ТОРЖЕСТВО ПРАВОСЛАВИЯ. ОБЕДНИЦА (Изобразительные). Неделя первая Великого поста. Глас 1
24 мáрта 2024 гóда. Недéля пéрвая Велúкaго постà. Торжествò Правослáвiя. Глас 1. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егò./ Благословѝ, душè моя, Гóспода,/ и не забывáй всех воздая́нїй Егò,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля ю́ность твоя́./ Творя́й ми́лостыни Госпóдь,/ и судьбý всем оби́димым./ Сказà путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концà прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егò./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егò./ Я́ко Той познà создáнїе нáше,/ помянý, яко персть есмы̀./ Человéк, яко травà днíе eгò,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегò./ Ми́лость же Госпóдня от вéка и до вéка на боя́щихся Егò,/ и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я./ Госпóдь на Небесѝ уготóва Престóл Свой,/ и Цáрство Егò всéми обладáет./ Благослови́те Гóспода вси Áнгели Егò,/ си́льнїи крéпостїю, творя́щїи слóво Егò, услышати глас словéс Егò./ Благослови́те Гóспода вся Си́лы Егò,/ слýги Егò, творя́щїи вóлю Егò./ Благослови́те Гóспода вся делà Егò,/ на всяком мéсте влады́чества Егò.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егò./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгò/ и возврати́тся в зéмлю свою́./ В той день поги́бнут вся помышлéнїя eгò./ Блажéн, eмýже Бог Iáковль Помóщник егò,/ уповáнiе eгò на Гóспода Бóга своегò,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы̀./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдà прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 1): Снéдiю изведè из рая́ враг Адáма:/ Крестóм же разбóйника введè Хрїстóс вонь,/ помянѝ мя, зовýща,// егдà прiи́деши во Цáрствiи Твоéм.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Покланя́юся страстéм Твои́м,/ славослóвлю и Воскресéнiе со Адáмом и разбóйником,/ со глáсом свéтлым вопiю́ Ти:/ помянѝ мя Гóсподи,// егдà прiи́деши во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец: Распя́лся есѝ безгрéшне,/ и во грóбе положи́лся есѝ волею,/ но воскрéсл есѝ яко Бог,/ совоздви́гнувый Себè Адáма,/ помянѝ мя, зовýща,// егдà прiи́деши во Цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Храм Твой телéсный триднéвным Воскреси́вый погребéнiем,/ со Адáмом, и и҆́же от Адáма, воскреси́л есѝ Хрїстè Бóже:/ помяни́ нас зовýщих,// егдà прiи́деши во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Мvронóсицы прiидóша плáчуща,/ на гроб Твой Хрїстè Бóже, зелò рáно:/ и в бéлых ризах обретóша Áнгела седя́ща,/ что и҆́щете; зовýща.// Воскрéсе Хрїстóс, не рыдáйте прóчее.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Апóстоли Твоѝ Гóсподи/ на гóру, áможе повелéл есѝ им, пришéдше Спáсе,/ и Тя ви́девше поклони́шася.// И҆́хже и послáл есѝ во язы́ки учи́ти и крести́ти я.
На 4. Хор: Блажéни естè, егдà понóсят вам,/ и изженýт, и рекýт всяк зол глагóл на вы лжýще Менè рáди.
Чтец (стiхúры Трióди, глас 4): Пи́шется и почитáется вéрно/ покланя́емый óбраз Влады́ки,/ и прiéмлет пáки Цéрковь дерзновéнiе,// благочéстно Спáса прославля́ющи.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Обнажáется сéтованiя, и тьмы ересéй Хрїстóва Цéрковь,/ и нóсит ри́зу весéлiя,// и Божéственною и светонóсною покрывáется благодáтiю.
Хор: Слáва Ѻтцý и Сы́ну и Святóму Дýху.
Чтец: Благослáвiя дрéвняго осiя́нiя получѝ правослáвных собóр,/ Феодóры мановéнiем цари́цы,// и ея́ сы́на благочести́ваго Мiхаи́ла самодéржца.
Хор: И ны́не и прúсно и во вéки векóв. Амúнь.
Богорóдичен: Дрéвле свидéнiя повелéвый бы́ти ски́нiи,/ я́ко в ски́нiи словéсней, в Тебè живéт Еди́н Препрослáвленный,// прославля́яй храм Твой, Дéво, чудесы̀.
Тропари и кондаки
Тропáрь воскрéсный, глас 1: Кáмени запечáтану от iудéй/ и вóином стрегýщим Пречúстое Тéло Твоè,/ воскрéсл есù триднéвный, Спáсе,/ дáруяй мíрови жизнь./ Сегò рáди сúлы небéсныя вопiя́ху Ти, Жизнодáвче:/ слáва Воскресéнiю Твоемý, Хрїстè,/ слáва Цáрствiю Твоемý,// слáва смотрéнiю Твоемý, едúне Человеколю́бче.
Тропáрь торжествà Правослáвiя, глас 2: Пречúстому óбразу Твоемý покланя́емся, Благíй,/ прося́ще прощéнiя прегрешéнiй нáших, Хрїстè Бóже,/ вóлею бо благоволúл есù плóтiю взы́ти на Крест,/ да избáвиши, я́же создáл есù, от рабóты врáжiя. Тем благодáрственно вопiéм Ти:/ рáдости испóлнил есù вся, Спáсе наш,// пришéдый спастù мiр.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк Трióди, глас 2: Неопúсанное Слóво Óтчее,/ из Тебè, Богорóдице, описáся воплощáемь,/ и осквéрншiйся óбраз в дрéвнее вообразúв,/ Божéственною добрóтою смесù,/ но исповéдающе спасéнiе,// дéлом и слóвом, сiè вообрáжаем.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен недели Торжества Православия
Чтец: Прокíмен, глас четвéртый, песнь ѻтцéв. Благословéн есѝ, Гóсподи Бóже отéц нáших, и хвáльно и прослáвлено И҆́мя Твоè во вéки. (Дан.3:26)
Хор: Благословéн есù, Гóсподи Бóже отéц нáших,/ и хвáльно и прослáвлено И҆́мя Твоè во вéки.
Чтец: Я́ко прáведен есѝ о всех, я́же сотвори́л есѝ нам. (Дан.3:27А)
Хор: Благословéн есù, Гóсподи Бóже отéц нáших,/ и хвáльно и прослáвлено И҆́мя Твоè во вéки.
Чтец: Благословéн есѝ, Гóсподи Бóже отéц нáших.
Хор: И хвáльно и прослáвлено И҆́мя Твоè во вéки.
АПОСТОЛ
Чтец: Ко Еврéем послáнiя святáго апóстола Пáвла чтéнiе.
(Евр.зач.329Б(от полý): Брáтiе, вéрою Моисéй, вели́к быв, отвéржеся нарицáтися сын дщéре фараóновы. Пáче же извóли страдáти с людьмѝ Бóжiими, нéжели имéти врéменную грехà слáдость. Бóльшее богáтство вмени́в еги́петских сокрóвищ поношéнiе Хрїстóво, взирáше бо на мздовоздая́нiе. И что eщé глагóлю? Не достáнет бо ми повествýющу лéта, о Гедеóне, Варáце же и Сампсóне и Iеффáи, о Давíде же и Самуи́ле, и о други́х прорóцех, и́же вéрою победи́ша цáрствiя, содéяша прáвду, получи́ша обетовáнiя, загради́ша устà львов, угаси́ша си́лу óгненную, избегóша óстрея мечà, возмогóша от нéмощи, бы́ша крéпцы во бранéх, обрати́ша в бéгство полкѝ чужи́х. Прiя́ша жeны̀ от воскресéнiя мéртвыя своя́; инíи же избiéни бы́ша, не прiéмше избавлéнiя, да лýчшее воскресéнiе улучáт. Друзíи же ругáнiем и рáнами искушéнiе прiя́ша, eщè же и уз и темни́ц. Кáменiем побiéни бы́ша, претрéни бы́ша, искушéни бы́ша, убíйством мечà умрóша, проидóша в ми́лотех, и в кóзiях кóжах, лишéни, скорбя́ще, озлóблени. И́хже не бе достóин весь мiр, в пусты́нях скитáющеся, и в горáх, и в вертéпах, и в прóпастех земны́х. И сíи вси послýшествовани бы́вше вéрою, не прiя́ша обетовáнiя, Бóгу лýчшее что о нас предзрéвшу, да не без нас совершéнство прiи́мут. Тéмже ýбо и мы, толи́к имýще облежáщь нас óблак свидéтелей, гóрдость вся́ку отлóжше, и удóбь обстоя́тельный грех, терпéнiем да течéм на предлежáщiй нам пóдвиг, взирáюще на начáльника вéры и соверши́теля Iисýса.
[Синодальный перевод]Братия, верою Моисей, придя в возраст, отказался называться сыном дочери фараоновой, и лучше захотел страдать с народом Божиим, нежели иметь временное греховное наслаждение, и поношение Христово почел большим для себя богатством, нежели Египетские сокровища; ибо он взирал на воздаяние. И что еще скажу? Недостанет мне времени, чтобы повествовать о Гедеоне, о Вараке, о Самсоне и Иеффае, о Давиде, Самуиле и (других) пророках, которые верою побеждали царства, творили правду, получали обетования, заграждали уста львов, угашали силу огня, избегали острия меча, укреплялись от немощи, были крепки на войне, прогоняли полки чужих; жены получали умерших своих воскресшими; иные же замучены были, не приняв освобождения, дабы получить лучшее воскресение; другие испытали поругания и побои, а также узы и темницу, были побиваемы камнями, перепиливаемы, подвергаемы пытке, умирали от меча, скитались в милотях и козьих кожах, терпя недостатки, скорби, озлобления; те, которых весь мир не был достоин, скитались по пустыням и горам, по пещерам и ущельям земли. И все сии, свидетельствованные в вере, не получили обещанного, потому что Бог предусмотрел о нас нечто лучшее, дабы они не без нас достигли совершенства. Посему и мы, имея вокруг себя такое облако свидетелей, свергнем с себя всякое бремя и запинающий нас грех и с терпением будем проходить предлежащее нам поприще, взирая на начальника и совершителя веры Иисуса. (Евр. от середины. (11:24-26,32-12:2)
Аллилуиарий недели Торжества Православия
Чтец: Аллилýїа, аллилýїа, аллилýїа, глас осьмы́й, псалóм Давíдов.
Хор: Аллилýїа, аллилýїа, аллилýїа.
Чтец: Моисéй и Аарóн во iерéех Егò, и Самуи́л в призывáющих И́мя Егò.(Пс.98:6А)
Хор: Аллилýїа, аллилýїа, аллилýїа.
Чтец: Призывáху Гóспода, и Той послýшаше их.(Пс.98:6Б)
Хор: Аллилýїа, аллилýїа, аллилýїа.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.5): Во врéмя óно, восхотé Iисýс изы́ти в Галiлéю, и обрéте Фiлíппа и глагóла емý: грядѝ по Мне. Бе же Фiлíпп от Вифсаíды, от грáда Андрéова и Петрóва. Обрéте Фiлíпп Нафанáила и глагóла емý: Егóже писà Моисéй в закóне и прорóцы, обретóхом Iисýса сы́на Ióсифова, и́же от Назарéта. И глагóла емý Нафанáил: от Назарéта мóжет ли что добрò бы́ти? Глагóла емý Фiлíпп: прiидѝ и виждь. Ви́де же Iисýс Нафанáила грядýща к Себè и глагóла о нем: се вои́стинну Iзрáильтянин, в нéмже льсти несть. Глагóла Емý Нафанáил: кáко мя знáеши? Отвещà Iисýс и речè емý: прéжде дáже не возгласѝ тебé Фiлíпп, сýща под смокóвницею ви́дех тя. Отвещà Нафанáил и глагóла Емý: Раввí, Ты есѝ Сын Бóжiй, Ты есѝ Царь Iзрáилев. Отвещà Iисýс и речè емý: занè рех ти, я́ко ви́дех тя под смокóвницею, вéруеши, бóльша сих ýзриши. И глагóла емý: ами́нь, ами́нь глагóлю вам, отсéле ýзрите нéбо отвéрсто и Áнгелы Бóжiя восходя́ща и нисходя́ща над Сы́на Человéческаго.
[Синодальный перевод]На другой день Иисус восхотел идти в Галилею, и находит Филиппа и говорит ему: иди за Мною. Филипп же был из Вифсаиды, из одного города с Андреем и Петром. Филипп находит Нафанаила и говорит ему: мы нашли Того, о Котором писали Моисей в законе и пророки, Иисуса, сына Иосифова, из Назарета. Но Нафанаил сказал ему: из Назарета может ли быть что доброе? Филипп говорит ему: пойди и посмотри. Иисус, увидев идущего к Нему Нафанаила, говорит о нем: вот подлинно Израильтянин, в котором нет лукавства. Нафанаил говорит Ему: почему Ты знаешь меня? Иисус сказал ему в ответ: прежде нежели позвал тебя Филипп, когда ты был под смоковницею, Я видел тебя. Нафанаил отвечал Ему: Равви! Ты Сын Божий, Ты Царь Израилев. Иисус сказал ему в ответ: ты веришь, потому что Я тебе сказал: Я видел тебя под смоковницею; увидишь больше сего. И говорит ему: истинно, истинно говорю вам: отныне будете видеть небо отверстым и Ангелов Божиих восходящих и нисходящих к Сыну Человеческому.(Ин.1:43-51)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк Трióди, глас 2: Неопúсанное Слóво Óтчее,/ из Тебè, Богорóдице, описáся воплощáемь,/ и осквéрншiйся óбраз в дрéвнее вообразúв,/ Божéственною добрóтою смесù,/ но исповéдающе спасéнiе,// дéлом и слóвом, сiè вообрáжаем.
Гóсподи, поми́луй. (12 раз)
И молúтву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою́, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Вместо Достойно есть (задостойник)
Хор: О Тебè рáдуется, Благодáтная вся́кая тварь,/ Áнгельскiй собóр и человéческiй род,/ освящéнный хрáме и раю́ словéсный,/ дéвственная похвалò,/ из Нея́же Бог воплотúся,/ и Младéнец бысть, прéжде век Сый Бог наш:/ ложеснà бо Твоя престóл сотворù/ и чрéво Твоè прострáннее Небéс содéла.// О Тебè рáдуется, Благодáтная, вся́кая тварь, слáва Тебè.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.