Неделя 2 по Пятидесятнице, всех святых в земле Русской просиявших. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ
26 ию́ня 2022 гóда. Недéля 2 по Пятидеся́тнице, всех святы́х в землé Рýсской просiя́вших. Глас 1. Всeнóщное бдéнiе для домáшнего (келéйнаго) совершéнiя состоит из Великой вечéрни, утрени, также канóна и пéрваго чáса. Вся слýжба прáздника по Октóиху и Минéе. Слýжба мирскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрiстé, Бóже наш, поми́луй нас, ами́нь.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святы́й Крéпкiй, Святый Безсмéртный, помилуй нас.(3 раза)
Слáва Отцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сы́не Бóжiй, поми́луй нас. Ами́нь.
Гóсподи, поми́луй, (12 раз.)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 103, предначинáтельный
Стихú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился еси зелó. Во исповéданiе и в велелéпоту облéклся еси. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слуги́ Своя плáмень óгненный. Основáяй зéмлю на твéрди ея, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл еси им. Предéл положи́л еси, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, извести́ хлеб от земли́. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и́хже еси насади́л. Тáмо пти́цы вогнездя́тся, еродíево жили́ще предводи́тельствует и́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л еси тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сиé мóре вели́кое и прострáнное, тáмо гáди, и́мже несть числá, живóтная мáлая с вели́кими, тáмо корабли́ преплáвают, змiй сей, eгóже создáл еси ругáтися eму. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé земли́. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от земли́, и беззакóнницы, я́коже не бы́ти им. Благослови́, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л еси.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýіа, аллилýіа, аллилýіа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Пeрвая кафисма
Читаем либо кафúсму 1-ю (1-ю cтатию(«Блажен муж» - 1-й антифон.)
[Псалом 1]Блажéн муж, и́же не и́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрiстá Егó. Растóргнем ýзы их и отвéржем от нас и́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поем стихú избрáннии
БЛАЖЕН МУЖ
Чтец (или хор): Блажéн муж, и́же не и́де на совéт нечести́вых.
Хор: Аллилýіа, аллилýіа, аллилýіа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýіа, аллилýіа, аллилýіа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýіа, аллилýіа, аллилýіа.
Чтец (или хор): Блажéни вси надéющiися Нань.
Хор: Аллилýіа, аллилýіа, аллилýіа.
Чтец (или хор): Воскресни, Гóсподи, спасѝ мя, Бóже мой.
Хор: Аллилýіа, аллилýіа, аллилýіа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýіа, аллилýіа, аллилýіа.
Чтец: Слáва Отцý и Сы́ну и Святóму Дýху.
Хор: Аллилýіа, аллилýіа, аллилýіа.
Хор: И ны́не и присно и во вéки векóв, аминь.
Хор: Аллилýіа, аллилýіа, аллилýіа.
Аллилýіа, аллилýіа, аллилýіа, слáва Тебé Бóже. (трúжды)
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
ГОСПОДИ ВОЗЗВАХ, ГЛАС 2
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéния о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти их при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою,// исповéдатися úмени Твоемý.
Стихúры воскрéсные, глас 1: Вечéрнiя нáша моли́твы/ прiими́, Святы́й Гóсподи,/ и подáждь нам оставлéнiе грехóв,/ я́ко Еди́н еси́// явлéй в мíре Воскресéнiе.
Менé ждут прáведницы,// дóндеже воздáси мне.
Стихúра: Обыди́те лю́дiе Сióн,/ и обыми́те Егó,/ и дади́те слáву в нем Воскрéсшему из мéртвых:/ я́ко Той есть Бог наш,// Избавлéй нас от беззакóнiй нáших.
На 8. Стих: Из глубины воззвáх к Тебé, Гóсподи,// Гóсподи, услыши глас мой.
Стихúра: Прiиди́те лю́дiе,/ воспои́м, и поклони́мся Хрiстý,/ слáвяще Егó из мéртвых Воскресéнiе:/ я́ко Той есть Бог наш,// от прéлести врáжiя мiр Избавлéй.
Да бýдут ýши Твоú// внéмлюще глáсу молéнiя моегó.
И҆́на стихúра анатóлiева: Весели́теся Небесá,/ воструби́те основáнiя земли́,/ возопíйте гóры весéлiе:/ се бо Емманýил грехи́ нáша на Крестé пригвозди́,/ и живóт дая́й, смерть умертви́,// Адáма Воскреси́вый, я́ко Человеколю́бец.
На 6. Стих: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стихúры рýсских святы́х, глас 3, самоглáсны: Прiиди́те, собóри вéрных,/ сýщiя в землé нáшей святы́я восхвáлим:/ преподóбныя, и iерáрхи, и кня́зи благовéрныя,/ мýченики и священномýченики,/ и Хрiстá рáди юрóдивыя,/ и жен святы́х сослóвiе,/ вкýпе именýемыя и неименýемыя,/ сíи бо вои́стинну дéлы и словесы́, и многови́дным житiéм,/ и от Бóга даровáнiи/ содéлашася святíи/ и Руси́ тезоимéнiе свя́тости подáша,/ и́хже и грóбы Бог чудесы́ прослáви,/ и ны́не несрéдственне прослáвльшему их Хрiстý предстоя́ще,/ мóлятся прилéжно о нас,// любóвiю совершáющих свéтлое их торжествó.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стихúра: Прiиди́те, правослáвiя люби́телiе,/ пéсненными добрóтами похвáлим богомýдрыя святи́тели Цéркви Рýсскiя,/ свящéнства венцы́, благочéстiя прáвило,/ истóчники Божéственных исцелéнiй неисчерпáемыя,/ проли́тiе даровáнiй духóвных,/ рéки мнóгих чудéс,/ зéмлю Рýсскую веселя́щiя течéнiем,/ благовéрным лю́дем тéплыя посóбники,/ и́хже рáди Хрiстóс врагóв возношéнiя низложи́,// имéяй вéлiю ми́лость.
На 4. Стих: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стихúра: Земля́ весели́тся и Нéбо рáдуется,/ отцы́ преподóбнiи,/ восхваля́юще пóдвиги и труды́ вáша,/ душéвное благомóщiе и умá чистотý,/ закóном бо естествá не победи́стеся./ О собóре святы́й и пóлче Божéственный,// земли́ нáшея утверждéнiе вы естé вои́стинну.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стихúра, глас 8, самоглáсны: Блажéннiи богомýдрiи кня́зiе Рýсскiи,/ правослáвною мýдростiю сiя́ющiи,/ добродéтелей же свéтлостiю блистáющiи,/ озаря́ете вéрных исполнéнiя,/ бесóв тьму отгоня́юще;/ тéмже, я́ко причáстники невечéрнiя благодáти/ и наслéдiя вáшего храни́тели непосты́дныя,// вас почитáем, досточýднiи.
На 2. Стих: Хвалúте Гóспода вси языцы, похвалúте Егó вси лю́дiе.
Стихúра: Мýченицы Хрiстóвы преблажéннiи,/ на вóльное заколéнiе сáми себé предáсте,/ и зéмлю Рýсскую кровьми́ вáшими освяти́сте,/ и воздýх просвети́сте преставлéнiем;/ ны́не же живетé на Небесéх,/ во свéте невечéрнем,// о нас всегдá моля́щеся, богови́дцы.
Яко утвердúся мúлость Егó на нас,// и úстина Госпóдня пребывáет во век.
Стихúра: Блажéннiи Хрiстá рáди юрóдивiи и прáведнiи,/ на Руси Святóй просiя́вшiи,/ вы, отвержéнiем себé Хрiстý послéдовавше,/ мудрéйшим юрóдством прехи́трили естé дiáвола,/ сегó связáвше пóдвиги вáшими,/ и, богáтство нося́ще в души́ некрáдомо,/ вся Хрiстóва учéнiя дéлом испóлнисте,/ и, ны́не на Небесéх ликýюще,/ не престáйте моли́тися о Рýсстей земли́// и о всех почитáющих вас.
Слáва Отцý и Сыну и Святóму Дýху.
Стихúра, Глас 1: Весели́ся о Гóсподе, Русь Правослáвная,/ рáдуйся и ликýй, вéрою свéтло одéявшися,/ телесá подви́жников вéры и свидéтелей и́стины/ в нéдрех свои́х имýщи, я́ко сокрóвище,/ наслади́ся чудéс, от них истекáющих,/ и, ви́дящи полк сей святы́й,/ от ви́димых и неви́димых врагóв тя ограждáющiй,/ благодáрно Спáсу возопíй:// Гóсподи, слáва Тебé.
И ныне и прúсно и во вéки векóв, амúнь.
Догмáтик. Глас 1: Всеми́рную слáву,/ от человéк Прозя́бшую,/ и Влады́ку Рóждшую,/ Небéсную Дверь,/ воспои́м Марíю Дéву,/ Безплóтных песнь, и вéрных удобрéнiе:/ Сiя́ бо яви́ся Нéбо, и Храм Божествá:/ Сiя́ преграждéнiе вражды́ разруши́вши,/ мир введé, и Цáрствiе отвéрзе./ Сiю́ ýбо имýще вéры Утверждéнiе,/ Побóрника и́мамы из Нея́ Рóждшагося Гóспода./ Дерзáйте ýбо, дерзáйте лю́дiе Бóжiи:// и́бо Той победи́т враги́, я́ко Всеси́лен.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Отцá Небéснаго, Святáго, Блажéннаго, Iисýсе Хрiстé! Пришéдше на зáпад сóлнца, ви́девше свет вечéрнiй, поéм Отцá, Сына и Святáго Дýха, Бóга. Достóин еси во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Проки́мен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся.
Чтец: Облечéся Госпóдь в си́лу и препоя́сася.
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится.
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРИМИИ
Чтец: Прорóчества Исáiина чтéнiе.
(Из главы 49): Тáко глагóлет Госпóдь: во врéмя прiя́тное послýшах тя и в день спасéнiя помогóх тебé. И создáх тя и дах тя в завéт язы́ков, éже устрóити зéмлю и наслéдити наслéдiе пусты́ни. Глагóлюща сýщим во ýзах: изыди́те! И сýщим во тьме: откры́йтеся! На всех путéх пасти́ся бýдут, и на всех стезя́х пáжить их. Не взáлчут, нижé вжáждут, нижé порази́т их зной, нижé сóлнце, но Ми́луяй их утéшит я́ и сквозé истóчники вод проведéт я́. И положý вся́кую гóру в путь и вся́кую стезю́ в пáству их. Се сíи издалéча прiи́дут, сíи от сéвера и мóря, инíи же от земли́ Пéрсскiя. Да веселя́тся Небесá, и рáдуется земля́, да отры́гнут гóры весéлiе и хóлми прáвду, я́ко поми́лова Бог лю́ди Своя́ и смирéнныя людéй утéши. Речé же Сióн: остáви мя Госпóдь, и Бог забы́ мя. Едá забýдет женá отрочá своé? Или́ не поми́лует изчáдiя чрéва своегó? А́ще ли же и сих забýдет женá, но Аз не забýду тебé, - глагóлет Госпóдь.
[Русский синодальный перевод]Так говорит Господь: во время благоприятное Я услышал Тебя, и в день спасения помог Тебе; и Я буду охранять Тебя, и сделаю Тебя заветом народа, чтобы восстановить землю, чтобы возвратить наследникам наследия опустошенные, сказать узникам: «выходите», и тем, которые во тьме: «покажитесь». Они при дорогах будут пасти, и по всем холмам будут пажити их; не будут терпеть голода и жажды, и не поразит их зной и солнце; ибо Милующий их будет вести их и приведет их к источникам вод. И все горы Мои сделаю путем, и дороги Мои будут подняты. Вот, одни придут издалека; и вот, одни от севера и моря, а другие из земли Синим. Радуйтесь, небеса, и веселись, земля, и восклицайте, горы, от радости; ибо утешил Господь народ Свой и помиловал страдальцев Своих. А Сион говорил: «оставил меня Господь, и Бог мой забыл меня!» Забудет ли женщина грудное дитя своё, чтобы не пожалеть сына чрева своего? но если бы и она забыла, то Я не забуду тебя, - говорит Господь! (Ис.49:8-15)
Чтец: Премýдрости Iисýса, сы́на Сирáхова, чтéнiе.
(Из главы 44): Восхвáлим ýбо мýжи слáвны и отцы́ нáша в бытiи́. Мнóгу слáву создá Госпóдь в них вели́чiем Свои́м от вéка. Госпóдствующе в цáрствiих свои́х и мýжи, имени́ти си́лою, совéтующе рáзумом свои́м, провещáвшiи во прорóчествах; старéйшины людíй в совéтех и в рáзуме писáнiя людíй. Премýдрая словесá в наказáнiи их; и́щуще глáса мусiкíйска и повéдающе пóвести во писáнiих, мýжи богáтiи, обдаровáни крéпостiю, ми́рно живýще в жили́щих свои́х. Вси сíи в рóдех прослáвлени бы́ша, и во днех их похвалá. Суть от них и́же остáвиша и́мя, éже повéдати хвалы́. И суть, и́хже несть пáмяти, и погибóша, я́ко не сýщiи, и бы́ша я́ко не бы́вше, и чáда их по них. Но сíи мýжiе ми́лостивiи, и́хже прáвды не забвéны бы́ша, с сéменем их пребýдет дóброе наслéдiе, изчáдiя их в завéтех. Остáся сéмя их и чáда их по них, до века пребýдет сéмя их, и слáва их не потреби́тся. Телесá их в ми́ре погребéна бы́ша, а именá их живýт в рóды. Премýдрость их повéдят лю́дiе, и похвалý их исповéсть Цéрковь.
[Русский синодальный перевод]Восхвалим ныне мужей славных и отцов нашего рода: много славного Господь являл чрез них, величие Своё от века; это были господствующие в царствах своих и мужи, именитые силою; они давали разумные советы, возвещали в пророчествах; они были руководителями народа при совещаниях и в книжном обучении. Мудрые слова были в учении их; они изобрели музыкальные строи и гимны предали писанию; люди богатые, одаренные силою, они мирно обитали в жилищах своих. Все они были уважаемы между племенами своими и во дни свои были славою. Есть между ними такие, которые оставили по себе имя для возвещения хвалы их, - и есть такие, о которых не осталось памяти, которые исчезли, как будто не существовали, и сделались как бы не бывшими, и дети их после них. Но те были мужи милости, которых праведные дела не забываются; в семени их пребывает доброе наследство; потомки их - в заветах; семя их будет твердо, и дети их - ради них; семя их пребудет до века, и слава их не истребится; тела их погребены в мире, и имена их живут в роды; народы будут рассказывать о их мудрости, а церковь будет возвещать их хвалу.(Сир.44:1-14)
Чтец: Премýдрости Соломóни чтéнiе.
(Из главы 3) Прáведных дýши в руцé Бóжiей, и не прикóснется их мýка. Непщевáни бы́ша во очесéх безýмных умрéти, и вмени́ся озлоблéнiе исхóд их. И éже от нас шéствiе сокрушéнiе, они́ же суть в ми́ре. И҆́бо пред лицéм человéческим, áще и мýку прiи́мут, уповáнiе их безсмéртiя испóлнено. И в мáле накáзани бы́вше, вели́кими благодéтельствовани бýдут: я́ко Бог искуси́ я́, и обрéте их достóйны Себé. Я́ко злáто в горни́ле искуси́ их: и я́ко всеплóдiе жéртвенное прiя́т я́. И во врéмя посещéнiя их возсiя́ют, и я́ко и́скры по стéблiю потекýт. Сýдят язы́ком и обладáют людьми́, и воцари́тся Госпóдь в них во вéки. Надéющiися Нань разумéют и́стину, и вéрнiи в любви́ пребýдут Емý. Я́ко благодáть и ми́лость в преподóбных Егó, и посещéнiе во избрáнных Егó.
[Русский синодальный перевод]Души праведных в руке Божией, и мучение не коснется их. В глазах неразумных они казались умершими, и исход их считался погибелью, и отшествие от нас - уничтожением; но они пребывают в мире. Ибо, хотя они в глазах людей и наказываются, но надежда их полна бессмертия. И немного наказанные, они будут много облагодетельствованы, потому что Бог испытал их и нашел их достойными Его. Он испытал их как золото в горниле и принял их как жертву всесовершенную. Во время воздаяния им они воссияют как искры, бегущие по стеблю. Будут судить племена и владычествовать над народами, а над ними будет Господь царствовать вовеки. Надеющиеся на Него познают истину, и верные в любви пребудут у Него; ибо благодать и милость со святыми Его и промышление об избранных Его. (Прем.3:1-9)
Гóсподи, поми́луй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже отéц нáших,/ и хвáльно и прослáвлено и́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Отцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стихúры рýсских святы́х, глас 8, самоглáсна: Срáдуйтеся с нáми, вси ли́цы святы́х/ и вся áнгельская чиноначáлiя,/ духóвне совокýпльшеся,/ прiи́дем и воспои́м благодáрную песнь Хрiстý Бóгу:/ се бо безчи́сленный сонм срóдников нáших/ предстои́т Царю́ Слáвы/ и молéбно ходáтайствует о нас./ Сíи суть столпи́ и красотá вéры правослáвныя;/ сíи учéнiи, и дéлы, и кровéй излiя́нiи/ Цéрковь Бóжiю прослáвиша;/ сíи от всех предéл земли́ нáшея возсiя́ша,/ и вéру правослáвную в ней/ чудесы́ и знáменiи утверди́ша,/ и во ины́я страны́ пронесóша,/ апóстольски ревнýюще;/ инíи же пусты́ни и грáды оби́тельми святы́ми украси́ша,/ áнгельское житié показýюще;/ мнóзи ругáнiи, и рáнами, и лю́тою смéртiю/ от сынóв вéка сегó искуси́шася,/ мнóзи же и инéми ви́ды,/ во вся́цем чи́не подвизáвшеся,/ нам терпéнiя и злострадáнiя óбраз подáша,/ и вси вкýпе мóлят ны́не Гóспода/ от бед избáвитися отéчеству нáшему// и всем нам спасти́ся.
Глас 1: О, ди́вное чýдо!/ Истóчницы благочéстiя/ на Руси явля́ются,/ и путеводи́телiе к Небеси́ святíи срóдницы нам бывáют./ Весели́ся, Русь Правослáвная,/ сих отéчество земнóе./ Возопiи́м, вéрнiи,/ таковы́я имýще в бедáх застýпники:/ блажéннiи и святíи,/ Бóга не престáйте о нас моли́ти,// подаю́щаго вáми земли́ нáшей вéлiю ми́лость.
Глас 2: Свéтите отéчеству вáшему всегдá,/ слáвнiи чудотвóрцы рýсстии,/ я́коже звéзды свéтлыя,/ покрывáете бо при́сно сié от пáгубы врагóв/ и избавля́ете озлоблéнiя и бýри вся́кiя./ Тéмже рáдостно прáзднует,/ лéтнюю пáмять, блажéннiи, совершáюще,/ вéрою и любóвiю пою́ще Гóспода,// вас прослáвльшаго.
Глас 3: Вéлiя святы́х Твои́х, Хрiстé, си́ла:/ во гробéх бо лежáще,/ дýхи прогоня́ют/ и упраздни́ша врáжiю власть,/ вéрою Трóическою подви́гшеся// во благочéстiи.
Глас 4: Дал еси́ знáменiе/ боя́щимся Тебé, Гóсподи,/ Крест Твой честны́й,/ и́мже тíи, посрами́вше/ начáла тьмы и влáсти,/ на Святéй Руси́ правослáвiе утверди́ша./ Тéмже Твоé человеколю́бное смотрéнiе слáвим,/ Iисýсе всеси́льне,// Спáсе душ нáших.
Глас 5: Прiиди́те, Небéснiи предстáтелiе нáши, к нам,/ вáшего трéбующим ми́лостивнаго посещéнiя,/ и избáвите озлóбленныя мучи́тельскими прещéнiи/ и лю́таго неи́стовства невéрных,/ от ни́хже, я́ко плéнницы и нáзи, гони́ми есмы́,/ от мéста на мéсто чáсто преходя́ще/ и заблуждáюще в вертéпех и горáх./ Ущéдрите ýбо, прехвáльнiи,/ и дáруйте нам ослáбу,/ утоли́те бýрю/ и угаси́те éже на ны негодовáнiе,/ Бóга моля́ще,// подаю́щаго вáми земли́ нáшей вéлiю ми́лость.
Глас 6: Все отложи́вше/ житéйское томлéнiе/ и слáдость текýщую презрéвше,/ крест взя́сте, я́ко и́го Божéственное,/ и Хрiстý послéдовасте,/ и к Небéсному покóю чýдно всели́стеся./ О дрýзи Хрiстóви, сосýди честнíи,/ святíи вси, на Руси просiя́вшiи,/ прiиди́те посредé нас неви́димо,/ предначинáюще торжествó и пéнiе/ и сподобля́юще дарóв невещéственных// ваш прáздник совершáющих светолéпно.
Глас 7: Не лишéни есмы́ надéжди спасéнiя,/ святы́я бо срóдники нáша и́мамы,/ о нас моля́щияся.// Гóсподи, слáва Тебé.
Глас 8: Гóсподи,/ áще и нам по всемý подóбни бы́ша святíи,/ но, пристрáстiя земнáго отвéргшеся,/ любóвiю к Тебé крéпко привязáшася,/ и, венчáвшеся ны́не/ рукóю Твоéю,// предзащищáют дýши нáша.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 8: Безневéстная Дéво,/ Я́же Бóга неизречéнно зачéнши плóтiю,/ Мáти Бóга Вы́шняго,/ Твои́х рабóв мольбы́ прiими́, Всенепорóчная,/ всем подаю́щи очищéнiе прегрешéнiй:/ ны́не нáша молéнiя прiéмлющи,// моли́ спасти́ся всем нам.
Гóсподи, поми́луй. (40 раз)
Слáва Отцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стихúры воскрéсные, глас 1): Стрáстiю Твоéю, Хрiстé,/ от страстéй свободи́хомся,/ и воскресéнiем Твои́м из истлéнiя избáвихомся,// Гóсподи, слáва Тебé.
Стих: Госпóдь воцарúся, в лéпоту облечéся.
Да рáдуется тварь, небесá да веселя́тся,/ рукáми да восплéщут язы́цы с весéлiем:/ Хрiстóс бо Спас наш, на Крестé пригвозди́ грехи́ нáша:/ и смерть умертви́в, живóт нам даровá,/ пáдшаго Адáма всерóднаго Воскреси́вый,// я́ко Человеколю́бец.
Стих: И҆́бо утвердú вселéнную, я́же не подвúжется.
Царь сый небесé и земли́ непостижи́ме,/ вóлею распя́лся еси́ за человеколю́бiе./ Егóже ад срет дóле, огорчи́ся,/ и прáведных дýши прiéмша, возрáдовашася:/ Адáм же, ви́дев Тя, Зижди́теля в преиспóдних, воскрéсе./ О чудесé! Кáко смéрти вкуси́ всех жизнь;/ но я́коже восхотé мiр просвети́ти зовýщiй и глагóлющiй:// Воскресы́й из мéртвых, Гóсподи, слáва Тебé.
Стих: Дóму Твоемý подобáет святы́ня, Гóсподи, в долготý дний.
Жены́ миронóсицы, ми́ра нося́ща,/ со тщáнiем и рыдáнiем грóба Твоегó достигóша,/ и не обрéтша Пречи́стаго Тéла Твоегó,/ от Áнгела же увéдевша нóвое и преслáвное чýдо,/ Апóстолом глагóлаху:/ воскрéсе Госпóдь,// подая́ мíрови вéлiю ми́лость.
Слáва Отцý и Сыну и Святóму Дýху.
Стихúра рýсских святы́х, глас 2: Нóвый дóме Евфрáфов,/ удéле избрáнный,/ Русь Святáя,/ храни́ вéру Правослáвную,// в нéйже тебé утверждéнiе.
И ны́не и прúсно и во вéки векóв, амúнь.
Богорóдичен воскрéсен, глас 2: О чудесé нóваго всех дрéвних чудéс!/ Кто бо познá мáтерь без мýжа рóждшую,/ и на рукý нося́щую, всю тварь Содержáщаго?/ Бóжiе есть изволéнiе Рóждшееся./ Егóже, я́ко Младéнца, Пречи́стая,/ Твои́ма рукáма носи́вшая,/ и Мáтернее дерзновéнiе к Немý имýщая,/ не престáй моля́щи о чтýщих Тя,// ущéдрити и спасти́ дýши нáша.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Слáва Отцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá еси душ нáших. (Дважды)
Тропáрь рýсских святы́х, глас 8: Я́коже плод крáсный Твоегó спаси́тельнаго сéянiя,/ земля́ Рýсская принóсит Ти, Гóсподи, вся святы́я, в той просiя́вшiя./ Тех моли́твами в ми́ре глубóце// Цéрковь и странý нáшу Богорóдицею соблюди́, Многоми́лостиве.
Бýди и́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша ѝ,/ и от всех скорбéй егó спасé ѝ./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.
И глаголи утреню