Неделя 21 по Пятидесятнице.Иконы Божией Матери Всех скорбящих радость.ВСЕНОЩНОЕ БДЕНИЕ. УТРЕНЯ.КАНОН
6 ноября́ 2022 гóда. Недéля 21 по Пятидеся́тнице. Iкóны Бóжiей Мáтери «Всех скорбя́щих Рáдость». Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ПСАЛОМ ИЗБРАННЫЙ
Помяни́, Гóсподи, Давíда и всю крóтость егó./ Я́ко кля́тся Гóсподеви, обещáся Бóгу Iáковлю./ Се, слы́шахом я во Евфрáфе, обретóхом я в поля́х дубрáвы./ Преслáвная глагóлашася о тебé, грáде Бóжiй./ Бог посредé егó, и не подви́жится./ Кля́тся Госпóдь Давíду и҆́стиною, и не отвéржется ея./ От плодá чрéва твоегó посаждý на престóле твоéм./ Я́ко избрá Госпóдь Сióна, извóли егó в жили́ще себé./ Освяти́л есть селéнiе Своé Вы́шнiй./ Святы́ня и велелéпота во святи́ле егó./ Свят храм твой, ди́вен в прáвде./ Дóму Твоемý подобáет святы́ня, Гóсподи, в долготý днíй./ Помянý и҆́мя Твоé во вся́ком рóде и рóде.// Благословéн Госпóдь во век, и в век вéка.
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 4: Я́же Твоегó преслáвнаго востáнiя, предтéкша мvронóсицы,/ апóстолом проповéдаху Хрiстé,/ я́ко воскрéсл еси́ я́ко Бог,// подая́ мíрови вéлiю ми́лость.
СЕДАЛЬНЫ БОГОРОДИЦЫ
Глас 5 (по 1‑м стiхослóвiи): Утоли́ болéзни многовоздыхáющiя души́ моея́,/ утоли́вшая вся́ку слезý от лицá земли́:/ Ты бо человéков болéзни отгоня́еши/ и грéшных скóрби разрешáеши,/ Тебé бо вси стяжáхом надéжду и утверждéнiе,// Пресвятáя Мáти Дéво.
Глас 6 (по 2‑м стiхослóвiи): Уповáнiе мíра, Благáя Богорóдице Дéво,/ Твоé и еди́ное стрáшное предстáтельство прóсим:/ умилосéрдися на лю́ди безпомóщныя/ и моли́ Ми́лостиваго Бóга// избáвитися душáм нáшим от вся́каго прещéнiя, еди́на Благословéнная.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Седáлен прáздника по полiелéе, глас 6: Преложéние скорбя́щих,/ пременéнiе боля́щих еси́, Богорóдице Всепéтая:/ спаси́ град Твой и лю́ди,/ бори́мых умирéнiе, обуревáемых тишинó,// еди́на Предстáтельнице вéрных.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
2 АНТИФОН
Воззвáх Тебé Гóсподи тéпле,/ из глубины́ душú моея́,/ и мне да бýдут на послушáнiе// Божéственная Твоя́ ушесá. (Двáжды)
На Гóспода надéжду всяк кто стяжáв,// вы́шшiй есть всех скорбя́щих. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.
И ны́не и прúсно и во вéки векóв. Амúнь.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.
3 АНТИФОН
Сéрдце моé/ к Тебé, Слóве, да возвы́сится,/ и да ничтóже усладúт мя// от мiрскúх красóт на слáбость. (Двáжды)
К мáтери своéй/ я́коже и҆́мать кто любóвь,/ ко Гóсподу тéпльше// люблéнiем дóлжни есмы́. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.
И ны́не и прúсно и во вéки векóв. Амúнь.
Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.
ПРОКИМЕН
Чтец: Прокíмен, глас четвéртый. Воскресни́, Гóсподи, помози́ нам и избáви нас и́мене Твоегó рáди. (Пс.43:26)
Хор: Воскреснú, Гóсподи, помозù нам/ и избáви нас úмене Твоегó рáди.
Чтец: Бóже, уши́ма нáшима услы́шахом, и отцы́ нáши возвести́ша нам. (Пс.43:2А)
Хор: Воскреснú, Гóсподи, помозù нам/ и избáви нас úмене Твоегó рáди.
Чтец: Воскресни́, Гóсподи, помози́ нам.
Хор: И избáви нас úмене Твоегó рáди.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе
Хор: Слáва Тебé, Гóсподи, слáва Тебé.
(Ин.зач.66): Во врéмя óно, яви́ся Iисýс ученикóм Свои́м, востáв от мéртвых, на мóри Тiверiáдстем. яви́ся же си́це. Бя́ху вкýпе Сíмон Петр, и Фомá нарицáемый Близнéц, и Нафанáил, и҆́же бе от Кáны Галiлéйскiя, и сы́на Зеведéова, и и҆́на от учени́к Егó два. Глагóла им Сíмон Петр: идý ры́бы лови́ти. Глагóлаша емý: и҆́дем и мы с тобóю. Изыдóша же и вседóша áбiе в корáбль, и в ту нощь не я́ша ничесóже. У́тру же бы́вшу, ста Iисýс при брéзе: не познáша же ученицы́, я́ко Iисýс есть. Глагóла же им Iисýс: дéти, едá что снéдно и҆́мате? Отвещáша Емý: ни. Он же речé им: ввéрзите мрéжу о деснýю странý корабля́ и обря́щете. Ввергóша же, и ктомý не можáху привлещи́ ея́ от мнóжества рыб. Глагóла же учени́к той, егóже любля́ше Iисýс, Петрóви: Госпóдь есть. Сíмон же Петр слы́шав, я́ко Госпóдь есть, епенди́том препоя́сася, бе бо наг, и ввéржеся в мóре. А друзíи ученицы́ кораблецéм прiидóша, [не бéша бо далéче от земли́, но я́ко две сте лактéй,] влекýще мрéжу рыб. Я́коже излезóша на зéмлю, ви́деша огнь лежáщь, и ры́бу на нем лежáщу и хлеб. И глагóла им Iисýс: принеси́те от рыб, я́же я́сте ны́не. Влез же Сíмон Петр, извлечé мрéжу на зéмлю, пóлну вели́ких рыб, сто и пятьдеся́т, и три: и толи́ко сýщим, не протóржеся мрéжа. Глагóла им Iисýс: прiиди́те, обéдуйте. Ни еди́н же смéяше от учени́к истязáти Егó, Ты кто еси́; вéдяще, я́ко Госпóдь есть. Прiи́де же Iисýс, и прiя́т хлеб, и дадé им, и ры́бу тáкожде. Се ужé трéтiе яви́ся Iисýс ученикóм Свои́м, востáв от мéртвых.
[Русский синодальный перевод]После того опять явился Иисус ученикам Своим при море Тивериадском. Явился же так: были вместе Симон Петр, и Фома, называемый Близнец, и Нафанаил из Каны Галилейской, и сыновья Зеведеевы, и двое других из учеников Его. Симон Петр говорит им: иду ловить рыбу. Говорят ему: идем и мы с тобою. Пошли и тотчас вошли в лодку, и не поймали в ту ночь ничего. А когда уже настало утро, Иисус стоял на берегу; но ученики не узнали, что это Иисус. Иисус говорит им: дети! есть ли у вас какая пища? Они отвечали Ему: нет. Он же сказал им: закиньте сеть по правую сторону лодки, и поймаете. Они закинули, и уже не могли вытащить сети от множества рыбы. Тогда ученик, которого любил Иисус, говорит Петру: это Господь. Симон же Петр, услышав, что это Господь, опоясался одеждою, - ибо он был наг, - и бросился в море. А другие ученики приплыли в лодке, - ибо недалеко были от земли, локтей около двухсот, - таща сеть с рыбою. Когда же вышли на землю, видят разложенный огонь и на нем лежащую рыбу и хлеб. Иисус говорит им: принесите рыбы, которую вы теперь поймали. Симон Петр пошел и вытащил на землю сеть, наполненную большими рыбами, которых было сто пятьдесят три; и при таком множестве не прорвалась сеть. Иисус говорит им: придите, обедайте. Из учеников же никто не смел спросить Его: кто Ты? зная, что это Господь. Иисус приходит, берет хлеб и дает им, также и рыбу. Это уже в третий раз явился Иисус ученикам Своим по воскресении Своем из мертвых. (Ин.21:1-14)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Иерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Отцý и Сыну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ныне и прúсно и во вéки векóв, амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé.
Стихúра, глас 6: Воскрéс Iисýс от грóба,/ якоже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ВОСКРЕСНЫЙ, ГЛАС 4
(совмещéнный с канóном Богорóдицы (глас 4) и пéрвым и вторым канóнами Борóдицы (Всех скорбящих рáдости), глас 4 и глас 8)
ПЕСНЬ 1
Iрмóс: Мóря чермнýю пучи́ну/ невлáжными стопáми/ дрéвнiй пешешéствовав Iзрáиль,/ крестообрáзныма Моисéовыма рукáма// Амали́кову си́лу в пусты́ни победи́л есть.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Вознéслся еси́ на пречи́стем дрéве крéстнем,/ нáше отпадéнiе исправля́я,/ éже на дрéве исцеля́я всегуби́тельство, Влады́ко,// я́ко Благ и Всеси́лен.
Хор: Слáва, Гóсподи, Святóму Воскресéнiю Твоемý.
Чтец: Во грóбе плóтски, во áде же с душéю, я́ко Бог:/ в раи́ же с разбóйником, и на Престóле был еси́, Хрiстé, со Ѻтцéм и Дýхом,// вся исполня́я Неопи́санный.
Хор: Пресвятáя Богорóдице, спасú нас.
Богорóдичен: Без сéмене Ѻ́тчею вóлею/ от Божéственнаго Дýха Бóжiя зачалá еси́ Сы́на,/ и плóтiю родилá еси́:/ И҆́же из Ѻтцá без мáтере,// нас же рáди, из Тебé без отцá.
Канон Богородицы, глас 4
Хор: Пресвятáя Богорóдице, спасú нас.
Чтец: Сотрясóшася лю́дiе, смятóшася язы́цы,/ цáрствiя же держáвная уклони́шася, Чи́стая, от стрáха рождествá Твоегó:/ прiи́де бо Царь мой, и низложи́ мучи́теля,// и мiр от тли избáви.
Хор: Пресвятáя Богорóдице, спасú нас.
Чтец: Жили́ще Своé, живы́й в вы́шних,/ к человéком сошéд, освяти́ Хрiстé, и непоколеби́мо яви́:/ Еди́на бо по рождествé дéвства сокрóвище,// Зижди́теля рóждши пребылá еси́.
Канон первый Богородицы «всех скорбящих радость», глас 4
Хор: Пресвятáя Богорóдице, спасú нас.
Чтец: Кýю Ти достóйную песнь принесéт нáше неможéнiе,/ тóчiю обрáдовательную, éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасú нас.
Чтец: Рáдуйся, благодáти истóчниче; рáдуйся, лéствице и дверь Небéсная;/ рáдуйся, свéщниче, и стáмно златáя, и горó несекóмая,// Я́же Жизнодáвца Хрiстá ми́рови рóждшая.
Хор: Пресвятáя Богорóдице, спасú нас.
Чтец: Всея́ моея́ жи́зни Предстáтельнице, от бед мнóгих избáви мя,/ да благодáрственный глас воспевáю Ти, Богоневéсто Пречи́стая,// и бýдущiя мя исхити́ мýки.
Хор: Пресвятáя Богорóдице, спасú нас.
Чтец: Я́же всем удóбь послýшная в скóрби/и в печáли помогáющая, Богорóдице Благáя,// благодáть подáждь пéти Тя дерзáющим, Влады́чице, скорбя́щих Рáдосте.
Второй канон Богородицы «всех скорбящих радость», глас 8
Хор: Пресвятáя Богорóдице, спасú нас.
Чтец: Мóря житéйскаго волнáми потопля́ем и напáстьми лю́тыми одержи́м,/ ко пристáнищу устреми́хся невлáемому, покрóву Твоемý:// тéмже мя избáви, Богорóдице, от лю́тых.
Хор: Пресвятáя Богорóдице, спасú нас.
Чтец: Положи́ Тя пристáнище сýщим в бедáх, Чи́стая, Бог, И҆́же от Тебé благоволи́вый воспрiя́ти плоть./ Тéмже Ти, припáдающе, взывáем:// дáруй пóмощь Твою́ рабóм Твои́м.
Слáва Ѻтцý и Сы́ну и Святóму Дýху.
Тропáрь: Еди́на Благословéнная и Богорáдованная,/ Я́же Рáдость человéком рóждши неизречéнную,// печáли отыми́ души́ моея́, молю́ся, и возвесели́ сéрдце моé.
И ны́не и прúсно и во вéки векóв. Амúнь.
Тропáрь: Избáви мя, Пречи́стая, бесóвскiя прéлести,/ озлоблéнiя же, и вредá, и искушéнiя,// да вéрою Тя слáвлю, сýщую по Бóзе Застýпницу и покрóв мой.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ успéнiе.
ПЕСНЬ 3
Iрмóс: Весели́тся о Тебé Цéрковь Твоя́, Хрiстé, зовýщи:/ Ты моя́ крéпость, Гóсподи,// и прибéжище, и утверждéнiе.
Хор: Слáва, Гóсподи, Святóму Воскресéнiю Твоемý.
Чтец: Дрéво живóтное, мы́сленный и҆́стинный виногрáд,// на Крестé ви́сит, всем источáя нетлéнiе.
Хор: Слáва, Гóсподи, Святóму Воскресéнiю Твоемý.
Чтец: Я́ко вели́к, я́ко стрáшен, я́ко áдово низлóжь шатáнiе,// и я́ко Бог нетлéнен, ны́не плóтски воскрéсе.
Хор: Пресвятáя Богорóдице, спасú нас.
Богорóдичен: Ты еди́на сýщим на земли́,/ я́же пáче естествá благи́х Ходáтаица,/ Мáти Бóжiя былá еси́:// тéмже Ти, рáдуйся, принóсим.
Глас 4
Хор: Пресвятáя Богорóдице, спасú нас.
Чтец: Очищáется человéков существó,/ Тобóю присовокýпльшееся нестерпи́мому Божéственному Огню́:/ я́ко сокровéнный, Пречи́стая Дéво, в Тебé Хлеб испéкшееся,// И҆́же и Тебé невреждéнну сохрáншему.
Хор: Пресвятáя Богорóдице, спасú нас.
Чтец: Кáя сiя́ я́же вои́стинну близ Бóга;/ я́ко превозшéдши вся áнгельскiя чи́ны,/ еди́на добрóтою дéвства,// я́ко Мáти сiя́ющи Вседержи́теля.
Глас 4
Хор: Пресвятáя Богорóдице, спасú нас.
Чтец: Утверждéнiе бýди, и прибéжище, и покрóв, Дéво Богороди́тельнице,// вéрою к Тебé прибегáющим и Бóжiю Тя Мáтерь исповéдающим.
Хор: Пресвятáя Богорóдице, спасú нас.
Чтец: Крéпость моя́, и рáдость, и весéлiе, и стенá твéрдая,/ и Предстáтельница Ты еси́, Всенепорóчная,// искушéнiй и бед избавля́ющи мя.
Хор: Пресвятáя Богорóдице, спасú нас.
Чтец: Ми́лостивным и крóтким Твои́м óком, Богороди́тельнице,/ зря́щи мя во обстоя́нiи и скóрби одержи́ма, вскóре свободи́:// Тя бо призывáю на пóмощь.
Хор: Пресвятáя Богорóдице, спасú нас.
Чтец: Кропи́ши исцелéнiй струи́ боля́щим, Дéво, всю́ду:/ Тя бо истóчника показá милосéрдiя, Влады́чице, И҆́же ми́лости Госпóдь,// из Тебé рождéйся пáче умá.
Глас 8
Хор: Пресвятáя Богорóдице, спасú нас.
Чтец: Ты еси́ земнорóдных уповáнiе, и пóмощь, и рáдость, покрóв и прибéжище, Влады́чице, Мáти Животá.// Тéмже Тя мóлим: Твою́ пóмощь низпосли́ всем пою́щим Тя, Пречи́стая.
Хор: Пресвятáя Богорóдице, спасú нас.
Чтец: И҆́же Тобóю избáвльшеся от бед/ и Тебé рáди рáдость получи́вше, Мáти Безневéстная,// я́ко Подáтельницу благýю и Застýпницу благохвáльну вси прославля́ем.
Слáва Ѻтцý и Сы́ну и Святóму Дýху.
Тропáрь: Благословéн Плод чрéва Твоегó, Дéво Богорóдице, всех рáдосте:/ Рáдость бо всемý мíру родилá еси́ и Весéлiе,// разгоня́ющее печáль грехóвную, Богоневéсто.
И ны́не и прúсно и во вéки векóв. Амúнь.
Тропáрь: Тя Храни́тельницу, Пресвятáя, в напáстех стяжáх;/ Тебé по Бóзе мою́ Предстáтельницу и҆́мам неусы́пну;// Тебé да обря́щу, Пречи́стая, избавля́ющую мя в день Судá вся́каго осуждéнiя.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в Божéственней пáмяти Твоéй// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Богорóдицы, глас 6: Не и҆́мамы ины́я пóмощи,/ не и҆́мамы ины́я надéжды,/ рáзве Тебé, Влады́чице./ Ты нам помози́:/ на Тебé надéемся и Тобóю хвáлимся,/ Твои́ бо есмы́ раби́,// да не постыди́мся.
И҆́кос: Простри́ длáни Твоя́, и҆́миже всех Влады́ку я́ко Младéнца прiя́ла еси́ за мнóжество блáгости:/ не остáви нас, всегдá надéющихся на Тя, бóдренною Твоéю моли́твою,/ и неисчéтною просты́нею ущéдри нас,/ и подáждь душáм нáшим милосéрдiе Твоé, во вéки источáющи,/ Тебé бо и҆́мамы грéшнiи Застýпницу от находя́щих на ны бед и зол./ Но я́ко имýщи милосéрдiя щедрóты,/ ускори́ на моли́тву и потщи́ся на умолéнiе,// предстáтельствующи при́сно, Богорóдице, чтýщих Тя.
Седáлен Богорóдицы, глас 7: Рáдуйся, Сóлнца óблаче мы́сленнаго и неизречéннаго, Влады́чице;/ рáдуйся, всесвéтлая свещé; рáдуйся, свéщниче всезлаты́й;/ Тобóю, Пресвятáя, Éва избáвися от кля́твы./ Но я́ко имýщая дерзновéнiе ко Благопремéнному Сы́ну Твоемý и Бóгу,// мáтернею моли́твою не оскудéй о нас моли́тися, Пречи́стая.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Богорóдицы, глас 7: Рáдуйся, Сóлнца óблаче мы́сленнаго и неизречéннаго, Влады́чице;/ рáдуйся, всесвéтлая свещé; рáдуйся, свéщниче всезлаты́й;/ Тобóю, Пресвятáя, Éва избáвися от кля́твы./ Но я́ко имýщая дерзновéнiе ко Благопремéнному Сы́ну Твоемý и Бóгу,// мáтернею моли́твою не оскудéй о нас моли́тися, Пречи́стая.
ПЕСНЬ 4
Iрмóс: Вознесéна Тя ви́девши Цéрковь на Крестé,/ Сóлнце Прáведное,/ ста в чи́не своéм,/ достóйно взывáющи:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Возшéл еси́, стрáсти моя́ исцеля́я, на Крест/ стрáстiю Пречи́стыя плóти Твоея́,/ в ню́же вóлею облéклся еси́./ Тéмже Ти взывáем:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Безгрéшнаго смерть вкуси́вши,/ Животворя́щаго Тéла Твоегó,/ достóйно, Влады́ко, умертви́ся:/ мы же вопiéм Ти,// слáва си́ле Твоей, Гóсподи.
Хор: Пресвятáя Богорóдице, спасú нас.
Богорóдичен: Неискусобрáчно родилá еси́, Дéво,/ и по рождествé яви́лася еси́ дéвствующи пáки:/ тéмже немóлчными глáсы,/ éже рáдуйся, Тебé, Влады́чице,// вéрою несумнéнною взывáем.
Глас 4
Хор: Пресвятáя Богорóдице, спасú нас.
Чтец: Поживé с человéки, ви́димь быв Неви́димый,/ во зрáце сый Непостижи́маго Божествá,/ и вообрáжься из Тебé, Отрокови́це, в чуждéе,// вéдущих Тя, Чи́стую Богомáтерь, спасáет.
Хор: Пресвятáя Богорóдице, спасú нас.
Чтец: Прiя́т в вещéственне Дéва Невещéственнаго, в причáстiи веществá,/ Младéнца от Нея́ бы́вша./ Тéмже во дву существý, Еди́н познавáется// плотонóсец Бог, и Человéк Пресýщественный.
Глас 4
Хор: Пресвятáя Богорóдице, спасú нас.
Чтец: Надéждо ненадéжных, помóщнице си́рых,/ плáчущих утешéнiе, согрешáющих очищéнiе,/ Руководи́тельнице заблýдших, боля́щих Целéбнице и исправлéнiе пáдающих,// Влады́чице, спаси́ рабы́ Твоя́.
Хор: Пресвятáя Богорóдице, спасú нас.
Чтец: Не непричáстни есмы́, Влады́чице, Твоегó заступлéнiя в скóрбех;/ тéмже и ны́не нам помози́ вскóре, лю́те обуревáемым, рýку простирáющи, Чи́стая:// бýди ми́лостива болéзнем нáшим, Мáти Бóжiя, рáдость скóрую подаю́щи.
Хор: Пресвятáя Богорóдице, спасú нас.
Чтец: Вся Благáя и тéплая Застýпница сýщи грéшником и смирéнным, Богороди́тельнице Пречи́стая Влады́чице,// от бед и скорбéй, и грехóв спасáй рабы́ Твоя́.
Хор: Пресвятáя Богорóдице, спасú нас.
Чтец: Преслáвную Твою́ Мáтерь, Хрiстé, прiими́ моля́щуюся о мíре, ми́лостивно Тебé зовýщую:// Сы́не Мой, прiими́ мольбý Мою́ и ути́ши гнев, належáщiй земли́.
Глас 8
Хор: Пресвятáя Богорóдице, спасú нас.
Чтец: От вели́ких и разли́чных прегрешéнiй же и напáстей всегдá спасáеши мя;/ тéмже Тя я́ко рóждшую Гóспода молю́/ и к Тебé прибегáю, непобеди́мей пóмощи скорбя́щим:// от бед изведи́ мольбáми Твои́ми.
Хор: Пресвятáя Богорóдице, спасú нас.
Чтец: Бóже мой Милосéрде, Бóже Человеколю́бче, Воли́телю ми́лости,/ ны́не на мя излíй Твою́ ми́лость:// мóлит Тя надéжда и Застýпница моя́, Мáти Твоя́.
Слáва Ѻтцý и Сы́ну и Святóму Дýху.
Тропáрь: Ми́лость Твою́ и милосéрдiе на рабы́ Твоя́, Чи́стая, простри́,// при́сно моля́щiя Тя вся́кiя скóрби и мýки избавля́ющи моли́твами Твои́ми.
И ны́не и прúсно и во вéки векóв. Амúнь.
Тропáрь: Рáдуйся, крáсная палáто Слóва, дéвственный чертóже Царя́;/ рáдуйся, похвалó всех Безплóтных;// рáдуйся, человéков рáдосте и пóмоще и уповáнiе.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Ты, Гóсподи мой,/ Свет в мiр пришéл еси́,/ Свет Святы́й, обращáяй из мрáчна невéденiя// вéрою воспевáющiя Тя.
Хор: Слáва, Гóсподи, Святóму Воскресéнiю Твоемý.
Чтец: Ты, Гóсподи, к земли́ ми́лостивно сошéл еси́:// Ты вознéсл еси́ пáдшее человéческое существó, на дрéве воздвизáемь.
Хор: Слáва, Гóсподи, Святóму Воскресéнiю Твоемý.
Чтец: Ты взял ми еси́, Хрiстé, прегрешéнiй осуждéнiе:// Ты разруши́л еси́ болéзни смéртныя, Щéдре, Божéственным воскресéнiем Твои́м.
Хор: Пресвятáя Богорóдице, спаси нас.
Богорóдичен: Тя орýжiе непобеди́мое на враги́ предлагáем,// Тя утверждéнiе, и надéжду нáшего спасéнiя, Богоневéсто, стяжáхом.
Глас 4
Хор: Пресвятáя Богорóдице, спасú нас.
Чтец: Дом Тя слáвы, Гóру Бóжiю Святýю, Чи́стая,/ Невéсту, Чертóг, Храм освящéнiя,/ Сын Бóжiй, в Тя всели́вся,// и рай слáдости присносýщныя нам содéла.
Хор: Пресвятáя Богорóдице, спасú нас.
Чтец: Плоть от крóве Дéвственныя прiя́л еси́, Хрiстé,/ Безсéменну, Пречи́сту, Ипостáсну,/ и словéсну и ýмну, одушевлéнну,/ дéйственну, хотéтельну,// Самовлады́чну и Самовлáстну.
Глас 4
Хор: Пресвятáя Богорóдице, спасú нас.
Чтец: Ты крéпость моя́, Ты похвалá, и рáдованiе, и Храни́тельница ми еси́,/ и заступлéнiе, и прибéжище, и Предстáтельница непобеди́ма, Пресвятáя Богорóдице Дéво:// тéмже спаси́ рабá Твоегó.
Хор: Пресвятáя Богорóдице, спасú нас.
Чтец: Спаси́ мя, Влады́чице, из глубины́ напáстей, и скорбéй, и печáлей, и страстéй телéсных// и в тишинé Божéственней сохрани́ дýшу мою́.
Хор: Пресвятáя Богорóдице, спасú нас.
Чтец: Моли́твеннице нелóжная, уповáнiе хрiстiáн, Обрáдованная,// прiими́ мольбы́ от нас, прилéжно призывáющих и моля́щихся Тебé.
Хор: Пресвятáя Богорóдице, спасú нас.
Чтец: Покрóв мой еси́ Ты и при́сное хвалéнiе, о Влады́чице Богорóдице:// никáкоже бо презирáеши к Тебé прибегáющих.
Глас 8
Хор: Пресвятáя Богорóдице, спасú нас.
Чтец: Добрóту Тя Iáковлю возлюби́ Бог, Дéво Отрокови́це,// украшáя вся Тобóю, омрачи́вшiяся преступлéнiем пéрвее.
Хор: Пресвятáя Богорóдице, спасú нас.
Чтец: Дýшу мою́ сохрани́, я́ко зéницу óка, под крóвом крилý Твоéю, Благáя Пречи́стая,// и от духóв лукáвых томлéнiя и мучéнiя избáви.
Слáва Ѻтцý и Сы́ну и Святóму Дýху.
Тропáрь: Избáвльшеся Тобóю прамáтернiя печáли, Богороди́тельнице, утешéнiя испóлнени бы́хом,/ Весéлiе всем рóждшая и всемíрную Рáдость:// тéмже, Всепéтая, Твоя́ песнослóвцы от бед Твои́ми моли́твами соблюди́.
И ны́не и прúсно и во вéки векóв. Амúнь.
Тропáрь: Благодари́м Тя, избáвльшеся Тобóю грехóв мнóгих, и нéмощей, и болéзней, и недýг лю́тых, Пречи́стая Влады́чице:// надéжда бо еси́ твердá Твои́м вéрным рабóм.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Пожрý Ти со глáсом хвалéнiя, Гóсподи,/ Цéрковь вопiéт Ти,/ от бесóвскiя крóве очи́щшися/ рáди ми́лости от ребр Твои́х// истéкшею Крóвiю.
Хор: Слáва, Гóсподи, Святóму Воскресéнию Твоемý.
Чтец: Возшéл еси́ на Крест, си́лою препоя́сався,/ и соплéтся с мучи́телем, я́ко Бог, с высоты́ свергл еси́,// Адáма же непобеди́мою си́лою воскреси́л еси́.
Хор: Слáва, Гóсподи, Святóму Воскресéнию Твоемý.
Чтец: Воскрéсл еси́ блистáяйся крáсный из грóба, Хрiстé,/ и разгнáл еси́ вся враги́ Божéственною си́лою Твоéю,// и вся, я́ко Бог, весéлiя испóлнил еси́.
Хор: Пресвятáя Богорóдице, спаси нас.
Богорóдичен: О чýдо всех чудéс новéйшее!/ Я́ко Дéва во утрóбе, вся́ческая обдержáщаго// неискусомýжно зачéнши, не тесновмести́.
Глас 4
Хор: Пресвятáя Богорóдице, спасú нас.
Чтец: Дрéвле ýбо прельсти́ мя змiй, и умори́ мя,/ прамáтерiю моéю Éвою:// ны́не же, Чи́стая, Тобóю создáвый мя из истлéнiя воззвá.
Хор: Пресвятáя Богорóдице, спасú нас.
Чтец: Бéздна Тя бéздну неизречéнно,/ благоутрóбiя Отрокови́це, избрáнную показá чудéс:/ и҆́бо из Тебé мóлнiею Божествá,// би́сер Хрiстóс возсiя́.
Глас 4
Хор: Пресвятáя Богорóдице, спасú нас.
Чтец: Боля́щих Цели́тельницу, пáдающих востáнiе, согрешáющих очищéнiе, Богорóдице,/ Тебé молю́, со слезáми припáдаю и зовý Ти:// я́ко сильнá Самá мя спаси́, погибáющаго.
Хор: Пресвятáя Богорóдице, спасú нас.
Чтец: Ты еси́ стенá неруши́ма, Ты еси́ покрóв тверд, Богорóдице Благáя,/ Ты еси́ Предстáтельница крепкá рабý Твоемý:// сегó рáди призывáю Тя при́сно и притекáю к покрóву Твоемý.
Хор: Пресвятáя Богорóдице, спасú нас.
Чтец: Мíрови рáдость сýщи, Богорóдице Чи́стая, рáдуйся, Тебé, Дéво, зовéм со Áнгелом вéрно:// Твоея́ рáдости сподóби ны и печáль нáшу разори́.
Хор: Пресвятáя Богорóдице, спасú нас.
Чтец: Слáдость Áнгелов, скорбя́щих Рáдость,/ хрiстiáн Предстáтельница Ты еси́, Дéво Мáти Госпóдня:// заступи́ нас и избáви вéчных мук.
Глас 8
Хор: Пресвятáя Богорóдице, спасú нас.
Чтец: В нощи́ и во дни, я́ве и втай под Твой прибегáем кров, Пречи́стая Дéво,// и҆́же Тя вéрно славослóвящи.
Хор: Пресвятáя Богорóдице, спасú нас.
Чтец: В напáстех Застýпницу Тя и҆́мамы твéрду,/ в скóрбех крéпкое спасéнiе, покóй в печáлех,// в бедáх пóмощь, Приснодéво.
Слáва Ѻтцý и Сы́ну и Святóму Дýху.
Тропáрь: Добрóта честны́х святы́х Áнгел,/ рáдованiе человéк всех Ты еси́, Богорóдице Дéво:// Ты мя к животý настáви.
И ны́не и прúсно и во вéки векóв. Амúнь.
Тропáрь: Палáта Царя́ Слáвы и огнезрáчный былá еси́ Престóл, Дéво,/ Херувíм превы́шши и Серафíм:// тéмже Тя вся́кое дыхáнiе слáвит, я́ко Мáтерь Зижди́теля.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 4: Спас и Избáвитель мой/ из грóба, я́ко Бог, воскресѝ от уз земнорóдныя,/ и вратá áдова сокрушѝ,/ и я́ко Влады́ка// воскрéсе триднéвен.
И҆́кос: Воскрéсшаго из мéртвых Хрiстá Жизнодáвца триднéвна из грóба,/ и вратá смéртная днесь сокру́шшаго си́лою Своéю,/ и áда умертви́вшаго, и жáло смéртное стéршаго,/ и Адáма со Éвою свободи́вшаго,/ воспои́м вси земнорóднiи, вопiю́ще хвалу́ прилéжно:// Той бо я́ко Еди́н Крéпкiй, Бог и Влады́ка, воскрéсе триднéвен.
ПЕСНЬ 7
Iрмóс: В пещи́ Авраáмстiи óтроцы перси́дстей,/ любóвiю благочéстiя пáче,/ нéжели плáменем, опаля́еми, взывáху:// благословéн еси́ в хрáме слáвы Твоея́, Гóсподи.
Хор: Слáва, Гóсподи, Святóму Воскресéнiю Твоемý.
Чтец: К нетлéнiю человéчество призвáся,/ Божéственною измовéно Крóвiю Хрiстóвою, благодáрно воспевáющее:// благословéн еси́ в хрáме Слáвы Твоея́, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́ко Живонóсец, я́ко рая́ краснéйшiй/ вои́стинну, и чертóга вся́каго цáрскаго показáся светлéйшiй, Хрiстé, гроб Твой,// истóчник нáшего воскресéнiя.
Хор: Пресвятáя Богорóдице, спаси нас.
Богорóдичен: Вы́шняго освящéнное Божéственное селéнiе, рáдуйся,/ Тобóю бо дадéся рáдость, Богорóдице, зовýщим:// благословéна Ты в женáх еси́, Всенепорóчная Влады́чице.
Глас 4
Хор: Пресвятáя Богорóдице, спасú нас.
Чтец: Привлачи́т мя к пéнiю любóвь дéвственная огнь,/ и҆́же в сéрдцы, вопи́ти Мáтери и Дéве:// Благословéнная, Госпóдь си́лам с Тобóю.
Хор: Пресвятáя Богорóдице, спасú нас.
Чтец: Превы́шши твáри яви́лася еси́,/ я́ко Творцá рóждши и Гóспода./ Тéмже Ти вопiю́, Богорóдице:// Благословéнная, Госпóдь си́лам с Тобóю.
Глас 4
Хор: Пресвятáя Богорóдице, спасú нас.
Чтец: Страстьми́ престарéвся и неослáбными напáстьми, и скорбьми́/ и, доспéв к зáпадом житiя́ моегó, добродéтелем непричáстен, лéностiю снедéн быв,/ вопiю́ Ти, Влады́чице:// утешéнiе земны́м, поми́луй мя.
Хор: Пресвятáя Богорóдице, спасú нас.
Чтец: Рáдуйся, истóчниче присноживóтныя воды́;/ рáдуйся, раю́ пи́щный;/ рáдуйся, стенó вéрных;/ рáдуйся, Неискусобрáчная;/ рáдуйся, всеми́рная рáдосте,// Éюже нам возсiя́ хвáлимый отцéв Бог и препрослáвлен.
Хор: Пресвятáя Богорóдице, спасú нас.
Чтец: Всем, сýщим в мíре, Застýпница еси́/ и стенá хрiстiáном, и прибéжище непосты́дно, Чи́стая Марíе./ Тéмже вéрою Тя чтýще, вопiéм Хрiстý:// отéц нáших Бóже, благословéн еси́.
Хор: Пресвятáя Богорóдице, спасú нас.
Чтец: О, благоутрóбiя Твоегó, Дéво Чи́стая!/ Реши́ши бо безмéрныя печáли и напáсти, призывáющим в нýжде и обстоя́нiи:// тéмже и ны́не помози́, Благословéнная, Тя восхваля́ющим.
Продолжение здесь