Рождество Иоанна Предтечи Крестителя Господня.ВСЕНОЩНОЕ БДЕНИЕ.ВЕЛИКАЯ ВЕЧЕРНЯ Служба мирским чином
7 ию́ля 2023 гóда. Рождествó честнáго слáвного Прорóка, Предтéчи и Крестúтеля Госпóдня Iоáнна. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 3
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
[Пропускается до стихир]Изведи́ из темни́цы дýшу мою́, исповéдатися и҆́мени Твоемý. Менé ждут прáведницы, дóндеже воздáси мне.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúры Предтéчи, самоглáсны, глас 4 (Iоáнна монáха): Разрешáет Захáрiино молчáнiе рождéйся Iоáнн,/ и́бо не подобáше отцý молчáти, пришéдшу глáсу,/ но, я́коже не вéровавшу пéрвее/ язы́к связá,/ си́це я́вльшуся дáти отцý свобождéнiе./ Емýже и благовести́ся,/ и роди́ся глас Слóва// и Свéта Предтéча, моля́ о душáх нáших.
Да бýдут ýши Твоù// внéмлюще глáсу молéнiя моегó.
Стiхúра: Разрешáет Захáрiино молчáнiе рождéйся Iоáнн,/ и́бо не подобáше отцу́ молчáти, пришéдшу глáсу,/ но, я́коже не вéровавшу пéрвее/ язы́к связá,/ си́це я́вльшуся дáти отцу́ свобождéнiе./ Емýже и благовести́ся,/ и роди́ся глас Слóва// и Свéта Предтéча, моля́ о душáх нáших.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Днесь глас Слóва,/ глас, за невéрiе держи́мый, разрешáет отéч/ и Цéркви явля́ет благочáдiе,/ соýзы неплóдствiя разрешáя мáтерни./ Свети́льник Свéта предгрядéт,/ заря́ Сóлнца прáвды возвещáет пришéствiе// в создáнiе всех и спасéнiе душ нáших.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Анатóлiя: Бóжiю Слóву хотя́щу от Дéвы роди́тися,/ Áнгел от стáрческих чресл происхóдит,/ вели́кiй в рождéнных женáми/ и прорóков превы́шшiй:/ подобáше бо Божéственных вещéй преслáвным бы́ти начáлом,/ кромé вóзраста исчáдiе/ и без сéмене зачáтiе./ Творя́й чудесá во спасéнiе нáше,// слáва Тебé.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Андрéя Крúтскаго: Яви́ся днесь вели́кiй Предтéча,/ от неплóдных ложéсн Елiсавéти произшéд,/ бóлiй всех прорóков прорóк,/ и ин несть, нижé востá:/ я́ко Предтéчи, свети́льнику, Свет послéдова пресвéтлый,/ и глáсу - Слóво,/ и невестовóдцу - Жени́х,/ готóвящему Гóсподеви лю́ди изря́дныя/ и предочищáющу при Дýсе водóю,/ Захáрiино прозябéнiе/ и пусты́ни дóброе воспитáнiе,/ покая́нiя проповéдник,/ очищéнiе согрешéнiй,/ сýщим во áде благовествýяй из мéртвых востáнiе// и моля́ о душáх нáших.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Прорóк и Предтéча из утрóбы яви́лся еси́,/ Хрiстóв Крести́телю Iоáнне,/ игрáя и рáдуяся во чрéве мáтерни,/ зря Цари́цу, пришéдшу к рабé,/ нося́щую Безлéтнаго, от Отцá без мáтере,/ к тебé, от неплóдныя и стáрца по обетовáнiю возсiя́вшему.// Тогó моли́ поми́ловати дýши нáша.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: О, преслáвнаго чудесé!/ И́же слóву Áнгела не вéровавый, глагóлющу,/ я́ко зачнéт Елiсавéть и роди́т сы́на, глагóля:/ кáко тáя роди́т,/ занé аз заматерéх/ и óныя удесá умертви́шася?/ Осуди́выйся молчáти за невéрiе/ днесь зрит раждáемо обещáнное/ и, молчáнiя разрéшься,/ в весéлiе вхóдит,/ благословéн, - вопiя́, - Госпóдь, Бог Iзрáилев,/ я́ко посети́ и сотвори́ избавлéнiе лю́дем Свои́м,// подая́й мíрови вéлiю ми́лость.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Iоáнне прехвáльне,/ и вселéнскiй апóстоле,/ Гаврiи́лово благовествовáнiе,/ и неплóдныя прозябéнiе,/ и пусты́ни дóброе воспитáнiе,/ и и́скреннiй дрýже Женихá Хрiстá,// Тогó моли́ поми́ловатися душáм нáшим.
Слáва Отцý и Сы́ну и Святóму Дýху.
Глас 6 (византíево): Днесь Свéта свети́льник/ предпýтiе твори́т пришéствiю Бóжiя Слóва,/ я́ко звездá свéтлая,/ днесь Захáрiин язы́к уясни́ся,/ молчáнiе держáв, Áнгелу повелéвшу,/ подобáше бо си́це отцý/ глас немолчáнiем храни́ти, произшéдш из утрóбы неплóдныя/ и всегó мíра избавлéнiе благовествýющ// со дерзновéнiем мнóгим.
И ны́не и прúсно и во вéки векóв, амúнь.
Глас тóйже: Елiсавéть зачáт Предтéчу благодáти,/ Дéва же Гóспода слáвы,/ целовáстеся óбе мáтери,/ и младéнец взыгрáся,/ внутрь бо раб хваля́ше Влады́ку./ Удиви́вшися же, мáти Предтéчева начáт вопи́ти:/ откýду мне се, да Мáти Гóспода моегó прiи́де ко мне?/ Да спасéт лю́ди отчáянныя// Имéяй вéлiю ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ВЕЧЕРНИЙ ПРОКИМЕН ДНЯ (ВЕЧЕРА ЧЕТВЕРГА)
Чтец: Прокíмен, глас шесты́й: Пóмощь моя́ от Гóспода, сотвóршаго нéбо и зéмлю. (Пс.120:2)
Хор: Пóмощь моя́ от Гóспода,/ сотвóршаго нéбо и зéмлю.
Чтец: Возведóх óчи мои́ в гóры, отню́дуже прiи́дет пóмощь моя́. (Пс.120:1)
Хор: Пóмощь моя́ от Гóспода,/ сотвóршаго нéбо и зéмлю.
Чтец: Пóмощь моя́ от Гóспода.
Хор: Сотвóршаго нéбо и зéмлю.
ПАРИМИИ
Чтец: Бытiя чтéнiе.
(Из глав 17,18 и 21): Речè Бог Авраáму: Сáра, женá твоя́, не наречéтся и́мя ей Сáра, но Сáрра бýдет и́мя ей. Благословлю́ же ю, и дам тебé от нея́ чáдо, и благословлю́ е, и бýдет во язы́ки, и цáрiе язы́к от негó изы́дут. И падé Авраáм на лицé своéм, и речé в мы́сли своéй: áще столéтну роди́тся сын? И Сáрра, дéвятьдесят лет сýщи, роди́т? Речé же Бог Авраáму: ей, се Сáрра, женá твоя́, роди́т тебе́ сы́на, и наречéши и́мя емý Iсаáк. И положý завéт Мой к немý в завéт вéчен. Авраáм же и Сáрра престарéвшася во днех. Возсмея́ же ся Сáрра в себé, глагóлющи: не у ми бысть дáже до ны́не, господи́н же мой стар. И речé Госпóдь Бог Авраáму: что я́ко возсмея́ся Сáрра в себé, глагóлющи: ýбо вои́стинну ли рождý? Аз же состарéхся. Едá не возмóжет от Бóга всяк глагóл? И Госпóдь Бог посети́ Сáрру, я́коже глагóла. И, зачéнши, роди́ Авраáму сы́на в стáрости, я́коже глагóла емý Госпóдь Бог. Обрéза же егó в день осмы́й, я́коже заповéда емý Госпóдь Бог. И Авраáм бя́ше лет ста, егдá бысть емý Iсаáк, сын егó. Речé же Сáрра: смех ми сотвори́ Госпóдь Бог. И́же бо áще услы́шит, срáдуется мне. И речé: кто возвести́т Авраáму, я́ко сосцáми питáет отрочá Сáрра, я́ко роди́х отрочá в стáрости моéй? И возрастé отрочá, и престá сосцáми питáтися. И сотвори́ Авраáм учреждéнiе вéлiе, вóньже день отдои́ся Iсаáк, сын егó.
[Русский синодальный перевод]Сказал Бог Аврааму: Сару, жену твою, не называй Сарою, но да будет имя ей: Сарра; Я благословлю её и дам тебе от неё сына; благословлю её, и произойдут от неё народы, и цари народов произойдут от неё. И пал Авраам на лицо своё, и рассмеялся, и сказал сам в себе: неужели от столетнего будет сын? и Сарра, девяностолетняя, неужели родит? Бог же сказал Аврааму: именно Сарра, жена твоя, родит тебе сына, и ты наречешь ему имя: Исаак; и поставлю завет Мой с ним заветом вечным. Авраам же и Сарра были стары и в летах преклонных. Сарра внутренне рассмеялась, сказав: мне ли, когда я состарилась, иметь сие утешение? и господин мой стар. И сказал Господь Аврааму: отчего это сама в себе рассмеялась Сарра, сказав: "неужели я действительно могу родить, когда я состарилась"? Есть ли что трудное для Господа? И призрел Господь на Сарру, как сказал. Сарра зачала и родила Аврааму сына в старости его во время, о котором говорил ему Бог. И обрезал Авраам Исаака, сына своего, в восьмой день, как заповедал ему Бог. Авраам был ста лет, когда родился у него Исаак, сын его. И сказала Сарра: смех сделал мне Бог; кто ни услышит обо мне, рассмеется. И сказала: кто сказал бы Аврааму: Сарра будет кормить детей грудью? ибо в старости его я родила сына. Дитя выросло и отнято от груди; и Авраам сделал большой пир в тот день, когда Исаак сын его отнят был от груди. (Быт.17:15-17.19; 18:11-14; 21:1-2.4-8)
Чтец: Судéй чтéнiе.
(Из главы 13): Во дни óны бысть муж от колéна Дáнова, и и́мя емý Манóе, и женá егó неплóды, и не раждáше. И яви́ся Áнгел Госпóдень к женé, и речé к ней: се ты неплóды, и во чрéве прiи́меши, и роди́ши сы́на. И ны́не сохрани́ся, не пiй вiнá и сiкéра и не яждь вся́ко нечи́сто. Занé се ты во чрéве прiи́меши и роди́ши сы́на, и желéзо не взы́дет на главý егó, я́ко освящéнно Бóгу бýдет отрочá из чрéва. И прiи́де женá, и речé мýжу своемý, глагóлющи: я́ко человéк Бóжiй прiи́де ко мне, и видéнiе егó, я́ко видéнiе Áнгела Бóжiя свéтло зелó. И речé: се во чрéве прiи́меши и роди́ши сы́на; и ны́не не пiй вiнá и сiкéра и не яждь вся́ко нечи́сто, я́ко освящéнно Бóгу бýдет отрочá из чрéва дáже до дне смéрти егó. И помоли́ся Манóе Бóгу, и речé: ко мне, Гóсподи, человéк Бóжiй, егóже послáл еси́ к нам, да прiи́дет ýбо и просвети́т нас, что сотвори́м отрочáти раждáющемуся? Прiи́де же Áнгел к Манóю и речé: от всех, и́хже рекóх женé твоéй, да сохрани́тся, ели́ка исхóдят от виногрáда, да не яст и вiнá и сiкéра да не пiéт. И речé Манóе ко Áнгелу Госпóдню: что и́мя твоé? Да егдá прiи́дет глагóл твой, прослáвим тя. И речé емý Áнгел Госпóдень: вскýю ты вопрошáеши и́мене моегó? И то есть чýдно. И не приложи́ ктомý Áнгел Госпóдень яви́тися к Манóю и женè егó.
[Русский синодальный перевод]В то время был человек, от племени Данова, именем Маной; жена его была неплодна и не рождала. И явился Ангел Господень жене и сказал ей: вот, ты неплодна и не рождаешь; но зачнешь, и родишь сына; итак берегись, не пей вина и сикера, и не ешь ничего нечистого; ибо вот, ты зачнешь и родишь сына, и бритва не коснется головы его, потому что от самого чрева младенец сей будет назорей Божий, и он начнет спасать Израиля от руки Филистимлян. Жена пришла и сказала мужу своему: человек Божий приходил ко мне, которого вид, как вид Ангела Божия, весьма почтенный; я не спросила его, откуда он, и он не сказал мне имени своего; он сказал мне: "вот, ты зачнешь и родишь сына; итак не пей вина и сикера и не ешь ничего нечистого, ибо младенец от самого чрева до смерти своей будет назорей Божий". Маной помолился Господу и сказал: Господи! пусть придет опять к нам человек Божий, которого посылал Ты, и научит нас, что нам делать с имеющим родиться младенцем. И Ангел Божий опять пришел и сказал Маною: пусть младенец остерегается всего, о чем я сказал жене твоей; пусть не ест ничего, что производит виноградная лоза; пусть не пьет вина и сикера и не ест ничего нечистого и соблюдает всё, что я приказал жене. И сказал Маной Ангелу Господню: как тебе имя? чтобы нам прославить тебя, когда исполнится слово твоё. Ангел Господень сказал ему: что ты спрашиваешь об имени моем? оно чудно. И невидим стал Ангел Господень Маною и жене его.(Суд.13:2-8, 13-14, 17-18, 21)
Чтец: Прорóчества Исáiина чтéнiе.
(Из глав 40,41,45,48 и 54): Тáко глагóлет Госпóдь: утешáйте, утешáйте лю́ди Моя́, глагóлет Бог. Свящéнницы, глагóлите в сéрдцы Iерусали́му, умоли́те егó, я́ко умнóжися смирéнiе егó, разреши́ся бо грех егó, я́ко прiя́т из руки́ Госпóдни сугýба согрешéнiя своя́. Глас вопiю́щаго в пусты́ни: уготóвайте путь Госпóдень, прáвы твори́те стези́ Бóгу нáшему. На гóру высóку взы́ди, благовествýй Сióну, возвышáй крéпостiю глас твой, благовествýй Iерусали́му, вознеси́те, не бóйтеся. Аз Госпóдь Бог, Аз услы́шу убóгих, Iзрáилев, и не остáвлю тех. Но отвéрзу от гор рéки и посредé пóля истóчники, сотворю́ пусты́ню в луг и жáждущую зéмлю во истóчники водны́я. Да возвесели́тся нéбо свы́ше, и óблацы да кропя́т прáвду, да возсiя́ет земля́, и да прозя́бнет ми́лость, и прáвда да возсiя́ет вкýпе. Глас весéлiя возвести́те, и услы́шано да бýдет, возвести́те дáже до конéц земли́. Глагóлите, я́ко избáви Госпóдь рабá Своегó Iáкова, и áще вжáждут в пусты́ни, источи́т им вóду из кáмене. Возвесели́ся, неплóды нераждáющая, растóргни и возопíй, неболéвшая, я́ко мнóга чáда пусты́я пáче, нéжели имýщiя мýжа.
