Неделя 15 по Пятидесятнице. Иконы Божией Матери "Неопалимая Купина" ВСЕНОЩНОЕ БДЕНИЕ. УТРЕНЯ КАНОН
17 сентября́ 2023 гóда. Недéля 15 по Пятидеся́тнице. Пáмять явлéнiя Iкóны Бóжiей Мáтери, именýемой «Неопалúмая Купинá». Глас 6. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 6: Вóльною и животворя́щею Твоéю смéртiю, Хрїстé,/ вратá áдова сокруши́в, я́ко Бог,/ отвéрзл еси́ нам дрéвнiй рай, и воскрéс из мéртвых,// избáвил еси́ от тлéнiя живóт наш.
СЕДАЛЬНЫ ПО ПОЛИЕЛЕИ
Глас 4 (по 1‑м стiхослóвiи): Яви́ся в огнепáльней купинé на Сiнáи/ Твоегó, Влады́чице, нетлéннаго Рождествá проóбраз,/ я́коже богослóвцы Цéркве Хрiстóвой богомýдренно исповéдуют./ Купинá бо, огнéм горéвшая, неопáльна пребывáше./ Тáко и Ты Огнь Божествá во чрéве Твоéм неопáльно носи́ла еси́,/ воплóщшагося от Тебé Бóга Слóва,/ Егóже моли́ спасти́ся нам, пою́щим Тя.
Глас 4 (по 2‑м стiхослóвiи): Удиви́ся богови́дец Моисéй, ви́дев купинý, огнéм горя́щу и несгарáему,/ и устраши́ся Божéственнаго тайноявлéнiя,/ в нéмже благоволи́ Госпóдь/ воплощéнiя Своегó от Дéвы неискусомýжныя проóбраз ми́ру яви́ти,/ я́ко в послéдняя лéта, спасти́ хотя́ пáдшее человéчество,/ плóти дебельствóм Божествá Своегó слáву сокры́ет/ и с нáми поживéт, спасáя дýши нáша от поги́бели вéчныя.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Седáлен пресвяты́я Богорóдицы по полiелéе, глас 6: А́нгельскiя Си́лы боголéпно Тебé слýжат, Небесé и земли́ Цари́це Богорóдице,/ и Твой пресвяты́й óбраз обстоя́т неви́димо./ Тех бо Творцá и Гóспода воплоти́ла еси́ и на рукý Твоéю, я́ко Младéнца, носи́ла еси́,/ Иже гóрняя с дóльними совокупи́ и А́нгелы с человéки ликовствовáти устрóи,/ пою́щiя во глáсех рáдованiя Твоé нетлéнное Рождествó.
СТЕПЕННА, ГЛАС 6
1 АНТИФОН
Хор: На нéбо óчи моù возвожý, к Тебé, Слóве:// ущéдри мя, да живý Тебé. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас протúву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и҆́мам от врагá избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем дúвни:// горé бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ны́не и прúсно и во вéки векóв. Амúнь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiиди́ во éже спасти́ нас. (Пс.79:3Б)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Гóсподи, воздви́гни си́лу Твою́.
Хор: И прiидù во éже спастù нас.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.112): Во врéмя óно, во еди́ну от суббóт, зелó рáно, прiидóша жены́ на гроб, нося́ще я́же уготóваша аромáты, и другíя с ни́ми. Обретóша же кáмень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, ещé сый в Галiлéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возврáщшася от грóба, возвести́ша вся сiя́ единомунáдесяте и всем прóчим. Бя́ше же Магдали́на Марíя, и Iоáнна, и Марíя Iáковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же востáв течé ко грóбу, и прини́к ви́де ри́зы еди́ны лежáща, и оты́де, в себé дивя́ся бы́вшему.
В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менé от лицá Твоегó, и Дýха Твоегó Святáго не отымѝ от менé. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном крестовоскрéсным (глас 6), Богорóдицы (глас 6) и канóном Iкóны Бóжiей Мáтери, именýемой «Неопалúмая Купинá», глас 8)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гонúтеля фараóна/ вúдя потопля́ема,// Бóгу побéдную песнь поúм, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестé,/ отéческаго испóлнил еси́ благоволéнiя, благíй Iисýсе, вся́ческая.// тéмже побéдную песнь Тебé вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебé, я́ко рабы́ня, смерть/ повелéна приступи́ Влады́це животá,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасù нас.
