Среда четвертой седмицы по ПАСХЕ. ПРЕПОЛОВЕНИЕ ПЯТИДЕСЯТНИЦЫ. ВЕЛИКАЯ ВЕЧЕРНЯ. Служба мирским чином
29 мáя 2024 гóда. Средà 4-й седмúцы по Пáсхе. Преполовéнiе Пятидеся́тницы. Глас 3. Слýжба для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба совершáется по Трióди. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелò./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делà Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже есѝ насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя́, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л есѝ тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Девятая кафизма
Читáем кафíсму 9-ю лúбо 1-ю cтатiю.
[Псалом 64]Тебè подобáет песнь, Бóже, в Сióне, и Тебè воздáстся моли́тва во Iерусали́ме. Услы́ши моли́тву мою́, к Тебè вся́ка плоть прiи́дет. Словесà беззакóнник премогóша нас, и нечéстiя нáша Ты очи́стиши. Блажéн, егóже избрáл есѝ и прiя́л, всели́тся во двóрех Твои́х. Испóлнимся во благи́х дóму Твоегò, свят храм Твой ди́вен в прáвде. Услы́ши ны, Бóже, Спаси́телю наш, уповáнiе всех концéй землѝ, и сýщих в мóри далéче уготовля́яй гóры крéпостiю Своéю, препоя́сан си́лою смущáяй глубинý морскýю, шýму волн егò кто постои́т? Смятýтся язы́цы и убоя́тся живýщiи в концáх от знáменiй Твои́х, исхóды ýтра и вéчера украси́ши. Посети́л есѝ зéмлю и упои́л есѝ ю́, умнóжил есѝ обогати́ти ю́. Рекà Бóжiя напóлнися вод. Уготóвал есѝ пи́щу им, я́ко тáко [есть] уготóванiе. Бразды̀ ея́ упóй, умнóжи жи́та ея́, в кáплях ея́ возвесели́тся возсiя́ющи. Благослови́ши венéц лéта блáгости Твоея́, и поля́ Твоя́ испóлнятся тýка разботéют крáсная пусты́ни, и рáдостiю хóлми препоя́шутся. Одéяшася óвни óвчiи, и удóлiя умнóжат пшени́цу, воззовýт, и́бо воспою́т.
[Псалом 65]Воскли́кните Гóсподеви, вся земля́, пóйте же и́мени Егò, дади́те слáву хвалè Егò. Рцы́те Бóгу: коль стрáшна делà Твоя́? Во мнóжестве си́лы Твоея́ сóлжут Тебè вразѝ Твоѝ. Вся земля́ да поклóнится Тебè и поéт Тебè, да поéт же и́мени Твоемý, Вы́шнiй. Прiиди́те и ви́дите делà Бóжiя, коль стрáшен в совéтех пáче сынóв человéческих. Обращáяй мóре в сýшу, в рецè прóйдут ногáми, тáмо возвесели́мся о Нем Влады́чествующем си́лою Своéю вéком. О́чи Егò на язы́ки призирáете, преогорчевáющiи да не вознóсятся в себè. Благослови́те, язы́цы, Бóга нáшего и услы́шан сотвори́те глас хвалы̀ Егò полóжшаго дýшу мою́ в живóт и не дáвшаго во смятéнiе ног мои́х. Я́ко искуси́л ны есѝ, Бóже, разжéгл ны есѝ, я́коже разжизáется сребрò. Ввел ны есѝ в сеть, положи́л есѝ скóрби на хребтè нáшем. Возвéл есѝ человéки на главы̀ нáша, проидóхом сквозè огнь и вóду, и извéл есѝ ны в покóй. Вни́ду в дом Твой со всесожжéнiем, воздáм Тебè моли́твы моя́ я́же изрекóсте устнè мои́, и глагóлаша устà моя́ в скóрби моéй всесожжéнiя тýчна вознесý Тебè с кади́лом, и овны̀, вознесý Тебè волы̀ с козлы̀. Прiиди́те, услы́шите, и повéм вам, вси боя́щiися Бóга, ели́ка сотвори́ душѝ моéй. К Немý усты̀ мои́ми воззвáх и вознесóх под язы́ком мои́м. Непрáвду áще узрéх в сéрдце моéм, да не услы́шит менè Госпóдь. Сегò рáди услы́ша мя Бог, внят глáсу молéнiя моегò. Благословéн Бог, и́же не отстáви моли́тву мою́ и ми́лость Свою́ от менè.
[Псалом 66]Бóже, ущéдри ны и благословѝ ны, просветѝ лицè Твоè на ны и поми́луй ны. Познáти на землѝ путь Твой, во всех язы́цех спасéнiе Твоè. Да исповéдятся Тебè лю́дiе, Бóже, да исповéдятся Тебè лю́дiе вси. Да возвеселя́тся и да возрáдуются язы́цы, я́ко сýдиши лю́дем правотóю и язы́ки на землѝ настáвиши. Да исповéдятся Тебè лю́дiе, Бóже, да исповéдятся Тебè лю́дiе вси. Земля́ дадè плод свой, благословѝ ны, Бóже, Бóже наш благословѝ ны, Бóже, и да убоя́тся Егò вси концы̀ землѝ.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 67]Да воскре́снет Бог, и расточа́тся врази́ Егò, и да бежа́т от лицà Егò ненави́дящiи Егò. Я́ко исчеза́ет дым, да исче́знут, я́ко та́ет воск от лица́ огня́, та́ко да поги́бнут гре́шницы от лицà Бо́жiя а пра́ведницы да возвеселя́тся, да возра́дуются пред Бо́гом, да насладя́тся в весе́лiи. Воспо́йте Бо́гу, по́йте и́мени Егò, путесотвори́те возше́дшему на за́пады. Госпо́дь и́мя Емý, и ра́дуйтеся пред Ним. Да смяту́тся от лицà Егò, Отцà си́рых и судiи́ вдови́ц: Бог в ме́сте святе́м Свое́м. Бог вселя́ет единомы́сленныя в дом, изводя́ окова́нныя мýжеством, та́кожде преогорчева́ющыя живýщыя во гробе́х. Бо́же, внегдà исходи́ти Тебе́ пред людьми́ Твои́ми, внегда́ мимоходи́ти Тебе́ в пусты́ни земля́ потрясе́ся, и́бо небесà ка́нуша от лица́ Бо́га Сiна́ина, от лицà Бо́га Iзра́илева. Дождь во́лен отлучи́ши, Бо́же, достоя́нiю Твоемý и изнемо́же, Ты же соверши́л еси́ е́. Живо́тная Твоя́ живýт на ней, угото́вал еси́ бла́гостiю Твое́ю ни́щему, Бо́же. Госпо́дь даст глаго́л благовествýющым си́лою мно́гою. Царь сил возлю́бленнаго, красото́ю до́му раздели́ти коры́сти. А́ще поспите́ посреде́ преде́л, криле́ голуби́не посре́брене, и междора́мiя ея́ в блеща́нiи зла́та. Внегдà ра́знствит Небе́сный цари́ на ней, оснежа́тся в Селмо́не. Горà Бо́жiя, горà тýчная, горà усыре́нная, горà тýчная. Вскýю непщýете го́ры усыре́нныя? Горà, ю́же благоволи́ Бог жи́ти в ней, и́бо Госпо́дь всели́тся до концà. Колесни́ца Бо́жiя тма́ми тем, ты́сяща гобзýющих, Госпо́дь в них в Сiна́и во святе́м. Возше́л еси́ на высотý, плени́л еси́ плен, прiя́л еси́ дая́нiя в челове́цех, и́бо не покаря́ющыяся, е́же всели́тися. Госпо́дь Бог благослове́н, благослове́н Госпо́дь день дне, поспеши́т нам Бог спасе́нiй на́ших. Бог наш, Бог е́же спаса́ти, и Госпо́дня, Госпо́дня исхо́дища сме́ртная. Оба́че Бог сокруши́т главы̀ враго́в Свои́х, верх влас преходя́щих в прегреше́нiих свои́х. Рече́ Госпо́дь: от Васа́на обращý, обращý во глубина́х морски́х. Я́ко да омо́чится ногà Твоя́ в кро́ви, язы́к пес твои́х, от враг от негò. Ви́дена бы́ша ше́ствiя Твоя́, Бо́же, ше́ствiя Бо́га моего́ Царя́, и́же во святе́м предвари́ша кня́зи близ пою́щих, посреде́ дев тимпа́нниц. В це́рквах благослови́те Бо́га, Го́спода от исто́чник Iзра́илевых. Та́мо Венiами́н юне́йшiй во ýжасе, кня́зи Iýдовы влады́ки их, кня́зи Завуло́ни, кня́зи Неффали́мли. Запове́ждь, Бо́же, си́лою Твое́ю, укрепи́, Бо́же, сiе́, е́же соде́лал еси́ в нас. От хра́ма Твоегò во Iерусали́м Тебе́ принесýт ца́рiе да́ры. Запрети́ звере́м тро́стным, сонм юне́ц в ю́ницах людски́х, е́же затвори́ти искуше́нныя сребро́м, расточи́ язы́ки хотя́щыя бра́нем. Прiи́дут моли́твенницы от Еги́пта, Ефiо́пiа предвари́т рýку свою́ к Бо́гу. Ца́рства земна́я, по́йте Бо́гу, воспо́йте Го́сподеви возше́дшему на Не́бо небесе́ на восто́ки, се даст гла́су Своемý глас си́лы. Дади́те сла́ву Бо́гови, на Iзра́или велеле́пота Егò, и си́ла Егò на о́блацех. Ди́вен Бог во святы́х Свои́х, Бог Iзра́илев: Той даст си́лу и держа́ву лю́дем Свои́м, благослове́н Бог.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 68]Спасѝ, мя, Бо́же, я́ко внидо́ша во́ды до душѝ моея́. Углебо́х в тиме́нiи глубины́, и несть постоя́нiя. Прiидо́х во глубины́ морски́я, и бу́ря потопѝ мя. Утруди́хся зовы́й, измолче́ горта́нь мой, исчезо́сте о́чи моѝ, от е́же упова́ти ми на Бо́га моего́. Умно́жишася па́че влас главы́ моея́ ненави́дящiи мя ту́не, укрепи́шася вразѝ моѝ, изгоня́щiи мя непра́ведно: я́же не восхища́х, тогда́ воздая́х. Бо́же, Ты уве́дел есѝ безу́мiе мое́, и прегреше́нiя моя́ от Тебе́ не утаи́шася. Да не постыдя́тся о мне терпя́щiи Тебе́, Го́споди, Го́споди сил, ниже́ да посра́мятся о мне и́щущiи Тебе́, Бо́же Iзра́илев. Я́ко Тебе́ ра́ди претерпе́х поноше́нiе, покры́ срамота́ лице́ мое́. Чуждь бых бра́тiи мое́й, и стра́нен сыново́м ма́тере моея́. Я́ко ре́вность до́му Твоего́ снеде́ мя, и поноше́нiя понося́щих Ти нападо́ша на мя. И покры́х посто́м ду́шу мою́, и бысть в поноше́нiе мне и положи́х одея́нiе мое́ вре́тище, и бых им в при́тчу. О мне глумля́хуся седя́щiи во врате́х, и о мне поя́ху пiю́щiи вино́. Аз же моли́твою мое́ю к Тебе́, Бо́же, вре́мя благоволе́нiя, Бо́же, во мно́жестве ми́лости Твоея́ услы́ши мя, во и́стине спасе́нiя Твоего́. Спасѝ мя от бре́нiя, да не угле́бну, да изба́влюся от ненави́дящих мя и от глубо́ких вод. Да не потопи́т мене́ бу́ря водна́я, ниже́ да пожре́т мене́ глубина́, ниже́ сведе́т о мне рове́нник уст свои́х. Услы́ши мя, Го́споди, я́ко бла́га ми́лость Твоя́, по мно́жеству щедро́т Твои́х при́зри на мя. Не отвратѝ лица́ Твоего́ от о́трока Твоего́, я́ко скорблю́, ско́ро услы́ши мя. Вонмѝ душѝ мое́й, и изба́ви ю́, враг мои́х ра́ди изба́ви мя. Ты бо ве́си поноше́нiе мое́ и студ мой, и срамоту́ мою́: пред Тобо́ю вси оскорбля́ющiи мя. Поноше́нiе ча́яше душа́ моя́, и стра́сть и ждах соскорбя́щаго, и не бе́, и утеша́ющих, и не обрето́х. И да́ша в снедь мою́ желчь, и в жа́жду мою́ напои́ша мя о́цта. Да бу́дет трапе́за их пред ни́ми в сеть, и в воздая́нiе, и в собла́зн. Да помрача́тся о́чи их, е́же не ви́дети, и хребе́т их вы́ну сляцы̀. Проле́й на ня́ гнев Твой, и я́рость гне́ва Твоего́ да пости́гнет их. Да бу́дет двор их пуст, и в жили́щах их да не бу́дет живы́й. Зане́ его́же Ты порази́л есѝ, ти́и погна́ша, и к боле́зни язв мои́х приложи́ша. Приложѝ беззако́нiе к беззако́нiю их, и да не вни́дут в пра́вду Твою́. Да потребя́тся от кни́ги живы́х и с пра́ведными да не напи́шутся. Нищ и боля́й есмь аз: спасе́нiе Твое́, Бо́же, да прiи́мет мя. Восхвалю́ и́мя Бо́га моего́ с пе́снiю, возвели́чу Его́ во хвале́нiи: и уго́дно бу́дет Бо́гу па́че тельца́ ю́на, ро́ги износя́ща и па́знокти. Да у́зрят ни́щiи и возвеселя́тся: взыщи́те Бо́га, и жива́ будет душа́ ва́ша. Я́ко услы́ша убо́гiя Госпо́дь и окова́нныя Своя́ не уничижѝ. Да восхва́лят Его́ небеса́ и земля́, мо́ре и вся живу́щая в нем. Я́ко Бог спасе́т Сiо́на, и сози́ждутся гра́ди Iуде́йстiи, и вселя́тся та́мо, и насле́дят ѝ и се́мя рабо́в Твои́х удержи́т ѝ, и лю́бящiи и́мя Твое́ вселя́тся в нем.
[Псалом 69]Бóже, в пóмощь мою́ вонмѝ, Гóсподи, помощѝ ми потщи́ся. Да постыдя́тся и посрáмятся и́щущiи дýшу мою́, да возвратя́тся вспять и постыдя́тся хотя́щiи ми злáя. Да возвратя́тся áбiе стыдя́щеся глагóлющiи ми: блáгоже, блáгоже. Да возрáдуются и возвеселя́тся о Тебè вси и́щущiи Тебè, Бóже, и да глагóлют вы́ну, да возвели́чится Госпóдь, лю́бящiи спасéнiе Твоè: аз же нищ есмь и убóг, Бóже, помозѝ ми: Помóщник мой и Избáвитель мой есѝ Ты, Гóсподи, не закоснѝ.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 4
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
[Пропускается до стихир]Изведѝ из темни́цы дýшу мою́, исповéдатися и҆́мени Твоемý. Менè ждут прáведницы, дóндеже воздáси мне. Из глубины̀ воззвáх к Тебè, Гóсподи,// Гóсподи, услы́ши глас мой. Да бýдут ýши Твоѝ// внéмлюще глáсу молéнiя моегò.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúры Трióди (Преполовéнiю), глас 4: Настà преполовéнiе дней,/ от спаси́тельнаго начинáемых востáнiя,/ Пятдеся́тницею же Божéственною печáтаемое,/ и свéтится свéтлости обою́ду имýщее, и соединя́ющее обоя́,/ и прiитѝ слáве предъявля́ющее,/ Влады́чняго Вознесéнiя предпочитáет.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Настà преполовéнiе дней,/ от спаси́тельнаго начинáемых востáнiя,/ Пятдеся́тницею же Божéственною печáтаемое,/ и свéтится свéтлости обою́ду имýщее, и соединя́ющее обоя́,/ и прiитѝ слáве предъявля́ющее,/ Влады́чняго Вознесéнiя предпочитáет.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Слы́ша и возвесели́ся Сióн, благовести́вшуся Хрїстóву Воскресéнiю: вéрнiи же егò сы́нове возрáдовашася Сегò ви́девше, и омывáюща Дýхом сквéрну хрiстоубíйства: готóвится торжествýющи, обои́х весéлое преполовéнiе.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúра: Слы́ша и возвесели́ся Сióн, благовести́вшуся Хрїстóву Воскресéнiю: вéрнiи же егò сы́нове возрáдовашася Сегò ви́девше, и омывáюща Дýхом сквéрну хрiстоубíйства: готóвится торжествýющи, обои́х весéлое преполовéнiе.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Прибли́жися Божéственнаго изъоби́льное изли́тiе на всех, я́коже написáся, Дýха: предъузаконéнiе проповéдует преполови́вшееся, по Хрїстóве смéрти и погребéнiи и Воскресéнiи, от Негò дáнну сýщу ученикóм, нелóжному обещáнiю, Утéшителево показýющу явлéнiе.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Прибли́жися Божéственнаго изъоби́льное изли́тiе на всех, я́коже написáся, Дýха: предъузаконéнiе проповéдует преполови́вшееся, по Хрїстóве смéрти и погребéнiи и Воскресéнiи, от Негò дáнну сýщу ученикóм, нелóжному обещáнiю, Утéшителево показýющу явлéнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 6: Прáзднику преполовля́ющуся, Твоегò Хрїстè Воскресéнiя,/ и Божéственнаго пришéствiя Святáго Твоегò Дýха,/ сошéдшеся чудéс Твои́х воспевáем тáинства,/ вóньже низпосли́ нам вéлiю ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ВЕЧЕРНИЙ ПРОКИМЕН ДНЯ (ВЕЧЕРА ВТОРНИКА)
Чтец: Прокíмен, глас пéрвый: Ми́лость Твоя́, Гóсподи, поженéт мя вся дни животà моегò. (Пс.22:6А)
Хор: Мúлость Твоя́, Гóсподи,/ поженéт мя вся дни животà моегò.
Чтец: Госпóдь пасéт мя, и ничтóже мя лиши́т, на мéсте злáчне, тáмо всели́ мя. (Пс.22:1-2А)
Хор: Мúлость Твоя́, Гóсподи,/ поженéт мя вся дни животà моегò.
Чтец: Ми́лость Твоя́, Гóсподи.
Хор: Поженéт мя вся дни животà моегò.
ПАРЕМИИ ПРЕПОЛОВЕНИЯ
Чтец: Прорóчества Мiхéина чтéнiе.
(Из глав 4, 5 и 6): Та́ко глаго́лет Госпо́дь: от Сiо́на изы́дет зако́н, и сло́во Госпо́дне из Iерусали́ма, и су́дит посреди́ людéй мно́гих, и обличи́т язы́ки крéпкiя да́же на до́лзе, я́ко вси лю́дiе по́йдут ки́йждо свои́м путéм: мы же по́йдем и́менем Го́спода Бо́га на́шего в век. Та́ко глаго́лет Госпо́дь Вседержи́тель: услы́шите хо́лми суд Госпо́день, и де́бри основа́нiя земли́, я́ко суд Го́сподеви к лю́дем его́, и со Iзра́илем сопри́тся, глаго́ля: лю́дiе Мои́, что́ сотвори́х вам? или́ чим опеча́лих вас? отвеща́йте Ми: зане́ возведо́х вы от земли́ Еги́петския, и из до́му рабо́ты изба́вих вас, и посла́х пред лицéм ва́шим Моисéа и Ааро́на и Марiа́м. Лю́дiе Мои́ [помяни́те у́бо], что́ совеща́ша на вас сопроти́внiи? кто возвести́ тебе́? возвести́х бо тебе́, человéче, что добро́, или́ что Госпо́дь и́щет от Тебе́, ра́зве твори́ти суд, и люби́ти ми́лость, и гото́ву бы́ти, éже ходи́ти с Го́сподем Бо́гом твои́м: зане́ в крéпости возвели́чится Госпо́дь, и упасéт ста́до Свое́ в ми́ре, да́же до конéц земли́.
[Cинодальный перевод]Так говорит Господь: от Сиона выйдет закон и слово Господне - из Иерусалима. И будет Он судить многие народы, и обличит многие племена в отдаленных странах. Ибо все народы ходят, каждый во имя своего бога; а мы будем ходить во имя Господа Бога нашего во веки веков. Так говорит Господь: Слушайте, горы, суд Господень, и вы, твердые основы земли: ибо у Господа суд с народом Своим, и с Израилем Он состязуется. Народ Мой! что сделал Я тебе и чем отягощал тебя? отвечай Мне. Я вывел тебя из земли Египетской и искупил тебя из дома рабства, и послал перед тобою Моисея, Аарона и Мариам. Народ Мой! вспомни же, что замыслили против тебя противники? Кто сказал тебе? О, человек! сказано тебе, что - добро и чего требует от тебя Господь: действовать справедливо, любить дела милосердия и смиренномудренно ходить пред Богом твоим. И станет Он, и будет пасти в силе Господней, в величии имени Господа Бога Своего, и они будут жить безопасно, ибо тогда Он будет великим до краев земли.(Мих.4:2-3 5; 6:2-5, [?], 8; 5:4)
Чтец: Прорóчества Исáiина чтéнiе.
(Из главы 55): Тáко глаго́лет Госпо́дь: жáждущiи иди́те на во́ду, и ели́цы не и́мате сребра́, шéдше купи́те, и яди́те, пи́йте без сребра́ и цены́, вино́ и тук. Я́ко тáко глаго́лет Госпо́дь Вседержи́тель вам: лю́дiе Мои́, почерпи́те во́ду с весéлiем от исто́чник спасéнiя. И речéши в день о́ный: воспо́йте Го́сподеви, призови́те и́мя Его́, возвести́те во язы́цех слáвная его́: помяни́те, я́ко вознесéся и́мя Его́. Лю́дiе Мои́, услы́шите Мене́, и снéсте благáя, и наслади́тся во благи́х душа́ вáша. Внуши́те уши́ма вáшима, и послéдуйте путéм Мои́м. Услы́шите Мене́, и жива́ бу́дет во благи́х душа́ вáша, и завещáю вам завéт вéчный, и призови́те. Внегда́ же áще прибли́житеся Мне, да остáвит нечести́вый пути́ своя́, и муж беззако́нный совéты своя́, и обрати́теся ко мне, и поми́лую вас, и остáвлю грехи́ вáшя. Не суть бо совéти Мои́, я́коже совéти вáши, ни я́коже путiе́ вáши путiе́ Мои́, глаго́лет Госпо́дь. Но я́коже отстои́т нéбо от земли́, тáко отстои́т путь Мой от путéй вáших, и умышлéнiя вáша от мы́сли Моея́. Я́коже бо áще сни́дет дождь, или́ снег с небесе́, и не возврати́тся отту́ду, до́ндеже упои́т зéмлю, и израсти́т, и прозя́бнет, и даст сéмя сéющему, и хлеб в снедь: Си́це бу́дет глаго́л Мой, и́же áще изы́дет из уст Мои́х, не возврати́тся ко Мне тощ, до́ндеже скончáет вся, ели́ка восхотéх, и испрáвлю пути́ твоя́, и зáповеди Моя́. С весéлiем бо изы́дете, и с рáдостiю научи́теся: го́ры бо и хо́лми возскáчут, жду́ще вас в рáдости, и вся древа́ сéльная восплéщут вéтвьми. И вмéсто дрáчiя взы́дет кипари́с, вмéсто же кропи́вы взы́дет мирси́на: и бу́дет Госпо́дь во и́мя, и в знáменiе вéчное, и не оскудéет, глаго́лет Госпо́дь Бог Святы́й Iзрáилев.
[Cинодальный перевод]Так говорит Господь: жаждущие! идите все к водам; даже и вы, у которых нет серебра, идите, покупайте и ешьте; идите, покупайте без серебра и без платы вино и молоко. И в радости будете почерпать воду из источников спасения, и скажете в тот день: славьте Господа, призывайте имя Его; возвещайте в народах дела Его; напоминайте, что велико имя Его. Для чего вам отвешивать серебро за то, что не хлеб, и трудовое своё за то, что не насыщает? Послушайте Меня внимательно и вкушайте благо, и душа ваша да насладится туком. Приклоните ухо ваше и придите ко Мне: послушайте, и жива будет душа ваша, - и дам вам завет вечный, неизменные милости, обещанные Давиду. Ищите Господа, когда можно найти Его; призывайте Его, когда Он близко. Да оставит нечестивый путь свой и беззаконник - помыслы свои, и да обратится к Господу, и Он помилует его, и к Богу нашему, ибо Он многомилостив. Мои мысли - не ваши мысли, ни ваши пути - пути Мои, говорит Господь. Но как небо выше земли, так пути Мои выше путей ваших, и мысли Мои выше мыслей ваших. Как дождь и снег нисходит с неба и туда не возвращается, но напояет землю и делает её способною рождать и произращать, чтобы она давала семя тому, кто сеет, и хлеб тому, кто ест, - так и слово Моё, которое исходит из уст Моих, - оно не возвращается ко Мне тщетным, но исполняет то, что Мне угодно, и совершает то, для чего Я послал его. Итак вы выйдете с веселием и будете провожаемы с миром; горы и холмы будут петь пред вами песнь, и все дерева в поле рукоплескать вам. Вместо терновника вырастет кипарис; вместо крапивы возрастет мирт; и это будет во славу Господа, в знамение вечное, несокрушимое.(Ис.55:1; 12:3-4; 55:2-3 6-13)
Чтец: При́тчей чтéнiе.
(Из главы 9): Премýдрость создà Себè дом и утвердѝ столпóв седмь. Заклà Своя́ жéртвенная, и растворѝ в чáши Своéй винò, и уготóва Свою́ трапéзу. Послà Своя́ рабы̀, созывáющи с высóким проповéданiем на чáшу, глагóлющи: И҆́же есть безýмен, да уклони́тся ко Мне. И трéбующим умà речè: Прiиди́те, яди́те Мой хлеб, и пíйте винò, éже раствори́х вам. Остáвите безýмiе и жи́ви бýдете, и взыщи́те рáзума, да поживетè, и испрáвите рáзум в вéденiи. Наказýяй злы́я прiи́мет себè безчéстiе, обличáяй же нечести́ваго опорóчит себè: обличéнiя бо нечести́вому рáны емý. Не обличáй злых, да не возненави́дят тебè. Обличáй премýдра, и возлю́бит тя. Даждь премýдрому винý, и премýдршiй бýдет. Сказýй прáведному, и приложи́т прiимáти. Начáло премýдрости страх Госпóдень и совéт святы́х рáзум: разумéти бо закóн пóмысла есть благáго. Сим бо óбразом мнóгое поживéши врéмя, и приложáтся тебè лéта животà.
[Cинодальный перевод]Премудрость построила себе дом, вытесала семь столбов его, заколола жертву, растворила вино своё и приготовила у себя трапезу; послала слуг своих провозгласить с возвышенностей городских: "кто неразумен, обратись сюда!" И скудоумному она сказала: "идите, ешьте хлеб мой и пейте вино, мною растворенное; оставьте неразумие, и живите, и ходите путем разума". Поучающий кощунника наживет себе бесславие, и обличающий нечестивого - пятно себе. Не обличай кощунника, чтобы он не возненавидел тебя; обличай мудрого, и он возлюбит тебя; дай наставление мудрому, и он будет еще мудрее; научи правдивого, и он приумножит знание. Начало мудрости - страх Господень, и познание Святого - разум; потому что чрез меня умножатся дни твои, и прибавится тебе лет жизни.(Притч.9:1-11)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
СТИХИРЫ НА СТИХОВНЕ
Стiхúры Трióди (Преполовéнiю), глас 1: Пятдеся́тницы настà дней преполовéнiе, в нéмже Хрїстóс обнажи́в малови́дно Божéственную си́лу, разслáбленнаго стягнý слóвом, тогò от одрà возстáвив, и Боголéпно чудотворя́й в здáнном тéле, человéком даровà вéчный живóт, и вéлiю ми́лость.
Помянѝ сонм Твой, егóже стяжáл есù испéрва.(Пс.73:2А)
Стiхúра: Во святи́лище пришéл есѝ Премýдросте Бóжiя, преполовля́ющуся прáзднику, учя́ и обличáя непокори́выя iудéи, фарiсéи и кни́жники, и вопiя́ со дерзновéнiем к ним: жáждай да грядéт ко Мне, и пiéт вóду живóтную, и не вжáждет во век: вéруяй Моéй блáгости, рéки потекýт из чрéва егò жи́зни вéчныя. О блáгости и благоутрóбiя Твоегò Хрїстè Бóже наш, слáва Тебè!
Бог же Царь наш прéжде вéка, содéла спасéнiе посредè землù. (Пс.73:12)
Глас 2: Егдà преполовéнiе прáздника настà, взы́де Iисýс во святи́лище, и учáше непокори́выя iудéи, глагóля: жáждай да грядéт ко Мне, и пiéт вóду живóтную, вéчную, и не вжáждется во век. Вéруяй в Мя, рéки потекýт из чрéва егò, и имéти бýдет свет живóтный.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 8: Преполови́вшуся прáзднику, учáщу Ти Спáсе, глагóлаху iудéе: кáко Сей весть пи́смена, не учи́вся? Не разумéюще, я́ко Ты есѝ Премýдрость устрóившая мiр, слáва Тебè.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 8: Преполови́вшуся прáзднику,/ жáждущую дýшу мою́ благочéстiя напóй водáми,/ я́ко всем Спáсе возопи́л еси́:/ жáждай да грядéт ко Мне и да пiéт,/ истóчниче жи́зни нáшея Хрїстè Бóже, слáва Тебè.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере и всех святых, поми́лует и спасéт нас, яко Благ и Человеколю́бец. Ами́нь.
МНОГОЛЕТИЕ
И глагóли ýтреню