[Русский синодальный перевод]Так говорит Господь: утешайте, утешайте народ Мой, говорит Бог ваш; говорите к сердцу Иерусалима и возвещайте ему, что исполнилось время борьбы его, что за неправды его сделано удовлетворение, ибо он от руки Господней принял вдвое за все грехи свои. Глас вопиющего в пустыне: приготовьте путь Господу, прямыми сделайте в степи стези Богу нашему. Взойди на высокую гору, благовествующий Сион! возвысь с силою голос твой, благовествующий Иерусалим! возвысь, не бойся; скажи городам Иудиным: вот Бог ваш! Бедные и нищие ищут воды, и нет её; язык их сохнет от жажды: Я, Господь, услышу их, Я, Бог Израилев, не оставлю их. Открою на горах реки и среди долин источники; пустыню сделаю озером и сухую землю - источниками воды. Кропите, небеса, свыше, и облака да проливают правду; да раскроется земля и приносит спасение, и да произрастает вместе правда. Со гласом радости возвещайте и проповедуйте это, распространяйте эту весть до пределов земли; говорите: "Господь искупил раба Своего Иакова". И не жаждут они в пустынях, чрез которые Он ведет их: Он источает им воду из камня; рассекает скалу, и льются воды. Возвеселись, неплодная, не рождающая; воскликни и возгласи, не мучившаяся родами; потому что у оставленной гораздо более детей, нежели у имеющей мужа. (Ис 40:1-3, 9; 41:17-18; 45:8; 48:20-21; 54:1)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Предтéчи, самоглáсны, глас 1: Искáпайте, гóры, слáдость,/ и хóлми, я́ко áгнцы, взыгрáйте,/ я́ко роди́ся от Елiсавéти/ хотя́й с нáми водвори́тися Госпóдень Предтéча,/ разреши́вый в рождествé óтчее безглáсiе./ Тем и мы вопiéм емý:// Крести́телю Хрїстóв, моли́ спасти́ся душáм нáшим.
Богознамени́тый глас, Свéта свети́льник,/ Госпóдень Предтéча,/ Хрїстóм свидéтельствованный,/ пéрвый во прорóцех, о мíре моли́тву творя́й,// изря́дно стáдо твоé поминáй, спасти́ невреди́мо.
Проповéдник был еси́ Áгнца Бóжiя и Слóва,/ Iоáнне прорóче и Предтéче,/ прорицáеши бýдущая и предглагóлеши концéм:/ се Áгнец Бóжiй, взéмляй мíра грехи́// и подая́й всем вéлiю ми́лость.
Слáва Ѻтцý и Сы́ну и Святóму Дýху.
Глас 5 (Андрéя Крúтскаго): Прорóков предéл и начáло апóстолов,/ земнáго Áнгела и Небéснаго человéка,/ глас Слóва, вóина и Предтéчу Хрїстóва,/ от обещáнiя предвзыгрáвшася/ и проповéдавша прéжде рождествá Сóлнца прáвды,/ днесь Елiсавéть раждáет, и рáдуется,/ и чуди́тся Захáрiя в стáрости,/ молчáнiе, áки ýзу обложéнну, отложи́в,/ и я́ко роди́тель глáса прорóчествует явлéннейше:/ ты бо, отрочá, прорóк Вы́шняго наречéшися/ и предъи́деши пути́ готóвити Емý./ Тéмже, Áнгеле, прорóче, апóстоле,/ вóине, Предтéче,/ Крести́телю, и проповéдниче покая́нiя, и настáвниче,/ я́ко глас свéта, Слóва,/ непрестáнно моли́ся о нас,// вéрою творя́щих твою́ пáмять.
И ны́не и прúсно и во вéки векóв, амúнь.
Богорóдичен воскрéсен, глас 5 (по глáсу «Слáвы»): Храм и дверь еси́,/ палáта и престóл Царéв,/ Дéво Всечестнáя:/ Éюже Избáвитель мой, Хрїстóс Госпóдь,/ во тме спя́щим яви́ся, Сóлнце сый прáвды,/ просвети́ти хотя́, я́же создá по óбразу Своемý рукóю Своéю./ Тéмже Всепéтая,/ я́ко мáтерне дерзновéнiе к Немý стяжáвшая,// непрестáнно моли́ спасти́ся душáм нáшим.
Гóсподи, поми́луй. (40 раз)
Слáва Отцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры Предтéчи, самоглáсны, глас 2): И́же от прорóка прорóка/ и неплóдныя прозябéнiе,/ в рождéнных женáми превы́шша всех,/ пусты́ннаго граждани́на, Iоáнна слáвнаго/ псалмы́ и пéньми и пéсньми духóвными восхвáлим,/ вопiю́ще к немý:/ Крести́телю Спáсов и Предтéче,/ я́ко имéя дерзновéнiе,/ в честнéм твоéм рождествé/ умоли́ Хрїстá даровáти мир мíру// и душáм нáшим вéлiю ми́лость.
Стiх: Благословéн Госпóдь, Бог Iзрáилев,/ я́ко посетù и сотворù избавлéнiе лю́дем Своúм. (Лк.1:68)
Прiи́де глас благодáти Слóва,/ Сóлнца проповéдник,/ роди́выйся днесь от неплóдове безчáдныя,/ от обетовáнiя Iоáнн Предтéча./ Лю́дiе, рáдуйтеся:/ прiи́де уготóвати путь нам спасéнiя,/ Емýже и, взыгрáв, поклони́ся,/ во чрéве сýщу Мáтерни,/ Áгнцу, взéмлющему грехи́ мíра// и подаю́щему нам вéлiю ми́лость.
Стiх: И ты, отрочá,/ прорóк Вы́шняго наречéшися.(Лк.1:76А)
И́же из чрéва мáтерня освя́щся/ и прорóчества прiéм исполнéнiе,/ днесь от неплóдныя раждáется,/ Госпóдне пришéствiе проповéдая я́сно:// покáйтеся, прибли́жися бо Цáрство Небéсное.
Слáва Отцý и Сы́ну и Святóму Дýху.
Кассíи монáхини, глас 8: Исáiи ны́не прорóка глас/ днесь в бóльшаго от прорóк рождéнiи Iоáнна испóлнися:/ се бо, - речé, - послю́ Áнгела Моегó пред лицéм Твои́м,/ и́же уготóвит путь Твой пред Тобóю./ Сей ýбо, Небéснаго Царя́ вóин, предтéк,/ я́ко вои́стинну прáвы творя́ше стези́ Бóгу нáшему,/ человéк ýбо естествóм, Áнгел же житiéм сый,/ чистотý бо конéчно и целомýдрiе целовáв,/ имя́ше ýбо по естествý,/ бежá же я́же чрез естествó,/ пáче естествá подвизáвся./ Томý, вси вéрнiи, добродéтельми подóбящеся,/ моли́ти о нас мóлимся,// во éже спасти́ дýши нáша.
И ны́не и прúсно и во вéки векóв, амúнь.
Глас тóйже: Виждь Елiсавéть к Дéве Марíи глагóлющу:/ что пришлá еси́ ко мне, Мáти Гóспода моегó?/ Ты Царя́ нóсиши, и аз вóина./ Ты Законодáвца, и аз законоположи́теля./ Ты Слóва, и аз глас,// проповéдающ Цáрство Небéсное.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Предтéчи, глас 4: Прорóче и Предтéче пришéствiя Хрїстóва,/ достóйно восхвали́ти тя недоумéем мы, любóвiю чтýщiи тя:/ неплóдство бо рóждшiя и ѻ҆тчее безглáсiе разреши́ся/ слáвным и честны́м твои́м рождествóм,// и воплощéнiе Сы́на Бóжiя мíрови проповéдуется. (Двáжды)
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню