Святителя Николая, архиепископа Мир Ликийских чудотворца (Никола зимний) ВСЕНОЩНОЕ БДЕНИЕ. УТРЕНЯ
19 декабря́ 2023 гóда. Втóрник 29-й седмúцы по Пятидеся́тнице. И́же во святы́х отцà нáшего Нiколáя, архиепíскопа Мир Ликíйских, чудотвóрца. (Нiкóла зúмнiй). Глас 3. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в земли́ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè мои́ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́нїй Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делá Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 3
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь cв. Нiколáя, глас 4: Прáвило вéры и óбраз крóтости,/ воздержáнiя учи́теля/ яви́ тя стáду твоемý/ Я́же вещéй И́стина./ Сегó рáди стяжáл есѝ смирéнiем высóкая,/ нищетóю богáтая,/ óтче священноначáльниче Нiкóлае,/ молѝ Хрїстá Бóга,// спасти́ся душáм нáшим. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный (отпустúтельный), глас 4 (по глáсу «Слáвы»): Éже от вéка утаéное,/ и Áнгелом несвéдомое тáинство,/ Тобóю Богорóдице сýщым на землѝ яви́ся Бог,/ в несли́тном соединéнiи воплощáемь,/ и Крeст вóлею нас рáди воспрiи́м,/ и҆́мже воскреси́в первоздáннаго,// спасè от смéрти дýшы нáша.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА СЕДЬМАЯ
И чтем кафíсму 7-ю ( или одúн псалóм, или до 1-й Слáвы)
[Псалом 46]Вси язы́цы восплещи́те рукáми, воскли́кните Бóгу глáсом рáдованiя. Я́ко Госпóдь Вы́шнiй стрáшен, Царь вéлiй по всей земли́. Покори́ лю́ди нам и язы́ки под нóги нáша: избрáнам достоя́нiе Своé, добрóту Iáковлю, ю́же возлюби́. Взы́де Бог в воскликновéнiи, Госпóдь во глáсе трýбне. Пóйте Бóгу нáшему, пóйте, пóйте Царéви нáшему, пóйте. Я́ко Царь всея́ земли́ Бог, пóйте разýмно. Воцари́ся Бог над язы́ки, Бог седи́т на Престóле святéм Своéм. Кня́зи лю́дстiи собрáшася с Бóгом Авраáмлим. Я́ко Бóжiи держáвнiи земли́ зелó вознесóшася.
[Псалом 47]Вéлiй Госпóдь и хвáлен зелó во грáде Бóга нáшего, в горé святéй Егó. Благокорéнным рáдованiем всея́ земли́: гóры Сióнскiя, рéбра сéверова, град Царя́ Вели́каго. Бог в тя́жестех eгó знáемь есть, егдá заступáет и́. Я́ко се цáрiе зéмстiи собрáшася, снидóшася вкýпе. Ти́и ви́девше тáко, удиви́шася, смятóшася, подвигóшася. Трéпет прiя́т я́: тáмо болéзни я́ко раждáющiя. Дýхом бýрным сокруши́ши корабли́ Фарси́йскiя. Я́коже слы́шахом, тáко и ви́дехом во грáде Гóспода сил, во грáде Бóга нáшего, Бог основá и́ в век. Прия́хом, Бóже, ми́лость Твою́ посредé людéй Твои́х. По и́мени Твоемý, Бóже, тáко и хвалá Твоя́ на концáх земли́, прáвды испóлнь десни́ца Твоя́. Да возвесели́тся горá Сióнская и да возрáдуются дщéри Iудéйскiя судéб рáди Твои́х, Гóсподи. Обыди́те Сióн и обыми́те eгó, повéдите в столпéх eгó. Положи́те сердцá вáша в си́лу Егó и раздели́те дóмы Егó, я́ко да повéсте в рóде инóм. Я́ко Той есть Бог наш во век и в век вéка, Той упасéт нас во вéки.
[Псалом 48]Услы́шите сия́ вси язы́цы, внуши́те вси живýщии по вселéнней: земнорóднии же и сы́нове человéчестии, вкýпе богáт и убóг. Устá моя́ возглагóлют премýдрость, и поучéние сéрдца моегó рáзум. Приклоню́ в при́тчу ýхо моé, отвéрзу во псалти́ри ганáние моé. Вскýю бою́ся, в день лют? Беззакóние пяты́ моея́ обы́дет мя. Надéющиися на си́лу свою́ и о мнóжестве богáтства своегó хвáлящиися, брат не избáвит, избáвит ли человéк? Не даст Бóгу измéны за ся, и цéну избавлéния души́ своея́, и утруди́ся в век. И жив бýдет до концá, не ýзрит пáгубы. Егдá уви́дит премýдрыя умирáющия, вкýпе безýмен и несмы́слен поги́бнут и остáвят чужди́м богáтство своé. И грóби их жили́ща их во век, селéния их в род и род, нарекóша именá своя́ на земля́х. И человéк в чéсти сый не разумé, приложи́ся скотóм несмы́сленным и уподóбися им. Сей путь их соблáзн им, и по сих во устéх своих благоволя́т. Я́ко óвцы во áде положéни суть, смерть упасéт я́, и обладáют и́ми прáвии заýтра, и пóмощь их обетшáет во áде, от слáвы своея́ изриновéни бы́ша. Обáче Бог избáвит дýшу мою́ из руки́ áдовы, егдá приéмлет мя. Не убóйся, егдá разбогатéет человéк или́ егдá умнóжится слáва дóму eгó: я́ко внегдá умрéти eмý, не вóзмет вся, нижé сни́дет с ним слáва eгó. Я́ко душá eгó в животé eгó благослови́тся: исповéстся Тебé, егдá благосотвори́ши eмý. Вни́дет дáже до рóда отéц свои́х, дáже до вéка не ýзрит свéта. И человéк в чéсти сый не разумé, приложи́ся скотóм несмы́сленным и уподóбися им.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 49]Бог богóв Госпóдь глагóла и призвá зéмлю от востóк сóлнца до зáпад. От Сиóна благолéпие красоты́ Егó. Бог я́ве прии́дет, Бог наш, и не премолчи́т: огнь пред Ним возгори́тся, и óкрест Егó бýря зéльна. Призовéт Нéбо свы́ше и зéмлю разсуди́ти лю́ди Своя́. Собери́те Емý преподóбныя Егó, завещáющiя завéт Егó о жéртвах. И возвестя́т небесá прáвду Егó, я́ко Бог судiя́ есть. Услы́шите, лю́дiе мои́, и возглагóлю вам, Iзрáилю, и засвидéтельствую тебé: Бог, Бог твой есмь Аз. Не о жéртвах твои́х обличý тя, всесожжéнiя же Твоя́ предо Мнóю суть вы́ну. Не прiимý от дóму Твоегó тельцóв, нижé от стад твои́х козлóв. Я́ко мои́ суть вси звéрiе дубрáвнiи, скóти в горáх и волóве. Познáх вся пти́цы небéсныя, и красотá сéльная со Мнóю есть. Áще взáлчу, не рекý тебé: Моя́ бо есть вселéнная и исполнéнiе ея́. Едá ям мясá ю́нча или́ кровь козлóв пiю́? Пожри́ Бóгови жéртву хвалы́ и воздáждь Вы́шнему моли́твы Твоя́. И призови́ Мя в день скóрби твоея́, и измý тя, и прослáвиши Мя. Грéшнику же речé Бог: вскýю ты повéдаеши оправдáния Моя́ и восприéмлеши завéт Мой усты́ твои́ми? Ты же возненави́дел еси́ наказáние и отвéргл еси́ словесá Моя́ вспять. Áще ви́дел еси́ тáтя, текл еси́ с ним, и с прелюбодéем учáстие твоé полагáл еси́. Устá Твоя́ умнóжиша злóбу, и язы́к твой сплетáше льщéния. Седя́, на брáта твоегó клеветáл еси́ и на сы́на мáтере твоея́ полагáл еси́ соблáзн. Сия́ сотвори́л еси́ и умолчáх, вознепщевáл еси́ беззакóние, я́ко бýду тебé подóбен. Обличý тя и предстáвлю пред лицéм твои́м грехи́ Твоя́. Разумéйте ýбо сия́, забывáющии Бóга, да не когдá похи́тит, и не бýдет избавля́яй. Жéртва хвалы́ прослáвит Мя, и тáмо путь, и́мже явлю́ eмý спасéние Моé.
[Псалом 50]Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 51]Что хвáлишися во злóбе, си́льне? Беззакóнiе весь день. Непрáвду умы́сли язы́к твой, я́ко бри́тву изощрéну сотвори́л еси́ лесть. Возлюби́л еси́ злóбу пáче благосты́ни, непрáвду нéже глагóлати прáвду. Возлюби́л еси́ вся глагóлы потóпныя, язы́к льстив. Сегó рáди Бог разруши́т тя до концá, востóргнет тя, и пресели́т тя от селéнiя твоегó и кóрень твой от земли́ живы́х. У́зрят прáведнiи и убоя́тся, и о нем возсмею́тся и рекýт: се человéк, и҆́же не положи́ Бóга Помóщника себé, но уповá на мнóжество богáтства своегó, и возмóже суéтою своéю. Аз же я́ко мáслина плодови́та в домý Бóжiи, уповáх на ми́лость Бóжiю во век и в век вéка. Исповéмся Тебé во век, я́ко сотвори́л еси́, и терплю́ и҆́мя Твоé, я́ко блáго пред преподóбными Твои́ми.
[Псалом 52]Речé безýмен в сéрдце своéм: несть Бог, растлéша и омерзи́шася в беззакóнiих, несть творя́й благóе. Бог с Небесé прини́че на сы́ны человéческiя, ви́дети, áще есть разумевáяй или́ взыскáяй Бóга? Вси уклони́шася, вкýпе непотрéбни бы́ша, несть творя́й благóе, несть до еди́наго. Ни ли уразумéют вси дéлающiи беззакóнiе, снедáющiи лю́ди моя́ в снедь хлéба, Гóспода не призвáша. Тáмо устраши́шася стрáха, идéже не бе страх, я́ко Бог разсы́па кóсти человекоугóдников: постыдéшася, я́ко Бог уничижи́ их. Кто даст от Сióна спасéнiе Iзрáилево? Внегдá возврати́т Бог пленéнiе людéй Свои́х, возрáдуется Iáков и возвесели́тся Iзрáиль.
[Псалом 53]Бóже, во и҆́мя Твоé спасѝ мя, и в силе Твоéй судѝ ми. Бóже, услы́ши молитву мою, внушѝ глагóлы уст моих. Яко чýждiи востáша на мя и крéпцыи взыскáша дýшу мою, и не предложи́ша Бóга пред собóю. Се бо Бог помогáет ми, и Госпóдь застýпник душѝ моéй. Отврати́т злáя врагóм мои́м, и҆́стиною Твоéю потребѝ их. Вóлею пожрý Тебé, исповéмся и҆́мени Твоемý, Гóсподи, яко блáго; Яко от вся́кiя печáли избáвил мя есѝ, и на врагѝ моя воззрé óко моé.
[Псалом 54]Внушѝ, Бóже, молитву мою и не прéзри молéнiя моегó. Вонмѝ ми и услыши мя: возскорбéх печáлiю моéю и смятóхся. От глáса врáжiя и от стужéнiя грéшнича, яко уклони́ша на мя беззакóнiе и во гнéве враждовáху ми. Сéрдце мое смятéся во мне и боя́знь смéрти нападé на мя. Страх и трéпет прiиде на мя и покры́ мя тьма. И рех: кто даст ми крилé, яко голуби́не, и полещý, и почíю; Се удалихся бéгая и водворихся в пустыни. Чáях Бóга спасáющаго мя от малодýшiя и от бýри. Потопи Гóсподи, и разделѝ языки и҆́х: я́ко видех беззакóнiе и пререкáнiе во грáде. Днем и нóщiю обыдет и по стенáм егó: беззакóнiе и труд посредé егó и непрáвда. И не оскудé от стогн его лихва и лесть. Яко áще бы враг поносил ми, претерпéл бых ýбо, и áще бы ненави́дяй мя на мя велерéчевал, укрыл бых ся от негó. Ты же человéче равнодýшне, владыко мой и знáемый мой; И҆́же кýпно наслаждáлся еси́ со мнóю брáшен, в дoмý Бóжiи ходи́хом единомышлéнiем. Да прiи́дет же смерть на ня, и да сни́дут во ад жи́ви, яко лукáвство в жили́щах и҆́х, посредé и҆́х. Аз к Бóгу воззвáх, и Госпóдь услыша мя. Вéчер и заýтра, и полýдне повéм, и возвещý, и услышит глас мой. Избáвит ми́ром дýшу мою от приближáющихся мне, яко во мнóзе бяху со мнóю. Услышит Бог и смири́т я, Сый прéжде век. Несть бо им изменéнiя, яко не убояшася Бóга. Прострé рýку свою на воздаянiе, оскверни́ша завéт Егó. Раздели́шася от гнéва лицá Егó, и прибли́жишася сердцá их, умякнуша словесá их пáче елéа, и та суть стрéлы. Возвéрзи на Гóспода печáль твою, и Той тя препитáет, не даст в век молвы прáведнику. Ты же, Бóже, низведéши их во студенéц истлéнiя, мýжiе кровéй и льсти не преполовя́т дней свои́х. Аз же, Гóсподи, уповáю на Тя.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáльны святúтеля, глас 1): В Ми́рех живы́й чýвственне, iерáрше,/ ми́ром разýмно духóвным яви́лся еси́ помáзан, óтче Нiкóлае./ Тéмже ми́ры чудéс твои́х мiр облаговóнил еси́,/ ми́ро приснотекýщее проливáя,// ми́рными твои́ми благовóнными словесы́ и пáмятiю твоéю.
Слáва Отцý и Сы́ну и Святóму Дýху.
Облиставáеши на земли́ чудéс лучáми, Нiкóлае мýдре,/ и дви́жеши всяк язы́к на слáву же и хвалý на земли́ тя Прослáвльшаго,/ Егóже моли́ вся́кiя нýжды избáвитися// пáмять твою́ вéрою и любóвiю почитáющим, отцéм избрáнiе.
И ны́не и прúсно и во вéки векóв. Амúнь.
Богорóдичен: Всех Творцá, Бóга же и Содéтеля, Всенепорóчная Чи́стая,/ Дýхом Божéственным в ложеснáх зачалá еси́/ и тлéнiя кромé родилá еси́,/ Егóже слáвяще, Тя воспевáем Дéво,// я́ко палáту Всецаря́ и мíра защищéнiе.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ВОСЬМАЯ
И чтем кафíсму 8-ю (или одúн псалóм, или до 1-й Слáвы)
[Псалом 55]Поми́луй мя, Бóже, я́ко попрá мя человéк, весь день боря́ стужи́ ми. Попрáша мя врази́ мои́ весь день, я́ко мнóзи борю́щии мя с высоты́. В день не убою́ся, аз же уповáю на Тя. О Бóзе похвалю́ словесá моя́, на Бóга уповáх, не убою́ся, что сотвори́т мне плоть? Весь день словéс мои́х гнушáхуся, на мя вся помышлéния их на зло. Вселя́тся и скры́ют, ти́и пя́ту мою́ сохраня́т, я́коже потерпéша дýшу мою́. Ни о чесóмже отри́неши я́, гнéвом лю́ди низведéши. Бóже, живóт мой возвести́х Тебé, положи́л еси́ слéзы моя́ пред Тобóю, я́ко и во обетовáнии Твоéм. Да возвратя́тся врази́ мои́ вспять, вóньже áще день призовý Тя, се познáх, я́ко Бог мой еси́ Ты. О Бóзе похвалю́ глагóл, о Гóсподе похвалю́ слóво. На Бóга уповáх, не убою́ся, что сотвори́т мне человéк? Во мне, Бóже, моли́твы, я́же воздáм хвалы́ Твоея́, я́ко избáвил еси́ дýшу мою́ от смéрти, óчи мои́ от слез, и нóзе мои́ от поползновéния, благоугождý пред Гóсподем во свéте живы́х.
[Псалом 56]Поми́луй мя, Бóже, поми́луй мя, я́ко на Тя уповá душá моя́, и на сень крилý Твоéю надéюся, дóндеже прéйдет беззакóние. Воззовý к Бóгу Вы́шнему, Бóгу, благодéявшему мне. Послá с Небесé и спасé мя, дадé в поношéние попирáющия мя, послá Бог ми́лость Свою́ и и́стину Свою́, и избáви дýшу мою́ от среды́ ски́мнов. Поспáх смущéн, сы́нове человéчестии, зýбы их орýжия и стрéлы, и язы́к их меч остр. Вознеси́ся на Небесá, Бóже, и по всей земли́ слáва Твоя́. Сеть уготóваша ногáм мои́м и слякóша дýшу мою́, ископáша пред лицéм мои́м я́му и впадóша в ню. Готóво сéрдце моé, Бóже, готóво сéрдце моé, воспою́ и пою́ во слáве моéй. Востáни слáва моя́, востáни псалти́рю и гýсли, востáну рáно. Исповéмся Тебé в лю́дех, Гóсподи, воспою́ Тебé во язы́цех, я́ко возвели́чися до Небéс ми́лость Твоя́, и дáже до óблак и́стина Твоя́. Вознеси́ся на Небесá, Бóже, и по всей земли́ слáва Твоя́.
[Псалом 57]Áще вои́стинну ýбо прáвду глагóлете, прáвая суди́те, сы́нове человéчестии. И́бо в сéрдце беззакóние дéлаете, на земли́ непрáвду рýки вáша сплетáют. Очужди́шася грéшницы от ложéсн, заблуди́ша от чрéва, глагóлаша лжу. Я́рость их по подóбию змiинý, я́ко áспiда глýха и затыкáющаго ýши свои́, и́же не услы́шит глáса обавáющих, обавáемь обавáется от премýдра. Бог сокруши́т зýбы их во устéх их, членóвныя львов сокруши́л есть Госпóдь. Уничижáтся я́ко водá мимотекýщая, напряжéт лук свой, дóндеже изнемóгут. Я́ко воск растáяв отъи́мутся, падé огнь на них и не ви́деша сóлнца. Прéжде éже разумéти тéрния вáшего рáмна, я́ко жи́вы, я́ко во гнéве пожрéт я́. Возвесели́тся прáведник, егдá уви́дит отмщéнiе, рýце свои́ умы́ет в крóви грéшника. И речéт человéк: áще ýбо есть плод прáведнику, ýбо есть Бог судя́ им на земли́.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 58]Изми́ мя от враг мои́х, Бóже, и от востаю́щих на мя избáви мя. Избáви мя от дéлающих беззакóние и от муж кровéй спаси́ мя. Я́ко се улови́ша дýшу мою́, нападóша на мя крéпцыи, нижé беззакóние моé, нижé грех мой, Гóсподи. Без беззакóния текóх и испрáвих, востáни в срéтение моé и виждь. И ты, Гóсподи Бóже сил, Бóже Изрáилев, вонми́ посети́ти вся язы́ки, да не ущéдриши вся дéлающия беззакóние. Возвратя́тся на вéчер и взáлчут, я́ко пес, и обы́дут град. Се ти́и отвещáют усты́ свои́ми, и меч во устнáх их, я́ко кто слы́ша? И Ты, Гóсподи, посмеéшися им, уничижи́ши вся язы́ки. Держáву мою́ к Тебé сохраню́, я́ко Ты, Бóже, Застýпник мой еси́. Бог мой, ми́лость Егó предвари́т мя, Бог мой, яви́т мне на вразéх мои́х. Не уби́й их, да не когдá забýдут закóн Твой, расточи́ я́ си́лою Твое́ю и низведи́ я́, Защи́тниче мой, Гóсподи. Грех уст их, слóво устéн их, и я́ти да бýдут в горды́ни своéй, и от кля́твы и лжи возвестя́тся в кончи́не. Во гнéве кончи́ны, и не бýдут, и увéдят, я́ко Бог влады́чествует Iáковом и концы́ земли́. Возвратя́тся на вéчер, и взáлчут, я́ко пес, и обы́дут град. Ти́и разы́дутся я́сти. А́ще ли же не насы́тятся, и порóпщут. Аз же воспою́ си́лу Твою́ и возрáдуюся заýтра о ми́лости Твоéй, я́ко был еси́ Застýпник мой и Прибéжище моé в день скóрби моея́. Помóщник мой еси́, Тебé пою́: я́ко Бог Застýпник мой еси́, Бóже мой, ми́лость моя́.
[Псалом 59]Бóже, отри́нул ны еси́ и низложи́л еси́ нас, разгнéвался еси́, и ущéдрил еси́ нас. Стрясл еси́ зéмлю и смути́л еси́ ю́, исцели́ сокрушéнiе ея́, я́ко подви́жеся. Показáл еси́ лю́дем Твои́м жестóкая, напои́л еси́ нас винóм умилéнiя. Дал еси́ боя́щимся Тебé знáменiе, éже убежáти от лицá лýка. Я́ко да избáвятся возлю́бленнiи Твои́, спаси́ десни́цею Твоéю и услы́ши мя. Бог возглагóла во святéм Своéм: возрáдуюся и разделю́ Сiкíму, и юдóль жили́щ размéрю. Мой есть Галаáд, и Мой есть Манассíй, и Ефрéм - крéпость главы́ Моея́, Iýда - царь Мой. Моáв - конóб уповáнiя Моегó, на Iдумéю прострý сапóг Мой, Мне иноплемéнницы покори́шася. Кто введéт мя во град ограждéнiя? или́ кто настáвит мя до Iдумéи? Не Ты ли, Бóже, отри́нувый нас? И не изы́деши, Бóже, в си́лах нáших? Даждь нам пóмощь от скóрби, и сýетно спасéнiе человéческо. О Бóзе сотвори́м си́лу, и Той уничижи́т стужáющiя нам.
[Псалом 60]Услы́ши, Бóже, молéнiе моé, вонми́ моли́тве моéй. От конéц земли́ к Тебé воззвáх, внегдá уны́ сéрдце моé, на кáмень вознéсл мя еси́, настáвил мя еси́. Я́ко был еси́ уповáнiе моé, столп крéпости от лицá врáжiя. Вселю́ся в селéнiи Твоéм во вéки, покры́юся в крóве крил Твои́х. Я́ко Ты, Бóже, услы́шал еси́ моли́твы моя́, дал еси́ достоя́нiе боя́щимся и҆́мене Твоегó. Дни на дни царéвы приложи́ши, лéта eгó до дне рóда и рóда. Пребýдет в век пред Бóгом, ми́лость и и҆́стину Егó кто взы́щет? Тáко воспою́ и҆́мени Твоемý во вéки, воздáти ми моли́твы моя́ день от дне.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 61]Не Бóгу ли повинéтся душá моя́? От Тогó бо спасéнiе моé. И҆́бо Той Бог мой и Спас мой, Застýпник мой, не подви́жуся наипáче. Докóле належитé на человéка? Убивáете вси вы, я́ко стенé преклонéне, и оплóту возриновéну. Обáче цéну мою́ совещáша отри́нути, текóша в жáжди, усты́ свои́ми благословля́ху и сéрдцем свои́м кленя́ху. Обáче Бóгови повини́ся, душé моя́, я́ко от Тогó терпéнiе моé. И҆́бо Той Бог мой и Спас мой, Застýпник мой, не преселю́ся. О Бóзе спасéнiе моé и слáва моя́, Бог пóмощи моея́, и уповáнiе моé на Бóга. Уповáйте на Негó весь сонм людéй, излiя́йте пред Ним сердцá вáша, я́ко Бог помóщник наш. Обáче сýетни сы́нове человéчестiи, лжи́ви сы́нове человéчестiи в мéрилех éже непрáвдовати, тíи от суеты́ вкýпе. Не уповáйте на непрáвду и на восхищéнiе не желáйте. Богáтство áще течéт, не прилагáйте сéрдца. Еди́ною глагóла Бог, двóя сiя́ слы́шах, занé держáва Бóжiя, и Твоя́, Гóсподи, ми́лость, я́ко Ты воздáси комýждо по делóм eгó.
[Псалом 62]Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и҆́мени Твоéм воздежý рýце моѝ. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся Им, я́ко загради́шася устá глагóлющих непрáведная.
[Псалом 63]Услы́ши, Бóже, глас мой, внегдá моли́ти ми ся к Тебè, от стрáха врáжiя изми́ дýшу мою́. Покры́й мя от сóнма лукáвнующих, от мнóжества дéлающих непрáвду. И҆́же изостри́ша, я́ко мечь, язы́ки своя́, напрягóша лук свой, вещь гóрьку, состреля́ти в тáйных непорóчна, внезáпу состреля́ют eгò и не убоя́тся. Утверди́ша себé слóво лукáвое, повéдаша скры́ти сеть, рéша: кто ýзрит их? Испытáша беззакóнiе, исчезóша испытáющiи испытáнiя, пристýпит человéк, и сéрдце глубокò, и вознесéтся Бог. Стрéлы младéнец бы́ша я́звы их, и изнемогóша на ня язы́цы их. Смути́шася вси ви́дящiи их, и убоя́ся всяк человéк, и возвести́ша делá Бóжiя, и творéнiя Егò разумéша. Возвесели́тся прáведник о Гóсподе и уповáет на Негò, и похвáлятся вси прáвiи сéрдцем.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáльны святúтеля, глас 4): Вéрным предстáтельствуеши, покрывáя, соблюдáя ты́я, блажéнне,/ вся́кiя скóрби избавля́я я́ве,// iерáрхов краснéйшая слáво и хвалó, Нiкóлае преподóбне.
Слáва Отцý и Сы́ну и Святóму Дýху.
Глас 8: Истóчник чудéс, óтче мýдре, прiéм от Гóспода,/ всем вéрным источáеши, блажéнне, медотóчныя вóды:/ я́ко бо пáстырь сый и проповéдник вéры,/ и́стиннаго Пáстыря словесá соблю́л еси́./ Тéмже, дерзновéнiе к Немý имéя,/ человéки спасл еси́ от смéрти, Нiкóлае, iерáрше блажéнне,/ моли́ Хрїстá Бóга// грехóв оставлéнiе подáти чтýщим любóвiю святýю пáмять твою́.
И ны́не и прúсно и во вéки векóв, амúнь.
Богорóдичен: В ти́ну впад грехóв, и несть мне постоя́нiя,/ лю́те потопи́ мя бýря прегрешéнiй;/ но я́ко рóждшая Слóво, Еди́наго Человеколю́бца,/ на мя, рабá Твоегó, при́зри/ и избáви мя вся́каго грехá, и страстéй душетлéнных,/ и вся́каго озлоблéнiя лукáваго убíйцы, Богорóдице Неискусомýжная,/ моли́ Хрїстá Бóга грехóв оставлéнiе дáти мне,// Тя бо надéжду и́мам, раб Твой.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя́ Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих./ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Продолжéнiе здесь