СВЯТОЕ БОГОЯВЛЕНИЕ. КРЕЩЕНИЕ Господа Бога и Спаса нашего Иисуса Христа.ВСЕНОЩНОЕ БДЕНИЕ УТРЕНЯ КАНОН
19 января́ 2024 гóда. Святóе Богоявлéнiе. Крещéнiе Гóспода и Бóга и Спáса нáшего Iисýса Хрїстà. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкое повечéрiе) и здесь ( ýтреня)
Аллилýїа, аллилýїа, аллилýїа, слáва Тебè Бóже. (Трúжды)
Хор: Величáем Тя,/ Живодáвче Хрїстè,/ нас рáди ныне плóтiю крестúвшагося// от Iоáнна в водáх Iордáнских.
Гóсподи, поми́луй. (12 раз)
СЕДАЛЕН
Седáлен прáздника по полiелéи, глас 4: Прiиди́те, ви́дим, вéрнiи, где крести́ся Хрїстóс,/ да послéдуим прóчее ко Iордáну рецè,/ ко глáсу вопiю́щаго в пусты́ни,/ и уви́дим тáмо Содéтеля Адáмова,/ длáнiю рáбскою рукополагáема за благоутрóбiе неизречéнное,/ и к Немý велеглáсно возопiи́м:// пришéл еси́ и яви́лся еси́ во Iордáне освяти́ти вóды.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Прiиди́те, ви́дим, вéрнiи, где крести́ся Хрiстóс,/ да послéдуим прóчее ко Iордáну рецè,/ ко глáсу вопiю́щаго в пусты́ни,/ и уви́дим тáмо Содéтеля Адáмова,/ длáнiю рáбскою рукополагáема за благоутрóбiе неизречéнное,/ и к Немý велеглáсно возопiи́м:// пришéл еси́ и яви́лся еси́ во Iордáне освяти́ти вóды.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травà бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душà живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душà живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый, псалóм Давíдов: Мóре ви́де и побежè, Iордáн возврати́ся вспять. (Пс.113:3)
Хор: Мóре вúде и побежè,/ Iордáн возвратúся вспять.
Чтец: Что ти есть, мóре, я́ко побéгло еси́, и тебè, Iордáне, я́ко возврати́лся еси́ вспять? (Пс.113:5)
Хор: Мóре вúде и побежè,/ Iордáн возвратúся вспять.
Чтец: Мóре ви́де и побежè.
Хор: Iордáн возвратúся вспять.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.2): Во врéмя óно прiи́де Iисýс от Назарéта Галiлéйскаго и крестися от Iоáнна во Iордáне. И áбiе восходя́ от воды̀, ви́де разводя́щася Небесà и Дух, я́ко гóлубь, сходя́щ Нань. И глас бысть с Небесè: Ты есѝ Сын Мой возлю́бленный, о Нéмже благоволи́х.
[Синодальный перевод]В те дни пришел Иисус из Назарета Галилейского и крестился от Иоанна в Иордане. И когда выходил из воды, тотчас увидел Иоанн разверзающиеся небеса и Духа, как голубя, сходящего на Него. И глас был с небес: Ты Сын Мой возлюбленный, в Котором Мое благоволение. (Мк.1:9-11)
Хор: Слáва Тебè, Гóсподи, слáва Тебè.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 2: Вся́ческая днесь да возрáдуются,// Хрiстý я́вльшуся во Iордáне.
И ны́не и прúсно и во вéки векóв. Амúнь.
Вся́ческая днесь да возрáдуются,// Хрiстý я́вльшуся во Iордáне.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра Богоявлéнiя, глас 6: Бог Слóво яви́ся плóтiю рóду человéческому,/ стоя́ше крести́тися во Iордáне,/ и глагóлаше к Немý Предтéча:/ кáко прострý рýку/ и прикоснýся верхý Держáщаго вся́ческая?/ А́ще и от Марíи еси́ Младéнец,/ но вем Тя, Бóга Превéчнаго,/ по земли́ хóдиши, певáемый от Серафíм,/ и раб Влады́ку крещáти не научи́хся.// Непостижи́ме Гóсподи, слáва Тебè.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ПЕРВЫЙ КАНОН ПРАЗДНИКА, ГЛАС 2
ПЕСНЬ 1
Iрмóс: Глубины̀ откры́л есть дно/ и сýшею Своя́ влечéт,/ в ней покры́в протúвныя,/ крéпкiй во бранéх Госпóдь,// я́ко прослáвися. (Двáжды)
Хор (припéв): Слáва Тебè, Бóже наш, слáва Тебè.
Чтец (тропáрь): Адáма истлéвшаго обновля́ет струя́ми Iордáнскими/ и змiéв главы́ гнездя́щихся сокрушáет Царь векóв, Госпóдь,// я́ко прослáвися. (Двáжды)
Хор: Слáва Тебè, Бóже наш, слáва Тебè.
Чтец: Огнéм Божествà Невещéственным/ в плоть вещéственну одéявся, Iордáнскою облагáется водóю// воплощéйся от Дéвы Госпóдь, я́ко прослáвися.(Двáжды)
Хор: Слáва Тебè, Бóже наш, слáва Тебè.
Чтец: Сквéрну омывáяй человéков, сим очи́щся во Iордáне,/ и́мже, восхотéв, уподóбися, éже бе пребы́в,// сýщыя во тьме просвещáяй Госпóдь, я́ко прослáвися. (Двáжды)
ВТОРОЙ КАНОН ПРАЗДНИКА, ГЛАС 2
Iрмóс: Шéствует морскýю волня́щуюся бýрю,/ сýшу áбiе Iзрáиль я́вльшуюся./ Чермны́й же понт тристáты егúпетскiя покры̀ кýпно,/ водостлáнен гроб,// сúлою крéпкою деснúцы Влады́чни. (Двáжды)
Хор: Слáва Тебè, Бóже наш, слáва Тебè.
Чтец: У́тру я́вльшуся человéком светонóсну/ ны́не из пусты́ни, к водáм Iордáнским преклони́л есѝ, Царю́ сóлнца, Твою́ вы́ю,/ ли́ка мрáчна родоначáльника исхи́тити,// сквéрны же вся́кiя очи́стити тварь. (Трúжды)
Хор: Слáва Тебè, Бóже наш, слáва Тебè.
Чтец: Безначáльне, струя́м спогрéбшася Тебè, Слóве,/ нóваго превóдиши, истлéвшаго лéстiю,/ Сегò несказáнно от Отцà прiéм глас держáвен:// Сей возлю́бленный, рáвен же Мне Óтрок естествóм. (Трúжды)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiи Богоявлéнiя (глас 2): Глубины̀ откры́л есть дно/ и сýшею Своя́ влечéт,/ в ней покры́в протúвныя,/ крéпкiй во бранéх Госпóдь,// я́ко прослáвися.
Шéствует морскýю волня́щуюся бýрю,/ сýшу áбiе Iзрáиль я́вльшуюся./ Чермны́й же понт тристáты егúпетскiя покры̀ кýпно,/ водостлáнен гроб,// сúлою крéпкою деснúцы Влады́чни.
ПЕСНЬ 3
Iрмóс: Крéпость дая́й царéм нáшим Госпóдь/ и рог помáзанных Своúх вознося́й/ от Дéвы раждáется, грядéт же ко Крещéнiю./ Томý, вéрнiи, возопiéм:// несть свят, я́ко Бог наш. (Двáжды)
Хор: Слáва Тебè, Бóже наш, слáва Тебè.
Чтец: Неплóдная дрéвле и безчáдная лю́те, днесь весели́ся, Хрiстóва Цéрковь:/ водóю бо и Дýхом сы́нове тебè роди́шася, вéрою взывáюще:// несть свят, я́коже Бог наш.(Трúжды)
Хор: Слáва Тебè, Бóже наш, слáва Тебè.
Чтец: Вéлiим глáсом в пусты́ни вопiéт Предтéча:/ Хрiстý уготóвайте путѝ/ и стезѝ Бóгу нáшему прáвы содéлайте, вéрою взывáюще:// несть свят, я́коже Бог наш. (Трúжды)
Ин.
Iрмóс: Елúцы дрéвних изрешúхомся сéтей/ брáшен львов, сотрéнных членóвными,/ рáдуимся и разширúм устà, слóво плетýще от словéс сладкопéнiя,// úмже к нам наслаждáется даровáнiй. (Двáжды)
Хор: Слáва Тебè, Бóже наш, слáва Тебè.
Чтец: Умерщвлéнiе пéрвее насади́вый твáри,/ звéря злодéйственнаго вообрáжься в естествò,/ омрачáется плотски́м пришéствiем:// ýтру я́вльшуся, прирази́вся Влады́це сокруши́ти свою́ враждéбную главý.(Трúжды)
Хор: Слáва Тебè, Бóже наш, слáва Тебè.
Чтец: Влечéт к себè Богоздáнное естествò, утрóбы мучи́теля, погребéнное предéлы;/ раждáется пáки земнорóдных Обновлéнiе,/ дéло держáвно совершáя Влады́ка:// прiи́де бо, тóе очи́стити хотя́.(Трúжды)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiи Богоявлéнiя (глас 2): Крéпость дая́й царéм нáшим Госпóдь/ и рог помáзанных Своúх вознося́й/ от Дéвы раждáется, грядéт же ко Крещéнiю./ Томý, вéрнiи, возопiéм:// несть свят, я́ко Бог наш.
Елúцы дрéвних изрешúхомся сéтей/ брáшен львов, сотрéнных членóвными,/ рáдуимся и разширúм устà, слóво плетýще от словéс сладкопéнiя,// úмже к нам наслаждáется даровáнiй.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Ипакоù Богоявлéнiя, глас 5: Егдà явлéнiем Твои́м просвети́л есѝ вся́ческая,/ тогдà слáное невéрiя мóре побежè,/ и Iордáн, дóле текíй, возврати́ся,/ к Небесѝ возвышáя нас./ Но высотóю Божéственных зáповедей Твои́х// соблюдѝ, Хрiстè Бóже, моли́твами Богорóдицы и поми́луй нас.
ПЕСНЬ 4
Iрмóс: Услы́шах, Гóсподи, глас Твой, егóже рекл есù,/ глас вопiю́щаго в пусты́ни,/ я́ко возгремéл есù над водáми мнóгими,/ Твоемý свидéтельствуяй Сы́ну,/ весь быв сошéдшаго Дýха, возопù:// Ты есù Хрїстóс, Бóжiя мýдрость и сúла.(Двáжды)
Хор: Слáва Тебè, Бóже наш, слáва Тебè.
Чтец: Очищáемо сóлнце кто ви́де, -/ проповéдник вопiéт, - пресвéтлое естествóм?/ Да Тебè водáми, сiя́нiе Слáвы, Отцà óбраз Присносýщнаго, омы́ю/ и, сéно сый, Огню́ прикоснýся Твоегò Божествà?// Ты бо есѝ Хрiстóс, Бóжiя мýдрость и си́ла.(Двáжды)
Хор: Слáва Тебè, Бóже наш, слáва Тебè.
Чтец: Явѝ Божéственное, éже имè, благоговéнiе Моисéй, прилучи́вся Тебè,/ я́ко бо из купины̀ Тя, возгласи́вша, разумè, áбiе отвратѝ лицè./ Аз же кáко Тя уви́жу я́сно?/ Илѝ кáко рукý положý на Тя?// Ты бо есѝ Хрiстóс, Бóжiя мýдрость и си́ла. (Двáжды)
Хор: Слáва Тебè, Бóже наш, слáва Тебè.
Чтец: Душéвное совершáя мýдре и слóвом почтéнный, бездýшных стыждýся./ А́ще бо крещý Тя, клевéтна ми есть огнéм дымя́щаяся горà,/ побéгшее же мóре на двóе и Iордáн сей, возврати́выйся:// Ты бо есѝ Хрiстóс, Бóжiя мýдрость и си́ла.(Двáжды)
Ин
Iрмóс: Огнéм очúщся тáйнаго зрéнiя,/ поя́ прорóк человéков новодéйство,/ возглашáет глас, Дýхом плéщущ,/ воплощéнiе явля́ющ Неизречéнна Слóва,// И́мже сúльных держáвы сотрóшася. (Двáжды)
Хор: Слáва Тебè, Бóже наш, слáва Тебè.
Чтец: Пóслан от Отцà, всесвéтлое Слóво, нóщи отгнáти зломрáчное стремлéнiе,/ и искорени́ти грядéши человéков грехѝ,/ сы́ны же привлещѝ, Твои́м Крещéнiем, Блáже,// свéтлы от струй Iордáнских.(Двáжды)
Хор: Слáва Тебè, Бóже наш, слáва Тебè.
Чтец: Сáмое прови́дев наречéнное Слóво, я́сно проповéдник вопiéт твáри:/ Сей прéжде менè, вторы́й плóтiю сообрáзен,// просiя́ Божéственною си́лою враждéбный наш отъя́ти грех.(Двáжды)
Хор: Слáва Ѻтцý и Сы́ну и Святóму Дýху.
Чтец: Пáжить у Себè животвóрну нося́, уловля́ет змiéв,/ гнéздам натекáя мнóгими сетьмѝ, низлагáя, Бог Слóво,/ запинáет же уязви́вшаго всемíрный род,// сегò потрéбль, избавля́ет тварь.
и ны́не и прúсно и во вéки векóв, амúнь.
Чтец: Пáжить у Себè животвóрну нося́, уловля́ет змiéв,/ гнéздам натекáя мнóгими сетьмѝ, низлагáя, Бог Слóво,/ запинáет же уязви́вшаго всемíрный род,// сегò потрéбль, избавля́ет тварь.
Катавáсiи Богоявлéнiя (глас 2): Услы́шах, Гóсподи, глас Твой, егóже рекл есù,/ глас вопiю́щаго в пусты́ни,/ я́ко возгремéл есù над водáми мнóгими,/ Твоемý свидéтельствуяй Сы́ну,/ весь быв сошéдшаго Дýха, возопù:// Ты есù Хрїстóс, Бóжiя мýдрость и сúла.
Огнéм очúщся тáйнаго зрéнiя,/ поя́ прорóк человéков новодéйство,/ возглашáет глас, Дýхом плéщущ,/ воплощéнiе явля́ющ Неизречéнна Слóва,// И́мже сúльных держáвы сотрóшася.
ПЕСНЬ 5
Iрмóс: Iисýс, животà Начáльник,/ разрешúти осуждéнiе грядéт Адáма первоздáннаго,/ очищéнiй же, я́ко Бог, не трéбуя,/ пáдшаго очищáет во Iордáне,/ в нéмже враждý убúв,// преимýщ всяк ум мир дáрует. (Двáжды)
Хор: Слáва Тебè, Бóже наш, слáва Тебè.
Чтец: Сшéдшимся без числа́ лю́дем от Iоáнна крести́тися, сам посреде́ их ста./ Провозгласи́ же предстоя́щим:/ кто показа́, непокори́вiи, гнéва вам уклони́тися, хотя́щаго бы́ти?/ Плоды́ достóйны Хрiсту́ сотвори́те:// Предстоя́й бо ны́не мир дáрует.(Трúжды)
Хор: Слáва Тебè, Бóже наш, слáва Тебè.
Чтец: Дéлатель и Зижди́тель, посреде́ стоя́й, я́ко Еди́н всех сердца́ испыту́ет,/ чисти́тельную же лопáту рукóю прiéм,/ всеми́рное гумно́ всему́дре разлучáет, неплóдiе паля́,// благоплóдным вéчный живóт дáрует.(Трúжды)
Ин
Iрмóс: Врагá тéмнаго и осквернéннаго я́да очищéнiем Дýха измовéни,/ к нóвой пристáхом неблáзненной стезù,/ водя́щей в непристýпную рáдость, едúнем пристýпну,// úмже Бог примирúся. (Двáжды)
Хор: Слáва Тебè, Бóже наш, слáва Тебè.
Чтец: Ви́дев Зижди́тель во мра́це прегрешéнiй плени́цами неизбéжными/ егóже вообрази́ персты́, поставля́ет на обою́ ра́му, воздвиг горе́, ны́не во многотеку́щих вода́х омыва́я студа́ дрéвняго// Ада́мова зла́го нра́ва.(Трúжды)
Хор: Слáва Тебè, Бóже наш, слáва Тебè.
Чтец: Со благочéстiем притецéм прилéжно ко истóчником пречи́стым течéнiя спаси́тельнаго,/ Слóво усмотря́юще от Нетлéнныя,/ почерпа́ла принося́ще жа́жди Божéственныя,// ми́ра сла́достне исцеля́я неду́г.(Трúжды)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiи Богоявлéнiя (глас 2): Iисýс, животà Начáльник,/ разрешúти осуждéнiе грядéт Адáма первоздáннаго,/ очищéнiй же, я́ко Бог, не трéбуя,/ пáдшаго очищáет во Iордáне,/ в нéмже враждý убúв,// преимýщ всяк ум мир дáрует.
Врагá тéмнаго и осквернéннаго я́да очищéнiем Дýха измовéни,/ к нóвой пристáхом неблáзненной стезù,/ водя́щей в непристýпную рáдость, едúнем пристýпну,// úмже Бог примирúся.
ПЕСНЬ 6
Iрмóс: Глас Словесè, светúльник Свéта,/ деннúца Сóлнца, Предтéча в пусты́ни, -/ покáйтеся! - всем вопiéт лю́дем, - и предочúститеся:/ се бо предстоúт Хрїстóс,// от тли мiр избавля́яй. (Двáжды)
Хор: Слáва Тебè, Бóже наш, слáва Тебè.
Чтец: Рóждься нетле́нно от Бóга и Отца́,/ от Де́вы кроме́ скве́рны воплоща́ется Хрiстóс,/ Ему́же реме́нь, я́же от нас Слóва сочта́нiя, разреши́ти неудóб, учи́т Предте́ча,// земнорóдныя от ле́сти избавля́я.(Трúжды)
Хор: Слáва Тебè, Бóже наш, слáва Тебè.
Чтец: Огне́м крести́т коне́чным Хрiстóс проти́вныя,/ а не Бóга му́дрствующих Его́,/ Ду́хом же обновля́ет водóю благода́ти разумли́выя Божества́ Его́,// от прегреше́нiй избавля́я.(Трúжды)
Ин
Iрмóс: Вожделéннаго я́вствова со всеблажéнным глáсом Отéц,/ Егóже из чрéва отры́гну./ Ей, - глагóлет, - Сей соестéствен Сын,/ Сый светозáрен, произнúче из человéча рóда,// Слóво же моè жúво, и Человéк промышлéнiем. (Двáжды)
Хор: Слáва Тебè, Бóже наш, слáва Тебè.
Чтец: От глуби́ннаго льва, тревечéрнiй стра́нне прорóк во вну́тренних валя́яся,/ а́бiе произы́де, пакибытiя́ спасéнiе// от зми́я человекоуби́йцы всем предъявля́я в послéдняя лéта.(Трúжды)
Хор: Слáва Тебè, Бóже наш, слáва Тебè.
Чтец: Отвéрсту Нéбу всесве́тлых писа́нiй, учени́к зрит от Отца́ посыла́емый,/ пребыва́ющ же Дух на Пречи́стем Слóве,/ нашéд я́ко гóлубь неизречéнным óбразом,// лю́дем же явля́ется, пришéдшим ко Влады́це.(Трúжды)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiи Богоявлéнiя (глас 2): Глас Словесè, светúльник Свéта,/ деннúца Сóлнца, Предтéча в пусты́ни, -/ покáйтеся! - всем вопiéт лю́дем, - и предочúститеся:/ се бо предстоúт Хрїстóс,// от тли мiр избавля́яй.
Вожделéннаго я́вствова со всеблажéнным глáсом Отéц,/ Егóже из чрéва отры́гну./ Ей, - глагóлет, - Сей соестéствен Сын,/ Сый светозáрен, произнúче из человéча рóда,// Слóво же моè жúво, и Человéк промышлéнiем.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прáздника, глас 4: Яви́лся есѝ днесь вселéнней,/ и свет Твой, Гóсподи, знáменася на нас,/ в рáзуме пою́щих Тя:/ пришéл есѝ и яви́лся есѝ,// Свет Непристýпный.
Íкос: Галiлéи язы́честей, Завулóнстей стране́ и Неффали́мстей земли́,/ я́коже рече́ прорóк, Свет вели́к возсiя́, Хрiстóс./ Омрачéнным свéтла яви́ся Заря́, из Вифлеéма облистáющая,/ пáче же из Мари́и Госпóдь, всей вселéнней возсiявáет лучи́ Сóлнце прáвды./ Тéмже, и́же от Адáма нази́и, прiиди́те вси, облечéмся в Него́, да согрéемся,/ покрывáет бо наги́я и просвещáет тéмныя.// Пришéл еси́ и яви́лся еси́, Свет Непристу́пный.
Песнь 7
Iрмóс: Ю́ноши благочестúвыя, пéщи óгненней приобщúвшiяся,/ шумя́щ дух рóсный невредúмы сохранù/ и Бóжiя А́нгела снизхождéнiе./ Тéмже, в плáмени орошáеми, благодáрственно воспевáху:// препéтый отéц Гóсподи и Бóже, благословéн есù. (Двáжды)
Хор: Слáва Тебè, Бóже наш, слáва Тебè.
Чтец:Я́коже на Небеси́, с трéпетом и чу́дом предстоя́ху/ во Iордáне си́лы Áнгельскiя, смотря́юще толи́ка Бóжiя схождéнiя:/ я́ко Держáй превы́шних вод состáв, в водáх Плотонóсец стоя́ше,// Бог отцéв нáших.(Двáжды)
Хор: Слáва Тебè, Бóже наш, слáва Тебè.
Чтец: О́блак дрéвле и мóре Божéственнаго прообража́ху Крещéнiя чу́до,/ в ни́хже дрéвнiи крести́шася, исходя́ще закóннiи лю́дiе./ Мóре же бе óбраз воды́, и óблак - Ду́ха.// И́миже совершáеми, - благословéн еси́, - зовéм, - Гóсподи Бóже, во вéки.(Двáжды)
Хор: Слáва Тебè, Бóже наш, слáва Тебè.
Чтец: Вси вéрнiи, в Нéмже совершéнiе прiя́хом,/ богосло́вяще немóлчно со Áнгелы, прослáвим Отца́, и Сы́на, и Ду́ха Святáго:/ се бо - Трóица, Ипостáсьми Единосу́щная, Еди́н же Бог.// Ему́же поéм: благословéн еси́, Гóсподи Бóже, во вéки. (Двáжды)
Ин
Iрмóс: Опалù струéю змíевы главы̀ пéщный высóкiй плáмень,/ ю́ноши нося́щ благочестúвыя,/ Утúшивый, неудободержúмую мглу из грехà// всю же омывáет росóю Дýха. (Двáжды)
Хор: Слáва Тебè, Бóже наш, слáва Тебè.
Чтец: Тебе́ живопису́ющiй ассири́йскiй пла́мень ужа́сен поставля́еши, в рóсу преведéн;/ тéмже вода́ ны́не, я́коже пла́мень, одева́яй, врéдную злóбу, Хрiсте́, прикровéнную опаля́ет,// от поползновéнныя стези́ призыва́ющи.(Двáжды)
Хор: Слáва Тебè, Бóже наш, слáва Тебè.
Чтец: Раздéльшуся Iорда́ну дрéвле, по су́ху прехóдят лю́дiе Iзра́ильтестiи,/ Тебе́, Держа́внейшаго, содержа́ща тварь некосни́тельне,// ны́не в вода́х напису́ющiи, к нетлéнней и полéзней стези́.(Двáжды)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вéмы, пéрвее всепа́губный потóп/ ми́лостивно Тя всех во тлю привести́,/ о, тревели́кая сотворя́я и стра́нная!// Ны́не же потóпльша, Хрiсте́, грех за благосéрдiе и человéческое спасéнiе.(Двáжды)
Катавáсiи Богоявлéнiя (глас 2): Ю́ноши благочестúвыя, пéщи óгненней приобщúвшiяся,/ шумя́щ дух рóсный невредúмы сохранù/ и Бóжiя А́нгела снизхождéнiе./ Тéмже, в плáмени орошáеми, благодáрственно воспевáху:// препéтый отéц Гóсподи и Бóже, благословéн есù.
Опалù струéю змíевы главы̀ пéщный высóкiй плáмень,/ ю́ноши нося́щ благочестúвыя,/ Утúшивый, неудободержúмую мглу из грехà// всю же омывáет росóю Дýха.
Песнь 8
Iрмóс: Тáйну преслáвную вавилóнская показà пещь, источúвшая рóсу,/ я́ко струя́ми имя́ше Невещéственный Огнь воспрiя́ти Iордáн/ и объя́ти плóтiю крещáема Зиждúтеля,// Егóже благословя́т лю́дiе и превознóсят во вся вéки.(Двáжды)
Хор: Слáва Тебè, Бóже наш, слáва Тебè.
Чтец: Отложи́ страх весь, - Изба́витель Предтéчи рече́,/ - Мне же повини́ся, я́ко Благóму,/ Мне приступи́, сiе́ бо естествóм бых,/ Мои́м повелéнiем покори́ся и крести́ Мя, сошéдшаго,// Егóже благословя́т лю́дiе и превознóсят во вся вéки.(Двáжды)
Хор: Слáва Тебè, Бóже наш, слáва Тебè.
Чтец: Глагóлы я́коже услы́ша Крести́тель Влады́чни, с трéпетом длань простира́ет,/ оба́че же, рукóю косну́вся верху́ Зижди́теля своего́, Крéщшемуся вопiя́ше:/ освяти́ мя, Ты бо еси Бог мой,// Егóже благословя́т лю́дiе и превознóсят во вся вéки.(Двáжды)
Хор: Слáва Тебè, Бóже наш, слáва Тебè.
Чтец: Трóицы явлéнiе во Iорда́не бысть,/ са́мое бо Пребожéственное Естество́, Отéц, возгласи́:/ Сей креща́емый - Сын возлю́бленный Мой,/ Дух же прiи́де к Подóбному,// Егóже благословя́т лю́дiе и превознóсят во вся вéки. (Двáжды)
Ин
Iрмóс: Свобóдна ýбо тварь познавáется/ и сы́нове Свéта, прéжде омрачéннiи,/ едúн стенéт тьмы предстáтель./ Ны́не да благословúт усéрдно Винóвнаго// прéжде окая́нное язы́ков всенаслéдiе.(Двáжды)
Хор: Слáва Тебè, Бóже наш, слáва Тебè.
Чтец: Трiе́ Богови́днiи, во огни́ ороша́еми, озаря́ющеся тремѝ всесвéтле святы́нями,/ я́ве показова́ху Превы́шнее Естество́ смешéнiем человéческим,// огнепаля́щее росóю ми́лостивно вся́ку па́губную лесть.(Трúжды)
Хор: Слáва Тебè, Бóже наш, слáва Тебè.
Чтец: Да убели́тся вся́кое земнóе естество́,/ от падéнiя ны́не на Нéбо возводи́мо,/ И́мже бо вся соблюда́ются, Слóвом, теку́щими струя́ми омы́вшеся,// прегрешéнiй прéжних убеже́, пресвéтло измовéно.(Трúжды)
Хор: Благословúм Отцà, и Сы́на, и Святáго Дýха, Гóспода, и ны́не и прúсно и во вéки векóв, амúнь.
Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiи Богоявлéнiя (глас 2): Тáйну преслáвную вавилóнская показà пещь, источúвшая рóсу,/ я́ко струя́ми имя́ше Невещéственный Огнь воспрiя́ти Iордáн/ и объя́ти плóтiю крещáема Зиждúтеля,// Егóже благословя́т лю́дiе и превознóсят во вся вéки.
Свобóдна ýбо тварь познавáется/ и сы́нове Свéта, прéжде омрачéннiи,/ едúн стенéт тьмы предстáтель./ Ны́не да благословúт усéрдно Винóвнаго// прéжде окая́нное язы́ков всенаслéдiе.
Песнь 9
Вóзглас: Величáй, душè моя́,// Честнéйшую Гóрних вóинств, Дéву Пречúстую, Богорóдицу.
Iрмóс: Недоумéет всяк язы́к благохвалúти по достоя́нiю,/ изумевáет же ум и премúрный пéти Тя, Богорóдице,/ обáче Благáя сýщи, вéру прiимù,/ úбо любóвь вéси Божéственную нáшу:// Ты бо хрiстiáн есù Предстáтельница, Тя величáем.
Хор: Величáй, душè моя́,// Честнéйшую Гóрних вóинств, Дéву Пречúстую, Богорóдицу.
Iрмóс: Недоумéет всяк язы́к благохвалúти по достоя́нiю,/ изумевáет же ум и премúрный пéти Тя, Богорóдице,/ обáче Благáя сýщи, вéру прiимù,/ úбо любóвь вéси Божéственную нáшу:// Ты бо хрiстiáн есù Предстáтельница, Тя величáем.
Хор: Величáй, душè моя́,/ от Предтéчи Крещéнiя Прося́ща.
Чтец: Давíде, прiидѝ Дýхом к просвещéнным, -/ ны́не приступи́те, - пой к Бóгу, -/ вéрою, - глагóля, - просвети́теся!/ Сей ни́щiй воззвà Адáм в падéнiи, и́бо Тогò услы́ша Госпóдь,// пришéд, струя́ми Iордáнскими тлéннаго же обновѝ.
Хор: Величáй, душè моя́,/ во Iордáне Пришéдшаго крестúтися.
Чтец: Давíде, прiидѝ Дýхом к просвещéнным, -/ ны́не приступи́те, - пой к Бóгу, -/ вéрою, - глагóля, - просвети́теся!/ Сей ни́щiй воззвà Адáм в падéнiи, и́бо Тогò услы́ша Госпóдь,// пришéд, струя́ми Iордáнскими тлéннаго же обновѝ.
Хор: Величáй, душè моя́,/ от Отéческаго глáса Свидéтельствованна.
Чтец: Исáiя, - измы́йтеся, очи́ститеся! - глагóлет,/ - лукáвствiя пред Гóсподем остáвите./ Жáждущiи, на вóду жи́ву иди́те:/ кропи́т бо водóю, обновля́я, Хрiстóс приступáющiя к Немý вéрою// и к животý нестарéемому крещáет Дýхом.
Хор: Величáй, душè моя́,/ Едúнаго от Трóицы, преклóньшаго вы́ю и Крещéнiе прiéмша.
Чтец: Исáiя, - измы́йтеся, очи́ститеся! - глагóлет,/ - лукáвствiя пред Гóсподем остáвите./ Жáждущiи, на вóду жи́ву иди́те:/ кропи́т бо водóю, обновля́я, Хрiстóс приступáющiя к Немý вéрою// и к животý нестарéемому крещáет Дýхом.
Хор: Прорóче, прiидù ко Мне,/ прострù рýку и крестù Мя скóро.
Чтец: Соблюдáемся благодáтiю, вéрнiи, и печáтiю./ Я́ко бо губи́теля, бежáша прáга еврéи, дрéвле окровáвлена,/ тáко и нам исхóдное Божéственное сiè пакибытiя́ бáня бýдет.// Отсю́ду и Трóицы ýзрим Свет Незаходи́мый.
Хор: Прорóче, остáви ны́не и крестù Мя, хотя́ща:/ испóлнити бо прiидóх вся́ку прáвду.
Чтец: Соблюдáемся благодáтiю, вéрнiи, и печáтiю./ Я́ко бо губи́теля, бежáша прáга еврéи, дрéвле окровáвлена,/ тáко и нам исхóдное Божéственное сiè пакибытiя́ бáня бýдет.// Отсю́ду и Трóицы ýзрим Свет Незаходи́мый.
Ин
Хор: Днесь Влады́ка/ преклоня́ет вы́ю под рýку Предтéчеву.
Iрмóс: О, пáче умà Рождествà Твоегò чудéс!/ Невéсто Всечúстая,/ Мáти Благословéнная,/ Éюже получúвше всесовершéнное спасéнiе,// достóйно хвáлим я́ко Благодéтеля, дар нося́ще песнь благодарéнiя.
Хор: Днесь Влады́ка/ преклоня́ет вы́ю под рýку Предтéчеву.
Iрмóс: О, пáче умà Рождествá Твоегó чудéс!/ Невéсто Всечи́стая,/ Мáти Благословéнная,/ Éюже получи́вше всесовершéнное спасéнiе,// достóйно хвáлим я́ко Благодéтеля, дар нося́ще песнь благодарéнiя.
Хор: Днесь Iоáнн крещáет Влады́ку,/ во струя́х Iордáнских.
Чтец: Увéдехом Моисéю купинóю явлéнная, грядѝ, стрáнными устáвы содéланная:/ я́ко бо спасéся, Огнь нося́щи, Дéва, Светонóсна рóждши Благодéтеля,// во Iордáнских же струя́х явлéнна.
Хор: Днесь Iоáнн крещáет Влады́ку,/ во струя́х Iордáнских.
Чтец: Увéдехом Моисéю купинóю явлéнная, грядѝ, стрáнными устáвы содéланная:/ я́ко бо спасéся, Огнь нося́щи, Дéва, Светонóсна рóждши Благодéтеля,// во Iордáнских же струя́х явлéнна.
Хор: Днесь Влады́ка/ водáми погребáет человéческiй грех.
Чтец: Увéдехом Моисéю купинóю явлéнная, грядѝ, стрáнными устáвы содéланная:/ я́ко бо спасéся, Огнь нося́щи, Дéва, Светонóсна рóждши Благодéтеля,// во Iордáнских же струя́х явлéнна.
Хор: Днесь Влады́ка свы́ше свидéтельствуется,/ Сын возлю́бленный.
Чтец: Помазýеши, совершáя человéческое существò, Царю́ Безначáльне,/ Дýха общéнiем, струя́ми чи́стыми отмы́в/ и тьмы крéпость же посрáмль возвы́шенную,// ны́не в безпрестáннем воздáти житiѝ.
Хор: Днесь Влады́ка/ прiúде освятúти естествò воднóе.
Чтец: Помазýеши, совершáя человéческое существò, Царю́ Безначáльне,/ Дýха общéнiем, струя́ми чи́стыми отмы́в/ и тьмы крéпость же посрáмль возвы́шенную,// ны́не в безпрестáннем воздáти житiѝ.
Хор: Днесь Влады́ка/ Крещéнiе прiéмлет рукóю Предтéчевою.
Чтец: Помазýеши, совершáя человéческое существò, Царю́ Безначáльне,/ Дýха общéнiем, струя́ми чи́стыми отмы́в/ и тьмы крéпость же посрáмль возвы́шенную,// ны́не в безпрестáннем воздáти житiѝ.
Величáй, душè моя́,// Честнéйшую Гóрних вóинств, Дéву Пречúстую, Богорóдицу.
Катавáсiя Богоявлéнiя (глас 2): Недоумéет всяк язы́к благохвалúти по достоя́нiю,/ изумевáет же ум и премúрный пéти Тя, Богорóдице,/ обáче Благáя сýщи, вéру прiимù,/ úбо любóвь вéси Божéственную нáшу:// Ты бо хрiстiáн есù Предстáтельница, Тя величáем.
Днесь Влады́ка/ преклоня́ет вы́ю под рýку Предтéчеву.
Ин катавáсiя Богоявлéнiя (глас 2): О, пáче умà Рождествà Твоегò чудéс!/ Невéсто Всечúстая,/ Мáти Благословéнная,/ Éюже получúвше всесовершéнное спасéнiе,// достóйно хвáлим я́ко Благодéтеля, дар нося́ще песнь благодарéнiя.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен прáздника: Яви́ся Спас, благодáть и и́стина, во струя́х Iордáнских/ и сýщiя во тьме и сéни спя́щiя просвети́л есть,// и́бо прiи́де и яви́ся Свет Непристýпный.
Слáва Отцý и Сы́ну и Святóму Дýху.
Яви́ся Спас, благодáть и и́стина, во струя́х Iордáнских/ и сýщiя во тьме и сéни спя́щiя просвети́л есть,// и́бо прiи́де и яви́ся Свет Непристýпный.
И ны́не и прúсно и во вéки векóв, амúнь.
Яви́ся Спас, благодáть и и́стина, во струя́х Iордáнских/ и сýщiя во тьме и сéни спя́щiя просвети́л есть,// и́бо прiи́де и яви́ся Свет Непристýпный.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егó Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егò. Хвали́те Бóга во святы́х Егò, хвали́те Егò в утвержéнiи си́лы Егò.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúры прáздника, глас 1, (Гéрмана патрiáрха): Свет от Свéта,/ возсiя́ мíрови Хрїстóс, Спас наш,/ явлéйся Бог.// Семý, лю́дiе, поклони́мся.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Кáко Тя, Хрїстè,/ рабѝ, Влады́ку достóйно почти́м?// Я́ко в водáх всех нас обнови́л eсѝ.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúра: Ты, во Ioрдáне крéщся, Спáсе наш,/ вóды освяти́л eсѝ,/ длáнiю рабá рукополагáемый/ и стрáсти мíра исцеля́яй./ Вéлiе тáинство явлéнiя Твоегó,// Человеколю́бче Гóсподи, слáва Тебè.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: И҆́стинный Свет яви́ся/ и всем просвещéнiе дáрует,/ крещáется Хрїстóс с нáми,/ И҆́же вся́кiя вы́шши чистоты́,/ влагáет свящéнiе водè,/ и душáм сiè очищéнiе бывáет,/ земнóе явля́емое и вы́ше Небéс разумевáемое./ Бáнею - спасéнiе, водóю же - Дух,/ погружéнiя рáди, и́же к Бóгу, наш восхóд бывáет.// Чудéсна делá Твоя́, Гóсподи, слáва Тебè.
Слáва Отцý и Сы́ну и Святóму Дýху.
Глас 6: Водáми Ioрдáнскими одéялся eсѝ, Спáсе,/ одея́йся Свéтом, я́ко ри́зою,/ и приклони́л eсѝ главý Предтéчи, И҆́же нéбо измéривый пя́дiю./ Да обрати́ши мiр от лéсти и спасéши,// я́ко Человеколю́бец.
И ны́не и прúсно и во вéки векóв. Амúнь.
Глас 2: Днесь Хрїстóс на Ioрдáн прiи́де крести́тися,/ днесь Iоáнн касáется верхý Влады́чню./ Си́лы Небéсныя ужасóшася,/ преслáвное ви́дяще тáинство./ Мóре ви́де и побежé,/ Ioрдáн, ви́дев, возврати́ся./ Мы же, просвéщшеся, вопiéм:/ слáва яви́вшемуся Бóгу,/ и на землѝ ви́денному,// и просвети́вшему мiр.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Продолжéнiе здесь