Богорóдичен: Своегó прiéмши Содéтеля, я́ко Сам восхотé,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася еси́, Влады́чица.
Канон крестовоскресный, глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Суди́лищу Пiлáтову предстои́т хотя́/ беззакóнному судý, я́ко суди́мь, Судiя́,/ и от руки́ непрáвды по лицý заушáется Бог,// егóже трепéщут земля́, и небéсная.
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ Божéственнеи длáни Твои́, Спáсе,/ на пречи́стем Твоéм и живонóснем Крестé:/ и собрáл еси́ язы́ки в познáнiе Твоé, Влады́ко,// покланя́ющыяся, Гóсподи, слáвному Твоемý распя́тiю.
Канон Богородицы, глас 6
Хор: Пресвятáя Богорóдице, спасù нас.
Чтец: Причáщшися Éва садý, преслушáннаго брáшна, кля́тву введé:/ но сiю́ разреши́ла еси́, Чи́стая,// благословéнiя начáток Хрiстá рóждши.
Хор: Пресвятáя Богорóдице, спасù нас.
Чтец: Я́же би́сера от божéственныя мóлнiи Хрiстá рóждши,/ страстéй мои́х мглу, и прегрешéнiй смущéнiе, Чи́стая,// разжени́ свéтом Твоея́ свéтлости.
Канон Богородицы (иконы «Неопалимая Купина»), глас 8
Хор: Пресвятáя Богорóдице, спасù нас.
Чтец: Ум помрачéнный мой просвети́, Дéво,/ огненóсным сiя́нiем Твоея́ слáвы,/ пáмять, в славослóвiи изнемогáющую, укрепи́/ и воспламени́ хлáдное моé сéрдце Божéственною любóвiю,/ да Тебé, Купинé Неопали́мей, пéнiе хвалéбное воспою́ достóйно, Чи́стая.(Двáжды)
Хор: Пресвятáя Богорóдице, спасù нас.
Чтец: Храм Трисóлнечнаго Свéта прекрáсный,/ украси́ моя́ чýвства, молю́ся,/ да целомýдренною мы́слiю и несквéрными усты́/ огнезрáчныя iкóны Твоея́ явлéнiе воспою́ достóйно, Чи́стая.(Двáжды)
Слáва Отцý и Сы́ну и Святóму Дýху.
Тропáрь: К Твоéй пресвéтлаго зрáка iкóне припáдаю, окая́нный:/ дýшу мою́ озари́ благодáтно, яви́ и тéло несквéрно/ и, от лю́тых мя недýгов свободи́вши,/ покажи́ причáстника наслéдiя Небéснаго, Богоневéстная.
И ны́не и прúсно и во вéки векóв, амúнь.
Тропáрь: Недýгующа страстьми́ многоразли́чными, / от iкóны Твоея́ Божéственныя исцелéнiя сподóби мя́, о Богомáти Влады́чице, / да слáвлю чудесá Твоя́ и пою́ Тя́, благи́х винóвную, // Вéчную Блáгость воплоти́вшую, мíра благýю Застýпницу.
Катавáсiя (глас 8): Крест начертáв, Моисéй/ впря́мо жезлóм Чермнóе пресечè,/ Iзрáилю пешеходя́щу;/ тóже обрáтно фараóновым колесни́цам, удáрив, совокупѝ,/ вопрекѝ написáв непобеди́мое орýжiе.// Тем Хрїстý пои́м, Бóгу нáшему, я́ко прослáвися.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твоúх, Блáже,/ и утвердúвый нас на кáмени// исповéданiя Твоегó.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животá бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасù нас.
Богорóдичен: Божéственнаго рождествá Твоегó, Чи́стая,/ вся́кiй естествá чин превосхóдит чýдо:/ Бóга бо преестéственне зачалá еси́ во чрéве,// и рóждши пребывáеши при́сно Дéва.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Во грóбе триднéвствовавый/ воскреси́л еси́ животворя́щим востáнiем Твои́м прéжде умерщвлéнныя,/ и осуждéнiя разреши́вшеся, рáдостно веселя́хуся,// се избавлéнiе пришéл еси́, Гóсподи, взывáюще.
Хор: Слáва, Гóсподи, Крестý Твоемý Честнóму и Воскресéнiю.
Чтец: Слáва Твоемý востáнiю, Спáсе наш,/ я́ко нас от áда тлéнiя, и смéрти избáвил еси́, я́ко Всеси́лен,/ и пою́ще глагóлем:// несть свят рáзве Тебé, Гóсподи Человеколю́бче.
Глас 6
Хор: Пресвятáя Богорóдице, спасù нас.
Чтец: Тлéнную мою́ плоть и смéртную, Всечи́стая Богомáти,/ из чрéва Твоегó несказáнно прiéм Благíй,// и обезтлéнив сiю́, вéчне Себé связáл есть.
Хор: Пресвятáя Богорóдице, спасù нас.
Чтец: Бóга воплощáема из Тебé зря́ще, Дéво,/ ужасáхуся стрáхом ли́цы Áнгельстiи,// и я́ко Мáтерь Бóжiю немóлчными пéсньми Тя почитáют.
Глас 8
Хор: Пресвятáя Богорóдице, спасù нас.
Чтец: Низложи́ налóги бесóвскiя, стужáющыя мне, Влады́чице,/ гóрдость в добродéтели, лицемéрiе в свя́тости, тщеслáвiе во бдéнiи,/ высокоýмiе в благоговéнiи и неблагодáрность о благодея́нiих Сы́на Твоегó,// еди́на Всепéтая Дéво.(Двáжды)
Хор: Пресвятáя Богорóдице, спасù нас.
Чтец: Стрáнна мя любочéстiя сотвори́, молю́ Тя, Дéво,/ и чýжда любопы́тства о человéческих согрешéнiих,/ дéрзость и изли́шнее на ми́лость Сы́на Твоегó уповáнiе отдали́ от менé,/ да достóйны Емý плоды́ принесý, еди́на Пречи́стая.(Двáжды)
Слáва Отцý и Сы́ну и Святóму Дýху.
Тропáрь: Начáло от земли́ прiéмшую хýдость моегó естествá познавáя,/ молю́ Тя, Дéво, даждь ми презрéнiе славолю́бiя, бéгство человéческiя хвалы́,/ познáнiе собственнаго грехá и собственныя нéмощи,/ еди́на Богоблажéнная.
И ны́не и прúсно и во вéки векóв, амúнь.
Тропáрь: Крáткiй всех вещéй и всегó мíра конéц,/ смéртный час и мучéнiе бýдущее за суетý дея́нiй тщеслáвных/ помышля́ти сподóби мя́, Дéво,/ да благодáтiю Сы́на Твоегó к пути́ и́стиннаго покая́нiя настáвлен,// вéчнаго избéгну прокля́тiя, Пренепорóчная.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк пресвяты́я Богорóдицы, глас 8: Предочи́стим чýвствiя душ и телéс нáших,/ да ви́дим тáинство Божéственное,/ обрáзно явлéнное дрéвле вели́кому во прорóцех Моисéю купинóю,/ горéвшею огнéм и не сгарáвшею,/ в нéйже Твоегó безсéменнаго Рождествá, Богорóдице, предвозвещéнiе исповéдуем/ и, благоговéйно покланя́ющеся Тебé и рóждшемуся от Тебé Спáсу нáшему,/ со стрáхом вопiéм: рáдуйся, Влады́чице,/ покрóве, и прибéжище, и спасéнiе душ нáших.
Íкос: Прови́дя ди́вный Моисéй в неопали́мей купинé на Сiнáи тáйну, от вéка утаéнную,/ Безлéтнаго, в лéте роди́тися восхотéвшаго, рождéнiе от Чи́стыя и Неискусобрáчныя Дéвы,/ ýжасом содержи́мь, вопiя́ше:/ Сiя́ земля́ вои́стину святá есть,/ я́ко Плод спаси́тельный ми́ру из Нея́ произы́дет,/ и́мже гóресть падéнiя Адáмова услади́тся./ Сегó послýшая, и мы, тáинства Бóжiя собы́тiе познáвшiи,/ ублажáем Тя, Богорóдице, возвели́чившую пáдшее человéчество/ и милосéрдiем неизречéнным призревáющую на род хрiстiáнскiй,/ тéмже и зовéм Ти:/ рáдуйся, Влады́чице, покрóве, и прибéжище, и спасéнiе душ нáших.
Седáлен пресвяты́я Богорóдицы, глас 8: Вели́чiя Твоя́ кто исповéсть, Богорóдице?/ Явлéнiем бо огнезрáчныя iкóны Твоея́ возвесели́ла еси́ дýши правослáвных,/ мнóгiя недýги éю врачýющи, от огня́ же и грóма защищáющи/ и́же по Бóзе на Тя уповáнiе возлагáют./ О Всеми́лостивая Влады́чице, не лиши́ ýбо и нас Твоегó заступлéнiя,/ спаси́ правослáвных хрiстiáн от вся́каго зла,/ да Тобóю хвáлящеся, не постыди́мся во вéки.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Вели́чiя Твоя́ кто исповéсть, Богорóдице?/ Явлéнiем бо огнезрáчныя iкóны Твоея́ возвесели́ла еси́ дýши правослáвных,/ мнóгiя недýги éю врачýющи, от огня́ же и грóма защищáющи/ и́же по Бóзе на Тя уповáнiе возлагáют./ О Всеми́лостивая Влады́чице, не лиши́ ýбо и нас Твоегó заступлéнiя,/ спаси́ правослáвных хрiстiáн от вся́каго зла,/ да Тобóю хвáлящеся, не постыди́мся во вéки.
ПЕСНЬ 4
Iрмóс: Хрїстóс моя́ сúла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чúста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелó есть, Хрїстé, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегó ребрá,// живóт нам прозябé.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрїстóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасù нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на земли́ и на небеси́, Приснодéво, тáинства.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Честны́й крест Твой почитáем, и гвóзди, Хрiстé,/ и святóе копié с трóстiю, венéц и́же от тéрнiй,// и́миже от áдова истлéнiя избáвихомся.
Хор: Слáва, Гóсподи, Крестý Твоемý Честнóму и Воскресéнiю.
Чтец: Гроб, Спáсе, Тя подъя́т вóлею мéртва о нас я́вльшагося,/ но никáкоже возмóже, Слóве, удержáти:// я́ко Бог бо воскрéсл еси́, спасáя род наш.
Глас 6
Хор: Пресвятáя Богорóдице, спасù нас.
Чтец: Поéм, Пречи́стая, Тебé Всенепорóчную,/ и҆́же Тобóю спáсшiися,/ и благочéстно пою́ще взывáем:// благословéнна, я́же Бóга, Приснодéво, рóждшая.
Хор: Пресвятáя Богорóдице, спасù нас.
Чтец: Свет незаходи́мый, Дéво, родилá еси́,/ сýщим во тьме житiя́,/ плóтiю светя́щ, Всеблажéнная, и пою́щим Тя,// рáдость, Приснодéво, источи́ла еси́.
Глас 8
Хор: Пресвятáя Богорóдице, спасù нас.
Чтец: Жестокосéрдiем отягчéннаго мя облегчи́,/ немилосéрдiем к трéбующим окаменéнную утрóбу мою́ умягчи́,/ бýрею сребролю́бiя объя́таго мя ути́ши,/ во огни́ неопали́мыя купины́ прообразовáнная Влады́чице.(Двáжды)
Хор: Пресвятáя Богорóдице, спасù нас.
Чтец: Во уповáнiи тлéнных и врéменных вещéй не остáви мя/ и плáмень хищéнiя непрáведнаго угаси́ во мне плáменем огня́ Божéственнаго,/ Неопали́мая Купинá я́вльшаяся, Богоневéстная Влады́чице.(Двáжды)
Слáва Отцý и Сы́ну и Святóму Дýху.
Тропáрь: Iдолослужéнiе в лихоимáнiи и заблуждéнiе от и́стиннаго благочéстiя и правослáвныя вéры/ потреби́ от менé, Влады́чице, и не попусти́ мя пáсти падéнiем ерети́ческим,/ да восхваля́ю и́мя Твоé благословéнное до кончи́ны животá моегó в Правослáвiи непорóчно,/ еди́на Приснодéво.
И ны́не и прúсно и во вéки векóв, амúнь.
Тропáрь: Ум мой, молю́ Тя, Богорóдице, благоустрóй к познáнiю вéчных и́стин Хрiстóва Евáнгелiя,/ к разсмотрéнiю тлéнности врéменных благ напрáви мой пóмысл/ и щедролю́бiе дáруй ми неоскýдное,/ да благодáтiю Хрiстóвою укрáшен, пою́ Тя, еди́на Приснодéво.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоè Божествó.
ПЕСНЬ 5
Iрмóс: Бóжiим свéтом Твоúм, Блáже,/ ýтренюющих Ти дýши любóвiю озарù, молю́ся,/ Тя вéдети, Слóве Бóжiй,/ úстиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещи́ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрїстé, возвращéнiя:/ Ты бо от земли́ мя возвéл еси́ забвéнна,/ благоутрóбiя рáди мнóгаго,// к высотé нетлéнiя воскресéнiем Твои́м.
Хор: Пресвятáя Богорóдице, спасù нас.
Богорóдичен: И҆́же Богорóдицу Тя от души́, Влады́чице мíра благáя,/ исповéдающих спаси́:/ Тебé бо предстáтельство непобори́мое и҆́мамы,// и҆́стинную Богороди́тельницу.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Снéдiю дрéва во Едéме прельсти́выйся, в тлю поползé родоначáльник,/ преслýшавый, Гóсподи, зáповеди Твоя́, Преблагíй:/ но сегó Крестóм пáки возвéл еси́ в пéрвую добрóту,// послушли́в Отцý, Спáсе, бы́вый.
Хор: Слáва, Гóсподи, Крестý Твоемý Честнóму и Воскресéнiю.
Чтец: Твоéю смéртiю, Блáже, смéрти потреби́ся держáва,/ истóчник жи́зни нам источи́, и безсмéртiе даровáся:/ сегó рáди погребéнiю Твоемý и воскресéнiю вéрою покланя́емся,// и́мже, я́ко Бог, мир весь просвети́л еси́.
Глас 6
Хор: Пресвятáя Богорóдице, спасù нас.
Чтец: Чистотóю возсiя́вши свéтло,/ Божéственное пребывáнiе Влады́ки, Всепéтая, былá еси́./ Ты бо еди́на Мáти Бóжiя яви́лася еси́,// во объя́тiих, я́ко младéнца, Сегó носи́вши.
Хор: Пресвятáя Богорóдице, спасù нас.
Чтец: Нося́щи добрóту ýмную, краснéйшiя Твоея́ души́,/ Невéста Бóжiя былá еси́,/ запечáтствована дéвством, Чи́стая,// и свéтом чистоты́ мiр просвещáющи.
Глас 8
Хор: Пресвятáя Богорóдице, спасù нас.
Чтец: Огнь нечистоты́ и вся́кiя сквéрны во мне, безстýднем,/ мóрем блáгости Твоея́ потопи́, и мглу грехóвную разжени́,/ и сéрдце моé рáдости испóлни, Всенепорóчная.(Двáжды)
Хор: Пресвятáя Богорóдице, спасù нас.
Чтец: Срамослóвiю безобрáзному не даждь во мне мéста, Влады́чице,/ селéнiе соблáзнов замени́ в души́ моéй зрéнiем сóбственных грехóв,/ храм мя чистоты́ и целомýдрiя содéлай,/ да несквéрными усты́ величáю Тя вы́ну, Всенепорóчная.(Двáжды)
Слáва Отцý и Сы́ну и Святóму Дýху.
Тропáрь: Смерть, суд и мучéнiя вéчныя, грéшником уготóванная, в пáмяти моéй углуби́, Влады́чице,/ да понé послéдняя сiя́ в пáмяти содержá,/ лю́тая беззакóнiя остáвлю и плоды́ покая́нiя и́стиннаго принесý,/ величáя Тя при́сно, еди́но души́ моея́ уповáнiе.
И ны́не и прúсно и во вéки векóв, амúнь.
Тропáрь: Любóвь сея́ жи́зни изли́шнюю и плотскáго покóя рачéнiе/ отложи́ от менé, молю́ Тя, Дéво Чи́стая,/ да сýетных попечéнiй избéг, Тобóю получý нетлéнное на Небеси́ богáтство,/ еди́на души́ моея́ Покрови́тельнице.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к тúхому пристáнищу Твоемý притéк, вопiю́ Ти:/ возведù от тли живóт мой,// Многомúлостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копiéм же прободáемь в ребрó,// адáмово рукописáнiе растерзáв, мíр свободи́л еси́.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел еси́ на взыскáнiе,// и на рáму понéс, совоскреси́л еси́.
Хор: Пресвятáя Богорóдице, спасù нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утоли́ смущéнiе,// и тишинý подáждь сéрдцу моемý.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстоубíйца и пророкоубíйца бысть еврéйское мнóжество:/ я́ко бо прорóки дрéвле, и́стины сýщiя тáйныя лучи́, уби́ти не убоя́ся:/ си́це и ны́не Гóспода, егóже проповéдаху они́ тогдá,/ зáвистiю влекóми уби́ша,// но нам бысть живóт умерщвлéнiе Егó.
Хор: Слáва, Гóсподи, Крестý Твоемý Честнóму и Воскресéнiю.
Чтец: Ят был еси́, но не удержáн, Спáсе, во грóбе,/ áще бо и вóлею вкуси́л еси́ смéрти, Слóве,/ но воскрéсл еси́, я́ко Бог безсмéртен,/ совоздви́гнувый ýзники сýщiя во áде,// и рáдость женáм вмéсто печáли прéжнiя, пáки премени́вый.
Глас 6
Хор: Пресвятáя Богорóдице, спасù нас.
Чтец: Вели́кiй преднаписá во прорóцех Моисéй Тя,/ ковчéг, и трапéзу, и свéщник, и рýчку,/ обрáзно назнáменуя воплощéнiе,// éже из Тебé Вы́шняго, Мáти Дéво.
Хор: Пресвятáя Богорóдице, спасù нас.
Чтец: Умерщвля́ется смерть, и тлéнiе упражня́ется/ Адáмова осуждéнiя, о Влады́чице!/ Плодý Твоемý прирази́вшееся:/ Жизнь бо родилá еси́,// от истлéнiя избавля́ющую пою́щих Тя.
Глас 8
Хор: Пресвятáя Богорóдице, спасù нас.
Чтец: Рáдости сýетныя, к преогорчéнiю бли́жняго приводя́щiя, чýжда мя содéлай,/ Купинó Неопали́мая вéрными именýемая, Пречýдная Цари́це,/ даждь ми сопечáловатися и́скреннему моемý в бéдствiих, Человеколюби́вая Влады́чице,/ и памятозлóбiя избáви мя, прилéжно молю́ Тя, Всенепорóчная Дéво.(Двáжды)
Хор: Пресвятáя Богорóдице, спасù нас.
Чтец: Зáвисти в пóмысле моéм не даждь вкореня́тися,/ видéнiем несгарáемыя купины́ прообразовáнная Моисéю и рóждшаяся от кóрене свя́та, Дéво,/ и братоненавидéнiя избáви мя, Чи́стая,/ да не злóбою мрáчною осквернéн быв,/ лишýся Бóжiя благодáти и жи́зни вéчныя, Всенепорóчная Влады́чице.(Двáжды)
Слáва Отцý и Сы́ну и Святóму Дýху.
Тропáрь: Терпéнiе в бедáх утверди́ во мне, Всечи́стая,/ с рáдующимися духóвную рáдость, к сéтующим сожалéнiе дáруй ми, Пресвятáя,/ и братолю́бiе низпосли́ мне свы́ше, Любвé Пучи́ну рóждшая Дéво/ и любóвь вéлiю при́сно явля́ющая рóду хрiстiáнскому.
И ны́не и прúсно и во вéки векóв, амúнь.
Тропáрь: Желáнiе крáйнее согрéй во мне вся́кому бли́жнему от души́ благотвори́ти, Благáя,/ да не кáко злоб лю́тых душá моя́ испóлнится, и живóт мой áду прибли́жится,/ и прéдан бýду без ми́лости, я́ко несотвори́вый ми́лости, во тьму кромéшнюю,/ Всенепорóчная Богоневéсто.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 6: Живоначáльною длáнiю/ умéршiя от мрáчных удóлiй,/ Жизнодáвец воскреси́в всех Хрїстóс Бог,/ воскресéнiе подадé человéческому рóду:/ есть бо всех Спаси́тель,// Воскресéнiе и Живóт, и Бог всех.
Íкос: Крест и погребéнiе Твоé, Жизнодáвче, воспевáем вéрнiи, и покланя́емся,/ я́ко ад связáл еси́, Безсмéртне, я́ко Бог всеси́льный:/ и мéртвыя совоскреси́л еси́, и вратá смéртная сокруши́л еси́,/ и держáву áдову низложи́л еси́, я́ко Бог./ Тéмже земнорóднiи славослóвим Тя любóвiю, воскрéсшаго,/ и низложи́вшаго врáжiю держáву всепáгубную,/ и всех воскреси́вшаго в Тя вéровавших,/ и мiр избáвльшаго от стрел змiи́ных,// и от прéлести врáжiя, я́ко Бог всех.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучúтеля увещá вопúти:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, земли́ свет помéрче, вопiя́:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрїстé схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн еси́, Бóже отéц нáших.
Хор: Пресвятáя Богорóдице, спасù нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилá еси́ Бóга,/ Егóже проси́, Всечи́стая,// нам низпослáти вéрным вéлiю ми́лость.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: О стрáннаго óбраза!/ Iзрáиля Избавлéй от рабóты фараóнскiя,/ распинáется вóлею от негó,/ и разрешáет вери́ги согрешéнiй./ Емýже вéрою поéм:// избáвителю Бóже, благословéн еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé, Спáса, на лóбнем распя́ша пребеззакóнных óтроцы нечести́вiи,/ вратá мéдная и вереи́ сломи́вшаго,/ во спасéнiе нас, пою́щих:// избáвителю Бóже, благословéн, еси́.
Глас 6
Хор: Пресвятáя Богорóдице, спасù нас.
Чтец: Ю́нош трiéх пещь не опали́, рождествó прообразýющих Твоé:/ божéственный бо огнь Тебé не опали́в, всели́ся в Тя,/ и вся научи́ вопи́ти:// благословéн еси́, Бóже отéц нáших.
Хор: Пресвятáя Богорóдице, спасù нас.
Чтец: Блажáт концы́ Тя, Всечи́стая Мáти, я́коже прореклá еси́,/ просвещáеми светолýчными сiя́ньми Твои́ми,/ и благодáтiю пою́ще, вопiю́т:// благословéн еси́, Бóже отéц нáших.
Глас 8
Хор: Пресвятáя Богорóдице, спасù нас.
Чтец: Весéлiе мирскóе пресецы́ и душетлéнное пристрáстiе умертви́ во мне, Дéво,/ презрéнiе врéменных, желáнiе вéчных благ и нетлéнную рáдость подáждь ми с пою́щими:/ отцéв Бóже, благословéн еси́.(Двáжды)
Хор: Пресвятáя Богорóдице, спасù нас.
Чтец: Безчи́нное весéлiе и изли́шество, ум вредя́щее, душé сквéрну раждáющее, отлучи́ от менé, Дéво,/ и сподóби во здрáвiи душéвнем и телéснем духóвнаго утешéнiя наслаждáтися с пою́щими:/ отцéв Бóже, благословéн еси́.(Двáжды)
Слáва Отцý и Сы́ну и Святóму Дýху.
Тропáрь: Грехóм, смерть лю́тую раждáющим, оскверни́х дýшу мою́,/ но Ты, Пречи́стая Влады́чице, огнезрáчная и неопали́мая Купинá я́вльшися,/ ти́ну страстéй мои́х изсуши́ огнéм Бóжiя благодáти и настáви мя на богоугóдное житié,/ украси́ же воздержáнiем и целомýдрiем и даждь ми чи́стым сéрдцем пéти:/ отцéв Бóже, благословéн еси́.
И ны́не и прúсно и во вéки векóв, амúнь.
Тропáрь: К Твоéй огнезрáчней iкóне взирáя, молю́ Тя, Влады́чице,/ омрачéннаго мя самолю́бiем свéтом зрáка Твоегó просвети́/ и, пóхоти плотскíя укроти́вши во мне, огнéм Бóжiя любвé хлáдное сéрдце моé воспламени́,/ да Рóждшемуся от Тебé достóйно возмогý пéти:/ отцéв Бóже, благословéн еси́.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
продолженiе зри здесь