Неделя 29 по Пятидесятнице, святых праотец, глас 4. ОБЕДНИЦА (Изобразительные)
24 декабря́ 2023 гóда. Недéля 29 по Пятидеся́тнице, святы́х прáотец. Глас 4. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе, то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егò./ Благословѝ, душè моя, Гóспода,/ и не забывáй всех воздая́нїй Егò,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказà путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концà прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егò./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егò./ Я́ко Той познá создáнїе нáше,/ помянý, яко персть есмы́./ Человéк, яко травà днíе eгò,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегò./ Ми́лость же Госпóдня от вéка и до вéка на боя́щихся Егò,/ и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я./ Госпóдь на Небесѝ уготóва Престóл Свой,/ и Цáрство Егò всéми обладáет./ Благослови́те Гóспода вси Áнгели Егò,/ си́льнїи крéпостїю, творя́щїи слóво Егò, услышати глас словéс Егò./ Благослови́те Гóспода вся Си́лы Егò,/ слýги Егò, творя́щїи вóлю Егò./ Благослови́те Гóспода вся делà Егò,/ на всяком мéсте влады́чества Егò.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егò./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгò/ и возврати́тся в зéмлю свою́./ В той день поги́бнут вся помышлéнїя eгò./ Блажéн, eмýже Бог Iáковль Помóщник егò,/ уповáнiе eгò на Гóспода Бóга своегò,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы̀./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдà прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 4): Дрéвом Адáм рая́ бысть изселéн;/ дрéвом же крéстным разбóйник в рай всели́ся./ Ов ýбо вкуш, зáповедь отвéрже Сотвóршаго;/ ов же сраспинáем, Бóга исповéда Тая́щагося,// помянѝ мя, вопiя́, во Цáрствiи Твоéм.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Вознесы́йся на Крест, смéртную разруши́вый си́лу,/ и заглáдивый, я́ко Бог, éже на ны рукописáнiе, Гóсподи,/ разбóйниче покая́нiе и нам подáждь, Еди́не Человеколю́бче,/ вéрою служáщим, Хрїстè Бóже наш, и вопiю́щим Ти:// помянѝ и нас во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец: Рукописáнiе нáше на Крестè копiéм раздрáл есѝ,/ и вмени́вся в мéртвых, тáмошняго мучи́теля связáл есѝ,/ избáвивый всех от уз áдовых воскресéнiем Твои́м,/ и҆́мже просвети́хомся, Человеколю́бче Гóсподи, и вопiéм Ти:// помянѝ и нас во Цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Распны́йся и воскресы́й я́ко Си́лен из грóба триднéвен,/ и первоздáннаго Адáма воскреси́вый, Еди́не Безсмéртне:/ и менè на покая́нiе обрати́тися, Гóсподи, сподóби от всегó сéрдца моегó,/ и тéплою вéрою при́сно взывáти Ти:// помяни́ мя, Спáсе, во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Нас рáди, И҆́же безстрáстен, стрáстный бысть человéк,/ и вóлею на Крестè пригвождéйся, нас совоскресѝ,/ тéмже и слáвим со Крестóм страсть и воскресéнiе,/ и҆́миже возсоздáхомся, и҆́миже и спасáемся, взывáюще:// помянѝ и нас во Цáрствiи Твоéм.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Воскрéсшаго из мéртвых, и áдову держáву плени́вшаго,/ и ви́дима женáми миронóсицами, рáдуйтеся, глагóлющаго,/ вéрнiи умóлим, от истлéнiя избáвити дýши нáша,/ зовýще всегдà разбóйника благоразýмнаго глáсом к Немý:// помянѝ и нас во Цáрствiи Твоéм.
На 4. Хор: Блажéни естè, егдà понóсят вам,/ и изженýт, и рекýт всяк зол глагóл на вы лжýще Менè рáди.
Чтец (стiхúры прáотцев, глас 1): Поéтся в мíре Си́фово к Зижди́телю разжжéнiе,/ и́бо в непорóчнем жи́тельстве и душéвней любвѝ Томý и́стинно угодѝ,/ и ны́не во странé живы́х вопiéт:// Свят есѝ, Гóсподи.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Усты̀, и язы́ком, и сéрдцем Енóс чýдный/ призвáти богомýдренно Влады́ку всех и Бóга надéяшеся в Дýсе// и, благоугóдно пожи́в на землѝ, слáву воспрiя́т.
Хор: Слáва Ѻтцý и Сы́ну и Святóму Дýху.
Чтец: Священнослóвiи свящéнными Енóха ублажи́м,/ благоугоди́в бо Гóсподу, престáвися в слáве,/ яви́вся лýчши смéрти, я́коже писáся,// и́мже Бóжiй быв раб и́скреннейшiй.
Хор: И ны́не и прúсно и во вéки векóв. Амúнь.
Богорóдичен: Ны́не чáянiе язы́ков от Дéвы предгрядéт,/ и Вифлеéм заключéнный отверзáет свéтло Едéма,// Слóво воплощáемое прiéмля, и в я́слех плóтiю возлéгшаго.
Тропари и кондаки
Тропáрь воскрéсный, глас 4: Свéтлую Воскресéнiя прóповедь/ от Áнгела увéдевша Госпóдни учени́цы/ и прáдеднее осуждéнiе отвéргша,/ апóстолом хвáлящася глагóлаху:/ испровéржеся смерть,/ воскрéсе Хрїстóс Бог,// дáруяй мíрови вéлiю ми́лость.
Тропáрь прáотцев, глас 2: Вéрою прáотцы оправдáл есѝ,/ от язы́к тéми предобручи́вый Цéрковь:/ хвáлятся в слáве святíи,/ я́ко от сéмене их есть Плод благослáвен,/ без сéмене Рóждшая Тя.// Тех моли́твами, Хрїстè Бóже, поми́луй нас.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк прáотцев, глас 6: Рукопи́саннаго óбраза не почéтше,/ но Неопи́санным Существóм защити́вшеся, треблажéннiи,/ в пóдвизе огня́ прослáвистеся,/ средè же плáмене нестерпи́маго стоя́ще, Бóга призвáсте:/ ускорѝ, о Щéдрый, и потщи́ся, я́ко Ми́лостив, в пóмощь нáшу,// я́ко мóжеши хотя́й.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен святых праотцев, глас 4
Чтец: Прокíмен, глас четвéртый, песнь ѻтцéв. Благословéн есѝ, Гóсподи Бóже отéц нáших, и хвáльно и прослáвлено И҆́мя Твоè во вéки. (Дан.3:26)
Хор: Благословéн есù, Гóсподи Бóже отéц нáших,/ и хвáльно и прослáвлено И҆́мя Твоè во вéки.
Чтец: Я́ко прáведен есѝ о всех, я́же сотвори́л есѝ нам. (Дан.3:27А)
Хор: Благословéн есù, Гóсподи Бóже отéц нáших,/ и хвáльно и прослáвлено И҆́мя Твоè во вéки.
Чтец: Благословéн есѝ, Гóсподи Бóже отéц нáших.
Хор: И хвáльно и прослáвлено И҆́мя Твоè во вéки.
АПОСТОЛ
Чтец: К Колоссáем послáнiя святáго апóстола Пáвла чтéнiе.
(Кол.зач.257): Брáтiе, егдà Хрїстóс яви́тся, живóт ваш, тогдà и вы с Ним явитéся в слáве. Умертви́те ýбо ýды вáша, я́же на землѝ, блуд, нечистотý, страсть, пóхоть злýю, и лихоимáнiе, éже есть iдолослужéнiе. И҆́хже рáди грядéт гнев Бóжiй на сы́ны противлéнiя. В ни́хже и вы иногдà ходи́сте, егдà живя́сте в них. Ны́не же отложи́те и вы та вся: гнев, я́рость, злóбу, хулéнiе, срамослóвiе от уст вáших. Не лжи́те друг дрýгу, совлéкшеся вéтхаго человéка с дея́ньми егò. И облéкшеся в нóваго, обновля́емаго в рáзум, по óбразу создáвшаго егò. Идéже несть éллин, ни iудéй, обрéзанiе, и необрéзанiе, вáрвар и скиф, раб и свобóдь, но вся́ческая и во всех Хрїстóс.
[Синодальный перевод]Братия, когда явится Христос, жизнь ваша, тогда и вы явитесь с Ним во славе. Итак, умертвите земные члены ваши: блуд, нечистоту, страсть, вожделение злое и стяжательство, которое есть идолопоклонство, за что приходит гнев Божий на сынов непослушания, в чем и вы некогда ходили, когда жили среди них. А теперь и вы отложите все: гнев, ярость, злобу, хулу, сквернословие уст ваших. Не говорите лжи друг другу, совлекшись ветхого человека с делами его и облекшись в нового, обновляемого в познании по образу Создавшего его, где нет Эллина и Иудея, обрезания и необрезания, варвара, скифа, раба, свободного, но все и во всем - Христос. (Кол.3:4-11)
Аллилуиарий святых праотцев
Чтец: Аллилýїа, аллилýїа, аллилýїа, глас четвéртый, псалóм Давíдов:
Хор: Аллилýїа, аллилýїа, аллилýїа.
Чтец: Моисéй и Аарóн во iерéех Егò, и Самуи́л в призывáющих И́мя Егò.(Пс.98:6А)
Хор: Аллилýїа, аллилýїа, аллилýїа.
Чтец: Призывáху Гóспода, и Той послýшаше их.(Пс.98:6Б)
Хор: Аллилýїа, аллилýїа, аллилýїа.
ЕВАНГЕЛИЕ
От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.76): Речè Госпóдь при́тчу сiю́: человéк нéкiй сотворѝ вéчерю вéлiю, и зва мнóги. И послà рабà своегò в год вéчери рещѝ звáнным: гряди́те, я́ко ужè готóва суть вся. И начáша вкýпе отрицáтися вси. Пéрвый речè емý: селò купи́х, и и҆́мам нýжду изы́ти и ви́дети è. Молю́ ти ся, имéй мя отречéна. И другíй речè: супрýг волóвных купи́х пять, и грядý искуси́ти их. Молю́ тя, имéй мя отречéна. И другíй речè: женý поя́х, и сегò рáди не могý прiитѝ. И пришéд раб той, повéда господи́ну своемý сiя́. Тогдà разгнéвався дóму влады́ка, речè рабý своемý: изы́ди скóро на распýтiя и стóгны грáда, и ни́щiя, и бéдныя, и слепы́я, и хрóмыя введѝ сéмо. И речè раб: гóсподи, бысть я́коже повелè, и ещè мéсто есть. И речè господи́н к рабý: изы́ди на путѝ и халýги, и убедѝ вни́ти, да напóлнится дом мой. Глагóлю бо вам: я́ко ни еди́н мужéй тех звáнных вкýсит моея́ вéчери, мнóзи бо суть звáни, мáло же избрáнных.
[Синодальный перевод]Сказал Господь притчу сию: человек некий сделал большой ужин и позвал многих. И послал раба своего в час ужина сказать приглашенным: “Приходите, ибо уже все готово”. И начали все как один извиняться. Первый сказал ему: “Я купил поле, и мне нужно пойти и посмотреть его. Прошу тебя, извини меня”. И другой сказал: “Я купил пять пар волов и иду испытать их. Прошу тебя, извини меня”. И третий сказал: “Я женился, и потому не могу придти”. И придя, раб тот сообщил это господину своему. Тогда, разгневавшись, сказал хозяин дома рабу своему: “Выйди скорее на улицы и в переулки города и введи сюда нищих, и увечных, и слепых, и хромых”. И сказал раб: “Господин! Сделано, как ты приказал, и еще есть место”. И сказал господин рабу: “Выйди на дороги и к изгородям и заставь людей войти, чтобы наполнился дом мой. Ибо говорю вам, что никто из мужей тех приглашенных не вкусит моего ужина: ибо много званных, но мало избранных”. (Лк.14:16-24)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк прáотцев, глас 6: Рукопи́саннаго óбраза не почéтше,/ но Неопи́санным Существóм защити́вшеся, треблажéннiи,/ в пóдвизе огня́ прослáвистеся,/ средè же плáмене нестерпи́маго стоя́ще, Бóга призвáсте:/ ускорѝ, о Щéдрый, и потщи́ся, я́ко Ми́лостив, в пóмощь нáшу,// я́ко мóжеши хотя́й.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Достойно есть
Хор: Достóйно есть я́ко воúстинну блажúти Тя, Богорóдицу,/ Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сы́не Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и богонóсных отéц наших и всех святы́х, поми́лует и спасéт нас, я́ко Благ и Человеколю́бец.