Святителя Николая, архиепископа Мир Ликийских чудотворца(Никола зимний) УТРЕНЯ(окончание) ЧАС ПЕРВЫЙ
19 декабря́ 2023 гóда. Втóрник 29-й седмúцы по Пятидеся́тнице. И́же во святы́х отцà нáшего Нiколáя, архиепíскопа Мир Ликíйских, чудотвóрца. (Нiкóла зúмнiй). Глас 3. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Пресвятáя Богорóдице, спасù нас.
Чтец: Струю́ благодáти Твоея́ источѝ ми,/ плáменем злоключéнiй опаля́ему и лю́те истаявáему,/ истóчниче, благодáтно точáщiй,/ рóждшая рекý благодáтей,// из нея́же пiя́й вжáждется никогдáже. (Двáжды)
Хор: Пресвятáя Богорóдице, спасù нас.
Чтец: Я́ко Женихà Тя крáсный чертóг,/ я́ко Влады́чню палáту одушевлéнну,/ я́ко порфи́ру всезлатýю,/ я́ко крáснейшее оби́телище Хрїстóво,// Влады́чице всех, умоля́ющаго Тя спасѝ мя. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Свещáми благодáти, Богомýдре, просвещáемь,/ и свети́льник благочéстiя я́ве был есѝ,/ сýщiя в напáстех спасáеши,/ и сýщiя во глубинè морстéй избавля́еши,// и питáеши áлчущiя преслáвно, всеблажéнне.
Хор: Святúтелю óтче Нiкóлае, молù Бóга о нас.
Чтец: И́же в рай слáдости ны́не водворя́яся/ и неизречéнную слáву я́сно зря,/ от Небéсных круг певцы̀ твоя́ назирáеши,// от страстéй избавля́я, Богонóсе, всеблажéнне.
Хор: Пресвятáя Богорóдице, спасù нас.
Богорóдичен: Премýдрость, и Си́лу, и Слóво Ипостáсное Ѻ́тчее,/ Богомáти Чи́стая, родилà есѝ,/ от Твои́х пречи́стых кровéй свой храм прiи́мшую// и Семý по соединéнiю соедини́вшую нераздéльно.
Глас 1
Хор: Святúтелю óтче Нiкóлае, молù Бóга о нас.
Чтец: Ликовствýем духóвно, вси празднолю́бцы,/ Небесà, весели́теся, гóры же и хóлми,/ цéркви, и дев ли́цы, и пóстников свéтлость,// в пáмяти всеблажéннаго, в нéйже, сошéдшеся, Спáса величáем.
Хор: Святúтелю óтче Нiкóлае, молù Бóга о нас.
Чтец: Да пою́т пéсньми непрестáнно вси концы̀,/ похвáльными венцы̀ верх Нiколáя украшáюще я́ве,/ угóдника Хрїстà Бóга,// Егóже моли́твами от страстéй же и бед да избáвимся.
Хор: Святúтелю óтче Нiкóлае, молù Бóга о нас.
Чтец: Я́ко достóйное прiимѝ пéнiе, Нiкóлае, мáлаго трудà сегò,/ я́коже Хрїстóс прiя́т вдовы̀ два лéпта./ Не возгнушáйся окая́ннаго страстьмѝ,// не гордя́ся бо, треблажéнне, дерзнýх.
Хор: Слáва Отцý и Сы́ну и Святóму Дýху.
Трóичен: Соединя́ется Единосýщною Вóлею Трóица,/ разделя́ется же пáки Ли́чно нераздéльне,/ соблюдáющи Держáву при́сно,/ Отéц, Сын и Дух Живы́й,// Еди́н Трiипостáсный Бог, Егóже величáем.
Хор: И ны́не и прúсно и во вéки векóв. Амúнь.
Богорóдичен: Потреби́ся вся́ка печáль Рождествóм Твои́м,/ и отъя́т Госпóдь рыдáнiе, и плач, и вся́ку слезý/ от вся́каго лицà земнорóдных, Чи́стая Богорóдице Неискусобрáчная.// О Тебè и мы дóлги исполня́ем.
Катавáсiя Рождествá (глас 1): Тáинство стрáнное вúжу и преслáвное:/ Нéбо - вертéп, Престóл Херувíмскiй - Дéву,/ я́сли - вместúлище,/ в нúхже возлежè Невместúмый - Хрїстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен святúтеля: Вели́каго архiпáстыря и iерáрха вси,/ председáтеля Мирлiкíйскаго Нiколáя восхвáлим:/ мнóги бо мýжи спасè, непрáведно умрéти имýщыя,/ и царю́ явля́ется со Авлáвiем во сне,// решà непрáведный суд.
Слáва Ѻтцý и Сы́ну и Святóму Дýху.
Ин светúлен святúтеля: Вельмѝ тя прослáви в чудесéх Госпóдь/ и жи́ва и по концè, iерáрше Нiкóлае:/ кто бо от любвè вéры тóкмо святóе твоè и҆́мя призовéт и не áбiе услы́шан,// тéпла тя предстáтеля обретáет?
И҆ ны́не и прúсно и во вéки векóв. Амúнь.
Богорóдичен из минéи: Мýдрость Ипостáсную, и Слóво пресýщественное,/ и Врачà всех Хрїстà рóждши, Дéво,/ гноéнiя и я́звы душѝ моея́ исцелѝ лю́тыя и многоврéменныя// и сéрдца моегò стрáстная помышлéнiя умертвѝ.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егó Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры святúтеля, самоглáсны, глас 1: Воззрéв неуклóнно на высотý рáзума/ и узрéв неявлéнно премýдрости глубинý,/ твои́ми учéньми мiр обогати́л есѝ, óтче.// О нас при́сно моли́ся Хрїстý, святи́телю Нiкóлае.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Человéче Бóжiй, и вéрный угóдниче,/ и строи́телю Тогò тáин, и мýжу желáнiй духóвных,/ стóлпе одушевлéнный, и вдохновéнный óбраз,/ я́ко Божéственное бо сокрóвище тя Ми́рская Цéрковь, чудя́щися, прiя́ла есть// и моли́твенника о душáх нáших.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
И́ны стiхúры святúтеля, глас 1: Церкóвныя цвéты облетáя,/ я́коже птенéц Вы́шняго гнездá Áнгельскаго,/ Нiкóлае треблажéнне,/ зовéши при́сно к Бóгу о всех нас,/ и́же в нýждных бедáх и искушéнiих,// и избавля́еши моли́твами твои́ми.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Свящéнныя одéжды красотý/ дéятельными содéлал есѝ добродéтельми светлéйшую,/ óтче Богонóсе./ Тéмже нам священнодéйствуеши ди́вная,/ слáвных чудéс священнодéтелю,// лю́тых избавля́я ны.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúра: Неви́димых добрóты проходя́,/ стрáшную óну разумéл есѝ/ слáву святы́х, свя́те./ Тéмже нам Небéсная словесà/ присноживóтных óнех видéнiй явля́еши,// свящéннейшiй óтче.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: Я́ко во сне предстáл есѝ благочести́вому царю́/ и ýзники, óтче, от смéрти избáвил есѝ;/ моли́ся непрестáнно,/ я́ко да и ны́не моли́твами твои́ми/ избáвимся от искушéнiй, и бед, и болéзней,// достóйно благохвáлящiи тя.
Слáва Отцý и Сыну и Святóму Дýху.
Глас 5: Воструби́м трубóю пéсней,/ взыгрáем прáзднственная и ликовствýем, рáдующеся,/ в молéбное торжествò Богонóснаго отцà,/ царѝ и кня́зи да стекýтся,/ и́же сóнным стрáшным явлéнiем царя́ препирáюща/ непови́нно держи́мыя три отпусти́ти воевóды да воспою́т;/ пáстыри и учи́тели,/ Дóброму Пáстырю подобноревни́тельна пáстыря,/ сошéдшеся, восхвáлим;/ и҆́же в недýзех - врачà, в бедáх - избáвителя,/ грéшнiи - застýпника, ни́щiи - сокрóвище/ и и҆́же в скóрбех - утéшителя,/ спýтника - путешéствующiи,/ на мóри сýщiи - прави́теля/ и вси вездè тéпле предваря́юща./ Вели́каго святи́теля/ восхваля́юще, си́це рцем:/ пресвяты́й Нiкóлае, предварѝ, и избáви нас от настоя́щiя беды̀,// и спасѝ стáдо твоè моли́твами твои́ми.
И ны́не и прúсно и во вéки векóв. Амúнь.
Богорóдичен (самоподóбен, творéнiе Патрiáрха Гéрмана) глас 2: Вострýбим трубóю пéсней:/ прини́кши бо свы́ше, Всецари́ца Мáти Дéва/ благословéньми венчавáет воспевáющiя Ю́./ Лю́дiе да стекýтся/ и Цари́це да восплéщут в пéснех, Царя́ рóждшей,/ и́же смéртiю держи́мыя пéрвее/ разреши́ти человеколю́бно благоволи́вшаго;/ пáстырiе и учи́телiе,/ Дóбраго Пáстыря Пречи́стую Мáтерь, сошéдшеся, восхвáлим./ Свéщник златозáрный, светонóсный óблак,/ Небéс прострáннейшую, одушевлéнный кiвóт,/ огнезрáчный Влады́чень престóл,/ маннопрiéмную златýю стáмну,/ затворéнную Слóва дверь,/ всех хрїстiáн прибéжище,/ пéсньми Богоглáсными похваля́юще, си́це рцем:/ палáто Слóва,/ сподóби смирéнных нас Небéснаго Цáрствiя:// ничтóже бо невозмóжно ходáтайству Твоемý.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь Святúтеля Николáя, глас 4: Прáвило вéры и óбраз крóтости, воздержáнiя учи́теля яви́ тя стáду твоемý Я́же вещéй И́стина. Сегò рáди стяжáл есѝ смирéнием высóкая, нищетóю богáтая, óтче священноначáльниче Нiкóлае, молѝ Хрїстà Бóга, спасти́ся душáм нáшим.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный (отпустúтельный), глас 4: Éже от вéка утаéное/ и Áнгелом несвéдомое тáинство,/ Тобóю, Богорóдице, сýщим на земли́ яви́ся Бог,/ в несли́тном соединéнiи воплощáемь,/ и Крест вóлею нас рáди воспрiи́м,/ и́мже воскреси́в первоздáннаго,/ спасé от смéрти дýши нáша.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Тропáрь cв. Нiколáя, глас 4: Прáвило вéры и óбраз крóтости, воздержáнiя учи́теля яви́ тя стáду твоемý Я́же вещéй И҆́стина. Сегò рáди стяжáл есѝ смирéнiем высóкая, нищетóю богáтая, óтче священноначáльниче Нiкóлае, молѝ Хрїстà Бóга, спасти́ся душáм нáшим.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Святúтеля Николáя, глас 3: В Ми́рех, свя́те, священнодéйствитель показáлся есѝ, Хрїстóво бо, преподóбне, Евáнгелiе испóлнив, положи́л есѝ дýшу твою́ о лю́дех твои́х и спасл есѝ непови́нныя от смéрти. Сегó рáди освяти́лся есѝ, я́ко вели́кiй таи́нник Бóжiя благодáти.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу