Недeля 16 по Пятидесятнице, перед Воздвижением. Попразднство Рождества Богородицы. УТРЕНЯ ЧАС ПЕРВЫЙ
24 сентября́ 2023 гóда. Недéля 16 по Пятидеся́тнице, пéред Воздвúженiем. Попрáзднство Рождествá Пресвятóй Богорóдицы. Прп. Сiлуáна Афóнскаго. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрiстóвым пáки обновля́емь есть.// Менè бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебè воскрéсшаго, Хрiстè, из грóба, тварь вся воспè:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 2
Хор: Пресвятáя Богорóдице, спасù нас.
Чтец: Твоé в вещéственных явлéнiих/ законополóжник возбрани́ся разумéти/ и вели́кое, Пречи́стая, тáинство,/ не мýдрствовати земнорéвностная обрáзно наказýемь иногдá./ Тéмже, уди́влься чудеси́, глагóлаше:// благословéн Бог отéц нáших. (Двáжды)
Хор: Пресвятáя Богорóдице, спасù нас.
Чтец: Гóру и дверь Небéсную и мы́сленную Тя лéствицу/ боголéпно лик божéственный пронаречè,/ от Тебè бо Кáмень отсечéся не рукáми мýжескими,// и дверь, Éюже прóйде Госпóдь, И҆́же чудéс Бог отéц нáших. (Двáжды)
Глас 5
Хор: Преподóбне óтче Сiлуáне, молù Бóга о нас.
Чтец: И́го благóе, брéмя лéгкое Хрiстá Спáса взем,/ и ветри́лом Дýха Святáго, в стрáсе божéственнем,/ к пристáнищу благооти́шному корáбль душéвный твой упрáвил еси́, óтче Сiлуáне,// монáхом, в пóдвизе изнемогáющим, óбразе преди́вный. (Двáжды)
Хор: Преподóбне óтче Сiлуáне, молù Бóга о нас.
Чтец: Кáко не диви́мся смирéнiю и человеколю́бiю твоемý, Сiлуáне предóбре,/ ви́дяще тя слéзы источáюща/ и о сýщих во áде и нераскáянных грéшницех рыдáньми сраспинáющася,// врагóм же свои́м прощéнiя прося́ща, всепрощéнiю Хрiстóву подражáюща?
Хор: Преподóбне óтче Сiлуáне, молù Бóга о нас.
Чтец: Псалóмски восклицáя: ви́дена бы́ша шéствiя Твоя́, Бóже,/ шéствiя Бóга моегó и Царя́, И́же во святéм,/ Сегó вои́стину в лицè отцá духóвнаго Авраáмiя зрéти сподóбился еси́,// чти́ти настáвники нáша благодáтне нас наставля́я, Сiлуáне боговéдче.
Слáва Ѻтцý и Сы́ну и Святóму Дýху.
Тропáрь: Óбраз начертáнiй добродéтельных дея́нiй сый,/ смирéн же, и крóток, и настáвник дóбрый монáшествующим в Горè Афóнстей показáлся еси́, Сiлуáне,/ сегó рáди монáси и мiрстíи// предстáтельству твоемý пред Бóгом вверя́ются.
И ны́не и прúсно и во вéки векóв. Амúнь.
Богорóдичен: Покрóв бýди, и предстáтельство, и заступлéнiе, и похвалá, Дéво,/ обнажéну мне ны́не вся́кiя пóмощи,/ безпóмощных си́ло и надéждо ненадéемых,// Сiлуáна моли́твами, сóлнца теплéйшими.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга явù медленоязы́чному и гугнúвому Моисéови,/ и óтроки рéвность Бóжiя/ три непреборúмыя во огнù певцы́ показá:/ вся делá Госпóдня Гóспода пóйте,// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромé прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
Глас 2
Хор: Пресвятáя Богорóдице, спасù нас.
Чтец: Я́же к Бóгу нáшего примирéнiя предопределéнная ски́нiя/ éже бы́ти ны́не начинáет,/ имýщи роди́ти Слóва, нам дебельствóм Плóти я́вльшася,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (Двáжды)
Хор: Пресвятáя Богорóдице, спасù нас.
