Неделя 2 по Пятидесятнице, всех святых в земле Русской просиявших. КАНОН (завершение) ЧАС ПЕРВЫЙ.
26 ию́ня 2022 гóда. Недéля 2 по Пятидеся́тнице, всех святы́х в землé Рýсской просiя́вших. Глас 1. Всeнóщное бдéнiе (завершéнiе) для домáшнего (келéйнаго) совершéнiя. Слýжба мирскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь (продолжéние ýтрени с канóном)
Слáва Отцý и Сы́ну и Святóму Дýху.
Тропáрь: Ликýй, Фиваи́до Рýсская,/ красýйтеся, пусты́ни и дéбри Олонéцкiя, Белоезéрскiя и Вологóдскiя,/ возрасти́вшiя святóе и слáвное отéц мнóжество,/ чýдным житiéм всех наставля́ющее ми́ру не прилепля́тися,// крест свой на рáмена взя́ти и во след Хрiстý шéствовати.
И ны́не и прúсно и во вéки векóв, амúнь.
Богорóдичен: Твоéю всечестнóю икóною Ти́хвинскою,/ ю́же вели́кая земля́ нáша я́ко нéкiй дар Божéственный свы́ше благоговéйно прiя́т,/ при́сно странý нáшу, о Госпожé Цари́це Богорóдице, покрывáй и заступáй,// спасáющи сiю́ от всех навéт врáжiих.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрiстé, воскресéнiе.
И҆́кос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, реки́й:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовеству́ют,/ и ад стенéт, и смерть рыдáет:/ мир же весели́тся, и вси с ним рáдуются.// Ты бо пóдал еси́, Хрiстé, всем Воскресéнiе.
ПЕСНЬ 7
Ирмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасé три Превозноси́мый,/ мир обнови́,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ ка́менiе же разсéдеся:/ на крестé бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Ты быв а́ки безпомо́щен,/ и уя́звен в мéртвых во́лею нас ра́ди/ превозноси́мый, вся свободи́л еси́,/ и держа́вною руко́ю совоскреси́л еси́,// хва́льный отцéв Бог, и препросла́влен.
Хор: Пресвятáя Богорóдице, спасú нас.
Богорóдичен: Ра́дуйся, исто́чниче присноживы́я воды́./ Ра́дуйся, раю́ пи́щный./ Ра́дуйся, стено́ ве́рных./ Ра́дуйся, Неискусобра́чная./ Ра́дуйся, всеми́рная Ра́досте,/ Е́юже нам возсия́// Хва́льный отце́в Бог, и препросла́влен.
Глас 1
Хор: Пресвятáя Богорóдице, спасú нас.
Чтец: Тя, Богорóдице, ле́ствицу Iа́ков прорóчески разумева́ет:/ Тобóю бо Превозноси́мый на земли́ яви́ся,/ и с челове́ки поживе́, я́ко благоволи́,// Хва́льный отце́в Бог и Препросла́влен.
Хор: Пресвятáя Богорóдице, спасú нас.
Чтец: Ра́дуйся, Чи́стая, из Тебе́ про́йде Па́стырь,/ И́же во Ада́мову ко́жу обо́лкся вои́стинну Превозноси́мый,/ во всего́ мя челове́ка, за благоутро́бие непости́жное:// Хва́льный отце́в Бог и Препросла́влен.
Глас 8
Хор: Вси святíи землú Рýсскiя, молúте Бóга о нас.
Чтец: Леóнтий, Иса́iя и Игна́тiй, Iа́ков и Феóдор,/ честни́и Ду́ха сосу́ди и Ростóву украше́нiе,/ Авраа́мiй, и́долом покланя́вшияся ко Хрiсту́ приведы́й,/ и Петр царе́вич, и Ирина́рх, самопроизвóльный страда́лец,/ Кассиа́н и Паи́сий, князь Рома́н и царе́вич Дими́трiй,// и вси Ростóвстiи и У́гличстiи чудотвóрцы Боже́ственными да воспою́тся пе́сньми.
Хор: Вси святíи землú Рýсскiя, молúте Бóга о нас.
