Неделя вторая Великoго поста. Святителя Григория Паламы. Глас 2. ВСЕНОЩНОЕ БДЕНИЕ. УТРЕНЯ. КАНОН
31 мáрта 2024 гóда. Недéля вторáя Велúкaго постà. Святúтеля Григóрiя Палáмы, архiепíскопа фессалонíтскаго. Глас 2. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 2: По стрáсти шéдша во гроб жены̀,/ во éже помáзати тéло Твоè, Хрїстè Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СТЕПЕННА, ГЛАС 2
1 АНТИФОН
Хор: На нéбо óчи пущáю моегò сéрдца, к Тебè, Спасè,// спасù мя Твоúм осiя́нiем. (Двáжды)
Поми́луй нас согрешáющих Тебè мнóго,/ на вся́кiй час, о Хрїстè мой,// и даждь óбраз прéжде концà покáятися Тебè. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагà,// кýпно и человекоубíйцы? (Двáжды)
Зубóм их не предáждь, Спáсе, Твоегò рабà:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
3 АНТИФОН
Надéющiися на Гóспода, уподóбишася горè святéй:// и҆́же никáкоже двúжутся прилóги врáжiими. (Двáжды)
В беззакóнiи рук свои́х, да не прóструт божéственне живýщiи:// не оставля́ет бо Хрїстóс жезлà на жрéбiи Своéм. (Двáжды)
Слáва Ѻтцý и Сы́ну и Святóму Дýху.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
И ны́не и прúсно и во вéки векóв. Амúнь.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
ПРОКИМЕН
Чтец: Прокíмен, глас вторы́й, псалóм Давíдов: Востáни, Гóсподи, Бóже мой, повелéнiем, и҆́мже заповéдал есѝ, и сонм людéй обы́дет Тя. (Пс.7:7Б-8А)
Хор: Востáни, Гóсподи, Бóже мой, повелéнiем, и҆́мже заповéдал есù,/ и сонм людéй обы́дет Тя.
Чтец: Гóсподи Бóже мой, на Тя уповáх, спасѝ мя. (Пс.7:2А)
Хор: Востáни, Гóсподи, Бóже мой, повелéнiем, úмже заповéдал есù,/ и сонм людéй обы́дет Тя.
Чтец: Востáни, Гóсподи, Бóже мой, повелéнiем, и҆́мже заповéдал есѝ.
Хор: И сонм людéй обы́дет Тя.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.66): Во врéмя óно, яви́ся Iисýс ученикóм Свои́м, востáв от мéртвых, на мóри Тiверiáдстем. яви́ся же си́це. Бя́ху вкýпе Сíмон Петр, и Фомà нарицáемый Близнéц, и Нафанáил, и҆́же бе от Кáны Галiлéйскiя, и сы́на Зеведéова, и и҆́на от учени́к Егò два. Глагóла им Сíмон Петр: идý ры́бы лови́ти. Глагóлаша емý: и҆́дем и мы с тобóю. Изыдóша же и вседóша áбiе в корáбль, и в ту нощь не я́ша ничесóже. У́тру же бы́вшу, ста Iисýс при брéзе: не познáша же ученицы̀, я́ко Iисýс есть. Глагóла же им Iисýс: дéти, едà что снéдно и҆́мате? Отвещáша Емý: ни. Он же речè им: ввéрзите мрéжу о деснýю странý корабля́ и обря́щете. Ввергóша же, и ктомý не можáху привлещи́ ея́ от мнóжества рыб. Глагóла же учени́к той, егóже любля́ше Iисýс, Петрóви: Госпóдь есть. Сíмон же Петр слы́шав, я́ко Госпóдь есть, епенди́том препоя́сася, бе бо наг, и ввéржеся в мóре. А друзíи ученицы̀ кораблецéм прiидóша, [не бéша бо далéче от земли́, но я́ко две сте лактéй,] влекýще мрéжу рыб. Я́коже излезóша на зéмлю, ви́деша огнь лежáщь, и ры́бу на нем лежáщу и хлеб. И глагóла им Iисýс: принеси́те от рыб, я́же я́сте ны́не. Влез же Сíмон Петр, извлечè мрéжу на зéмлю, пóлну вели́ких рыб, сто и пятьдеся́т, и три: и толи́ко сýщим, не протóржеся мрéжа. Глагóла им Iисýс: прiиди́те, обéдуйте. Ни еди́н же смéяше от учени́к истязáти Егò, Ты кто еси́; вéдяще, я́ко Госпóдь есть. Прiи́де же Iисýс, и прiя́т хлеб, и дадé им, и ры́бу тáкожде. Се ужé трéтiе яви́ся Iисýс ученикóм Свои́м, востáв от мéртвых.
[Cинодальный перевод]В те дни явился Иисус ученикам Своим при море Тивериадском. Явился же так: были вместе Симон Петр, и Фома, называемый Близнец, и Нафанаил из Каны Галилейской, и сыновья Зеведеевы, и двое других из учеников Его. Симон Петр говорит им: иду ловить рыбу. Говорят ему: идем и мы с тобою. Пошли и тотчас вошли в лодку, и не поймали в ту ночь ничего. А когда уже настало утро, Иисус стоял на берегу; но ученики не узнали, что это Иисус. Иисус говорит им: дети! есть ли у вас какая пища? Они отвечали Ему: нет. Он же сказал им: закиньте сеть по правую сторону лодки, и поймаете. Они закинули, и уже не могли вытащить сети от множества рыбы. Тогда ученик, которого любил Иисус, говорит Петру: это Господь. Симон же Петр, услышав, что это Господь, опоясался одеждою, - ибо он был наг, - и бросился в море. А другие ученики приплыли в лодке, - ибо недалеко были от земли, локтей около двухсот, - таща сеть с рыбою. Когда же вышли на землю, видят разложенный огонь и на нем лежащую рыбу и хлеб. Иисус говорит им: принесите рыбы, которую вы теперь поймали. Симон Петр пошел и вытащил на землю сеть, наполненную большими рыбами, которых было сто пятьдесят три; и при таком множестве не прорвалась сеть. Иисус говорит им: придите, обедайте. Из учеников же никто не смел спросить Его: кто Ты? зная, что это Господь. Иисус приходит, берет хлеб и дает им, также и рыбу. Это уже в третий раз явился Иисус ученикам Своим по воскресении Своем из мертвых. (Ин.21:1-14)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И ны́не и прúсно и во вéки векóв. Амúнь.
Богорóдичен (Трióди): На спасéнiя стезѝ настáви мя Богорóдице,/ стýдными бо окаля́х дýшу грехмѝ,/ и в лéности все житiè моè ижди́х:/ но Твои́ми моли́твами/ избáви мя от вся́кiя нечистоты̀.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегò,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 2
(совмещéнный с канóном Трióди, о блýдном сы́не, глас 8 и канóном Трióди, свт. Григóрiя, глас 4)
ПЕСНЬ 1
Iрмóс: Во глубинè постлà иногдà/ фараонúтское всевóинство преоружéнная сúла;/ воплóщшееся же Слóво всезлóбный грех потребúло есть,/ препрослáвленный Госпóдь,// слáвно бо прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Мiрскíй князь Блáже, емýже написáхомся,/ зáповеди Твоея́ не послýшавше, крестóм Твои́м осуди́ся:/ прирази́ся бо Ти я́ко смéртну:/ отпадè же влáсти Твоея́ держáвою,// и немощны́й обличи́ся.
На 12.Хор: Поéм Гóсподеви, слáвно бо прослáвися./ Коня́ и всáдника вéрже в мóре.
Чтец: Избáвитель рóда человéческаго,/ и нетлéнному животý Начáльник/ в мiр пришéл есѝ:/ Воскресéнiем бо Твои́м раздрáл есѝ смéртныя пелены̀,// Éже славослóвим вси: слáвно бо прослáвися.
Хор: Помóщник и Покровúтель бысть мне во спасéнiе,/ Сей мой Бог, и прослáвлю Егò,/ Бог отцà моегò, и вознесý Егò.
Богорóдичен: Превы́шши яви́лася есѝ, Чи́стая Приснодéво,/ вся́кiя неви́димыя же и ви́димыя твáри:/ Зижди́теля бо родилà есѝ,/ я́ко благоволѝ воплоти́тися во утрóбе Твоéй,// Егóже со дерзновéнiем молѝ, спастѝ дýши нáша.
Канон Триоди (о блудном сыне), глас 8
На 10: Госпóдь, сокрушáяй брáни, Госпóдь И́мя Емý,/ колеснúцы фараóновы и сúлу егò вéрже в мóре.
Чтец: Воспрiéмше тéплыми слезáми, блýднаго глас,/ Тебé Отцý всех и Бóгу припáдаем, вопiю́ще:/ я́ко согреши́хом от Тебé удали́вшеся, и блудý рабóтавше,// прiими́ нáше покая́нiе.
Хор: Пучúною покры̀ я́,/ погрязóша во глубинè я́ко кáмень.
Чтец: Цáрское преоби́дев благорóдiе,/ éже даровáл еси́ мне, менé рáди Слóве, Человéк бы́вый:/ лю́те осуди́хся угоди́ти свинiя́м, грехóвным вкýсом,// но пощади́ мя Спáсе, милосéрдiем Твои́м.
На 8.Хор: Тогдà потщáшася влады́ки Едóмстiи, и князéй Моавíтских,/ прiя́т я́ трéпет, растáяша вси живýщiи в Ханаáне.
Чтец: На колéну пáдающа мя,/ я́коже пéрвее блýднаго Влады́ко Гóсподи,/ Ты притéк прiими́, и рукáма объéм,/ подáждь ми óбразы Твоегó спасéнiя,/ вмéсто наéмника Человеколю́бче,// пáки Твоегó сы́на сотворя́я.
Хор: Нападéт на ня страх и трéпет,/ велúчiем мы́шцы Твоея́ да окáменятся.
Богорóдичен: Богоявлéнiя Тобóю сподóбися Богорáдованная, человéческое естествò:/ еди́на бо ходáтаица Дéво, былà еси́ Бóгу и человéком./ Тем я́ко Бóжiю Тя Роди́тельницу вси достóйно слáвим.
Канон Триоди (свт. Григóрия), глас 4
На 6: Дóндеже прóйдут лю́дiе Твоù, Гóсподи,/ дóндеже прóйдут лю́дiе Твоù сíи, я́же стяжáл есù.
Содéлал есù, Гóсподи, святы́ню,/ ю́же уготóвасте рýце Твоù.
Чтец: Ри́торов божéственнiи, и богослóвов изря́днiи, и язы́цы боговещáннiи,/ прiиди́те сни́дитеся в соединéнiе,// воспéти по достоя́нiю духори́тора, божéственнаго Григóрiа. (двáжды)
На 4.Хор: Госпóдь цáрствуяй вéки и на век, и ещè,/ егдà внúде конь фараóнов с колеснúцами и всáдники в мóре.
Сы́нове же Iзрáилевы проидóша сýшею/ посредè мóря.
Чтец: Столп вéры, Цéркве побóрник,/ вели́кiй Григóрiй да восхвáлится мнóю,/ всеизря́дный пáстырь Фессалонíтскiй,// красотà чи́на iерáршескаго вои́стинну. (двáжды)
Слáва Ѻтцý и Сы́ну и Святóму Дýху.
Тропáрь: От младéнства возжелáл еси́ лýчшее житié,/ и совершéнное óтче от ю́ности возлюби́л еси́ мудровáнiе,/ и купнонрáвен, и единомýдрен показáлся еси́// тезоимéнствующаго тебé óтче Григóрiе.
И ны́не и прúсно и во вéки векóв. Амúнь.
Богорóдичен: Бýди ми Всенепорóчная животà путь,/ наставля́ющiй мя к Божéственным селéнiем:/ прельсти́хся бо, и к прóпастем злóбы поползнýхся,// от ни́хже мя возведи́ ходáтайством Твои́м.
Катавáсiя Трióди (глас 4): Отвéрзу устà моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ чудесà.
ПЕСНЬ 3
Iрмóс: Процвелà есть пусты́ня, я́ко крíн, Гóсподи,/ язы́ческая неплодя́щая цéрковь,/ пришéствiем Твоúм,// в нéйже утвердúся моè сéрдце.
Хор: Слáва, Гóсподи, Святóму Воскресéнiю Твоемý.
Чтец: Тварь в стрáсти Твоéй изменя́шеся,/ зря́щи Тя в нищéтне óбразе от беззакóнных поругáема,// основáвшаго вся Божéственным мановéнiем.
На 12.Хор: Утвердúся сéрдце моè во Гóсподе,/ вознесéся рог мой о Бóзе моéм,/ разширúшася устà моя́ на врагù моя́,/ возвеселúхся о спасéнiи Твоéм.
Чтец: От пéрсти по óбразу мя рукóю Твоéю создáл есѝ:/ и сокрушéнна пáки в персть смéртную за грех,// Хрїстè сошéд во ад, совоскреси́л есѝ.
Хор: Я́ко несть свят, я́ко Госпóдь,/ и несть прáведен я́ко Бог наш,/ и несть свят пáче Тебè.
Богорóдичен: Чи́ни удиви́шася áнгельстiи, Пречи́стая,/ и человéческая устраши́шася сердцà о Рождествè Твоéм:// тéмже Тя, Богорóдицу, вéрою чтим.
Глас 8
На 10: Не хвалúтеся и не глагóлите высóкая в горды́ни,/ нижè да изы́дет велерéчiе из уст вáших.
Чтец: Убоя́вся мои́х дел, и далéчнаго отшéствiя,/ и расточéннаго Твоегò богáтства,/ егóже ижди́х в блýдных стремлéнiих,/ в покая́нiи к Тебé зовý, Отцý и Бóгу моемý:// согреши́х, спаси́ мя.
Хор: Я́ко Бог рáзумов Госпóдь,/ и Бог, уготовля́яй начинáнiя Своя́.
Чтец: На земли́ согрешáя, небесé убоя́хся:/ си́це бо ми бýдет суд тогдà препирáяй,/ егдà вся́ческая предстáнут Слóве,// прáведным судóм Твои́м суди́мая.
На 8.Хор: Дая́й молúтву моля́щемуся,/ и благословù лéта прáведнаго.
Чтец: Мрáчная и сквéрная мя помышлéнiя питáху,/ егдà от Тебé Спáсе, далéче бых блýдный,/ ны́не же зовý Ти: согреши́х, согреши́х, спаси́// тéпле прибегáющаго милосéрдiю Твоемý.
Хор: Госпóдь нéмощна сотворù супостáта Егò,/ Госпóдь Свят.
Чтец: Обожи́ся Дéво Адáмово смешéнiе:/ из чрéва бо Твоегò Бог плотонóсец яви́ся,/ И́мже воззвáни бы́хом от дрéвняго осуждéнiя,// солгáни надéждею дрéвле обожéнiя.
Глас 4
На 6.Хор: Да не хвáлится премýдрый премýдростiю своéю,/ и да не хвáлится сúльный сúлою своéю,/ и да не хвáлится богáтый богáтством своúм.
Но о сем да хвáлится хваля́йся,/ éже разумéти и знáти Гóспода/ и творúти суд и прáвду посредè землù.
Чтец: Струи́ Божéственных учéнiй твои́х сохраня́ющiи,/ вся́кiя кóзни злослáвных избегáем,/ и вся избивáем твои́ми свящéнными списáньми// полки́ сих Григóрiе. (двáжды)
На 4: Госпóдь взы́де на Небесà и возгремè,/ Той сýдит концéм землù, прáведен Сый.
И даст крéпость царю́ нáшему,/ и вознесéт рог Хрiстà Своегò.
Чтец: Премýдрости бýiя злослáвных разруши́л еси́ блажéнне,/ премýдрость Бóжiю ипостáсную имéя в сéрдце твоéм,// éюже с шýмом порази́л еси́ гнилáя сих шатáнiя. (двáжды)
Слáва Ѻтцý и Сы́ну и Святóму Дýху.
Тропáрь: Умертви́в плóти тлéемыя вся́кое сладострáстiе премýдре,/ пóстнически оживи́л еси́ души́ твоея́ движéнiя,// и сiю́ Божéственный оргáн Богослóвiя показáл еси́.
И ны́не и прúсно и во вéки векóв. Амúнь.
Богорóдичен: В рáзуме умà и произволéнiи,/ стýдное же и блýдное житié прилéжно возлюби́х,/ но любóвiю Божéственною мя свяжи́,// моли́твами Твои́ми, Дéво Богоневéстная.
Катавáсiя Трióди (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшыя, духóвно утвердù,/ в Божéственней Твоéй слáве// венцéв слáвы сподóби.
Гóсподи, поми́луй. (3 рáза)
Кондáк Трióди, глaс 4: Ны́не врéмя дéлательное яви́ся, при двéрех суд,/ востáнем ýбо постя́щеся,/ принесéм слéзы умилéнiя,/ ми́лостынями, зовýще:/ согреши́хом пáче пескà морскáго./ Но ослáби Содéтелю всех,// я́ко да прiи́мем нетлéнныя венцы́.
Седáлен Трióди, глaс 4: Прéлесть попали́л еси́ злослáвных премýдре,/ вéру изъясни́л еси́ правослáвных дóбре,/ и мiр просвети́л еси́./ Отонýдуже победонóсный победи́тель показáлся еси́,/ столп Цéркве, и́стинный iерáрх,/ моля́ся не престáй Хрїстý,// спасти́ся всем нам. (двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен Трióди, глас 4: Скóро прiими́ Влады́чице молéнiя нáша,/ и сiя́ принеси́ Сы́ну Твоемý и Бóгу,/ Госпожé Всенепорóчная:/ погаси́ обстоя́нiя злослáвных языковрéдных,/ укроти́ кóзни, и низложи́ дéрзость/ вооружáющихся безбóжных// Пречи́стая, на рабы́ Твоя́.
ПЕСНЬ 4
Iрмóс: Пришéл есù от Дéвы, не ходáтай, ни Áнгел,/ но Сам, Гóсподи, воплóщься,/ и спасл есù всегó мя человéка./ Тем зовý Ти:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Предстои́ши суди́щу я́ко суди́мь, Бóже мой,/ не вопiя́ Влады́ко, суд износя́ язы́ком:/ и́мже стрáстiю Твоéю, Хрїстè// вселéнней содéлал есѝ Спасéнiе.
На 12.Хор: Гóсподи, услы́шах слух Твой и убоя́хся;/ Гóсподи, разумéх делà Твоя́ и ужасóхся.
Чтец: Стрáстiю Твоéю, Хрїстè,/ врагý оскудéша орýжiя,/ проти́вным же éже во ад схождéнiем Твои́м, грáды разруши́шася,// и мучи́телева дéрзость низложéна бысть.
Хор: Внегдà смутúтися душù моéй во гнéве,/ мúлость Твою́ помянéши.
Богорóдичен: Тя пристáнище спасéнiя, и стéну недви́жиму,/ Богорóдице Влады́чице, вси вéрнiи свéмы:// Ты бо моли́твами Твои́ми избавля́еши от бед дýши нáша.
Глас 8
На 10: Бог от ю́га прiúдет,/ и Святы́й из горы̀ приосенéнныя чáщи.
Чтец: Отметáтельное отéческих ми повелéнiй богáтство,/ éже ми даровáл еси́, в сладострáстiи ижди́в,/ бых Божéственных даровáнiй нищ окая́нный./ Тéмже кáющася со исповéданiем// не омерзи́ менé Влады́ко Гóсподи.
Хор: Покры̀ Небесà добродéтель Егò,/ и хвалы̀ Егò испóлнь земля́.
Чтец: Боголéпно воспрiи́м нищетý менé,/ далéче Тебé дрéвле бы́вшаго,/ Собóю к Себé присвоя́еши,/ и освящáеши мя к весéлiю Человеколю́бче:/ тéло Твоé Божéственное Слóве,// воззвáнiе моé, весéлiя творя́.
На 8.Хор: Занè смоквь не плодопринесéт,/ и не бýдет рóда в лозáх.
Чтец: Да далéче слезáми непрестáнными,/ вéчныя мýки избáвимся,/ ю́же уготóва Бог лукáвым духовóм,/ я́ко блýдный, вопiéм: согреши́хом Ти Óтче,// но прiими́ вся прибегáющiя ны к Твоéй ми́лости.
Хор: Солжéт дéло мáслинное,/ и поля́ не сотворя́т я́ди.
Чтец: Собезначáльное Отцý Слóво сый и Дýху,/ от Неискусомýжныя Дéвы раждáется кромé закóна:/ пребы́в ýбо éже бе, пребы́в же пáки éже от нас прiя́т./ Во двою́ бо естествý еди́н Сын есть,// во обою́ храня́ естéственное.
Глас 4
На 6: Оскудéша óвцы от пúщи,/ и не бýдет волóв при я́слех.
Аз же о Гóсподе возрáдуюся,/ возвеселю́ся о Бóзе, Спáсе моéм.
Чтец: Отвéрз устà твоя́ óтче премýдре,/ Божéственную премýдрость проповéдал еси́,/ éйже поучáлся еси́ в сéрдце твоéм при́сно,// и Варлаáма сýетнаго несмы́сленна и безýмна показáл еси́. (двáжды)
На 4: Госпóдь Бог мой сúла моя́/ и учинúт нóзе моù на совершéнiе.
И на высóкая возвóдит мя,/ победúти ми в пéсни Егò.
Чтец: Зашéл еси́ сладчáйшiй в зéмлю, сóлнце закóном естествà,/ возсiя́еши же ýтро со Хрїстóм сóлнце невечéрнее,// вся назирáя моли́твами твои́ми. (двáжды)
Слáва Отцý и Сы́ну и Святóму Дýху.
Тропáрь: Яви́ благодáть тебé блажéнне Бóжiй,/ похвалý и утверждéнiе превéлiе правослáвных,/ и пáстыря благáго, и богослóва вторáго,// и стáда бóдраго храни́теля.
И ны́не и прúсно и во вéки векóв, амúнь.
Богорóдичен: Ушесà мне отвéрзи душéвныя Мáти Бóжiя,/ роди́вшая прéжде ушесà Отвéрзшаго глухóму,// и Божéственным внимáти словесéм, и исполня́ти сподóби.
Катавáсiя Трióди (глас 4): Неизслéдный Бóжiй совéт,/ éже от Дéвы воплощéнiя/ Тебè, Вы́шняго,/ прорóк Аввакýм усмотря́я, зовя́ше:// слáва сúле Твоéй, Гóсподи.
ПЕСНЬ 5
Iрмóс: Ходáтай Бóгу и человéком был есù, Хрїстé Бóже;/ Тобóю, бо Влады́ко, к Светоначáльнику, Ѻтцý Твоемý,/ от нóщи невéденiя// приведéнiе úмамы.
Хор: Слáва, Гóсподи, Святóму Воскресéнiю Твоемý.
Чтец: Я́ко кéдры, Хрїстè, язы́ков шатáнiе сокруши́л есѝ вóлею, Влады́ко:/ я́ко извóлил есѝ на кипарíсе, и на пéвке, и кéдре,// плóтiю совозвышáемь.
На 12.Хор: От нóщи ýтренюет дух мой к Тебè, Бóже,/ занè свет повелéнiя Твоя́ на землù.
Чтец: В рóве, Хрїстè, преиспóднем положи́ша Тя бездыхáнна мéртва:/ но Твоéю я́звою забвéнныя мéртвыя, и́же во гробéх спя́щiя, уя́звен// с Собóю воскреси́л есѝ.
Хор: Прáвде научúтеся, живýщiи на землù.
Богорóдичен: Молѝ Сы́на Твоегò и Гóспода, Дéво Чи́стая,/ на Тя уповáющим мир даровáти, пленéнным избавлéнiе,// от сопроти́вных настоя́нiй.
Глас 8
На 10: Да вóзмется нечестúвый, да не вúдит слáвы Госпóдни./ Гóсподи, высокà Твоя́ мы́шца, и не вéдеша, разумéвше же постыдя́тся.
Чтец: Богáтства и даровáнiй Божéственных лиши́хся,/ и в странý прiидóх благи́х живóтных глáдом тáя,/ но Ты мя Óтче я́ко Благíй,/ дрéвнiя слáвы и слáдости,// благосéрдiя рáди Твоегò, испóлни.
Хор: Зáвисть прiúмет лю́ди ненакáзанныя,/ и ны́не огнь супостáты поя́ст.
Чтец: Пóмысл блýднаго, в блудè житiè ижди́вша прiи́мше,/ Отцý ми́лостивому притецéм,/ несумнéнною вéрою, и сокрушéнiем сéрдца,// я́ко да согрешéнiй оставлéнiе прiи́мем.
На 8.Хор: Приложù им зла, Гóсподи,/ приложù зла слáвным землù.
Чтец: Не косни́ душè моя́, в дáльней странè пребывáющи,/ но тецы́ вскóре, Бóгу и Отцý исповéдающися,/ да прiи́меши разрешéнiе,// и́хже зле содéлала есѝ житiè изнури́вши.
Хор: Гóсподи, в скóрби помянýхом Тя,/ в скóрби мáле наказáнiе Твоè нам.
Чтец: Свéтлый Тя óблак, нося́й Сóлнце прáвды,/ в Тебè носи́мое, Пречи́стая Дéво вéмы,/ неразýмiя тьму íдольскую отгоня́ющее,// и рáзумом и́стинным просвещáющее.
Глас 4
На 6.Хор: И я́ко боля́щая приближáется родúти, и в болéзни своéй вопiя́ше, тáко бы́хом Возлю́бленному Твоемý.
Не падéм, но падýт живýщiи на землù.
Чтец: Серпóм словéс твои́х, и свящéнными списáньми/ посéкл есѝ éреси тернови́дныя,/ и плéвел лóжная прозябéнiя,/ правослáвiя же благочести́вая положи́л есѝ сéмена,// священноначáльне Григóрiе. (двáжды)
На 4.Хор: Воскрéснут мéртвiи, и востáнут, úже во гробéх,/ и возвеселя́тся, úже на землù.
Росà бо, я́же от Тебè, исцелéнiе им есть,/ земля́ же нечестúвых падéт.
Чтец: Словесà твоя́ всемýдре, и честнáя списáнiя/ суть росà Небéсная,/ мед кáменный, хлеб áнгельскiй притекáющим,/ питié, брáшно, слáдость,// наслаждéнiе, Григóрiе, и истóчник живы́я воды́. (двáжды)
Слáва Отцý и Сы́ну и Святóму Дýху.
Тропáрь: Óбщаго тя учи́теля познавáет земля́ и мóре,/ столп свящéнный правослáвiя,/ и оружеполóжницу Божéственных догмáт честнýю,/ премýдраго богослóва свящéннаго,// сожи́теля, сопричáстника, апóстолом единонрáвнаго.
И ны́не и прúсно и во вéки векóв, амúнь.
Богорóдичен: Струя́ми умилéнiя,/ сквéрны сéрдца моегò Непорóчная отмы́й Дéво,/ и покая́нiя óбразы мне дáруй,/ Твои́ми к щéдрому Бóгу свящéнными молéнiи,// Егóже неизречéнно родилà есѝ.
Катавáсiя Трióди (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилà есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: В бéздне грехóвней валя́яся,/ неизслéдную милосéрдiя Твоегó призывáю бéздну:// от тли Бóже, мя возведù.
Хор: Слáва, Гóсподи, Святóму Воскресéнiю Твоемý.
Чтец: Я́ко злодéй Прáведник осуди́ся/ и со беззакóнными на дрéве пригвозди́ся,// пови́нным оставлéнiе Своéю дáруя крóвiю.
На 12.Хор: Возопúх в скóрби моéй ко Гóсподу Бóгу моемý,/ и услы́ша мя.
Чтец: Еди́нем ýбо человéком,/ пéрвым Адáмом дрéвле в мiр вни́де смерть,// и Еди́нем Воскресéнiе Сы́ном Бóжiим яви́ся.
Хор: Отвéргл мя есù во глубины̀ сéрдца морскáго,/ и рéки обыдóша мя.
Богорóдичен: Неискусомýжно, Дéво, родилà есѝ,/ и вéчнуеши Дéва, явля́ющи И҆́стиннаго Божествà,// Сы́на и Бóга Твоегò óбразы.
Глас 8
На 10: Вся высоты̀ Твоя́ и вóлны Твоя́ на мне преидóша.
Чтец: Юнéйшiй бых сын Твой,/ и богáтство Твоè зле ижди́х,/ удалéнiем злáго житiя́,/ и благи́х Твои́х лишáяся Человеколю́бче,/ прихождý Тебè Отцý и Бóгу моемý,// и прошý прощéнiя.
Хор: Едà приложý призрéти ми ко хрáму святóму Твоемý?
Чтец: Стрáнничество безчеловéчное получи́х,/ и пастѝ свинiѝ осуждéн бых,/ я́ко моè расточи́х богáтство,/ éже ми́лостивно вскóре подáл есѝ,/ и бых от всех наг,// но Ты я́ко Бог мой ущéдри.
На 8.Хор: Возлiя́ся водà до душù моея́,/ бéздна обы́де мя послéдняя.
Чтец: Не и́мам дерзновéнiя Человеколю́бче, воззрéти и ви́дети,/ согреши́в на Нéбо, безмéрную высотý,/ ни нарещи́ся сын Твой, блýдный,// но ущéдри мя тýне, имéяй безмéрную ми́лость.
Хор: Хор: Понрè главà моя́ в разсéли гор,/ снидóх в зéмлю, ея́же вереù ея́ заклéпи вéчнiи.
Чтец: Несказáнное Твоè Рождествò,/ и неизречéнный рождествà Твоегò óбраз Деви́це,/ я́ко Бóга вы́ше умà раждáеши,/ дéвство несквéрное имýщи:// тем Тя вси и́стинную Богорóдицу достóйно слáвим.
Глас 4
На 6: И да взы́дет из истлéнiя живóт мой к Тебè, Гóсподи, Бóже мой.
И да прiúдет к Тебè молúтва моя́, ко хрáму святóму Твоемý.
Чтец: Растерзáся сýетное шатáнiе,/ и язы́к Варлаáма безýмнаго,/ словесы́ и велéнiи, и рáзума остротóю// премýдраго царя́, и твоéю, Григóрiе. (двáжды)
На 4: Храня́щiи сýетная и лóжная, мúлость свою́ остáвиша.
Елúка обещáх, воздáм Тебè во спасéнiе моè, Гóсподеви.
Чтец: Божéственную цевни́цу Дýха,/ трубý я́ве проповéдающую Божéственныя тáйны,// Фессалонíтскаго председáтеля, Богослóвскiй язы́к, пéсньми почти́м. (двáжды)
Слáва Ѻтцý и Сы́ну и Святóму Дýху.
Тропáрь: Лю́дем иногдà предводи́тель,/ я́ко столп óгненный, вéры врагѝ попали́л есѝ,/ вéрных же состоя́нiя просвети́л есѝ,// богомýдре óтче Григóрiе.
И ны́не и прúсно и во вéки векóв, амúнь.
Богорóдичен: Бýди ми Всечи́стая Влады́чице,/ тишинà и пристáнище утешéнiя,/ преводя́щее к Божéственному пристáнищу невлáемому,// бýрю страстéй мои́х укроти́вши.
Катавáсiя Трióди (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Тропáрь Трióди (свт. Григóрiя), глас 8: Премýдрости свящéнный и Божéственный оргáн,/ богослóвiя свéтлую соглáсно трубý,/ воспевáем тя Григóрiе богоглагóльниче,/ но я́ко ум Умý пéрвому предстоя́й,/ к Немý ум наш óтче настáви, да зовéм:// рáдуйся проповéдниче благодáти.
Íкос: Áнгел яви́лся есѝ на землѝ, неизречéнная Бóжiя человéком возвещáя./ Безплóтных бо глáсы, от человéческих сый, и плóтiю употребля́яся, удиви́л есѝ нас,/ и вопи́ти тебè богоглагóливе увещáл есѝ сiя́:/ рáдуйся, и́мже тьма сокры́ся; рáдуйся, и́мже свет взы́де./ Рáдуйся, несоздáннаго Божествà áнгеле;/ рáдуйся, создáннаго и бýяго вои́стинну обличи́телю./ Рáдуйся, высотý невосходи́мую, Божéственное естествò рекíй;/ рáдуйся, глубинý неудóбь ви́димую, дéйство рекíй;/ рáдуйся, я́ко слáву Бóжiю дóбре рекл есѝ;/ рáдуйся, я́ко мнéнiя злодéев отрéкл есѝ./ Рáдуйся свети́льниче, показáвый Сóлнце;/ рáдуйся чáше, питiя́ Божéственнаго подáтельнице./ Рáдуйся, и́мже и́стина просiявáет;/ рáдуйся, и́мже помрачи́ся лжа.// Рáдуйся, проповéдниче благодáти.
ПЕСНЬ 7
Iрмóс: Богопротúвное велéнiе/ беззакóннующаго мучúтеля/ высóк плáмень вознеслó есть;/ Хрїстóс же прострè Богочестúвым отрокóм рóсу духóвную,// Сый благословéн и препрослáвлен.
Продолжéнiе здесь