ТОРЖЕСТВО ПРАВОСЛАВИЯ. Неделя первая Великого поста. ВСЕНОЩНОЕ БДЕНИЕ. Глас 5. Великая вечерня
13 мáрта 2022 гóда. Недéля пéрвая Велúкaго постá. Торжествó Правослáвия. Глас 5. Воскрéсная прáздничная слýжба для домáшнего (келéйного) совершéния. Всенощное бдéние состоúт из Велúкой вечéрни, ýтрени, тáже канóна и пéрвого чáса. Слýжба мирскúм чúном.
ВЕЛИКАЯ ВЕЧЕРНЯ
Молитвами святых отéц нáших, Гóсподи Иисýсе Христé, Бóже наш, помилуй нас, аминь.
Слáва Тебе, Бóже наш, слáва Тебé.
Царю Небéсный, Утéшителю, Дýше Истины, Иже вездé сый и вся исполня́яй, Сокрóвище благих и жизни Подáтелю, прииди́ и всели́ся в ны, и очи́сти ны от вся́кия сквéрны, и спаси, Блáже, Дýши нáша.
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ныне и присно и во вéки векóв, ами́нь.
Óтче наш, Иже еси́ на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Ами́нь.
Гóсподи, поми́луй, (12 раз.)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 103, предначинáтельный
Стихú избрáннии: Благослови́, душé моя́, Гóспода./ Благословéн еси́, Гóсподи./ Гóсподи, Бóже мой, возвели́чился еси́ зелó./ Благословéн еси́, Гóсподи./ Во исповéдание и в велелéпоту/ облéклся еси́. Благословéн еси́, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростию сотвори́л еси́./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился еси зелó. Во исповéдание и в велелéпоту облéклся еси. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя, полагáяй óблаки на восхождéние Своé, ходя́й на крилý вéтреню. Творя́й Áнгелы Своя дýхи и слуги́ Своя плáмень óгненный. Основáяй зéмлю на твéрди ея, не преклони́тся в век вéка. Бéздна, яко ри́за, одея́ние ея́, на горáх стáнут вóды, от запрещéния Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл еси им. Предéл положи́л еси, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáмения дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, извести́ хлеб от земли́. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстии, и́хже еси насади́л. Тáмо пти́цы вогнездя́тся, ероди́ево жили́ще предводи́тельствует и́ми. Гóры высóкия елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л еси тму, и бысть нощь, в нéйже прóйдут вси звéрие дубрáвнии. Ски́мни рыкáющии, восхи́тити и взыскáти от Бóга пи́щу себé. Возсия́ сóлнце и собрáшася и в лóжах свои́х ля́гут. Изы́дет человéк на дéло своé и на дéлание своé до вéчера. Яко возвели́чишася делá Твоя, Гóсподи, вся премýдростию сотвори́л еси, испóлнися земля́ твáри Твоея́. Сиé мóре вели́кое и прострáнное, тáмо гáди, и́мже несть числá, живóтная мáлая с вели́кими, тáмо корабли́ преплáвают, змий сей, eгóже создáл еси ругáтися eму. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé земли́. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от земли́, и беззакóнницы, я́коже не бы́ти им. Благослови́, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростию сотвори́л еси.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Пeрвая кафисма
Читаем либо кафисму 1-ю (1-ю cтатию(«Блажен муж» - 1-й антифон.)
[Псалом 1]Блажéн муж, и́же не и́де на совéт нечести́вых и на пути́ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вии, не тáко, но яко прах, eгóже возметáет ветр от лицá земли́. Сегó рáди не воскрéснут нечести́вии на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дие поучи́шася тщéтным? Предстáша цáрие зéмстии, и кня́зи собрáшася вкýпе на Гóспода и на Христá Егó. Растóргнем ýзы их и отвéржем от нас и́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростию Своéю смятéт я́. Аз же постáвлен есмь Царь от Негó над Сиóном, горóю святóю Егó, возвещáяй повелéние Госпóдне. Госпóдь речé ко Мне: Сын Мой еси Ты, Аз днесь роди́х Тя. Проси́ от Менé, и дам Ти язы́ки достоя́ние Твоé, и одержáние Твоé концы́ земли́. Упасéши я́ жезлóм желéзным, яко сосýды скудéльничи сокруши́ши я́. И ны́не, цáрие, разумéйте, накажи́теся вси судя́щии земли́. Рабóтайте Гóсподеви со стрáхом и рáдуйтеся Ему с трéпетом. Приими́те наказáние, да не когдá прогнéвается Госпóдь и поги́бнете от пути́ прáведнаго, егдá возгори́тся вскóре я́рость Егó. Блажéни вси надéющиися Нань.
[Псалом 3]Гóсподи, что ся умнóжиша стужáющии ми? Мнóзи востаю́т на мя, мнóзи глагóлют души́ моéй: несть спасéния eмý в Бóзе eгó. Ты же, Гóсподи, Застýпник мой еси, слáва моя́ и вознося́й главý мою́. Глáсом моим ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскресни́, Гóсподи, спаси́ мя, Бóже мой, я́ко Ты порази́л еси́ вся враждýющыя ми всýе: зýбы грéшников сокруши́л еси́. Госпóдне есть спасéние, и на лю́дех Твои́х благословéние Твоé.
Либо поем стихи избрáннии
БЛАЖЕН МУЖ
Чтец (или хор): Блажéн муж, и́же не и́де на совéт нечести́вых.
Хор: Аллилýиа, аллилýиа, аллилýиа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýиа, аллилýиа, аллилýиа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýиа, аллилýиа, аллилýиа.
Чтец (или хор): Блажéни вси надéющиися Нань.
Хор: Аллилýиа, аллилýиа, аллилýиа.
Чтец (или хор): Воскресни, Гóсподи, спаси́ мя, Бóже мой.
Хор: Аллилýиа, аллилýиа, аллилýиа.
Чтец (или хор): Госпóдне есть спасéние, и на лю́дех Твои́х благословéние Твоé.
Хор: Аллилýиа, аллилýиа, аллилýиа.
Чтец: Слáва Отцý и Сы́ну и Святóму Дýху.
Хор: Аллилýиа, аллилýиа, аллилýиа.
Хор: И ны́не и присно и во вéки векóв, аминь.
Хор: Аллилýиа, аллилýиа, аллилýиа.
Аллилýиа, аллилýиа, аллилýиа, слáва Тебé Бóже. (трúжды)
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
ГОСПОДИ ВОЗЗВАХ, ГЛАС 5
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéния моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ние рукý моéю/ - жéртва вечéрняя./ Услы́ши мя, Гóсподи.
[в приходской практике пропускается до стихир](в приходской практике пропускается до стихир): Положи́, Гóсподи, хранéние устóм мои́м, и дверь ограждéния о устнáх мои́х. Не уклони́ сéрдце моé в словесá лукáвствия, непщевáти вины́ о гресéх, с человéки дéлающими беззакóние, и не сочтýся со избрáнными их. Накáжет мя прáведник ми́лостию и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéниих их. Пожéрты бы́ша при кáмени судии́ их: услы́шатся глагóли мои́, я́ко возмогóша. Я́ко тóлща земли́ просéдеся на земли́, расточи́шася кóсти их при áде. Я́ко к Тебé, Гóсподи, Гóсподи, óчи мои́: на Тя уповáх, не отыми́ дýшу мою́. Сохрани́ мя от сéти, ю́же состáвиша ми, и от соблáзн дéлающих беззакóние. Падýт во мрéжу свою́ грéшницы: еди́н есмь аз, дóндеже прейдý.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролию́ пред Ним молéние моé, печáль мою́ пред Ним возвещý. Внегдá исчезáти от менé дýху моемý: и Ты познáл еси́ стези́ моя́: на пути́ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты еси́ уповáние моé, часть моя́ еси́ на земли́ живы́х. Вонми́ молéнию моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою,// исповéдатися úмени Твоемý.
Стихиры воскрéсные, глас 5: Честны́м Твои́м Крестóм, Христé,/ диáвола посрами́л еси́,/ и Воскресéнием Твои́м жало грехóвное притупи́л еси́,/ и спасл еси́ ны от врат смéртных:// слáвим Тя, Единорóдне.
Менé ждут прáведницы,// дóндеже воздáси мне.
Стихúра: Воскресéние дая́й рóду человéческому,/ я́ко овчá на заколéние ведéся,/ устраши́шася сегó кня́зи áдстии,/ и взя́шася вратá плачéвная./ Вни́де бо Царь слáвы Христóс,/ глагóля сýщим во ýзах, изыди́те:// и сýщим во тьме, откры́йтеся.
На 8. Стих: Из глубины воззвáх к Тебе, Гóсподи,// Гóсподи, услыши глас мой.
Стихúра: Вéлие чýдо,/ неви́димых Содéтель, за человеколю́бие плóтию пострадáв,/ воскрéсе Безсмéртный./ Прииди́те отéчествия язы́к, Томý поклони́мся:/ благоутрóбием бо Егó от прéлести избáвльшеся,// в Триéх Ипостáсех Еди́наго Бóга пéти навыкóхом.
Да бýдут ýши Твоú// внéмлюще глáсу молéния моегó.
Стихúра: Вечéрнее поклонéние/ принóсим Тебé, Невечéрнему Свéту,/ на конéц векóв, я́ко в зерцáле плóтию возсия́вшему ми́рови,/ и дáже до áда низшéдшему,/ и тáмо сýщую тьму разруши́вшему,/ и свет Воскресéния язы́ком показáвшему:// Светодáвче Гóсподи, слáва Тебé.
На 6. Стих: Аще беззакóния нáзриши, Гóсподи, Гóсподи, кто постоúт? Яко у Тебé очищéние есть.
Стихúра: Начáльника спасéния нáшего,/ Христá славослóвим:/ Томý бо из мéртвых воскрéсшу,/ мир от прéлести спасéн бысть./ Рáдуется лик А́нгельский,/ бéгает дéмонов прéлесть,/ Адáм пады́й востá,// диáвол упраздни́ся.
Имене рáди Твоегó потерпéх Тя, Гóсподи, потерпé душá моя в слóво Твоé, уповá душá моя на Гóспода.
Стихúра: И́же от кустоди́и научéни бывáху от беззакóнник,/ покры́йте Христóво Востáние,/ и приими́те срéбреники, и рцы́те/ я́ко нам спя́щим, из грóба укрáден бысть Мéртвый./ Кто ви́де, кто слы́ша, мертвецá укрáдена когдá,/ пáче же помáзана и нáга,/ остáвльша и во грóбе погребáльная Своя́?/ Не прельщáйтеся иудéе,/ навы́кните речéнием прорóческим, и уразумéйте,// я́ко Той есть вои́стинну Избáвитель ми́ра, и Всеси́льный.
На 4. Стих: От стрáжи ýтренния до нóщи, от стрáжи ýтренния, да уповáет Изрáиль на Гóспода.
Стихúры Триóди, глас 6: Тя, Непостижи́маго,/ прéжде денни́цы безначáльно из Невещéственнаго возсия́вшаго,/ безплóтнаго же чрéва Роди́телева,/ прорóцы Гóсподи, Твои́м Дýхом вдохновéни,/ прорекóша Отрочá бы́ти,/ из Неискусобрáчныя воплощáема,/ человéком совокупля́ема,/ и сýщими на земли́ зри́ма,/ и́миже я́ко Щéдрый/ просвещéния сподóби Твоегó,/ воспевáющих неизречéнное,// и честнóе Твоé Воскресéние.
Яко у Гóспода мúлость, и многое у Него избавлéние, и Той избáвит Изрáиля от всех беззакóний eго.
Стихúра: Слóвом Тя проповéдавшии/ богоглагóливии прорóцы,/ и дéлы почéтшии,/ безконéчную жизнь приплоди́ша,/ твáри бо Влады́ко, пáче Тебé Содéтеля,/ служи́ти не претерпéвше,/ ми́ра всегó евáнгельски отврати́шася,/ и сообрáзни бы́ша стрáсти Твоéй,/ ю́же провозвести́ша,/ и́хже моли́твами,/ сподóби непорóчно прейти́/ воздержáния пóприще,// еди́не Многоми́лостиве.
На 2. Стих: Хвалúте Гóспода вси языцы, похвалúте Егó вси лю́дие.
Стихúра: Естествóм неопи́санный Божéственным Твои́м сый,/ на послéдняя Влады́ко воплóщься,/ извóлил еси́ описовáтися,/ плóти бо прия́тием, и свóйства вся сея́ взял еси́./ Тéмже вид Твой образовáния описýющии/ любéзно целýем,/ к Твоéй любви́ возвышáеми,/ и исцелéний благодáть почерпáем из негó,/ апóстольским послéдующе// Божéственным предáнием.
Яко утвердúся мúлость Егó на нас, и úстина Госпóдня пребывáет во век.
Стихúра: Пречестнóе украшéние Христóва Цéрковь,/ честны́х прия́т и святы́х икóн,/ Спáса Христá и Богомáтере,/ и всех святы́х светлéйшее возставлéние,/ и́мже просвещáется, и красýется благодáтию,/ и сóнмище отлагáет ерети́ческое изгоня́щи,/ и рáдующися слáвит Человеколю́бца Бóга,// ея́ рáди претерпéвша стрáсти вóльныя.
Слáва Отцу и Сыну и Святóму Духу.
Стихúра Триóди, глас 2: Благодáть возсия́ и́стины,/ прообразýемая дрéвле сенóвно,/ ны́не явлéнно скончáся:/ се бо Цéрковь воплощéнным óбразом Христóвым,/ я́ко прекрáсною ýтварию облачи́тся,/ ски́нии свидéния óбраз пронаписýющи,/ и правослáвную вéру содержáщи,/ да Егóже почитáем,/ Сегó и óбраз держáще, не прельщáемся,/ да облекýтся в студ си́це невéрующии,/ нам бо слáва зрак Воплоти́вшагося/ благочéстно покланя́емый, не боготвори́мый./ Той облобызáюще вéрнии возопии́м:// Бóже, спаси́ лю́ди Твоя́, и благослови́ достоя́ние Твоé.
И ныне и прúсно и во вéки векóв, амúнь.
Догмáтик. Глас 5: В Чермнéм мóри,/ Неискусобрáчныя Невéсты óбраз написáся иногдá:/ тáмо Моисéй, раздели́тель воды́:/ зде же Гаврии́л, служи́тель чудесé./ Тогдá глубинý шéствова немóкренно Изрáиль;/ ны́не же Христá роди́ безсéменно Дéва./ Мóре по прошéствии Изрáилеве пребы́сть непрохóдно;/ Непорóчная по Рождествé Эмманýилеве пребы́сть Нетлéнна./ Сый, и прéжде Сый,/ явлéйся, я́ко Человéк,// Бóже поми́луй нас.
СВЕТЕ ТИХИЙ
Хор: Свéте Ти́хий святы́я слáвы Безсмéртнаго Отцá Небéснаго, Святáго, Блажéннаго, Иисусе Христé! Пришéдше на зáпад сóлнца, ви́девше свет вечéрний, поéм Отцá, Сына и Святáго Духа, Бóга. Достóин еси во вся временá пет бы́ти глáсы преподóбными, Сы́не Бóжий, живóт дая́й; тéмже мир Тя слáвит.
ПРОКИМЕН ВОСКРЕСНЫЙ
Чтец: Проки́мен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся.
Чтец: Облечéся Госпóдь в си́лу и препоя́сася.
Хор: Госпóдь воцарúся,/ в лéпоту облечéся.
Чтец: Ибо утверди́ вселéнную, я́же не подви́жится.
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý дний.
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, помилуй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн еси́, Гóсподи Бóже отéц нáших,/ и хвáльно и прослáвлено и́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн еси́, Гóсподи, научи́ мя оправдáнием Твои́м./ Благословéн еси́, Влады́ко, вразуми́ мя оправдáнием Твои́м./ Благословéн еси́, Святы́й, просвети́ мя оправдáнии Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéние,/ Тебé слáва подобáет, Отцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, помилуй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Слáва Отцý и Сыну и Святóму Дýху.
Стихúра Триóди, глас 2: Рáдуйтеся прорóцы честни́и,/ закóн Госпóдень дóбре учини́вшии,/ и вéрою я́вльшиися необори́мии столпи́ неуклóннии:/ вы бо и ходáтаи яви́стеся Нóваго Завéта Христóва,/ и престáвившеся на небесá./ Тогó моли́те,// умири́ти мир, и спасти́ дýши нáша.
И ныне и прúсно и во вéки векóв. Амúнь.
Богорóдичен, Триóди, глас тóйже: Все уповáние мое́/ на Тя возлагáю, Мáти Бóжия,// сохрани́ мя под покрóвом Твои́м.
Гóсподи, помилуй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СТИХИРЫ НА СТИХОВНЕ
Чтец (Стихúры воскрéсные, глас 5): Тебé, Воплощéннаго Спáса Христá,/ и Небéс неразлучи́вшася,/ во глáсех пéний величáем,/ я́ко Крест и смерть прия́л еси́ за род наш,/ я́ко Человеколю́бец Госпóдь,/ испровéргий áдова вратá,/ триднéвно воскрéсл еси́,// спасáя дýши нáша.
Стих: Госпóдь воцарúся, в лéпоту облечéся.
Прободéным Твои́м рéбром, Жизнодáвче,/ тóки оставлéния всем источи́л еси́,/ жи́зни и спасéния:/ плóтию же смерть восприя́л еси́,/ безсмéртие нам дáруя./ Всели́в же ся во гроб нас свободи́л еси́,/ совоскреси́в с Собóю слáвно, я́ко Бог./ Сегó рáди вопиéм:// Человеколю́бче Гóсподи, слáва Тебé.
Стих: И́бо утвердú вселéнную, я́же не подвúжется.
Стрáнно Твоé распя́тие,/ и éже во ад сошéствие, Человеколю́бче, есть:/ плени́в бо егó, и дрéвния ю́зники совоскреси́в с Собóю слáвно, я́ко Бог,/ рай отвéрз, восприя́ти сегó сподóбил еси́./ Тéмже и нам, слáвящим Твоé триднéвное Востáние,/ дáруй очищéние грехóв:/ рая́ жи́тели сподобля́я,// я́ко Еди́н Благоутрóбен.
Стих: Дóму Твоемý подобáет святы́ня, Гóсподи, в долготý дний.
Нас рáди плóтию страсть прии́мый,/ и триднéвен из мéртвых воскресы́й,/ плотски́я нáша стрáсти исцели́,/ и возстáви от прегрешéний лю́тых,// Человеколю́бче, и спаси́ нас.
Слáва Отцý и Сыну и Святóму Дýху.
Стихúра Триóди, глас 2: Из нечéстия во благочéстие прешéдше,/ и свéтом рáзума просвети́вшеся,/ псалóмски рукáми восплéщим,/ благодáрственно хвалý Бóгу принося́ще,/ и на стенáх, и дсках, и на свящéнных сосýдех,/ начертáнным свящéнным образóм Христóвым,/ и Пречи́стыя, и всех святы́х,/ чéстно поклони́мся, отлагáюще злочéстную злослáвных вéру,/ [честь бо óбраза, я́коже глагóлет Васи́лий, на первообрáзное прехóдит,]/ прося́ще моли́твами Пречи́стыя Твоея́ Мáтере, Христé Бóже наш, и всех святы́х,// даровáти нам вéлию ми́лость.
И ны́не и прúсно и во вéки векóв, амúнь.
Богорóдичен воскрéсный, глас 2 (по гласу «Славы»): О чудесé нóваго всех дрéвних чудéс!/ Кто бо познá мáтерь без мýжа рóждшую,/ и на рукý нося́щую,/ всю тварь Содержáщаго?/ Бóжие есть изволéние, Рóждшееся./ Егóже я́ко Младéнца, Пречи́стая,/ Твои́ма рукáма носи́вшая,/ и Мáтерне дерзновéние к Немý имýщая,/ не престáй моля́щи о чтýщих Тя,// ущéдрити и спасти́ дýши нáша.
Молитва святаго Симеона Богоприимца
Ныне отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи мои спасéние Твоé,/ éже еси́ уготóвал пред лицéм всех людéй,/ свет во откровéние язы́ков,// и слáву людéй Твои́х Изрáиля.
Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, Иже еси́ на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя́, я́ко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Мари́е, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá еси душ нáших. (двáжды)
Тропáрь торжествá Правослáвия, глас 2: Пречи́стому óбразу Твоемý покланя́емся, Благи́й,/ прося́ще прощéния прегрешéний нáших, Христé Бóже,/ вóлею бо благоволи́л еси плóтию взы́ти на Крест,/ да избáвиши, я́же создáл еси, от рабóты врáжия./ Тем благодáрственно вопиéм Ти:/ рáдости испóлнил еси вся, Спáсе наш,// пришéдый спасти́ мир.
Бýди и́мя Госпóдне благословéно от ныне и до вéка. (3 раза)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щий воззвá, и Госпóдь услы́ша и,/ и от всех скорбéй егó спасé и./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святи́и Егó,/ яко несть лишéния боя́щымся Его./ Богáтии обнищáша и взалкáша,/ взыскáющии же Гóспода не лишáтся вся́каго блáга./ Прииди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержи́ язык твой от зла,/ и устнé твои́, éже не глагóлати льсти./ Уклони́ся от зла и сотвори́ блáго,/ взыщи́ ми́ра, и пожени́ и./ Очи Госпóдни на прáведныя,/ и ýши Егó в моли́тву их./ Лицé же Госпóдне на творя́щия злáя,/ еже потреби́ти от земли́ пáмять их./ Воззвáша прáведнии, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
И глаголи утреню