Чтец: Да велича́ется Не́вскiй победи́тель, благове́рный князь Алекса́ндр,/ да пое́тся Гео́ргий, во́ин хра́брый и страда́лец,/ да похва́лится Андре́й, пе́рвый Ру́сския земли́ собира́тель,/ вку́пе со Гле́бом, ю́ным сы́ном свои́м,/ да воспое́тся же и Авраа́мiй му́ченик,/ гра́да Влади́мира сла́ва, Святы́я Руси́ засту́пницы// и Це́ркве Правосла́вныя украше́нiе.
Хор: Вси святíи землú Рýсскiя, молúте Бóга о нас.
Чтец: Феóдору и Iоа́нну сла́ва, Су́ждальским свети́льником,/ Си́мону и Диони́сiю!/ С ни́ми да пою́тся и Евфи́мiй, в по́двизех превысо́кiй,/ и Евфроси́нiя преподо́бная, пресве́тлая Су́ждальская звезда́,// вку́пе же и Косма́, на Я́хроме реце́ подвиза́выйся.
Хор: Вси святíи землú Рýсскiя, молúте Бóга о нас.
Чтец: Песнь сто́лпнику Ники́те, покая́нiя о́браз яви́вшему,/ хвала́ и Дании́лу, ни́щих и безро́дных согрева́телю,/ сла́ва и Андре́ю, княже́ние оста́вившему и в ни́щетнем о́бразе житие́ сконча́вшему,// Переясла́вским чудотво́рцем.
Хор: Вси святíи землú Рýсскiя, молúте Бóга о нас.
Чтец: Константи́не кня́же, апо́столе и просвети́телю Му́ромския земли́,/ с Михаи́лом и Фео́дором, ча́ды твои́ми,/ и Пе́тре и Февро́ние, и пра́ведная Иулиани́е ми́лостивая, Му́рома засту́пницы,/ вку́пе же и Васи́лие святи́телю и кня́же Рома́не, Ряза́ни сла́во,// о нас Христа́ моли́те.
Хор: Вси святíи землú Рýсскiя, молúте Бóга о нас.
Чтец: Тверска́я похвало́, Арсе́нiе святи́телю,/ Михаи́ле, кня́же и му́чениче,/ и Áнно, гра́да Ка́шина сокро́вище,/ Ни́ле и Мака́рiе преподо́бнiи,/ Ефре́ме, гра́да Торжка́ просвети́телю,/ со Арка́дiем и Иулиани́ею, цве́том целому́дрiя,// о нас Хрiста́ моли́те.
Слáва Отцý и Сы́ну и Святóму Дýху.
Тропáрь: Ору́жием ва́ших моли́тв, благове́рнии кня́зие Фео́доре и Дави́де с Константи́ном/ и Васи́лие и Константи́не, Яросла́вля сла́во,/ охраня́йте и ны́не оте́чество ва́ше// и люде́й правосла́вных от вся́ких бед и напа́стей.
И ны́не и прúсно и во вéки векóв, амúнь.
Богорóдичен: Я́ко благода́тное сокро́вище дарова́ла еси́ Святе́й Руси́ ико́ну Твою́ Влади́мирскую,/ е́юже отце́м на́шим многоча́стне и многообра́зне благоде́яла еси́./ Не оскуде́й и ны́не, о Ма́ти Бо́жiя,// утоля́ющи лю́тое на нас воста́ние, и зе́млю Рýсскую спаси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Ирмóс: В пещи́ óтроцы Iзрáилевы,/ я́коже в горни́ле,/ добрóтою благочéстiя чистéе злáта блещáхуся, глагóлюще:/ благослови́те, вся делá Госпóдня, Гóспода,// пóйте и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: И́же во́лею вся творя́й, и претворя́яй,/ обраща́яй сень смéртную в вéчную жизнь,/ стра́стiю Твоéю, Сло́ве Бо́жiй,/ Тебé непреста́нно вся дела́ Госпо́дня,// Го́спода пои́м, и превозно́сим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л еси́ сокрушéнiе, Хрiстé, и окая́нство,/ во вратéх и тверды́нях а́довых,/ воскрéс из гро́ба триднéвен./ Тебé непреста́нно вся дела́, я́ко Го́спода, пою́т,// и превозно́сят во вся вéки.