Чтец: Неплóдства преложéнiе мiрскóе благи́х разреши́ неплóдство/ и я́сно чýдо Хрiстá показá, к земны́м пришéдша,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (Двáжды)
Глас 5
Хор: Преподóбне óтче Сiлуáне, молù Бóга о нас.
Чтец: Воздея́нiе рук нáших прiими́, преподóбне,/ Влады́чней блáгости подóбяся, прегрешéнiя нáша презирáя,/ ты бо дýшу твою́ уязви́л еси́ Хрiстóвою любóвiю и Пречи́стыя Егó Мáтере,// Е́юже умоли́ спасти́ дýши нáша. (Двáжды)
Хор: Преподóбне óтче Сiлуáне, молù Бóга о нас.
Чтец: Я́ко крiн преди́вный и сапфíр пречýдный,/ в вертогрáде Пречи́стыя процвéл еси́, преподóбне Сiлуáне,/ Влады́це твоемý Хрiстý смирéнно ревнýя, вы́ше бо человéка воспрiéм житié,// и́мже мнóгих дýши Гóсподу привóдиши.
Хор: Преподóбне óтче Сiлуáне, молù Бóга о нас.
Чтец: Вои́стину носи́тель дарóв Святáго Дýха был еси́/ и, разли́чными добродéтельми украшéн, Сiлуáне,/ смирéнiем гóрнюю высотý наслéдив, нищетóю Небéсное богáтство изря́дно прiя́л еси́.// Наслéдники сегó покажи́ ны, моли́твами твои́ми.
Благословúм Отцá, и Сы́на, и Святáго Дýха, Гóспода.
Тропáрь: Сiя́нiя Божéственнаго и Дýха Святáго слáдости причáстника показá тя Госпóдь, óтче Сiлуáне,/ егдá в неизречéннем Фавóрстем сiя́нiи тя посети́л есть./ Зрéти слáву Сегó в свéте блистáнiя Божествá Егó// сподóби и нас, мóлимтися.
И ны́не и прúсно и во вéки векóв. Амúнь.
Богорóдичен: Пречи́стая Влады́чице, Небéсных Сил превы́шшая,/ рóждшая Спáса, всех Содéтеля, Единосýщна Отцý и Дýху,/ даждь нам слóво, Препéтая, я́ко да возмóжем пéти Тя,// сýщую Застýпницу рóда нáшего.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпúмаго,/ Селó Невместúмаго Зиждúтеля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрїстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасù нас.
Богорóдичен: Не божéств Трóицу, но Ипостáсей,/ нижé еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 2
Хор: Пресвятáя Богорóдице, спасù нас.
Чтец: И́же непокори́вым лю́дем из кáмене источи́в вóду,/ благопокори́вым же язы́ком дáрует от чресл неплóдных плод на весéлiе нам,/ Тя, Богомáти Пречи́стая,// Ю́же достóйно величáем. (Двáжды)
Хор: Пресвятáя Богорóдице, спасù нас.
Чтец: Напрáснаго дрéвняго Отъя́тельницу осуждéнiя и прамáтере исправлéнiе,/ Ю́же рóда к Бóгу вину́ присвоéнiя, к Зижди́телю мост,// Тя, Богорóдице, величáем.(Двáжды)
Глас 5
Хор: Преподóбне óтче Сiлуáне, молù Бóга о нас.
Чтец: В житiи́ подви́жника преди́вна, по смéрти же моли́твенника/ и сострадáтеля за ны пред Бóгом изря́дна познáхом тя, преподóбне,/ егдá iеродiáкона Давíда, смертéльне отрáвлена, посещéнiем твои́м внезáпу исцели́л еси́,// покая́нiя врéмя семý исходáтайствовав усéрдно. (Двáжды)
Хор: Преподóбне óтче Сiлуáне, молù Бóга о нас.
