Неделя четвертая Великаго поста, прп. Иоанна лествичника. ВСЕНОЩНОЕ БДЕНИЕ. Глас 8. ВЕЛИКАЯ ВЕЧЕРНЯ
3 апрéля 2022 гóда. Недéля четвéртая Велúкaго постá. Прп. Иоáнна Лéствичника. Глас 8. Воскрéсная прáздничная слýжба для домáшнего (келéйного) совершéния. Всенóщное бдéние состоúт из Велúкой вечéрни, ýтрени, тáже канóна и пéрвого чáса. Слýжба мирскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Иисýсе Христé, Бóже наш, поми́луй нас, ами́нь.
Слáва Тебе, Бóже наш, слáва Тебé.
Царю Небéсный, Утéшителю, Дýше Истины, Иже вездé сый и вся исполня́яй, Сокрóвище благих и жизни Подáтелю, прииди́ и всели́ся в ны, и очи́сти ны от вся́кия сквéрны, и спаси, Блáже, Дýши нáша.
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ныне и присно и во вéки векóв, ами́нь.
Óтче наш, Иже еси́ на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Ами́нь.
Гóсподи, поми́луй, (12 раз.)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 103, предначинáтельный
Стихú избрáннии: Благослови́, душé моя́, Гóспода./ Благословéн еси́, Гóсподи./ Гóсподи, Бóже мой, возвели́чился еси́ зелó./ Благословéн еси́, Гóсподи./ Во исповéдание и в велелéпоту/ облéклся еси́. Благословéн еси́, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростию сотвори́л еси́./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился еси зелó. Во исповéдание и в велелéпоту облéклся еси. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя, полагáяй óблаки на восхождéние Своé, ходя́й на крилý вéтреню. Творя́й Áнгелы Своя дýхи и слуги́ Своя плáмень óгненный. Основáяй зéмлю на твéрди ея, не преклони́тся в век вéка. Бéздна, яко ри́за, одея́ние ея́, на горáх стáнут вóды, от запрещéния Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл еси им. Предéл положи́л еси, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáмения дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, извести́ хлеб от земли́. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстии, и́хже еси насади́л. Тáмо пти́цы вогнездя́тся, ероди́ево жили́ще предводи́тельствует и́ми. Гóры высóкия елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л еси тму, и бысть нощь, в нéйже прóйдут вси звéрие дубрáвнии. Ски́мни рыкáющии, восхи́тити и взыскáти от Бóга пи́щу себé. Возсия́ сóлнце и собрáшася и в лóжах свои́х ля́гут. Изы́дет человéк на дéло своé и на дéлание своé до вéчера. Яко возвели́чишася делá Твоя, Гóсподи, вся премýдростию сотвори́л еси, испóлнися земля́ твáри Твоея́. Сиé мóре вели́кое и прострáнное, тáмо гáди, и́мже несть числá, живóтная мáлая с вели́кими, тáмо корабли́ преплáвают, змий сей, eгóже создáл еси ругáтися eму. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé земли́. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от земли́, и беззакóнницы, я́коже не бы́ти им. Благослови́, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростию сотвори́л еси.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Пeрвая кафисма
Читаем либо кафúсму 1-ю (1-ю cтатию(«Блажен муж» - 1-й антифон.)
[Псалом 1]Блажéн муж, и́же не и́де на совéт нечести́вых и на пути́ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вии, не тáко, но яко прах, eгóже возметáет ветр от лицá земли́. Сегó рáди не воскрéснут нечести́вии на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дие поучи́шася тщéтным? Предстáша цáрие зéмстии, и кня́зи собрáшася вкýпе на Гóспода и на Христá Егó. Растóргнем ýзы их и отвéржем от нас и́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростию Своéю смятéт я́. Аз же постáвлен есмь Царь от Негó над Сиóном, горóю святóю Егó, возвещáяй повелéние Госпóдне. Госпóдь речé ко Мне: Сын Мой еси Ты, Аз днесь роди́х Тя. Проси́ от Менé, и дам Ти язы́ки достоя́ние Твоé, и одержáние Твоé концы́ земли́. Упасéши я́ жезлóм желéзным, яко сосýды скудéльничи сокруши́ши я́. И ны́не, цáрие, разумéйте, накажи́теся вси судя́щии земли́. Рабóтайте Гóсподеви со стрáхом и рáдуйтеся Ему с трéпетом. Приими́те наказáние, да не когдá прогнéвается Госпóдь и поги́бнете от пути́ прáведнаго, егдá возгори́тся вскóре я́рость Егó. Блажéни вси надéющиися Нань.
[Псалом 3]Гóсподи, что ся умнóжиша стужáющии ми? Мнóзи востаю́т на мя, мнóзи глагóлют души́ моéй: несть спасéния eмý в Бóзе eгó. Ты же, Гóсподи, Застýпник мой еси, слáва моя́ и вознося́й главý мою́. Глáсом моим ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскресни́, Гóсподи, спаси́ мя, Бóже мой, я́ко Ты порази́л еси́ вся враждýющыя ми всýе: зýбы грéшников сокруши́л еси́. Госпóдне есть спасéние, и на лю́дех Твои́х благословéние Твоé.
Лúбо поем стихú избрáннии
БЛАЖЕН МУЖ
Чтец (или хор): Блажéн муж, и́же не и́де на совéт нечести́вых.
Хор: Аллилýиа, аллилýиа, аллилýиа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýиа, аллилýиа, аллилýиа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýиа, аллилýиа, аллилýиа.
Чтец (или хор): Блажéни вси надéющиися Нань.
Хор: Аллилýиа, аллилýиа, аллилýиа.
Чтец (или хор): Воскресни, Гóсподи, спаси́ мя, Бóже мой.
Хор: Аллилýиа, аллилýиа, аллилýиа.
Чтец (или хор): Госпóдне есть спасéние, и на лю́дех Твои́х благословéние Твоé.
Хор: Аллилýиа, аллилýиа, аллилýиа.
Чтец: Слáва Отцý и Сы́ну и Святóму Дýху.
Хор: Аллилýиа, аллилýиа, аллилýиа.
Хор: И ны́не и присно и во вéки векóв, аминь.
Хор: Аллилýиа, аллилýиа, аллилýиа.
Аллилýиа, аллилýиа, аллилýиа, слáва Тебé Бóже. (трúжды)
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
ГОСПОДИ ВОЗЗВАХ, ГЛАС 8
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéния моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ние рукý моéю/ - жéртва вечéрняя./ Услы́ши мя, Гóсподи.
[в приходской практике пропускается до стихир](в приходской практике пропускается до стихир): Положи́, Гóсподи, хранéние устóм мои́м, и дверь ограждéния о устнáх мои́х. Не уклони́ сéрдце моé в словесá лукáвствия, непщевáти вины́ о гресéх, с человéки дéлающими беззакóние, и не сочтýся со избрáнными их. Накáжет мя прáведник ми́лостию и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéниих их. Пожéрты бы́ша при кáмени судии́ их: услы́шатся глагóли мои́, я́ко возмогóша. Я́ко тóлща земли́ просéдеся на земли́, расточи́шася кóсти их при áде. Я́ко к Тебé, Гóсподи, Гóсподи, óчи мои́: на Тя уповáх, не отыми́ дýшу мою́. Сохрани́ мя от сéти, ю́же состáвиша ми, и от соблáзн дéлающих беззакóние. Падýт во мрéжу свою́ грéшницы: еди́н есмь аз, дóндеже прейдý.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролию́ пред Ним молéние моé, печáль мою́ пред Ним возвещý. Внегдá исчезáти от менé дýху моемý: и Ты познáл еси́ стези́ моя́: на пути́ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты еси́ уповáние моé, часть моя́ еси́ на земли́ живы́х. Вонми́ молéнию моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою,// исповéдатися úмени Твоемý.
Стихиры воскрéсные, глас 8: Вечéрнюю песнь, и словéсную слýжбу,/ Тебé, Христé, принóсим,/ я́ко благоволи́л еси́// поми́ловати нас Воскресéнием.
Менé ждут прáведницы,// дóндеже воздáси мне.
Стихúра: Гóсподи, Гóсподи,/ не отвéржи нас от Твоегó лицá,// но благоволи́ поми́ловати нас Воскресéнием.
На 8. Стих: Из глубины воззвáх к Тебе, Гóсподи,// Гóсподи, услыши глас мой.
Стихúра: Рáдуйся, Сиóне Святы́й,/ мáти церквéй, Бóжие жили́ще,/ Ты бо прия́л еси́ пéрвый,// оставлéние грехóв, Воскресéнием.
Да бýдут ýши Твоú// внéмлюще глáсу молéния моегó.
Стихúра: Éже от Бóга Отцá Слóво,/ прéжде век Рóждшееся, в послéдняя же временá,/ Тóежде от Неискусобрáчныя воплóщшееся вóлею,/ распя́тие смéртное претерпé:/ и дрéвле умерщвлéннаго человéка спасé// Свои́м Воскресéнием.
На 6. Стих: Аще беззакóния нáзриши, Гóсподи, Гóсподи, кто постоúт? Яко у Тебé очищéние есть.
Стихúра: Éже из мéртвых Твоé Воскресéние славослóвим Христé,/ и́мже свободи́л еси́ Адáмский род от áдова мучи́тельства:/ и даровáл еси́ ми́рови я́ко Бог жизнь вéчную// и вéлию ми́лость.
Имене рáди Твоегó потерпéх Тя, Гóсподи, потерпé душá моя в слóво Твоé, уповá душá моя на Гóспода.
Стихúра: Слáва Тебé, Христé Спáсе,/ Сы́не Бóжий Единорóдный,/ пригвозди́выйся на Крестé,// и воскресы́й из грóба триднéвен.
На 4. Стих: От стрáжи ýтренния до нóщи, от стрáжи ýтренния, да уповáет Изрáиль на Гóспода.
Стихúра: Тебé слáвим, Гóсподи,/ вóлею нас рáди Крест претерпéвшаго,/ и Тебé покланя́емcя, Всеси́льне Спáсе,/ не отвéржи нас от Лицá Твоегó,/ но услы́ши и спаси́ ны// Воскресéнием Твои́м, Человеколю́бче.
Яко у Гóспода мúлость, и многое у Него избавлéние, и Той избáвит Изрáиля от всех беззакóний eго.
Стихúры Триóди, глас 8: Óтче Иоáнне преподóбне,/ вы́ну вои́стинну Бóжия в гортáни возношéния носи́л еси́/ поучáяся дéтельнейшим, Богодухновéнным словесéм всемýдре,/ и оттýду истекáемою благодáтию обогати́лся еси́, быв блажéн,// нечести́вых всех совéтования низвращáя.
На 2. Стих: Хвалúте Гóспода вси языцы, похвалúте Егó вси лю́дие.
Стихúра: Óтче Иоáнне преслáвне,/ слез истóчники дýшу очи́стив,/ и всенóщными стоя́нии Бóга уми́лостивив,/ воспери́лся еси́ к люблéнию Сегó блажéнне и красотé:/ ея́же достóйно ны́не наслаждáешися, непрестáнно рáдуяся,// со страдáльцы твои́ми богомýдре преподóбне.
Яко утвердúся мúлость Егó на нас, и úстина Госпóдня пребывáет во век.
Стихúра: Óтче Иоáнне преподóбне,/ воспери́в ум к Бóгу вéрою,/ мирскáго смешéния омерзи́л еси́ непостоя́нное:/ и крест твой восприи́м, Всеви́дцу послéдовал еси́:/ тéло необуздáнное, пóдвигами обучéния, пóмыслу порабóтив,// крéпостию Божéственнаго Дýха.
Слáва Отцу и Сыну и Святóму Духу.
Стихúра Триóди, глас 5: Преподóбне óтче,/ глáса Евáнгелия Госпóдня послýшав,/ мир остáвил еси́,/ богáтство и слáву нивочтóже вмени́в./ Отонýдуже всем возопи́л еси́:/ возлюби́те Бóга, и обря́щете благодáть вéчную./ Ничтóже предпочти́те пáче любвé Егó,/ да егдá прии́дет во слáве Своéй,/ обря́щете упокоéние со всéми святы́ми,/ и́хже моли́твами Христé сохрани́,// и спаси́ дýши нáша.
И ныне и прúсно и во вéки векóв, амúнь.
Догмáтик. Глас 8: Царь Небéсный за человеколю́бие на земли́ яви́ся,/ и с человéки поживé:/ от Дéвы бо Чи́стыя плоть приéмый,/ и из Нея́ прошéдый с восприя́тием./ Еди́н есть Сын, сугу́б естествóм,/ но не Ипостáсию./ Тéмже совершéнна Тогó Бóга/ и совершéнна Человéка вои́стину проповéдающе,/ исповéдуем Христá Бóга нáшего:/ Егóже моли́, Мáти Безневéстная,// поми́ловатися душáм нáшим.
СВЕТЕ ТИХИЙ
Хор: Свéте Ти́хий святы́я слáвы Безсмéртнаго Отцá Небéснаго, Святáго, Блажéннаго, Иисусе Христé! Пришéдше на зáпад сóлнца, ви́девше свет вечéрний, поéм Отцá, Сына и Святáго Дýха, Бóга. Достóин еси во вся временá пет бы́ти глáсы преподóбными, Сы́не Бóжий, живóт дая́й; тéмже мир Тя слáвит.
ПРОКИМЕН ВОСКРЕСНЫЙ
Чтец: Проки́мен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся.
Чтец: Облечéся Госпóдь в си́лу и препоя́сася.
Хор: Госпóдь воцарúся,/ в лéпоту облечéся.
Чтец: Ибо утверди́ вселéнную, я́же не подви́жится.
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý дний.
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, помилуй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн еси́, Гóсподи Бóже отéц нáших,/ и хвáльно и прослáвлено и́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн еси́, Гóсподи, научи́ мя оправдáнием Твои́м./ Благословéн еси́, Влады́ко, вразуми́ мя оправдáнием Твои́м./ Благословéн еси́, Святы́й, просвети́ мя оправдáнии Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéние,/ Тебé слáва подобáет, Отцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, помилуй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Слáва Отцý и Сыну и Святóму Дýху, и ныне и прúсно и во вéки векóв, амúнь.
Богорóдичен воскрéсный, глас 8: Безневéстная Дéво,/ Я́же Бóга неизречéнно зачéнши плóтию,/ Мáти Бóга Вы́шняго,/ Твои́х рабóв мольбы́ приими́, Всенепорóчная,/ всем подаю́щи очищéние прегрешéний:/ ны́не нáша молéния приéмлющи,// моли́ спасти́ся всем нам.
Гóсподи, помилуй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СТИХИРЫ НА СТИХОВНЕ
Чтец (Стихúры воскрéсные, глас 8): Возшéл еси́ на Крест, Иисýсе,/ снизшéдый с Небесé,/ пришéл еси́ на смерть, Животé Безсмéртный,/ к сýщим во тьме Свет и́стинный,/ к пáдшым всех Воскресéние,// просвещéние, и Спáсе наш, слáва Тебé.
Стих: Госпóдь воцарúся, в лéпоту облечéся.
Христá славослóвим, воскрéсшаго от мéртвых:/ дýшу бо и тéло приéм,/ стрáсти отъобою́ду отсечé,/ пречи́стей ýбо души́ во ад сошéдшей,/ егóже и плени́:/ во грóбе же истлéния не ви́де святóе тéло,// Избáвителя душ нáших.
Стих: И́бо утвердú вселéнную, я́же не подвúжется.
Псалмы́ и пéсньми славослóвим, Христé,/ от мéртвых Твоé Воскресéние:/ и́мже нас свободи́л еси́ мучи́тельства áдова,/ и я́ко Бог даровáл еси́ жизнь вéчную,// и вéлию ми́лость.
Стих: Дóму Твоемý подобáет святы́ня, Гóсподи, в долготý дний.
О Влады́ко всех Непостижи́ме,/ Твóрче небесé и земли́,/ крестóм пострадáвый, мне безстрáстие источи́л еси́:/ погребéние же приéм, и воскрéс во слáве,/ совоскреси́л еси́ Адáма рукóю всеси́льною./ Слáва Твоемý триднéвному востáнию,/ и́мже даровáл еси́ нам вéчную жизнь,/ и очищéние грехóв,// я́ко Еди́н Благоутрóбен.
Слáва Отцý и Сыну и Святóму Дýху.
Стихúра Триóди, глас 2: На земли́ Áнгела,/ и на небесéх человéка Бóжия,/ ми́ра благоукрашéние,/ наслаждéние благи́х,/ добродéтелей пóстнических похвалý, Иоáнна почти́м:/ насаждéн бо в домý Бóжии, процветé прáведно,/ и я́ко кедр в пусты́ни умнóжи стадá Христóва словéсных овéц,// в преподóбии и прáвде.
И ны́не и прúсно и во вéки векóв, амúнь.
Богорóдичен воскрéсный, глас 2 (по гласу «Славы»): О чудесé нóваго всех дрéвних чудéс!/ Кто бо познá мáтерь без мýжа рóждшую,/ и на рукý нося́щую,/ всю тварь Содержáщаго?/ Бóжие есть изволéние, Рóждшееся./ Егóже я́ко Младéнца, Пречи́стая,/ Твои́ма рукáма носи́вшая,/ и Мáтерне дерзновéние к Немý имýщая,/ не престáй моля́щи о чтýщих Тя,// ущéдрити и спасти́ дýши нáша.
Молитва святаго Симеона Богоприимца
Ныне отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи мои спасéние Твоé,/ éже еси́ уготóвал пред лицéм всех людéй,/ свет во откровéние язы́ков,// и слáву людéй Твои́х Изрáиля.
Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, Иже еси́ на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя́, я́ко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Мари́е, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá еси душ нáших. (трúжды)
Бýди и́мя Госпóдне благословéно от ныне и до вéка. (3 раза)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щий воззвá, и Госпóдь услы́ша и,/ и от всех скорбéй егó спасé и./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святи́и Егó,/ яко несть лишéния боя́щымся Его./ Богáтии обнищáша и взалкáша,/ взыскáющии же Гóспода не лишáтся вся́каго блáга./[в приходской практитке пропускается]Прииди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержи́ язык твой от зла,/ и устнé твои́, éже не глагóлати льсти./ Уклони́ся от зла и сотвори́ блáго,/ взыщи́ ми́ра, и пожени́ и./ Очи Госпóдни на прáведныя,/ и ýши Егó в моли́тву их./ Лицé же Госпóдне на творя́щия злáя,/ еже потреби́ти от земли́ пáмять их./ Воззвáша прáведнии, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
И глаголи утреню