Хор: Пресвятáя Богорóдице, спасú нас.
Богорóдичен: Я́же без сéмене и преестéственне от облиста́нiя Божéственнаго/ Ро́ждшую би́сера многоцéннаго Хрiста́, воспои́м глаго́люще:/ благослови́те вся дела́ Госпо́дня, Го́спода,// по́йте и превозноси́те Его́ во вся вéки.
Глас 1
Хор: Пресвятáя Богорóдице, спасú нас.
Чтец: Черто́г светови́дный, из него́же всех Влады́ка,/ я́ко Жени́х произы́де Христо́с,/ воспои́м вси вопию́ще:/ вся дела́ Госпо́дня, Го́спода по́йте,// и превозноси́те во вся ве́ки.
Хор: Пресвятáя Богорóдице, спасú нас.
Чтец: Ра́дуйся, Престо́ле сла́вный Бо́жий,/ ра́дуйся, ве́рных стено́,/ Е́юже су́щим во тьме возсия́ свет Христо́с,/ Тебе́ блажа́щим, и вопию́щим:/ вся дела́ Госпо́дня, Го́спода по́йте,// и превозноси́те во вся ве́ки.
Глас 8
Хор: Вси святíи землú Рýсскiя, молúте Бóга о нас.
Чтец: Красу́йся, гра́де Каза́нь, име́я моли́твенники своя́,/ преподо́бных святи́телей Гу́рия, Варсоно́фия и Ге́рмана, отгна́вших от тебе́ тьму неве́рия,/ и Иоа́нна му́ченика, и Стефа́на, и Петра́,// оте́ческое нече́стие оста́вивших и му́ченически в Небе́сное оте́чество преше́дших.
Хор: Вси святíи землú Рýсскiя, молúте Бóга о нас.
Чтец: Свяще́ннаго Писа́ния от ю́ности научи́вся, богоно́се Стефа́не,/ ра́лом слове́с твои́х олядене́вшая зыря́нских люде́й сердца́ возде́лал еси́/ и Боже́ственное се́мя в них все́ял еси́./ Ны́не же вку́пе со святы́ми продолжа́тели де́ла твоего́/ Гера́симом, Питири́мом и Ио́ною// па́ству ва́шу и всю Ру́сскую зе́млю моли́твами ва́шими огражда́йте.
Хор: Вси святíи землú Рýсскiя, молúте Бóга о нас.
Чтец: Весели́ся, Сиби́рская страно́,/ в тебе́ бо Госпо́дь яви́ уго́дники Своя́:/ пра́веднаго Симео́на Верхоту́рскаго, и Ирку́тския святи́тели Инноке́нтия и Софро́ния, и Иоа́нна Тобо́льскаго,// но́выя ди́вныя свети́льники и чудотво́рцы.
Хор: Вси святíи землú Рýсскiя, молúте Бóга о нас.
Чтец: Ра́дуйся, Иве́рие и вся земле́ Грузи́нская, торжеству́й, Арме́ние,/ воспева́ющи равноапо́стольную Ни́ну и Тама́ру, Григо́рия Просвети́теля/ и ины́х мно́гих, в страна́х Кавка́зских ве́ру правосла́вную испове́давших// и ны́не о земне́м оте́честве Хрiсту́ моля́щихся.
Хор: Вси святíи землú Рýсскiя, молúте Бóга о нас.
Чтец: Иера́рше Богому́дре Дими́трiе,/ жити́й святы́х списа́телю и подража́телю о́ным ре́вностный,// сла́вы о́ных моли́твами твои́ми соде́лай нас о́бщники.
Хор: Вси святíи землú Рýсскiя, молúте Бóга о нас.
Чтец: Святи́телю о́тче Митрофа́не, пе́рвый Воро́нежу па́стырю,/ му́жество ве́лие яви́вый, преще́ния царе́ва и сме́рти не убоя́выйся// и в простоте́ ду́шу свою́ спасы́й, моли́ Бо́га о нас.
Благословúм Отцá, и Сы́на, и Святáго Дýха, Гóспода.
Тропáрь: Я́ко пчела́, мед сла́дкий от цвето́в скороувяда́ющих собра́л еси́, о́тче Ти́хоне,/ от тле́ннаго ми́ра духо́вное сокро́вище,// и́мже всех нас услажда́еши.
И ны́не и прúсно и во вéки векóв, амúнь.
Богорóдичен: Засту́пницу усе́рдную восхва́лим и честно́му Ея́ поклони́мся о́бразу,/ и́мже в новопросвеще́нней стране́ правове́рие утверди́/ и в годи́ну лю́тую ма́терь ру́сских градо́в спасе́./ Сей и гра́да свята́го Петра́ вели́кое сокро́вище,// и всея́ земли́ на́шея пресла́вное бога́тство.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Ѻ́троки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Ирмóс: Ѻ́браз чи́стаго рождествá Твоегó,/ огнепали́мая купинá/ показá неопáльная;/ и ны́не на нас/ напáстей свирéпеющую угаси́ти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лука́вая совещáвше,/ гóрдаго и нечести́ваго оправди́ша:/ Прáведнаго же на дре́ве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спа́се А́гнче Непорóчне,/ И́же ми́ра грехи́ взе́мый,/ Тебе́ сла́вим воскре́сшаго тридне́вно,/ со Отце́м и Боже́ственным Твои́м Дýхом,/ и Гóспода сла́вы:// Егóже богослóвяще, велича́ем.
Хор: Пресвятáя Богорóдице, спасú нас.
Богорóдичен: Спаси́ лю́ди Твоя́, Гóсподи,/ и́хже стяжа́л еси́ честнóю Твое́ю крóвiю,/ це́рквам Твои́м подая́ мир, Человеколю́бче,// Богорóдицы моли́твами.
Глас 1
Хор: Пресвятáя Богорóдице, спасú нас.
Чтец: Из ко́рене Дави́дова прозябла́ еси́ прорóческаго, Де́во, и богооте́ческаго:/ но и Дави́да я́ко вои́стинну Ты просла́вила еси́,/ я́ко рóждши прорóчествованнаго Гóспода сла́вы:// Егóже достóйно велича́ем.
Хор: Пресвятáя Богорóдице, спасú нас.
Чтец: Всяк похва́льный, Пречи́стая, зако́н/ побежда́ется вели́чеством сла́вы Твоея́./ Но о, Влады́чице, от раб Твои́х недосто́йных,/ от любве́ Тебе́ приноси́мое приими́, Богоро́дице,// со усе́рдием пе́ние похва́льное.
Глас 8
Хор: Вси святíи землú Рýсскiя, молúте Бóга о нас.
Чтец: О благи́й просвети́телю и ти́хий а́нгеле Це́ркве Тамбо́вския, святи́телю Питири́ме,/ весели́ся о па́стве твое́й и всея́ Руси́,// в ней бо но́вая и ве́чная ра́дость процвете́, преподо́бный Серафи́м, ди́вный тру́дник спасе́ния на́шего.
Хор: Вси святíи землú Рýсскiя, молúте Бóга о нас.
Чтец: О святи́телие Богому́дрии Феодо́сие и Иоаса́фе, ди́вным нетле́нием от Го́спода просла́вленнии!/ Ва́ми возвели́чени есмы́ и мы, ча́да су́ще Це́ркве Правосла́вныя,/ в не́йже и доны́не Госпо́дь чу́дная явля́ет// и рабо́в Свои́х прославля́ет.
Хор: Вси святíи землú Рýсскiя, молúте Бóга о нас.
Чтец: О но́вый чудотво́рче, Ио́сифе, святи́телю и му́чениче!/ Град А́страхань и вся Пово́лжская страна́ тобо́ю хва́лится/ и почита́ет тя, за пра́вду от неве́рных мяте́жников лю́те пострада́вша.
Хор: Вси святíи землú Рýсскiя, молúте Бóга о нас.
Чтец: О, па́че сло́ва и превы́ше похва́л святы́х страстоте́рпцев по́двига! / Зло́бу у́бо лю́тых отсту́пников и на́глое иуде́йское неи́стовство претерпе́ша, / ве́ру Христо́ву проти́ву уче́ний ми́ра сего́, я́ко щит, держа́ще // и нам о́браз терпе́ния и злострада́ний досто́йно явля́юще.
Хор: Вси святíи землú Рýсскiя, молúте Бóга о нас.
Чтец: О, тве́рдости и му́жества по́лка му́ченик Христо́вых, / от хи́нов лю́тых за Христа́ убие́нных! / Ти́и бо Це́рковь Правосла́вную украси́ша / и в стране́ свое́й кро́ви своя́, я́ко се́мя ве́ры, да́ша, // и ку́пно со все́ми святы́ми досто́йно да почту́тся.
Хор: Вси святíи землú Рýсскiя, молúте Бóга о нас.
Чтец: О вели́цыи сро́дницы на́ши, имено́ваннии и безыме́ннии, явле́ннии и неявле́ннии,/ Небе́снаго Сио́на дости́гшии и сла́ву мно́гу от Бо́га прии́мшии,/ утеше́ние нам, в ско́рби су́щим, испроси́те,/ ве́ру на́шу па́дшую возста́вите и лю́ди расточе́нныя собери́те,// от нас, я́ко дар, песнь благодаре́ния прие́млюще.
Слáва Отцý и Сы́ну и Святóму Дýху.
Тропáрь: О Тро́ице Честна́я,/ приими́, я́же земля наша прино́сит Ти,/ я́ко нача́тки и я́ко фимиа́м избра́нный,/ вся угоди́вшия и пре́жде, и по́слежде в ней,/ зна́емыя и незна́емыя,// и моли́твами их от вся́каго вре́да сию́ сохраня́й.
И ны́не и прúсно и во вéки векóв, амúнь.
Богорóдичен: О Де́во Благода́тная,/ гра́ды и ве́си на́ша честна́го ли́ка Твоего́ изображе́нии,/ я́ко благоволе́ния зна́мении, обогати́вшая,/ благодаре́ние на́ше прiими́ и от бед лю́тых оте́чество на́ше изба́ви,// вси бо Тя, я́ко Покро́в всемо́щный страны́ на́шея, велича́ем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный вторóй: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речé: се Хрiстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречé другóм.
Слáва Отцу и Сыну и Святóму Духу.
Светúлен рýсских святы́х: В пéснех восхва́лим свети́ла незаходи́мая земли́ нашея,/ таи́нники Боже́ственнаго Сло́ва,/ Хрiста́ сла́вяще, сих просвети́вшаго и возлюби́вшаго// и помо́щники нам да́вшаго в ско́рби.
И ныне и присно и во вéки векóв. Аминь.
Богорóдичен воскрéсный: Áнгел ýбо принесé Дéве, éже рáдуйся,/ прéжде Твоегó зачáтiя, Хрiстé,/ Áнгел же кáмень отвали́ грóба Твоегó,/ вмéсто печáли ов ýбо рáдости неизречéнныя знáменiя,/ ов же в смéрти мéсто подáтеля Тя жи́зни проповéдуя и величáя,// и глагóля воскресéнiе женáм, и таи́нником.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и́мя Госпóдне, я́ко вознесéся и́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сынове Сióни возрáдуются о Царé своéм. Да восхвáлят и́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обоюду остри́ в рукáх их: сотвори́ти отмщéнiе во языцех, обличéнiя в людех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стихúры воскрéсные, глас 1: Поéм Твою́, Хрiстé, спаси́тельную страсть,// и слáвим Твоé Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стихúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стихúра: Áда плени́вый, и человéка воскреси́вый,/ Воскресéнiем Твои́м, Хрiстé,/ сподóби нас чи́стым сéрдцем// Тебé пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Боголéпное Твоé снисхождéнiе слáвяще,/ поéм Тя, Хрiстé./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стихúры рýсских святы́х, глас 5: Рáдуйся, Цéрковь Рýсская вéрная,/ рáдуйся, кня́же благовéрный Влади́мире преслáвный,/ рáдуйся, Ѻ́льго избрáнная!/ Вы бо естé ко Влады́це всех/ пéрвейшiи нáши ходáтаи,/ и начáльницы правослáвiя,/ и настáвницы ко и́стинней вéре./ Рáдуйся, вся́ко мéсто, и странá, и град,/ грáжданы воспитáвшiи Небéснаго Цáрствiя,/ сíи святáя свети́ла душáм нáшим яви́шася,/ сíи чудéс зарéю, и дéлы, и знáменiи просiя́ша мы́сленно во вся концы́/ и ны́не Хрiстý мóлятся// подáти душáм нáшим вéлiю ми́лость.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стихúра: Рáдуйтеся, земли́ Рýсскiя украшéнiе,/ Цéркве нáшея непоколеби́мое утверждéнiе,/ слáво правослáвных,/ чудéс истóчницы,/ любвé струи́ неистощи́мыя,/ свети́льницы многосвéтлiи,/ Дýха Святáго оргáни,/ крóтцыи и незлóбивiи,/ добродéтельми укрáшеннiи,/ человéцы небéснiи,/ земнíи áнгели,/ Хрiстá дрýзи и́скреннiи!/ Тогó прилéжно моли́те// подáти вас чтýщим вéлiю ми́лость.
