Неделя 3 по Пасхе, св. жен-мироносиц. ВСЕНОЩНОЕ БДЕНИЕ (завершение утрени) ЧАС ПЕРВЫЙ, глас 2.
16 мая 2021 года. Неделя 3 по Пасхе, св. жен-мироносиц. Глас 2. Всенощное бдение для домашнего (келейного) совершения состоит из Великой вечерни, утрени с чтением евангелия, также канона и первого часа. Вся служба праздника (по Триоди).
Окончание всенощного бдения. Начало здесь ( великая вечерня), здесь ( утреня) здесь ( продолжение утрени) здесь ( канона)
ВЕЛИКОЕ СЛАВОСЛОВИЕ
Хор: Слáва в вышних Бóгу, и на земли мир, в человéцех благоволéние. Хвáлим Тя, благословим Тя, клáняем Ти ся, славослóвим Тя, благодарим Тя великия рáди слáвы Твоея. Гóсподи, Царю Небéсный, Боже, Отче Вседержителю, Гóсподи Сыне Единорóдный, Иисусе Христé, и Святый Душе. Гóсподи Бóже, Агнче Божий, Сыне Отéчь, взéмляй грех мира, помилуй нас. Взéмляй грехи мира, приими молитву нáшу. Седяй одесную Отцá, помилуй нас. Яко Ты еси Един Свят; Ты еси Един Госпóдь, Иисус Христóс, в слáву Бóга Отцá, аминь.
На всяк день благословлю Тя и восхвалю имя Твоé во вéки, и в век вéка.
Сподóби, Гóсподи, в день сей без грехá сохранитися нам. Благословéн еси, Гóсподи Бóже отéц нáших, и хвáльно и прослáвлено имя Твоé во вéки, аминь.
Буди, Гóсподи, милость Твоя на нас, якоже уповáхом на Тя.Благословéн еси, Гóсподи, научи мя оправдáнием Твоим. (трижды)
Гóсподи, прибéжище был еси нам в род и род. Аз рех: Гóсподи, помилуй мя, исцели душу мою, яко согреших Тебé. Гóсподи, к Тебé прибегóх, научи мя творити вóлю Твою, яко Ты еси Бог мой, яко у Тебé истóчник животá, во свéте Твоéм узрим свет. Пробáви милость Твою вéдущим Тя.
Святый Бóже,/ Святый Крéпкий,/ Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Святый Безсмéртный, помилуй нас.
Святый Бóже,/ Святый Крéпкий,/ Святый Безсмéртный, помилуй нас.
ТРОПАРЬ ВОСКРЕСЕН, ГЛАС 2
Воскрéс из грóба и узы растерзáл еси áда,/ разрушил еси осуждéние смéрти, Гóсподи,/ вся от сетéй врагá избáвивый;/ явивый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Едине Многомилостиве.
Завершение утрени
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
Утверди, Бóже, святую правослáвную вéру, правослáвных христиáн во век вéка.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
Воскресый из мéртвых, Христé, истинный Бог наш, молитвами Пречистыя Своея Мáтере, святых слáвных и всехвáльных Апóстол, Святых жен-мироносиц (Марии Магдалины, Марии Клеóповой, Саломии, Иоáнны, Мáрфы и Марии, Сусáнны и иных), праведных Иóсифа Аримафейского и Никодима, ихже и пáмять ныне совершáем, святых и прáведных богоотéц Иоакима и Анны, и всех святых, помилуй и спаси нас, яко Благ и Человеколюбец. Аминь.
МНОГОЛЕТИЕ
Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!
ПЕРВЫЙ ЧАС
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
Псалом 5
Глагóлы моя внуши, Гóсподи, разумéй звáние моé. Вонми глáсу молéния моегó, Царю мой и Бóже мой, яко к Тебé помолюся, Гóсподи. Заутра услыши глас мой, заутра предстáну Ти, и узриши мя. Яко Бог не хотяй беззакóния, Ты еси: не приселится к Тебé лукáвнуяй, нижé пребудут беззакóнницы пред очима Твоима: возненавидел еси вся дéлающыя беззакóние. Погубиши вся глагóлющыя лжу: мужа кровéй и льстива гнушáется Госпóдь. Аз же мнóжеством милости Твоея, вниду в дом Твой, поклонюся ко хрáму святóму Твоему, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их истины, сéрдце их суетно, гроб отвéрст гортáнь их: языки своими льщáху. Суди им, Бóже, да отпадут от мыслей своих, по мнóжеству нечéстия их изрини я, яко преогорчиша Тя, Гóсподи. И да возвеселятся вси уповáющии на Тя, во век возрáдуются, и вселишися в них, и похвáлятся о Тебé любящии имя Твоé. Яко Ты благословиши прáведника, Гóсподи: яко оружием благоволéния венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не быти и создáтися земли и вселéнней, и от вéка и до вéка Ты еси. Не отврати человéка во смирéние, и рекл еси: обратитеся, сынове человéчестии. Яко тысяща лет пред очима Твоима, Гóсподи, яко день вчерáшний, иже мимоиде, и стрáжа нощнáя. Уничижéния их лéта будут. Утро яко травá мимоидет, утро процветéт и прéйдет: на вéчер отпадéт ожестéет и изсхнет. Яко исчéзохом гнéвом Твоим, и яростию Твоéю смутихомся. Положил еси беззакóния нáша пред Тобóю: век наш в просвещéние лицá Твоегó. Яко вси дние нáши оскудéша, и гнéвом Твоим исчезóхом, лéта нáша яко паучина поучáхуся. Дние лет нáших, в нихже сéдмьдесят лет, áще же в силах, óсмьдесят лет, и мнóжае их труд и болéзнь: яко прииде крóтость на ны, и накáжемся. Кто весть держáву гнéва Твоегó, и от стрáха Твоегó, ярость Твою исчести? Десницу Твою тáко скажи ми, и оковáнныя сéрдцем в мудрости. Обратися, Гóсподи, докóле? И умолéн буди на рабы Твоя. Испóлнихомся заутра милости Твоея, Гóсподи, и возрáдовахомся, и возвеселихомся, во вся дни нáша возвеселихомся, за дни в няже смирил ны еси, лéта в няже видехом злáя. И призри на рабы Твоя, и на делá Твоя, и настáви сыны их. И буди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Милость и суд воспою Тебé, Гóсподи. Пою и разумéю в пути непорóчне, когдá приидеши ко мне? Прехождáх в незлóбии сéрдца моегó посредé дóму моегó. Не предлагáх пред очима моима вещь законопреступную: творящыя преступлéние возненавидех. Не прильпé мне сéрдце строптиво, уклоняющагося от менé лукáваго не познáх. Оклеветáющаго тай искренняго своегó, сегó изгонях: гóрдым óком, и несытым сéрдцем, с сим не ядях. Очи мои на вéрныя земли, посаждáти я со мнóю: ходяй по пути непорóчну, сей ми служáше. Не живяше посредé дóму моегó творяй гордыню, глагóляй непрáведная, не исправляше пред очима моима. Во утрия избивáх вся грéшныя земли, еже потребити от грáда Госпóдня вся дéлающыя беззакóние.
Слáва Отцу и Сыну и Святóму Духу, и ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Тропáрь воскрéсный, глас 2: Егдá снизшéл еси к смéрти, Животé Безсмéртный, тогдá ад умертвил еси блистáнием Божествá. Егдá же и умéршыя от преиспóдних воскресил еси, вся Силы Небéсныя взывáху: Жизнодáвче, Христé Бóже наш, слáва Тебé.
Слáва Отцу и Сыну и Святóму Духу.
Тропáрь Триóди (недели мироносиц), глас 2: Благообрáзный Иóсиф,/ с Дрéва снем Пречистое Тéло Твоé,/ плащаницею чистою обвив, и благоухáньми,/ во грóбе нóве, закрыв, положи,/ но триднéвен воскрéсл еси, Гóсподи,// подаяй мирови вéлию милость.
И ныне и присно и во веки векóв. Аминь.
Богорóдичен: Что Тя наречéм, о Благодáтная? Нéбо, яко возсияла еси Сóлнце Прáвды. Рай, яко прозяблá еси цвет нетлéния. Дéву, яко пребылá еси нетлéнна. Чистую Мáтерь, яко имéла еси на святых Твоих объятиях Сына, всех Бóга. Тогó моли спастися душáм нáшим.
Стопы моя напрáви по словеси Твоему и да не обладáет мнóю всякое беззакóние. Избáви мя от клеветы человéческия, и сохраню зáповеди Твоя. Лицé Твоé просвети на рабá Твоегó и научи мя оправдáнием Твоим.
Да испóлнятся устá моя хвалéния Твоегó, Гóсподи, яко да воспою слáву Твою, весь день великолéпие Твоé.
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДАК ТРИОДИ (НЕДЕЛИ МИРОНОСИЦ), ГЛАС 2
Рáдоватися миронóсицам повелéл еси,/ плачь прамáтере Евы утолил еси/ воскресéнием Твоим, Христé Бóже,/ апóстолом же Твоим проповéдати повелéл еси:// Спас воскрéсе от грóба.
Гóсподи, помилуй. (40 раз)
Иже на всякое врéмя и на всякий час, на небеси и на земли покланяемый и слáвимый Христе Бóже, долготерпеливе, многомилостиве, многоблагоутрóбне, Иже прáведныя любяй, и грéшныя милуяй, Иже вся зовый ко спасéнию обещáния рáди будущих благ; Сам, Гóсподи, приими и нáша в час сей молитвы, и испрáви живóт наш к зáповедем Твоим; души нáша освяти, телесá очисти, помышлéния испрáви, мысли очисти, и избáви нас от всякия скóрби, зол и болéзней; огради нас святыми Твоими Ангелы, да ополчéнием их соблюдáеми и наставляеми, достигнем в соединéние вéры, и в рáзум неприступныя Твоея слáвы, яко благословéн еси во вéки векóв, аминь.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв. Аминь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Христé, Свéте Истинный, просвещáяй и освящáяй всякаго человéка, грядущаго в мiр, да знáменается на нас свет лицá Твоегó, да в нем узрим Свет Неприступный: и испрáви стопы нáша к дéланию зáповедей Твоих, молитвами Пречистыя Твоея Мáтере, и всех Твоих святых, аминь.
КОНДАК ПАСХИ ГЛАС 8
Аще и во гроб снизшéл еси, Безсмéртне, но áдову разрушил еси силу, и воскрéсл еси, яко победитель, Христé Бóже, женáм миронóсицам вещáвый: рáдуйтеся, и Твоим апóстолом мир дáруяй, пáдшим подаяй воскресéние.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
Воскресый из мéртвых, Христé, истинный Бог наш, молитвами Пречистыя Своея Мáтере, преподóбных и Богонóсных отéц нáших и всех святых, помилуй и спаси нас, яко Благ и Человеколюбец. Аминь.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
С утра чти часы и обедницу