Чтец: Земли́ Россíйскiя сосýде избрáнный и Горы́ Афóнскiя подви́жниче нóвый,/ угóдниче Бóжiй Сiлуáне, простри́ длáни твоя́ за ны ко Гóсподу/ и, я́ко ми́ро благовóнное, моли́твы вознеси́,// да спасéт от смéрти дýши нáша.
Хор: Преподóбне óтче Сiлуáне, молù Бóга о нас.
Чтец: Áнгелом единонрáвна и святы́м сопричáстна/ к гóрнему Сióну призвá тя Госпóдь, преподóбне,/ идéже вознеси́ моли́твы твоя́ за ны ко всех Влады́це,// ходáтайствуя о Святéй Цéркви и о нас, чтýщих пáмять твою́ сладкопéсненно.
Слáва Ѻтцý и Сы́ну и Святóму Дýху.
Тропáрь: Огнéм купинý не опали́вшаго и плáменными язы́ки Цéрковь Хрiстóву освяти́вшаго,/ смирéнiя твоегó рáди, Дýхом Святы́м возжжéн был еси́, óтче преди́вне,/ да житiéм несквéрным научи́ши ны покланя́тися Трóице, всех Бóгу,// плáменем любвé твоéй к Немý приближáющихся.
И ны́не и прúсно и во вéки векóв. Амúнь.
Богорóдичен: Я́ко всех Цари́цу и Влады́чицу нáшу,/ Тя любóвiю слáвим, Пречи́стая Дéво,/ просвéщшiися Страстьми́ Сы́на Твоегó и познáвшiи Сегó всем Благодéтеля.// Слáва благодáти Егó во вся вéки.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрїстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный пя́тый: Живóт и путь, Хрiстóс востá из мéртвых,/ Клеóпе и Луцé спутешéствова,/ и́маже и познáся во Еммаýсе, преломля́я хлеб:/ ею́же дýши и сердцá горя́ща бя́ху,/ егдá тéма глагóлаше на пути́,/ и писáнiя скáзоваше, я́же претерпé./ С ни́маже, востá, зовéм,// яви́ся же и Петрóви.
Слáва Отцý и Сы́ну и Святóму Дýху.
Светúлен прп. Сiлуáна, глас 4: Свéта немéркнущаго блистáнiем украси́лся еси́, преподóбне óтче наш Сiлуáне,/ и предстои́ши вéчно престóлу слáвы Трiеди́наго Божествá, о Дýсе Святéм ликовствýяй./ Благодáти сея́ испроси́ и нам,// да моли́твами твои́ми причáстницы жи́зни вéчныя бýдем.
И ны́не и прúсно и во вéки векóв. Амúнь.
Светúлен Попрáзднства, глас 4: От неплóдныя и стáрицы, престарéлыя Áнны/ жизнь и свет возсiя́, Всенепорóчная Отрокови́ца,/ дверь востóка, свет возсiя́вшая концéм неизречéнно;// лик состáвльше, ублажи́м Ю́, я́ко земны́х превы́шшую.
ХВАЛИТНЫ
Хор, глас 6: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрїстóс из мéртвых,/ разрýш смéртныя ýзы:/ благовести́ землé, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрїстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрїстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Что воздáмы Гóсподеви о всех, я́же воздадé нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестé, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры прп. Сiлуáна, глас 4: Любве́ Бо́жия пла́менный рачи́телю/ и Ду́ха Свята́го усе́рднейший стяжа́телю,/ преподо́бне о́тче Силуа́не,/ Его́же ветри́лы/ стра́сти душе́вныя в се́рдцы твое́м,/ я́ко на ме́льнице, исте́рл еси́,/ и си́це хлеб а́нгельский вкуси́в,/ те́мже, иконо́ме добре́йший, пита́еши и нас,// да прича́стницы жи́зни ве́чныя бу́дем.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Кла́дязь но́вый,/ воды́ живы́я преиспо́лненный,/ в Горе́ Афо́нстей источи́ся,/ сле́зы моли́твы твое́я, преподо́бне Силуа́не,/ и́хже, я́ко ми́ро на́рда чи́ста многоце́нна,/ у ног Го́спода на́шего источа́л еси́,/ ме́ртвым, живы́м и гряду́щим умилостивле́ния прося́./ Сея́ моли́твы не лиши́ и нас, преподо́бне,// в мо́ри жите́йстем грехми́ обурева́емых.
Честнá пред Гóсподем/ смерть преподóбных Егó. (Пс.115:6)
Стiхúра: О́браз смире́ния Христо́ва и любве́ Его́/ житие́м твои́м показа́л еси́, преподо́бне,/ сле́зно взыва́я:/ бра́тие, люби́те враги́ ва́ша,/ си́и бо суть бра́тия ва́ша,/ враг же наш диа́вол есть,/ си́це бо средосте́ние греха́ разруша́ется, и злоухищре́ния диа́вола побежда́ются,/ и мир Бо́жий в челове́цех водворя́ется,// творя́щии же сия́ не подвижатся в пра́вде Бо́жией во ве́ки.
Блажéн муж, боя́йся Гóспода,/ в зáповедех Егó восхóщет зелó.(Пс.111:1)
Свещу́, мрак грехо́вный просвеща́ющую,/ показа́ тя Госпо́дь, боголюби́ве Силуа́не,/ да к тебе́, человеколю́бием изоби́лующу,/ за томя́щихся во а́де страда́ти жела́ющу,/ в наде́жди спасе́ния припа́дающе, вопие́м:/ слез твои́х тече́ньми очи́сти прегреше́ния на́ша/ и исцели́ ду́ши на́ша,/ да не лише́ни бу́дем любве́ Христо́вы,// егда́ яви́тся в День Су́дный.
Слáва Отцý и Сыну и Святóму Дýху.
Стiхúра евáнгельская пя́тая, глас 5: О премýдрых судéб Твои́х, Хрiстé!/ Кáко Петрý ýбо плащани́цами еди́неми,/ дал еси́ разумéти Твоé воскресéнiе,/ Луцé же и Клеóпе спутешéствуя, бесéдовал еси́,/ и бесéдуяй не áбие себé явля́еши?/ Тéмже и поноси́мь бывáеши, я́ко еди́н пришéльствуяй во Iерусали́м,/ и не причащáяйся в конéц совéта их./ Но И҆́же вся к создáнiя пóльзе стрóя,/ и я́же о Тебé прорóчествiя откры́л еси́,/ и внегдá благослови́ти хлеб, познáлся еси́ им,/ и҆́хже и прéжде тогó сердцá к познáнiю Твоемý распалáстася,/ и҆́же и ученикóм сóбранным ужé/ я́сно проповéдаста Твоé воскресéнiе,// и҆́мже поми́луй нас.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 7: Разруши́л есѝ Крестóм Твои́м смерть, отвéрзл есѝ разбóйнику рай; мvронóсицам плач преложи́л есѝ и Апóстолом проповéдати повелéл есѝ, я́ко воскрéсл есѝ, Хрїстè Бóже, дáруяй мíрови вéлiю ми́лость.
Слáва Отцý и Сы́ну и Святóму Дýху.
Тропáрь Рождествá Богорóдицы, глас 4: Рождествó Твоè, Богорóдице Дéво, рáдость возвести́ всей вселéнней: из Тебè бо возсiя́ Сóлнце Прáвды, Хрїстóс Бог наш, и, разруши́в кля́тву, дадè благословéнiе, и, упраздни́в смерть, даровá нам живóт вéчный.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Рождествá Богорóдицы, глас 4: Iоакíм и Áнна поношéнiя безчáдства и Адáм и Éва от тли смéртныя свободи́стася, Пречи́стая, во святéм рождествé Твоéм. То прáзднуют и лю́дiе Твои́, вины́ прегрешéнiй избáвльшеся,/ внегдá звáти Ти: неплóды раждáет Богорóдицу и Питáтельницу Жи́зни нáшея.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу