Неделя21 по Пятидесятнице.Иконы Божией Матери Всех скорбящих радостьВСЕНОЩНОЕ БДЕНИЕ.ВЕЛИКАЯ ВЕЧЕРНЯ
6 ноября́ 2022 гóда. Недéля 21 по Пятидеся́тнице. Iкóны Бóжiей Мáтери «Всех скорбя́щих Рáдость». Глас 4. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáкже канóна и пéрваго чáса. Вся слýжба прáздника по Октóиху и Минéе. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святы́й Крéпкiй, Святый Безсмéртный, помилуй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Гóсподи, поми́луй, (12 раз.)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читаем либо кафíсму 1-ю (1-ю cтатiю(«Блажен муж» - 1-й антiфон.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрiстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поем стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 4
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою́,// исповéдатися и҆́мени Твоемý.
Стiхúры воскрéсные, глас 4: Животворя́щему Твоемý Крестý,/ непрестáнно клáняющеся, Хрiстé Бóже,/ триднéвное Воскресéнiе Твоé слáвим:/ тем бо обнови́л еси́ истлéвшее человéческое естествó, Всеси́льне,/ и и҆́же на Небесá восхóд обнови́л еси́ нам,// я́ко Еди́н Благ и Человеколю́бец.
Менé ждут прáведницы,// дóндеже воздáси мне.
Стiхúра: Дрéва преслушáнiя запрещéнiе/ разреши́л еси́, Спáсе,/ на дрéве крéстнем вóлею пригвозди́вся,/ и во ад сошéд, Си́льне,/ смéртныя ýзы, я́ко Бог, растерзал еси́./ Тéмже клáняемся éже из мéртвых Твоемý Воскресéнiю,/ рáдостiю вопiю́ще:// Всеси́льне Гóсподи, слáва Тебé.
На 8. Стiх: Из глубины́ воззвáх к Тебé, Гóсподи,// Гóсподи, услы́ши глас мой.
Стiхúра: Вратá áдова сокруши́л еси́, Гóсподи,/ и Твоéю смéртiю смéртное цáрство разруши́л еси́:/ род же человéческiй от истлéнiя свободи́л еси́,/ живóт и нетлéнiе мíру даровáв,// и вéлiю ми́лость.
Да бýдут ýши Твоú// внéмлюще глáсу молéнiя моегó.
И҆́ны стiхúры анатóлiевы: Прiиди́те, воспои́м лю́дiе,/ Спáсово триднéвное востáнiе,/ и҆́мже избáвихомся áдовых нереши́мых уз;/ и нетлéнiе и жизнь вси воспрiя́хом зовýще:/ Распны́йся, и Погребы́йся, и Воскресы́й,/ спаси́ ны Воскресéнiем Твои́м,// Еди́не Человеколю́бче.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúры Богорóдицы, глас 2: Всем предстáтельствуеши, Благáя,/ прибегáющим с вéрою в держáвный Твой покрóв:/ инóго бо не и҆́мамы грéшнiи к Бóгу в бéдах и скóрбех при́сно избавлéнiя,/ обременéни грехи́ мнóгими,/ Мáти Бóга Вы́шняго./ Тéмже Ти припáдаем:// избáви от вся́каго обстоя́нiя рабы́ Твоя́.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: Всех скорбя́щих Рáдосте,/ и оби́димых Застýпнице,/ и áлчущих Питáтельнице,/ стрáнных утешéнiе,/ обуревáемых пристáнище,/ больны́х посещéнiе,/ немощны́х покрóве и Застýпнице,/ жéзле стáрости,/ Мáти Бóга Вы́шняго Ты еси́, Пречи́стая:// потщи́ся, мóлимся, спасти́ся рабóм Твои́м.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
И҆́ны стiхúры Богорóдицы, глас 4: Рáдуйся, Богомáти Пречи́стая;/ рáдуйся, вéрным надéждо;/ рáдуйся, мíру очищéнiе;/ рáдуйся, избавля́ющая от вся́ких скорбéй рабы́ Твоя́;/ рáдуйся, пристáнище обуревáемым;/ рáдуйся, всемíрный свете;/ рáдуйся, Утéшительнице и Застýпнице хрiстiáн;// рáдуйся, прибéжище и спасéнiе всех блажáщих Тя, Богоневéсто.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Рáдуйся, добрóто Iáковля,/ Ю́же избрá Бог, Ю́же возлюби́,/ дверь спасáемых, кля́твы разрешéнiе, Всеблагословéнная,/ чрéво Боговмести́мое, пáдших возведéнiе,/ святéйшая Херувíм и твáрей преимýщая,/ огнезрáчный Престóле Влады́чнiй,/ всемíрная рáдосте и слáво,/ колесни́це Слóва, óблаче, из негóже возсiя́ Сóлнце,// сýщим во тьме подая́ вéлiю ми́лость.
На 2. Стiх: Хвалúте Гóспода вси язы́цы, похвалúте Егó вси лю́дiе.
И҆́ны стiхúры Богорóдицы, глас 8: Рáдуйся, Áнгелов рáдосте;/ рáдуйся, человéков слáво;/ рáдуйся, вéрных надéждо и предстáтельство,/ стенó и заступлéнiе, Влады́чице Богомáти Пречи́стая,/ Я́же Бóга плóтiю неискусомýжно рóждшая, Избáвителя мíру;/ не прéзри рабы́ Твоя́,/ но мольбáми Твои́ми от одержáщих нас избáви искушéнiй, и бед, и обстоя́нiй,/ всех скорбя́щих Рáдосте,// еди́на хрiстiáн прибéжище.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Рáдуйся, Богорóдице Всепéтая;/ рáдуйся, истóчниче, живóт вéрным источáяй;/ рáдуйся, всех Влады́чице и Госпожé твáри, Благословéнная;/ рáдуйся, Всенепорóчная, Препрослáвленная;/ рáдуйся, Всепречи́стая;/ рáдуйся, купинó неопали́мая;/ рáдуйся, горó святáя;/ рáдуйся, сáде живонóсный,/ рáдуйся, раю́ одушевлéнный;/ рáдуйся, Мáти Дéво;// рáдуйся, Богоневéсто.
Слáва Ѻтцý и Сы́ну и Святóму Дýху.
Стiхúра, глас 6: Прiиди́те, празднолю́бных собóри,/ святýю Дéву Богоотрокови́цу ублажи́м:/ рáдости бо и спасéнiя Ходáтаица бысть мíрови,/ я́ко рóждшая Хрiстá Бóга./ Сiю́ бо Отéц Пребезначáльный,/ от всех родóв еди́ну избрáнную, Дщерь Себé именовá;/ Сын Собезначáльный и Соприсносýщный в Мáтерь избрá;/ Дух же Святы́й я́ко Пречи́стую Невéсту Себé Боголéпно сочетá./ Сiю́ я́ко Богоизбрáнную и Благословéнную в женáх/ Вы́шнiя си́лы немóлчными пéсньми величáют,/ Гаврiи́ла имýща Чиноначáльника:/ Благодáтная, рáдуйся, с Тобóю Госпóдь./ Сiю́ патрiáрси, прорóцы и вси святíи/ со прорóком Давíдом рáдостными глáсы венчавáют:/ предстá Цари́ца одеснýю Тебé, Влады́ко,/ ря́сны златы́ми одéяна/ и преукрашéна Божéственными благолéпотами./ Сiю́, я́ко держáвную Застýпницу рóда нáшего,/ и мы, недостóйнiи, воспои́м, глагóлюще:/ рáдуйся, Цéркве чýдное украшéнiе/ и всемý мíру преди́вный покрóве;/ рáдуйся, похвалó и рáдосте всех земнорóдных;/ рáдуйся, Божéственное утешéнiе всех скорбя́щих и оби́димых;/ рáдуйся, Обрáдованная, с Тобóю Госпóдь,// подáяй мíрови Тобóю вéлiю ми́лость.
И ны́не и прúсно и во вéки векóв, амúнь.
Догмáтик. Глас 4: И҆́же Тебé рáди, богоотéц прорóк Давíд,/ пéсненно о Тебé провозгласи́,/ вели́чiя Тебé сотвóршему:/ предстá Цари́ца одеснýю Тебé./ Тя бо Мáтерь, ходáтаицу животá показá,/ без Отцá из Тебé вочеловéчитися благоволи́вый Бог:/ да Свой пáки обнови́т óбраз, истлéвшiй страстьми́,/ и заблýждшее горохи́щное обрéт овчá,/ на рáмо воспрiи́м, ко Отцý принесéт,/ и Своемý хотéнiю, с небéсными совокупи́т си́лами,/ и спасéт Богорóдице мiр,// Хрiстóс имéяй вéлiю и богáтую ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сына и Святáго Дýха, Бóга. Достóин еси во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРЕМИИ
Чтец: Бытiя́ чтéнiе.
(Из главы 28) Изы́де Iáков от студенцá кля́твеннаго и и҆́де в Харрáнь. И обрéте мéсто, и спа тáмо: зáйде бо сóлнце, и взят от кáменiя мéста тогó, и положи́ возглáвше себé, и спа на мéсте óном. И сон ви́де. И се лéствица, утверждéна на земли́, eя́же главá досязáше до небéс, и Áнгели Бóжiи восхождáху и низхождáху по ней. Госпóдь же утверждáшеся на ней, и речé: Аз Бог Авраáмов, отцá твоегó, и Бог Iсаáков, не бóйся: земля́, идéже ты спи́ши на ней, тебé дам ю и сéмени твоемý. И бýдет сéмя твоé, я́ко песóк земны́й, и распространи́тся на мóре, и ли́ву, и сéвер, и на востóки; и возблагословя́тся о тебé вся колéна земнáя и о сéмени твоéм. И се Аз с тобóю, сохраня́яй тя на вся́ком пути́, áможе áще пóйдеши. И возвращý тя в зéмлю сiю́, яко не и҆́мам тебé остáвити, дóндеже сотвори́ти Ми вся, ели́ка глагóлах тебé. И востá Iáков от сна своегó, и речé: яко eсть Госпóдь на мéсте сем, аз же не вéдех. И убоя́ся, и речé: я́ко стрáшно мéсто сié; несть сié, но дом Бóжiй и сiя́ вратá Небéсная.
[Русский синодальный перевод]Иаков же вышел из Вирсавии и пошел в Харран, и пришел на одно место, и остался там ночевать, потому что зашло солнце. И взял один из камней того места, и положил себе изголовьем, и лег на том месте. И увидел во сне: вот, лестница стоит на земле, а верх ее касается неба; и вот, Ангелы Божии восходят и нисходят по ней. И вот, Господь стоит на ней и говорит: Я Господь, Бог Авраама, отца твоего, и Бог Исаака; [не бойся]. Землю, на которой ты лежишь, Я дам тебе и потомству твоему; и будет потомство твое, как песок земной; и распространишься к морю и к востоку, и к северу и к полудню; и благословятся в тебе и в семени твоем все племена земные; и вот Я с тобою, и сохраню тебя везде, куда ты ни пойдешь; и возвращу тебя в сию землю, ибо Я не оставлю тебя, доколе не исполню того, что Я сказал тебе. Иаков пробудился от сна своего и сказал: истинно Господь присутствует на месте сем; а я не знал! И убоялся и сказал: как страшно сие место! это не иное что, как дом Божий, это врата небесные.(Быт.28:10-17)
Чтец: Прорóчества Iезекíилева чтéнiе.
(Из глав 43 и 44) Тáко глагóлет Госпóдь: бýдет от дне осмáго и прóчее, сотворя́т iерéи на олтари́ всесожжéнiя вáшего и я́же спасéнiя вáшего, и прiимý вы, глагóлет Адонаи́ Госпóдь. И обрати́ мя на путь врат святы́х внéшних, зря́щих на востóки, и сiя́ бя́ху затворéна. И речé Госпóдь ко мне: вратá сiя́ затворéна бýдут и не отвéрзутся, и никтóже прóйдет сквозé их; я́ко Госпóдь Бог Iзрáилев прóйдет и҆́ми, и бýдут затворéна. Я́ко Игýмен ся́дет в них снéсти хлеб, по пути́ Елáмских врат вни́дет и по пути́ егó изы́дет. И введé мя по пути́ врат святы́х, сýщих к сéверу, пря́мо хрáму, и ви́дех, и се испóлнь слáвы храм Госпóдень.
[Русский синодальный перевод]Так говорит Господь: по окончании сих дней, в восьмой день и далее, священники будут возносить на жертвеннике ваши всесожжения и благодарственные жертвы; и Я буду милостив к вам, говорит Господь Бог. И привел он меня обратно ко внешним воротам святилища, обращенным лицом на восток, и они были затворены. И сказал мне Господь: ворота сии будут затворены, не отворятся, и никакой человек не войдет ими, ибо Господь, Бог Израилев, вошел ими, и они будут затворены. Что до князя, он, как князь, сядет в них, чтобы есть хлеб пред Господом; войдет путем притвора этих ворот, и тем же путем выйдет. Потом привел меня путем ворот северных перед лицо храма, и я видел, и вот, слава Господа наполняла дом Господень.(Иез.43:27;44:1-4)
Чтец: При́тчей чтéнiе.
(Из главы 9): Премýдрость создá Себé дом и утверди́ столпóв седмь. Заклá Своя́ жéртвенная, и раствори́ в чáши Своéй винó, и уготóва Свою́ трапéзу. Послá Своя́ рабы́, созывáющи с высóким проповéданiем на чáшу, глагóлющи: И҆́же есть безýмен, да уклони́тся ко Мне. И трéбующим умá речé: Прiиди́те, яди́те Мой хлеб, и пíйте винó, éже раствори́х вам. Остáвите безýмiе и жи́ви бýдете, и взыщи́те рáзума, да поживетé, и испрáвите рáзум в вéденiи. Наказýяй злы́я прiи́мет себé безчéстiе, обличáяй же нечести́ваго опорóчит себé: обличéнiя бо нечести́вому рáны емý. Не обличáй злых, да не возненави́дят тебé. Обличáй премýдра, и возлю́бит тя. Даждь премýдрому винý, и премýдршiй бýдет. Сказýй прáведному, и приложи́т прiимáти. Начáло премýдрости страх Госпóдень и совéт святы́х рáзум: разумéти бо закóн пóмысла есть благáго. Сим бо óбразом мнóгое поживéши врéмя, и приложáтся тебé лéта животá.
[Русский синодальный перевод]Премудрость построила себе дом, вытесала семь столбов его, заколола жертву, растворила вино свое и приготовила у себя трапезу; послала слуг своих провозгласить с возвышенностей городских: «кто неразумен, обратись сюда!» И скудоумному она сказала: «идите, ешьте хлеб мой и пейте вино, мною растворенное; оставьте неразумие, и живите, и ходите путем разума». Поучающий кощунника наживет себе бесславие, и обличающий нечестивого - пятно себе. Не обличай кощунника, чтобы он не возненавидел тебя; обличай мудрого, и он возлюбит тебя; дай наставление мудрому, и он будет еще мудрее; научи правдивого, и он приумножит знание. Начало мудрости - страх Господень, и познание Святаго - разум; потому что чрез меня умножатся дни твои, и прибавится тебе лет жизни.(Притч.9:1-11)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Богорóдицы, глас 8: Предстáтельнице вéрных, Богороди́тельнице,/ скорбя́щих Рáдосте и плáчущих вели́кое утешéнiе,/ моли́ Сы́на Твоегó, Хрiстá Бóга нáшего,/ со Áнгелы, и Апóстолы, и всéми святы́ми/ избáвити нас в час испытáнiя лю́таго осуждéнiя,/ да Тобóю спасéнiе улучи́вше,// во вéки слáвим Тя, Преблагословéнную.
Вéрою притекáю к покрóву Твоемý, Богороди́тельнице Пречи́стая:/ от напáстей, и бед, и страстéй томлéнiя,/ и бесóвскаго озлоблéнiя спаси́ мя,/ я́ко ми́лости имýщи пучи́ну и спасéнiя я́вльшися Ходáтаица,/ Влады́чице, Я́же Бóга рóждши Ми́лостиваго,// еди́наго Всещéдраго и Многоблагоутрóбнаго.
Крáсную Тя, Всечи́стая,/ еди́ну от вéка обрéт добрóту Iáковлю Пребезначáльное Слóво/ и, всели́вся в Тя благоутрóбiя рáди,/ обнови́ человéческое естествó:/ егóже моли́ непрестáнно/ от вся́ких бед и скорбéй избáвитися нам,// Тя рáдость и спасéнiе мíра почитáющим.
Небéсную дверь и кiвóт,/ всесвятýю гóру, светозáрный óблак воспои́м,/ Небéсную лéстницу, словéсный рай,/ Éвино избавлéнiе, вселéнныя всея́ вели́кое сокрóвище,/ я́ко спасéнiе в Ней содéлася мíрови/ и оставлéнiе дрéвних согрешéнiй./ Сегó рáди вопiéм Ей:/ моли́ Сы́на Твоегó и Бóга прегрешéнiй оставлéнiе даровáти/ благочéстно покланя́ющимся Тебé/ и с весéлiем торжествýющим Твой всечестны́й прáздник,// слáво и рáдосте нáша, Богомáти Благословéнная.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 5: Воструби́м трубóю пéсней:/ преклóнши бо Ся свы́ше, Всецари́ца Мáти Дéва/ благословéньми увенчавáет воспевáющiя Ю́./ Правослáвные да стекýтся/ и Цари́це да восплéщут в пéснех, Царя́ рóждшей,/ смéртiю одержи́мыя пéрвее разреши́ти человеколю́бно благоволи́вшаго./ Пáстырiе и учи́телiе, Дóбраго Пáстыря Пречи́стую Мáтерь, сошéдшеся, восхвáлим,/ небéс прострáннейшую, одушевлéнный Госпóдень Кiвóт,/ огнезрáчный Влады́чень престóл, маннопрiéмную златýю стáмну,/ заключéнную Слóва дверь, всех хрiстiáн прибéжище./ И вси лю́дiе, пéсньми благоглагóливыми похваля́юще Ю́, си́це рцем:/ Мáти Слóва Бóжiя,/ сподóби смирéнныя ны Небéснаго Цáрствiя,// ничтóже бо невозмóжно ходáтайству Твоемý.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Стiхúра воскрéсная, глас 4: Гóсподи, восшéд на Крест,/ прáдеднюю нáшу кля́тву потреби́л еси́,/ и сошéд во ад,/ я́же от вéка ýзники свободи́л еси́,/ нетлéнiе дáруя человéческому рóду,/ сегó рáди пою́ще слáвим// Животворя́щее и Спаси́тельное Твоé Востáнiе.
Стiх: Госпóдь воцарúся,/ в лéпоту облечéся.
И҆́ны по алфавúту, глас 4: Повéшен на дрéве, Еди́не Си́льне,/ всю тварь поколебáл еси́:/ положéн же во грóбе,/ живýщiя во гробéх воскреси́л еси́,/ нетлéнiе и жизнь дáруя человéческому рóду./ Тéмже пою́ще, слáвим// триднéвное Твоé Востáнiе.
Стiх: И҆́бо утвердú вселéнную,/ я́же не подвúжется.
Лю́дiе беззакóннiи, Хрiстé,/ Тебé, предáвше Пiлáту, распя́ти осуди́ша,/ неблагодáрнiи о Благодéтеле яви́вшеся./ Но вóлею претерпéл еси́ погребéнiе:/ самовлáстно воскрéсл еси́ триднéвно, я́ко Бог,// дáруя нам безконéчный живóт, и вéлiю ми́лость.
Стiх: Дóму Твоемý подобáет святы́ня, Гóсподи,/ в долготý днiй.
Со слезáми жены́ дошéдша грóба, Тебé искáху,/ не обрéтша же, рыдáюща с плáчем вопiю́ща глагóлаху:/ увы́ нам, Спáсе наш Царю́ всех,/ кáко укрáден был еси́;/ кóе же мéсто держи́т Живонóсное Тéло Твоé?/ Áнгел же к ним отвещавáше, не плáчите, глагóлет,/ но шéдша проповéдите, я́ко воскрéсе Госпóдь,// подая́ нам рáдость, я́ко Еди́н Благоутрóбен.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный, глас 4: При́зри на молéнiя Твои́х раб, Всенепорóчная,/ утоля́ющи лю́тая на ны востáнiя,/ вся́кiя скóрби нас изменя́ющи./ Тя бо, Еди́ну, твéрдое и извéстное Утверждéнiе и҆́мамы,/ и Твоé предстáтельство стяжáхом./ Да не постыди́мся, Влады́чице, Тя призывáющiи,/ потщи́ся на умолéнiе, Тебé вéрно вопiю́щих:/ рáдуйся, Влады́чице, всех Пóмоще,// Рáдосте и Покрóве, и Спасéнiе душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Тропáрь прáздника, глас 8: Ко истóчнику приснотекýщему милосéрдiя,/ Пречи́стей Дéве Богорóдице,/ притецéм, лю́дiе вси, свящéнницы же и и҆́ноцы,/ мýжiе, и жены́, и чáда, здрáвiи и боля́щiе,/ в покая́нiи вопiю́ще и уми́льно глагóлюще:/ Влады́чице, помози́ грéшным рабóм Твои́м,/ яви́ я́ко Благáя слáву Твою́,/ при́сно потщи́ся умилосéрдитися на ны,/ испроси́те очищéнiе душ и телéс нáших/ от Истóчника жи́зни нáшея, Бóга,// Егóже родила́ еси́, еди́на Благословéнная. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[в приходской практитке пропускается]/Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню