Среда четвертой седмицы по ПАСХЕ. ПРЕПОЛОВЕНИЕ ПЯТИДЕСЯТНИЦЫ. УТРЕНЯ. Служба мирским чином
29 мáя 2024 гóда. Средà 4-й седмúцы по Пáсхе. Преполовéнiе Пятидеся́тницы. Глас 3. Cлýжба для домáшнего (келéйнаго) совершéнiя. Слýжба совершáется по Трióди. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 19
Услы́шит тя Госпóдь в день печáли, защи́тит тя и҆́мя Бóга Iáковля. Пóслет ти пóмощь от Святáго и от Сióна застýпит тя. Помянéт вся́ку жéртву твою́, и всесожжéнiе твоè тýчно бýди. Даст ти Госпóдь по сéрдцу твоемý и весь совéт твой испóлнит. Возрáдуемся о спасéнiи твоéм и во и҆́мя Гóспода Бóга нáшего возвели́чимся. Испóлнит Госпóдь вся прошéнiя твоя́. Ны́не познáх, я́ко спасè Госпóдь хрїстà Своегò, услышит eгò с Небесè Святáго Своегò, в си́лах спасéнiе десни́цы Егò. Сíи на колесни́цах, и сíи на кóнех, мы же во и҆́мя Гóспода Бóга нáшего призовéм. Тíи спя́ти бы́ша и падóша, мы же востáхом и испрáвихомся. Гóсподи, спасѝ царя́ и услы́ши ны, вóньже áще день призовéм Тя.
Псалом 20
Гóсподи, си́лою Твоéю возвесели́тся царь и о спасéнiи Твоéм возрáдуется зелò. Желáнiе сéрдца eгò дал есѝ eмý, и хотéнiя устнý eгò нéси лиши́л eгò. Я́ко предвари́л есѝ eгò благословéнiем благосты́нным, положи́л есѝ на главè eгò венéц от кáмене чéстна. Животà проси́л есть у Тебé, и дал есѝ eмý долготý днíй во век вéка. Вéлiя слáва eгò спасéнiем Твои́м, слáву и велелéпiе возложи́ши на негò. Я́ко дáси eмý благословéнiе во век вéка, возвесели́ши eгò рáдостiю с лицéм Твои́м. Я́ко царь уповáет на Гóспода, и ми́лостiю Вы́шняго не подви́жится. Да обря́щется рукà Твоя́ всем врагóм Твои́м, десни́ца Твоя́ да обря́щет вся ненави́дящiя Тебè. Я́ко положи́ши их я́ко пещь óгненную во врéмя лицà Твоегò, Госпóдь гнéвом Свои́м смятéт я́, и снéсть их огнь. Плод их от землѝ погуби́ши, и сéмя их от сынóв человéческих. Я́ко уклони́ша на Тя злáя, помы́слиша совéты, и҆́хже не возмóгут состáвити. Я́ко положи́ши я́ хребéт, во избы́тцех Твои́х уготóвиши лицè их. Вознеси́ся, Гóсподи, си́лою Твоéю, воспоéм и поéм си́лы Твоя́.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Спасѝ Гóсподи лю́ди Твоя́,/ и благословѝ достоя́нiе Твоè,/ побéды (раньше: благовѣ́рному імперáтору нáшему úмярек) правослáвным хрїстiáнам на сопроти́вныя дáруя,// и Твоè сохраня́я Крестóм Твои́м жи́тельство.
Слáва Отцý и Сыну и Святóму Дýху.
Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрїстè Бóже,/ возвеселѝ нас си́лою Твоéю, (раньше: благовѣ́рнаго імперáтора нáшего úмярек)/ побéды дая́ нам на сопостáты,/ посóбiе имýщим Твоè oрýжiе ми́ра,// непобеди́мую побéду.
И ныне и прúсно и во вéки векóв. Амúнь.
Предстáтельство стрáшное и непосты́дное,/ не прéзри Благáя моли́тв нáших, Всепéтая Богорóдице,/ утвердѝ правослáвных жи́тельство:/ спасѝ лю́ди Твоя́, (раньше: благовѣ́рнаго імперáтора нáшего úмярек, емýже повелѣ́ла есù цáрствовати) и подáждь им с небесè побéду,// занè родилà есѝ Бóга, еди́на благословéнная.
Гóсподи, поми́луй, (12 раз)
ШЕСТОПСАЛМИЕ
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в землѝ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè моѝ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́ній Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостію и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делà Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
БОГ ГОСПОДЬ, глас 3
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь Преполовéнiя, глас 8: Преполовúвшуся прáзднику,/ жáждущую дýшу мою́ благочéстiя напóй водáми,/ я́ко всем Спáсе возопúл есù:/ жáждай да грядéт ко Мне и да пiéт,/ истóчниче жúзни нáшея Хрїстè Бóже, слáва Тебè.(Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Преполовúвшуся прáзднику,/ жáждущую дýшу мою́ благочéстiя напóй водáми,/ я́ко всем Спáсе возопúл есù:/ жáждай да грядéт ко Мне и да пiéт,/ истóчниче жúзни нáшея Хрїстè Бóже, слáва Тебè.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ДЕСЯТАЯ
И чтем кафíсму 10-ю (илù одúн псалóм, илù до 1-й Слáвы)
[Псалом 70]На Тя, Гóсподи, уповáх, да не постыжýся в век. Прáвдою Твоéю избáви мя и измѝ мя, приклонѝ ко мне ýхо Твоè и спасѝ мя. Бýди ми в Бóга защи́тителя и в мéсто крéпко спастѝ мя, я́ко утверждéнiе моè и прибéжище моè есѝ Ты. Бóже мой, избáви мя из рукѝ грéшнаго, из рукѝ законопрестýпнаго и оби́дящаго, я́ко Ты есѝ терпéнiе моè, Гóсподи, Гóсподи, уповáнiе моè от ю́ности моея́. В Тебè утверди́хся от утрóбы, от чрéва мáтере моея́ Ты есѝ мой покрови́тель: о Тебè пéнiе моè вы́ну. Я́ко чýдо бых мнóгим, и Ты помóщник мой крéпок. Да испóлнятся устà моя́ хвалéнiя, я́ко да воспою́ слáву Твою́, весь день великолéпiе Твоè. Не отвéржи менè во врéмя стáрости, внегдà оскудевáти крéпости моéй, не остáви менè. Я́ко рéша вразѝ моѝ мне, и стрегýщiи дýшу мою́ совещáша вкýпе, глагóлюще: Бог остáвил есть eгò, пожени́те и ими́те eгò, я́ко несть избавля́яй. Бóже мой, не удали́ся от Менè, Бóже мой, в пóмощь мою́ вонмѝ. Да постыдя́тся и исчéзнут оклеветáющiи дýшу мою́, да облекýтся в студ и срам и́щущiи злáя мне. Аз же всегдà возуповáю на Тя и приложý на вся́ку похвалý Твою́. Устà моя́ возвестя́т прáвду Твою́, весь день спасéнiе Твоè, я́ко не познáх кни́жная. Вни́ду в си́ле Госпóдни; Гóсподи, помянý прáвду Тебè еди́наго. Бóже мой, и́мже научи́л мя есѝ от ю́ности моея́, и до ны́не возвещý чудесà Твоя́, и дáже до стáрости и престарéнiя, Бóже мой, не остáви менè, дóндеже возвещý мы́шцу Твою́ рóду всемý грядýщему, си́лу Твою́ и прáвду Твою́, Бóже, дáже до вы́шних, я́же сотвори́л ми есѝ вели́чiя. Бóже, кто подóбен Тебè? Ели́ки яви́л ми есѝ скóрби мнóги и злы, и обрáщься оживотвори́л мя есѝ, и от бездн землѝ возвéл мя есѝ. Умнóжил есѝ на мне вели́чествiе Твоè, и обрáщься утéшил мя есѝ, и от бездн землѝ пáки возвéл мя есѝ. И́бо аз исповéмся Тебè в лю́дех, Гóсподи, в сосýдех псалóмских и́стину Твою́, Бóже, воспою́ Тебè в гýслех, Свя́тый Iзрáилев. Возрáдуетеся устнè моѝ, егдà воспою́ Тебè, и душà моя́, ю́же есѝ избáвил. Ещè же и язы́к мой весь день поучи́тся прáвде Твоéй, егдà постыдя́тся и посрáмятся и́щущiи злáя мне.
