Рождество честнаго славного Пророка, Предтечи и Крестителя Господня Иоанна. УТРЕНЯ(ок-ние)Час первый
7 ию́ля 2023 гóда. Рождествó честнáго слáвного Прорóка, Предтéчи и Крестúтеля Госпóдня Iоáнна. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúры Предтéчи, глас 8: О, преслáвнаго чудесé!/ Из престаре́лыя ма́тере/ Бо́жия Сло́ва провозве́стник,/ Iоа́нн днесь произы́ти тщи́тся,/ свя́занный язы́к ясне́йше рождество́м глаго́лати явля́ет./ О, неизглаго́ланнаго Твоего́ смотре́нiя, Влады́ко!/ И́мже, Хрiсте́,/ спаси́ ду́ши на́ша,// я́ко еди́н Милосе́рд.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: О, пресла́внаго чудесе́!/ В рожде́нных жена́ми/ проро́к же превы́шшiй/ ма́терняго непло́дства разреша́ет осужде́нiе,/ и́же ду́хом и си́лою прише́д Илiино́ю/ путь Госпо́день испра́вити./ О, неизглаго́ланнаго Твоего́ благоутро́бия, Влады́ко!/ И́мже, Хрiсте́, спаси́ ду́ши на́ша,// я́ко еди́н Милосе́рд.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: О, пресла́внаго чудесе́!/ Пропове́давый Хрiсто́во к челове́ком истоща́нiе/ превы́ше показу́ет всех Того́ гла́сом/ и ро́ждшiя разреша́ет непло́дiе/ си́лою Боже́ственною/ и Заха́рiин язы́к./ О, вели́ких Твои́х чуде́с, Влады́ко!/ И́миже, Хрiсте́,// спаси́ чту́щiя Твоего́ вели́каго Предте́чу.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: О, пресла́внаго чудесе́!/ В рожде́нных жена́ми/ проро́к и Предте́ча превы́ше явля́ется,/ проро́ков же превы́шший/ и прише́ствiя Хрiсто́ва предвозве́стник,/ предвзыгра́вый во утро́бе ма́терни./ О, зело́ вели́ких Твои́х дарова́нiй, Человеколю́бче!/ И́миже, Хрiсте́, спаси́ ду́ши на́ша,// я́ко Всеси́лен.
Слáва Отцý и Сы́ну и Святóму Дýху.
Глас 6: Звезда́ звезд, Предте́ча/ от непло́дныя утро́бы на земли́ ражда́ется днесь,/ Иоа́нн Боговожделе́нный,/ и Хрiсто́ву явля́ет зарю́, восто́к свы́ше,// в пра́вое ве́рных прехожде́нiе.
И҆ ны́не и прúсно и во вéки векóв, амúнь.
Богорóдичен, глас 6: Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.
Вóзглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь Предтéчи, глас 4: Прорóче и Предтéче пришéствiя Хрїстóва,/ достóйно восхвали́ти тя недоумéем мы, любóвiю чтýщiи тя:/ неплóдство бо рóждшiя и ѻ҆тчее безглáсiе разреши́ся/ слáвным и честны́м твои́м рождествóм,// и воплощéнiе Сы́на Бóжiя мíрови проповéдуется.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный (отпустúтельный), глас 4: Éже от вéка утаéное,/ и Áнгелом несвéдомое тáинство,/ Тобóю Богорóдице сýщым на земли́ яви́ся Бог,/ в несли́тном соединéнiи воплощáемь,/ и Крéст вóлею нас рáди воспрiи́м,/ и҆́мже воскреси́в первоздáннаго,// спасé от смéрти дýшы нáша.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжїй, моли́твами пречи́стыя Своея́ Мáтере, прорóка, Предтéчи и Крести́телѧ Госпóднѧ Iѡáнна, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сы́ну и Святóму Дýху.
Тропáрь Предтéчи, глас 4: Прорóче и Предтéче пришéствiя Хрїстóва,/ достóйно восхвали́ти тя недоумéем мы, любóвiю чтýщiи тя:/ неплóдство бо рóждшiя и ѻ҆тчее безглáсiе разреши́ся/ слáвным и честны́м твои́м рождествóм,// и воплощéнiе Сы́на Бóжiя мíрови проповéдуется.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Предтéчи, глас 3: Пре́жде непло́ды днесь Хрїсто́ва Предте́чу ражда́ет,/ и той есть исполне́нiе вся́каго проро́чества:/ Его́же бо проро́цы пропове́даша,/ на Сего́ во Iорда́не ру́ку положи́в,// яви́ся Бо́жiя Сло́ва проро́к, пропове́дник, вку́пе и Предте́ча.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстè, Сыне Бóжїй, моли́твами пречи́стыя Своея́ Мáтере, прорóка, Предтéчи и Крести́телѧ Госпóднѧ Iѡáнна, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу