Терпя́ потерпéх Гóспода, и внят ми, и услы́ша моли́тву мою́:/ Постáви на кáмени нóзе мои́, и испрáви стопы́ моя́./ Се удали́хся бéгая, и водвори́хся в пусты́ни./ Уподóбихся нея́сыти пусты́нней./ Бдех, и бых я́ко пти́ца осóбящаяся на зде./ Колéна моя́ изнемогóста от пóста:/ И плоть моя́ измени́ся елéа рáди./ Слезáми мои́ми постéлю мою́ омочý./ Я́ко обыдóша мя пси мнóзи, сонм лукáвых одержáша мя./ Напрягóша лук свой вещь гóрьку:/ Состреля́ти в тáйных непорóчнаго./ Предзрéх Гóспода предо мнóю вы́ну, я́ко одеснýю менé есть, да не подви́жуся./ Вси язы́цы обыдóша мя, и И́менем Госпóдним противля́хся им./ Благословéн Госпóдь, И́же не дадé нас в лови́тву зубóм их:/ Да исповéдятся Тебé, Гóсподи, вся делá Твоя́:/ И преподóбнiи Твои́ да благословя́т Тя./ И увéдите, я́ко удиви́ Госпóдь преподóбнаго Своегó./ И утруди́ся во век, и жив бýдет до концá./ Храни́т Госпóдь дýши преподóбных Свои́х./ Восхвáлятся преподóбнiи во слáве, и возрáдуются на лóжах свои́х./ Честнá пред Гóсподем смерть преподóбных Егó.// Пóйте Гóсподеви преподóбнiи Егó, и исповéдайте пáмять святы́ни Егó, во всех лю́дех чудесá Егó.
Хор: Величáем Тя,/ преподóбне óтче Сiлуáне,/ и чтим святýю пáмять твою́,/ настáвниче монáхов// и собесéдниче áнгелов.
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Седáлен прп. Сiлуáна по полiелéе, глас 1: От ю́ности на гóру безстрáстiя возшéл еси́,/ и, я́ко ветвь мáсличная кóрене земли́ Росси́йския,/ в пусты́ни Афóнстей житiéм непорóчным процвéл еси́, преди́вне óтче Сiлуáне,/ и, я́ко нóвый тайнови́дец, благодáть боговéденiя стяжáл еси́,/ и дерзновéнiем Илiины́м ко Гóсподу взывáл еси́:// Гóсподи, спаси́ мир, во зле обуревáемый.
И ны́не и прúсно и во вéки векóв, амúнь.
Богорóдичен из Минéи, глас тóйже: Настáви нас на путь покая́нiя,/ уклóньшихся к безпýтiем зол и Преблагáго прогнéвавших Гóспода,/ Неискусобрáчная Преблагословéнная Мáти,// ми́ра всегó и Гóры Афóнскiя надéждо непререкáемая.
СТЕПЕННА, ГЛАС 7
1 АНТИФОН
Хор: Плен Сióнь от лéсти обратúв,/ и менé Спáсе, оживù,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь созúждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.113) Во врéмя óно Петр востáв течé ко грóбу, и прини́к ви́де ри́зы еди́ны лежáща: и оты́де, в себé дивя́ся бы́вшему. И се два от них бéста идýща в тóйже день в весь, отстоя́щу стáдiй шестьдеся́т от Iерусали́ма, éйже и҆́мя Еммаýс: и та бесéдоваста к себé о всех сих приклю́чшихся. И бысть бесéдующема и҆́ма и совопрошáющемася, и Сам Iисýс прибли́жився идя́ше с ни́ма: óчи же ею́ держáстеся, да Егó не познáета. Речé же к ни́ма: что суть словесá сiя́, о ни́хже стязáетася к себé идýща, и естá дря́хла? Отвещáв же еди́н, емýже и҆́мя Клеóпа, речé к Немý: Ты ли еди́н пришлéц есѝ во Iерусали́м, и не увéдел есѝ бы́вших в нем во дни сiя́? И речé и҆́ма: кíих? Óна же рéста емý: я́же о Iисýсе Назаряни́не, и҆́же бысть Муж Прорóк, си́лен дéлом и слóвом пред Бóгом и всéми людьмѝ: кáко предáша Егó архiерéи и кня́зи нáши на осуждéнiе смéрти, и распя́ша Егó: мы же надéяхомся, я́ко Сей есть хотя́ избáвити Iзрáиля: но и над всéми си́ми, трéтiй сей день есть днесь, отнéлиже сiя́ бы́ша. Но и жены́ нéкiя от нас ужаси́ша ны, бы́вшыя рáно у грóба: и не обрéтша телесé Егó, прiидóша, глагóлюща, я́ко и явлéнiе Áнгел ви́деша, и҆́же глагóлют Егó жи́ва. И идóша нéцiи от нас ко грóбу, и обрéтоша тáко, я́коже и жены́ рéша: Самогó же не ви́деша. И Той речé к ни́ма: о несмы́сленная и кóсная сéрдцем, éже вéровати о всех, я́же глагóлаша прорóцы: не сiя́ ли подобáше пострадáти Хрiстý и вни́ти в слáву свою́? И начéн от Моисéа и от всех прорóк, сказáше и҆́ма от всех писáнiй я́же о Нем. И прибли́жишася в весь, в ню́же идя́ста: и Той творя́шеся далечáйше итѝ. И нуждáста Егó, глагóлюща: обля́зи с нáма, я́ко к вéчеру есть, и приклони́лся есть день. И вни́де с ни́ма облещѝ. И бысть я́ко возлежé с ни́ма, и прiи́м хлеб благословѝ, и преломи́в дая́ше и҆́ма. Óнема же отверзóстеся óчи, и познáста Егó: и Той неви́димь бысть и҆́ма. И рекóста к себé: не сéрдце ли нáю горя́ бе в нáю, егдá глагóлаше нáма на путѝ и егдá скáзоваше нáма писáнiя? И востáвша в той час, возврати́стася во Iерусали́м, и обретóста совокýпленны единагонáдесяте и и҆́же бя́ху с ни́ми, глагóлющих, я́ко вои́стинну востá Госпóдь и яви́ся Сíмону. И та повéдаста, я́же бы́ша на путѝ, и я́ко познáся и҆́ма в преломлéнiи хлéба.
[Русский синодальный перевод]Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. В тот же день двое из них шли в селение, отстоящее стадий на шестьдесят от Иерусалима, называемое Эммаус; и разговаривали между собою о всех сих событиях. И когда они разговаривали и рассуждали между собою, и Сам Иисус, приблизившись, пошел с ними. Но глаза их были удержаны, так что они не узнали Его. Он же сказал им: о чем это вы, идя, рассуждаете между собою, и отчего вы печальны? Один из них, именем Клеопа, сказал Ему в ответ: неужели Ты один из пришедших в Иерусалим не знаешь о происшедшем в нем в эти дни? И сказал им: о чем? Они сказали Ему: что было с Иисусом Назарянином, Который был пророк, сильный в деле и слове пред Богом и всем народом; как предали Его первосвященники и начальники наши для осуждения на смерть и распяли Его. А мы надеялись было, что Он есть Тот, Который должен избавить Израиля; но со всем тем, уже третий день ныне, как это произошло. Но и некоторые женщины из наших изумили нас: они были рано у гроба и не нашли тела Его и, придя, сказывали, что они видели и явление Ангелов, которые говорят, что Он жив. И пошли некоторые из наших ко гробу и нашли так, как и женщины говорили, но Его не видели. Тогда Он сказал им: о, несмысленные и медлительные сердцем, чтобы веровать всему, что предсказывали пророки! Не так ли надлежало пострадать Христу и войти в славу Свою? И, начав от Моисея, из всех пророков изъяснял им сказанное о Нем во всем Писании. И приблизились они к тому селению, в которое шли; и Он показывал им вид, что хочет идти далее. Но они удерживали Его, говоря: останься с нами, потому что день уже склонился к вечеру. И Он вошел и остался с ними. И когда Он возлежал с ними, то, взяв хлеб, благословил, преломил и подал им. Тогда открылись у них глаза, и они узнали Его. Но Он стал невидим для них. И они сказали друг другу: не горело ли в нас сердце наше, когда Он говорил нам на дороге и когда изъяснял нам Писание? И, встав в тот же час, возвратились в Иерусалим и нашли вместе одиннадцать апостолов и бывших с ними, которые говорили, что Господь истинно воскрес и явился Симону. И они рассказывали о происшедшем на пути, и как Он был узнан ими в преломлении хлеба.(Лк.24:12-35)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менé от лицá Твоегó, и Дýха Твоегó Святáго не отымѝ от менé. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Чтец: Умá чистотóю зовý Мáтере Гóспода Сил внéмляй,/ змíя, грех пораждáющаго, изрыгнýл есѝ,/ и взыгрáся дух твой о Бóзе Спáсе твоéм, боголюби́ве óтче Сiлуáне,// Егóже молѝ о чтýщих пáмять твою́. (Двáжды)
Хор: Преподóбне óтче Сiлуáне, молù Бóга о нас.
Чтец: К тебè, крест твой взéмшему и на гóру безстрáстiя возшéдшему,/ припáдающе, мóлимся, всеблажéнне:/ воспламенѝ сердцá нáша ко всех лю́бящему Бóгу,// плáменем любвè твоея́, в горéнiи неугасáющем.
Хор: Преподóбне óтче Сiлуáне, молù Бóга о нас.
Чтец: Егóже возлюбѝ душá твоя́, Семý увéрился есѝ,/ и к Немý Еди́ному прилепи́лся есѝ, боголю́бче,/ и си́це искуси́теля злолукáваго душѝ твоея́ покори́л есѝ,// трудóм, бдéнiем, смирéнiем и слéзною моли́твою сегó посрамля́я.
Слáва Ѻтцý и Сы́ну и Святóму Дýху.
Тропáрь: Гóсподи Сил, освящáяй вся́каго человéка, грядýщаго в мiр,/ даждь слóво хвалéнiя устóм мои́м,/ да превознесý Трисвятóе и́мя Твоè, ди́вно во святы́х Твои́х почивáющее,// с ни́миже и Сiлуáн, возлю́бленный Твой, мóлит Тя о душáх нáших.
И ны́не и прúсно и во вéки векóв. Амúнь.
Богорóдичен: Скóрбных наведéнiя обуревáют убóгую мою́ дýшу,/ и напáстей óблацы моè покрывáют сéрдце, Богоневéсто,/ но, Свет рóждшая Божéственный и превéчный,// возсiя́й мне свет рáдости, моли́твами Сiлуáна, угóдника Твоегó.
Iрмóс: В начáле Небесá/ всесúльным Слóвом Твоúм утверждéй Гóсподи Спáсе,/ и Вседéтельным и Бóжiим Дýхом,/ всю сúлу их,/ на недвúжимем мя кáмени// исповéданiя Твоегó утвердù.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрїстé,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менé совоскреси́л есѝ.
Хор: Пресвятáя Богорóдице, спасù нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 2
Хор: Пресвятáя Богорóдице, спасù нас.
Чтец: Непорóчно Бóгу пожи́вшiи,/ всех роди́сте Спасéнiе,/ богомýдрiи роди́теле// Зижди́теля Рóждшiя и Бóга нáшего. (Двáжды)
Хор: Пресвятáя Богорóдице, спасù нас.
Чтец: Всем жизнь источáяй Госпóдь/ от неплóдове произведé Дéву,/ в Ню́же всели́тися извóли,// и по Рождествé сохрани́в нетлéнну.
Хор: Пресвятáя Богорóдице, спасù нас.
Чтец: Áннин плод, Марíю, днесь,/ Грозд рóждшую живонóсный,/ я́ко Богорóдицу воспои́м,// Предстáтельницу же всех, и Помóщницу.
Глас 5
Хор: Преподóбне óтче Сiлуáне, молù Бóга о нас.
Чтец: Кто исповéсть страдáнiя души́ твоея́, преподóбне Сiлуáне,/ егдá дух злóбы поднебéсныя претя́ше ти,/ от Гóспода удали́ти дýшу твою́ зложелáя?// Сетéй сегó лукáваго избáви и нас, моли́твенниче о всей вселéнней. (Двáжды)
Хор: Преподóбне óтче Сiлуáне, молù Бóга о нас.
Чтец: Си́лою терпéнiя и красотóю смирéнiя душá твоя́, всеблажéнне,/ хрáмина Дýху Святóму устрóися, сегó рáди взывáл еси́:/ о лю́дiе, творéнiе Бóжiе, познáйте Творцá// и любóвiю к Немý прилепи́теся.
Хор: Преподóбне óтче Сiлуáне, молù Бóга о нас.
Чтец: Истóчник рáдостей твои́х и средотóчiе мы́слей твои́х/ И́мя Бóга Вы́шняго бысть, óтче Сiлуáне,/ к Немý прилепи́тися и в Нем утверди́тися// моли́твами твои́ми помози́ нам, к тебé прибегáющим.
Слáва Ѻтцý и Сы́ну и Святóму Дýху.
Тропáрь: Гóсподи, Гóсподи, дáруй си́лу Твоея́ благодáти,/ да познáют Тебé вси лю́дiе Дýхом Святы́м,/ взывáем к Тебé уми́льно, я́коже возлю́бленный Твой,// любóвiю к Тебé распаля́емый, Сiлуáн преди́вный.
И ны́не и прúсно и во вéки векóв. Амúнь.
Богорóдичен: Не умолчý вопи́ти яснéйше вели́чiя Твоя́:/ áще бо не Ты, Отрокови́це,/ всегдá предстоя́ла, моля́щи о мне Сы́на Твоегó,// кто бы толи́кiя бýри и лю́тых бед избáвил мя?
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Рождествá Богорóдицы, глас 4: Iоакíм и Áнна поношéнiя безчáдства/ и Адáм и Éва от тли смéртныя свободи́стася, Пречи́стая,/ во святéм рождествé Твоéм./ То прáзднуют и лю́дiе Твои́,/ вины́ прегрешéнiй избáвльшеся,/ внегдá звáти Ти:// неплóды раждáет Богорóдицу и Питáтельницу Жи́зни нáшея.
Íкос: Моли́тва кýпно и воздыхáнiе неплóдства и безчáдства Iоакíма же и Áнны благопрiя́тное/ и во ýши Госпóдни вни́де, и прозябé плод живонóсен мíру./ Ов бо моли́тву на горé творя́ше, óва же в садé поношéнiе ношáше,// но с рáдостiю неплóды раждáет Богорóдицу и Питáтельницу Жи́зни нáшея.
Кондáк прп. Сiлуáна, глас 2: Смиренномýдрiя исповéдниче преди́вный/ и человеколю́бiя Дýхом Святы́м согревáемая добрóто,/ Бóгу возлю́бленне Сiлуáне,/ о пóдвизе твоéм Цéрковь Россíйская рáдуется,/ íноцы же Горы́ Афóнскiя и вси хрїстiáнстiи лю́дiе,/ веселя́щеся, сынóвнею любóвiю к Бóгу устремля́ются./ Егóже моли́ о нас, равноáнгельне боговéдче,// во éже спасти́ся нам, в горéнiи любвé тебé подражáющим.
Íкос: Имéя богáтство благодáти, во éже дýхом на Небесá возведéну бы́ти,/ вои́стину рáдости неизречéнныя сподóбился еси́, óтче преблажéнне Сiлуáне./ Егдá бо, вне образóв мíра, в созерцáнiи безмéрно лю́бящаго Хрїстá Бóга Лицé ви́дети сподóбился еси́,/ тогдá, Дýхом Святы́м укрепля́емь,/ в вертогрáде Преблагословéнныя Богомáтере Томý всеусéрднейше послужи́л еси́./ Егóже моли́, равноáнгельне боговéдче,// во éже спасти́ся нам, в горéнiи любвé тебé подражáющим.
Седáлен прп. Сiлуáна, глас 4: Жáждею по Бóзе возревновáв, óтче наш Сiлуáне, зéмлю отéческую остáвил еси́,/ и со пустыннолю́бцы Горы́ Афóнскiя/ длáни твоя́ порабóтати Гóсподеви всеусéрднейше распростéрл еси́,/ идéже равноáнгельскими труды́ твои́ми вертогрáд Влады́чицы ми́ра преукрáсил еси́/ и, я́ко благовóнiе, Цéркви Вселéнстей возблагоухáл еси́,// лозó виногрáда нóваго, Дýхом Святы́м облагодáтствованная.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Попрáзднства, глас 5: Iоакíм и Áнна торжествýют,/ по Бóзе бо достóйно благодáть обретóша/ и роди́ша плод, богопрiя́тен храм,/ Дéву и Чи́стую Мáтерь Бóжiю,/ еди́ну Благословéнную, моля́щуюся непрестáнно// спасти́ся душáм нáшим.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрїстè Бóже,/ тáйну услы́шах смотрéнiя Твоегó,// и прослáвих Тя, Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Чтец: Я́ко пчелá трудолю́бная, постóм и моли́твою к Бóгу прилежáл еси́/ и Богорóдицу Пречи́стую мiр не оставля́ти слéзно умоля́л еси́,/ óтче преподóбне, не престáй и ны́не о нас моли́тися,// я́ко и́маши дерзновéнiе вéлiе. (Двáжды)
Хор: Преподóбне óтче Сiлуáне, молù Бóга о нас.
Чтец: Клáдязь нóвый благодáти неисчерпáемыя в Горè Афóнстей яви́лся еси́, всеблажéнне,/ из негóже, пáче мéда и сóта,/ слáдость любвè Хрїстóвы Дýхом Святы́м источáется,// éюже в гóрести грехóвней услади́ сердцá нáша.
Хор: Преподóбне óтче Сiлуáне, молù Бóга о нас.
Чтец: Гóсподу, рéкшу: идéже есть сокрóвище вáше, ту бýдет и сéрдце вáше,/ - благоволи́ ýбо, о всеблажéнне, с тобóю Томý взывáти:/ Гóсподи, Дýхом Твои́м Святы́м даждь сéрдцу моемý жáжду,// да никогдáже Тобóю насы́щуся.
Слáва Ѻтцý и Сы́ну и Святóму Дýху.
Тропáрь: Я́ко жéртву благовóнную и непорóчную,/ принеси́ моли́твы твоя́ за ны ко Пресвятéй Трóице, преподóбне óтче наш,/ и ми́лости испроси́ ненави́дящим и враждýющим на нас,// и их и нас избáви от вся́кiя скóрби и печáли.
Чтец: За Твоя́ рабы́ продаéшися, Хрїстé,/ и по лани́те ударéнiе терпи́ши,/ свобóде ходáтайственно пою́щим:// к Тебé ýтренюю, и воспевáю Твоé Божествó.
Богорóдичен: Бóга родилá еси́ Мáти чи́стая,/ воплощéннаго из Тебé боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 2
Хор: Пресвятáя Богорóдице, спасù нас.
Чтец: Воспои́м, лю́дiе, всех винý/ сýщаго по нам бы́ти Винóвнаго:/ Ея́же óбразу рáдовахуся сподобля́еми прорóцы,// явлéнное спасéнiе от Тоя́ плодя́ще. (Двáжды)
Хор: Пресвятáя Богорóдице, спасù нас.
Чтец: От сýха прозябéнiе жезлá iерéева/ Iзрáилю показá проразсуждéнiе,/ и ны́не свéтлость прозя́бших преслáвно свéтит,// от неплóдове всеслáвное рождéнiе. (Двáжды)
Глас 5
Хор: Преподóбне óтче Сiлуáне, молù Бóга о нас.
Чтец: Ты, Гóсподи, создáл мя еси́ и святы́м Крещéнiем просвети́л мя еси́,/ Ты прощáеши грехи́ моя́ и дáруеши причащáтися Тéла Твоегó и Крóве,/ дáруй ми си́лу всегдá пребывáти в Тебé,// Сiлуáново рыдáнiе приношý Ти, Бóже наш. (Двáжды)
Хор: Преподóбне óтче Сiлуáне, молù Бóга о нас.
Чтец: Умá моегó омрачéнiе и страстéй телéсных обуревáнiе/ твои́ми моли́твами, всеблажéнне, просвети́ и ути́ши,/ я́коже дерзнýл еси́ укроти́ти вóлны морскíя,// не терпя́ ви́дети ры́бари ги́бельными вéтры обуревáемы.
Хор: Преподóбне óтче Сiлуáне, молù Бóга о нас.
Чтец: Недостóйными усты́ приноси́мое тебé убóгое хвалéнiе нáше, преподóбне, не прéзри,/ но прiими́ и воспевáющих пáмять твою́ моли́твою посети́,/ бед и напáстей и вéчнаго мучéнiя избáви,// да не постыди́мся, на тя уповáюще.
Слáва Ѻтцý и Сы́ну и Святóму Дýху.
Тропáрь: Я́коже гóрлица пустыннолю́бная, от стрáжи ýтреннiя до нóщи/ воспевáти Трóицу Единосýщную и Нераздéльную/ со пустыннолю́бцы Гóры Святы́я прилежáл еси́, óтче Сiлуáне,// умилостивлéнiя мéртвым, живы́м и грядýщим ходáтайствуя.
И ны́не и прúсно и во вéки векóв. Амúнь.
Богорóдичен: Кiй дар благодарéнiя принесý Ти, Богорóдице,/ я́ко наслади́хся Твои́х даровáнiй и Твоея́ безмéрныя блáгости?/ Тéмже ýбо песнослóвлю и величáю// Твою́ неизречéнную ко мне ми́лость.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Плáвающаго в молвè житéйских попечéнiй,/ с кораблéм потопля́ема грехù,/ и душетлéнному звéрю приметáема,/ я́ко Ióна, Хрїстè, вопiю́ Ти:// из смертонóсныя глубины́ возведù мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебé спасéнiя моля́хуся:/ éже Крестóм, Хрїстé, пóдал еси́ преиспóдним,// пришéд я́ко благоутрóбен.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебé,// плоть из Тебé бысть.
Глас 2
Хор: Пресвятáя Богорóдице, спасù нас.
Чтец: Ко Гóсподу в скóрби неплóдства возопи́ша/ Богомáтере богомýдрiи роди́тели/ и Сiю́ в рóды родóв роди́ша,// на óбщее спасéнiе и похвалý. (Двáжды)
Хор: Пресвятáя Богорóдице, спасù нас.
Чтец: Прiя́ша Небéсный дар от Бóга достóин/ Богомáтере богомýдрiи роди́тели,/ самéх Херувíмов превы́шшее носи́ло,// Слóва и Зижди́теля Роди́тельницу.(Двáжды)
Глас 5
Хор: Преподóбне óтче Сiлуáне, молù Бóга о нас.
Чтец: Святи́телiе и свящéнницы, íноцы и вси лю́дiе,/ рáдующеся, вкýпе прослáвите Бóга и Пречи́стую Мáтерь Егó,/ кади́ло нóвое, моли́тву чи́стую Сiлуáна, плáменем Дýха Святáго горя́ща,// у Престóла Небéснаго за нас прiя́вших. (Двáжды)
Хор: Преподóбне óтче Сiлуáне, молù Бóга о нас.
Чтец: Возвесели́ся, Горó Афóнская, со пустыннолю́бцы твои́ми/ и во псалмéх и пéнiих и пéснех духóвных воскли́кни Бóгу:/ да угóден бýдет пред Лицéм Твои́м вéрный слугá Твой,// егóже моли́твами благодáть нóвая Цéркви Святéй даровáся.
Хор: Преподóбне óтче Сiлуáне, молù Бóга о нас.
Чтец: Прiиди́те, вси вéрнiи, со пустыннолю́бцы Горы́ Святы́я,/ пáмять прáведнаго с похвалáми почти́м, взывáюще:/ возноси́те Гóспода Бóга нáшего и покланя́йтеся в горé святéй Егó// ди́вно во святы́х Свои́х Почивáющему.
Слáва Ѻтцý и Сы́ну и Святóму Дýху.
Тропáрь: Бóже, кто уподóбится Тебé?/ Ты Еди́н Вы́шнiй по всей земли́./ Мы же, равноáнгельному смирéнiю рабá Твоегó внéмлюще,// óбразу и подóбiю Твоемý Дýхом Святы́м чáем обнови́тися.
И ны́не и прúсно и во вéки векóв. Амúнь.
Богорóдичен: Не скры́ю глубины́ Твои́х щедрóт, и тóка безмéрных чудéс,/ и истóчника приснотекýщаго вои́стину éже ко мне ми́лости Твоея́, Богорóдице:// но всем исповéдую, и вопiю́, и вещáю.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, ами́нь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрїстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Íкос: Вострепетáша дóле преиспóдняя днесь,/ ад и смерть Еди́наго от Трóицы:/ земля́ поколебáся, врáтницы же áдовы ви́девше Тя, ужасóшася:/ вся же тварь со прорóки рáдующися поéт Тебé побéдную песнь,/ избáвителю Бóгу нáшему,/ разруши́вшему ны́не смéртную си́лу./ Да воскли́кнем и возопiи́м ко Адáму, и к сýщим из Адáма:/ дрéво сегó пáки введé.// Изыди́те, вéрнiи, в воскресéнiе.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Едúнаго Бóга воспевáюще и глагóлюще:/ превозносúмый отцéв Бог// и препрослáвлен.