Неделя 29 по Пятидесятнице, святых праотец, глас 4. ВСЕНОЩНОЕ БДЕНИЕ ВЕЛИКАЯ ВЕЧЕРНЯ
24 декабря́ 2023 гóда. Недéля 29 по Пятидеся́тнице, святы́х прáотец. Глас 4. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелò./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делà Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л еси тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгò, и в закóне Егò поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицà землѝ. Сегó рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстà Егò. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдà возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негò над Сióном, горóю святóю Егò, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдà прогнéвается Госпóдь и поги́бнете от путѝ прáведнаго, егдà возгори́тся вскóре я́рость Егò. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 4
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 4: Животворя́щему Твоемý Крестý,/ непрестáнно клáняющеся, Хрїстè Бóже,/ триднéвное Воскресéнiе Твоè слáвим:/ тем бо обнови́л есѝ истлéвшее человéческое естествò, Всеси́льне,/ и и҆́же на Небесà восхóд обнови́л есѝ нам,// я́ко Еди́н Благ и Человеколю́бец.
Менè ждут прáведницы,// дóндеже воздáси мне.
Стiхúра: Дрéва преслушáнiя запрещéнiе/ разреши́л есѝ, Спáсе,/ на дрéве крéстнем вóлею пригвозди́вся,/ и во ад сошéд, Си́льне,/ смéртныя ýзы, я́ко Бог, растерзáл есѝ./ Тéмже клáняемся éже из мéртвых Твоемý Воскресéнiю,/ рáдостiю вопiю́ще:// Всеси́льне Гóсподи, слáва Тебè.
На 8. Стiх: Из глубины̀ воззвáх к Тебè, Гóсподи,// Гóсподи, услы́ши глас мой.
Стiхúра: Вратà áдова сокруши́л есѝ, Гóсподи,/ и Твоéю смéртiю смéртное цáрство разруши́л есѝ:/ род же человéческiй от истлéнiя свободи́л есѝ,/ живóт и нетлéнiе мíру даровáв,// и вéлiю ми́лость.
Да бýдут ýши Твоù// внéмлюще глáсу молéнiя моегò.
И҆́ны стiхúры анатóлiевы: Прiиди́те, воспои́м лю́дiе,/ Спáсово триднéвное востáнiе,/ и҆́мже избáвихомся áдовых нереши́мых уз;/ и нетлéнiе и жизнь вси воспрiя́хом зовýще:/ Распны́йся, и Погребы́йся, и Воскресы́й,/ спасѝ ны Воскресéнiем Твои́м,// Еди́не Человеколю́бче.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Áнгели и человéцы, Спáсе,/ Твоè пою́т триднéвное Востáнiе,/ и́мже озари́шася вселéнныя концы̀,/ и рабóты врáжiя вси избáвихомся, зовýще:/ Животвóрче Всеси́льне Спáсе,/ спасѝ ны Воскресéнiем Твои́м,// Еди́не Человеколю́бче.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Вратà мéдная стерл есѝ,/ и вереѝ сокруши́л есѝ, Хрїстè Бóже,/ и род человéческiй пáдшiй воскреси́л есѝ./ Сегò рáди соглáсно вопiéм:// Воскресы́й из мéртвых, Гóсподи, слáва Тебè.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры святы́х прáотцев, глас 8: Прáотцев днесь, вéрнiи, совершáюще пáмять,/ воспои́м Хрїстà Избáвителя,/ возвели́чившаго их во всех язы́цех/ и чудéс преслáвная вéрно соверши́вшаго Гóспода,/ я́ко держáвна и си́льна,/ и от них показáвша жезл си́лы нам -/ Еди́ну Неискусомýжную и Богоотрокови́цу Марíю Чи́стую,/ из Нея́же цвет прóйде - Хрїстóс,/ израсти́вый всем жизнь,// и неиждивáемую пи́щу, и спасéнiе вéчное.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúра: И́же святы́я óтроки из огня́ избáвивый, Влады́ко,/ и от уст львóвых Данiи́ла,/ благослови́вый Авраáма, и Iсаáка, рабà Твоегò,/ и сегò сы́на Iáкова,/ благоволи́вый от сéмене их бы́ти по нам,/ да прéжде поползнýвшыяся спасéши прáотцы нáша/ Крестóм Твои́м и Воскресéнiем/ и, растóргнув смéртныя ýзы, совозстáвиши вся,/ я́же от вéка сýщыя в мéртвых,// покланя́ющыяся Тебè, Хрїстè, Царю́ векóв.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Я́коже в хлáде, посредè плáмене/ росóю Дýха, рáдующеся, óтроцы Бóжiи хождáху,/ тáинственно в нем прообрази́вше Трóицу/ и воплощéнiе Хрiстóво,/ и, я́ко мýдрiи, вéрою угаси́ша си́лу óгненную,/ и Данiи́л же прáведный львов яви́ся обуздáтель;/ и́хже моли́твами умолéн быв, Человеколю́бче Спáсе,/ и нас негаси́маго вéчнаго избáви огня́// и сподóби ны Цáрствiя Твоегò, Гóсподи.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Я́коже в росè сýще,/ вéрнiи и святíи óтроцы Твоѝ/ в пещѝ плáмене óгненнаго предживописáху тáинственно/ éже из Дéвы Твоè пришéствiе,/ неопáльно возсiя́вшее нам,/ и Данiи́л же прáведный и во прорóцех чýдный,/ я́сно Божéственное вторóе Твоè пришéствiе проявля́я,/ ви́дех, дóндеже престóли постáвишася, - глагóлет,/ и Судiя́ сéде, и óгненная потечè рекà,// ея́же да избáвимся, Хрїстè, моли́твами их, Влады́ко.
Слáва Отцý и Сы́ну и Святóму Дýху.
Стiхúра прáотцев, Анатóліево, глас 6: И́же прéжде закóна/ отцы̀ вся восхвáлим днесь, вéрнiи,/ Авраáма Боголюби́ваго,/ и Iсаáка, от обещáнiя рождéннаго,/ и Iáкова, и дванáдесять патрiáрхи,/ Давíда кротчáйшаго,/ и Данiи́ла, желáнiй прорóка,/ и три óтроки с ни́ми слáвяще,/ пещь в рóсу преложи́вшыя,/ прося́ще оставлéнiя от Хрїстà Бóга,// прославля́емаго во святы́х Свои́х.
И ны́не и прúсно и во вéки векóв, амúнь.
Догмáтик. Глас 4: И҆́же Тебè рáди, богоотéц прорóк Давíд,/ пéсненно о Тебè провозгласѝ,/ вели́чiя Тебè сотвóршему:/ предстà Цари́ца одеснýю Тебè./ Тя бо Мáтерь, ходáтаицу животà показà,/ без Отцà из Тебè вочеловéчитися благоволи́вый Бог:/ да Свой пáки обнови́т óбраз, истлéвшiй страстьмѝ,/ и заблýждшее горохи́щное обрéт овчà,/ на рáмо воспрiи́м, ко Отцý принесéт,/ и Своемý хотéнiю, с небéсными совокупи́т си́лами,/ и спасéт Богорóдице мiр,// Хрїстóс имéяй вéлiю и богáтую ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утвердѝ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Слáва Отцý и Сы́ну и Святóму Дýху.
Стiхúра прáотцев, глас 1: Лучáми облистáвшеся Богоглагóланiя,/ великоимени́тiи прорóцы при́сно блажáтся/ и, речéнiя Дýха плóдствующе,/ несказáнное рождествò Хрїстà Бóга всем проповéдаша;/ закóнно же кончи́ну соверши́ша,// пожи́вше жизнь пречýдную.
И ны́не и прúсно и во вéки векóв. Амúнь.
Богорóдичен воскрéсен, глас 1 (по глáсу «Слáвы»): Се испóлнися Исáiино проречéнiе,/ Дéва бо родилà есѝ,/ и по Рождествè я́ко прéжде Рождествà пребылà есѝ:/ Бог бо бе Рождéйся,/ тéмже и естествà новопресечè./ Но о Богомáти!/ Молéнiя Твои́х рабóв,/ в Твоéм хрáме приноси́мая Тебè не прéзри,/ но я́ко Благоутрóбнаго Твои́ма рукáма нося́щи,// на Твоя́ рабы̀ умилосéрдися,/ и молѝ спасти́ся душáм нáшим.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 4): Гóсподи, восшéд на Крест,/ прáдеднюю нáшу кля́тву потреби́л есѝ,/ и сошéд во ад,/ я́же от вéка ýзники свободи́л есѝ,/ нетлéнiе дáруя человéческому рóду,/ сегò рáди пою́ще слáвим// Животворя́щее и Спаси́тельное Твоè Востáнiе.
Стiх: Госпóдь воцарúся, в лéпоту облечéся.
И҆́ны по алфавúту, глас 4: Повéшен на дрéве, Еди́не Си́льне,/ всю тварь поколебáл есѝ:/ положéн же во грóбе,/ живýщiя во гробéх воскреси́л есѝ,/ нетлéнiе и жизнь дáруя человéческому рóду./ Тéмже пою́ще, слáвим// триднéвное Твоè Востáнiе.
Стiх: И҆́бо утвердù вселéнную,/ я́же не подвúжется.
Лю́дiе беззакóннiи, Хрїстè,/ Тебè, предáвше Пiлáту, распя́ти осуди́ша,/ неблагодáрнiи о Благодéтеле яви́вшеся./ Но вóлею претерпéл есѝ погребéнiе:/ самовлáстно воскрéсл есѝ триднéвно, я́ко Бог,// дáруя нам безконéчный живóт, и вéлiю ми́лость.
Стiх: Дóму Твоемý подобáет святы́ня, Гóсподи,/ в долготý днiй.
Со слезáми жены̀ дошéдша грóба, Тебè искáху,/ не обрéтша же, рыдáюща с плáчем вопiю́ща глагóлаху:/ увы̀ нам, Спáсе наш Царю́ всех,/ кáко укрáден был есѝ;/ кóе же мéсто держи́т Живонóсное Тéло Твоè?/ Áнгел же к ним отвещавáше, не плáчите, глагóлет,/ но шéдша проповéдите, я́ко воскрéсе Госпóдь,// подая́ нам рáдость, я́ко Еди́н Благоутрóбен.
Слáва Ѻтцý и Сы́ну и Святóму Дýху.
Стiхúра прáотцев, глас 3: Прáотцев собóр, празднолю́бцы,/ прiиди́те, псалóмски да восхвáлим: Адáма прáотца, Енóха, Нóя, Мелхiседéка,/ Авраáма, Iсаáка и Iáкова,/ по закóне Моисéя, и Аарóна,/ Iисýса, Самуи́ла и Давíда,/ с ни́миже Исáiю, Iеремíю, Iезекíиля,/ и Данiи́ла, и дванáдесять,/ кýпно Илiю́, Елiссéя и вся,/ Захáрiю, и Крести́теля, и проповéдавшiя Хрїстà,// жизнь и воскресéнiе рóда нáшего.
И ны́не и прúсно и во вéки векóв, амúнь.
Богорóдичен воскрéсен, глас 3 (по глáсу «Слáвы»): Без сéмене от Божéственнаго Дýха/ вóлею же Óтчею зачалà есѝ Сы́на Бóжiя,/ от Отцà без мáтере прéжде век сýща,/ нас же рáди, из Тебè без отцà бы́вша, плóтiю родилà есѝ/ и Младéнца млекóм питáла есѝ./ Тéмже не престáй моли́ти// избáвитися от бед душáм нáшим.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегò,// яко Спáса родилà есù душ нáших. (Двáжды)
Тропáрь прáотцев, глас 2: Вéрою прáотцы оправдáл есù,/ от язы́к тéми предобручúвый Цéрковь:/ хвáлятся в слáве святíи, я́ко от сéмене их есть Плод благослáвен,/ без сéмене Рóждшая Тя.// Тех молúтвами, Хрїстè Бóже, помúлуй нас.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню