мя и и́менем Госпóдним противля́хся им.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Не умрý, но жив бýду и повéм делá Госпóдня.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Кáмень, Егóже небрегóша зи́ждущии, Сей бысть во главý ýгла, от Гóспода бысть Сей, и есть ди́вен во очесéх нáших.
Хор: Бог Госпóдь, и явúся нам, благословéн Гряды́й во Имя Госпóдне.
Тропáрь воскрéсный, глас 6: Áнгельския Си́лы на грóбе Твоéм,/ и стрегýщии омертвéша;/ и стоя́ше Мари́я во грóбе,/ и́щущи Пречи́стаго Тéла Твоегó./ Плени́л еси́ ад, не искуси́вся от негó;/ срéтил еси́ Дéву, дáруяй живóт.// Воскресы́й из мéртвых, Гóсподи, слáва Тебé. (Двáжды)
Слáва Отцý и Сы́ну и Святóму Дýху.
Тропáрь Триóди (Святúтеля Григóрия), глас 8: Правослáвия свети́льниче,/ Цéркве утверждéние и учи́телю,/ монáхов добрóто, богослóвов побóрниче непребори́мый,/ Григóрие чудотвóрче, Фессалони́тская похвалó, проповéдниче благодáти,// моли́ся вы́ну спасти́ся душáм нáшим.
И ны́не и прúсно и во вéки векóв, амúнь.
Богорóдичен воскрéсный, глас 8 (по глáсу «Слáвы»): И́же нас рáди рождéйся от Дéвы,/ и распя́тие претерпéв, Благи́й,/ испровéргий смéртию смерть,/ и воскресéние явлéй, я́ко Бог,/ не прéзри, я́же создáл еси́ рукóю Твоéю,/ яви́ человеколю́бие Твоé, Ми́лостиве,/ приими́ рóждшую Тя Богорóдицу, моля́щуюся за ны,// и спаси́, Спáсе наш, лю́ди отчáянныя.
Гóсподи, поми́луй. (3 раза)
Слáва Отцý и Сы́ну и Святóму Дýху.
Чтец: И ныне и присно и во вéки векóв. Аминь.
КАФИЗМЫ И СЕДАЛЬНЫ
КАФИЗМА ВТОРАЯ
И чтем кафúсму 2-ю ( или одúн псалóм, или до 1-й Слáвы)
[Псалом 9]Исповéмся Тебé, Гóсподи, всем сéрдцем мои́м, повéм вся чудесá Твоя́. Возвеселю́ся и возрáдуюся о Тебé, пою́ и́мени Твоемý, Вы́шний. Внегдá возврати́тися врагý моемý вспять, изнемóгут и поги́бнут от лицá Твоегó. Яко сотвори́л eси суд мой и прю мою́, сел eси на Престóле, судя́й прáвду. Запрети́л eси язы́ком, и поги́бе нечести́вый, и́мя eгó потреби́л eси в век и в век вéка. Врагу оскудéша oрýжия в конéц, и грáды разруши́л eси, поги́бе пáмять eгó с шýмом. И Госпóдь во век пребывáет, уготóва на суд Престóл Свой, и Той суди́ти и́мать вселéнней в прáвду, суди́ти и́мать лю́дем в правотé. И бысть Госпóдь прибе́жище убóгому, помóщник во благоврéмениих, в скóрбех. И да уповáют на Тя знáющии и́мя Твоé, я́ко не остáвил eси взыскáющих Тя, Гóсподи. Пóйте Гóсподеви, живýщему в Сиóне, возвести́те во язы́цех начинáния Егó, я́ко взыскáяй крóви их помянý, не забы́ звáния убóгих. Поми́луй мя, Гóсподи, виждь смирéние моé от враг мои́х, вознося́й мя от врат смéртных, Яко да возвещý вся хвалы́ Твоя́ во вратéх дщéре Сиóни, возрáдуемся о спасéнии Твоéм. Углебóша язы́цы в па́губе, ю́же сотвори́ша, в сéти сей, ю́же скры́ша, увязé ногá их. Знáемь eсть Госпóдь судьбы́ творя́й, в дéлех рукý своéю увязé грéшник. Да возвратя́тся грéшницы во ад, вси язы́цы забывáющии Бóга. Яко не до концá забвéн бýдет ни́щий, терпéние убóгих не поги́бнет до концá. Воскресни́, Гóсподи, да не крепи́тся человéк, да сýдятся язы́цы пред Тобóю. Постáви, Гóсподи, законоположи́теля над ни́ми, да разумéют язы́цы, я́ко человéцы суть. Вскýю, Гóсподи, отстоя́ далéче, презирáеши во благоврéмениих, в скóрбех? Внегдá горди́тися нечести́вому, возгарáется ни́щий, увязáют в совéтех, я́же помышля́ют. Яко хвали́мь eсть грéшный в пóхотех души́ своея́, и оби́дяй благослови́мь eсть. Раздражи́ Гóспода грéшный, по мнóжеству гнéва своегó не взы́щет, несть Бóга пред ним. Оскверня́ются путиé eгó на вся́ко врéмя, отъéмлются судьбы́ Твоя́ от лицá eгó, всéми враги́ свои́ми обладáет. Речé бо в сéрдце своéм, не подви́жуся от рóда в род без зла, eгóже кля́твы устá eгó пóлна суть, и гóрести и льсти, под языком eгó труд и болéзнь. Приседи́т в лови́тельстве с богáтыми в тáйных, éже убити непови́ннаго, óчи eгó на ни́щаго призирáете. Лови́т в тáйне я́ко лев во огрáде своéй, лови́т éже восхи́тити ни́щаго, восхи́тити ни́щаго, внегдá привлещи́ и́ в сéти своéй. Смири́т eгó, преклони́тся и падéт, внегдá eмý обладáти убóгими. Речé бо в сéрдце своéм: забы Бог, отврати́ лицé Своé, да не ви́дит до концá. Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. Чесó рáди прогнéва нечести́вый Бóга? Речé бо в сéрдце своéм: не взы́щет. Ви́диши, я́ко Ты болéзнь и я́рость смотря́еши, да прéдан бýдет в рýце Твои́, Тебé остáвлен eсть ни́щий, си́ру Ты бýди помóщник. Сокруши́ мы́шцу грéшному и лукáвому, взы́щется грех eгó и не обря́щется. Госпóдь Царь во век и в век вéка, поги́бнете, язы́цы, от земли́ Егó. Желáние убóгих услы́шал eси́, Гóсподи, уготóванию сéрдца их внят ýхо Твоé. Суди́ си́ру и смирéну, да не приложи́т ктомý величáтися человéк на земли́.
[Псалом 10]На Гóспода уповáх, кáко речéте души́ моéй: превитáй по горáм, я́ко пти́ца? Яко се, грéшницы налякóша лук, уготóваша стрéлы в тýле, состреля́ти во мрáце прáвыя сéрдцем. Занé я́же Ты соверши́л eси́, oни́ разруши́ша, прáведник же что сотвори́? Госпóдь во хрáме святéм Своéм. Госпóдь, на Небеси́ Престóл Егó, óчи Егó на нищаго призирáете, вéжди Егó испытáете сы́ны человéчeския. Госпóдь испытáет прáведнаго и нечести́ваго, любя́й же непрáвду ненави́дит свою́ дýшу. Одожди́т на грéшники сéти, oгнь и жýпел, и дух бýрен часть чáши их. Яко прáведен Госпóдь, и прáвды возлюби́, правоты́ ви́де лицé Егó.
Чтец: Слáва Отцý и Сыну и Святóму Дýху.
Хор:И ны́не и при́сно и во вéки векóв. Ами́нь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, поми́луй. (3 раза)
Слáва Отцý и Сы́ну и Святóму Дýху.
Чтец: И ныне и присно и во вéки векóв. Аминь.
[Псалом 11]Спаси́ мя, Гóсподи, яко оскудé преподóбный, яко умáлишася и́стины от сынóв человéческих. Сýeтная глагóла ки́йждо ко и́скреннему своемý, устнé льсти́выя в сéрдце, и в сéрдце глагóлаша злáя. Потреби́т Госпóдь вся устны́ льсти́выя, язы́к велерéчивый, рéкшыя: язы́к наш возвели́чим, устны́ нáша при нас суть, кто нам Госпóдь eсть? Стрáсти рáди ни́щих и воздыхáния убóгих ны́не воскреснý, глагóлет Госпóдь, положýся во спасéние, не обиню́ся о нем. Словесá Госпóдня словесá чи́ста, сребрó разжжéно, искушéно земли́, очищéно седмери́цею. Ты, Гóсподи, сохрани́ши ны и соблюдéши ны от рóда сегó и во век. Окрест нечести́вии хóдят, по высотé Твоéй умнóжил eси́ сы́ны человéчeския.
[Псалом 12]Докóле, Гóсподи, забýдеши мя до концá? Докóле отвращáеши лицé Твоé от менé? Докóле положý совéты в души́ моéй, болéзни в сéрдце моéм день и нощь? Докóле вознесéтся враг мой на мя? При́зри, услы́ши мя, Гóсподи Бóже мой, просвети́ óчи мои́, да не когдá уснý в смерть, да не когдá речéт враг мой, укрепи́хся на негó. Стужáющии ми возрáдуются, áще подви́жуся. Аз же на ми́лость Твою́ уповáх, возрáдуется сéрдце моé о спасéнии Твоéм, воспою́ Гóсподеви благодéявшему мне и пою́ и́мени Гóспода Вы́шняго.
[Псалом 13]Речé безýмен в сéрдце своéм: несть Бог. Растлéша и омерзи́шася в начинáниих, несть творя́й благосты́ню. Госпóдь с Небесé прини́че на сы́ны человéчeския, ви́дети, áще eсть разумевáяй или́ взыскáяй Бóга. Вси уклони́шася, вкýпе неключи́ми бы́ша: несть творя́й благосты́ню, несть до eди́наго. Ни ли уразумéют вси дéлающии беззакóние, снедáющии лю́ди моя́ в снедь хлéба? Гóспода не призвáша. Тáмо убоя́шася стрáха, идéже не бе страх, я́ко Госпóдь в рóде прáведных. Совéт ни́щаго посрами́сте, Госпóдь же уповáние eгó eсть. Кто даст от Сиóна спасéние Изрáилево? Внегдá возврати́т Госпóдь пленéние людéй Свои́х, возрадуется Иáков, и возвесели́тся Изрáиль.
Чтец: Слáва Отцý и Сыну и Святóму Дýху.
Хор:И ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
[Псалом 14]Гóсподи, кто обитáет в жили́щи Твоéм? Или́ кто всели́тся во святýю гóру Твою́? Ходя́й непорóчен и дéлаяй прáвду, глагóляй и́стину в сéрдце своéм. Иже не ульсти́ язы́ком свои́м и не сотвори́ и́скреннему своемý зла, и поношéния не прия́т на бли́жния своя́. Уничижéн eсть пред ним лукáвнуяй, боя́щыя же ся Гóспода слáвит, клены́йся и́скреннему своéму и не отметáяся. Сребрá своегó не дадé в ли́хву и мзды на непови́нных не прия́т. Творя́й сия́ не подви́жится во век.
[Псалом 15]Сохрани мя, Гóсподи, яко на Тя уповáх. Рех Гóсподеви: Госпóдь мой eси Ты, яко благих моих не трéбуеши. Святы́м, иже суть на земли Егó, удиви Госпóдь вся хотéния Своя́ в них. Умнóжишася нéмощи их, по сих ускориша: не соберý собóры их от кровéй, ни помянý же имéн их устнáма моима. Госпóдь часть достоя́ния моегó и чáши моея́, Ты eси устроя́яй достоя́ние моé мне. Ужя нападóша ми в держáвных моих, ибо достоя́ние моé держáвно eсть мне. Благословлю́ Гóспода, вразумившаго мя, eщé же и до нóщи наказáша мя утрóбы моя́. Предзрéх Гóспода предо мнóю вы́ну, я́ко одеснýю менé eсть, да не подвижуся. Сегó рáди возвеселися сéрдце моé, и возрáдовася язы́к мой, eщé же и плоть моя́ вселится на уповáнии. Яко не остáвиши дýшу мою́ во áде, нижé дáси преподóбному Твоемý видети истле́ния. Сказáл ми eси пути животá, испóлниши мя весéлия с лицéм Твоим, красотá в деснице Твоéй в конéц.
[Псалом 16]Услы́ши, Гóсподи, прáвду мою, вонми́ молéнию моемý, внуши́ моли́тву мою́ не во устнáх льсти́вых. От лицá Твоегó судьбá моя́ изы́дет, óчи мои́ да ви́дита правоты́. Искуси́л eси́ сéрдце моé, посети́л eси́ нóщию, искуси́л мя eси́, и не обрéтеся во мне непрáвда. Яко да не возглагóлют устá моя́ дел человéческих, за словесá устéн Твоих аз сохрани́х пути́ жéстоки. Соверши́ стопы́ моя во стезя́х Твои́х, да не подви́жутся стопы́ моя́. Аз воззвáх, яко услы́шал мя eси́, Бóже, приклони́ ýхо Твоé мне и услы́ши глагóлы моя́. Удиви́ ми́лости Твоя́, спасáяй уповáющыя на Тя от проти́вящихся десни́це Твоéй. Сохрани́ мя, Гóсподи, я́ко зéницу óка, в крóве крилý Твоéю покрыеши мя. От лицá нечести́вых острáстших мя, врази́ мои́ дýшу мою́ одержáша. Тук свой затвори́ша, устá их глагóлаша гордыню. Изгоня́щии мя ныне обыдóша мя, óчи свои́ возложи́ша уклони́ти на зéмлю. Объя́ша мя я́ко лев готóв на лов и яко ски́мен обитáяй в тáйных. Воскресни́, Гóсподи, предвари́ я́ и запни́ им, избáви дýшу мою́ от нечести́ваго, орýжие Твоé от враг руки́ Твоея́, Гóсподи, от мáлых от земли́, раздели́ я́ в животé их, и сокровéнных Твои́х испóлнися чрéво их, насы́тишася сынóв, и остáвиша остáнки младéнцeм свои́м. Аз же прáвдою явлю́ся лицý Твоемý, насыщуся, внегдá яви́ти ми ся слáве Твоéй.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
СЕДАЛЬНЫ
Хор (по кафúсме седáльны воскрéсные, глас 6): Грóбу отвéрсту, áду плáчущуся,/ Мари́я вопия́ше ко скры́вшимся апóстолом:/ изыди́те виногрáда дéлателие,/ проповéдите воскресéния слóво:// воскрéсе Госпóдь, подая́ ми́рови вéлию ми́лость.
Стих: Воскресни Гóсподи Бóже мой, да вознесéтся рукá Твоя,/ не забуди убóгих Твоих до концá.
Гóсподи, предстоя́ше грóбу Твоемý Мари́я Магдали́на,/ и плáкаше вопию́щи, вертогрáдаря Тя мня́щи, глагóлаше:/ где сокры́л еси́ вéчный живóт?/ Где положи́л еси́, И́же на престóле херуви́мстем;/ стрегýщии бо сегó, от стрáха омертвéша./ Или́ Гóспода моегó дади́те ми,/ или́ со мнóю возопи́йте:// И́же в мéртвых быв, и мéртвыя воскреси́в, слáва Тебé.
Слáва Отцу и Сыну и Святóму Духу, и ныне и присно и во вéки векóв, аминь.
Богорóдичен: Благословéнную нареки́й Твою́ Мáтерь,/ пришéл еси́ на страсть вóльным хотéнием,/ возсия́в на Крестé, взыскáти хотя́ Адáма,/ глагóля áнгелом: срáдуйтеся Мне,/ я́ко обрéтеся поги́бшая дрáхма.// Вся мýдре устрóивый, Бóже наш, слáва Тебé!
Гóсподи, помилуй. (3 раза)
Слáва Отцý и Сыну и Святóму Дýху.
Чтец: И ныне и присно и во вéки векóв. Аминь.
КАФИЗМА ТРЕТЬЯ
И чтем кафúсму 3-ю ( или одúн псалóм, или до 1-й Слáвы)
[Псалом 17]Возлюблю́ Тя, Гóсподи, крéпосте моя́. Госпóдь утверждéние моé, и прибéжище моé, и Избáвитель Moй, Бог мой, Помóщник мой, и уповáю на Негó, Защититель мой, и рог спасéния моегó, и Застýпник мой. Хваля́ призовý Гóспода и от враг моих спасýся. Одержáша мя болéзни смéртныя, и потóцы беззакóния смятóша мя, болéзни áдовы обыдóша мя, предвариша мя сéти смéртныя. И внегдá скорбéти ми, призвáх Гóспода, и к Бóгу моемý воззвáх, услы́ша от хрáма Святáго Своегó глас мой, и вопль мой пред Ним внидет во ýши Егó. И подвижеся, и трéпетна бысть земля́, и основáния гор смятóшася и подвигóшася, я́ко прогнéвася на ня Бог. Взы́де дым гнéвом Егó, и огнь от лицá Егó восплáменится, ýглие возгорéся от Негó. И приклони́ небесá, и сниде, и мрак под ногáма Егó. И взы́де на Херувимы, и летé, летé на крилý вéтреню. И положи тму закрóв Свой, óкрест Егó селéние Егó, темнá водá во óблацех воздýшных. От облистáния пред Ним óблацы проидóша, град и ýглие óгненное. И возгремé с Небесé Госпóдь и Вы́шний дадé глас Свой. Низпослá стрéлы и разгнá я, и мóлнии умнóжи и смятé я́. И явишася истóчницы воднии, и откры́шася основáния вселéнныя, от запрещéния Твоегó, Гóсподи, от дохновéния дýха гнéва Твоегó. Низпослá с высоты́, и прият мя, восприят мя от вод мнóгих. Избáвит мя от врагóв моих сильных и от ненавидящих мя, я́ко утвердишася пáче менé. Предвариша мя в день озлоблéния моегó, и бысть Госпóдь утвержéние моé. И изведé мя на широтý, избáвит мя, я́ко восхотé мя. И воздáст ми Госпóдь по прáвде моéй и по чистотé рукý моéю воздáст ми. Яко сохраних пути Госпóдни и не нечéствовах от Бóга моегó. Яко вся судьбы́ Егó предо мнóю и оправдáния Егó не отступиша от менé. И бýду непорóчен с Ним, и сохранюся от беззакóния моегó. И воздáст ми Госпóдь по прáвде моéй и по чистотé рукý моéю пред очима Егó. С преподóбным преподóбен бýдеши, и с мýжем неповинным неповинен бýдеши, и со избрáнным избрáн бýдеши, и со строптивым развратишися. Яко Ты люди смирéнныя спасéши и óчи гóрдых смириши. Яко Ты просветиши светильник мой, Гóсподи, Бóже мой, просветиши тму мою. Яко Тобóю избáвлюся от искушéния и Бóгом моим прейдý стéну. Бог мой, непорóчен путь Егó, словесá Госпóдня разжжéна, Защититель есть всех уповáющих на Негó. Яко кто бог, рáзве Гóспода? или кто бог, рáзве Бóга нáшего? Бог препоясýяй мя силою, и положи непорóчен путь мой. Совершáяй нóзе мои, яко елéни, и на высóких поставляяй мя. Научáяй рýце мои на брань, и положил еси лук мéдян мышца моя́. И дал ми еси защищéние спасéния, и десница Твоя́ восприя́т мя, и наказáние Твоé испрáвит мя в конéц, и наказáние Твоé то мя научит. Уширил еси стопы моя́ подо мнóю, и не изнемогóсте плеснé мои. Поженý враги моя́, и постигну я́, и не возвращýся, дóндеже скончáются. Оскорблю́ их, и не возмóгут стáти, падýт под ногáма моима. И препоя́сал мя еси силою на брань, спял еси вся востаю́щыя на мя под мя. И врагóв моих дал ми еси хребéт, и ненавидящыя мя потребил еси. Воззвáша, и не бе спасáяй: ко Гóсподу, и не услы́ша их. И истню́ я́ я́ко прах пред лицéм вéтра, я́ко брéние путéй поглáжду я́. Избáвиши мя от пререкáния людéй, постáвиши мя во главý языков. Лю́дие, ихже не вéдех, рабóташа ми. В слух ýха послýшаша мя. Сы́нове чуждии солгáша ми. Сынове чуждии обетшáша и охромóша от стезь своих. Жив Госпóдь, и благословéн Бог, и да вознесéтся Бог спасéния моегó. Бог дая́й отмщéние мне и покоривый лю́ди под мя. Избáвитель мой от враг моих гневливых, от востаю́щих на мя вознесéши мя, от мýжа непрáведна избáвиши мя. Сегó рáди исповéмся Тебé во языцех, Гóсподи, и имени Твоемý пою́: величáяй спасéния царéва, и творя́й ми́лость христý Своемý Дави́ду, и сéмени eгó до вéка.
Чтец: Слáва Отцý и Сыну и Святóму Дýху.
Хор:И ныне и присно и во вéки векóв. Аминь.
Аллилуиа, аллилуиа, аллилýиа, слáва Тебé Бóже. (3 рáза)
Гóсподи, помилуй. (3 рáза)
Слáва Отцý и Сыну и Святóму Дýху.
Чтец: И ныне и присно и во вéки векóв. Аминь.
[Псалом 18]Небесá повéдают слáву Бóжию, творéние же рукý Егó возвещáет твердь. День дни отрыгáет глагóл, и нощь нóщи возвещáет рáзум. Не суть рéчи, нижé словесá, ихже не слы́шатся глáси их. Во всю зéмлю изы́де вещáние их и в концы вселéнныя глагóлы их. В сóлнце положи селéние Своé, и Той, я́ко Жених исходя́й от чертóга Своегó, возрáдуется, я́ко Исполин тещи путь. От крáя небесé исхóд Егó, и срéтение Егó до крáя небесé, и несть иже укры́ется теплоты́ Егó. Закóн Госпóдень непорóчен, обращáяй дýшы, свидéтельство Госпóдне вéрно, умудря́ющее младéнцы. Оправдáния Госпóдня прáва, веселя́щая сéрдце, зáповедь Госпóдня светлá, просвещáющая óчи. Страх Госпóдень чист, пребывáяй в век вéка: судьбы́ Госпóдни истинны, оправдáны вкýпе, вожделéнны пáче злáта и кáмене чéстна мнóга, и слáждша пáче мéда и сóта. Ибо раб Твой хранит я́, внегдá сохранити я́, воздая́ния мнóго. Грехопадéния кто разумéет? От тáйных моих очисти мя, и от чуждих пощади рабá Твоегó, аще не обладáют мнóю, тогдá непорóчен бýду и очищуся от грехá велика. И бýдут во благоволéние словесá уст моих, и поучéние сéрдца моегó пред Тобóю вы́ну, Гóсподи, Помóщниче мой и Избáвителю мой.
[Псалом 19]Услы́шит тя Госпóдь в день печáли, защитит тя имя Бóга Иáковля. Пóслет ти пóмощь от Святáго и от Сиóна застýпит тя. Помянéт вся́ку жéртву твою́, и всесожжéние твоé тýчно бýди. Даст ти Госпóдь по сéрдцу твоемý и весь совéт твой испóлнит. Возрáдуемся о спасéнии твоéм и во имя Гóспода Бóга нáшего возвеличимся. Испóлнит Госпóдь вся прошéния твоя́. Ны́не познáх, я́ко спасé Госпóдь христá Своегó, услышит eгó с Небесé Святáго Своегó, в силах спасéние десницы Егó. Сии на колесницах, и сии на кóнех, мы же во имя Гóспода Бóга нáшего призовéм. Тии спя́ти бы́ша и падóша, мы же востáхом и испрáвихомся. Гóсподи, спаси царя́ и услы́ши ны, вóньже áще день призовéм Тя.
[Псалом 20]Гóсподи, си́лою Твоéю возвесели́тся царь и о спасéнии Твоéм возрáдуется зелó. Желáние сéрдца eгó дал еси́ eмý, и хотéния устнý eгó нéси лиши́л eгó. Я́ко предвари́л еси́ eгó благословéнием благосты́нным, положи́л еси́ на главé eгó венéц от кáмене чéстна. Животá проси́л есть у Тебé, и дал еси́ eмý долготý дний во век вéка. Вéлия слáва eгó спасéнием Твои́м, слáву и велелéпие возложи́ши на негó. Я́ко дáси eмý благословéние во век вéка, возвесели́ши eгó рáдостию с лицéм Твои́м. Я́ко царь уповáет на Гóспода, и ми́лостию Вы́шняго не подви́жится. Да обря́щется рукá Твоя́ всем врагóм Твои́м, десни́ца Твоя́ да обря́щет вся ненави́дящия Тебé. Я́ко положи́ши их я́ко пещь óгненную во врéмя лицá Твоегó, Госпóдь гнéвом Свои́м смятéт я́, и снéсть их огнь. Плод их от земли́ погуби́ши, и сéмя их от сынóв человéческих. Я́ко уклони́ша на Тя злáя, помы́слиша совéты, и́хже не возмóгут состáвити. Я́ко положи́ши я́ хребéт, во избы́тцех Твои́х уготóвиши лицé их. Вознеси́ся, Гóсподи, си́лою Твоéю, воспоéм и поéм си́лы Твоя́.
Чтец:Слáва Отцý и Сыну и Святóму Дýху.
Хор:И ныне и присно и во вéки векóв. Аминь.
Аллилýиа, аллилýиа, аллилýиа, слáва Тебé Бóже.(3 рáза)
Гóсподи, помилуй. (3 рáза)
Слáва Отцý и Сыну и Святóму Дýху.
Чтец: И ныне и присно и во вéки векóв. Аминь.
(продолжение зри здесь)