Бог нам прибéжище и сúла,/ Помóщник в скóрбех, обрéтших ны зелó.
Стихúра: Прiиди́те, Небéснiи предстáтелiе нáши, к нам,/ вáшего трéбующим ми́лостивнаго посещéнiя,/ и избáвите озлóбленныя мучи́тельскими прещéнiи/ лю́таго неи́стовства невéрных,/ от ни́хже, я́ко плéнницы и нáзи, гони́мы есмы́,/ от мéста на мéсто чáсто преходя́ще/ и заблуждáюще в вертéпех и горáх./ Ущéдрите ýбо, прехвáльнiи,/ и дáруйте нам ослáбу,/ утоли́те бýрю/ и угаси́те éже на ны негодовáнiе,/ Бóга моля́ще,// подаю́щаго вáми земли́ нáшей вéлiю ми́лость.
Госпóдь сил с нáми,/ Застýпник наш, Бог Iáковль.
Глас 4: Глас евáнгельскiй услы́шавше/ и апóстольскою рéвностiю распали́вшеся,/ в научéнiе невéрных язы́ков устреми́стеся,/ богоблажéннiи равноапóстольнiи/ Кýкше, Леóнтiе, Стефáне и Гýрiе,/ Гéрмане Аля́скинскiй, и святи́телю óтче Никóлае Япóнскiй,/ и досточýдный Иннокéнтiе,/ вели́кiя Сиби́рскiя страны́ апóстоле/ и просвещéнiя за мóрем сýщих нóвых стран во Амéрице первоначáльниче./ Тéмже со всéми прóчими,/ во благовéстiи Хрiстóве потруди́вшимися,// достóйно ублажáетеся.
Слáва Отцý и Сыну и Святóму Дýху.
Стихúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галилéю тещи́,/ и ви́дети Егó воскрéсша из мéртвых,// я́ко Жизнодáвца и Гóспода.
И ныне и прúсно и во вéки векóв, амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Отцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе ми́ру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи поми́луй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшний, и́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 1: Кáмени запечáтану от iудéй/ и вóином стрегýщим Пречи́стое Тéло Твоé,/ воскрéсл еси триднéвный, Спáсе,/ дáруяй мíрови жизнь./ Сегó рáди си́лы небéсныя вопiя́ху Ти, Жизнодáвче:/ слáва Воскресéнiю Твоемý, Хрiстé,/ слáва Цáрствiю Твоемý,// слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь рýсских святы́х, глас 8: Я́коже плод крáсный Твоегó спаси́тельнаго сéянiя,/ земля́ Рýсская принóсит Ти, Гóсподи, вся святы́я, в той просiя́вшiя./ Тех моли́твами в ми́ре глубóце// Цéрковь и странý нáшу Богорóдицею соблюди́, Многоми́лостиве.
И ныне и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, прости́ беззакóнiя нáша, Святы́й, посетѝ и исцелѝ нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Христé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрiстé, воскресéнiе.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланию зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
Хрiстóс, и́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу