ТОРЖЕСТВО ПРАВОСЛАВИЯ. ВСЕНОЩНОЕ БДЕНИЕ. Глас 5. УТРЕНЯ (продолжение) ЕВАНГЕЛИЕ. КАНОН
13 мáрта 2022 гóда. Недéля пéрвая Велúкaго постá. Торжествó Правослáвия. Глас 5. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Начало зри здесь ( великая вечерня) и здесь ( утреня)
КАФИЗМА ТРЕТЬЯ
(3-я cтатия или 3-я слава)
[Псалом 21]Бóже, Бóже мой, вонми ми, вскýю остáвил мя еси? Далéче от спасéния моегó словесá грехопадéний моих. Бóже мой, воззову во дни, и не услышиши, и в нощи, и не в безýмие мне. Ты же во Святéм живéши, хвалó Изрáилева. На Тя уповáша отцы нáши, уповáша и избáвил еси я. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéние человéков и уничижéние людéй. Вси видящии мя поругáша ми ся, глагóлаша устнáми, покивáша главóю: уповá на Гóспода, да избáвит eгó, да спасéт eгó, яко хóщет eгó. Яко Ты еси истóргий мя из чрéва, уповáние моé от сосцý мáтере моея. К Тебé привéржен есмь от ложéсн, от чрéва мáтере моея Бог мой еси Ты. Да не отстýпиши от менé, яко скорбь близ, яко несть помогáяй ми. Обыдóша мя тельцы мнóзи, юнцы тýчнии одержáша мя. Отверзóша на мя устá своя, яко лев восхищáяй и рыкáяй. Яко водá излияхся, и разсыпашася вся кóсти моя, бысть сéрдце моé яко воск, тáяй посредé чрéва моегó. Изсше яко скудéль крéпость моя, и язык мой прильпé гортáни моему, и в персть смéрти свел мя еси. Яко обыдóша мя пси мнóзи, сонм лукáвых одержáша мя, ископáша рýце мои и нóзе мои. Исчетóша вся кóсти моя, тии же смотриша и презрéша мя. Разделиша ризы моя себé, и о одéжди моéй метáша жрéбий. Ты же, Гóсподи, не удали пóмощь Твою от менé, на заступлéние моé вонми. Избáви от оружия дýшу мою, и из руки пéсии единорóдную мою. Спаси мя от уст львóвых и от рог единорóжь смирéние моé. Повéм имя Твоé брáтии моéй, посредé цéркве воспою Тя. Боящиися Гóспода, восхвалите Егó, все сéмя Иáковле, прослáвите Егó, да убоится же от Негó все сéмя Изрáилево. Яко не уничижи, нижé негодовá молитвы нищаго, нижé отврати лицé Своé от менé, и егдá воззвáх к Немý, услыша мя. От Тебé похвалá моя, в цéркви велицей исповéмся Тебé, молитвы моя воздáм пред боящимися Егó. Ядят убóзии и насытятся, и восхвáлят Гóспода взыскáющии Егó, живá бýдут сердцá их в век вéка. Помянýтся и обратятся ко Гóсподу вси концы земли, и поклóнятся пред Ним вся отéчествия язы́к. Яко Госпóдне есть цáрствие, и Той обладáет языки. Ядóша и поклонишася вси тýчнии земли, пред Ним припадýт вси низходящии в зéмлю, и душá моя Томý живéт. И сéмя моé порабóтает Емý, возвестит Гóсподеви род грядýщий. И возвестят прáвду Егó людем рóждшымся, яже сотвори Госпóдь.
[Псалом 22]Госпóдь пасéт мя, и ничтóже мя лишит. На мéсте злáчне, тáмо всели мя, на водé покóйне воспитá мя. Дýшу мою обрати, настáви мя на стези прáвды, имене рáди Своегó. Аще бо и пойдý посредé сéни смéртныя, не убоюся зла, яко Ты со мнóю еси, жезл Твой и пáлица Твоя, та мя утéшиста. Уготóвал еси предо мнóю трапéзу сопротив стужáющым мне, умáстил еси елéом главý мою, и чáша Твоя упоявáющи мя, яко держáвна. И милость Твоя поженéт мя вся дни животá моегó, и éже вселити ми ся в дом Госпóдень, в долготý дний.
[Псалом 23]Госпóдня земля, и исполнéние ея, вселéнная и вси живýщии на ней. Той на морях основáл ю есть, и на рекáх уготóвал ю есть. Кто взы́дет на гóру Госпóдню? или кто стáнет на мéсте святéм Егó? Неповинен рукáма и чист сéрдцем, иже не прият всýе дýшу свою, и не клятся лéстию искреннему своемý. Сей приимет благословéние от Гóспода, и милостыню от Бóга, Спáса своегó. Сей род ищущих Гóспода, ищущих лицé Бóга Иáковля. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь крéпок и силен, Госпóдь силен в брáни. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Отцу и Сыну и Святóму Духу, и ныне и присно и во вéки векóв, аминь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (12 раз)
Хор (по кафисме седáльны воскрéсные, глас 5): Гóсподи, по триднéвнем Твоéм Воскресéнии, и апóстолов поклонéнии, Петр вопия́ше Ти:/ жены́ дерзновéние прия́ша, аз же убоя́хся./ Разбóйник богослóвяше, аз же отвергóхся./ У́бо призовéши ли мя прóчее ученикá бы́ти;/ или́ пáки покáжеши мя ловцá глуби́ннаго,// но кáющася приими́ мя, Бóже, и спаси́ мя.
Стих: Исповéмся Тебé Гóсподи всем сéрдцем моúм,/ повéм вся чудесá Твоя́.
Гóсподи, посредé осуждéнных пригвозди́ша Тя беззакóннии,/ и копиéм ребрó Твоé прободóша./ О Ми́лостиве!/ Погребéние же прия́л еси́,/ разруши́вый áдова вратá, и воскрéсл еси́ триднéвно./ Притекóша жены́ ви́дети Тя, и возвести́ша апóстолом востáние:// Превозноси́мый Спáсе, Егóже пою́т Áнгели, Благословéнный Гóсподи, слáва Тебé.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Богорóдичен: Неискусобрáчная Невéсто Богороди́тельнице,/ Я́же Éвину печáль радостотвори́вшая,/ воспевáем вéрнии и покланя́емся Тебé,/ я́ко возвелá еси́ нас от дрéвния кля́твы,/ и ны́не моли́ непрестáнно, Всепéтая, Пресвятáя,// во éже спасти́ся нам.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýиа (трúжды)
Благословéн Госпóдь от Сиóна, живы́й во Иерусали́ме.
Аллилýиа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýиа (трúжды)
Исповéдайтеся Бóгу Небéсному, я́ко в век ми́лость Егó.
Аллилýиа (трúжды)
ТРОПАРИ ВОСКРЕСНЫЕ, глас 5
Благословéн есú, Гóсподи,/ научú мя оправдáнием Твоúм.
Áнгельский собóр удиви́ся,/ зря́ Тебé в мéртвых вмени́вшася,/ смéртную же, Спáсе, крéпость разори́ша,/ и с Собóю Адáма воздви́гша,// и от áда вся свобóждша.
Благословéн есú, Гóсподи,/ научú мя оправдáнием Твоúм.
Почтó ми́ра с ми́лостивными слезáми,/ о учени́цы растворя́ете?/ Блистáяйся во грóбе Áнгел/ миронóсицам вещáше:/ ви́дите вы грóб и уразумéйте,// Спас бо воскрéсе от грóба.
Благословéн есú, Гóсподи,/ научú мя оправдáнием Твоúм.
Зелó рáно миронóсицы течáху/ ко грóбу Твоемý рыдáющия,/ но предстá к ним Áнгел, и речé:/ рыдáния врéмя престá, не плáчите,// воскресéние же апóстолом рцы́те.
Благословéн есú, Гóсподи,/ научú мя оправдáнием Твоúм.
Миронóсицы жены́, с ми́ры пришéдша/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми Живáго помышля́ете?// Я́ко Бог бо воскрéсе от грóба.
Чтец: Слáва Отцý и Сыну и Святóму Дýху.
Поклони́мся Отцý,/ и Егó Сы́нови, и Святóму Дýху,/ Святéй Трóице во еди́ном существé, с Серафи́мы зовýще:/ Свят, Свят, Свят еси́, Гóсподи.
И ныне и прúсно и во вéки векóв. Амúнь.
Жизнодáвца рóждши,/ грехá, Дéво, Адáма избáвила еси́,/ рáдость же Éве в печáли мéсто подалá еси́;/ пáдшия же от жи́зни/ к сей напрáви,// из Тебé воплоти́выйся Бог и Человéк.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (12 раз)
ИПАКОИ
Глас 5: Áнгельским зрáком ум смущáюща,/ и Божéственным востáнием душéю просвещáемы,/ мироно́сицы апóстолом благовествовáху:/ возвести́те во язы́цех Воскресéние,/ Гóсподу содéйствующу чудесы́,// подаю́щему нам вéлию ми́лость.
СТЕПЕННА, ГЛАС 5
1 АНТИФОН
Хор: Внегдá скорбéти мне,/ Дави́дски пою́ Тебé, Спáсе мой:// избáви дýшу мою́ от язы́ка льсти́ваго. (Двáжды)
Пусты́нным живóт блажéн есть,// Божéственным рачéнием воскриля́ющимся. (Двáжды)
Слáва Отцу и Сыну и Святóму Духу.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ныне и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душé, воздви́гнемся,// гряди́ тáмо, отню́дуже пóмощь и́дет. (Двáжды)
Деснáя Твоя́ рукá, и менé, Христé, касáющися,// от лéсти вся́кия да сохрани́т. (Двáжды)
Слáва Отцý и Сыну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéние, Свет, Ум:// Ты Благосты́ня, Ты цáрствуеши во вéки.
И ныне и присно и во вéки векóв. Аминь.
Святóму Дýху богослóвяще рцем:/ Ты еси́ Бог, Живóт, Рачéние, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ вни́дем Госпóдня:// рáдости мнóгия испóлнен быв, моли́твы возсылáю. (Двáжды)
В домý Дави́дове стрáшная совершáются:// огнь бо тáмо паля́ всяк срáмный ум. (Двáжды)
Слáва Отцý и Сыну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Отцé, кýпно же и Слóве.
И ныне и присно и во вéки векóв. Аминь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Отцé, кýпно же и Слóве.
ПРОКИМЕН
Чтец: Прокíмен, глас пятый. Воскресни́, Гóсподи Бóже мой, да вознесéтся рукá Твоя́, я́ко Ты цáрствуеши во вéки.
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебé, Гóсподи, всем сéрдцем мои́м, повéм вся чудесá Твоя́.
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскресни́, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помилуй.
Слáва Отцу и Сыну и Святóму Духу, и ныне и прúсно и во вéки векóв, амúнь.
Чтец: Всякое дыхáние да хвáлит Гóспода.
Хор: Всякое дыхáние да хвáлит Гóспода.
Чтец: Хвалите Бóга во святых Егó, хвалите Егó во утвержéнии силы Егó.
Хор: Всякое дыхáние да хвáлит Гóспода.
Чтец:Всякое дыхáние.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.113) Во врéмя óно Петр востáв течé ко грóбу, и прини́к ви́де ри́зы еди́ны лежáща: и оты́де, в себé дивя́ся бы́вшему. И се два от них бéста идýща в тóйже день в весь, отстоя́щу стáдий шестьдеся́т от Иерусали́ма, éйже и́мя Еммаýс: и та бесéдоваста к себé о всех сих приклю́чшихся. И бысть бесéдующема и́ма и совопрошáющемася, и Сам Иисýс прибли́жився идя́ше с ни́ма: óчи же ею́ держáстеся, да Егó не познáета. Речé же к ни́ма: что суть словесá сия́, о ни́хже стязáетася к себé идýща, и естá дря́хла? Отвещáв же еди́н, емýже и́мя Клеóпа, речé к Немý: Ты ли еди́н пришлéц еси́ во Иерусали́м, и не увéдел еси́ бы́вших в нем во дни сия́? И речé и́ма: ки́их? О́на же рéста емý: я́же о Иисýсе Назаряни́не, и́же бысть Муж Прорóк, си́лен дéлом и слóвом пред Бóгом и всéми людьми́: кáко предáша Егó архиерéи и кня́зи нáши на осуждéние смéрти, и распя́ша Егó: мы же надéяхомся, я́ко Сей есть хотя́ избáвити Изрáиля: но и над всéми си́ми, трéтий сей день есть днесь, отнéлиже сия́ бы́ша. Но и жены́ нéкия от нас ужаси́ша ны, бы́вшыя рáно у грóба: и не обрéтша телесé Егó, приидóша, глагóлюща, я́ко и явлéние Áнгел ви́деша, и́же глагóлют Егó жи́ва. И идóша нéции от нас ко грóбу, и обрéтоша тáко, я́коже и жены́ рéша: Самогó же не ви́деша. И Той речé к ни́ма: о несмы́сленная и кóсная сéрдцем, éже вéровати о всех, я́же глагóлаша прорóцы: не сия́ ли подобáше пострадáти Христý и вни́ти в слáву свою́? И начéн от Моисéа и от всех прорóк, сказáше и́ма от всех писáний я́же о Нем. И прибли́жишася в весь, в ню́же идя́ста: и Той творя́шеся далечáйше ити́. И нуждáста Егó, глагóлюща: обля́зи с нáма, я́ко к вéчеру есть, и приклони́лся есть день. И вни́де с ни́ма облещи́. И бысть я́ко возлежé с ни́ма, и прии́м хлеб благослови́, и преломи́в дая́ше и́ма. О́нема же отверзóстеся óчи, и познáста Егó: и Той неви́димь бысть и́ма. И рекóста к себé: не сéрдце ли нáю горя́ бе в нáю, егдá глагóлаше нáма на пути́ и егдá скáзоваше нáма писáния? И востáвша в той час, возврати́стася во Иерусали́м, и обретóста совокýпленны единагонáдесяте и и́же бя́ху с ни́ми, глагóлющих, я́ко вои́стинну востá Госпóдь и яви́ся Си́мону. И та повéдаста, я́же бы́ша на пути́, и я́ко познáся и́ма в преломлéнии хлéба.
Русский синодальный перевод
Хор: Слáва Тебé, Гóсподи, слáва Тебé.
Воскресéние Христóво ви́девше, поклони́мся Святóму Гóсподу Иисýсу, еди́ному безгрéшному, Крестý Твоемý покланя́емся, Христé, и святóе Воскресéние Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé именýем. Прииди́те вси вéрнии, поклони́мся Святóму Христóву Воскресéнию: се бо прии́де Крестóм рáдость всемý миру. Всегдá благословя́ще Гóспода, поéм Воскресéние Егó:/ распя́тие бо претерпéв, смéртию смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóние моé. Наипáче омы́й мя от беззакóния моегó, и от грехá моегó очи́сти мя. Яко беззакóние моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóниих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлие, возрáдуются кóсти смирéнныя. Отврати́ лицé Твоé от грех мои́х, и вся беззакóния моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вии к Тебé обратятся. Избáви мя от кровéй, Бóже, Бóже спасéния моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестят хвалý Твою. Яко áще бы восхотéл еси жéртвы, дал бых ýбо, всесожжéния не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы.
Слáва Отцу и Сыну и Святóму Духу.
глас 8: Покая́ния отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостию.
И ныне и прúсно и во вéки векóв, амúнь.
На спасéния стези́ настáви мя Богорóдице,/ стýдными бо окаля́х дýшу грехми́,/ и в лéности все житиé моé ижди́х:/ но Твои́ми моли́твами// избáви мя от вся́кия нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóние моé.
Стихúра прáздника, глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбия Твоегó,/ я́ко Дави́д вопию́ Ти:/ поми́луй мя Бóже// по вели́цей Твоéй ми́лости.
Гóсподи, помилуй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ВОСКРЕСНЫЙ, ГЛАС 5
(совмещéнный с каноном крестовоскрéсным (глас 5) и Богородицы (глас 5) и каноном Триоди, глас 4)
ПЕСНЬ 1
Ирмóс: Коня́ и всáдника в мóре Чермнóе,/ сокрушáяй брáни/ мы́шцею высóкою,/ Христóс истрясé,/ Изрáиля же спасé,// побéдную песнь пою́ща.
Хор (припéв): Слáва, Гóсподи, Святóму Воскресéнию Твоемý.
Чтец (тропáрь): Тебé тернонóсный еврéйский сонм,/ любвé, Благодéтелю, к Тебé не сохрáнь мáтерния, Христé, венчá,// родоначáльника разрешáюща тернóвное запрещéние.
Хор: Слáва, Гóсподи, Святóму Воскресéнию Твоемý.
Чтец: Воздви́гл еси́ мя пáдшаго в ров,/ преклóнься, Жизнодáвче Безгрéшне:/ и моея́ злосмрáдныя тли, Христé, претерпéв неискушéнно,// Божéственнаго Существá ми́ром мя облагоухáл еси́.
Хор: Пресвятáя Богорóдице, спасú нас.
Богорóдичен: Разреши́ся кля́тва, печáль престá:/ Благословéнная бо и Благодáтная,/ вéрным рáдость возсия́,// благословéние всем концéм цветонося́щи Христá.
Канон крестовоскресный, глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: И́же вóлею на крестé пригвождéнному плóтию,/ и дрéвняго от изречéния дрéвом пáдшаго свобóждшему,// Томý Еди́ному воспои́м: я́ко прослáвися.
Хор: Слáва, Гóсподи, Крестý Твоемý Честнóму и Воскресéнию.
Чтец: И́же из грóба мертвецý воскрéсшу Христý, и пáдшаго совозстáвившу,/ и соседéнием Отéческим украси́вшему,// Томý Еди́ному воспои́м: я́ко прослáвися.
Канон Богородицы, глас 5
Хор: Пресвятáя Богорóдице, спасú нас.
Чтец: Свéта всéльшагося в Тя, Пречи́стая,/ и просвéщшаго мир лучáми Божествá,/ Христá моли́,// просвети́ти вся пою́щия Тя, Мáти Дéво.
Хор: Пресвятáя Богорóдице, спасú нас.
Чтец: Я́ко украшáема добрóтою добродéтелей, Благодáтная,/ добротвóрное благолéпие лучéю Дýха,// подъя́ла еси́, Всечи́стая, вся́ческая удобри́вшаго.
Канон Триоди, глас 4
Хор: Слáва Тебé, Бóже наш, слáва Тебé.
Чтец: Плéщуще с весéлием днесь вéрнии возопии́м:/ коль чýдна делá Твоя́ Христé, и вели́ка си́ла,// нáше единомы́слие и соглáсие содéлавый! (двáжды)
Хор: Слáва Тебé, Бóже наш, слáва Тебé.
Чтец: День рáдостный богомýдреннии/ прииди́те соверши́м,/ ны́не нéбо и земля́ весели́тся, и áнгелов чи́ни,// и человéков собрáния изря́дно прáзднующе.
Хор: Слáва Тебé, Бóже наш, слáва Тебé.
Чтец: Превéлие благодея́ние ви́дяще, рукáми восплéщим,/ разстоя́щияся ýды Христóвы, совокýплены во еди́нство,// и Бóга похвáлим мир подáвшаго.
Слáва Отцý и Сыну и Святóму Дýху.
Тропáрь: Дáшася Цéркви днесь победи́тельная,/ Богодви́жным мановéнием и совéтом,/ Михаи́ла же и Феодóры,// благочéстно вéру содержáщих царéй нáших.
И ныне и прúсно и во вéки векóв, амúнь.
Богорóдичен: Орýжия злочести́вых исчезóша я́ве ересéй,/ храм бо Твой Пречи́стая Чи́стая,/ во образéх украшáемый всеблаголéпно зря́ще,// ны́не всесвящéнно рáдуемся.
Катавáсия (глас 4): Мóря чермнýю пучи́ну,/ невлáжными стопáми/ дрéвний пешешéствовав Изрáиль,/ крестообрáзныма Моисéовыма рукáма,// Амали́кову си́лу в пусты́ни победи́л есть.
ПЕСНЬ 3
Ирмóс: Водрузи́вый на ничесóмже зéмлю повелéнием Твои́м,/ и повéсивый неодержи́мо тяготéющую/ на недви́жимем, Христé, кáмени зáповедей Твои́х,// Цéрковь Твою́ утверди́, Еди́не Блáже и Человеколю́бче.
Хор: Слáва, Гóсподи, Святóму Воскресéнию Твоемý.
Чтец: Желчь ýбо и́же из кáмене мед ссáвшии,/ в пусты́ни чудодéйствовавшему Тебé принесóша, Христé:/ óцет же за мáнну воз благодея́ние Ти воздáша// óтроцы Изрáилевы неблагодáрнии.
Хор: Слáва, Гóсподи, Святóму Воскресéнию Твоемý.
Чтец: И́же дрéвле светови́дным óблаком покрывáеми,/ Живóт во грóбе Христá положи́ша:/ но самовлáстно воскрéс, всем вéрным подадé// тáйно осеня́ющее свы́ше Дýха сия́ние.
Хор: Пресвятáя Богорóдице, спасú нас.
Богорóдичен: Ты Мáти Бóжия несочетáнно родилá еси́,/ И́же от Нетлéнна Отцá возсия́вшаго, кромé болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: Воскрéсл еси́ от грóба, Христé,/ тли смéртныя избáвль// воспевáющих, Жизнодáвче, вóльное Твоé распя́тие.
Хор: Слáва, Гóсподи, Крестý Твоемý Честнóму и Воскресéнию.
Чтец: Помáзати ми́ром тéло Твоé миронóсицы, Христé, тщáхуся,/ и не обрéтша возврати́шася,// воспевáюща Твоé Востáние.
Глас 5
Хор: Пресвятáя Богорóдице, спасú нас.
Чтец:Лéствица, Éюже к нам сни́де Вы́шний,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблаги́й ми́рови бесéдовати благоволи́.
Хор: Пресвятáя Богорóдице, спасú нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц приéм яви́ся.
Глас 4
Хор: Слáва Тебé, Бóже наш, слáва Тебé.
Чтец: Не ктомý нечести́вых еретикóв ны́не бровь взéмлется:// Бóжия бо си́ла правослáвие удержáла есть. (двáжды)
Хор: Слáва Тебé, Бóже наш, слáва Тебé.
Чтец: Óблацы прорóчестии,/ животворя́щую с небесé днесь рóсу нам да кропя́т,// на востáние вéры.
Хор: Слáва Тебé, Бóже наш, слáва Тебé.
Чтец: Благоглáсно тáйныя апóстолов Христóвых трубы́,/ пáче естествá да вопию́т,// честны́х образóв исправлéние.
Слáва Отцý и Сыну и Святóму Дýху.
Тропáрь: Воспои́м Христá, показáвшаго нам/ цари́цу благочести́вую, христолюби́вую,// с Боговенчáнною óтраслию.
И ныне и прúсно и во вéки векóв, амúнь.
Богорóдичен: Селéние Твоé свящéнное/ дости́гше вéрнии, Пречи́стая,// светови́дною благодáтию ны́не озари́тися, мóлимся.
Катавáсия (глас 4): Весели́тся о Тебé Цéрковь Твоя́, Христé, зову́щи:/ Ты моя́ крéпость, Гóсподи,// и прибéжище, и утверждéние.
Гóсподи, помилуй. (3 раза)
Седáльны Триóди, глaс 1: Божéственный Твой зрак, во óбразе образýюще, Христé,/ я́сно вопиéм Рождествó,/ чудесá неизглагóланная, вóльное распя́тие./ Отонýдуже бéсове отгóнятся стрáхом,/ и злослáвнии в посуплéнии рыдáют,// я́ко сих сопричáстницы.
Слáва Отцý и Сыну и Святóму Дýху.
Зрáками прорóков, апóстолов ви́дами,/ мýчеников свящéнных, и святы́х всех икóнами,/ и изображéньми свящéнно красýется,/ Женихá же мы́сленнаго и Невéсты украшáется ýмными красовáньми,// мáти вы́шний Сиóн.
И ныне и прúсно и во вéки векóв, амúнь.
Богорóдичен Триóди, глас 1: Не умолчи́м никогдá Богорóдице,/ си́лы Твоя́ глагóлати недостóйнии:/ áще бо Ты не бы предстоя́ла моля́щи,/ кто бы нас избáвил от толи́ких бед,/ кто же бы сохрани́л до ны́не свобóдны?/ Не отстýпим Влады́чице, от Тебé:// Твоя́ бо рабы́ спасáеши при́сно от вся́ких лю́тых.
ПЕСНЬ 4
Ирмóс: Божéственное Твоé разумéв истощáние/ прозорли́во, Аввакýм, Христé, со трéпетом вопия́ше Тебé:/ во Спасéние людéй Твои́х// спасти́ помáзанныя Твоя́ пришéл еси́.
Хор: Слáва, Гóсподи, Святóму Воскресéнию Твоемý.
Чтец: Я́же от Мéрры горчáйшыя вóды,/ я́ко во óбразе проначертáя Пречи́стый Крест Твой, Блáже,/ грехóвное умерщвля́ющ вкушéние,// дрéвом услади́л еси́.
Хор: Слáва, Гóсподи, Святóму Воскресéнию Твоемý.
Чтец: Крест за дрéво разýмное,/ за слáдкую же пи́щу желчь, Спáсе мой, прия́л еси́,// за тлéние же смéрти кровь Твою́ Божéственную излия́л еси́.
Хор: Пресвятáя Богорóдице, спасú нас.
Богорóдичен: Кромé ýбо сочетáния зачалá еси́ нетлéнно во чрéве,/ и без болéзни родилá еси́,// и по Рождествé, Дéва, Бóга плóтию рóждши, сохрани́лася еси́.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: Я́ко водрузи́ся на земли́ на лóбнем Крест,/ сокруши́шася вереи́ и врáтницы вéчнии,// и возопи́ша: слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнию.
Чтец: Я́ко сни́де Спас к свя́занным я́ко мертв,/ совоскресóша с Ним и́же от вéка умéршии,// и возопи́ша: слáва си́ле Твоéй, Гóсподи.
Глас 5
Хор: Пресвятáя Богорóдице, спасú нас.
Чтец:Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéния плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасú нас.
Чтец: Создáвый от не сýщих вся́ческая,/ от Тебé, Чи́стыя, создáтися я́ко Благодéтель, благоволи́,// на Спасéние вéрою и любóвию Тя пою́щих, Всенепорóчная.
Глас 4
Хор: Слáва Тебé, Бóже наш, слáва Тебé.
Чтец: Наи́тием Божéственным Утéшителя, Твой храм освяти́,/ и пришéствием Сегó ерети́ческую прéлесть отжени́,// Слóве Бóжий многоми́лостиве. (двáжды)
Хор: Слáва Тебé, Бóже наш, слáва Тебé.
Чтец: Нýжднейшаго избáвивый злочéстия Твоя́ лю́ди,/ покажи́ благочéстия рéвностию разжжéны,/ и вéрою взывáющия:// слáва си́ле Твоéй, Гóсподи.
Хор: Слáва Тебé, Бóже наш, слáва Тебé.
Чтец: Священнообрáзными изображéньми,/ образóв Христóвых зря́ще и Богорóдицы,/ сия́ющая Божéственная селéния,// священнолéпно рáдуемся.
Слáва Отцý и Сыну и Святóму Дýху.
Тропáрь: Цари́ца по обоемý укрáшена,/ и́стиннаго возжелéвши Христóва Цáрства,/ Сегó написá óбраз пречи́стый,// и святы́х изображéния.
И ныне и прúсно и во вéки векóв, амúнь.
Богорóдичен: Воплощéнна роди́вши Божéственнаго Слóва,/ Боголéпное освящéние Благодáтная, Сегó показáла еси́,// тéмже Твой храм светови́дный обновля́ем.
Катавáсия (глас 4): Вознесéна Тя ви́девши Цéрковь на Крестé,/ сóлнце прáведное,/ ста в чи́не своéм,/ достóйно взывáющи:// слáва си́ле Твоéй, Гóсподи.
ПЕСНЬ 5
Ирмóс: Одея́йся Свéтом, я́ко ри́зою,/ к Тебé ýтреннюю, и Тебé зовý:/ дýшу мою́ просвети́ омрачéнную, Христé,// я́ко Еди́н Благоутрóбен.
Хор: Слáва, Гóсподи, Святóму Воскресéнию Твоемý.
Чтец: И́же слáвы Госпóдь в неслáвне зрáце,/ на дрéве обезчéщен вóлею ви́сит,// о божéственней мне слáве несказáнно промышля́я.
Хор: Слáва, Гóсподи, Святóму Воскресéнию Твоемý.
Чтец: Ты мя преоблéкл еси́ в нетлéние, Христé,/ тли смéртныя неистлéнно плóтию вкуш,// и возсия́в из грóба триднéвен.
Хор: Пресвятáя Богорóдице, спасú нас.
Богорóдичен: Ты прáвду же и избавлéние нам рóждши Христá без сéмене,// свобóдно содéяла еси́ от кля́твы, Богорóдице, естествó прáотца.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: Простéрл еси́ длáни, Спáсе наш, на дрéве,// вся призывáя к Себé, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнию.
Чтец: Плени́л еси́ ад, Спáсе мой, Твои́м погребéнием,// и Твои́м Воскресéнием рáдости вся испóлнил еси́.
Глас 5
Хор: Пресвятáя Богорóдице, спасú нас.
Чтец: Вси прорóцы Тя я́ве предвозвести́ша/ хотя́щую бы́ти Бóжию Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасú нас.
Чтец: Свéтел óблак Тя живóтныя вóды,/ нам тýчу нетлéния Христá одожди́вший отчáянным,// Чи́стая, познавáем.
Глас 4
Хор: Слáва Тебé, Бóже наш, слáва Тебé.
Чтец: Положи́, Гóсподи, Твоéй Цéркви утверждéние,/ непреклóнней пребы́ти в век вéка// от смятéний ересéй. (двáжды)
Хор: Слáва Тебé, Бóже наш, слáва Тебé.
Чтец: Во всю зéмлю свéтлость возсия́ свы́ше,/ дáннаго вéрным весéлия,// и Божéственнаго заступлéния.
Хор: Слáва Тебé, Бóже наш, слáва Тебé.
Чтец: Еди́не Благи́й, и истóчниче блáгости,/ Ты возвы́си правослáвных рог,// чтýщих óбраз Твой.
Слáва Отцý и Сыну и Святóму Дýху.
Тропáрь: Свет незаходи́мый нам благочéстия возсия́,/ велéнием Богодухновéнным вéрных пáстырей,// и мáнием Богомýдрым.
И ныне и прúсно и во вéки векóв, амúнь.
Богорóдичен: Обнови́ нам дрéвнее благолéпие,/ Пречи́стая Богомáти,/ и дом Твой сей освяти́// Твоéю благодáтию.
Катавáсия (глас 4): Ты Гóсподи мой, Свет в мир пришéл еси́./ Свет Святы́й, обращáяй из мрáчна невéдения,// вéрою воспевáющих Тя.
ПЕСНЬ 6
Ирмóс: Неи́стовствующееся бýрею душетлéнною,/ Влады́ко Христé, страстéй мóре укроти́,// и от тли возведи́ мя, я́ко Благоутрóбен.
Хор: Слáва, Гóсподи, Святóму Воскресéнию Твоемý.
Чтец: В тлéние попóлзся родоначáльник, Влады́ко Христé,/ преслýшаннаго брáшна вкуш,// и к животý возведéн бысть стрáстию Твоéю.
Хор: Слáва, Гóсподи, Святóму Воскресéнию Твоемý.
Чтец: Живóт низшéл еси́ ко áду, Влады́ко Христé,/ и тлéние растлéвшему быв,// тлéнием источи́л еси́ Воскресéние.
Хор: Пресвятáя Богорóдице, спасú нас.
Богорóдичен: Дéва роди́, и рóждши пребы́сть чистá,/ на рукý нося́щаго вся́ческая,// я́ко вои́стинну Дéва Мáти понéсшая.
Глас 5
Хор: Слáва, Гóсподи, Крестý Твоемý Честнóму и Воскресéнию.
Чтец: Простéрл еси́ длáни Твои́, собирáя далéче расточéнная/ язы́к Твои́х собрáния, Христé Бóже наш,// живонóсным Крестóм Твои́м, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнию.
Чтец: Плени́л еси́ смерть, и вратá áдова сокруши́л еси́,/ Адáм же свя́занный разрешéн быв, вопия́ше Тебé:// Спасé мя десни́ца Твоя́, Гóсподи.
Глас 5
Хор: Пресвятáя Богорóдице, спасú нас.
Чтец: И́же всемý винóвный, и éже бы́ти всем подáвый,/ я́ко винóвну имя́ше воплощáемь, éже по нам,// Тя, Богомáти Всенепорóчная.
Хор: Пресвятáя Богорóдице, спасú нас.
Чтец: Исцелéний, Влады́чице, душепитáтельный точáщий истóчник/ вéрно притекáющим к покрóву Твоемý благослáвному,// вéмы Тя, Всенепорóчная.
Глас 4
Хор: Слáва Тебé, Бóже наш, слáва Тебé.
Чтец: Пи́шется и почитáется вéрно/ покланя́емый óбраз Влады́ки,/ и приéмлет пáки Цéрковь дерзновéние,// благочéстно Спáса прославля́ющи. (двáжды)
Хор: Слáва Тебé, Бóже наш, слáва Тебé.
Чтец: Обнажáется сéтования, и тьмы ересéй Христóва Цéрковь,/ и нóсит ри́зу весéлия,// и Божéственною и светонóсною покрывáется благодáтию. (двáжды)
Слáва Отцý и Сыну и Святóму Дýху.
Тропáрь: Благослáвия дрéвняго осия́ния получи́ правослáвных собóр,/ Феодóры мановéнием цари́цы,// и ея́ сы́на благочести́ваго Михаи́ла самодéржца.
И ныне и прúсно и во вéки векóв, амúнь.
Богорóдичен: Дрéвле свидéния повелéвый бы́ти ски́нии,/ я́ко в ски́нии словéсней, в Тебé живéт Еди́н Препрослáвленный,// прославля́яй храм Твой, Дéво, чудесы́.
Катавáсия (глас 4): Пожрý Ти со глáсом хвалéния, Гóсподи,/ Цéрковь вопиéт Ти,/ от бесóвския крóве очи́щшися,/ рáди ми́лости от ребр Твои́х// истéкшею крóвию.
Продолжение здесь