Святителя Николая, архиепископа Мир Ликийских чудотворца (Никола зимний) УТРЕНЯ КАНОН
19 декабря́ 2023 гóда. Втóрник 29-й седмúцы по Пятидеся́тнице. И́же во святы́х отцà нáшего Нiколáя, архиепíскопа Мир Ликíйских, чудотвóрца. (Нiкóла зúмнiй). Глас 3. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ СВЯТИТЕЛЮ
Хор: Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси, живýщiи по вселéнней. Устà моя́ возглагóлют премýдрость, и поучéнiе сéрдца моегó рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесà Твоя́./ Гóсподи, возлюби́х благолéпiе дóму Твоегó, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х пути́ Госпóдни и не нечéствовах от Бóга моегó./ Устà прáведнаго поучáтся премýдрости, и язы́к егó возглагóлет суд./ Прáвда Егó пребывáет в век вéка./ Свящéнницы Твои́ облекýтся прáвдою, и преподóбнiи Твои́ возрáдуются.// Блажéни живýщiи в домý Твоéм, в вéки векóв восхвáлят Тя.
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (Трúжды)
Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
Гóсподи, поми́луй. (12 раз)
Седáльны прáздника по полiелéи, глас 5: Премýдраго iерáрха восхвáлим,/ я́ко тéпла в бедáх и в скóрбех сýща от Бóга помóщника и защи́тника,/ вси Нiколáя, вéрнiи, Богонóснаго благочéстно:/ мóлится бо ко Гóсподу// о вéрою творя́щих и пою́щих Божéственную пáмять егó.
Слáва Ѻтцý и Сы́ну и Святóму Дýху.
Глас 4: Предстáтель теплéйшiй Цéркве Хрiстóвы показáлся еси́, Нiкóлае,/ и ересéй безбóжная учéнiя разрушáя со дерзновéнiем,/ и прáвило показáлся еси́ всем Правослáвiя,// о всех моля́ся, послéдующих твои́м Божéственным учéнiем и наказáнiем.
И ны́не и прúсно и во вéки векóв. Амúнь.
Богорóдичен, глас 4: Скóро прiими́, Влады́чице, моли́твы нáша/ и сiя́ принеси́ Твоемý Сы́ну и Бóгу, Госпожé Всенепорóчная,/ избáви обстоя́нiй к Тебé притекáющiя,/ сокруши́ ковáрства и низложи́ дéрзость вооружáющихся безбóжных, Пречи́стая,// на рабы́ Твоя́.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый, псалóм Давíдов: Честнá пред Гóсподем смерть преподóбных Егó.(Пс.115:6)
Хор: Честнá пред Гóсподем/ смерть преподóбных Егó.
Чтец: Что воздáм Гóсподеви о всех, я́же воздадé ми? (Пс.115:3)
Хор: Честнá пред Гóсподем/ смерть преподóбных Егó.
Чтец: Честнá пред Гóсподем.
Хор: Смерть преподóбных Егó.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.36): Речè Госпóдь ко пришéдшим к Немý Iудéем: Аз eсмь дверь, Мнóю áще кто вни́дет, спасéтся; и вни́дет, и изы́дет, и пáжить обря́щет. Тать не прихóдит, рáзве да укрáдет и убiéт и погуби́т: Аз прiидóх, да живóт и́мут, и ли́шше и́мут. Аз eсмь пáстырь дóбрый: пáстырь дóбрый дýшу свою́ полагáет за óвцы: А наéмник, и́же несть пáстырь, eмýже не суть óвцы своя́, ви́дит вóлка грядýща, и оставля́ет óвцы, и бéгает. И волк расхи́тит их, и распýдит óвцы. А наéмник бежи́т, я́ко наéмник eсть, и неради́т о oвцáх. Аз eсмь пáстырь дóбрый, и знáю Моя́, и знáют Мя Моя́. Якоже знáет Мя Oтéц, и Аз знáю Oтцá, и дýшу Мою́ полагáю за óвцы. И и́ны óвцы и́мам, я́же не суть от дворá сегó, и ты́я Ми подобáет привести́, и глас Мой услы́шат, и бýдет eди́но стáдо, и eди́н Пáстырь.
[Синодальный перевод]Сказал Господь пришедшим к Нему Иудеям: Я - дверь: кто войдет Мною, тот спасется, и войдет, и выйдет, и пажить найдет. Вор приходит только для того, чтобы украсть, убить и погубить. Я пришел для того, чтобы имели жизнь и имели с избытком. Я - пастырь добрый: пастырь добрый полагает жизнь свою за овец. А наемник, не пастырь, которому овцы не свои, видит приходящего волка, и оставляет овец, и бежит; и волк расхищает овец, и разгоняет их. А наемник бежит, потому что наемник, и нерадит об овцах. Я - пастырь добрый; и знаю Моих, и Мои знают Меня. Как Отец знает Меня, так и Я знаю Отца; и жизнь Мою полагаю за овец. Есть у Меня и другие овцы, которые не сего двора, и тех надлежит Мне привести: и они услышат голос Мой, и будет одно стадо и один Пастырь.(Ин.10:9-16)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами святи́теля,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра cвятúтеля, глас 6: Наслéдниче Бóжiй,/ сопричáстниче Хрiстóв,/ служи́телю Госпóдень, свя́те Нiкóлае,/ по и́мени твоемý тáко и житié твоé:/ спросiя́ бо седи́не рáзум,/ свидéтельствоваше свéтлость лицá твоегó душéвное незлóбiе,/ извéствоваше крóтость слóва молчали́вое./ Жизнь твоя́ слáвна и успéнiе со святы́ми,// моли́ о душáх нáших.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН БОГОРОДИЦЫ, ГЛАС 1
(совмещенный с первым и вторым каноном Свят. Николая, гласы 2 и 1)
ПЕСНЬ 1
Iрмóс: Песнь побéдную поúм вси Бóгу,/ сотвóршему дúвная чудесà мы́шцею высóкою// и спáсшему Iзрáиля, я́ко прослáвися. (Двáжды)
Припéв: Пресвятáя Богорóдице, спасù нас.
Тропáрь: Премýдрости бéздну рóждшая,/ кáпли мýдрости ми истóчник благодáтно точáщiй. Чи́стая, низпосли́,// песнослóвити благодáтей Твои́х пучи́ну. (Двáжды)
Припéв: Пресвятáя Богорóдице, спасù нас.
Тропáрь: Пою́ Тя, Всепéтая, Ю́же воспевáют Áнгелов чи́ни,/ я́ко Бóга рóждшую препéтаго,// Егóже вся тварь воспевáет, я́ко прослáвися.(Двáжды)
Первый канон св. Николая, глас 2
Хор: Святúтелю óтче Нiкóлае, молù Бóга о нас.
Чтец: Венценóсец престóлу Хрiстóву, премýдре Нiкóлае,/ предстоя́ со Áнгельскими вóинствы,/ просвещéнiе ми дáруй, озаря́ющее души́ моея́ омрачéнiе,// я́ко да восхвалю́, рáдуяся, твою́, всеблажéнне, пáмять.
Хор: Святúтелю óтче Нiкóлае, молù Бóга о нас.
Чтец: Прославля́яй вся Госпóдь Тогó слáвящiя,/ тя вéрным прибéжище дадé,/ напáстей избавля́юща притекáющiя к твоемý крóву, Нiкóлае,// и призывáющiя тя вéрою и любóвiю, преслáвне.
Хор: Пресвятáя Богорóдице, спасù нас.
Богорóдичен: Сравни́тися желáнiе ми вложи́в змiй вселукáвый, Содéтелю,/ я́ко плéнника, восхи́ти./ Тобóю же, Всечи́стая, воззвáн бых,/ обожи́вся и́стиннейше:/ Ты бо, о Богомáти,// менé обожи́вшаго родилá еси́.
Второй канон св. Николая, глас 1
Хор: Святúтелю óтче Нiкóлае, молù Бóга о нас.
Чтец: Недоумéнным язы́ком и устнáми, похвалéнiе мáлое и молéнiе/ принести́ твоемý, Нiкóлае, прiидóх Богоподражáнному преизя́ществу;// но, я́ко богатодáвец, Спáса и Бóга ми́лостива подáждь ми.
Хор: Святúтелю óтче Нiкóлае, молù Бóга о нас.
Чтец: Человéк сый Небéсный, равноáнгелен на земли́ яви́лся еси́,/ вдов защи́тник готóвый, и утруждáемых отмсти́тель,// и всем скорбя́щим в бедáх помóщник, óтче Нiкóлае.
Хор: Святúтелю óтче Нiкóлае, молù Бóга о нас.
Чтец: Сказýет вся подсóлнечная, Нiкóлае треблажéнне,/ чудéс твои́х добродéтелей пучи́ну:/ ни́щiи предстáтеля, и сироты́ и вдовы́ питáтеля,// и слепи́и путевождá, вси же побóрника.
Хор: Слáва Отцý и Сы́ну и Святóму Дýху.
Трóичен: Трóицу чествýю Несоздáнную,/ Отцá и Сы́на со Дýхом, Существó Прóсто, Божествó,/ Естествó Несекóмое сущéственне, Три Ипостáси,// разделя́я Ли́чно и по Ипостáси.
Хор: И ны́не и прúсно и во вéки векóв. Амúнь.
Богорóдичен: Безсемéнно Слóво зачалá еси́,/ Еди́наго от Трóицы, Всенепорóчная,/ и Сегó плóтiю родилá еси́,/ пребы́вши по рождествé Дéва, я́ко и прéжде./ Сегó, я́ко Сы́на Твоегó и Бóга,// о нас при́сно моли́.
Катавáсiя Рождествá (глас 1): Хрїстóс раждáется - слáвите,/ Хрїстóс с Небéс - сря́щите./ Хрїстóс на землù - возносúтеся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися.
ПЕСНЬ 3
Iрмóс: Да утвердúтся сéрдце моè в вóли Твоéй, Хрїстè Бóже,/ И́же над водáми Нéбо утверждéй вторóе// и основáвый на водáх зéмлю, Всесúльне. (Двáжды)
Хор: Пресвятáя Богорóдице, спасù нас.
Чтец: Небéс чистéйшее Царéво оби́телище,/ благодáтно ды́шущiй вои́стинну и благовóнный рай,// надéжду хрiстiáн, Богороди́тельницу мою́ воспевáю. (Двáжды)
Хор: Пресвятáя Богорóдице, спасù нас.
Чтец: Слóвом Слóво породила́ еси́,/ слóвом все к существý привéдшаго словéсное естествó, кýпно и безсловéсное,// безсловéсiя избавля́ющаго человéки, Всеблагословéнная. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Нiкóлае блажéнне, Влады́ки и́скреннiй учени́к ты быв,// спасáеши к тебé притекáющия от лю́тых бед и смéрти гóрькiя.
Хор: Святúтелю óтче Нiкóлае, молù Бóга о нас.
Чтец: Очи́сти рабы́ Твоя́, грехóв оставлéнiе, я́ко благ,/ дáруя, Нiколáя, Твоегó угóдника,// я́же к Тебé ходáтайствы, Многоми́лостиве.
Хор: Пресвятáя Богорóдице, спасù нас.
Богорóдичен: Утоли́ смущéнiе души́ моея́, Пречи́стая,/ и жизнь окорми́, Всесвятáя, Бóга рóждшая,// в Нéмже утверди́ся сéрдце моé.
Глас 1
Хор: Святúтелю óтче Нiкóлае, молù Бóга о нас.
Чтец: Скрижáль в сéрдцы стяжáв, Богомýдре, мнóгих добродéтелей,/ напи́сану безсмéртным и пречи́стым пéрстом Хрiстá Бóга, Нiкóлае,// пáче мéда и сóта слáдость тóчиши из устéн твои́х.
Хор: Святúтелю óтче Нiкóлае, молù Бóга о нас.
Чтец: Показá благодáть на тебé преслáвне чудесá, Нiкóлае:/ чи́стое бо житié твоé, вои́стинну злáта светлéйши,// облистáет мрáчныя дýши зарéю Божéственнаго Дýха.
Хор: Святúтелю óтче Нiкóлае, молù Бóга о нас.
Чтец: Живéши и по смéрти, во снех я́ве явля́яся,/ и ю́ноши от смéрти преслáвно избáвил еси́, вопiя́ я́ве царю́:// не оби́ди мужéй, сýетною зáвистiю оклеветáнных.
Хор: Слáва Отцý и Сы́ну и Святóму Дýху.
Трóичен: Ми́лостива бýди мне, Всесвятáя Трóице, Бóже наш,/ безмéрными прегрешéнiи оскверни́вшему житié,/ Ѻ́тче, Сы́не и Дýше Живы́й,// соблюдáющи мя отвсю́ду, и при́сно неуя́звленна от скóрби.
Хор: И ны́не и прúсно и во вéки векóв. Амúнь.
Богорóдичен: Даéши, Богорóдице, спасéнiя надéжду рабóм Твои́м/ и в нýждах, и напáстех скоротéчными моли́твами соблюдáти и помогáти предстáни:// Ты бо еси́ похвалá нам, вéрным, Приснодéво.
Катавáсiя Рождествá (глас 1): Прéжде век от Отцà рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрїстý Бóгу возопiúм:/ вознесы́й рог наш,// свят есù, Гóсподи.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Седáльны Святúтеля Нiколáя, глас 8: Возшéд на высотý добродéтелей/ и Божéственными оттýду, óтче, озари́вся сiя́нiи чудéс,/ пресвéтел вои́стинну яви́лся еси́ мíрови пáстырь,/ нам в напáстех сый предстáтель непобеди́мь;/ тéмже, преслáвно врагá победи́в, лжу отгнáл еси́/ и человéки спасл еси́ от смéрти, Нiкóлае,/ моли́ Хрiстá Бóга грехóв оставлéнiе даровáти// чтýщим любóвiю святýю пáмять твою́.
Слáва Отцý и Сы́ну и Святóму Дýху.
Рекý исцелéнiй, оби́льне изливáющую,/ и истóчник тя чудéс неоскýдный показá, Нiкóлае, ми́лости бéздна:/ тя́жкими бо недýгами гóрце дручи́мiи/ и злоключéньми житiя́ лю́те мýчимiи/ вся́кiя скóрби целéбную вои́стинну обретáют лечбý,/ тéплое твоé защищéнiе./ Сегó рáди вопiéм ти:/ моли́ся Хрiстý Бóгу прегрешéнiй оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из Минéи, глас 8: Я́ко Дéву и еди́ну в женáх,/ Тя, без сéмене рóждшую Бóга плóтiю, вси ублажáем, рóди человéчестiи:/ огнь бо всели́ся в Тя Божествá,/ и я́ко Младéнца дои́ши Зижди́теля и Гóспода./ Тем, Áнгельскiй и человéческiй род, достóйно слáвим пресвятóе Рождествó Твоé/ и соглáсно вопiéм Ти:/ моли́ Хрiстá Бóга согрешéнiй оставлéнiе даровáти// покланя́ющимся вéрою пресвятóму Рождествý Твоемý.
ПЕСНЬ 4
Iрмóс: Духом провúдя, прорóче Аввакýме, Словесè воплощéнiе,/ проповéдал есù, вопiя́:/ внегдà приблúжитися лéтом, познáешися, внегдà прiитù врéмени, покáжешися.// Слáва сúле Твоéй, Гóсподи. (Двáжды)
Хор: Пресвятáя Богорóдице, спасù нас.
Чтец: Смéрти ýбо винá земны́м Éва бысть совéтом змíя;/ Ты же, Дéво Чи́стая, рóждшая слóвом Слóво,/ безсмéртiя и жи́зни Ходáтаица яви́лася еси́.// Тéмже достóйно поéм Тя. (Двáжды)
Хор: Пресвятáя Богорóдице, спасù нас.
Чтец: Дýхом прорóцы предзря́ще Тя, Чи́стая,/ гóру, дверь, трапéзу, святы́й кiвóт,/ свéщник, престóл жи́зни, стáмну и одр,/ Бóжiю Мáтерь в гадáнiих Тя прояви́ша,// и́хже мы зрим сбытié. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Прибли́жився чи́сте заря́м духóвным,/ светонóсец был еси́, мíра просвещáя концы́,// всем предстáтельствуя и вся спасáя вéрою, к тебé притекáющiя.
Хор: Святúтелю óтче Нiкóлае, молù Бóга о нас.
Чтец: Избавля́я от смéрти, я́ко яви́лся еси́ пéрвее, Нiкóлае,/ ю́ноши, преподóбне./ Тáко и ны́не мя спаси́ от вся́каго обстоя́нiя,// и напáстей, и бед, всеблажéнне.
Хор: Святúтелю óтче Нiкóлае, молù Бóга о нас.
Чтец: Облистáл еси́ добродéтелей сiя́ньми, всеблажéнне,/ подражáтель преизря́днейшiй Твоегó Влады́ки быв,/ спасáеши же, призывáемь,// благоговéнiем и любóвiю тя слáвящiя.
Хор: Пресвятáя Богорóдице, спасù нас.
Богорóдичен: Нáйде на Тя Влады́ка твáри воплощáемь,/ и спасáя, я́ко благоутрóбен, всегó мя человéка:// тéмже, вéрнiи, Богорóдицу Тя слáвим.
Глас 1
Хор: Святúтелю óтче Нiкóлае, молù Бóга о нас.
Чтец: Именовáнiе твоé, еди́но вои́стинну призывáемо,/ от всех врáжiих совéт скóро избавля́ет зовýщiя тебé тéпле, свящéнне Нiкóлае:/ я́ко пéрвее воевóды избáвил еси́,// спаси́ и нас от вся́каго лю́таго обстоя́нiя.
Хор: Святúтелю óтче Нiкóлае, молù Бóга о нас.
Чтец: Престóлу предстоя́ Бóжiю, моли́ти прилéжно, мýдре,/ не престáй о всех нас, твои́х вéрных рабéх, чýдне Нiкóлае,/ да огня́ вéчнаго избáвимся и от врагóв,// язы́ка лукáваго и озлоблéнiя.
Хор: Слáва Отцý и Сы́ну и Святóму Дýху.
Трóичен: Безначáльнаго Божествá начáло Отцá и Сы́на чту и Дýха почитáю Всесвятáго,/ вся́ческих Вседéтельное, Еди́нственное, Несекóмое,/ Треми́ Характи́ры и Ли́цы разделя́емое при́сно,// еди́но Цáрство Нераздéльное.
Хор: И ны́не и прúсно и во вéки векóв. Амúнь.
Богорóдичен: Ты вои́стинну пáче земны́х и Небéсных честнéйши Еди́на еси́, Богороди́тельнице:/ всех бо Творцá во утрóбе зачалá еси́,/ плóтiю вéщною одéяна, рóждши без сéмене.// О, новолéпнаго зрéнiя!
Катавáсiя Рождествá (глас 1): Жезл из кóрене Iессéева/ и цвет от негó, Хрїстè,/ от Дéвы прозя́бл есù,/ из горы̀, Хвáльный, приосенéнныя чáщи,/ пришéл есù, воплóщся от Неискусомýжныя,/ Невещéственный и Бóже:// слáва сúле Твоéй, Гóсподи.
ПЕСНЬ 5
Iрмóс: Свéтлый нам возсiя́й Свет Присносýщный,/ ýтренюющим о судьбáх зáповедей Твоúх,// Влады́ко Человеколю́бче, Хрїстè Бóже наш. (Двáжды)
Хор: Пресвятáя Богорóдице, спасù нас.
Чтец: Я́ко кiвóт, Честнáя, свящéнiя, и я́ко огнеобрáзный престóл свят,/ и я́ко палáта освящéнна, Влады́чице,// вмести́ла еси́ Бóга Вседержи́теля. (Двáжды)
Хор: Пресвятáя Богорóдице, спасù нас.
Чтец: Мáтерь неискусомýжная в дéвах, Ты пáки Дéва в мáтерех, еди́на Пречи́стая, яви́лася еси́:// Бóга бо неизречéнно родилá еси́, естествó воздаю́щаго. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Боголéпным житiéм, треблажéнне, просвещáемь,/ осуждéнныя непрáведным изречéнiем умрéти, предстáв, избáвил еси́,/ Влады́це Хрiстý зовýщiя:// инóго бо, рáзве Тебé, бóга не знáем.
Хор: Святúтелю óтче Нiкóлае, молù Бóга о нас.
Чтец: На Небесéх присносýщную слáву ны́не зря, и неизглагóланныя и Божéственныя зари́ светлéйшими наслаждáяся сiя́нiи,/ покры́й мя предстáтельством твои́м, преподóбне,// угóдниче Хрiстóв всечéстне.
Хор: Пресвятáя Богорóдице, спасù нас.
Богорóдичен: Да Твой взы́щеши óбраз, погребéнный страстьми́, Спáсе,/ Небéсных утаи́вся сил, воплóщься из Дéвы,/ яви́лся еси́ Тебé зовýщим:// инóго, рáзве Тебé, бóга не знáем.
Глас 1
Хор: Святúтелю óтче Нiкóлае, молù Бóга о нас.
Чтец: Проповéдует твоя́, óтче, чудесá, ны́не Мир,/ величáйшая митропóлiя и Ликíйская епáрхiя,/ и вся отéчествiя твоя́ чудодéйства,// и́миже вся от болéзней и скорбéй избавля́еши, Богоблажéнне Нiкóлае.
Хор: Святúтелю óтче Нiкóлае, молù Бóга о нас.
Чтец: Питáтель вдов и отéц сирóт,/ помóщник сýщим в скóрбех всеизря́днейшiй,/ плáчущим утешéнiе, пáстырь и путевóждь всех блудя́щих, Нiкóлае, сый,// и нас твои́ми моли́твами от бед избáви.
Хор: Святúтелю óтче Нiкóлае, молù Бóга о нас.
Чтец: Престáвился еси́ от земли́ к невещéственным оби́телем,/ идéже зри́ши добрóту неизречéнную Хрiстóву,/ и Áнгельским вóинством собесéдник яви́лся еси́./ Тéмже, со апóстолы и с мýченики ликýя,// прилéжно Влады́це всех, óтче Нiкóлае, о нас моли́ся.
Хор: Слáва Отцý и Сы́ну и Святóму Дýху.
Трóичен: Собезначáльная Три, Единопрестóльная, Нераздéльнаго же Еди́наго Божествá слáвлю Самовлáстная Ли́ца я́ве,/ И́мже из не сýщаго приведóхся во éже бы́ти, со Áнгелы зовы́й:// свят, свят, свят еси́, Гóсподи.
Хор: И ны́не и прúсно и во вéки векóв. Амúнь.
