Недeля 16 по Пятидесятнице, перед Воздвижением. Попразднство Рождества Богородицы. ВЕЛИКАЯ ВЕЧЕРНЯ
24 сентября́ 2023 гóда. Недéля 16 по Пятидеся́тнице, пéред Воздвúженiем. Попрáзднство Рождествá Пресвятóй Богорóдицы. Прп. Сiлуáна Афóнскаго. Глас 7. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душé моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 7
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 7: Пpiиди́те, возpáдуемся Гóсподеви,/ сокpуши́вшему смépти деpжáву,/ и пpосвети́вшему человéческiй pод,/ со безплóтными зовýще:// Содéтелю и Спáсе наш, слáва Тебé.
Менè ждут прáведницы,// дóндеже воздáси мне.
Стiхúра: Кpест пpетеpпéл еси́ Спáсе,/ и погpебéнiе нас páди,/ смépтiю же я́ко Бог смеpть умеpтви́л еси́./ Тéмже покланя́емся тpиднéвному воскpесéнiю Твоемý:// Гóсподи, слáва Тебé.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúра: Апóстоли ви́девше воскpесéнiе Содéтеля, чудя́хуся,/ пою́ще хвалý Áнгельскую:/ сiя́ слáва есть цеpкóвная,/ сié богáтство Цápствiя:/ постpадáвый нас páди, Гóсподи, слáва Тебé.
Да бýдут ýши Твоù// внéмлюще глáсу молéнiя моегó.
Стiхúры Попрáзднства, глас 2: Пла́кала еси́ от души́,/ я́ко безча́дна рыда́ющи,/ отроча́те жела́ющи:/ но родила́ еси́ Отроча́,// ро́да всего́ похвалу́.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Рожде́ние че́стно/ Де́вы Всесвяты́я,/ Ея́же ра́ди/ обнови́ся мир,// пе́сненными гла́сы почти́м.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Ра́дуйтеся, му́дрии,/ проро́цы богоглаго́ливии:/ ражда́ется бо Де́ва,/ из Нея́же Спасе́ние ми́ра// хо́щет роди́тися.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры Прп. Сiлуáна Афóнскаго, глас 5: Прииди́те, лю́дие Бо́жии,/ с ли́ки святы́х и А́нгел соста́вим духо́вное торжество́,/ в нем бо Це́рковь земна́я боже́ственне с Небе́сней ликовству́ет:/ ны́не ве́рный де́латель вертогра́да Присноде́вы Богоро́дицы/ во Иерусали́м го́рний прие́млется/ и, я́ко муж жела́нный,/ у Престо́ла Бо́жия сла́вою и че́стию венча́ется,/ ра́дость спасе́ния нам предвозвеща́ет,// егда́ горе́нием любве́ его́ ко Го́споду воспламени́мся.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Прииди́те, Ма́тере Бо́жия сподви́жницы/ и по́стническаго жития́ ревни́телие,/ со пустыннолю́бцы Горы́ Афо́нския/ трапе́зы боже́ственныя соприча́стницы бу́дем./ Ны́не Пречи́стая Ма́ти Бо́жия/ Силуа́на, подви́жника но́ва и преди́вна,/ его́же диа́вол иска́ше поглоти́ти, спасла́ есть,/ и Це́ркви Небе́сней на ра́дость приведе́,/ и, я́ко фимиа́м благово́нный,/ моли́твенника те́пла за нас у Престо́ла Бо́жия поста́ви,// венце́м ле́поты неувяда́емыя увенча́на.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Прииди́те, мона́шескаго по́двига щедролю́бцы,/ воста́ните, уневе́стившиися Христу́,/ да Силуа́на богому́дреннаго,/ по́двигом равноа́нгельским укра́шена, у́зрим,/ и сему́, ко́зни вра́жия победи́вшему, ра́дующеся, возопии́м:/ ра́дуйся, роди́телей благочести́вых плод целому́дренныя чистоты́;/ ра́дуйся, облагода́тствованный щедро́тами боже́ственныя добро́ты;/ ра́дуйся, ве́ры чи́стыя и незло́бия ди́вное воплоще́ние;// ра́дуйся, посто́м и моли́твою стяжа́вый Христо́во всепроще́ние.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: О преблаже́нне о́тче Силуа́не,/ Небе́снаго Уте́шителя дориноси́телю преди́вный/ и пла́мене любве́ Бо́жия сосу́де неистощи́мый,/ тебе́, припа́дающе, вопие́м:/ Его́же всем се́рдцем возлюби́л еси́,/ Его́же ра́ди в Горе́ Афо́нстей моли́твою сле́зною за мир сраспина́лся еси́,/ не преста́й и ны́не умоля́ти/ Це́ркви Святе́й от зол избавле́ние дарова́ти,/ лю́дем же, грехо́вными собла́зны обурева́емым,// мир и ве́лию ми́лость.
Слáва Ѻтцý и Сы́ну и Святóму Дýху.
Стiхúра Прп. Сiлуáна Афóнскаго, глас 6: Весели́ся и ра́дуйся, Горо́ Свята́я,/ Врата́рницы Небе́сныя омофо́ром при́сно украша́емая,/ Це́рковь Росси́йская, взыгра́й, ликовству́ющи./ Ны́не христолюби́вии лю́дие,/ от восто́к со́лнца до за́пад,/ ве́чери А́гнца Бо́жия приуготовля́ются,/ Силуа́на богому́дреннаго добро́ты порфи́рою украша́ются./ С ни́миже и мы, сему́ братолю́бия учи́телю,/ па́мять пра́зднующе, сла́дце вопие́м:/ ра́дуйся, се́вера благода́тное сия́ние,/ в вертогра́де Афо́нстем Святы́я Руси́ све́тлое отраже́ние;/ ра́дуйся, А́нгеле моли́твы сле́зныя,/ Бо́гу приноси́мыя о всей вселе́нней;// моли о нас Го́спода, братолю́бием оскудева́ющих.
И ны́не и прúсно и во вéки векóв, амúнь.
Догмáтик. Глас 7: Мáти ýбо познáлася еси́,/ пáче естествá, Богоpóдице,/ пpебылá же еси́ Дéва,/ пáче слóва и páзума:/ и чудесé Рождествá Твоегó сказáти язы́к не мóжет./ Пpеслáвну бо сýщу зачáтiю Чи́стая,/ непости́жен есть óбpаз pождéнiя:/ идéже бо хóщет Бог, побеждáется естествá чин./ Тéмже Тя вси, Мáтеpь Бóжiю вéдуще,/ мóлим Ти ся пpилéжно,// моли́ спасти́ся душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРИМИИ
Чтец: Премýдрости Соломóни чтéнiе.
(Из главы 5 и 6): Прáведницы во вéки живýт,/ и в Гóсподе мзда их, и попечéнiе их у Вы́шняго./ Сегó рáди прiи́мут Цáрствiе благолéпiя/ и венéц добрóты от руки́ Госпóдни;/ занé десни́цею покры́ет я́ и мы́шцею защити́т их./ Прiи́мет всеорýжiе рвéнiе своé/ и вооружи́т тварь в месть врагóм./ Облечéтся в броня́ прáвды/ и возложи́т шлем - суд нелицемéрен./ Прiи́мет щит непобеди́мый - преподóбiе,/ поостри́т же напрáсный гнев во орýжiе,/ спобóрет же с ним мiр на безýмныя./ Пóйдут праволýчныя стрéлы мóлнiины,/ и, я́ко от благокрýгла лýка облакóв, на намéренiе полетя́т./ И от каменомéтныя я́рости, испóлнь падýт грáды, вознегодýет на них водá морскáя,/ рéки же потопя́т я́ нáгло./ Сопроти́в стáнет им дух си́лы,/ и я́ко ви́хор развéет их,/ и опустоши́т всю зéмлю беззакóнiе,/ и злодéйство преврати́т престóлы си́льных./ Слы́шите ýбо, цáрiе, и разумéйте,/ навы́кните, судiи́ концéв земли́./ Внуши́те держáщiи мнóжества/ и гордя́щiися о нарóдех язы́к, я́ко данá есть от Гóспода держáва вам// и си́ла от Вы́шняго.
[Русский синодальный перевод]Праведники живут вовеки; награда их - в Господе, и попечение о них - у Вышнего. Посему они получат царство славы и венец красоты от руки Господа, ибо Он покроет их десницею и защитит их мышцею. Он возьмет всеоружие - ревность Свою, и тварь вооружит к отмщению врагам; облечется в броню - в правду, и возложит на Себя шлем - нелицеприятный суд; возьмет непобедимый щит - святость; строгий гнев Он изострит, как меч, и мир ополчится с Ним против безумцев. Понесутся меткие стрелы молний и из облаков, как из туго натянутого лука, полетят в цель. И, как из каменометного орудия, с яростью посыплется град; вознегодует на них вода морская и реки свирепо потопят их; восстанет против них дух силы и, как вихрь, развеет их. Так беззаконие опустошит всю землю, и злодеяние ниспровергнет престолы сильных. Итак, слушайте, цари, и разумейте, научитесь, судьи концов земли! Внимайте, обладатели множества и гордящиеся пред народами! От Господа дана вам держава, и сила - от Вышнего.(Прем.5:15-24;6:1-3)
Чтец: Премýдрости Соломóни чтéнiе.
(Из главы 3): Прáведных дýши в руцé Бóжiей, и не прикóснется их мýка. Непщевáни бы́ша во очесéх безýмных умрéти, и вмени́ся озлоблéнiе исхóд их. И éже от нас шéствiе сокрушéнiе, они́ же суть в ми́ре. И҆́бо пред лицéм человéческим, áще и мýку прiи́мут, уповáнiе их безсмéртiя испóлнено. И в мáле накáзани бы́вше, вели́кими благодéтельствовани бýдут: я́ко Бог искуси́ я́, и обрéте их достóйны Себé. Я́ко злáто в горни́ле искуси́ их: и я́ко всеплóдiе жéртвенное прiя́т я́. И во врéмя посещéнiя их возсiя́ют, и я́ко и́скры по стéблiю потекýт. Сýдят язы́ком и обладáют людьми́, и воцари́тся Госпóдь в них во вéки. Надéющiися Нань разумéют и҆́стину, и вéрнiи в любви́ пребýдут Емý. Я́ко благодáть и ми́лость в преподóбных Егó, и посещéнiе во избрáнных Егó.
[Русский синодальный перевод]Души праведных в руке Божией, и мучение не коснется их. В глазах неразумных они казались умершими, и исход их считался погибелью, и отшествие от нас - уничтожением; но они пребывают в мире. Ибо, хотя они в глазах людей и наказываются, но надежда их полна бессмертия. И немного наказанные, они будут много облагодетельствованы, потому что Бог испытал их и нашел их достойными Его. Он испытал их как золото в горниле и принял их как жертву всесовершенную. Во время воздаяния им они воссияют как искры, бегущие по стеблю. Будут судить племена и владычествовать над народами, а над ними будет Господь царствовать вовеки. Надеющиеся на Него познают истину, и верные в любви пребудут у Него; ибо благодать и милость со святыми Его и промышление об избранных Его. (Прем.3:1-9)
Чтец: Премýдрости Соломóни чтéнiе.
(Из главы 4): Прáведник, áще пости́гнет скончáтися, в покóи бýдет./ Стáрость бо честнá не многолéтна,/ нижé в числé лет исчитáется. Сединá же есть мýдрость человéком/ и вóзраст стáрости - житié несквéрное./ Благоугóден Бóгови быв, возлю́блен бысть/ и живы́й посредé грéшник, престáвлен бысть./ Восхищéн бысть, да не злóба измени́т рáзума егó,/ или́ лесть прельсти́т дýшу егó./ Рачéнiе бо злóбы помрачáет дóбрая,/ и парéнiе пóхоти пременя́ет ум незлóбив./ Скончáвся вмáле, испóлни лéта дóлга,/ угóдна бо бе Гóсподу душá егó,/ сегó рáди потщáся от среды́ лукáвствiя. Лю́дiе же, ви́девше, и не разумéвше,/ нижé полóжше в помышлéнiи таковóе,/ я́ко благодáть и ми́лость в преподóбных Егó// и посещéнiе во избрáнных Егó.
[Русский синодальный перевод]Праведник, если и рановременно умрёт, будет в покое, ибо не в долговечности честная старость и не числом лет измеряется: мудрость есть седина для людей, и беспорочная жизнь - возраст старости. Как благоугодивший Богу, он возлюблен, и, как живший посреди грешников, преставлен, восхищен, чтобы злоба не изменила разума его, или коварство не прельстило души его. Ибо упражнение в нечестии помрачает доброе, и волнение похоти развращает ум незлобивый. Достигнув совершенства в короткое время, он исполнил долгие лета; ибо душа его была угодна Господу, потому и ускорил он из среды нечестия. А люди видели это и не поняли, даже и не подумали о том, что благодать и милость со святыми Его и промышление об избранных Его.(Прем.4:7-15)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Попрáзднства, глас 1: От А́нны днесь цвет,/ сад богодáнный,/ Богорóдица прозябé,/ спасéнiе человéков,/ из Нея́же всех Зижди́тель рóждься пáче ума,// Адáмову очищáет, я́ко Благ, всю сквéрну блáгостiю.
Кто довóльно по достóинству пéти возмóжет/ от А́нны неизречéнно младéнствующую Дéву?/ Гóры у́бо и хóлми, слáдость искáпайте днесь:/ всех бо жизнь и очищéнiе/ млекóм питáется,// Богорóдица Чи́стая.
Прéжде безчáдная неплóды/ раждáет всех жизнь, еди́ну Богорóдицу;/ весéлiя исполня́ется/ и рáдуется земнóе естествó ны́не человéческое,/ слáвяще и́стинную Роди́тельницу// Избáвителя Iисýса, Еди́наго Гóспода.
Стiхúры прп. Сiлуáна, глас 2: Свéтом невечéрним Святы́я Трóицы просвещéн,/ нощь житéйскую без претыкáнiя прешéл еси́,/ богомýдре Сiлуáне,/ видéнiи божéственными возвышáлся,/ во двóрех Бóга Вы́шняго всели́лся еси́./ Тéмже и нас наслéдники Тогó содéлай,// святýю твою́ пáмять почитáющих.
Земнáя вся остáвив,/ богáтство и слáву я́ко прах вмени́в,/ Гóру Святýю слезáми твои́ми ороси́л еси́/ и, невозврáтным желáнiем Еди́ному Бóгу приближáяся,/ Семý áнгельски послужи́л еси́./ Егóже моли́, преподóбне,// в кни́зе жи́зни написáтися почитáющим тя.
Не престáй моля́ся, óтче Сiлуáне,/ о неключи́мых рабéх твои́х,/ и́хже богомýдренным твои́м житiéм просвети́вый,/ Бóгу прирази́л еси́,// да вси честнóе преставлéнiе твоé свéтло почитáем.
Слáва Ѻтцý и Сы́ну и Святóму Дýху.
Стiхúра Прп. Сiлуáна, глас 6: Прiиди́те, вси Хрiстý любóвiю ýтренююще,/ да рáдости подви́жника преди́внаго причáстницы бýдем:/ ны́не А́нгели на Небесéх/ и человéцы на земли́ рáдуются,/ се бо Пречи́стая Мáти/ от юдóли грехóвныя,/ я́ко овчá обретéнное,/ Сiлуáна, смирéнiем укрáшена,/ во двор овéц Хрiстóвых приведé,/ вели́чiе егó пóдвига вéры,/ я́ко жéртву непорóчную,/ во Святáя Святы́х вознесé,/ да ви́дяще, кáко лю́бит Госпóдь вéрных Свои́х,// и мы Цáрствiю Хрiстóву приобщи́мся.
И ны́не и прúсно и во вéки векóв, амúнь.
Попрáзднства. Глас 8 (Сéргiа Патрiáрха): В благознамени́тый день прáздника нáшего/ вострýбим духóвною цевни́цею:/ Я́же бо от сéмене Давíдова, днесь раждáется Мáти Животá,/ тьму разрешáющи,/ Адáмово обновлéнiе, и Éвино воззвáнiе,/ и нетлéнiя истóчник, тли пременéнiе,/ Eя́же рáди мы обожи́хомся/ и от смéрти избáвлени бы́хом,/ и возопiи́м Той с Гаврiи́лом, вéрнiи:/ рáдуйся, Благодáтная, Госпóдь с Тобóю,// Тебé рáди дáруя нам вéлiю ми́лость.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 7): Воскpéсл еси́ из гpóба Спáсе мípа,/ и совоздви́гл еси́ человéки с плóтiю Твоéю:// Гóсподи, слáва Тебé.
Стiх: Госпóдь воцарúся, в лéпоту облечéся.
И҆́ны по алфавúту, глас 7: Воскpéсшему из мépтвых, и пpосвети́вшему вся,/ пpiиди́те поклони́мся:/ от áдова бо мучи́тельства нас свободи́л есть,/ Свои́м тpиднéвным Воскpесéнiем живóт нам даpовáвый,// и вéлiю ми́лость.
Стiх: И҆́бо утвердù вселéнную,/ я́же не подвúжется.
Во ад сошéд Хpїстé, смеpть плени́л еси́,/ и тpиднéвен воскpéс, нас совоскpеси́л еси́,/ слáвящих Твоé всеси́льное востáнiе,// Гóсподи Человеколю́бче.
Стiх: Дóму Твоемý подобáет святы́ня, Гóсподи,/ в долготý днiй.
Стpáшен яви́лся еси́ Гóсподи, во гpóбе лежá я́ко спя,/ воскpéс же тpиднéвен я́ко си́лен,/ Адáма совоскpеси́л еси́ зовýща:/ слáва Воскpесéнiю Твоемý,// Еди́не Человеколю́бче.
Слáва Ѻтцý и Сы́ну и Святóму Дýху.
Стихúра Прп. Сiлуáна, глас 2: О всеблажéнне óтче Сiлуáне,/ богáтства некрáдомаго стяжáтелю премýдрый,/ моли́тву я́ко хлеб, слéзы я́ко елéй вменя́я/ и, я́коже Пáвел богомýдрый,/ о Крестé Госпóднем рáдуяся,/ Сóлнцу Прáвды горéнiем любвé ýтреневал еси́;// стяжáнiю Дýха Святáго нас научáеши прилéжно.
И ны́не и прúсно и во вéки векóв, амúнь.
Попрáзднства. Глас 4 (Гéрмана Патрiáрха): Неплóды безчáдная Áнна/ днесь рукáми да восплéщет свéтло,/ да светлонóсят зeмнáя, цáрiе да игрáют,/ святи́телiе во благословéнiих да веселя́тся,/ да прáзднует весь мiр:/ се бо Цари́ца и непорóчная Невéста Óтча/ от кóрене Iессéева прозябé./ Ктомý жены́ в печáлех не родя́т чад:/ Рáдость бо процветé, и Живóт всем человéком в мíре жи́тельствует./ И ктомý дáры Iоакíмовы не возвращáются,/ рыдáнiе бо Áнны в рáдость преложи́ся:/ срáдуйтеся мне, глагóлющи, весь избрáнный Iзрáиль,/ се бо дадé ми Госпóдь одушевлéнную палáту/ Божéственныя слáвы Eгó,/ во óбщее весéлiе и рáдость// и спасéнiе душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Двáжды)
Тропáрь Рождествá Богорóдицы, глас 4: Рождествó Твоè, Богорóдице Дéво,/ рáдость возвести́ всей вселéнней:/ из Тебè бо возсiя́ Сóлнце Прáвды, Хрїстóс Бог наш,/ и, разруши́в кля́тву, дадè благословéнiе,// и, упраздни́в смерть, даровá нам живóт вéчный.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню