ТОРЖЕСТВО ПРАВОСЛАВИЯ. ВСЕНОЩНОЕ БДЕНИЕ. Глас 5. УТРЕНЯ. КАНОН (завершение) ЧАС ПЕРВЫЙ.
13 мáрта 2022 гóда. Недéля пéрвая Велúкaго постá. Торжествó Правослáвия. Глас 5. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Окончание всенощного бдения. Начало здесь ( великая вечерня), здесь ( утреня) здесь (продолжение утрени с каноном)
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Кондáк Триóди, глас 2: Неопи́санное Слóво Отчее,/ из Тебé, Богорóдице, описáся воплощáемь,/ и осквéрншийся óбраз в дрéвнее вообрази́в,/ Божéственною добрóтою смеси́,/ но исповéдающе спасéние,// дéлом и слóвом, сиé вообрáжаем.
И́кос: Сиé смотрéния тáинство,/ дрéвле прорóцы Богови́дно вдохновéни бы́вше,/ нас рáди в концы́ векóв дости́гших предвозвести́ша,/ получи́вше сегó сия́ния./ Рáзум ýбо Божéственный от негó взéмше,/ Еди́наго Гóспода Бóга знáем,/ в триéх Ипостáсех покланя́емаго,/ и Томý еди́ному служáще,/ еди́ну вéру, и еди́но крещéние имýще,/ во Христá облекóхомся,/ но исповéдающе спасéние, дéлом и слóвом,// сиé воображáем.
ПЕСНЬ 7
Ирмóс: Превозноси́мый отцéв Госпóдь/ плáмень угаси́, óтроки ороси́, соглáсно пою́щия:// Бóже, благословéн еси́.
Хор: Слáва, Гóсподи, Святóму Воскресéнию Твоемý.
Чтец: Плóтию облóжься я́коже на ýдице льщéния,/ Божéственною Твоéю си́лою зми́я низвлéкл еси́// возводя́ вопию́щия: Бóже, благословéн еси́.
Хор: Слáва, Гóсподи, Святóму Воскресéнию Твоемý.
Чтец: Земли́ непрохóдное осуществовáвый составлéние,/ во грóбе покрывáется плóтию Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спаси нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: И́же дрéвом крéстным и́дольскую прéлесть разреши́вый,// благословéн Бог отéц нáших.
Хор: Слáва, Гóсподи, Крестý Твоемý Честнóму и Воскресéнию.
Чтец: Воскресы́й из мéртвых, и сýщия во áде совоздви́гнувый,// благословéн Бог отéц нáших.
Глас 5
Хор: Пресвятáя Богорóдице, спасú нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебé Пресвятéй:// И́же Еди́н благословéн Бог отéц нáших.
Хор: Пресвятáя Богорóдице, спасú нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
Глас 4
Хор: Слáва Тебé, Бóже наш, слáва Тебé.
Чтец: Да сликовствýет церкóвней свéтлости/ любóвию Божéственною áнгельское вóинство,/ Богомýдренно воспевáющее:// благословéн еси́ в хрáме слáвы Твоея́, Гóсподи. (двáжды)
Хор: Слáва Тебé, Бóже наш, слáва Тебé.
Чтец: Цéрковь перворождéнных, и торжествó рáдуется,/ зря́ще ны́не божéственныя лю́ди, единому́дренно воспевáющия:// благословéн еси́ в хрáме слáвы Твоея́, Гóсподи. (двáжды)
Слáва Отцý и Сыну и Святóму Дýху.
Тропáрь: Избáвлени прéжде мрáчныя éреси,/ мáнием Феодóры достолéпныя цари́цы, воспевáем:// благословéн еси́ в хрáме слáвы Твоея́, Гóсподи.
И ныне и прúсно и во вéки векóв, амúнь.
Богорóдичен: Пáче вы́шних ликостоя́ний, вознеслáся еси́ Всечи́стая,/ еди́на бы́вши Мáти Вседéтеля./ Рáдующеся ýбо взывáем:// благословéнна Ты еси́ в женáх, всенепорóчная Влады́чице.
Катавáсия (глас 4): В пещи́ Авраáмстии óтроцы перси́дстей,/ любóвию благочéстия пáче,/ нéжели плáменем опаля́еми взывáху:// благословéн еси́ в хрáме слáвы Твоея́, Гóсподи.
ПЕСНЬ 8
Ирмóс: Тебé, Вседéтелю,/ в пещи́ óтроцы, всеми́рный лик сплéтше, поя́ху:/ делá вся́кая, Гóспода пóйте// и превозноси́те во вся вéки.
Хор: Слáва, Гóсподи, Святóму Воскресéнию Твоемý.
Чтец: Ты о вóльней спаси́тельныя стрáсти помоли́лся еси́ чáши, я́коже невóльней:// два хотéния, двемá бо по коемýждо нóсиши существóма, Христé, во вéки.
Хор: Слáва, Гóсподи, Святóму Воскресéнию Твоемý.
Чтец: Твои́м вседéтельным схождéнием ад, Христé, порýганный/ изблевá вся, я́же дрéвле лéстию умерщвлéнныя,// Тебé превознося́щия во вся вéки.
Хор: Пресвятáя Богорóдице, спаси нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: И́же на Крéсте вóлею длáни простéршаго,/ и ýзы смéртныя разруши́вшаго Христá Бóга,// свящéнницы пóйте, лю́дие превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнию.
Чтец: И́же я́ко Женихá из грóба возсия́вшаго Христá Бóга,/ и миронóсицам я́вльшагося, и рáдость тем провещáвша,// свящéнницы пóйте, лю́дие превозноси́те во вся вéки.
Глас 5
Хор: Пресвятáя Богорóдице, спасú нас.
Чтец: Престá ны́не я́же прáотчая печáль,/ рáдость приéмши Ти Богомáтерни./ Тéмже непрестáнно поéм Тя, Дéво,// и превознóсим во вся вéки.
Хор: Пресвятáя Богорóдице, спасú нас.
Чтец: Поéт с нáми безплóтных собóр, Дéво/ Рождествó Твоé непостижи́мое,/ еди́н лик состáвльше любóвию,// и превознося́ще Егó во вéки.
Глас 4
Хор: Слáва Тебé, Бóже наш, слáва Тебé.
Чтец: Закóны Цéркве отéческия сохраня́юще, óбразы пи́шем,/ и лобзáим усты́, и сéрдцем, и хотéнием/ Христóвы, и Егó святы́х, зовýще:// благослови́те вся делá Госпóдня Гóспода. (двáжды)
Хор: Слáва Тебé, Бóже наш, слáва Тебé.
Чтец: На первообрáзное я́ве óбраза,/ пóчесть и поклонéние вознося́ще,/ чтим, Богоглагóливых учéнием послéдующе,/ и Христý вéрою зовéм:// благослови́те вся делá Госпóдня Гóспода. (двáжды)
Благословúм Отцá, и Сы́на, и Святáго Дýха, Гóспода.
Тропáрь: Ум озари́вши просвещéнием Божéственнаго Дýха,/ честнáя цари́ца, плоды́ Богомýдренныя имýщи,/ благолéпие возлюби́ Цéркве Христóвы, и красотý,// благословя́щи кýпно с вéрными Иисýса Богочеловéка.
И ныне и прúсно и во вéки векóв, амúнь.
Богорóдичен: Лучáми свéта ýмнаго, освещáемый Божéственный дом Твой,/ осеня́ет ны́не всех óблаком Дýха,/ и освящáет вéрныя соглáсно пою́щия:// благослови́те вся делá Госпóдня Гóспода.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсия (глас 4): Рýце распростéр Дании́л,/ львов зия́ния в рóве затчé:/ óгненную же си́лу угаси́ша,/ добродéтелию препоя́савшеся,/ благочéстия рачи́тели óтроцы, взывáюще:// благослови́те вся делá Госпóдня Гóспода.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувúм/ и Слáвнейшую без сравнéния Серафúм,/ без истлéния Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéние рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чие Си́льный,/ и свя́то И́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слию сéрдца их.
Низложи́ си́льныя со престóл, и вознесé смирéнныя;/ áлчущия испóлни благ, и богатя́щияся отпусти́ тщи.
Восприя́т Изрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Ирмóс: Исáие, ликýй,/ Дéва имé во чрéве/ и роди́ Сы́на Емманýила,/ Бóга же и Человéка,/ Востóк и́мя Емý,/ Егó же величáюще,// Дéву ублажáем.
Хор: Слáва, Гóсподи, Святóму Воскресéнию Твоемý.
Чтец: Пáдшаго человéка восприя́л еси́, Влады́ко Христé, из ложéсн Деви́ческих/ всемý совокýплься, грехý же ни еди́ному причáщься:// всегó от истлéния Ты свободи́л еси́ пречи́стыми Твои́ми страстьми́.
Хор: Слáва, Гóсподи, Святóму Воскресéнию Твоемý.
Чтец: Боготóчною крóвию истощéнною, Влады́ко Христé,/ от Твои́х пречи́стых ребр и животворя́щих,/ жéртва ýбо престá и́дольская,// вся же земля́ Тебé хвалéния жéртву принóсит.
Хор: Пресвятáя Богорóдице, спаси нас.
Богорóдичен: Не Бóга безплóтна, ниже́ пáки человéка прóста/ произведé Чи́стая Отрокови́ца, и Несквéрная:/ но Человéка совершéнна, и нелóжно совершéнна Бóга.// Егóже величáем со Отцéм же и Дýхом.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: Тебé И́же на Крестé страсть подъéмшаго,/ и áдову си́лу смéртию сокруши́вшаго,// вéрнии правослáвно величáем.
Хор: Слáва, Гóсподи, Крестý Твоемý Честнóму и Воскресéнию.
Чтец: Тебé из грóба триднéвно воскрéсша,/ и ад плени́вшаго, и мир просвети́вшаго,// вéрнии единомýдренно величáем.
Глас 5
Хор: Пресвятáя Богорóдице, спасú нас.
Чтец: От чи́стых кровéй Твои́х/ усыри́ся плоть преестéственно/ всех Содéтелю, Единорóдному Сы́ну Роди́телеву,// не от мýжа, без сéмене же ýмна и одушевлéнна, Богорóдице Приснодéво.
Хор: Пресвятáя Богорóдице, спасú нас.
Чтец: Обходи́мое устáвила еси́ смéрти неудержи́мое стремлéние,/ рóждши плóтию вои́стинну пáче умá Жизнь вéчную:/ Éйже прилóжься усты́ гóрькими ад упраздни́ся,// Пресвятáя Мáти Дéво.
Глас 4
Хор: Слáва Тебé, Бóже наш, слáва Тебé.
Чтец: Священнописáньми образóв укрáшеную,/ зря́ще пáки честнýю Цéрковь,/ со благоговéнием вси притецéм и Бóгу возопии́м:// Тебé величáем, Трисвяты́й. (двáжды)
Хор: Слáва Тебé, Бóже наш, слáва Тебé.
Чтец: Честь и слáву стяжáвши Цéрковь,/ Крест Твой и честны́я икóны, и святы́х изображéния,// с весéлием, Влады́ко, и рáдостию величáет Тя. (двáжды)
Слáва Отцý и Сыну и Святóму Дýху.
Тропáрь: Освети́ Божéственною Твоéю слáвою лю́ди нáши Щéдрый,/ и ополчéньми áнгельскими, и всеорýжествы сия́ огради́,// язы́ков свирéпство покаря́я им, Влады́ко.
И ныне и прúсно и во вéки векóв, амúнь.
Богорóдичен: Взя́тся прамáтере Éвы осуждéние, Богорóдице,/ я́ко Ты всех Влады́ку несказáнно, Чи́стая, родилá еси́.// Егóже и ны́не подóбие на икóнах целýем.
Катавáсия (глас 4): Кáмень нерукосéчный/ от несекóмыя горы́ Тебé, Дéво,/ краеугóльный отсечéся,/ Христóс, совокупи́вый разстоя́щаяся естествá.// Тем веселя́щеся Тя, Богорóдице, величáем.
Гóсподи, помилуй. (3 раза)
Слáва Отцý и Сыну и Святóму Дýху, И ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрий воскрéсный пятый: Живóт и путь, Христóс востá из мéртвых,/ Клеóпе и Луцé спутешéствова,/ и́маже и познáся во Еммаýсе, преломля́я хлеб:/ ею́же дýши и сердцá горя́ща бя́ху,/ егдá тéма глагóлаше на пути́,/ и писáния скáзоваше, я́же претерпé./ С ни́маже, востá, зовéм,// яви́ся же и Петрóви.
Слáва Отцу и Сыну и Святóму Духу.
Светúлен Триóди: Взыгрáйте, восплещи́те, с весéлием воспóйте:/ коль чýдная и стрáнная Твоя́, Христé, вопию́ще, делá!/ И кто возмóжет изрещи́, Спáсе, могýтства Тебé,/ нáше единомы́слие и соглáсие// во еди́ну соедини́вшаго цéрковь?
И ныне и присно и во вéки векóв. Аминь.
Богорóдичен Триóди: Орýжия ны́не оскудéша враждéбныя éреси,/ и пáмять ея́ исчезé с шýмом:/ храм бо Твой, Всечи́стая, всеблаголéпно зря́ще,/ укрáшенный благодáтьми честны́х икóн,// рáдости исполня́емся вси.
ХВАЛИТНЫ
Хор, глас 5: Вся́кое дыхáние да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике ропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и́дет. Хвали́те Гóспода от земли́, зми́еве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрие и вси скóти, гáди и пти́цы пернáты. Цáрие зéмстии и вси лю́дие, кня́зи и вси судии́ зéмстии, ю́ноши и дéвы, стáрцы с ю́нотами да восхвáлят и́мя Госпóдне, я́ко вознесéся и́мя Тогó Еди́наго, исповéдание Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Изрáилевым, лю́дем, приближáющымся Емý.
[В приходской практике ропускается до стихир]Воспóйте Гóсподеви песнь нóву, хвалéние Егó в цéркви преподóбных. Да возвеселится Изрáиль о сотвóршем Егó, и сынове Сиóни возрáдуются о Царé своéм. Да восхвáлят имя Егó в лице, в тимпáне и псалтири да поют Емý. Яко благоволит Госпóдь в людех Своих, и вознесéт крóткия во спасéние. Восхвáлятся преподóбнии во слáве и возрáдуются на лóжах своих. Возношéния Бóжия в гортáни их, и мечи обоюду остри в рукáх их: сотворити отмщéние во языцех, обличéния в людех, связáти цари их пýты, и слáвныя их ручными окóвы желéзными,
На 8.Чтец, стих: Сотворúти в них суд напúсан:/ слáва сия бýдет всем преподóбным Егó.
Стихúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнии Твои́ Áнгели:/ не чýвствоваша, когдá воскрéсл еси́, стрегýщии Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлию ми́лость.
Хвалúте Бóга во святых Егó,/ хвалúте Егó в утвержéнии сúлы Егó.
Стихúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и́стиннаго триднéвнаго Твоегó погребéния:/ и предвари́л еси́ в Галилéи, в пещéре стрегóмый./ Вéлия Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествия Егó.
Стихúра: Гóсподи, жены́ текóша на гроб,/ ви́дети Тя, Христá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáния,/ я́же подъя́л еси́, Спáсе Долготерпели́вый:/ я́ко от сéмене Дави́дова я́звы претерпéл еси́,/ я́ко Сын же Бóжий, мир свободи́л еси́./ Вéлия Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стихúра: Гóсподи, Царю́ векóв и Твóрче всех,/ нас рáди распя́тие и погребéние плóтию прии́мый,/ да нас от áда свободи́ши всех:/ Ты еси́ Бог наш,// рáзве Тебé инóго не вéмы.
Хвалúте Егó в кимвáлех доброглáсных, хвалúте Егó в кимвáлех восклицáния. Всякое дыхáние да хвáлит Гóспода.
Стихúры Триóди, глас 4: В Тебé ны́не рáдуется Цéрковь, Человеколю́бче,/ Женисé и Создáтеле своéм,/ сию́ вóлею Боголéпною/ от и́дольския лéсти избáвльшем,/ и Себé обручи́вшем честнóю крóвию,/ свéтло приéмлющи свящéнное возставлéние икóн,// и рáдующися Тя поéт, и слáвит вéрно.
Исповéмся Тебé Гóсподи, всем сéрдцем моúм,/ повéм вся чудесá Твоя́.
Стихúра: Плóти изображéние Твоé возставля́юще, Гóсподи,/ любéзно лобызáем,/ вели́кое тáинство смотрéния Твоегó изъясня́юще:/ не мнéнием бо, я́коже глагóлют богобóрнии дéти Мáнентовы,/ нам яви́лся еси́, Человеколю́бче,/ но и́стиною и естествóм плóти,// Тобóю возводи́ми к Твоéй любви́, и желáнию.
Возвеселю́ся и возрáдуюся о Тебé,/ пою́ úмени Твоемý, Вы́шний.
Стихúра: День рáдостный, и весéлия испóлненный яви́ся днесь:/ свéтлость бо догмáт и́стиннейших блистáет,/ и сия́ет Цéрковь Христóва/ укрáшена возставлéньми икóн святы́х ны́не,/ и изображéний сия́ньми,// и единомы́слие бывáет вéрных Богопочтéнное.
Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.
Стихúра, глас 6: Моисéй во врéмя воздержáния/ закóн прия́т, и лю́ди привлечé;/ Илия́ пости́вся небесá заключи́;/ триé же óтроцы Авраáмстии,/ мучи́теля беззакóннующа пощéнием победи́ша./ И́мже и нас, Спáсе, сподóби/ Воскресéние улучи́ти, си́це вопию́щих:// Святы́й Бóже, Святы́й Крéпкий, Святы́й Безсмéртный, поми́луй нас.
Слáва Отцý и Сыну и Святóму Дýху.
Глас 6: Моисéй во врéмя воздержáния/ закóн прия́т, и лю́ди привлечé;/ Илия́ пости́вся небесá заключи́;/ триé же óтроцы Авраáмстии,/ мучи́теля беззакóннующа пощéнием победи́ша./ И́мже и нас, Спáсе, сподóби/ Воскресéние улучи́ти, си́це вопию́щих:// Святы́й Бóже, Святы́й Крéпкий, Святы́й Безсмéртный, поми́луй нас.
И ныне и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смéрть умертви́ся, и мы ожи́хом./ Тем воспевáюще вопиéм:/ благословéн Христóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на земли́ мир, в человéцех благоволéние. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кия рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Иисýсе Христé, и Святы́й Дýше. Гóсподи Бóже, Áгнче Бóжий, Сы́не Отéчь, взéмляй грех мира, помилуй нас. Взéмляй грехи мира, приими́ молитву нáшу. Седя́й одеснýю Отцá, помилуй нас. Яко Ты еси Един Свят; Ты еси Един Госпóдь, Иисýс Христóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн еси, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн еси́, Гóсподи, научи́ мя оправдáнием Твои́м.
Благословéн еси́, Влады́ко, вразуми́ мя оправдáнием Твои́м.
Благословéн еси́, Святы́й, просвети́ мя оправдáнии Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцели́ дýшу мою́, я́ко согреши́х Тебé. Гóсподи, к Тебé прибегóх, научи мя твори́ти вóлю Твою́, яко Ты еси Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкий, Святы́й Безсмéртный, помилуй нас. (3 раза)
Хор: Слáва Отцý и Сыну и Святóму Дýху, и ныне и присно и во вéки векóв, аминь.
Хор: Святы́й Безсмéртный, помилуй нас.
Хор: Святы́й Бóже,/ Святы́й Крéпкий,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéние ми́ру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртию смерть,// побéду дадé нам и вéлию ми́лость.
Гóсподи помилуй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи помилуй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утверди́, Бóже, святýю правослáвную вéру, правослáвных христиáн во век вéка.
Честнéйшую Херуви́м и слáвнейшую без сравнéния Серафи́м, без истлéния Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благослови́.
ОТПУСТ
Христóс, и́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцу и Сыну и Святóму Духу, и ныне и присно и во вéки векóв. Аминь.
Стихúра евáнгельская, глас 5: О премýдрых судéб Твои́х, Христé!/ Кáко Петрý ýбо плащани́цами еди́неми,/ дал еси́ разумéти Твоé воскресéние,/ Луцé же и Клеóпе спутешéствуя, бесéдовал еси́,/ и бесéдуяй не áбие себé явля́еши?/ Тéмже и поноси́мь бывáеши, я́ко еди́н пришéльствуяй во Иерусали́м,/ и не причащáяйся в конéц совéта их./ Но И́же вся к создáния пóльзе стрóя,/ и я́же о Тебé прорóчествия откры́л еси́,/ и внегдá благослови́ти хлеб, познáлся еси́ им,/ и́хже и прéжде тогó сердцá к познáнию Твоемý распалáстася,/ и́же и ученикóм сóбранным ужé/ я́сно проповéдаста Твоé воскресéние,// и́мже поми́луй нас.
ПЕРВЫЙ ЧАС
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 5
Глагóлы моя внуши, Гóсподи, разумéй звáние моé. Вонми глáсу молéния моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотяй беззакóния, Ты еси: не приселится к Тебé лукáвнуяй, нижé пребýдут беззакóнницы пред очима Твоима: возненавидел еси вся дéлающыя беззакóние. Погубиши вся глагóлющыя лжу: мýжа кровéй и льстива гнушáется Госпóдь. Аз же мнóжеством милости Твоея, вниду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их истины, сéрдце их сýетно, гроб отвéрст гортáнь их: язы́ки своими льщáху. Суди им, Бóже, да отпадýт от мы́слей своих, по мнóжеству нечéстия их изрини я, яко преогорчиша Тя, Гóсподи. И да возвеселятся вси уповáющии на Тя, во век возрáдуются, и вселишися в них, и похвáлятся о Тебé лю́бящии имя Твоé. Яко Ты благословиши прáведника, Гóсподи: яко орýжием благоволéния венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися земли и вселéнней, и от вéка и до вéка Ты еси. Не отврати человéка во смирéние, и рекл еси: обратитеся, сы́нове человéчестии. Яко ты́сяща лет пред очима Твоима, Гóсподи, яко день вчерáшний, иже мимоиде, и стрáжа нощнáя. Уничижéния их лéта бýдут. Утро яко травá мимоидет, ýтро процветéт и прéйдет: на вéчер отпадéт ожестéет и изсхнет. Яко исчéзохом гнéвом Твоим, и яростию Твоéю смутихомся. Положил еси беззакóния нáша пред Тобóю: век наш в просвещéние лицá Твоегó. Яко вси дние нáши оскудéша, и гнéвом Твоим исчезóхом, лéта нáша яко паучина поучáхуся. Дние лет нáших, в нихже сéдмьдесят лет, áще же в силах, óсмьдесят лет, и мнóжае их труд и болéзнь: яко прииде крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчести? Десницу Твою́ тáко скажи ми, и оковáнныя сéрдцем в мýдрости. Обратися, Гóсподи, докóле? И умолéн бýди на рабы́ Твоя. Испóлнихомся заýтра милости Твоея́, Гóсподи, и возрáдовахомся, и возвеселихомся, во вся дни нáша возвеселихомся, за дни в няже смирил ны еси, лéта в няже видехом злáя. И призри на рабы́ Твоя, и на делá Твоя, и настáви сыны их. И буди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Милость и суд воспою́ Тебé, Гóсподи. Пою́ и разумéю в пути непорóчне, когдá приидеши ко мне? Прехождáх в незлóбии сéрдца моегó посредé дóму моегó. Не предлагáх пред очима моима вещь законопрестýпную: творя́щыя преступлéние возненавидех. Не прильпé мне сéрдце строптиво, уклоня́ющагося от менé лукáваго не познáх. Оклеветáющаго тай искренняго своегó, сегó изгоня́х: гóрдым óком, и несы́тым сéрдцем, с сим не ядя́х. Óчи мои на вéрныя земли, посаждáти я́ со мнóю: ходя́й по пути непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очима моима. Во ýтрия избивáх вся грéшныя земли, еже потребити от грáда Госпóдня вся дéлающыя беззакóние.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéние нáше, воспои́м, вéрнии, и поклони́мся; я́ко благоволи́ Плóтию взы́ти на Крест, и смерть претерпéти, и воскреси́ти умéршия слáвным воскресéнием Свои́м.
Слáва Отцý и Сыну и Святóму Дýху.
Тропáрь торжествá Правослáвия, глас 2: Пречи́стому óбразу Твоемý покланя́емся, Благи́й, прося́ще прощéния прегрешéний нáших, Христé Бóже, вóлею бо благоволи́л еси плóтию взы́ти на Крест, да избáвиши, я́же создáл еси, от рабóты врáжия. Тем благодáрственно вопиéм Ти: рáдости испóлнил еси вся, Спáсе наш, пришéдый спасти́ мир.
И ныне и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, яко возсия́ла еси Сóлнце Прáвды. Рай, яко прозяблá еси цвет нетлéния. Дéву, яко пребылá еси нетлéнна. Чистую Мáтерь, яко имéла еси на святы́х Твоих объятиях Сына, всех Бóга. Тогó моли спастися душáм нáшим.
Стопы́ моя напрáви по словеси Твоему и да не обладáет мнóю вся́кое беззакóние. Избáви мя от клеветы́ человéческия, и сохраню́ зáповеди Твоя. Лицé Твоé просвети на рабá Твоегó и научи мя оправдáнием Твоим.
Да испóлнятся устá моя хвалéния Твоегó, Гóсподи, яко да воспою́ слáву Твою́, весь день великолéпие Твоé.
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДАК
Кондáк Триóди, глас 2: Неопи́санное Слóво Óтчее, из Тебé, Богорóдице, описáся воплощáемь, и осквéрншийся óбраз в дрéвнее вообрази́в, Божéственною добрóтою смеси́, но исповéдающе спасéние, дéлом и слóвом, сиé вообрáжаем.
Гóсподи, помилуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Христé, Свéте Истинный, просвещáяй и освящáяй всякаго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы нáша к дéланию зáповедей Твоих, молитвами Пречистыя Твоея́ Мáтере, и всех Твоих святых, аминь.
КОНДАК, ГЛАС 8
Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
Гóсподи, Иисýсе Христé, Сыне Бóжий, молитвами Пречи́стыя Твоея́ Мáтере, святы́х слáвных и всехвáльных Апóстол, святых и прáведных богоотéц Иоаки́ма и Анны, и всех святых, поми́луй и спаси́ нас, яко Благ и Человеколю́бец. Аминь.
С утрá чти часы и обéдницу