Неделя 21 по Пятидесятнице. Иконы Божией Матери Всех скорбящих радость. УТРЕНЯ(окончание) Час первый
6 ноября́ 2022 гóда. Недéля 21 по Пятидеся́тнице. Iкóны Бóжiей Мáтери «Всех скорбя́щих Рáдость». Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь (продолжéнiе ýтрени с канóном)
Глас 8
Хор: Пресвятáя Богорóдице, спасú нас.
Чтец: Водвори́хомся в вéчер в плáчи печáлей и чáянiи злых,/ но Твои́м Боголéпным крóвом, Дéво, обожéни бы́вше,/ обретóхом рáдость заýтра:// Ты бо спаслá еси́ нас.
Хор: Пресвятáя Богорóдице, спасú нас.
Чтец: Я́ко Божéственное прибéжище покрóв Твой, Влады́чице, вси стяжáвше к Бóгу,/ в напастех и гонéнiях, и гресéх к Тебé прибегáем/ и Тобóю изменéнiе прiéмлем, Пречи́стая.
Слáва Ѻтцý и Сы́ну и Святóму Дýху.
Тропáрь: Грéшников прибéжище, низвéрженных исправлéнiе Ты еси́, Влады́чице:/ сегó рáди притекáю к покрóву Твоемý,// спаси́ мя, Богоневéсто.
И ны́не и прúсно и во вéки векóв. Амúнь.
Тропáрь: В недоумéнiи и печáли сый и в бедáх, Пречи́стая,/ Тя призывáю тéпле от сéрдца моегó:// предвари́, и избáви мя, и подáждь, Чи́стая, мне утешéнiе.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Рýце распростéр Данiи́л,/ львов зiя́нiя в рóве затчé,/ óгненную же си́лу угаси́ша,/ добродéтелiю препоя́савшеся,/ благочéстiя рачи́тели, óтроцы, взывáюще:// благослови́те, вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Рýце распростéр на Крестé, язы́ки вся собрáл еси́,/ и еди́ну яви́л еси́, Влады́ко/ Цéрковь воспевáющую Тя, земнýю и небéсную, соглáсно пою́щим:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Святóму Воскресéнiю Твоемý.
Чтец: Белообрáзен яви́ся женáм,/ непристýпным свéтом воскресéнiя блистáяйся Áнгел,/ что Живáго во грóбе, вопiя́, и҆́щете я́ко мéртва;/ вои́стинну востá Хрiстóс, Емýже вопiéм:/ вся делá пóйте Гóспода,// и превозноси́те во вся вéки.
Хор: Пресвятáя Богорóдице, спаси нас.
Богорóдичен: Ты Еди́на во всех рóдех, Дéво Пречи́стая,/ Мáти яви́лася еси́ Бóжiя:/ Ты Божествá былá еси́ жили́ще, Всенепорóчная,/ не опáльшися огнéм Непристýпнаго Свéта.// Тéмже вси Тя благослови́м, Марíе Богоневéсто.
Глас 4
Хор: Пресвятáя Богорóдице, спасú нас.
Чтец: От ребрá Адáмова создáвый Тя,/ от Твоегó дéвства воплоти́ся, И҆́же всех Госпóдь,/ Егóже пою́ще, вопiéм:/ вся делá благослови́те, пóйте Гóспода,// и превозноси́те Егó во вéки.
Хор: Пресвятáя Богорóдице, спасú нас.
Чтец: В сéни Авраáм узрé, éже в Тебé, Богорóдице, тáинство,/ Сы́на бо Твоегó Безплóтнаго прiя́т, поя́:/ вся делá благослови́те, пóйте Гóспода,// и превозноси́те Егó во вéки.
Глас 4
Хор: Пресвятáя Богорóдице, спасú нас.
Чтец: Рáдуйся, Престóле слáвный Бóжiй;/ рáдуйся, вéрных стенó, Éюже сýщим во тьме возсiя́ Свет, Хрiстóс,/ Тебé блажáщим и вопiю́щим:// вся делá Госпóдня, Гóспода пóйте и превозноси́те во вся вéки.
Хор: Пресвятáя Богорóдице, спасú нас.
Чтец: Поéм Тя, Пречи́стая и Мáти Бóжiя,/ и кто не слáвит Тя, вои́стину Благýю, сýщую надéжду душ нáших,// тéмже, Пречи́стая, и мою́ мольбý прiими́.
Хор: Пресвятáя Богорóдице, спасú нас.
Чтец: Ты еси́ спасéнiе всех человéк, Я́же Бóга рóждшая неизречéнно;/ Ты еси́ вéрных спаси́тельница, Богорóдице, и слепы́х настáвница, и пáдающих исправлéнiе./ Тéмже Тя восхваля́юще, Хрiстý зовéм:// благослови́те вся делá Гóспода, пóйте и превозноси́те Егó во вся вéки.
Хор: Пресвятáя Богорóдице, спасú нас.
Чтец: Струи́ исцелéнiй нам всегдá, вéрным, Чи́стая, источáеши:/ тéмже незави́стную благодáть взéмлюще,// воспевáем Рождествó Твоé, Чи́стая, и превознóсим во вся вéки.
Глас 8
Хор: Пресвятáя Богорóдице, спасú нас.
Чтец: Вся еси́ Чи́стая и Божéственныя слáвы испóлнена, Бли́жняя Моя́,/ речé Дух Бóжiй, Тя провозвещáя, Пречи́стая./ Ю́же пéсньми воспевáем, пою́ще:// тебé подобáет рáдоватися, Бóга Человéка рóждшей.
Хор: Пресвятáя Богорóдице, спасú нас.
Чтец: А́нгелов похвалó и человéков спасéнiе,/ и Спорýчница бýди ми, Мáти Бо́жiя:// я́ко да обращýся и прiимý разрешéнiе прéжде согрешéнных в вéденiи и не в вéденiи.
Благословúм Отцá, и Сы́на, и Святáго Дýха, Гóспода.
Тропáрь: Тя по Бóзе уповáнiе спасéнiя в напáстех имýще, вéрнiи, взывáем:// вся делá Госпóдня, Гóспода пóйте// и превозноси́те Егó во вéки.
И ны́не и прúсно и во вéки векóв. Амúнь.
Тропáрь: Прiими́ песнь от худы́х устéн, Дéво Всепéтая, вопiю́щих Ти:// рáдуйся, боля́щим телесéм врачевствó и отчáянным дýшам спасéнiе.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Кáмень нерукосéчный/ от несекóмыя горы́ Тебé, Дéво,/ краеугóльный отсечéся,/ Хрiстóс, совокупи́вый разстоя́щаяся естествá.// Тем веселя́щеся Тя, Богорóдице, величáем.
Хор: Слáва, Гóсподи, Святóму Воскресéнiю Твоемý.
Чтец: Всегó мя воспрiя́л еси́ весь в совокуплéнiи несли́тно,/ всемý ми дая́, Бóже мой, Спасéнiе стрáстiю Твоéю,/ ю́же на Крестé претерпéл еси́ телéсне,// благоутрóбiя рáди мнóгаго.
Хор: Слáва, Гóсподи, Святóму Воскресéнiю Твоемý.
Чтец: Твои́ ученицы́ зря́ще отвéрзен гроб Твой,/ и богонóсныя плащани́цы испражнéны воскресéнiем Твои́м,// с áнгелом глагóлаху: вои́стинну востá Госпóдь.
Хор: Пресвятáя Богорóдице, спаси нас.
Богорóдичен: Еди́нице ýбо Божéственнаго Существá, но Ипостáсьми Трóице,/ вси вéрнiи покланя́ющеся,/ в неслiя́нных Ипостáсех Равноси́льную Единочéстную// ны́не благочтýще величáем.
Глас 4
Хор: Пресвятáя Богорóдице, спасú нас.
Чтец: Зрим я́ко крин Тя, ри́зою обагрéною укрáшену, Пречи́стая, Божéственнаго Дýха,/ посредé тéрнiя сiя́ющу, и благоухáнiя исполня́ющу,// и́же Тебé и́скренно величáющих.
Хор: Пресвятáя Богорóдице, спасú нас.
Чтец: Тлéнное прiи́м человéческое естествó из Твоегó, Всенепорóчная, чрéва Нетлéнный,/ в Себé показá нетлéнно, за благоутрóбiе:// тéмже Тя, я́ко Богорóдицу, величáем.
Глас 4
Хор: Пресвятáя Богорóдице, спасú нас.
Чтец: Рáдуйся, Марíе, вели́кое всея́ твáри чýдо;/ рáдуйся, Дщи ýбо Давíдова, Госпо́дня же Мáти;/ рáдуйся, пéнiе Гаврiи́лово;// рáдуйся, прибéжище и утверждéнiе, и по́мощь всем, Пресвятáя, сýщим на земли́ грéшником.
Хор: Пресвятáя Богорóдице, спасú нас.
Чтец: Ю́же изво́лил еси́, Влады́ко, прiими́ ми́лостивно Моли́твенницу, Мáтерь Твою́, о нас,/ и Твоея́ блáгости вся́ческая испо́лнятся:// да Тя вси я́ко Благодéтеля величáем.
Хор: Пресвятáя Богорóдице, спасú нас.
Чтец: О, Дéво Благáя! О, ми́ра рáдосте и прибéжище!/ О, храни́лище вéрных и избавлéнiе скорбéй!// Ты предстáни ми в час смéрти и избáви от бесо́в, и҆́щущих поглоти́ти мя.
Хор: Пресвятáя Богорóдице, спасú нас.
Чтец: Ты еси́ А́нгелов рáдость, Ты еси́ прáведников добро́та,/ Ты еси́ вéрных надéжда, Ты еси́ соблюдéнiе нáше,// Ты еси́ мост, к жи́зни нестарéющейся преводя́й вéрою и любо́вiю Тя величáющiя.
Глас 8
Хор: Пресвятáя Богорóдице, спасú нас.
Чтец: Рáдости нам вéчныя и жи́зни яви́лася еси́ преестéственне, Богороди́тельнице, Ходáтаица, Чи́стая,// Спáса всех ро́ждшая, от лицá земнáго вся́ку слéзу я́ве отъéмшаго и всем рáдость подáвшаго.
Хор: Пресвятáя Богорóдице, спасú нас.
Чтец: Рáдость и весéлiе, и рáдованiе Божéственное, Дéво Неискусомýжная, нам умно́жися Бо́жiе:// се бо, плáчущiися лю́те, рáдуемся моли́твами Твоими.
Слáва Ѻтцý и Сы́ну и Святóму Дýху.
Тропáрь: Под Твоé милосéрдiе прибегáющiи вéрою избавля́ются ско́рбных бед житiя́:// тéмже и аз ко Твоемý покро́ву прибего́х, Богоро́дице.
И ны́не и прúсно и во вéки векóв. Амúнь.
Тропáрь: Псалмы́ Тя воспевáем, Благодáтная,/ и немо́лчно, éже рáдуйся, прино́сим:// Ты бо источи́ла еси́ всем Рáдость.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный деся́тый: Тиверiáдское мóре с детьми́ Зеведéевыми,/ Нафанáила с Петрóм же и со други́ма двемá дрéвле,/ и Фомý имя́ше на лóве,/ и҆́же Хрiстóвым повелéнiем одеснýю ввéргше,/ мнóжество извлекóша рыб:/ Егóже Петр познáв, к Немý бродя́ше,/ и҆́мже трéтiе явлéйся,// и хлеб показá, и ры́бу на ýглех.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Богорóдицы из минéи: Под кров Твой, Дéво Госпожé, прибегáем/ вси ро́ди человéчестiи:/ просвети́ ны свéтом Рождествá Твоего́,/ грéшныя рабы́ Твоя́,/ моля́щiяся прилéжно и покланя́ющiяся Тебé,/ и прося́щiя умирéнiя мíрови// и душáм нáшим вéлiя ми́лости.
ХВАЛИТНЫ
Хор, глас 4: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 4: Крест претерпéвый и смерть,/ и воскресы́й из мéртвых, Всеси́льне Гóсподи,// слáвим Твоé Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крестóм Твои́м, Хрiстé,/ от дрéвнiя кля́твы свободи́л еси́ нас,/ и смéртiю Твоéю/ естествó нáше мýчащаго дiáвола упраздни́л еси́:/ востáнiем же Твои́м рáдости вся испóлнил еси́./ Тéмже вопiéм Ти:// воскресы́й из мéртвых, Гóсподи, слáва Тебé.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Твои́м Крестóм, Хрiстé Спáсе,/ настáви нас на и́стину Твою́,/ и избáви нас от сéтей врáжiих,/ воскресы́й из мéртвых,/ возстáви ны пáдшыяся грехóм,/ простéр рýку Твою́, Человеколю́бче Гóсподи,// моли́твами святы́х Твои́х.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Отéческих Твои́х недр не разлучи́вся,/ Единорóдный Слóве Бóжiй,/ пришéл еси́ на зéмлю за человеколю́бiе,/ Человéк быв непрелóжен,/ и крест и смерть претерпéл еси́ плóтiю,/ безстрáстный Божествóм:/ воскрéс же из мéртвых,/ безсмéртiе пóдал еси́ рóду человéческому,// я́ко Еди́н Всеси́лен.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Богорóдицы, глас 2: Прiиди́те, возра́дуемся держа́вней Застýпнице ро́да на́шего,/ Цари́це Богоро́дице,/ прiиди́те к ти́хому и чýдному Ея́ Покро́ву, веселя́щеся./ Да́рует бо Богоро́дица ве́рным оби́льныя да́ры целе́бныя/ от неистощи́маго исто́чника ми́лости;/ тьмы избавля́ет нас искуше́нiй и бед, и обстоя́нiй,/ благоче́стно и Богопрiя́тно прославля́ющих и чтущих Ю́/ я́ко Всеблагослове́нную и Пречи́стую Ма́терь Хрiста́ Бо́га./ Те́мже ра́достно к Ней воззове́м:/ ра́дуйся, пала́то Сло́ва;/ ра́дуйся, Неве́сто Неневе́стная;/ ра́дуйся, ра́досте на́ша;/ ра́дуйся, Ма́ти Живота́,// благослове́н Плод чре́ва Твоего́.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Ра́дуйся, Всеблагослове́нная Марíе, Ма́ти Хрiсто́ва;/ ра́дуйся, су́щая ра́досте всего́ мíра;/ ра́дуйся, Всеблага́я Хрiстiа́ном Помо́щнице;/ ра́дуйся, оби́димых Застýпнице;/ ра́дуйся, недýгующим ско́рое и изве́стное прибе́жище;/ ра́дуйся, си́рым и вдови́цам Боже́ственное утеше́нiе;/ ра́дуйся, всех а́лчущих покро́ве и Пита́тельнице;/ ра́дуйся, всем сýщим в беда́х ско́рое избавле́нiе;// ра́дуйся, Богоневе́сто Влады́чице, упова́нiе хрiстiа́н.
Слы́ши, Дщи, и виждь, и приклонú ýхо Твоé. (Пс.44:11А)
Стiхúра: Ра́дуйся, всех хрiстiа́н наде́ждо и покро́ве, Богома́ти Всенепоро́чная,/ всея́ тва́ри честне́йшая, Небе́сных и земны́х сла́внейшая:/ всех бо родила́ еси́ Творца́ и Бо́га./ Но, о Владычице, прiими́ ми́лостивно моле́нiя на́ша/ и спаса́й нас всегда́ я́ко Блага́я и Ми́лостивая:/ да с весе́лiем лобыза́ем пресвятýю Твою́ iко́ну/ и при́сно, ра́дующеся, восхваля́ем и велича́ем Тя,// Обра́дованная Ра́досте ве́рных раб Твои́х.
Лицý Твоемý помóлятся богáтiи лю́дстiи. (Пс.44:13Б)
Глас 6: Днесь собо́ри ве́рных,/ соше́дшеся, духо́вно да торжествýем/ и Богоотрокови́цу Де́ву и Богоро́дицу/ пе́сньми благохва́льными ублажи́м, глаго́люще:/ ра́дуйся, еди́на Избра́нная от всех родо́в в Ма́терь Преве́чнаго Сло́ва;/ ра́дуйся, вмести́лище Невмести́маго всеми;/ ра́дуйся, А́нгелов и Серафи́мов ра́досте;/ ра́дуйся, проро́ков пропове́данiе и похвало́;/ ра́дуйся, Апо́столов и святи́телей удобре́нiе;/ ра́дуйся, мýчеников кре́посте и всех пра́ведных сла́во;/ ра́дуйся, держа́вный покро́ве ве́рных;/ ра́дуйся, скорбя́щих Боже́ственное утеше́нiе;/ ра́дуйся, в беда́х и напа́стех сýщим ско́рое избавле́нiе;/ ра́дуйся, гре́шников всех прибе́жище и Блага́я Застýпнице;/ ра́дуйся, Благода́тная и Обра́дованная, с Тобо́ю Госпо́дь,// подая́й мíрови Тобо́ю ве́лiю ми́лость.
Слáва Отцý и Сы́ну и Святóму Дýху.
Стiхúра евáнгельская деся́тая, глас 6: По éже во ад сошéствiи,/ и éже из мéртвых воскресéнiи,/ скорбя́ще я́коже достóяше,/ о разлучéнiи Твоéм, Хрiстé,/ ученицы́ на дéланiе обрати́шася,/ и пáки корабли́ и мрéжи, и лóва нигдéже./ Но Ты, Спáсе, яви́вся я́ко Влады́ка всех,/ одеснýю мрéжи повелева́еши воврещи́,/ и бысть слóво дéло вскóре,/ и мнóжество рыб мнóгое,/ и вéчеря стрáнная готóва на земли́:/ ея́же причасти́вшимся тогдá Твои́м ученикóм,/ и нас ны́не мы́сленно сподóби наслади́тися,// человеколю́бче Гóсподи.
И ны́не и прúсно и во вéки векóв, амúнь.
Богорóдичен, глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси́ áда,/ разруши́л еси́ осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твои́м,/ послáл еси́ я на прóповедь,/ и тéми мир Твой пóдал еси́ вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 4: Свéтлую Воскресéнiя прóповедь/ от Áнгела увéдевша Госпóдни учени́цы/ и прáдеднее осуждéнiе отвéргша,/ апóстолом хвáлящася глагóлаху:/ испровéржеся смерть,/ воскрéсе Хрїстóс Бог,// дáруяй мíрови вéлiю ми́лость.
Слáва Ѻтцý и Сы́ну и Святóму Дýху.
Тропáрь прáздника, глас 8: Ко истóчнику приснотекýщему милосéрдiя,/ Пречи́стей Дéве Богорóдице,/ притецéм, лю́дiе вси, свящéнницы же и и҆́ноцы,/ мýжiе, и жены́, и чáда, здрáвiи и боля́щiе,/ в покая́нiи вопiю́ще и уми́льно глагóлюще:/ Влады́чице, помози́ грéшным рабóм Твои́м,/ яви́ я́ко Благáя слáву Твою́,/ при́сно потщи́ся умилосéрдитися на ны,/ испроси́те очищéнiе душ и телéс нáших/ от Истóчника жи́зни нáшея, Бóга,// Егóже родила́ еси́, еди́на Благословéнная.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк Богорóдицы, глас 6: Не и҆́мамы ины́я пóмощи, не и҆́мамы ины́я надéжды, рáзве Тебé, Влады́чице. Ты нам помози́: на Тебé надéемся и Тобóю хвáлимся, Твои́ бо есмы́ раби́, да не постыди́мся.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Гóсподи, Iисýсе Хрiстé, Сыне Бóжiй, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу