Рождество честнаго славного Пророка, Предтечи и Крестителя Господня Иоанна. УТРЕНЯ. КАНОН
7 ию́ля 2023 гóда. Рождествó честнáго слáвного Прорóка, Предтéчи и Крестúтеля Госпóдня Iоáнна. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПРОКИМЕН
Чтец: Прокíмен, глас четвéртый. И ты, отрочá,/ прорóк Вы́шняго наречéшися. (Лк.1:76А)
Хор: И ты, отрочá,/ прорóк Вы́шняго наречéшися.
Чтец: Благословéн Госпóдь, Бог Iзрáилев,/ я́ко посетѝ и сотворѝ избавлéнiе лю́дем Свои́м. (Лк.1:68)
Хор: И ты, отрочá,/ прорóк Вы́шняго наречéшися.
Чтец: И ты, отрочá.
Хор: Прорóк Вы́шняго наречéшися.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.3Б): Во днех о́нех зача́т Eлiсаве́т, жена́ Заха́рiина, и тая́шеся ме́сяц пять, глаго́лющи: я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех. Елiсаве́ти же испо́лнися вре́мя роди́ти ей, и роди́ сы́на. И слы́шаша о́крест живу́щии и у́жики ея́, я́ко возвели́чил есть Госпо́дь ми́лость свою́ с не́ю: и ра́довахуся с не́ю. И бысть во осмы́й день, приидо́ша обре́зати отроча́, и нарица́ху е и́менем отца́ его́, Заха́рию. И отвеща́вши ма́ти его́, рече́: ни, но да нарече́тся Иоа́нн. И ре́ша к ней: я́ко никто́же есть в родстве́ твое́м, и́же нарица́ется и́менем тем. И помава́ху отцу́ его́, е́же ка́ко бы хоте́л нарещи́ е. И испро́шь дщи́цу, написа́, глаго́ля: Иоа́нн бу́дет и́мя ему́. И чудя́хуся вси. Отверзо́шася же уста́ его́ а́бие и язы́к его, и глаго́лаше благословя́ Бо́га. И бысть на всех страх живу́щих о́крест их, и во всей стране́ иуде́йстей пове́даеми бя́ху вси глаго́ли си́и. И положи́ша вси слы́шавшии в се́рдце свое́м, глаго́люще: что у́бо отроча́ сие́ бу́дет? И рука́ Госпо́дня бе с ни́м. И Заха́рия оте́ц его́ испо́лнися Ду́ха Свя́та, и проро́чествова, глаго́ля: благослове́н Госпо́дь Бог Iзра́илев, я́ко посети́ и сотвори́ избавле́ние лю́дем свои́м. И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́. Отроча́ же растя́ше и крепля́шеся ду́хом, и бе в пусты́нях до дне явле́нiя своего́ ко Iзра́илю.
[Русский синодальный перевод]В те дни зачала Елисавета, жена Захарии, и таилась пять месяцев и говорила: так сотворил мне Господь во дни сии, в которые призрел на меня, чтобы снять с меня поношение между людьми. Елисавете же настало время родить, и она родила сына. И услышали соседи и родственники ее, что возвеличил Господь милость Свою над нею, и радовались с нею. В восьмой день пришли обрезать младенца и хотели назвать его, по имени отца его, Захариею. На это мать его сказала: нет, а назвать его Иоанном. И сказали ей: никого нет в родстве твоем, кто назывался бы сим именем. И спрашивали знаками у отца его, как бы он хотел назвать его. Он потребовал дощечку и написал: Иоанн имя ему. И все удивились. И тотчас разрешились уста его и язык его, и он стал говорить, благословляя Бога. И был страх на всех живущих вокруг них; и рассказывали обо всем этом по всей нагорной стране Иудейской. Все слышавшие положили это на сердце своем и говорили: что будет младенец сей? И рука Господня была с ним. И Захария, отец его, исполнился Святого Духа и пророчествовал, говоря: благословен Господь Бог Израилев, что посетил народ Свой и сотворил избавление ему. И ты, младенец, наречешься пророком Всевышнего, ибо будешь идти пред лицом Господа приготовить пути Ему. Младенец же возрастал и укреплялся духом, и был в пустынях до дня явления своего Израилю.(Лк.1:24-25, 57-68, 76, 80)
Хор: Слáва Тебè, Гóсподи, слáва Тебè.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами святáго слáвнаго Прорóка, Предтéчи и Крести́теля Iоáнна,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 2: И́же из чрéва мáтерня освя́щся/ и прорóчества прiéм исполнéнiе,/ днесь от неплóдныя раждáется,/ Госпóдне пришéствiе проповéдая я́сно:// покáйтеся, прибли́жися бо Цáрство Небéсное.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПРАЗДНИКА, ГЛАС 4
( Пéрвый канóн Предтéчи, глас 4, совмещенный со вторы́м канóном Предтéчи, глас 4)
ПЕСНЬ 1
Iрмóс: Трiстáты крéпкiя,/ Рождéйся от Дéвы,/ безстрáстiя во глубинè/ душù тричáстное потопù, молю́ся,/ да Тебè, я́ко в тvмпáне,/ во умерщвлéнiи телесè// побéдное воспою́ пéнiе.(Двáжды)
Хор (припéв): Святы́й велúкiй Iоáнне, Предтéче Госпóдень, молù Бóга о нас.
Чтец (тропáрь): Я́ко ýтро благолéпно, Сóлнца предтекíй,/ неплóдныя прозябéнiе проповéдает я́ве Дéвы Рождествó,// всей ны́не вселéнней сiя́ет концéм просвещéнiе благочéстiя и благодáти. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Прорóк Вы́шняго и́стинно наречéшися,/ предъи́деши бо пред лицéм Хрiстá, - вопiéт тебé, сы́ну, Iоáнне прехвáльне,// Дýхом Захáрiя Пресвяты́м носи́м, - путь уготóвати Зижди́телю. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Глагóлы Гаврiи́ла Захáрiя слы́шав, вещáнiя Божéственнаго, яви́ся непокори́в,/ и молчáнiем осуждáется, реши́тся же внеза́пу от сегó:// глас бо роди́ся Слóва, Iоáнн Предтéча.
Хор: Пресвятáя Богорóдице, спасú нас.
Богорóдичен: Град Бóжiй, Всецаря́ Богопрiя́тное селéнiе, сокрóвище честнóе,/ Богорóдице Пренепорóчная, сохрани́ достоя́нiе Твоé,// при́сно восхваля́ющее Тя и чтýщее вéрою Рождествó Твоé.
Канон второй Предтечи, глас тойже
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Молчáнiе стáрчо закóннаго писáнiя óбраз нóсит тáин./ И́бо, пришéдши благодáти, Моисе́й умолчá:// подобáше бо, премýдрости сокрóвищу я́вльшуся, всем молчáти.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: В цéркви кадя́щу свящéннику, Áнгел предстá свы́ше, вопiя́:/ стрáнна рождествá благовéстiе, прiидóх, тебé нося́, стáрче:// прiи́меши бо от неплóдове рождéнiя плод, Крести́теля Хрiстóва.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Что удиви́лся еси́, стáрче?/ Что, не вéруя, стои́ши, глагóлющему тебé сiя́?/ Áнгел бо есть вещáяй, áще и óбраз нóсит человéч.// Бýди нем ýбо на врéмя, дáже до рождествá Слóва глáса.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: И́же молча́нiе Захáрiино, молчáнiя положи́в óбраз закóну напи́санному/ и тем показáв ми покая́нiя проповéдника зовýща,// глáса вопiю́щаго подавáет, неплóдствующей сы́на.
Слáва Ѻтцý и Сы́ну и Святóму Дýху.
Тропáрь: О, преслáвных вещéй Хрiстóва Предтéчи!/ И́же, прéжде пелéн познáв плени́цы нáша Разрéшшаго и нарóды Освя́щша,// днесь, от Елiсавéти роди́вся, разрешáет отцý глас.
И ны́не и прúсно и во вéки векóв. Амúнь.
Богорóдичен: Тя, Бóжiе вмести́лище и мы́сленную лéствицу, éюже сни́де Бог/ и, вообрáжся, нáше ýбо существó на Небесá возведé,// вси я́ко спасéнiю Ходáтаицу восхваля́ем.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Не мýдростiю, и сúлою, и богáтством хвáлимся,/ но Тобóю, О́тчею Ипостáсною Мýдростiю, Хрїстè:// несть бо свят, пáче Тебè, Человеколю́бче. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Влады́чне у́бо от Де́вы соверша́ется рожде́нiе,/ но раба́ любе́зна от ста́рицы и непло́дныя ма́тере:// в ле́поту предти́чет у́бо чу́до чудеси́.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Ста́рица и непло́ды Де́ву Ма́терь лобза́ет, позна́вши нело́жно Сея́ Рождество́,// я́ко разреши́ся соу́з непло́дства Боже́ственным хоте́нiем.(Двáжды)
Хор: Пресвятáя Богорóдице, спасù нас.
Богорóдичен: Неискусобра́чно Бо́га воплоще́нна ро́ждши,/ страсте́й прило́ги обурева́емаго мя утверди́:// несть бо, Пречи́стая, ра́зве Тебе́ помо́щницы.(Двáжды)
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Елiсаве́ть, пре́жде непло́ды су́щи, Хрiсте́, Це́рковь Твою́ прообража́ше, я́же от язы́к,/ и, ро́ждши пресла́вно, па́ки показу́ет многоча́дну// непло́ды я́вльшуюся иногда́.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Пути́ у́бо испра́вль Госпо́дни, стезю́ проугото́вав,/ покая́ния же плоды́ показа́л еси́ челове́ком и жи́зненному научи́л еси́ пути́,// проро́че и пропове́дниче Христо́в.(Двáжды)
Слáва Ѻтцý и Сы́ну и Святóму Дýху.
Тропáрь: Елисаве́ть, днесь игра́ющи, но́сит тя, Предте́че,/ на объя́тиях состаре́вшихся и вопие́т, хва́лящися:// несть свят, я́коже Ты, Го́споди Бо́же наш.
И ны́не и прúсно и во вéки векóв. Амúнь.
Богорóдичен: Пра́отцев разреши́ла еси́ печа́ль, ра́дость нам ро́ждшая, Животода́вца и Изба́вителя,// Его́же, Пречи́стая Богоро́дице, приле́жно моли́ спасти́ся ста́ду Твоему́.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трижды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáлен Предтéчи, глас 8: Захáрiин глас свéтло разреши́ Словесé глас рóждься, Предтéча,/ и закóна неплóдiе всем показá, зовы́й:/ покáйтеся, су́щiи на земли́, се бо прiи́де и яви́ся Iису́с,/ вся хотя́ избáвити от пéрвыя кля́твы, просвещáя Крещéнiем.// Вои́стинну чу́до преслáвно!
Слáва Отцý и Сы́ну и Святóму Дýху,
Ин седáлен Предтéчи, глас 4: Я́коже сóлнце свéтло, из чрéва Елiсавéти возсiя́ нам Заха́рiин сын,/ и óтчее разреши́ безглáсiе,/ и всем лю́дем в дерзновéнiи мнóзе, испрáвите, - вопiя́, - путь Госпóдень,/ и́бо Той свободи́т и спасéт к Нему́ притекáющiя.// Егóже проповéдал еси́, Iоáнне, моли́ спасти́ся душáм нáшим.
И ны́не и прúсно и во вéки векóв. Амúнь.
Богорóдичен минéи, глас 4: Обнови́ла еси́, Чи́стая, Божéственным Рождествóм Твои́м/ истлéвшее во страстéх земнорóдных мéртвенное существó/ и воздви́гла еси́ вся от смéрти к животу́ нетлéнiя.// Тéмже Тя по дóлгу блажи́м вси, Дéво Препрослáвленная, я́коже прореклá еси́.
ПЕСНЬ 4
Iрмóс: Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, си́ле Твоéй. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Та́ин неизрече́нных предхо́дит та́инство/ новосече́нiем законоположе́нiя есте́ственнаго,// боле́зни разреше́нiе провозвеща́ющи, исправле́нiе сея́, Хрiсте́, и обоже́нiе. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Иса́ия от Отца́ Сы́ну проро́чествова, воплоти́тися хотя́щему:/ А́нгела земноро́дна равноа́нгельна се Аз посыла́ю пред лице́м Твои́м, зову́ща:// сла́ва, Христе́, си́ле Твое́й. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Служи́ти, я́ко раб Влады́це, роди́хся:/ на се бо приидо́х, Сего́ возвести́ти прише́ствие,// я́ко да Де́вы Рождество́ предуве́рит, пресла́вно непло́дствующая ста́рица прозя́бши.
Хор: Пресвятáя Богорóдице, спасù нас.
Богорóдичен: Свята́я Богоро́дица, в Ню́же всели́тися благоизво́ли,/ я́ко во благово́нен дом, Сло́во О́тчее Пребоже́ственное,/ не растле́ся утро́бою, ни поболе́,// и́бо роди́ Емману́ила, Бо́га и Челове́ка.
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Покая́ние отве́рзеся твои́м рождество́м, Предте́че и пропове́дниче./ Ты бо еди́н пропове́дал еси́, взыва́я:// пока́йтеся, Ца́рство Небе́сное прибли́жися.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Де́вство утвержда́ется и целому́дрие торжеству́ет,// пусты́ня весели́тся и мир пра́зднует рождество́м твои́м, Предте́че. (Двáжды)
Слáва Ѻтцý и Сы́ну и Святóму Дýху.
Тропáрь: Елисаве́ть ра́дуется, и Заха́рия веща́ет па́ки:// о́ба у́бо обновля́ются по ста́рости Иоа́нновым а́бие гла́сом и просвеща́ются.
И ны́не и прúсно и во вéки векóв. Амúнь.
Богорóдичен: Неопали́мую купину́ Тя законополо́жник зря́ще дре́вле,// Дании́л же го́ру святу́ю смотря́ше, еди́на Ма́ти Де́во, Влады́чице.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прiе́м от Де́вы// и к све́ту у́мному вознося́й Моего́ Божества́. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Земля́ израсти́ всеи́стинна пропове́дника,/ гла́са, всем пропове́дающа язы́ком Ду́ха, Де́вы Сы́на,// Пра́вду, с Небесе́ на нас прини́чущую ве́щию теле́сною. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Положи́ Госпо́дь всеи́стинна свети́льника тя Христо́ва, вся просвеща́ющаго,/ еди́ны одева́юща вражду́ющия Ему́, я́ко ри́зою, в студ,// нело́жно Бо́жия Сло́ва Сы́на пропове́дающа. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Весели́тся вся тварь твои́м рождество́м, Боже́ственне:/ ты бо зе́млен А́нгел, Предте́че, и Небе́сный челове́к показа́лся еси́,// Небе́снаго Бо́га провозвеща́я нам воплоще́нна.
Хор: Пресвятáя Богорóдице, спасù нас.
Богорóдичен: От Тебе́ ражда́ется от Отца́ Сый,/ с Тобо́ю при́сно, Сло́во присносу́щное и неразде́льное, я́ко Сын Единоро́дный,// и напосле́док от Де́вы То́йже от Свята́го воплоща́ется Ду́ха.
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Звезду́ проугото́вал еси́, Пра́вды Со́лнце,/ Крести́теля Твоего́ Иоа́нна,// от обеща́ния рожде́ннаго днесь и ро́ждшаго разре́шша глас.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Не веща́й, не сопроти́в глаго́ли, ста́рче освяще́нне,/ Гаврии́л бо глаго́лет ти, пе́рвый во Арха́нгелех,// Бо́жия та́инства и е́же к нам Того́ сни́тие сказу́я.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Ста́рче, не неве́руй, Бог бо обещава́ет,/ я́ко в ста́рости роди́ши сы́на, его́же о рождестве́ мно́зи возра́дуются,// той бо прии́дет си́лою Илиино́ю.
Слáва Ѻтцý и Сы́ну и Святóму Дýху.
Тропáрь: Проро́че, пропове́дниче, Предте́че, е́же от непло́ды прозябе́ние,/ возвести́телю покая́ния, пусты́нное овча́, Све́та свети́льниче,/ о всех моли́, чту́щих тя ве́рно.
И ны́не и прúсно и во вéки векóв. Амúнь.
Богорóдичен: Я́ко дверь непроходи́му, и купину́ неопали́му,/ и несеко́му го́ру, от нея́же ка́мень усече́ся,// И́же из Тебе́ воплоща́емый, воспева́ем, Влады́чице, Ма́ти всех Творца́.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Прiидо́х во глубины́ морски́я,/ и потопúла мя есть бýря мнóгих грехóв,// но, я́ко Бог, из глубины́ возведù живóт мой, Многомúлостиве.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Бо́га Сло́ва позна́л еси́, я́ко проро́к, в ма́терней утро́бе,/ и, сея́ язы́ка употреби́в, богосло́виши в те́мне черто́зе,// обожа́емь Све́том Непристу́пным.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Немо́лчно, я́ко глас вопию́щаго, Изба́вителя ми́ра, Крести́телю, моля́ не преста́й// душе́вное разреши́ти непло́дие пою́щих твое́ рождество́.(Двáжды)
Хор: Пресвятáя Богорóдице, спасù нас.
Богорóдичен: Непристу́пнаго Божества́ селе́ние, Чи́стая, Твоя́ утро́ба яви́ся, о Богоро́дице,// на ню́же без боя́зни Небе́снии чи́нове взира́ти не мо́гут.(Двáжды)
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Днесь пусты́нный граждани́н Иоа́нн ражда́ется,/ покая́ния пропове́дник и благода́ти свиде́тель и́стинен,// Предте́ча Сло́ва и Све́ту предсия́ющая звезда́.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Днесь секи́ра, искова́вшися, посече́ние предлага́ет душа́м непло́дия,/ и насажда́ет плоды́ доброде́тельныя,// преды́дет тве́рдо в рождестве́ твое́м, Предте́че.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Возра́довася Иорда́н пресла́вно и игра́ет, науча́яся,/ Иоа́нна слы́ша, от непло́дна рожде́на чре́ва,// мо́ре же лику́ет водны́ми игра́нии.
Слáва Ѻтцý и Сы́ну и Святóму Дýху.
Тропáрь: Свети́льник, Све́та прише́ствие предте́к,/ пропове́да А́гнца Бо́жия, Спа́са,// свет возсия́вшаго земли́, естества́ же всего́ духо́вне преджре́на.
И ны́не и прúсно и во вéки векóв. Амúнь.
Богорóдичен: Бе́здну ми́лости ро́ждшая,/ страсте́й мои́х бе́здну пучи́ною щедро́т Твои́х потопи́вши,// ту́чу от души́ пода́ждь ми слез, Богороди́тельнице Всенепоро́чная.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Предтéчи, глас 3: Пре́жде непло́ды днесь Хрiсто́ва Предте́чу ражда́ет,/ и той есть исполне́ние вся́каго проро́чества:/ Его́же бо проро́цы пропове́даша,/ на Сего́ во Iорда́не ру́ку положи́в,// яви́ся Бо́жия Сло́ва проро́к, пропове́дник, вку́пе и Предте́ча.
Íкос: Восхва́лим ны́не Госпо́дня Предте́чу,/ его́же свяще́ннику Елисаве́ть роди́ из ложе́сн непло́дных, но не без се́мене:/ Христо́с бо еди́н вмести́лище про́йде непроходи́мо без се́мене./ Иоа́нна непло́ды роди́, без му́жа же сего́ не роди́,/ Иису́са же, осене́нием Отца́ и Ду́ха Бо́жия, Де́ва роди́ Чи́стая.// Но Безсе́менному яви́ся от непло́дныя проро́к и пропове́дник, вку́пе и Предте́ча.
ПЕСНЬ 7
Iрмóс: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,// Бо́же оте́ц на́ших. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Бя́ше пе́рвее во мра́це вся́ко земноро́дных естество́, о Предте́че,/ но у́тро, вопия́, яви́лся еси́:// благослове́н еси́, Го́споди, Бо́же оте́ц на́ших. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Неду́говавшее исцели́ естество́ все, сла́вное от непло́дныя твое́ рождество́,/ научи́вшее, Предте́че, пе́ти:// благослове́н еси́, Го́споди, Бо́же оте́ц на́ших. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Роди́лся еси́, Предте́че, от непло́дныя,/ прии́де бо всеи́стинно, зако́ну непло́дствующу, благода́ть, Христу́ пою́щи:// благослове́н еси́, Го́споди, Бо́же оте́ц на́ших.
Хор: Пресвятáя Богорóдице, спасù нас.
Богорóдичен: Де́во Благослове́нная, моли́ о нас, моля́щих Тя,/ на Тя бо упова́ем вси и Тебе́ вопие́м:// Влады́чице, не пре́зри рабо́в Твои́х.
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Заха́рия, умолча́в на вре́мя, возвести́ молча́ние писа́нием/ и, па́ки провеща́в, рождество́м твои́м, Предте́че,// Ду́ха благода́ть возвеща́ет пресла́вно.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Це́ркви подо́бится непло́ды безча́дная, Елисаве́ть всечестна́я,/ я́же пе́рвее у́бо су́щи тре́бами и сква́рами очерне́на,// ны́не же хва́лящися и добро́тою и рожде́нием.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Предте́чи рождество́м остри́тся днесь секи́ра духо́вная,/ е́юже вся посека́ются страсте́й взыгра́ния,// та́йно же процвета́ют плоды́ покая́ния.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Я́ко ве́тхаго и но́ваго хода́тая тя, Предте́че,/ и стези́ исправля́юща Христо́вы,// очища́ющаго согреше́ний гумно́ духо́вною лопа́тою, почита́ем, Иоа́нне.
Слáва Ѻтцý и Сы́ну и Святóму Дýху.
Тропáрь: И́же пред Со́лнцем те́кшаго, Христо́м Бо́гом на́шим, Иоа́нна сла́внаго,// я́ко звезду́, Предте́чу и покая́ния пропове́дника воспое́м вси, от непло́дныя проше́дшаго.
И ны́не и прúсно и во вéки векóв. Амúнь.
Богорóдичен: Во чре́во Твое́, Де́во, безсе́менно все́льшася,/ и ро́ждшася за неизрече́нное и коне́чное смире́ние, и нас ради Обнища́вшаго// о всех моли́ти не преста́й, Богоро́дице.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Законополо́жник раб бя́ше Моисе́й, Иису́с же - Бог Заве́та Но́ваго,/ ны́не же обои́х Предте́ча пое́т, я́ко хода́тай:// вся дела́, благослови́те Госпо́дня Го́спода. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: От пу́ста чре́ва го́рлица прии́де, я́ко богосажде́нная дубра́ва,/ ны́не принесе́ Це́ркви Предте́чу Христо́ва и воспева́ет:// вся дела́, благослови́те Госпо́дня Го́спода. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Богоно́снии лю́дие, язы́к свят, го́рлице Христо́вей уподо́битеся/ и медото́чно воспо́йте, в целому́дрии живу́ще:// вся дела́, благослови́те Госпо́дня Го́спода.
Хор: Пресвятáя Богорóдице, спасù нас.
Богорóдичен: Тричи́сленным све́том озаря́еми, Несозда́нное Еди́ное Божество́,/ немо́лчными усты́ правосла́вно вопию́ще, почти́м:// вся дела́, благослови́те Госпо́дня Го́спода.
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Позна́л еси́, Предте́че, Ему́же поклони́лся еси́ пре́жде рождества́/ и пре́жде пеле́н твои́х, Христа́ Жизнода́вца,/ и взыгра́ньми показа́л еси́ Сего́, Го́спода Твоего́ наре́к,// взаи́м взем ма́терний язы́к к пе́нию Христа́, Бо́га на́шего. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Концы́ днесь вселе́нстии предпра́зднуют,/ ра́дуются А́нгели и ду́си пра́ведных,/ живу́щии веселя́тся, уме́ршии же па́ки, Иоа́нну ро́ждшуся,// прие́мше им про́поведь всех Спа́са Го́спода.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Подо́бяся днесь Иоа́нну, Иорда́н мо́крыми быстрина́ми игра́ше пресла́вно,/ слы́ша ражда́ема равноа́нгельнаго житие́м от ста́рицы непло́дны,// исправля́ющаго пути́ и стези́ Госпо́дни и мир крести́вшаго.
Благословúм Отцá, и Сы́на, и Святáго Дýха, Гóспода.
Тропáрь: Начерта́ днесь Заха́рия на дсце/ и́мя богонарече́нное проро́ка и Предте́чи, молча́ же воззва́:/ Иоа́нн да нарече́тся рожде́йся мне на ста́рость.// Подо́бно есть от обеща́ния ро́ждшемуся стра́нное зва́ние.
И ны́не и прúсно и во вéки векóв. Амúнь.
Богорóдичен: Кре́пко утеше́ние и непосты́дну наде́жду,/ сте́ну необори́му и Боже́ственно предста́тельство лю́дие Твои́ и́мут Тя,/ и́же Тя сла́вят, Де́во, и, спаса́еми, зову́т приле́жно:// благослови́те, вся дела́ Госпо́дня, непреста́нно Го́спода.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пещѝ/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Сокрове́нное Бо́жiе неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдiе.// Те́мже Тя я́ко Богоро́дицу велича́ем. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Се глас Предте́чи непло́дным и пусты́м предста́ сердца́м вопию́щ:/ путь Христо́в ны́не угото́вите, я́ко во сла́ве гряде́т,// Ему́же повину́ющеся, велича́ем. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Я́коже дре́вле Ду́хом Пресвяты́м я́ве пропове́дал еси́/ Сы́на, Предте́че, А́гнца Бо́жия, ми́ра взе́млющаго грехи́,// ста́ду твоему́ согреше́ний разреше́ние испроси́. (Двáжды)
Хор: Пресвятáя Трóице, Бóже наш, слáва Тебè.
Чтец: Еди́ницу Тричи́сленную, Тро́ицу Единосу́щную,/ правосла́вно пою́ще, ве́рнии, просла́вим,/ богоде́тельне нас озаря́ющую// и светлостьми́ незаходи́маго све́та исполня́ющую ду́ши на́ша.
Хор: Пресвятáя Богорóдице, спасù нас.
Богорóдичен: Все́ми влады́чествующая творе́нии, лю́дем Твои́м да́руй побе́ду одоле́ния,/ непокори́ваго подложи́ под но́зе во́инству:// да Тя я́ко Богоро́дицу велича́ем.
Глас 4
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: В тебе́ вели́кое се и пресла́вное Бог сотвори́ зна́мение, свяще́нниче:// по ста́рости бо сы́на и по умерщвле́нии удо́в ражда́еши Предте́чу. (Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Да слы́шат непло́ды и да воспою́т Бо́га,/ се бо Елисаве́ть вопие́т:// по ста́рости сы́на и по умерщвле́нии удо́в ражда́ю Предте́чу.
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Весели́ся, Заха́рие, и ра́дуйся ны́не о Бо́зе:/ се бо Елисаве́ть сосцы́ пита́ет по ста́рости сы́на// и по умерщвле́нии удо́в ражда́ет Предте́чу.
Слáва Ѻтцý и Сы́ну и Святóму Дýху.
Тропáрь: Сла́ва Да́вшему непло́дней по ста́рости плод, ста́рцу и проро́ку сы́на,/ гото́вяща Ему́ лю́ди соверше́нны,// Боже́ственнаго Предте́чу.
И ны́не и прúсно и во вéки векóв. Амúнь.
Богорóдичен: В Тя всели́вся, И́же в не́дрех сый Оте́ческих роди́ся без стра́сти и тли// и приведе́ нас за милосе́рдие Отцу́ и Боже́ственному Ду́ху.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Предтéчи: Предте́чево днесь радостотво́рное рожде́ние/ се́тование реши́т о́тча безгла́сия и ро́ждшия непло́дство,/ возвеща́ет же настоя́щую ра́дость и весе́лие.// Те́мже и вся тварь све́тло то́е пра́зднует. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен: Проро́цы пропове́даша, апо́столи научи́ша/ и му́ченицы богому́дренно Твоего́ Сы́на, Богоро́дице, я́сно испове́даша, Бо́га всех, Пречи́стая.// С ни́ми же Тя велича́ем, Тобо́ю изба́вльшеся дре́вняго осужде́ния.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.
продолженiе зри здесь