Неделя 15 по Пятидесятнице. Иконы Божией Матери "Неопалимая Купина" ВСЕНОЩНОЕ БДЕНИЕ.ВЕЛИКАЯ ВЕЧЕРНЯ
17 сентября́ 2023 гóда. Недéля 15 по Пятидеся́тнице. Пáмять явлéнiя Iкóны Бóжiей Мáтери, именýемой «Неопалúмая Купинá». Глас 6. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душé моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 6: Побéду имéя, Хрїстé, ю́же на áда,/ на Крест возшéл еси́:/ да во тьме смéрти седя́щiя воскреси́ши с Собóю,/ И҆́же в мéртвых Свобóдь,/ Источáяй живóт от Своегó свéта,// Всеси́льне Спáсе, поми́луй нас.
Менè ждут прáведницы,// дóндеже воздáси мне.
Стiхúра: Днесь Хрїстóс смерть попрáв,/ я́коже речé, воскрéсе,/ и рáдованiе мíрови даровá,/ да вси взывáюще, песнь тáко рцем:/ Истóчниче жи́зни, Непристýпный Свéте,// Всеси́льне Спáсе, поми́луй нас.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúра: Тебé, Гóсподи, Сýщаго по всей твáри,/ грéшнiи кáмо бежи́м;/ на Небеси́ Сам живéши,/ во áде попрáл еси́ смерть./ Во глубины́ морскíя;/ тáмо рукá Твоя́, Влады́ко./ К Тебé прибегáем,/ Тебé припáдающе мóлимся:// Воскресы́й из мéртвых, поми́луй нас.
Да бýдут ýши Твоù// внéмлюще глáсу молéнiя моегó.
И҆́ны стiхúры анатóлiевы: Крестóм Твои́м, Хрїстé, хвáлимся,/ и воскресéнiе Твоé поéм и слáвим:/ Ты бо еси́ Бог наш,// рáзве Тебé инáго не вéмы.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Вы́ну благословя́ще Гóспода, / поéм воскресéнiе Егó: / Крест бо Претерпéв, // смéртiю смерть погуби́.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Слáва си́ле Твоéй, Гóсподи, / я́ко упраздни́л еси́ держáву имýщаго смéрти: / обнови́л еси́ нас Крестóм Твои́м, // дáруя нам живóт и нетлéнiе.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры Богорóдицы, глас 2: Прiиди́те, вéрнiи, с любóвiю к горé святéй/ и тáмо ýзрим видéнiе Божéственное,/ егóже вели́кiй во прорóцех Моисéй Богови́дец нам тáинственно возвещáет,/ кáко купинá горя́ше огнéм и неопали́ма бысть,/ сим проявля́ющи обрáзно вéлiю и непостижи́мую тáйну/ безсéменнаго Рождествá Твоегó, Богорóдице./ Я́ко Огнь Божествá неопали́мо в ложеснáх Твои́х вмести́ла еси́/ и по Рождествé ключи́ дéвства невреди́мо сохрани́ла еси́./ Тéмже ублажáем Тя вси рóди,// я́ко рóждшую Спáса и Избáвителя душ нáших.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Пребывáвши в Рождествé и по Рождествé Дéва,/ огнéм неопали́мыя купины́ дрéвле прообразовáнная Моисéови, Богороди́телънице,/ и созывáвши вéрных собóры/ iкóны Твоея́ честнóе явлéнiе благохвали́ти в пéснех духóвных./ Я́ко в ней залóг благоволéнiя Твоегó рóду хрїстiáнскому даровáла еси́/ в покрóв и защи́ту от óгненнаго запалéнiя и молнiенóснаго грóма./ Се бо и на iкóне зря́ще Тя, в подóбiи неопали́мыя купины́ изображéнную,/ дáры блáгости Твоея́ от нея́ неоскýдно прiéмлем/ и Тя ублажáем по дóлгу,// я́ко рóждшую Спáса и Избáвителя душ нáших.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Плáмень страстéй нáших угашáеши моли́твою Твоéю, Богорóдице Дéво,/ предстáтельствующи за нас непрестáнно у Престóла Сы́на Твоегó и Бóга нáшего,/ я́ко вои́стину вéлiе дерзновéнiе и́маши к Немý/ и ничтóже невозмóжно есть ходáтайству Твоемý./ Ибо самóй iкóне Твоéй даровá Он си́лу Божéственную/ совершáти мнóгая и преди́вная чудесá,/ си́ми уверя́я нас,/ я́ко никтóже прибегáяй к покрóву заступлéнiя Твоегó посрáмлен оты́дет./ Сегó рáди поéм моли́тв Твои́х си́лу/ и ублажáем Тя, Надéжде хрїстiáн,/ рóждшую Спáса и Избáвителя душ нáших.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Подáждь пóмощь Твою́ держáвную нам, Богорóдице,/ егдá, грех рáди нáших,/ óгненнаго запалéнiя наказáнiе на нас прiи́дет внезáпно/ или́ грóми и мóлнiи с небесé нас устрашáт./ Тогдá iкóною Твоéю святóю нас защити́ и избáви/ и яви́ся Утоли́тельница гнéва Бóжiя, на нас прáведно подви́женнаго./ Мнóго бо мóжет Мáтерняя моли́тва ко Творцý,/ и всеси́льно ходáтайство Твоé пред Лицéм Всевы́шняго,/ Егóже умоля́ти не престáй за род хрїстiáнскiй,/ я́же в пéснех немóлчных ублажáет Тя,// рóждшую Спáса и Избáвителя душ нáших.
Слáва Отцý и Сыну и Святóму Дýху и ны́не и прúсно и во вéки векóв, амúнь.
Догмáтик. Глас 6: Кто Тебé не ублажи́т, Пресвятáя Дéво?/ Кто ли не воспоéт Твоегó Пречи́стаго Рождествá?/ Безлéтно бо от Отцá возсiя́вый Сын Единорóдный,/ Тóйже от Тебé Чи́стыя прóйде,/ неизречéнно воплóщься,/ естествóм Бог сый,/ и естествóм быв Человéк нас рáди,/ не во двою́ лицý разделя́емый,/ но во двою́ естествý/ несли́тно познавáемый./ Тогó моли́ Чи́стая Всеблажéнная,// поми́ловатися душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРИМИИ
Чтец: Бытiя́ чтéнiе.
(Из главы 28) Изы́де Iáков от студенцá кля́твеннаго и и҆́де в Харрáнь. И обрéте мéсто, и спа тáмо: зáйде бо сóлнце, и взят от кáменiя мéста тогó, и положи́ возглáвше себé, и спа на мéсте óном. И сон ви́де. И се лéствица, утверждéна на земли́, eя́же главá досязáше до небéс, и Áнгели Бóжiи восхождáху и низхождáху по ней. Госпóдь же утверждáшеся на ней, и речé: Аз Бог Авраáмов, отцá твоегó, и Бог Iсаáков, не бóйся: земля́, идéже ты спи́ши на ней, тебé дам ю и сéмени твоемý. И бýдет сéмя твоé, я́ко песóк земны́й, и распространи́тся на мóре, и ли́ву, и сéвер, и на востóки; и возблагословя́тся о тебé вся колéна земнáя и о сéмени твоéм. И се Аз с тобóю, сохраня́яй тя на вся́ком пути́, áможе áще пóйдеши. И возвращý тя в зéмлю сiю́, яко не и҆́мам тебé остáвити, дóндеже сотвори́ти Ми вся, ели́ка глагóлах тебé. И востá Iáков от сна своегó, и речé: яко eсть Госпóдь на мéсте сем, аз же не вéдех. И убоя́ся, и речé: я́ко стрáшно мéсто сié; несть сié, но дом Бóжiй и сiя́ вратá Небéсная.
[Русский синодальный перевод]Иаков же вышел из Вирсавии и пошел в Харран, и пришел на одно место, и остался там ночевать, потому что зашло солнце. И взял один из камней того места, и положил себе изголовьем, и лег на том месте. И увидел во сне: вот, лестница стоит на земле, а верх ее касается неба; и вот, Ангелы Божии восходят и нисходят по ней. И вот, Господь стоит на ней и говорит: Я Господь, Бог Авраама, отца твоего, и Бог Исаака; [не бойся]. Землю, на которой ты лежишь, Я дам тебе и потомству твоему; и будет потомство твое, как песок земной; и распространишься к морю и к востоку, и к северу и к полудню; и благословятся в тебе и в семени твоем все племена земные; и вот Я с тобою, и сохраню тебя везде, куда ты ни пойдешь; и возвращу тебя в сию землю, ибо Я не оставлю тебя, доколе не исполню того, что Я сказал тебе. Иаков пробудился от сна своего и сказал: истинно Господь присутствует на месте сем; а я не знал! И убоялся и сказал: как страшно сие место! это не иное что, как дом Божий, это врата небесные.(Быт.28:10-17)
Чтец: Исхóда чтéнiе.
(Из главы 3): Вни́де Моисéй в гóру Бóжiю Хори́в, яви́ся же емý Áнгел Госпóдень в плáмени óгненне из купины́, и ви́де, яко купинá горя́ше огнéм и купинá не сгарáше. Речé же Моисéй: прешéд, узрю́ видéнiе вели́кое сié, что яко не сгарáет купинá? Якоже ви́де Госпóдь, яко приступáет ви́дети, призвá егó Госпóдь, из купины́ глагóля: Моисéе, Моисéе. Он же речé: что есть? И речé: не прибли́жися сéмо. Иззýй сапóг от ногý твоéю: мéсто бо, на нéмже ты стои́ши, земля́ святá есть. И речé емý: Аз есмь Бог отцá твоегó, Бог Авраáмов, и Бог Iсаáков, и Бог Iáковль. Отвратѝ же Моисéй лицé своé, стыдя́ше бо ся зрéти пред Бóгом. Речé же Госпóдь к Моисéю: ви́дя, ви́дех озлоблéнiе людéй Мои́х, иже во Еги́пте, и вопль их услы́шах от наси́льствующих в дéлех. Вем бо болéзнь их, и снидóх, éже изъя́ти их от рукѝ еги́птян, и известѝ их от землѝ óныя, и ввестѝ их в зéмлю блáгу и мнóгу, в зéмлю, точáщу мед и млекó.
[Русский синодальный перевод]И пришел Моисей к горе Божией, Хориву. И явился ему Ангел Господень в пламени огня из среды тернового куста. И увидел он, что терновый куст горит огнем, но куст не сгорает. Моисей сказал: пойду и посмотрю на сие великое явление, отчего куст не сгорает. Господь увидел, что он идет смотреть, и воззвал к нему Бог из среды куста, и сказал: Моисей! Моисей! Он сказал: вот я, [Господи]! И сказал Бог: не подходи сюда; сними обувь твою с ног твоих, ибо место, на котором ты стоишь, есть земля святая. И сказал [ему]: Я Бог отца твоего, Бог Авраама, Бог Исаака и Бог Иакова. Моисей закрыл лице свое, потому что боялся воззреть на Бога. И сказал Господь [Моисею]: Я увидел страдание народа Моего в Египте и услышал вопль его от приставников его; Я знаю скорби его и иду избавить его от руки Египтян и вывести его из земли сей [и ввести его] в землю хорошую и пространную, где течет молоко и мед.(Исх.3:1-8)
Чтец: Прорóчества Iезекíилева чтéнiе.
(Из глав 43 и 44) Тáко глагóлет Госпóдь: бýдет от дне осмáго и прóчее, сотворя́т iерéи на олтари́ всесожжéнiя вáшего и я́же спасéнiя вáшего, и прiимý вы, глагóлет Адонаи́ Госпóдь. И обрати́ мя на путь врат святы́х внéшних, зря́щих на востóки, и сiя́ бя́ху затворéна. И речé Госпóдь ко мне: вратá сiя́ затворéна бýдут и не отвéрзутся, и никтóже прóйдет сквозé их; я́ко Госпóдь Бог Iзрáилев прóйдет и҆́ми, и бýдут затворéна. Я́ко Игýмен ся́дет в них снéсти хлеб, по пути́ Елáмских врат вни́дет и по пути́ егó изы́дет. И введé мя по пути́ врат святы́х, сýщих к сéверу, пря́мо хрáму, и ви́дех, и се испóлнь слáвы храм Госпóдень.
[Русский синодальный перевод]Так говорит Господь: по окончании сих дней, в восьмой день и далее, священники будут возносить на жертвеннике ваши всесожжения и благодарственные жертвы; и Я буду милостив к вам, говорит Господь Бог. И привел он меня обратно ко внешним воротам святилища, обращенным лицом на восток, и они были затворены. И сказал мне Господь: ворота сии будут затворены, не отворятся, и никакой человек не войдет ими, ибо Господь, Бог Израилев, вошел ими, и они будут затворены. Что до князя, он, как князь, сядет в них, чтобы есть хлеб пред Господом; войдет путем притвора этих ворот, и тем же путем выйдет. Потом привел меня путем ворот северных перед лицо храма, и я видел, и вот, слава Господа наполняла дом Господень.(Иез.43:27;44:1-4)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Богорóдицы, глас 6: Я́ко вои́стину дрéвняго кiвóта честнéйшая/ яви́ся святáя iкóна Твоя́, Богорóдице Влады́чице,/ на нéйже божéственнаго ли́ка Твоегó подóбiе созерцáем./ На рукý бо Твоéю Богомладéнца Предвéчнаго,/ Гóспода Iисýса Хрїстá, держи́ши,/ Áнгелов и человéков Творцá,/ и всемý мíру явля́вши/ из Тебé безсéменно воплóщшагося Бóга Слóва,/ Емýже раболéпно клáняющеся,/ песнослóвим Тя, вои́стину Богорóдицу,/ и мóлим Ти ся прилéжно:/ умири́ мiр и спаси́ дýши нáша/ Мáтерним предстáтельством Твои́м к Рóждшемуся от Тебé,// еди́на Благословéнная.
Предстоя́т честнéй iкóне Твоéй хрiстолюби́вiи лю́дiе/ и с любóвiю ей покланя́ются, Богорóдице Влады́чице,/ почерпáюще оби́льныя от нея́ дáры щедрóт Твои́х:/ в недýзех врачествó, в бедáх избавлéнiе,/ в скóрбех утешéнiе,/ и́бо всем вся благáя и душеполéзная дáруеши/ с вéрою прося́щим пред пречи́стым óбразом Твои́м./ Сегó рáди сéрдцем и усты́ благоговéйно лобызáем/ Божéственнаго ли́ка Твоегó подóбiе/ и мóлим Ти ся прилéжно:/ умири́ мiр и спаси́ дýши нáша/ всеси́льными моли́твами Твои́ми к Рóждшемуся от Тебé,// еди́на Благословéнная.
Пéрвее написáвшейся iкóне Твоéй/ божéственным Евангели́стом Лукóю/ и к Тебé принесéнней, Богорóдице Влады́чице,/ благоволи́ла еси́ о iкóне сей, я́ко ми́лостива сýщи,/ и, благослови́вши ю,/ реклá еси́ со влáстiю:/ с сим óбразом благодáть Моя́ и си́ла./ И воспéла еси́, рáдующися,/ я́коже и Бóга внегдá носи́ла еси́ во чрéве,/ песнь прорóческую:/ сé от ны́не ублажáт Мя вси рóди./ Тéмже, ви́дяще с глáсом дéйство чудéс мнóжества,/ от iкóны Твоея́ явлéнное и присноявля́емое по всей вселéнней,/ немóлчными славословлéнiи Тя ублажáем/ и мóлим Ти ся прилéжно:/ умири́ мiр и спаси́ дýши нáша/ благопрiя́тным ходáтайством Твои́м к Рóждшемуся от Тебé,// еди́на Благословéнная.
Горá еси́ вели́кая и преслáвная/ пáче горы́ Сiнáйскiя, Богорóдице Влады́чице:/ та бо, не терпя́щи сни́тiя Слáвы Бóжiя,/ огнéм возгарáшеся, и грóми и мóлнiи тáмо бы́ша./ Ты же Огнь Божествá, Бóга Слóва,/ неопáльно во чрéве Твоéм вмести́ла еси́/ и млекóм питáла еси́ Питáтеля вселéнныя./ К Немýже дерзновéнiе Мáтернее имýщи,/ спасáй от бед вéрно прáзднующiй Твой честны́й прáздник,/ в нéмже песнослóвим ми́лости Твоя́ и щедрóты/ и мóлим Ти ся прилéжно:/ умири́ мiр и спаси́ дýши нáша/ Божéственным молéнiем Твои́м к Рóждшемуся от Тебé,// еди́на Благословéнная.
Слáва Ѻтцý и Сы́ну и Святóму Дýху и ны́не и прúсно и во вéки векóв, амúнь.
Пáче ски́нiи Моисéевы, по óбразу Небéсному сотворéнныя,/ всю Тя Бог освяти́, Богорóдице,/ и пáче Аарóня кiвóта испóлни благодáти Бóжiя изоби́льно,/ ея́же и iкóна Твоегó подóбiя причáстна показáся,/ источáет бо освящéнiе и цельбý душáм и телесéм человéческим/ и уставля́ет си́лу óгненную прису́тствiем свои́м./ Ейже с любóвiю покланя́ющеся,/ прóсим, Всеблагáя, и вопiéм:/ огня́ врéменнаго и вéчнаго избáви нас,// Благословéнная Помóщнице.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 6): Воскресéнiе Твоé, Хрїстé Спáсе,/ Áнгели пою́т на Небесéх,/ и нас на земли́ сподóби,/ чи́стым сéрдцем// Тебé слáвити.
Стiх: Госпóдь воцарúся, в лéпоту облечéся.
И҆́ны по алфавúту, глас 6: Вратá сокруши́в мéдная,/ и вереи́ áдовы сотры́й,/ я́ко Бог всеси́лен,/ род человéческiй пáдшiй воскреси́л еси́./ Сегó рáди и мы соглáсно вопiéм:// Воскресы́й из мéртвых, Гóсподи, слáва Тебé.
Стiх: И҆́бо утвердù вселéнную,/ я́же не подвúжется.
Тлéнiя нас дрéвняго Хрїстóс испрáвити хотя́,/ на Крестé пригвождáется,/ и во грóбе полагáется./ Егóже мvронóсицы жены́ со слезáми искáху, плáчуща глагóлаху:/ увы́ нам, Спáсе всех,/ кáко извóлил еси́ во грóбе всели́тися;/ Всели́выйся же хотя́, кáко укрáден был еси́;/ кáко преложи́лся еси́;/ кóе же мéсто Твоé Живонóсное сокры́ Тéло;/ но, Влады́ко, я́ко обещáлся еси́ нам яви́ся,/ и утоли́ от нас рыдáнiе слез./ Плáчущимся же им, Áнгел к ним возопи́:/ от плáча престáвша Апóстолом рцы́те, я́ко воскрéсе Госпóдь,// мíрови дáруя очищéнiе и вéлiю ми́лость.
Стiх: Дóму Твоемý подобáет святы́ня, Гóсподи,/ в долготý днiй.
Распны́йся я́ко восхотéл еси́, Хрїстé,/ и смерть погребéнiем Твои́м Плени́вый,/ триднéвен воскрéсл еси́, я́ко Бог, со слáвою,/ мíрови дáруя безконéчную жизнь,// и вéлiю ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен из Минéи, глас 6: От святы́я iкóны Твоей,/ Влады́чице Преблагáя,/ исцелéнiй струи́ истекáют,/ и́миже напая́ются благодáтно ду́ши нáша/ и врачу́ются безмéздно телесá нáша;/ тéмже Тя, Целéбницу ми́лостивую,// при́сно в пéснех величáем.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: И́же во огни́ купины́ неопали́мыя, дрéвле Моисéем ви́денныя,/ тáйну воплощéнiя Своегó от неискусобрáчныя Дéвы Марíи Прообразовáвый,/ Той и ны́не, я́ко чудéс Творéц и всея́ твáри Создáтель,/ iкóну Ея́ святýю чудесы́ мнóгими прослáви,/ даровáв ю вéрным во исцелéнiе недýгом/ и в защищéнiе от óгненнаго запалéнiя./ Сегó рáди вопiéм Преблагословéнней:/ надéждо хрїстiáн, от лю́тых бед, огня́ и грóма избáви на Тя уповáющiя/ и спаси́ дýши нáша, я́ко милосéрда. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню