Iрмóс: Богопротúвное велéнiе/ беззакóннующаго мучúтеля/ высóк плáмень вознеслó есть;/ Хрїстóс же прострè Богочестúвым отрокóм рóсу духóвную,// Сый благословéн и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Не терпéл есѝ, Влады́ко, за благоутрóбiе/ смéртiю человéка зрéти мýчима,/ но пришéл и спасл есѝ Твоéю крóвiю, человéк быв:// Сый благословéн и Препрослáвлен, Бог отец нáших.
На 12.Хор: Благословéн есù, Гóсподи, Бóже отéц нáших,/ и хвáльно и прослáвлено И́мя Твоè во вéки.
Чтец: Ви́девше Тя, Хрїстè, оболчéна во одéжду отмщéнiя,/ ужасóшася врáтницы áдовы:/ безýмнаго бо мучи́теля рабà, Влады́ко, пришéл есѝ уби́ти:// Сый благословéн и Препрослáвлен, Бог отéц нáших.
Хор: И вся делà Твоя́ úстинна, и прáви путiè Твоù.
Богорóдичен: Святы́х Святéйшую Тя разумéем,/ я́ко Еди́ну рóждшую Бóга Непремéннаго,/ Дéво Несквéрная, Мáти Безневéстная:/ всем бо вéрным источи́ла есѝ нетлéнiе,// Божéственным Рождествóм Твои́м.
Глас 8
На 10: И вси судù Твоù úстинни,/ и судьбы̀ úстинны сотворúл есù.
Чтец: Дерзновéнiя не и́мам,/ éже нарещи́ся сын Твой, Óтче Человеколю́бче,/ я́ко еди́наго от наéмник Твои́х бы́ти молю́ся,/ не гнушáйся менé зовýща:// отéц нáших Бóже благословéн еси́.
Хор: И на град святы́й отéц нáших Iерусалúм.
Чтец: Оскверни́вше пéрвым житiéм жизнь,/ и погуби́вше благорóдiе пéрвое,/ притецéм Еди́ному Отцý и Бóгу нáшему,// покая́нiем тéплым прiя́ти спасéнiе.
На 8.Хор: Благословéн есù, Гóсподи Бóже отéц нáших,/ и препéтый и превозносúмый во вéки.
Чтец: Жéсток граждани́н, емýже рабóтати окая́нный осуди́хся:/ глад же, егóже подъя́х, свинiя́м угождáя, крéпок и нестерпи́мь,// но обрáщься прошý, Спáсе, поми́луй мя.
Хор: И благословéно И́мя слáвы Твоея́ святóе,/ препéтое и превозносúмое во вéки.
На 6.Хор: Благословéн есù в хрáме святы́я слáвы Твоея́,/ препéтый и превозносúмый во вéки.
Благословéн есù вúдяй бéздны, седя́й на Херувíмех,/ препéтый и превозносúмый во вéки.
Чтец: Словесéм бесéдующiи, и списáнiем твои́м Григóрiе,/ рáзуму поучáются Бóжiю,/ и пóлны явля́ются премýдрости Бóжiя духóвныя,// и несоздáнную благодáть, и дéйство Бóжiе богослóвствуют. (двáжды)
На 4: Благословéн есù на престóле слáвы Цáрствiя Твоегò,/ препéтый и превозносúмый во вéки.
Благословéн есù на твéрди Небéсней,/ препéтый и превозносúмый во вéки.
Чтец: Меч и стрéлы злослáвных сокруши́л еси́,/ и гóрдость Варлаáмову, и вся́кую си́лу ерети́ческую,/ я́ко ткáнiе паучи́ны расточи́л еси́,// áки кáмень превели́кiй iерáрше. (двáжды)
Слáва Ѻтцý и Сы́ну и Святóму Дýху.
Тропáрь: Запечатлéся твои́ми словесы́ и догмáты вéра благочести́вых,/ и дéрзость éреси ста Григóрiе,// и низложéнiе правослáвiя престá, и крéпость злослáвных.
И ны́не и прúсно и во вéки векóв, амúнь.
Богорóдичен: Струи́ Тя истóчника, усóхшiи страстéй болéзньми, вéдуще вои́стинну,/ почерпáем спасéнiе, и Божéственныя струи́, и взывáем:// благословéн Всечи́стая, плод Твоегó чрéва.
Катавáсiя Трióди (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Пещь иногдà óгненная в Вавилóне дéйства разделя́ше,/ Бóжiим велéнiем халдéи опаля́ющая,/ вéрныя же орошáющая, пою́щiя:// благословúте вся делà Госпóдня, Гóспода.
На 12.Хор: Благословúте, вся делà Госпóдня, Гóспода,/ пóйте и превозносúте Егò во вéки.
Чтец: Ты моè смéртное одéял есѝ, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрїстè, зовýще Тебè:// пожéрта бысть вои́стинну смерть побéдою.
Хор: Благословúте, Áнгели Госпóдни, Небесà Госпóдня, Гóспода,/ пóйте и превозносúте Егò во вéки.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалà есѝ,/ и неизречéнно родилà есѝ, Богороди́тельнице Пречи́стая:// тéмже Тя спасéнiе всех нас свéмы.
Глас 8
На 10: Благословúте, вóды вся, я́же превы́ше Небéс, вся сúлы Госпóдни, Гóспода,/ пóйте и превозносúте Егò во вéки.
Чтец: Безмéрнаго Влады́ко, и мнóгаго милосéрдiя Твоегó,/ вéмы богáтство в Тя вéровавшiи./ Тéмже Ти припáдаем с блýдным вси тéпле:/ прiими́ согреши́вшiя, и к Тебé прибéгшiя:/ несть бо, несть грех Щéдре,// Твоé человеколю́бiе победи́ти могíй.
Хор: Благословúте, сóлнце и мéсяц, звéзды небéсныя, Гóспода,/ пóйте и превозносúте Егò во вéки.
Чтец: Милосéрдiя рáди Влады́ко Себé смири́в,/ пáдшим Твои́м сынóм прибли́жился еси́:/ Сам бо Человеколю́бче срел еси́ пáдших,/ и облобызáеши, и спасéнiе дáруеши:/ áще кто и дóлу пáднет,// ми́лостив сый не гнéваешися, я́ко Человеколю́бец.
На 8.Хор: Благословúте, вся птúцы небéсныя, звéрiе и вси скóти, Гóспода,/ пóйте и превозносúте Егò во вéки.
Чтец: Стрáшнейшiй суд менé усря́щет о Влады́ко,/ я́ко Тя человеколю́бца и незлóбива зря,/ не притекáю к Тебé, блýднаго зовы́й глáсом,/ но в лéности житié препровождáю:/ Ты ýбо ми́лостив бýди ми,// и осуждéнiя óнаго исхити́ Щéдре, покая́нiя рáди.
Хор: Благословúте, сы́нове человéчестiи, да благословúт Iзрáиль Гóспода,/ пóйте и превозносúте Егò во вéки.
Чтец: От мнóгих мя Всенепорóчная напáстей преклонéна,/ и печáлей бýрею потопля́ема/ пристáнище спасéнiя, Твоéю моли́твою Пречи́стая избáви,/ и от всех исхити́вши спаси́:/ да Тя достóйно я́ко тéплую предстáтельницу,// слáвлю Богорóдицу во вся вéки.
Глас 4
На 6: Благословúте, свящéнницы Госпóдни, рабù Госпóдни, Гóспода,/ пóйте и превозносúте Егò во вéки.
Благословúте, дýси и дýши прáведных,/ преподóбнiи и смирéннiи сéрдцем, Гóспода,/ пóйте и превозносúте Егò во вéки.
На 4.Хор: Благословúте Анáнiя, Азáрiя, Мiсаúл, Гóспода,/ пóйте и превозносúте Егò во вéки.
Благословúте, апóстоли, прорóцы и мýченицы Госпóдни, Гóспода,/ пóйте и превозносúте Егò во вéки.
Чтец: Вéдый чи́стое твоегó помышлéнiя Бог,/ и прéжде чрéва, и прéжде зачáтiя,/ вéрному возглагóла божéственному царю́ я́ве,/ Цéркве необори́маго бы́ти тя побóрника:/ тéмже прáвильным извéством,// ми́ром запечатлéн еси́ священноначáльства. (двáжды)
Благословúм Отцà, и Сы́на, и Святáго Дýха, Гóспода.
Тропáрь: Побеждáется я́ве и бéдствует/ собрáнiе Поликiнди́на длáнiю твоéю,/ и мýдрыми твои́ми глагóлы,/ преслáвне Григóрiе, Фессалонíтскiй председáтелю:/ и я́ко исчезáет дым, исчезé гнилóе безýмiе,// твои́м громоглáсным и Богослóвным язы́ком.
И ны́не и прúсно и во вéки векóв, амúнь.
Богорóдичен: Слóво Бóжiе в Тебé Дéво,/ человéческое естествó погружáемое страстьми́,/ возобрази́ крáйнею благосты́нею:/ и все обнови́ и посвяти́:/ тéмже Тобóю спасéни,// Тя славослóвим во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пещù/ Рождествò Богорóдичо спаслò есть;/ тогдà ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делà,// и превозносúте Егò во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Безначáльна Родúтеля Сын, Бог и Госпóдь,/ воплóщься от Дéвы, нам явúся,/ омрачéнная просветúти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегò пречи́стаго Крестà,/ крóвiю и водóю Божéственною,/ я́ко от истóчника Божéственнаго,/ ребрà Твоегò, Хрїстè, напоя́емо,// живóт нам прозяблò есть.
На 12.Хор: Благословéн Госпóдь, Бог Iзрáилев,/ я́ко посетù и сотворù избавлéнiе лю́дем Своúм.
Чтец: Низложи́л есѝ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествò человéческое вознéс,/ на Ѻ́тчем посади́л есѝ престóле.// С Ни́мже Тебè грядýщу покланя́ющеся, величáем.
Хор: И воздвúже рог спасéнiя нам/ в домý Давíдове, óтрока Своегò.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествò,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 8
На 10: Я́коже глагóла усты̀ святы́х, сýщих от вéка прорóк Егò,/ спасéнiе от враг нáших/ и из рукù всех, ненавúдящих нас.
Чтец: Рáдости и весéлiя ны́не,/ менé рáди заклáвшемуся Твоемý тельцý,/ испóлни сегó от Тебé/ чáющую мою́ дýшу Бóже:/ заблуждéна прiими́ мя,/ и умерщвлéна к жи́зни возведи́,/ и в Божéственную одéжду спасéнiя,// в нетлéнiе мя облецы́.
Хор: Сотворúти мúлость со отцы̀ нáшими/ и помянýти Завéт Святы́й Свой.
Чтец: Дýши удалéныя от Бóга,/ и Божéственных даровáнiй лишéныя,/ прiиди́те тéпле,/ и блýднаго обращéнiе воспрiи́мше зовéм:/ Óтче Благíй, И́же на Небесéх,/ согреши́хом Ти вси, очи́сти и спаси́// прибегáющiя к ми́лости Твоéй.
На 8.Хор: Кля́тву, éюже кля́тся ко Авраáму, отцý нáшему,/ дáти нам без стрáха, из рукù враг нáших избáвльшимся.
Чтец: Я́ко имы́й милосéрдiя мнóжество мнóгое,/ не гнушáйся менé Гóсподи Гóсподи,/ во мнóгих сластéх богáтство ижди́вша,/ и прибегáюща ны́не, и зовýща блýднаго глáсом:/ согреши́х Ти, спаси́// прибегáющаго к ми́лости Твоéй.
Хор: Служúти Емý преподóбiем и прáвдою/ пред Ним вся дни животà нáшего.
Чтец: Спасéнiя пристáнище и наставлéнiе,/ и предстáтельницу Тя и́мам раб Твой,/ лю́тых всех препя́тiй,/ я́ко благáя к Бóгу мольбáми Твои́ми Влады́чице да избáвлюся,/ я́ко на Тя всю мою́ надéжду возложи́х любóвiю,// да вéрою величáю Тя.
Глас 4
На 6.Хор: И ты, отрочà, прорóк Вы́шняго наречéшися,/ преды́деши бо пред лицéм Госпóдним, уготóвати путù Егò.
Чтец: Зерцáло Бóжiе был еси Григóрiе:/ éже бо по óбразу несквéрное соблю́л еси́,/ ум же влады́ку на стрáсти плотскíя мýжески постáвив,/ éже по подóбiю воспрiя́л еси́.// Отонýдуже дом был еси́ Святы́я Трóицы светлéйшiй. (двáжды)
На 4: В нúхже посетù нас Востóк с высоты̀,/ явúтися во тьме и сéни смéртней седя́щим.
Хор: Напрáвити нóги нáша на путь мúрен.
Чтец: Царь благочести́вый крилáтаго тя воздухохóдна показýет, семý спобóрствующа,/ я́ко всегó испóлнена Божéственнаго Дýха,/ на суемýдреннаго неи́стовствующаго Варлаáма,/ глагóлющаго на высотý непрáведная Бóгу,// егóже прáведно победи́л еси́. (двáжды)
Слáва Ѻтцý и Сы́ну и Святóму Дýху.
Тропáрь: Весь быв премýдрости лýчшiя испóлнен преслáвне,/ свет мíрови просвети́л еси́,/ правослáвiя источи́в догмáты:/ дрýжеством бо изря́днаго любомýдрiя премýдре,/ Божéственный страх во чрéве зачáл еси́,// и словесá Дýха породи́л еси́.
И ны́не и прúсно и во вéки векóв, амúнь.
Богорóдичен: Песнь Тебé вéрнiи соглáсно принóсим благодарéнiя:/ Ты бо дрéвнюю разруши́ла еси́ нáшу кля́тву Богороди́тельнице,/ и благословéнiе вси Божéственное прiéмлем,/ спасéнiе, просвещéнiе, и ми́лость Тобóю,// и рáдость вéчную.
Катавáсiя Трióди (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествò,/ почитáющее свящéнное торжествò Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный деся́тый: Тиверiáдское мóре с детьми́ Зеведéевыми,/ Нафанáила с Петрóм же и со други́ма двемá дрéвле,/ и Фомý имя́ше на лóве,/ и҆́же Хрiстóвым повелéнiем одеснýю ввéргше,/ мнóжество извлекóша рыб:/ Егóже Петр познáв, к Немý бродя́ше,/ и҆́мже трéтiе явлéйся,// и хлеб показá, и ры́бу на ýглех.
Богорóдичен Трióди: Влады́чице, всех Влады́чице, и всех вы́шшая,/ всех же превoсхoдя́щая гóрних вóинств,/ прoстри́ рукý держáвну, и сoхрани́ мир,/ свящéнники благoслoви́ Тебé священнoдéйствующiя,/ мoнáхи же прoсти́, мoля́щiя Тебé./ Лю́ди вся умири́, и сýщiя в палáте:/ вóинствo же укрепи́ вo врéмя брáни:/ сей град сoблюди́, святáя Бoгoрóдице./ И ны́не нас спoдóби ви́дети Небéснoе Цáрствo, и рáйскую дверь,/ егдá ся́дет Судiя́ суди́ти вселéнней,// вo втoрóм и стрáшнoм суди́лищи, Влады́чице Áнгелoв.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоè Воскресéнiе,// я́ко еди́н Человеколю́бец.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Да рекýт iудéе, кáко вóини погуби́ша стрегýщiи Царя́; почтò бо кáмень не сохранѝ кáмене жи́зни; илѝ погребéннаго да дадя́т, илѝ воскрéсшему да поклóнятся, глагóлюще с нáми: слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Рáдуйтеся лю́дiе и весели́теся, áнгел сѣдя́й на кáмени грóбнѣм, той нам благовѣстѝ, рек: Хрїстóс воскрéсе из мéртвых, Спас мíра, и испóлни вся́ческая благоухáнiя: рáдуйтеся лю́дiе и весели́теся.
Хвалúте Егò во глáсе трýбнем, хвалúте Егò во псалтúри и гýслех.
Услы́шите сiя́ вси язы́цы,/ внушúте вси живýщiи по вселéнней. (Пс.48:2)
Стiхúра: Непoро́чнагo твoегó житiя́ блажéнне свéтлoсти/ удиви́шася А́нгел и челoвéк сoбóри:/ и́бo прoизвoлéнiем твéрдый страдáлец и пóстник яви́лся еси́,/ и iерáрх, и дoстóйный служи́тель Бóжiй,// и друг и́скреннiй.
Воскреснù Гóсподи Бóже мой, да вознесéтся рукà Твоя́,/ не забýди убóгих Твоúх до концà.(Пс.9:33)
Стiхúра, самоглáсен дне Трióди, глас 6: Вo тьме сoгрешéнiй хoдя́щим,/ свет вoзсiя́л еси́ Хрїстé врéменем вoздержáнiя,/ и благoухáнный день стрáсти Твoея́/ пoкажи́ нам, да вoпiéм Тебé:// вoстáни Бóже, пoми́луй нас.
Слáва Отцý и Сы́ну и Святóму Дýху.
Глас 6: Вo тьме сoгрешéнiй хoдя́щим,/ свет вoзсiя́л еси́ Хрїстé врéменем вoздержáнiя,/ и благoухáнный день стрáсти Твoея́/ пoкажи́ нам, да вoпiéм Тебé:// вoстáни Бóже, пoми́луй нас.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская деся́тая, глас 6: По éже во ад сошéствiи,/ и éже из мéртвых воскресéнiи,/ скорбя́ще я́коже достóяше,/ о разлучéнiи Твоéм, Хрiстè,/ ученицы̀ на дéланiе обрати́шася,/ и пáки кораблѝ и мрéжи, и лóва нигдéже./ Но Ты, Спáсе, яви́вся я́ко Влады́ка всех,/ одеснýю мрéжи повелевáеши воврещѝ,/ и бысть слóво дéло вскóре,/ и мнóжество рыб мнóгое,/ и вéчеря стрáнная готóва на землѝ:/ ея́же причасти́вшимся тогдà Твои́м ученикóм,/ и нас ны́не мы́сленно сподóби наслади́тися,// человеколю́бче Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.