Богорóдичен: Человéком спасéнiе всем и уповáнiе,/ я́же предваря́ющи еди́на и спасáющи,/ помози́ и ны́не нам, вопiю́щим Тебé, Чи́стая,// и призывáющим Тя при́сно во обстоя́нiи лю́тых:/ Предстáтельницы бо ины́я, рáзве Тебé, по Бóзе не и́мамы.
Катавáсiя Рождествá (глас 1): Бог сый мúра, Отéц щедрóт,/ Велúкаго Совéта Твоегò Áнгела,/ мир подавáюща, послáл есù нам:/ тем, Богоразýмiя к свéту настáвльшеся,/ от нóщи ýтренююще,// славослóвим Тя, Человеколю́бче.
ПЕСНЬ 6
Iрмóс: Прорóка Ióну подражáя, вопiю́:/ живóт мой, Блáже, свободù из тли// и спасù мя, Спáсе мíра, зовýща: слáва Тебè. (Двáжды)
Хор: Пресвятáя Богорóдице, спасù нас.
Чтец: Заступлéнiе вéрных и печáльных рáдостное весéлiе,/ рáдостiю обогати́ духóвною рабы́ Твоя́,// желáющiя заступлéнiя Твоегó.(Двáжды)
Хор: Пресвятáя Богорóдице, спасù нас.
Чтец: Нéбо словéсное, храм пречи́стый,/ святы́й кiвóт, краснéйшiй Бóжiй рай,// в нéмже дрéво жи́зни моея́, да поéтся. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: И́же побéды, Нiкóлае, венéц на твоéм версé достóйно положи́ся,// я́ко победи́тель у́бо изря́днейшiй тя призывáющiя спаси́.
Хор: Святúтелю óтче Нiкóлае, молù Бóга о нас.
Чтец: Умерщвлéна мя, блажéнне, прегрешéньми/ и страстéй треволнéньми погружáема, яви́вся,// спаси́ ко пристáнищу Божéственныя вóли.
Хор: Пресвятáя Богорóдице, спасù нас.
Богорóдичен: На Тя надéжды возложи́х, Мáти Приснодéво, спасéнiя моегó// и Тя предстáтельницу полагáю жи́зни, твéрду же и непоколеби́му.
Глас 1
Хор: Святúтелю óтче Нiкóлае, молù Бóга о нас.
Чтец: Нóвый яви́лся еси́ Авраáм, Нiкóлае,/ я́ко единорóдна бо ны́не привéл еси́ сы́на Влады́це твоемý,/ безкрóвныя жéртвы принося́ при́сно./ Отонýдуже благослови́лся еси́, я́ко страннолю́бец, óтче,// и Трóицы был еси́ оби́тель Божéственна и непорóчна.
Хор: Святúтелю óтче Нiкóлае, молù Бóга о нас.
Чтец: Стрáнна и ужáсна содевáеши чудесá, Нiкóлае,/ по всей земли́ и в мóри далéче бéдствующим скоротéчными моли́твами предстáтельствуя,/ немощны́м врач и ни́щим питáтель,// побéды на враги́ тезоимени́т лю́дем вéрным явля́яся.
Хор: Святúтелю óтче Нiкóлае, молù Бóга о нас.
Чтец: Óком ýмным прови́дя бýдущая,/ учéнiй прáвых напóлнил еси́ вся концы́:/ Единосýщна Отцý Сы́на возвещáя нам, Áрiево неи́стовство потреби́л еси́,// столп правослáвныя вéры, честнáя твоя́ предложи́в исправлéнiя.
Хор: Слáва Отцý и Сы́ну и Святóму Дýху.
Трóичен: Чту и почитáю Трóицу Нераздéльную, Треми́ Ли́цы разделя́емую при́сно,/ соединя́емую же Существóм и Естествóм, я́ко Еди́но Начáло,/ Отцá, и Сы́на, и Дýха Святáго, всéми держáвно влады́чествующую// и вся соблюдáющую, я́ко хóщет.
Хор: И ны́не и прúсно и во вéки векóв. Амúнь.
Богорóдичен: Весь воплóщься во утрóбе Твоéй, Пречи́стая,/ Хрiстóс Бог без сéмене роди́ся:/ не стерпé бо Свои́х рук создáнiе зрéти, от льсти́ваго мýчимо,// прiи́де рабозрáчным óбразом человéческiй род избáвити.
Катавáсiя Рождествá (глас 1): Из утрóбы Ióну младéнца изблевà морскíй зверь,/ яковà прiя́т,/ в Дéву же всéльшееся Слóво/ и плоть прiéмшее прóйде сохрáншее нетлéнну./ Егóже бо не пострадà истлéнiя,// Рóждшую сохранù невреждéнну.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Святителя Николáя, глас 3: В Ми́рех, свя́те, священнодéйствитель показáлся еси́,/ Хрiстóво бо, преподóбне, Евáнгелiе испóлнив,/ положи́л еси́ дýшу твою́ о лю́дех твои́х/ и спасл еси́ непови́нныя от смéрти./ Сегó рáди освяти́лся еси́,// я́ко вели́кiй таи́нник Бóжiя благодáти.
Íкос: Воспои́м ны́не святи́теля пéсньми,/ ми́рским лю́дем пáстыря и учи́теля,/ да моли́твами егó просвети́мся:/ се бо яви́ся чист весь, нетлéнен дýхом,/ Хрiстý принося́ жéртву непорóчну, чи́сту, Бóгу благопрiя́тну,/ я́ко святи́тель, очищéн и душéю и тéлом,/ тéмже сый и́стинно Цéркве предстáтель и побóрник сея́,// я́ко вели́кiй таи́нник Бóжiя благодáти.
ПЕСНЬ 7
Iрмóс: Пещь, Спáсе, орошáшеся,/ óтроцы же, ликýюще, поя́ху:/ отцéв Бóже, благословéн есù. (Двáжды)
Хор: Пресвятáя Богорóдице, спасù нас.
Чтец: Высочáйший Нéбо Тя одушевлéнное,/ чертóг же, Чи́стая, благодáтно окружéн,// златообрáзную порфи́ру и рай показá. (Двáжды)
Хор: Пресвятáя Богорóдице, спасù нас.
Чтец: Утверди́ умá моегó вращéнiе,/ помышлéнiе мятéжно укрепи́ на недви́жимом кáмени// покрóвом Твои́м, Мáти Дéво. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Óстрому искушéнiю впадóх, лю́те пострекáемь,/ и ко вратóм áда прибли́жихся, скорбьми́ поражáемь,/ спаси́ мя моли́твами твои́ми, блажéнне, и возстáви, пою́ща:// благословéн еси́, Бóже отéц нáших.
Хор: Святúтелю óтче Нiкóлае, молù Бóга о нас.
Чтец: Незаходи́маго свéта невещéственными лучáми облистáемь,/ сýщiя во тьме скорбéй озлóбленныя исхи́ти/ и к просвещéнiю весéлiя настáви, пою́щiя:// благословéн еси́, Бóже отéц нáших.
Хор: Пресвятáя Богорóдице, спасù нас.
Богорóдичен: Моли́ Хрiстá, Сы́на Твоегó и Бóга, Дéво Богороди́тельнице,/ продáнныя лю́тыми прегрешéньми и лéстьми змiи́ными/ крóвiю Егó честнóю избáвитися, пою́щим:// благословéн еси́, Бóже отéц нáших.
Глас 1
Хор: Святúтелю óтче Нiкóлае, молù Бóга о нас.
Чтец: Вся́ких лю́тых недýг врач всеизря́днейшiй, óтче Никóлае, яви́вся,/ души́ моея́ нéмощь исцели́в, подáждь ми благоздрáвiе, вопи́ти:// отцéв Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Избáвив дрéвле воевóды от смéрти, свя́те,/ и ты́я воздви́гл еси́ пéти и слáвити Спáса Хрiстá с вéрою тéплою, и́же и взывáху:// отцéв Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Премýдрости чáши прибли́жився тáинственно, устнáми твои́ми, óтче Нiкóлае,/ кáпли одождéнiя почéрпл еси́,/ пáче мéда и сóта, лю́дем повелевáя вопи́ти:// отцéв Бóже, благословéн еси́.
Хор: Слáва Отцý и Сы́ну и Святóму Дýху.
Трóичен: Трóице, Тя воспевáем, Еди́нице Трисiя́тельнейшая, Единосýщная, Óтче, Сы́не и Дýше Святы́й,/ в Ни́хже вси крести́вшеся, воспевáем:// отцéв Бóже, благословéн еси́.
Хор: И ны́не и прúсно и во вéки векóв. Амúнь.
Богорóдичен: Я́ко всех твáрей вы́шши еси́, Богорóдице,/ моли́ся Твоемý Сы́ну и Бóгу,/ избáвитися мýки чествýющим Тя вои́стинну и слáвящим:// отцéв Бóже, благословéн еси́.
Катавáсiя Рождествá (глас 1): Óтроцы, благочéстiю совоспитáни,/ злочестúваго велéнiя небрéгше,/ óгненнаго прещéнiя не убоя́шася,/ но, посредè плáмени стоя́ще, поя́ху:// отцéв Бóже, благословéн есù.
ПЕСНЬ 8
Iрмóс: Егóже ужасáются Áнгели и вся вóинства,/ я́ко Творцà и Гóспода,/ пóйте, свящéнницы, прослáвите, óтроцы,/ благословúте, лю́дiе,// и превозносúте во вся вéки. (Двáжды)
Хор: Пресвятáя Богорóдице, спасù нас.
Чтец: Я́ко одушевлéнный чертóг и вдохновéнная червлени́ца,/ хлами́да червленошáрная всех Царя́ яви́лася еси́, Дéво, и порфи́ра,// из нея́же плоть сопросiя́ Богочеловéка Слóва. (Двáжды)
Хор: Пресвятáя Богорóдице, спасù нас.
Чтец: Зачалá еси́, Пречи́стая, всю тварь гóрстiю содержáщего,/ я́ко Зижди́теля и Бóга, неизречéнно, непости́жно нас рáди по нам Человéка бы́вша// и éже бе не отстýпльша. (Двáжды)
Глас 2
Хор: Святúтелю óтче Нiкóлае, молù Бóга о нас.
Чтец: Я́ко благ и сострадáтелен во глубинé напáстей лю́те содержи́мыя свободи́, блажéнне Нiкóлае,/ от содержáщих лю́тых, разрешéнiе подая́ моли́твами твои́ми// я́же ко Спáсу Хрiстý, священнотаи́нниче.
Хор: Святúтелю óтче Нiкóлае, молù Бóга о нас.
Чтец: Тайновóждь сýщих пáче умá,/ святы́х служи́тель и Небéсных сый, Богомýдре,// архiерéй же вéрен, прегрешéнiй оставлéнiя проси́ от Спáса нáшего, священноявлéнне.
Хор: Пресвятáя Богорóдице, спасù нас.
Богорóдичен: Изнемогáет мой ны́не ум, во глубинý впад безчéстiя,// я́ко отвсю́ду разли́чными объя́т есмь злы́ми; но Ты, Дéво, исцели́, безстрáстiя свéтом одевáющи.
Глас 1
Хор: Святúтелю óтче Нiкóлае, молù Бóга о нас.
Чтец: Чи́ни патрiáрхов и апóстолов,/ и священномýчеников собóри, и прорóков сослóвiе,/ весь собóр пóстнический блажáт Божéственное житié твоé,/ с ни́миже и мы вопiéм:// да благослови́т тварь вся Гóспода и превознóсит Егó во вéки.
Хор: Святúтелю óтче Нiкóлае, молù Бóга о нас.
Чтец: Высочáйшiй Всецарю́, великодержáвне,/ моли́твами преподóбнаго пáстыря жизнь умири́ всех, Слóве, хрiстiáн,/ побóрствуя на вáрвары, да Тебé, Хрiстý, зовéм:// да благослови́т тварь вся Гóспода и превознóсит во вся вéки.
Хор: Святúтелю óтче Нiкóлае, молù Бóга о нас.
Чтец: Свéтом просвéщся непристýпным, óтче,/ дýши сýщих в скóрби озаря́еши,/ разоря́я всю мрáчную тьму напáстей,/ облистáв же весéлiем сердцá нáша./ И́миже далечесiя́тельно просвещáеми, вопiéм:// да благослови́т тварь вся Гóспода и превознóсит во вся вéки.
Хор: Благословúм Отцá, и Сы́на, и Святáго Дýха, Гóспода.
Трóичен: Живóт и Животы́ и Еди́н и Три свéты, Трóицу вéрно воспевáем,/ - отéческим послéдующе Божéственным и́стинно учéнiем,/ - Отцá, и Сы́на, и Дýха Святáго./ С ни́миже благочéствующе, воспои́м:// да благослови́т тварь вся Гóспода и превознóсит во вся вéки.
Хор: И ны́не и прúсно и во вéки векóв. Амúнь.
Богорóдичен: Чýдо страннолéпно купинá óбраз прообрази́, Чи́стая Отрокови́це,/ горя́щи неопáльна дрéвле на горé Сiнáйстей,/ тáйну Рождествá Твоегó прописýющи:/ огнь бо, в Тя Божествá всели́выйся, неврéдну Тя соблюдé.// Егóже воспевáем во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Рождествá (глас 1): Чýда преестéственнаго/ росодáтельная изобразù пещь óбраз:/ не бо, я́же прiя́т, палúт ю́ныя,/ я́ко нижè огнь Божествà Дéвы,/ в Ню́же внúде утрóбу./ Тем воспевáюще, воспоéм:/ да благословúт тварь вся Гóспода// и превознóсит во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Живопрiéмный истóчник приснотекýщiй,/ светонóсный светúльник благодáти,/ храм одушевлéнный, сень пречúстую,/ Небесè и землù прострáннейшую,// Богорóдицу, вéрнiи, величáем.(Двáжды)
Продолжéнiе здесь