Неделя 15 по Пятидесятнице. Иконы Божией Матери "Неопалимая Купина" УТРЕНЯ (окончание) ЧАС ПЕРВЫЙ
17 сентября́ 2023 гóда. Недéля 15 по Пятидеся́тнице. Пáмять явлéнiя Iкóны Бóжiей Мáтери, именýемой «Неопалúмая Купинá». Глас 6. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
ПЕСНЬ 8
Iрмóс: Из плáмене преподóбным рóсу источúл есù/ и прáведнаго жéртву водóю попалúл есù:/ вся бо творúши, Хрїстè, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебè на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил еси́,/ и во ад сошéд, всегó совоздви́гл еси́/ лежáщаго во гнóищи, Хрїстè, человéка,// Тя превознося́ща во вся вéки.
Хор: Пресвятáя Богорóдице, спасù нас.
Богорóдичен: От Свéта Светодáвца Слóва зачалá еси́,/ и рóждши неизречéнно Сегó, прослáвилася еси́:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Ужасéся всяк слух,/ кáко Вы́шнiй вóлею прiи́де на зéмлю,/ áдову крéпость разруши́ти крестóм и погребéнiем,/ и вся воздви́гнути звáти:/ óтроцы благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Престá áдово мучи́тельство,/ и цáрство уничижи́ся прóчее,/ на крестè бо на земли́ водрузи́вся, и́же над всéми Бог,/ сегó могýтство низложи́./ Егóже óтроцы благослови́те, свящéнницы воспóйте,// лю́дiе превозноси́те во вся вéки.
Глас 6
Хор: Пресвятáя Богорóдице, спасù нас.
Чтец: Позлащéною ри́зою, я́коже Цари́цу, Сын Твой просвети́в зарéю Дýха,/ Тебé одеснýю Себé постáви, Пречи́стая:// Егóже превознóсим во вся вéки.
Хор: Пресвятáя Богорóдице, спасù нас.
Чтец: И҆́же хотéнiем еди́ным мiр водрузи́вый,/ от пречи́стыя Твоея́ утрóбы плоть взéмлет,/ свы́ше сiю́ наздáти хотя́:// Егóже превознóсим во вся вéки.
Глас 8
Хор: Пресвятáя Богорóдице, спасù нас.
Чтец: Возмущéнiе души́ моей утоли́, Всенепорóчная,/ от клеветы́ навéтующих избáви мя,/ враждý грехóвную во мне укроти́ и нéнависть мрáчную отврати́ от менé, Дéво,/ да прославля́ю Тя, Чи́стая, во вéки.(Двáжды)
Хор: Пресвятáя Богорóдице, спасù нас.
Чтец: Огнь я́рости, во мне зелó разжжéнный, росóю благодáтныя моли́твы Твоея угаси́,/ хулý, умножáющую души́ моéй озлоблéнiе, и вся́кiй вид злóбы, гнездя́щiйся в сéрдце моéм, искорени́, Дéво,/ да Тя прославля́ю, Чи́стая, во вéки.(Двáжды)
Благословúм Отцá, и Сы́на, и Святáго Дýха, Гóспода.
Тропáрь: Óбраз Хрїстóв евáнгельскими добродéтельми напиши́ в души́ моéй, Богоблагодáтная,/ укрепи́ и утверди́ мя во вся́ком дéле блáзе, от вся́кiя же злóбы отврати́ сéрдце моé,/ да ми́рными усты́ прославля́ю Тя, Чи́стая, во вéки.
И ны́не и прúсно и во вéки векóв, амúнь.
Тропáрь: Крóтким óком Твои́м виждь моé смирéнiе, Пренепорóчная Богоневéсто,/ и приклони́ ýхо Твоé к моли́тве сéрдца моегó,/ крóтостiю и незлóбiем благоукраси́ мя, помрачéннаго безобрáзiем злóбных страстéй,/ и сотвори́ причáстника блажéнства, крóтким обетовáннаго,/ да рáдуяся прославля́ю Тя, Чи́стая, во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Бóга/ человéком невозмóжно вúдети,/ на Негóже не смéют чúни Áнгельстiи взирáти;/ Тобóю бо, Всечúстая, явúся человéком/ Слóво воплощéнно,/ Егóже величáюще,// с Небéсными вóи Тя ублажáем.
Хор: Слáва, Гóсподи, Святóму Воскресéнiю Твоемý.
Чтец: Страстéй непричáстен Ты пребы́л еси́, Слóве Бóжiй,/ плóтiю прiобщи́вся страстéм:/ но реши́ши от страстéй человéка,/ страстéм быв страсть, Спáсе наш:// еди́н бо еси́ безстрáстен, и всеси́лен.
Хор: Слáва, Гóсподи, Святóму Воскресéнiю Твоемý.
Чтец: Тлю смéртную прiéм, тлéнiя соблю́л еси́ тéло Твоé невкýсно,/ Твоя́ же животворя́щая и божéственная, Влады́ко, душá, во áде не остáвлена бысть:// но я́коже от сна воскрéс, нас совоздви́гл еси́.
Хор: Пресвятáя Трóице, Бóже наш, слáва Тебè.
Трóичен: Бóга Отцá, Сы́на собезначáльна,/ вси человéцы устнáми ýбо чистыми слáвим,/ неизречéнную же и преслáвную Дýха Всесвятáго силу чтим:// едина бо еси́ всесильная Трóица неразлýчная.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: А́ще и во гроб сошéл еси́ я́ко мертв, Жизнодáвче,/ но áдову крéпость разруши́л еси́, Хрїстé,/ совоздви́гнув мéртвыя, я́же и поглоти́,/ и воскресéнiе всем пóдал еси́, я́ко Бог,// вéрою и любóвiю Тя величáющим.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да рáдуется тварь, и да процветéт я́ко крiн:/ Хрїстóс бо от мéртвых востá, я́ко Бог./ Где Твоé, смéрте, ны́не жáло, воззовéм?/ Где Твоя́, áде, побéда?/ Низложи́ Тя в зéмлю,// Возвы́сивый рог наш, я́ко благоутрóбен.
Глас 6
Хор: Пресвятáя Богорóдице, спасù нас.
Чтец: Звездá сiя́ющи заря́ми Божествá от Iáкова,/ от мрáка содержи́мым возсiя́:/ Тобóю бо, Всечи́стая, Хрїстóс Бог Слóво воплощéнно:// И́мже просвещáеми, с небéсными вóи Тя ублажáем.
Хор: Пресвятáя Богорóдице, спасù нас.
Чтец: Укрéплься си́лою Твоéю и благодáтiю,/ Тебé песнь усéрдно от сéрдца возложи́х:/ но сiю́ прiими́, Дéво Чи́стая,/ благодáть воздаю́щи Твою́ многосвéтлую,// от нетлéнных сокрóвищ, богоблажéнная.
Глас 8
Хор: Пресвятáя Богорóдице, спасù нас.
Чтец: Скóрби сéрдца моегó утиши́, Рáдосте скорбя́щих,/ уны́нiе душегуби́тельное отыми́ от менé, Утоли́тельнице печáли,/ и лéность ко взыскáнiю добродéтелей искорени́ во мне, Взыскáнiе поги́бших,/ да Тебé, Дéво Чи́стая, непрестáнно величáю.(Двáжды)
Хор: Пресвятáя Богорóдице, спасù нас.
Чтец: Малодýшiем болéзнующаго мя оживи́, Цели́тельнице боля́щих,/ отчáянiем пáдшаго мя возстáви, Одиги́трiе заблýждших,/ грехми́ умерщвлéннаго мя воскреси́, Спорýчнице грéшных,/ да Тебé, Дéво Непорóчная, непрестáнно величáю.(Двáжды)
Слáва Отцý и Сы́ну и Святóму Дýху.
Тропáрь: Усéрдiе во мне твори́ти вóлю Бóжiю возбуди́/ и рéвность ко слáве Бóжiей воспламени́ в сéрдце моéм,/ Купинó огнезрáчная и неопали́мая,/ и благоговéйна служи́теля Хрїстóва содéлай мя, Дéво,/ Предводи́тельнице моегó спасéнiя.
И ны́не и прúсно и во вéки векóв, амúнь.
Тропáрь: Слезáми покая́нiя и умилéнiя изсóхшую в зной страстéй дýшу мою́ умягчи́, я́ко рунó орошéнное Гедеóна,/ и сокрушéнiе к исправлéнiю даждь ми, Дéво,/ да вéчная блáга унаслéдую и с ли́ки избрáнных Бóжiих воспою́ Тя,/ Ходáтаицу моегó спасéнiя.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрїстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный четвéртый: Добродéтельми блистáвшеся,/ ви́дим предстоя́ща в живонóснем грóбе/ мýжа в блещáщихся ри́зах:/ миронóсицам преклóньшим ли́ца на зéмлю,/ небесы́ Влады́чествующаго воскресéнiю да научи́мся,/ и к Животá грóбу с Петрóм притецéм,/ и содéянному уди́вльшеся,// пребýдем Хрїстá ви́дети.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен пресвяты́я Богорóдицы: Iкóну Твою́ всечестнýю в залóг благоволéнiя Твоегó вéрным даровáла еси́, Влады́чице,/ покрывáющи и сохраня́ющи éю от óгненнаго запалéнiя на Тя уповáющiя./ О Мáти Царя́ Хрiстá Бóга, бýди и нам, грéшным,/ прибéжище спасéнiя в нечáянных бедáх и Ходáтаица вéчныя жи́зни.
ХВАЛИТНЫ
Хор, глас 6: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 6: Крест Твой, Гóсподи,/ жизнь и воскресéнiе лю́дем Твои́м есть,/ и надéющеся нань,// Тебè воскрéсшаго Бóга нáшего поéм: поми́луй нас.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Погребéнiе Твоè, Влады́ко,/ рай отвéрзе рóду человéческому:/ и от истлéнiя избáвльшеся,// Тебé воскрéсшаго Бóга нáшего поéм: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Со Отцéм и Дýхом Хрїстá воспои́м,/ воскрéсшаго из мéртвых,/ и к Немý вопiи́м:// Ты Живóт еси́ наш и Воскресéнiе, поми́луй нас.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Триднéвен воскрéсл еси́, Хрїстè, от грóба/ я́коже есть пи́сано,/ совоздви́гнувый прáотца нáшего./ Тéмже Тя и слáвит род человéческiй,// и воспевáет Твоé воскресéнiе.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры пресвяты́я Богорóдицы, глас 6: О, вели́кiя блáгости/ и неисчéтнаго милосéрдiя Твоегó, Влады́чице!/ Удивля́вши нас преслáвными чудесы́,/ и́хже источáет iкóна Твоя́ святáя,/ во óбразе неопали́мыя купины́ Тя изобразýющая/ и óгненнаго естествá си́лу укрощáющая/ си́лою Твоéю Божéственною./ ю́же с весéлiем прiéмлюще,/ Тя, Чи́стую Богоотрокови́цу,// достодóлжно пéсньми почитáем и ублажáем.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: О, благосéрдаго Твоегó/ о нас промышлéнiя, Влады́чице!/ В годи́ну бед и обстоя́нiй,/ егдá внезáпное запалéнiе óгненное/ обы́мет жили́ща нáша,/ чýдную iкóну Твою́/ посылáеши нам в пóмощь и защи́ту/ и éю укрощáвши свирéпство огня́,/ я́ко Мáти сýщи/ стихíями обладáющаго Влады́ки Хрїстá./ Тéмже велеглáсно проповéдуем Твоя́ чудесá/ и ми́лость мнóгу к рóду хрїстiáнскому/ и пéсньми хвалéбными// немóлчно Тя величáем и ублажáем.
Слы́ши, Дщи, и виждь, и приклони́ ýхо Твоé. (Пс.44:11А)
Стiхúра: О, преслáвнаго чудесè!/ Кáко огнезрáчная iкóна Твоя́, Влады́чице,/ огня́ си́лу угашáет/ и свéтлыми лучáми Бóжiя благодáти/ умы́ просвещáет и сердцá весели́т?/ Вои́стину бо торжествó благочéстiя/ явлéнiе iкóны Твоея́ познавáюще,/ прáзднуем сiè в пéснех духóвных рáдостно/ и Тя, Богоблагодáтная Дéво, Винóвницу рáдости нáшей,// славословлéнiя глáсы восхваля́ем и ублажáем.
Лицý Твоемý помóлятся богáтiи лю́дстiи. (Пс.44:13Б)
Глас 6: О чýдо чудéс,/ Богоневéстная Мáти и Дéво!/ Чудотвори́ти не престаéши и ны́не/ iкóною Твоéю пречестнóю,/ отрáду и утешéнiе éю дáруеши/ стрáнником земны́м в юдóли скóрби и плáча./ Из Тебè бо воплоти́ся/ Обнови́тель пáдшаго естествá человéча,/ сый Бог наш,/ даровáвый нам Тебé в покрóв и защи́ту,/ Иже слы́шит моли́тву Твою́,/ за нас приноси́мую,/ и преклоня́ется к молéнiю Твоемý Мáтернему,/ егдá умоля́вши блáгость Егó за лю́ди согреши́вшыя./ Тéмже не престáй, благосéрдая Влады́чице,/ предстáтельствовати за вся ны, чтýщыя Тя,// я́ко вои́стину еси́ Ходáтаица непосты́дная нáшего спасéнiя.
Слáва Отцý и Сыну и Святóму Дýху.
Стiхúра евáнгельская четвéртая, глас 4: У́тро бе глубокó,/ и жены́ прiидóша на гроб Твой, Хрїстè,/ но Тéло не обрéтеся желáемое и́ми./ Тéмже недоумевáющимся,/ и́же в ри́зах блещáщихся предстáвшiи глагóлаху:/ что живáго с мéртвыми и́щете;/ востá, я́коже предречè,/ что не пóмните глагóл Егó?/ И́мже вéровавша, ви́денная проповéдаху,/ но мня́хуся лжа благовéщенiя:/ тáко бы́ша ещé кóсни ученицы́./ Но Петр течè, и ви́дев// прослáви Твоя́ в себè чудесá.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 6: Áнгельскiя Си́лы на грóбе Твоéм, и стрегýщiи омертвéша; и стоя́ше Марíя во грóбе, и҆́щущи Пречи́стаго Тéла Твоегó. Плени́л еси́ ад, не искуси́вся от негó; срéтил еси́ Дéву, дáруяй живóт. Воскресы́й из мéртвых, Гóсподи, слáва Тебè.
Слáва Отцý и Сы́ну и Святóму Дýху.
Тропáрь пресвяты́я Богорóдицы, глас 4: И́же во огни́ купины́ неопали́мыя, дрéвле Моисéем ви́денныя, тáйну воплощéнiя Своегó от неискусобрáчныя Дéвы Марíи Прообразовáвый, Той и ны́не, я́ко чудéс Творéц и всея́ твáри Создáтель, iкóну Ея́ святýю чудесы́ мнóгими прослáви, даровáв ю вéрным во исцелéнiе недýгом и в защищéнiе от óгненнаго запалéнiя. Сегó рáди вопiéм Преблагословéнней: надéждо хрїстiáн, от лю́тых бед, огня́ и грóма избáви на Тя уповáющiя и спаси́ дýши нáша, я́ко милосéрда.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк пресвяты́я Богорóдицы, глас 8: Предочи́стим чýвствiя душ и телéс нáших, да ви́дим тáинство Божéственное, обрáзно явлéнное дрéвле вели́кому во прорóцех Моисéю купинóю, горéвшею огнéм и не сгарáвшею, в нéйже Твоегó безсéменнаго Рождествá, Богорóдице, предвозвещéнiе исповéдуем и, благоговéйно покланя́ющеся Тебé и рóждшемуся от Тебé Спáсу нáшему, со стрáхом вопiéм: рáдуйся, Влады́чице, покрóве, и прибéжище, и спасéнiе душ нáших.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу