СВЯТОЕ БОГОЯВЛЕНИЕ. КРЕЩЕНИЕ Господа Бога и Спаса нашего Иисуса Христа. ВЕЛИКОЕ ПОВЕЧЕРИЕ
19 января́ 2024 гóда. Святóе Богоявлéнiе. Крещéнiе Гóспода и Бóга и Спáса нáшего Iисýса Хрїстà. Всeнóщное бдéнiе для домáшнего (келéйнаго) совершéнiя состоúт из велúкаго повечéрiя, ýтрени, тáже канóна и пéрвого чáса.
ВЕЛИКОЕ ПОВЕЧЕРИЕ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
ПЕРВАЯ ЧАСТЬ ПОВЕЧЕРИЯ
Псалом 4
Внегдà призвáти ми, услы́ша мя Бог прáвды моея́, в скóрби распространи́л мя есѝ, ущéдри мя и услы́ши моли́тву мою́. Сы́нове человéчестiи, докóле тяжкосéрдiи? Вскýю лю́бите суетý и и́щете лжи? И увéдите, я́ко удивѝ Госпóдь преподóбнаго Своегò: Госпóдь услы́шит мя, внегдà воззвáти ми к Немý. Гнéвайтеся, и не согрешáйте, я́же глагóлете в сердцáх вáших, на лóжах вáших умили́теся. Пожри́те жéртву прáвды и уповáйте на Гóспода. Мнóзи глагóлют: кто яви́т нам благáя? Знáменася на нас свет лицà Твоегò, Гóсподи. Дал есѝ весéлiе в сéрдце моéм: от плодà пшени́цы, винà и елéа своегò умнóжишася. В ми́ре вкýпе уснý и почíю, я́ко Ты, Гóсподи, еди́наго на уповáнiи всели́л мя есѝ.
Псалом 6
Гóсподи, да не яростiю Твоéю обличи́ши менè, нижè гнéвом Твои́м накáжеши менè. Поми́луй мя, Гóсподи, яко нéмощен есмь, исцелѝ мя, Гóсподи, я́ко смятóшася кóсти моя́. И душà моя́ смятéся зелò: и Ты, Гóсподи, докóле? Обрати́ся, Гóсподи, избáви дýшу мою́: спасѝ мя рáди ми́лости Твоея́. Яко несть в смéрти поминáяй Тебè: во áде же кто исповéстся Тебè? Утруди́хся воздыхáнiем мои́м, измы́ю на вся́ку нощь лóже моè, слезáми мои́ми постéлю мою́ омочý. Смятéся от я́рости óко моè, обетшáх во всех вразéх моих. Отступи́те от менè, вси дéлающiи беззакóнiе, я́ко услы́ша Госпóдь глас плáча моегò: услы́ша Госпóдь молéнiе моè, Госпóдь моли́тву мою́ прiя́т. Да постыдя́тся и смятýтся вси вразѝ моѝ, да возвратя́тся и устыдя́тся зелò вскóре.
Псалом 12
Докóле, Гóсподи, забýдеши мя до концà? Докóле отвращáеши лицè Твоè от менè? Докóле положý совéты в душѝ моéй, болéзни в сéрдце моéм день и нощь? Докóле вознесéтся враг мой на мя? При́зри, услы́ши мя, Гóсподи Бóже мой, просветѝ óчи моѝ, да не когдà уснý в смерть, да не когдà речéт враг мой, укрепи́хся на негò. Стужáющiи ми возрáдуются, áще подви́жуся. Аз же на ми́лость Твою́ уповáх, возрáдуется сéрдце моè о спасéнiи Твоéм, воспою́ Гóсподеви благодéявшему мне и пою́ и҆́мени Гóспода Вы́шняго.
При́зри, услы́ши мя, Гóсподи Бóже мой, просветѝ óчи моѝ, да не когдà уснý в смерть, да не когдà речéт враг мой, укрепи́хся на негò.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 24
К Тебè, Гóсподи, воздвигóх дýшу мою́, Бóже мой, на Тя уповáх, да не постыжýся во век, нижè да посмею́т ми ся вразѝ моѝ; И҆́бо вси терпящiи Тя не постыдя́тся. Да постыдя́тся беззакóннующiи вотщè. Путѝ Твоя, Гóсподи, скажѝ ми, и стезя́м Твоим научѝ мя. Настáви мя на и҆́стину Твою́ и научѝ мя, яко Ты есѝ Бог Спас мой, и Тебè терпéх весь день. Помянѝ щедрóты Твоя, Гóсподи, и ми́лости Твоя, я́ко от вéка суть. Грех юности моея́ и невéденiя моегò не помянѝ, по ми́лости Твоéй помянѝ мя Ты рáди блáгости Твоея́, Гóсподи. Благ и прав Госпóдь, сегò рáди законоположи́т согрешáющим на путѝ. Настáвит крóткiя на суд, научи́т крóткiя путéм Свои́м. Вси путiè Госпóдни ми́лость и и҆́стина, взыскáющым завéта Егò и свидéнiя Егò. Рáди и҆́мене Твоегò, Гóсподи, и очи́сти грех мой, мног бо есть. Кто есть человéк боя́йся Гóспода; законоположи́т емý на путѝ, егóже извóли. Душà егò во благи́х водвори́тся, и сéмя егò наслéдит зéмлю. Держáва Госпóдь боя́щихся Егò и завéт Егò яви́т им. Óчи моѝ выну ко Гóсподу, яко Той истóргнет от сéти нóзе моѝ. При́зри на мя и поми́луй мя, яко единорóд и нищ есмь аз. Скóрби сéрдца моегò умнóжишася, от нужд мои́х изведѝ мя. Виждь смирéнiе моè и труд мой, и остáви вся грехѝ моя́. Виждь врагѝ моя́, я́ко умнóжишася, и ненавидéнiем непрáведным возненави́деша мя. Сохранѝ дýшу мою́ и избáви мя, да не постыжýся, я́ко уповáх на Тя. Незлóбивiи и прáвiи прилепля́хуся мне, я́ко потерпéх Тя, Гóсподи. Избáви, Бóже, Iзрáиля от всех скорбéй егò.
Псалом 30
На Тя, Гóсподи, уповáх, да не постыжýся во век: прáвдою Твоéю избáви мя и измѝ мя. Приклонѝ ко мне ýхо Твоè, ускорѝ изъя́ти мя, бýди ми в Бóга Защи́тителя, и в дом прибéжища, éже спастѝ мя. Яко держáва моя́ и прибéжище моè есѝ Ты, и и́мене Твоегò рáди настáвиши мя, и препитáеши мя. Изведéши мя от сéти сея́, ю́же скры́ша ми, я́ко Ты есѝ Защи́титель мой, Гóсподи. В рýце Твоѝ предложý дух мой: избáвил мя есѝ, Гóсподи Бóже и́стины. Возненави́дел есѝ храня́щiя суеты̀ вотщè: аз же на Гóспода уповáх. Возрáдуюся и возвеселю́ся о ми́лости Твоéй, я́ко призрéл есѝ на смирéнiе моè, спасл есѝ от нужд дýшу мою́, и нéси менè затвори́л в рукáх врáжiих, постáвил есѝ на прострáнне нóзе моѝ. Поми́луй мя, Гóсподи, я́ко скорблю́: смятéся я́ростiю óко моè, душà моя́ и утрóба моя́. Яко исчезè в болéзни живóт мой и лéта моя́ в воздыхáнiих, изнемóже нищетóю крéпость моя́ и кóсти моя́ смятóшася. От всех враг мои́х бых поношéнiе, и сосéдом мои́м зелò, и страх знáемым мои́м: ви́дящiи мя вон бежáша от менè. Забвéн бых я́ко мертв от сéрдца, бых я́ко сосýд погублéн. Яко слы́шах гаждéнiе мнóгих, живýщих óкрест, внегдà собрáтися им вкýпе на мя, прiя́ти дýшу мою́ совещáша. Аз же на Тя, Гóсподи, уповáх, рех: Ты есѝ Бог мой. В рукý Твоéю жрéбiи моѝ: избáви мя из рукѝ враг мои́х и от гоня́щих мя. Просветѝ лицè Твоè на рабà Твоегò, спасѝ мя ми́лостiю Твоéю. Гóсподи, да не постыжýся, я́ко призвáх Тя: да постыдя́тся нечести́вiи и сни́дут во ад. Нéмы да бýдут устны̀ льсти́выя, глагóлющiя на прáведнаго беззакóнiе, горды́нею и уничижéнiем. Коль мнóгое мнóжество блáгости Твоея́, Гóсподи, ю́же скрыл есѝ боя́щимся Тебè, содéлал есѝ уповáющим на Тя пред сы́ны человéческими. Скры́еши их в тáйне лицà Твоегò от мятéжа человéческа, покры́еши их в крóве от пререкáнiя язы́к. Благословéн Госпóдь, я́ко удивѝ ми́лость Свою́ во грáде ограждéнiя. Аз же рех во изступлéнiи моéм: отвéржен есмь от лицà óчiю Твоéю: сегò рáди услы́шал есѝ глас моли́твы моея́, внегдà воззвáх к Тебè. Возлюби́те Гóспода, вси преподóбнiи Егò, я́ко и́стины взыскáет Госпóдь, и воздаéт изли́ше творя́щым горды́ню. Мужáйтеся, и да крепи́тся сéрдце вáше, вси уповáющiи на Гóспода.
Псалом 90
Живы́й в пóмощи Вы́шняго, в крóве Бóга Небéснаго водвори́тся. Речéт Гóсподеви: застýпник мой есѝ и прибéжище моè, Бог мой, и уповáю на Негò. Яко Той избáвит тя от сéти лóвчи, и от словесè мятéжна; Плещмà Свои́ма осени́т тя, и под крилè Егò надéешися: орýжiем обыдет тя и҆́стина Егò. Не убои́шися от стрáха нощнáго, от стрелы летя́щiя во дни; От вéщи во тме преходя́щiя, от сря́ща и бéса полýденнаго. Падéт от страны̀ твоея́ ты́сяща, и тма одеснýю тебè, к тебè же не прибли́жится; Обáче очи́ма твои́ма смóтриши, и воздаянiе грéшников ýзриши. Яко Ты, Гóсподи, уповáнiе моè, Вы́шняго положи́л есѝ прибéжище твоè. Не прiи́дет к тебè зло, и рáна не прибли́жится телесѝ твоемý; Яко Áнгелом Свои́м заповéсть о тебè, сохрани́ти тя во всех путéх твои́х. На рукáх вóзмут тя, да не когдà преткнéши о кáмень нóгу твою́; На áспiда и васiлíска настýпиши, и поперéши льва и змíя. Яко на Мя уповà, и избáвлю и҆̀: покры́ю и҆̀, я́ко познà и҆́мя Моè. Воззовéт ко Мне, и услышу егò: с ним есмь в скóрби, измý егò, и прослáвлю егò; Долготóю дней испóлню егò, и явлю́ емý спасéнiе Моè.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
С НАМИ БОГ
С нáми Бог, разумéйте язы́цы, и покаря́йтеся:/ Я́ко с нáми Бог.
Услы́шите до послéдних землѝ:/ Я́ко с нáми Бог.
Могýщiи покаря́йтеся:/ Я́ко с нáми Бог.
Áще бо пáки возмóжете, и пáки побеждéни бýдете:/ Я́ко с нáми Бог.
И и҆́же áще совéт совещавáете, разори́т Госпóдь:/ Я́ко с нáми Бог.
И слóво, éже áще возглагóлете, не пребýдет в вас:/ Я́ко с нáми Бог.
Стрáха же вáшего не убои́мся, нижè смути́мся:/ Я́ко с нáми Бог.
Гóспода же Бóга нáшего Тогò освяти́м, и Той бýдет нам в страх:/ Я́ко с нáми Бог.
И áще на Негò надéяся бýду, бýдет мне во освящéнiе:/ Я́ко с нáми Бог.
И уповáя бýду на Негò, и спасýся Им:/ Я́ко с нáми Бог.
Се аз и дéти, я́же ми дадè Бог:/ Я́ко с нáми Бог.
Лю́дiе ходя́щiи во тьме, ви́деша свет вéлiй:/ Я́ко с нáми Бог.
Живýщiи во странè и сéни смéртней, свет возсiя́ет на вы:/ Я́ко с нáми Бог.
Яко Отрочà роди́ся нам, Сын, и дадéся нам:/ Я́ко с нáми Бог.
Егóже начáльство бысть на рáме Егò:/ Я́ко с нáми Бог.
И ми́ра Егó несть предéла:/ Я́ко с нáми Бог.
И нарицáется Имя Егò, Вели́ка Совéта Áнгел:/ Я́ко с нáми Бог.
Чýден Совéтник:/ Я́ко с нáми Бог.
Бог крéпок, Власти́тель, Начáльник ми́ра:/ Я́ко с нáми Бог.
Отéц бýдущаго вéка:/ Я́ко с нáми Бог.
С нáми Бог, разумéйте язы́цы, и покаря́йтеся:/ Я́ко с нáми Бог.
Слáва Отцý и Сы́ну и Святóму Дýху./ С нáми Бог.
И ны́не и при́сно и во вéки векóв. Ами́нь./ С нáми Бог.// Я́ко с нáми Бог.
ТРОПАРИ
День прешéд, благодарю́ Тя, Гóсподи, вéчер, прошý, с нóщiю без грехà подáждь ми, Спáсе, и спасѝ мя.
Слáва Отцý и Сы́ну и Святóму Дýху.
День прешéд, славослóвлю Тя, Влады́ко, вéчер, прошý, с нóщiю безсоблáзнство подáждь ми, Спáсе, и спасѝ мя.
И ны́не и прúсно и во вéки векóв. Амúнь.
День прешéд, песнослóвлю Тя, Святы́й, вéчер, прошý, ненавéтен подáждь ми, Спáсе, и спасѝ мя.
Безплóтное естествó Херувíмское, немóлчными пéсньми Тя славослóвят. Шестокри́льная живóтная серафíми, непрестáнными глáсы Тя превознóсят: Áнгелов же вся Вóинства трисвяты́ми пéсньми Тя восхваля́ют. Прéжде бо всех есѝ Сый Отéц, и собезначáльна и́маши Твоегò Сы́на: и равночéстна нося́й Дýха жи́зни, Трóицы явля́еши нераздéльное.
Пресвятáя Дéво Мáти Бóжiя, и и́же Слóва самови́дцы и слугѝ: прорóк же и мýченик вси ли́цы, я́ко безсмéртну имýще жизнь: о всех моли́теся прилéжно, я́ко вси есмы̀ в бедáх. Да прéлести избáвльшеся лукáваго, Áнгельскую вопiéм песнь: Святы́й, Святы́й, Святы́й, Трисвяты́й Гóсподи, поми́луй и спасѝ нас, ами́нь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Молительные стихи
Пресвятáя Влады́чице Богорóдице, молѝ о нас грéшных. (трúжды)
Вся Небéсныя Силы Святы́х Áнгел и Архáнгел, молите о нас грéшных.(2рáза)
Святый Iоáнне прорóче, и Предтéче, и Крести́телю Гóспода нáшего Iисýса Хрїстà, молѝ о нас грéшных. (двáжды)
Святiи слáвнiи Апóстоли, прорóцы и мýченицы, и вси святíи, моли́те о нас грéшных. (двáжды)
Преподóбнiи и богонóснiи отцы̀ нáши, пáстырiе и учи́телiе вселéнныя, моли́те о нас грéшных.(двáжды)
Непобеди́мая, и непостижи́мая, и Божéственная Си́ло Честнáго и Животворящаго Крестá, не остáви нас грéшных.(двáжды)
Бóже, очи́сти нас грéшных.(двáжды)
Бóже, очи́сти нас грéшных, и поми́луй нас.(двáжды)
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Тропáрь Богоявлéнiя, глас 1: Во Ioрдáне крещáющуся Тебè, Гóсподи,/ Трóйческое явúся поклонéнiе:/ Родúтелев бо глас свидéтельствоваше Тебè,/ возлю́бленнаго Тя Сы́на именýя,/ и Дух в вúде голубúне/ извéствоваше словесè утверждéнiе./ Явлéйся Хрїстè Бóже// и мiр просвещéй, слáва Тебè.
Гóсподи, поми́луй. (40 раз)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Моли́твами святых отéц нáших, Гóсподи Iисýсе Хрїстè, Бóже наш, поми́луй нас, ами́нь.
И молитву сию Великаго Василиа
Гóсподи Гóсподи, избавлéй нас от вся́кiя стрелы̀ летя́щiя во дни, избáви нас и от вся́кiя вéщи во тьме преходя́щiя. Прiимѝ жéртву вечéрнюю рук нáших воздея́нiе. Сподóби же нас и нощнóе пóприще без порóка прейтѝ, неискушéны от злых. И избáви нас от вся́каго смущéнiя и боя́зни, я́же от дiáвола нам прибывáющiя. Дáруй душáм нáшим умилéнiе, и помыслóм нáшим попечéнiе, éже на стрáшнем и прáведнем Твоéм судè испытáнiя. Пригвоздѝ стрáху Твоемý плóти нáша, и умертвѝ ýды нáша сýщiя на землѝ: да и сóнным безмóлвiем просвети́мся зрéнiем судéб Твои́х. Отимѝ же от нас вся́кое мечтáнiе неподóбное, и пóхоть врéдну. Возстáви же нас во врéмя моли́твы, утверждéны в вéре, и преспевáющiя в зáповедех Твои́х, благоволéнiем, и блáгостiю Единорóднаго Сы́на Твоегò: с Ни́мже благословéн есѝ, с Пресвяты́м, и Благи́м, и Животворя́щим Твои́м Дýхом, ны́не и при́сно, и во вéки векóв, ами́нь.
ВТОРАЯ ЧАСТЬ ПОВЕЧЕРИЯ
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Псалом 101
Гóсподи, услы́ши моли́тву мою́, и вопль мой к Тебè да прiи́дет. Не отвратѝ лицà Твоегò от менè: вóньже áще день скорблю́, приклонѝ ко мне ýхо Твоè: вóньже áще день призовý Тя, скóро услы́ши мя. Яко исчезóша я́ко дым днíе моѝ, и кóсти моя́ я́ко суши́ло сосхóшася. Уя́звен бых я́ко травà, и и́зсше сéрдце моè, я́ко забы́х снéсти хлеб мой. От глáса воздыхáнiя моегò прильпè кость моя́ плóти моéй. Уподóбихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осóбящаяся на зде. Весь день поношáху ми вразѝ моѝ, и хвáлящiи мя мнóю кленя́хуся. Занè пéпел я́ко хлеб ядя́х, и питiè моè с плáчем растворя́х. От лицà гнéва Твоегò и я́рости Твоея́: я́ко вознéс низвéргл мя есѝ. Днíе моѝ я́ко сень уклони́шася, и аз я́ко сéно изсхóх. Ты же, Гóсподи, во век пребывáеши, и пáмять Твоя́ в род и род. Ты воскрéс ущéдриши Сióна, я́ко врéмя ущéдрити eгò, я́ко прiи́де врéмя. Яко благоволи́ша рабѝ Твоѝ кáменiе eгò, и персть eгò ущéдрят. И убоя́тся язы́цы и́мене Госпóдня, и вси цáрiе зéмстiи слáвы Твоея́. Яко сози́ждет Госпóдь Сióна, и яви́тся во слáве Своéй. Призрè на моли́тву смирéнных, и не уничижѝ молéнiя их. Да напи́шется сiè в род ин, и лю́дiе зи́ждемiи восхвáлят Гóспода. Яко прини́че с высоты̀ святы́я Своея́, Госпóдь с Небесè на зéмлю призрè, услы́шати воздыхáнiе оковáнных, разреши́ти сы́ны умерщвлéнных, возвести́ти в Сióне И҆́мя Госпóдне, и хвалý Егò во Iерусали́ме. Внегдà собрáтися лю́дем вкýпе, и царéм, éже рабóтати Гóсподеви. Отвещà eмý на путѝ крéпости eгò: умалéнiе дней мои́х возвестѝ ми. Не возведѝ менè в преполовéнiе дней мои́х: в рóде родóв лéта Твоя́. В начáлех Ты, Гóсподи, зéмлю основáл есѝ, и делà рукý Твоéю суть небесà. Та поги́бнут, Ты же пребывáеши: и вся, я́ко ри́за обетшáют, и я́ко одéжду свiéши я́ и изменя́тся. Ты же тóйжде есѝ, и лéта Твоя́ не оскудéют. Сы́нове раб Твои́х вселя́тся, и сéмя их во век испрáвится.
Молитва Манассии царя Иудейска
Гóсподи Вседержителю, Бóже отéц нáших, Авраáмов, и Iсаáков, и Iáковль, и сéмене их прáведнаго: сотвори́вый нéбо и зéмлю со всéю лéпотою их, связáвый мóре слóвом повелéнiя Твоегò, заключи́вый бéздну, и запечáтствовавый ю́ стрáшным и слáвным и́менем Твои́м, егóже вся боя́тся, и трепéщут от лицà си́лы Твоея́, я́ко непостоя́нно великолéпiе слáвы Твоея́, и нестерпи́мь гнев, éже на грéшники прещéнiя Твоегò. Безмéрна же и неизслéдованна ми́лость обещáнiя Твоегò: Ты бо есѝ Госпóдь Вы́шнiй, благоутрóбен. долготерпели́в и многоми́лостив, и кáяйся о злóбах человéческих. Ты Гóсподи, по мнóжеству блáгости Твоея́, обещáл есѝ покая́нiе и оставлéнiе согреши́вшим Тебè, и мнóжеством щедрóт Твои́х, определи́л есѝ покая́нiе грéшником во спасéнiе. Ты ýбо Гóсподи Бóже сил, не положи́л есѝ покая́нiе прáведным, Авраáму и Iсаáку и Iáкову, не согреши́вшим Тебè. Но положи́л есѝ покая́нiе на мне, грéшнем: занè согреши́х пáче числà пескà морскáго. Умнóжишася беззакóнiя моя́, Гóсподи, умнóжишася беззакóнiя моя́: и несмь достóин воззрéти, и ви́дети высотý небéсную от мнóжества непрáвд мои́х. Сля́чен есмь мнóгими ýзами желéзными, во éже не возвестѝ главы̀ моея́, и несть ми ослаблéнiя: занè прогнéвах я́рость Твою́, и лукáвое пред Тобóю сотвори́х, не сотвори́вый вóли Твоея́, и не сохрани́вый повелéнiй Твои́х. И ны́не приклоня́ю колéна сéрдца, трéбуя от Тебè блáгости: согреши́х, Гóсподи, согреши́х, и беззакóнiя моя́ аз вем, но прошý моля́ся, ослáби ми, Гóсподи, ослáби ми, и не погубѝ менè со беззакóньми мои́ми. Нижè в век враждовáв соблюдéши зол мои́х, нижè осýдиши мя в преиспóдних землѝ. Занè Ты есѝ Бóже, Бог кáющихся, и на мне яви́ши всю блáгость Твою́, я́ко недостóйна сýща спасéши мя, по мнóзей ми́лости Твоéй, и восхвалю́ Тя вы́ну во днех животà моегò: я́ко Тя поéт вся си́ла небéсная, и Твоя́ есть слáва во вéки векóв, ами́нь.
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Кондáк Богоявлéнiя, глас 3: Явúлся есù днесь вселéнней,/ и свет Твой, Гóсподи, знáменася на нас,/ в рáзуме пою́щих Тя:/ пришéл есù и явúлся есù,// Свет Непристýпный.
Гóсподи, поми́луй. (40 раз)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Моли́твами святых отéц нáших, Гóсподи Iисýсе Хрїстè, Бóже наш, поми́луй нас, ами́нь.
Молитва святаго Мардария
Влады́ко Бóже Óтче Вседержи́телю, Гóсподи Сы́не Единорóдный Iисýсе Хрїстè, и Святы́й Дýше, Еди́но Божествó, Еди́на Си́ла, поми́луй мя грéшнаго, и и́миже вéси судьбáми спасѝ мя недостóйнаго рабá Твоегó, яко благословéн еси во вéки векóв, ами́нь.
ТРЕТЬЯ ЧАСТЬ ПОВЕЧЕРИЯ
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 69
Бóже, в пóмощь мою́ вонмѝ, Гóсподи, помощѝ ми потщи́ся. Да постыдя́тся и посрáмятся и́щущiи дýшу мою́, да возвратя́тся вспять и постыдя́тся хотя́щiи ми злáя. Да возвратя́тся áбiе стыдя́щеся глагóлющiи ми: блáгоже, блáгоже. Да возрáдуются и возвеселя́тся о Тебè вси и́щущiи Тебè, Бóже, и да глагóлют вы́ну, да возвели́чится Госпóдь, лю́бящiи спасéнiе Твоè: аз же нищ есмь и убóг, Бóже, помозѝ ми: Помóщник мой и Избáвитель мой есѝ Ты, Гóсподи, не закоснѝ.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Славословие вседневное:
Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Таже: Сподóби, Гóсподи, нощь сiю́ без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя. Благословéн есѝ, Гóсподи, научѝ мя оправдáнiем Твои́м. Благословéн есѝ, Влады́ко, вразумѝ мя оправдáнiем Твои́м. Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя во век, дел рукý Твоéю не прéзри: Тебè подобáет хвалà, Тебè подобáет пéнiе, Тебè слáва подобáет, Отцý, и Сы́ну, и Святóму Дýху, ны́не и при́сно, и во вéки векóв, ами́нь.
ЛИТИЯ
Стiхúры Прáздника, глас 4, самоглáсны (Космы́ монáха): Одевáяйся свéтом, я́ко ри́зою,/ нас рáди по нам бы́ти сподóбился eсть,/ во струи́ одевáется днесь Ioрдáнскiя,/ не Сам сих ко очищéнiю трéбуя,/ но нам Собóю устроя́яй порождéнiе./ О, чудесé!/ Без oгня́ изваря́ет,/ и назидáет без сокрушéнiя,/ и спасáет в Негó просвещáeмыя// Хрiстóс Бог и Спас душ нáших.
Тебé, в Дýсе и oгни́ очищáюща грех мíра,/ зря Крести́тель грядýща к себé,/ ужасáяся и трепéща, вопiя́ше, глагóля:/ не смéю держáти верх Твой пречи́стый,/ Ты мя освяти́, Влады́ко,/ Божéственным явлéнiем Твои́м,// Eди́не Человеколю́бче.
Прiиди́те, подражáим мýдрыя дéвы,/ прiиди́те, сря́щим я́вльшагося Влады́ку,/ я́ко прiи́де, я́ко Жени́х, ко Iоáнну./ Ioрдáн, ви́дев Тя, убоя́ся и пождá./ Iоáнн вопiя́ше:/ не смéю держáти верхá Безсмéртнаго./ Дух низхождáше в ви́де голуби́не освяти́ти вóды,/ и глас с Небесé:/ Сей eсть Сын Мой,/ пришéдый в мiр спасти́ род человéческiй,// Гóсподи, слáва Тебé.
Крещáется Хрiстóс и восхóдит от воды́,/ совозвóдит бо с Собóю мiр/ и зрит разводя́щаяся Небесá,/ я́же Адáм затвори́ себé и сýщим с ним,/ и Дух свидéтельствует Божествó,/ Подóбному бо предти́чет и глас от Небесé:// оттýду бо свидéтельствуемый, Спас душ нáших.
Трепетáше рукá Крести́телева,/ егдá пречи́стому Твоемý верхý коснýся;/ возврати́ся Iордáн рекá вспять,/ не дерзáя служи́ти Тебé./ Я́же бо устыдéся Iисýса Нави́на,/ кáко Творцá своегó устраши́тися не имя́ше?/ Но все испóлнил еси́ смотрéнiе, Спáсе наш,/ да спасéши мiр явлéнiем Твои́м,// Еди́не Человéколюбче.
Слáва Ѻтцý и Сы́ну и Святóму Дýху.
Глас 8 (Iоáнна монáха): Гóсподи, испóлнити хотя́,/ я́же устáвил eси́ от вéка,/ от всея́ твáри служи́тeли тáйны Твоея́ прiя́л eси́:/ от Áнгел - Гаврiи́ла, от человéк - Дéву,/ от Небéс - звездý и от вод - Ioрдáн,/ в нéмже беззакóнiе мiрскóе потреби́л eси́,// Спáсе наш, слáва Тебé.
И ны́не и прúсно и во вéки векóв, амúнь.
Глас 8 (Анатóлiево): Днесь тварь просвещáется,/ днесь вся́чeская веселя́тся,/ Небéсная вкýпе и земнáя,/ Áнгели и человéцы смешáются,/ идéже бо Царéво пришéствiе, и чин прихóдит./ Тецéм ýбо на Ioрдáн/ и ви́дим вси Iоáнна:/ кáко крещáет Верх Нерукотворéнный и Безгрéшный?/ Тéмже, апóстольскiй глас припевáюще, соглáсно возопiéм:/ яви́ся благодáть Бóжiя спаси́тельная всем человéком,// озаря́ющи и подаю́щи вéрным вéлiю ми́лость.
Гóсподи, помилуй. (40 раз)
Стихиры на стиховне
Стiхúры прáздника, самоглáсны, (Анатóлiево), глас 2 : На Ioрдáнстей рецé/ ви́дев Тя Iоáнн, к себé грядýща, глагóлаше:/ Хрiстé Бóже, что к рабý пришéл eси́,/ сквéрны не имы́й, Гóсподи?/ Во и́мя же чié Тя крещý?/ Oтцá? Но Тогó нóсиши в Себé./ Сы́на? Но Сам eси́ воплоти́выйся./ Дýха Святáго?/ И Сегó вéси дая́ти вéрным усты́.// Явлéйся Бóже, поми́луй нас.
Мóре вúде и побежè,/ Ioрдáн возвратúся вспять.
Стiхúра: Ви́деша Тя вóды, Бóже,/ ви́деша Тя вóды и убоя́шася:/ к Твоéй бо слáве противозрéти Херувíми не мóгут,/ нижé взирáти Серафíми,/ но, со стрáхом предстоя́ще,/ óвiи ýбо нóсят,/ óвiи же слáвят си́лу Твою́./ С ни́миже, Щéдре, возвещáем хвалý Твою́, глагóлюще:// явлéйся Бóже, поми́луй нас.
Что ти eсть мóре, я́ко побéгло eсù?/ И тебè, Ioрдáне, я́ко возвратúлся eсù вспять?
Стiхúра: Днесь Небесé и земли́ Творéц/ прихóдит плóтiю на Ioрдáн,/ Крещéнiя прося́ Безгрéшный,/ да очи́стит мiр от лéсти врáжiя,/ и крещáется от рабá Влады́ка вся́ческих,/ и очищéнiе водóю рóду человéческому дáрует./ Томý возопiéм:// явлéйся Бóже наш, слáва Тебé.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Глас 6 (Феофáново): Éже от Дéвы Сóлнце,/ ви́дя и́же от неплóдове свети́льник свéтлый,/ во Ioрдáне прося́ща Крещéнiя,/ ýжасом и рáдостiю вопiя́ше к Немý:/ Ты мя освяти́, Влады́ко,// Божéственным явлéнiем Твои́м.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Богоявлéнiя, глас 1: Во Ioрдáне крещáющуся Тебè, Гóсподи,/ Трóйческое явúся поклонéнiе:/ Родúтелев бо глас свидéтельствоваше Тебè,/ возлю́бленнаго Тя Сы́на именýя,/ и Дух в вúде голубúне/ извéствоваше словесè утверждéнiе./ Явлéйся Хрїстè Бóже// и мiр просвещéй, слáва Тебè. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню