ОБЕДНИЦА (изобразительные) НЕДЕЛЯ ЧЕТВЕРТАЯ ПО ПАСХЕ, O РАССЛАБЛЕННОМ. Глас 3. Служба мирским чином
26 мáя 2024 гóда. Недéля четвéртая по Пáсхе, о расслáбленном. Глас 3. Воскрéсная прáздничная слýжба для домáшнего (келéйнаго) совершéнiя. Слýжба совершáется по Трióди. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егò./ Благословѝ, душè моя, Гóспода,/ и не забывáй всех воздая́нїй Егò,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля ю́ность твоя́./ Творя́й ми́лостыни Госпóдь,/ и судьбý всем оби́димым./ Сказà путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концà прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егò./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егò./ Я́ко Той познà создáнїе нáше,/ помянý, яко персть есмы̀./ Человéк, яко травà днíе eгò,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегò./ Ми́лость же Госпóдня от вéка и до вéка на боя́щихся Егò,/ и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я./ Госпóдь на Небесѝ уготóва Престóл Свой,/ и Цáрство Егò всéми обладáет./ Благослови́те Гóспода вси Áнгели Егò,/ си́льнїи крéпостїю, творя́щїи слóво Егò, услышати глас словéс Егò./ Благослови́те Гóспода вся Си́лы Егò,/ слýги Егò, творя́щїи вóлю Егò./ Благослови́те Гóспода вся делà Егò,/ на всяком мéсте влады́чества Егò.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егò./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгò/ и возврати́тся в зéмлю свою́./ В той день поги́бнут вся помышлéнїя eгò./ Блажéн, eмýже Бог Iáковль Помóщник егò,/ уповáнiе eгò на Гóспода Бóга своегò,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы̀./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдà прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры Трióди, глас 3): Отвéргшаго, Хрїстè, зáповедь Твою́,/ прáотца Адáма из рая́ изгнáл есѝ:/ разбóйника же щéдре исповéдавша Тя на крестè,/ вонь всели́л есѝ, зовýща:// помянѝ мя, Спáсе, во цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Воскрéс из мéртвых, совоскреси́л есѝ нас от страстéй/ воскресéнiем Твои́м, Гóсподи:/ смéртную же всю си́лу погуби́л есѝ, Спáсе./ Сегò рáди вéрою Ти зовéм:// помяни́ и нас во цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Триднéвным Твои́м погребéнiем,/ и҆̀же во áде умерщвлéнныя, я́ко Бог, оживотвори́вый, совоздви́гл есѝ,/ и нетлéнiе всем, я́ко Благ, источи́л есѝ нам, вéрою зовýщим всегдà:// помянѝ и нас во цáрствiи Твоéм.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Согрéшших нас смéртною осуди́л есѝ кля́твою, Живодáвче и Гóсподи,/ тéлом же Твои́м, безгрéшне Влады́ко, пострадáв,/ смéртныя оживи́л есѝ зовýщыя:// помянѝ и нас во цáрствiи Твоéм.
На 4. Хор: Блажéни естè, егдà понóсят вам,/ и изженýт, и рекýт всяк зол глагóл на вы лжýще Менè рáди.
На 4.Чтец (недéли о расслáбленном, глас 3): Вознесы́йся вóлею на Дрéво,/ положи́лся еси́ я́ко мертв во грóбе,/ и сýщiя во áде мéртвыя вся вкýпе оживи́в, Хрiстé,// воскреси́л еси́ Божéственною си́лою.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Ад срет Тя Щéдре дóле, огорчи́ся,/ свя́занныя отдавáя со тщáнiем,/ Твоé стрáшное пою́щiя, Спáсе, Воскресéнiе,// во глáсех немóлчных.
Хор: Слáва Ѻтцý и Сы́ну и Святóму Дýху.
Трóичен: Трóицу Ли́цы Тя чту,/ Еди́ницу же Существóм проповéдаю,/ безначáльне Ѻ́тче, Сы́не, Дýше Прáвый: Бóже всех,// с вы́шними стрáшными вóинствы.
Хор: И ны́не и прúсно и во вéки векóв. Амúнь.
Богорóдичен: Вся Божéственным мановéнiем нося́й,/ держи́мь есть, Богорóдице Дéво, во объя́тiях Твои́х,// всех нас восхищáя, от руки́ рабóты лукáваго, я́ко Щедр.
Тропари и кондаки
Тропáрь воскрéсный, глас 3: Да веселя́тся небéсная,/ да рáдуются земнáя;/ я́ко сотворù держáву мы́шцею Своéю Госпóдь,/ попрà смéртiю смерть,/пéрвенец мéртвых бысть;/ из чрéва áдова избáви нас,// и подадè мíрови вéлiю мúлость.
Слáва Ѻтцý и Сы́ну и Святóму Дýху.
Кондáк прáздника Тріóди, (о расслáбленном) глас 3: Дýшу мою́, Гóсподи, во гресéх вся́ческих, и безмéстными дея́ньми лю́те разслáблену, воздвúгни Божéственным Твоúм предстáтельством, я́коже и разслáбленнаго воздвúгл есù дрéвле, да зовý Ти, спасáемь: Щéдрый, слáва Хрїстè, держáве Твоéй.
И ны́не и прúсно и во вéки векóв, амúнь.
Кондáк Пáсхи, глас 8: Áще и во гроб снизшéл есù, Безсмéртне,/ но áдову разрушúл есù сúлу,/ и воскрéсл есù, я́ко победúтель, Хрїстè Бóже,/ женáм миронóсицам вещáвый: рáдуйтеся,/ и Твоúм апóстолом мир дáруяй,// пáдшим подая́й воскресéнiе.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен Триоди, глас 1
Чтец: Прокíмен, глас пéрвый, псалóм Давíдов: Бýди, Гóсподи, ми́лость Твоя́ на нас, я́коже уповáхом на Тя. (Пс.32:22)
Хор: Бýди, Гóсподи, ми́лость Твоя́ на нас,/ я́коже уповáхом на Тя.
Чтец:Рáдуйтеся, прáведнiи, о Гóсподе, прáвым подобáет похвалà. (Пс.32:1)
Хор: Бýди, Гóсподи, ми́лость Твоя́ на нас,/ я́коже уповáхом на Тя.
Чтец: Бýди, Гóсподи, ми́лость Твоя́ на нас.
Хор: Я́коже уповáхом на Тя.
АПОСТОЛ
Чтец: Дея́нiй святы́х апóстол чтéнiе.
(Деян.зач.23): Во дни óны, бысть Петрý, посещáющу всех, сни́ти и ко святы́м живýщим в Ли́дде: Обрéте же тáмо человéка нéкоего, и́менем Енéа, от осми́ лет лежáща на одрé, и́же бе разслáблен. И речé емý Петр: Енéе, исцеля́ет тя Iисýс Хрiстóс, востáни с постéли твоея́. И áбiе востá: И ви́деша егó вси живýщiи в Ли́дде и во Ассарóне, и́же обрати́шася ко Гóсподу. Во Iоппíи же бе нéкая учени́ца, и́менем Тави́фа, я́же сказáема глагóлется, сéрна: сiя́ бя́ше испóлнена благи́х дел и ми́лостынь, я́же творя́ше. Бысть же во дни ты́я, болéвшей ей умрéти: омы́вше же ю́, положи́ша в гóрнице. Близ же сýщей Ли́дде Iоппíи, ученицы́ слы́шавше, я́ко Петр есть в ней, послáша два мýжа к немý, моля́ще егó не облени́тися прiитѝ до них. Востáв же Петр и́де с ни́ма, егóже пришéдша возведóша в гóрницу, и предстáша емý вся вдови́цы плáчуща, и показýюща ри́зы и одéжды, ели́ка творя́ше, с ни́ми сýщи, Сéрна. Изгнáв же вон вся Петр, преклóнь колéна помоли́ся, и обрáщься к тéлу, речé: Тави́фо, востáни. Онá же отвéрзе óчи своѝ, и ви́девши Петрá, сéде. Подáв же ей рýку, воздви́же ю́, и призвáв святы́я и вдови́цы, постáви ю́ жи́ву. Увéдано же бысть се по всей Iоппíи, и мнóзи вéроваша в Гóспода.
[Синодальный перевод]В те дни Петр, обходя всех, пришел и к святым, живущим в Лидде. Там нашел он одного человека, именем Энея, который восемь уже лет лежал в постели в расслаблении. Петр сказал ему: Эней! исцеляет тебя Иисус Христос; встань с постели твоей. И он тотчас встал. И видели его все, живущие в Лидде и в Сароне, которые и обратились к Господу. В Иоппии находилась одна ученица, именем Тавифа, что значит: «серна»; она была исполнена добрых дел и творила много милостынь. Случилось в те дни, что она занемогла и умерла. Ее омыли и положили в горнице. А как Лидда была близ Иоппии, то ученики, услышав, что Петр находится там, послали к нему двух человек просить, чтобы он не замедлил прийти к ним. Петр, встав, пошел с ними; и когда он прибыл, ввели его в горницу, и все вдовицы со слезами предстали перед ним, показывая рубашки и платья, какие делала Серна, живя с ними. Петр выслал всех вон и, преклонив колени, помолился, и, обратившись к телу, сказал: Тавифа! встань. И она открыла глаза свои и, увидев Петра, села. Он, подав ей руку, поднял ее, и, призвав святых и вдовиц, поставил ее перед ними живою. Это сделалось известным по всей Иоппии, и многие уверовали в Господа.(Деян.9:32-42)
Аллилуиарий, глас 5
Чтец: Аллилýїа, аллилýїа, аллилýїа, глас пя́тый.
Хор: Аллилýїа, аллилýїа, аллилýїа.
Чтец: Ми́лости Твоя́, Гóсподи, во век воспою́. (Пс.88:2А)
Хор: Аллилýїа, аллилýїа, аллилýїа.
Чтец: Занè рекл есѝ: во век ми́лость сози́ждется. (Пс.88:3А)
Хор: Аллилýїа, аллилýїа, аллилýїа.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.14) Во врéмя óно, взы́де Iисýс во Iерусали́м. Есть же во Iерусали́мех на Ѻ́вчей купéли, я́же глагóлется еврéйски Вифесдá, пять притвóр имýщи. В тех слежáше мнóжество боля́щих, слепы́х, хромы́х, сухи́х, чáющих движéнiя воды́. Áнгел бо Госпóдень на вся́ко лéто схождáше в купéль, и возмущáше вóду: и и́же пéрвее влáзяше по возмущéнiи воды́, здрав бывáше, яцéм же недýгом одержи́мь бывáше. Бе же ту нéкiй человéк, три́десять и осмь лет имы́й в недýзе своéм. Сегó ви́дев Iисýс лежáща, и разумéв, я́ко мнóга лéта ужé имя́ше в недýзе, глагóла емý: хóщеши ли цел бы́ти? Отвещá Емý недýжный: ей, Гóсподи, человéка не и́мам, да егдá возмути́тся вода, ввéржет мя в купéль: егдá же прихождý аз, ин прéжде менé слáзит. Глагóла емý Iисýс: востáни, возми́ одр твой, и ходи́. И áбiе здрав бысть человéк, и взем одр свой, и хождáше. Бе же суббóта в той день. Глагóлаху же жи́дове изцелéвшему: суббóта есть, и не достóит ти взя́ти одрá твоегó. Он же отвещá им: И҆́же мя сотвори́ цéла, Той мне речé: возми́ одр твой и ходѝ. Вопроси́ша же егó: кто есть Человéк рекíй ти: возми́ одр твой и ходѝ? Изцелéвый же не вéдяше, кто есть: Iисýс бо уклóнься, нарóду сýщу на мéсте. Потóм же обрéте егó Iисýс в цéркви, и речé емý: се здрав бысть, ктомý не согрешáй, да не гóрше ти что бýдет. И҆́де же человéк, и повéда iудéом, я́ко Iисýс есть, И҆́же мя сотвори́ цéла.
[Синодальный перевод]В те дни пришел Иисус в Иерусалим. Есть же в Иерусалиме у Овечьих ворот купальня, называемая по-еврейски Вифезда*, при которой было пять крытых ходов. //*Дом милосердия. В них лежало великое множество больных, слепых, хромых, иссохших, ожидающих движения воды, ибо Ангел Господень по временам сходил в купальню и возмущал воду, и кто первый входил в нее по возмущении воды, тот выздоравливал, какою бы ни был одержим болезнью. Тут был человек, находившийся в болезни тридцать восемь лет. Иисус, увидев его лежащего и узнав, что он лежит уже долгое время, говорит ему: хочешь ли быть здоров? Больной отвечал Ему: так, Господи; но не имею человека, который опустил бы меня в купальню, когда возмутится вода; когда же я прихожу, другой уже сходит прежде меня. Иисус говорит ему: встань, возьми постель твою и ходи. И он тотчас выздоровел, и взял постель свою и пошел. Было же это в день субботний. Посему Иудеи говорили исцеленному: сегодня суббота; не должно тебе брать постели. Он отвечал им: Кто меня исцелил, Тот мне сказал: возьми постель твою и ходи. Его спросили: кто Тот Человек, Который сказал тебе: возьми постель твою и ходи? Исцеленный же не знал, кто Он, ибо Иисус скрылся в народе, бывшем на том месте. Потом Иисус встретил его в храме и сказал ему: вот, ты выздоровел; не греши больше, чтобы не случилось с тобою чего хуже. Человек сей пошел и объявил Иудеям, что исцеливший его есть Иисус.(Ин.5:1-15)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк прáздника Тріóди, (о расслáбленном) глас 3: Дýшу мою́, Гóсподи, во гресéх вся́ческих, и безмéстными дея́ньми лю́те разслáблену, воздвúгни Божéственным Твоúм предстáтельством, я́коже и разслáбленнаго воздвúгл есù дрéвле, да зовý Ти, спасáемь: Щéдрый, слáва Хрїстè, держáве Твоéй.
Гóсподи, поми́луй. (12 раз)
И молúтву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою́, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Вместо Достойно есть (задостойник)
Хор, глас 1: Áнгел вопiя́ше Благодáтней:/ Чúстая Дéво, рáдуйся!/ И пáки рекý: рáдуйся!/ Твой Сын воскрéсе/ триднéвен от грóба,/ и мéртвыя воздвúгнувый:// лю́дiе, веселúтеся.
Iрмóс: Светúся, светúся,/ нóвый Iерусалúме:/ слáва бо Госпóдня/ на тебè возсiя́./ Ликýй ны́не/ и веселúся, Сióне./ Ты же, Чúстая, красýйся, Богорóдице,// о востáнiи Рождествà Твоегò.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, святых и прáведных богоотéц Iоакíма и Áнны, и всех святых, поми́луй и спасѝ нас, яко Благ и Человеколю́бец. Ами́нь.
Хрїстóс воскрéсе! Воúстину воскрéсе!
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (трижды)
И нам даровà живóт вéчный, покланяемся Егò триднéвному Воскресéнiю.
МНОГОЛЕТИЕ