[Псалом 71]Бóже, суд Твой царéви даждь, и прáвду Твою́ сы́ну царéву: суди́ти лю́дем Твои́м в прáвде, и ни́щим Твои́м в судè. Да воспрiи́мут гóры мир лю́дем, и хóлми прáвду. Сýдит ни́щим людски́м, и спасéт сы́ны убóгих и смири́т клеветникà. И пребýдет с сóлнцем, и прéжде луны̀ рóда родóв. Сни́дет я́ко дождь на рунò, и я́ко кáпля, кáплющая на зéмлю. Возсiя́ет во днех егò прáвда и мнóжество ми́ра, дóндеже отъи́мется лунà. И обладáет от мóря до мóря, и от рек до конéц вселéнныя. Пред ним припадýт Ефióпляне, и вразѝ егò персть поли́жут. Цáрiе Фарсíйстiи и óстрови дáры принесýт, цáрiе Арáвстiи и Савà дáры приведýт: и поклóнятся емý вси цáрiе зéмстiи, вси язы́цы порабóтают емý. Я́ко избáви ни́ща от си́льна, и убóга, емýже не бе помóщника. Пощади́т ни́ща и убóга, и дýши убóгих спасéт: от ли́хвы и от непрáвды избáвит дýши их, и чéстно и́мя егò пред ни́ми. И жив бýдет, и дáстся емý от злáта Аравíйска, и помóлятся о нем вы́ну, весь день благословя́т егò. Бýдет утверждéнiе на землѝ на версéх гор, превознесéтся пáче Лiвáна плод егò: и процветýт от грáда я́ко травà земнáя. Бýдет и́мя егò благословéно во вéки, прéжде сóлнца пребывáет и́мя егò, и благословя́тся в нем вся колéна земнáя, вси язы́цы ублажáт егò. Благословéн Госпóдь Бог Iзрáилев, творя́й чудесà Еди́н. И благословéно и́мя слáвы Егò во век и в век вéка, и испóлнится слáвы Егò вся земля́: бýди, бýди.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 72]Коль благ Бог Iзрáилев, прáвым сéрдцем. Моѝ же вмáле не подвижáстеся нóзе: вмáле не пролiя́шася стопы̀ моя́. Я́ко возревновáх на беззакóнныя, мир грéшников зря. Я́ко несть восклонéнiя в смéрти их, и утверждéнiя в рáне их, в трудéх человéческих не суть, и с человéки не прiи́мут ран. Сегò рáди удержà я́ горды́ня их до концà: одéяшася непрáвдою и нечéстiем свои́м. Изы́дет я́ко из тýка непрáвда их, преидóша в любóвь сéрдца. Помы́слиша и глагóлаша в лукáвстве, непрáвду в высотý глагóлаша. Положи́ша на небесѝ устà своя́, и язы́к их прéйде по землѝ. Сегò рáди обратя́тся лю́дiе моѝ сéмо, и днíе испóлнени обря́щутся в них. И рéша: кáко увéде Бог? И áще есть рáзум в Вы́шнем? Се сíи грéшницы и гобзýющiи в век, удержáша богáтство. И рех: едà всýе оправди́х сéрдце моè и умы́х в непови́нных рýце моѝ? И бых я́звен весь день, и обличéнiе моè на ýтренних. Áще глагóлах, повéм тáко: се рóду сынóв Твои́х, емýже обещáхся, и непщевáх разумéти: сiè труд есть предо мнóю, дóндеже вни́ду во святи́ло Бóжiе и разумéю в послéдняя их. Обáче за льщéнiя их положи́л есѝ им злáя, низложи́л есѝ я́, внегдà разгордéшася. Кáко бы́ша в запустéнiе? Внезáпу исчезóша, погибóша за беззакóнiе своè. Я́ко сóнiе востаю́щаго, Гóсподи, во грáде Твоéм óбраз их уничижи́ши. Я́ко разжжéся сéрдце моè, и утрóбы моя́ измени́шася. И аз уничижéн и не разумéх, скóтен бых у Тебè. И аз вы́ну с Тобóю, удержáл есѝ рýку деснýю мою́, и совéтом Твои́м настáвил мя есѝ, и со слáвою прiя́л мя есѝ. Что бо ми есть на небесѝ? И от Тебè что восхотéх на землѝ? Исчезè сéрдце моè и плоть моя́, Бóже сéрдца моегò, и часть моя́, Бóже, во век. Я́ко се удаля́ющiи себè от Тебè поги́бнут; потреби́л есѝ вся́каго любодéющаго от Тебè. Мне же прилепля́тися Бóгови блáго есть, полагáти на Гóспода уповáнiе моè, возвести́ти ми вся хвалы̀ Твоя́ во вратéх дщéре Сióни.
[Псалом 73]Вскýю, Бóже, отри́нул есѝ до концà, разгнéвася я́рость Твоя́ на óвцы пáжити Твоея́? Помянѝ сонм Твой, егóже стяжáл есѝ испéрва, избáвил есѝ жезлóм достоя́нiя Твоегò, горà Сióн сiя́, в нéйже всели́лся есѝ. Воздви́гни рýце Твоѝ на горды́ни их в конéц, ели́ка лукáвнова враг во святéм Твоéм. И восхвали́шися ненави́дящiи Тя посредè прáздника Твоегò, положи́ша знáменiя своя́, знáменiя, и не познáша, я́ко во исхóде превы́ше, я́ко в дубрáве дрéвяне секи́рами разсекóша. Двéри егò вкýпе: сéчивом и оскóрдом разруши́ша ѝ. Возжгóша огнéм святи́ло Твоè, на землѝ оскверни́ша жили́ще и҆́мене Твоегò. Рéша в сéрдце своéм ю́жики их вкýпе: прiиди́те и отстáвим вся прáздники Бóжiя от землѝ. Знáменiя их не ви́дехом: несть ктомý прорóка, и нас не познáет ктомý. Докóле, Бóже, понóсит враг? Раздражи́т проти́вный и҆́мя Твоè до концà? Вскýю отвращáеши рýку Твою́ и десни́цу Твою́ от среды̀ нéдра Твоегò в конéц? Бог же Царь наш прéжде вéка содéла спасéнiе посредè землѝ. Ты утверди́л есѝ си́лою Твоéю мóре, Ты стерл есѝ главы̀ змiéв в водè, Ты сокруши́л есѝ главý змíеву, дал есѝ тогò брáшно лю́дем Ефióпским. Ты растóргл есѝ истóчники и потóки, Ты изсуши́л есѝ рéки Ифáмскiя. Твой есть день, и Твоя́ есть нощь: Ты соверши́л есѝ зарю́ и сóлнце. Ты сотвори́л есѝ вся предéлы землѝ, жáтву и вéсну Ты создáл есѝ я́. Помянѝ сiя́, враг поносѝ Гóсподеви, и лю́дiе безýмнiи раздражи́ша и҆́мя Твоè. Не предáждь зверéм дýшу, исповéдающуся Тебè, душ убóгих Твои́х не забýди до концà. При́зри на завéт Твой, я́ко испóлнишася помрачéннiи землѝ домóв беззакóнiй. Да не возврати́тся смирéнный посрáмлен, нищ и убóг восхвали́та и҆́мя Твоè. Востáни, Бóже, судѝ прю Твою́, помянѝ поношéнiе Твоè, éже от безýмнаго весь день. Не забýди глáса моли́твенник Твои́х, горды́ня ненави́дящих Тя взы́де вы́ну.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 74]Исповéмыся Тебè, Бóже, исповéмыся Тебè, и призовéм и҆́мя Твоè; повéм вся чудесà Твоя́. Егдà прiимý врéмя, Аз правоты́ возсуждý. Растáяся земля́ и вси живýщiи на ней, Аз утверди́х столпы̀ ея́. Рех беззакóннующим, не беззакóннуйте: и согрешáющим, не возноси́те рóга, не воздвизáйте на высотý рóга вáшего, и не глагóлите на Бóга непрáвду: я́ко нижè от исхóд, нижè от зáпад, нижè от пусты́х гор. Я́ко Бог судiя́ есть: сегò смиря́ет, и сегò вознóсит. Я́ко чáша в руцè Госпóдни, винà нерастворéна, испóлнь растворéнiя, и уклонѝ от сея́ в сiю́: обáче дрóждiе Егò не истощи́ся, испiю́т вси грéшнiи землѝ. Аз же возрáдуюся в век, воспою́ Бóгу Iáковлю: и вся рóги грéшных сломлю́, и вознесéтся рог прáведнаго.
[Псалом 75]Вéдом во Iудéи Бог: во Iзрáили вéлiе и́мя Егò. И бысть в ми́ре мéсто Егò и жили́ще Егò в Сióне. Тáмо сокрушѝ крéпости лукóв, орýжiе и мечь и брань. Просвещáеши Ты ди́вно от гор вéчных. Смятóшася вси неразýмнiи сéрдцем: уснýша сном свои́м, и ничтóже обретóша вси мýжiе богáтства в рукáх свои́х. От запрещéнiя Твоегò, Бóже Iáковль, воздремáша всéдшiи на кóни. Ты стрáшен есѝ, и кто противостáнет Тебè? Оттóле гнев Твой. С Небесè слы́шан сотвори́л есѝ суд: земля́ убоя́ся, и умолчà, внегдà востáти на суд Бóгу, спастѝ вся крóткiя землѝ. Я́ко помышлéнiе человéческое исповéстся Тебè: и остáнок помышлéнiя прáзднует Ти. Помоли́теся и воздади́те Гóсподеви Бóгу нáшему вси и́же óкрест Егò принесýт дáры, стрáшному и отъéмлющему дýхи князéй, стрáшному пáче царéй земны́х.
[Псалом 76]Глáсом мои́м ко Гóсподу воззвáх, глáсом мои́м к Бóгу, и внят ми. В день скóрби моея́ Бóга взыскáх рукáма мои́ма, нóщiю пред Ним, и не прельщéн бых. Отвéржеся утéшитися душà моя́. Помянýх Бóга и возвесели́хся, поглумля́хся и малодýшествоваше дух мой. Предвари́сте стражбы̀ óчи моѝ: смятóхся и не глагóлах. Помы́слих дни пéрвыя, и лéта вéчная помянýх, и поучáхся: нóщiю сéрдцем мои́м глумля́хся, и тужáше дух мой: едà во вéки отри́нет Госпóдь, и не приложи́т благоволи́ти пáки? Илѝ до концà ми́лость Свою́ отсечéт, скончà глагóл от рóда в род? Едà забýдет ущéдрити Бог? Илѝ удержи́т во гнéве Своéм щедрóты Своя́? И рех: ны́не начáх, сiя́ измéна десни́цы Вы́шняго. Помянýх делà Госпóдня, я́ко помянý от начáла чудесà Твоя́, и поучýся во всех дéлех Твои́х, и в начинáнiих Твои́х поглумлю́ся. Бóже, во святéм путь Твой: кто бог вéлiй я́ко Бог наш? Ты есѝ Бог творя́й чудесà: сказáл есѝ в лю́дех си́лу Твою́, избáвил есѝ мы́шцею Твоéю лю́ди Твоя́, сы́ны Iáковли и Ióсифовы. Ви́деша Тя вóды, Бóже, ви́деша Тя вóды, и убоя́шася: смятóшася бéздны, мнóжество шýма вод, глас дáша óблацы, и́бо стрéлы Твоя́ прехóдят. Глас грóма Твоегò в колесѝ, освети́ша мóлнiя Твоя́ вселéнную: подви́жеся и трéпетна бысть земля́. В мóри путiè Твоѝ, и стезѝ Твоѝ в водáх мнóгих, и следы̀ Твоя́ не познáются. Настáвил есѝ я́ко óвцы лю́ди Твоя́ рукóю Моисéовою и Аарóнею.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен Трióди, Преполовéнiя, глас 4): Всех сердéц помышлéнiя вéдый, посредè святи́лища став взывáше лжи́вым глагóля и́стину: что и́щете уби́ти Мя Животодáвца, прáзднику преполовля́ющуся, вопiя́ дéрзостно? Не на лицà зря́ще суд суди́те законопрестýпницы.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Всех сердéц помышлéнiя вéдый, посредè святи́лища став взывáше лжи́вым глагóля и́стину: что и́щете уби́ти Мя Животодáвца, прáзднику преполовля́ющуся, вопiя́ дéрзостно? Не на лицà зря́ще суд суди́те законопрестýпницы.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ОДИННАДЦАТАЯ
И чтем кафíсму 11-ю (илù одúн псалóм, илù до 1-й Слáвы)
[Псалом 77]Внемли́те, лю́дiе моѝ, закóну моемý, приклони́те ýхо вáше во глагóлы уст мои́х. Отвéрзу в при́тчах устà моя́, провещáю ганáнiя испéрва. Ели́ка слы́шахом и познáхом я́, и отцы̀ нáши повéдаша нам: не утаи́шася от чад их в род ин, возвещáюще хвалы̀ Госпóдни и си́лы Егò, и чудесà Егò, я́же сотворѝ. И воздви́же свидéнiе во Iáкове, и закóн положѝ во Iзрáили: ели́ка заповéда отцéм нáшим, сказáти я́ сыновóм свои́м, я́ко да познáет род ин, сы́нове родя́щiися, и востáнут и повéдят я́ сыновóм свои́м: да положáт на Бóга уповáнiе своè, и не забýдут дел Бóжiих, и зáповеди Егò взы́щут. Да не бýдут я́коже отцы̀ их, род стропти́в и преогорчевáяй, род и́же не испрáви сéрдца своегò, и не увéри с Бóгом дýха своегò. Сы́нове Ефрéмли наляцáюще и стреля́юще лýки, возврати́шася в день брáни: не сохрани́ша завéта Бóжiя, и в закóне Егò не восхотéша ходи́ти. И забы́ша благодея́нiя Егò, и чудесà Егò, я́же показà им пред отцы̀ их, я́же сотворѝ чудесà в землѝ Еги́петстей, на пóли Танеóсе. Развéрзе мóре, и проведè их, предстáви вóды я́ко мех. И настáви я́ óблаком во дни, и всю нощь просвещéнiем огня́. Развéрзе кáмень в пусты́ни, и напоѝ я́ я́ко в бéздне мнóзе, и изведè вóду из кáмене, и низведè я́ко рéки вóды. И приложи́ша ещè согрешáти Емý, преогорчи́ша Вы́шняго в безвóдней; и искуси́ша Бóга в сердцáх свои́х, вопроси́ти брáшна душáм свои́м. И клеветáша на Бóга, и рéша: едà возмóжет Бог уготóвати трапéзу в пусты́ни? Понéже поразѝ кáмень, и потекóша вóды, и потóцы наводни́шася: едà и хлеб мóжет дáти? Илѝ уготóвати трапéзу лю́дем Свои́м? Сегò рáди слы́ша Госпóдь и презрè: и огнь возгорéся во Iáкове, и гнев взы́де на Iзрáиля, я́ко не вéроваша Бóгови, нижè уповáша на спасéнiе Егò. И заповéда облакóм свы́ше, и двéри небесè отвéрзе, и одождѝ им мáнну я́сти, и хлеб небéсный дадè им. Хлеб áнгельскiй ядè человéк, брáшно послà им до сы́тости. Воздви́же юг с небесè, и наведè си́лою Своéю ли́ва, и одождѝ на ня я́ко прах плóти, и я́ко песóк морскíй пти́цы пернáты. И нападóша посредè стáна их, óкрест жили́щ их. И ядóша и насы́тишася зелò, и желáнiе их принесè им. Не лиши́шася от желáнiя своегò: ещè брáшну сýщу во устéх их: и гнев Бóжiй взы́де на ня, и убѝ мнóжайшая их, и избрáнным Iзрáилевым запя́т. Во всех сих согреши́ша ещè, и не вéроваша чудесéм Егò. И исчезóша в суетè дни́е их, и лéта их со тщáнiем. Егдà убивáше я́, тогдà взыскáху Егò, и обращáхуся, и ýтреневаху к Бóгу: и помянýша, я́ко Бог Помóщник им есть, и Бог Вы́шнiй Избáвитель им есть. И возлюби́ша Егò усты̀ свои́ми, и язы́ком свои́м солгáша Емý: сéрдце же их не бе прáво с Ним, нижè увéришася в завéте Егò. Тóйже есть щедр, и очи́стит грехѝ их, и не растли́т, и умнóжит отврати́ти я́рость Свою́, и не разжжéт всегò гнéва Своегò. И помянý, я́ко плоть суть, дух ходя́й и не обращáяйся. Колькрáты преогорчи́ша Егò в пусты́ни, прогнéваша Егò в землѝ безвóдней? И обрати́шася, и искуси́ша Бóга, и Святáго Iзрáилева раздражи́ша, и не помянýша рукѝ Егò в день, вóньже избáви я́ из рукѝ оскорбля́ющаго, я́коже положѝ во Еги́пте знáменiя Своя́, и чудесà Своя́ на пóли Танеóсе, и преложѝ в кровь рéки их, и истóчники их, я́ко да не пiю́т. Послà на ня пéсiя мýхи и поядóша я́: и жáбы, и растлѝ я́. И дадè рже плоды̀ их, и труды̀ их пругóм. Убѝ грáдом вiногрáды их, и черни́чiе их слáною, и предадè грáду скоты̀ их, и имéнiе их огню́. Послà на ня гнев я́рости Своея́, я́рость и гнев и скорбь, послáнiе áнгелы лю́тыми. Путесотворѝ стезю́ гнéву Своемý, и не пощадè от смéрти душ их: и скоты̀ их в смéрти заключѝ, и поразѝ вся́кое перворóдное в землѝ Еги́петстей, начáток вся́каго трудà их в селéнiих Хáмовых. И воздви́же я́ко óвцы лю́ди Своя́, и возведè я́ я́ко стáдо в пусты́ни, и настáви я́ на уповáнiе, и не убоя́шася, и врагѝ их покры̀ мóре. И введè я́ в гóру святы́ни Своея́, гóру сiю́, ю́же стяжà десни́ца Егò. И изгнà от лицà их язы́ки, и по жрéбiю дадè им [зéмлю] ýжем жребодая́нiя, и вселѝ в селéнiих их колéна Iзрáилева. И искуси́ша и преогорчи́ша Бóга Вы́шняго, и свидéнiй Егò не сохрани́ша, и отврати́шася, и отвергóшася, я́коже и отцы̀ их, преврати́шася в лук развращéн, и прогнéваша Егò в хóлмех свои́х и во истукáнных свои́х раздражи́ша Егò. Слы́ша Бог и презрè, и уничижѝ зелò Iзрáиля, и отри́ну ски́нiю Силóмскую, селéнiе, éже всели́ся в человéцех. И предадè в плен крéпость их, и добрóту их в рýки врагóв, и затворѝ во орýжiи лю́ди Своя́, и достоя́нiе Своè презрè. Ю́ноши их поядè огнь, и дéвы их не осéтованы бы́ша; свящéнницы их мечéм падóша, и вдови́цы их не оплáканы бýдут. И востà я́ко спя Госпóдь, я́ко си́лен и шýмен от винà, и поразѝ врагѝ Своя́ вспять, поношéнiе вéчное дадè им. И отри́ну селéнiе Ióсифово, и колéно Ефрéмово не избрà, и избрà колéно Iýдово, гóру Сióню, ю́же возлюбѝ, и создà я́ко единорóга святи́лище Своè, на землѝ основà ѝ в век. И избрà Давíда рабà Своегò, и воспрiя́т егò от стад óвчих. От дои́лиц поя́т егò пастѝ Iáкова рабà Своегò и Iзрáиля достоя́нiе Своè. И упасè я́ в незлóбiи сéрдца своегò, и в рáзумех рукý своéю настáвил я́ есть.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 78]Бóже, прiидóша язы́цы в достоя́нiе Твоè, оскверни́ша храм святы́й Твой, положи́ша Iерусали́м я́ко овóщное храни́лище, положи́ша трýпiя раб Твои́х брáшно пти́цам небéсным, плóти преподóбных Твои́х зверéм земны́м. Пролiя́ша кровь их я́ко вóду óкрест Iерусали́ма, и не бе погребáяй. Бы́хом поношéнiе сосéдом нáшим, подражнéнiе и поругáнiе сýщим óкрест нас. Докóле, Гóсподи, прогнéваешися до концà? Разжжéтся я́ко огнь рвéнiе Твоè? Пролéй гнев Твой на язы́ки не знáющiя Тебè, и на цáрствiя, я́же и́мене Твоегò не призвáша, я́ко поядóша Iáкова, и мéсто егò опустоши́ша. Не помянѝ нáших беззакóнiй пéрвых: скóро да предваря́т ны щедрóты Твоя́, Гóсподи, я́ко обнищáхом зелò. Помозѝ нам, Бóже, Спаси́телю наш, слáвы рáди и́мене Твоегò, Гóсподи, избáви ны, и очи́сти грехѝ нáша и́мене рáди Твоегò. Да не когдà рекýт язы́цы, где есть Бог их? И да увéстся во язы́цех пред очи́ма нáшима отмщéнiе крóве раб Твои́х пролиты́я. Да вни́дет пред Тя воздыхáнiе оковáнных, по вели́чiю мы́шцы Твоея́ снабдѝ сы́ны умерщвлéнных. Воздáждь сосéдом нáшим седмери́цею в нéдро их поношéнiе их, и́мже поноси́ша Тя, Гóсподи. Мы же, лю́дiе Твоѝ и óвцы пáжити Твоея́, исповéмыся Тебè, Бóже, во век, в род и род возвести́м хвалý Твою́.
[Псалом 79]Пасы́й Iзрáиля вонмѝ: наставля́яй я́ко овчà Ióсифа, седя́й на Херувíмех, яви́ся, пред Ефрéмом и Вениамíном и Манассíем, воздви́гни си́лу Твою́, и прiидѝ во éже спастѝ нас. Бóже, обратѝ ны, и просветѝ лицè Твоè, и спасéмся. Гóсподи Бóже сил, докóле гнéваешися на моли́тву раб Твои́х? Напитáеши нас хлéбом слéзным, и напои́ши нас слезáми в мéру. Положи́л есѝ нас в пререкáнiе сосéдом нáшым, и вразѝ нáши подражни́ша ны. Гóсподи Бóже сил, обратѝ ны, и просветѝ лицè Твоè, и спасéмся. Вiногрáд из Еги́пта пренéсл есѝ, изгнáл есѝ язы́ки, и насади́л есѝ ѝ. Путесотвори́л есѝ пред ним, и насади́л есѝ корéнiя егò, и испóлни зéмлю. Покры̀ гóры сень егò, и вéтвiя егò кéдры Бóжiя; прострè рóзги егò до мóря, и дáже до рек óтрасли егò. Вскýю низложи́л есѝ оплóт егò, и объимáют ѝ вси мимоходя́щiи путéм? Озобà ѝ вепрь от дубрáвы, и уединéнный ди́вiй поядè ѝ. Бóже сил, обрати́ся ýбо, и при́зри с Небесè и виждь, и посетѝ вiногрáд сей, и совершѝ ѝ, егóже насадѝ десни́ца Твоя́, и на сы́на человéческаго, егóже укрепи́л есѝ Себè. Пожжéн огнéм и раскóпан, от запрещéнiя лицà Твоегò поги́бнут. Да бýдет рукà Твоя́ на мýжа десни́цы Твоея́, и на сы́на человéческаго, егóже укрепи́л есѝ Себè, и не отстýпим от Тебè; оживи́ши ны, и и́мя Твоè призовéм. Гóсподи Бóже сил, обратѝ ны, и просветѝ лицè Твоè, и спасéмся.
[Псалом 80]Рáдуйтеся Бóгу, Помóщнику нáшему, воскли́кните Бóгу Iáковлю, прiими́те псалóм и дади́те тимпáн, псалти́рь красéн с гýсльми, воструби́те в новомéсячiи трубóю, во благознамени́тый день прáздника вáшего, я́ко повелéнiе Iзрáилеви есть, и судьбà Бóгу Iáковлю. Свидéнiе во Ióсифе положѝ è, внегдà изы́ти емý от землѝ Еги́петскiя, язы́ка егóже не вéдяше услы́ша. Отъя́т от брéмене хребéт егò, рýце егò в кошѝ порабóтасте. В скóрби призвáл Мя есѝ, и избáвих тя, услы́шах тя в тáйне бýрне, искуси́х тя на водè пререкáнiя. Слы́шите, лю́дiе моѝ, и засвидéтельствую вам, Iзрáилю, áще послýшаеши Менè. Не бýдет Тебè бог нов, нижè поклони́шися бóгу чуждéму. Аз бо есмь Госпóдь Бог твой, изведы́й тя от землѝ Еги́петскiя, разширѝ устà Твоя́, и испóлню я́. И не послýшаша лю́дiе мои́ глáса Моегò, и Iзрáиль не внят Ми: и отпусти́х я́ по начинáнiем сердéц их, пóйдут в начинáнiих свои́х. А́ще бы́ша лю́дiе Моѝ послýшали Менè, Iзрáиль áще бы в путѝ Моя́ ходи́л, ни о чесóм же ýбо врагѝ егò смири́л бых, и на оскорбля́ющыя их возложи́л бых рýку Мою́. Вразѝ Госпóдни солгáша Емý, и бýдет врéмя их в век. И напитà их от тýка пшени́чна, и от кáмене мéда насы́ти их.
[Псалом 81]Бог ста в сóнме богóв, посредè же бóги разсýдит. Докóле сýдите непрáвду, и ли́ца грéшников прiéмлете? Суди́те си́ру и убóгу, смирéна и ни́ща оправдáйте. Изми́те ни́ща и убóга, из рукѝ грéшничи избáвите егò. Не познáша, нижè уразумéша, во тьме хóдят: да подви́жатся вся основáнiя землѝ. Аз рех: бóзи естè, и сы́нове Вы́шняго вси. Вы же я́ко человéцы умирáете, и я́ко еди́н от князéй пáдаете. Воскреснѝ, Бóже, судѝ землѝ: я́ко Ты наслéдиши во всех язы́цех.
Продолженiе здесь