Неделя 3 по Пасхе, св. жен-мироносиц. ВСЕНОЩНОЕ БДЕНИЕ. УТРЕНЯ (продолжение). Евангелие. Глас 2.
16 мая 2021 года. Неделя 3 по Пасхе, св. жен-мироносиц. Глас 2. Всенощное бдение для домашнего (келейного) совершения состоит из Великой вечерни, утрени с чтением евангелия, также канона и первого часа. Вся служба праздника (по Триоди).
КАФИЗМА ТРЕТЬЯ
Начало зри здесь ( великая вечерня) и здесь ( утреня)
[Псалом 18]Небесá повéдают слáву Бóжию, творéние же руку Егó возвещáет твердь. День дни отрыгáет глагóл, и нощь нóщи возвещáет рáзум. Не суть рéчи, нижé словесá, ихже не слышатся глáси их. Во всю зéмлю изыде вещáние их и в концы вселéнныя глагóлы их. В сóлнце положи селéние Своé, и Той, яко Жених исходяй от чертóга Своегó, возрáдуется, яко Исполин тещи путь. От крáя небесé исхóд Егó, и срéтение Егó до крáя небесé, и несть иже укрыется теплоты Егó. Закóн Госпóдень непорóчен, обращáяй душы, свидéтельство Госпóдне вéрно, умудряющее младéнцы. Оправдáния Госпóдня прáва, веселящая сéрдце, зáповедь Госпóдня светлá, просвещáющая óчи. Страх Госпóдень чист, пребывáяй в век вéка: судьбы Госпóдни истинны, оправдáны вкупе, вожделéнны пáче злáта и кáмене чéстна мнóга, и слáждша пáче мéда и сóта. Ибо раб Твой хранит я, внегдá сохранити я, воздаяния мнóго. Грехопадéния кто разумéет? От тáйных моих очисти мя, и от чуждих пощади рабá Твоегó, аще не обладáют мнóю, тогдá непорóчен буду и очищуся от грехá велика. И будут во благоволéние словесá уст моих, и поучéние сéрдца моего пред Тобóю выну, Гóсподи, Помóщниче мой и Избáвителю мой.
[Псалом 19]Услышит тя Госпóдь в день печáли, защитит тя имя Бóга Иáковля. Пóслет ти пóмощь от Святáго и от Сиóна заступит тя. Помянéт всяку жéртву твою, и всесожжéние твоé тучно буди. Даст ти Госпóдь по сéрдцу твоему и весь совéт твой испóлнит. Возрáдуемся о спасéнии твоéм и во имя Гóспода Бóга нáшего возвеличимся. Испóлнит Госпóдь вся прошéния твоя. Ныне познáх, яко спасé Госпóдь христá Своегó, услышит eгó с Небесé Святáго Своегó, в силах спасéние десницы Егó. Сии на колесницах, и сии на кóнех, мы же во имя Гóспода Бóга нáшего призовéм. Тии спяти быша и падóша, мы же востáхом и испрáвихомся. Гóсподи, спаси царя и услыши ны, вóньже áще день призовéм Тя.
[Псалом 20]Гóсподи, силою Твоéю возвеселится царь и о спасéнии Твоéм возрáдуется зелó. Желáние сéрдца eгó дал еси eму, и хотéния устну eгó нéси лишил eгó. Яко предварил еси eгó благословéнием благостынным, положил еси на главé eгó венéц от кáмене чéстна. Животá просил есть у Тебé, и дал еси eму долготу дний во век вéка. Вéлия слáва eгó спасéнием Твоим, слáву и велелéпие возложиши на негó. Яко дáси eму благословéние во век вéка, возвеселиши eгó рáдостию с лицéм Твоим. Яко царь уповáет на Гóспода, и милостию Вышняго не подвижится. Да обрящется рукá Твоя всем врагóм Твоим, десница Твоя да обрящет вся ненавидящыя Тебé. Яко положиши их яко пещь óгненную во врéмя лицá Твоегó, Госпóдь гнéвом Своим смятéт я, и снесть их огнь. Плод их от земли погубиши, и сéмя их от сынóв человéческих. Яко уклониша на Тя злáя, помыслиша совéты, ихже не возмóгут состáвити. Яко положиши я хребéт, во избытцех Твоих уготóвиши лицé их. Вознесися, Гóсподи, силою Твоéю, воспоéм и поéм силы Твоя.
Чтец: Слáва Отцу и Сыну и Святóму Духу.
Хор:И ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Чтец: И ныне и присно и во вéки векóв. Аминь.
[Псалом 21]Бóже, Бóже мой, вонми ми, вскую остáвил мя еси? Далéче от спасéния моегó словесá грехопадéний моих. Бóже мой, воззову во дни, и не услышиши, и в нощи, и не в безумие мне. Ты же во Святéм живéши, хвалó Изрáилева. На Тя уповáша отцы нáши, уповáша и избáвил еси я. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéние человéков и уничижéние людéй. Вси видящии мя поругáша ми ся, глагóлаша устнáми, покивáша главóю: уповá на Гóспода, да избáвит eгó, да спасéт eгó, яко хóщет eгó. Яко Ты еси истóргий мя из чрéва, уповáние моé от сосцу мáтере моея. К Тебé привéржен есмь от ложéсн, от чрéва мáтере моея Бог мой еси Ты. Да не отступиши от менé, яко скорбь близ, яко несть помогáяй ми. Обыдóша мя тельцы мнóзи, юнцы тучнии одержáша мя. Отверзóша на мя устá своя, яко лев восхищáяй и рыкáяй. Яко водá излияхся, и разсыпашася вся кóсти моя, бысть сéрдце моé яко воск, тáяй посредé чрéва моегó. Изсше яко скудéль крéпость моя, и язык мой прильпé гортáни моему, и в персть смéрти свел мя еси. Яко обыдóша мя пси мнóзи, сонм лукáвых одержáша мя, ископáша руце мои и нóзе мои. Исчетóша вся кóсти моя, тии же смотриша и презрéша мя. Разделиша ризы моя себé, и о одéжди моéй метáша жрéбий. Ты же, Гóсподи, не удали пóмощь Твою от менé, на заступлéние моé вонми. Избáви от оружия душу мою, и из руки пéсии единорóдную мою. Спаси мя от уст львóвых и от рог единорóжь смирéние моé. Повéм имя Твоé брáтии моéй, посредé цéркве воспою Тя. Боящиися Гóспода, восхвалите Егó, все сéмя Иáковле, прослáвите Егó, да убоится же от Негó все сéмя Изрáилево. Яко не уничижи, нижé негодовá молитвы нищаго, нижé отврати лицé Своé от менé, и егдá воззвáх к Нему, услыша мя. От Тебé похвалá моя, в цéркви велицей исповéмся Тебé, молитвы моя воздáм пред боящимися Егó. Ядят убóзии и насытятся, и восхвáлят Гóспода взыскáющии Егó, живá будут сердцá их в век вéка. Помянутся и обратятся ко Гóсподу вси концы земли, и поклóнятся пред Ним вся отéчествия язык. Яко Госпóдне есть цáрствие, и Той обладáет языки. Ядóша и поклонишася вси тучнии земли, пред Ним припадут вси низходящии в зéмлю, и душá моя Тому живéт. И сéмя моé порабóтает Ему, возвестит Гóсподеви род грядущий. И возвестят прáвду Егó людем рóждшымся, яже сотвори Госпóдь.
[Псалом 22]Госпóдь пасéт мя, и ничтóже мя лишит. На мéсте злáчне, тáмо всели мя, на водé покóйне воспитá мя. Душу мою обрати, настáви мя на стези прáвды, имене рáди Своегó. Аще бо и пойду посредé сéни смéртныя, не убоюся зла, яко Ты со мнóю еси, жезл Твой и пáлица Твоя, та мя утéшиста. Уготóвал еси предо мнóю трапéзу сопротив стужáющым мне, умáстил еси елéом главу мою, и чáша Твоя упоявáющи мя, яко держáвна. И милость Твоя поженéт мя вся дни животá моегó, и éже вселити ми ся в дом Госпóдень, в долготу дний.
[Псалом 23]Госпóдня земля, и исполнéние ея, вселéнная и вси живущии на ней. Той на морях основáл ю есть, и на рекáх уготóвал ю есть. Кто взыдет на гóру Госпóдню? или кто стáнет на ме́сте святéм Егó? Неповинен рукáма и чист сéрдцем, иже не прият всуе душу свою, и не клятся лéстию искреннему своему. Сей приимет благословéние от Гóспода, и милостыню от Бóга, Спáса своегó. Сей род ищущих Гóспода, ищущих лицé Бóга Иáковля. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь крéпок и силен, Госпóдь силен в брáни. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
Хор (по кафíсме седáльны Трióди, глас 2): Миронóсицы ýтро пришéдшiя,/ и гроб тощ видевшiя, апóстолом глагóлаху:/ тлéнiе низложѝ держáвный,/ и сýщiя во áде исхитѝ уз:/ проповéдите дерзновéнiем, яко воскрéсе Хрiстóс Бог,// дáруяй мíрови вéлiю ми́лость.
Стiх: Исповéмся Тебé Гóсподи всем сéрдцем моúм,/ повéм вся чудесá Твоя.
Ми́ры погребéнiя Твоегó жены́ нося́ща,/ тай ко грóбу прiидóша урáнше,/ иудéйскiя боя́щеся дéрзости,/ и вóинов предзря́ще утверждéнiе./ Но естествó немощнóе мýжество победѝ,/ яко намéренiе ми́лостивное Бóгу угодѝ./ Прили́чно ýбо взывáху:/ воскреснѝ Гóсподи, помозѝ нам,// и избáви нас слáвы рáди и́мене Твоегó.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Препрослáвленна еси Богорóдице Дéво, поéм Тя:/ Крестóм бо Сына Твоегó низложи́ся ад/ и смерть умертви́ся:/ умерщвлéннiи востáхом и животá сподóбихомся,/ рай воспрiя́хом дрéвнее наслаждéние./ Тем благодаря́ще славослóвим,/ яко держáвнаго Хрiстá Бóга нáшего,// и еди́наго Многоми́лостиваго.
Пение Непорочных на воскресной утрене назначается Уставом до отдания Воздвижения (21 сентября), кроме совпадения с воскресным днем полиелейного или бденного праздника. 118-й псалом (17-я кафизма) поется на 5-й глас, независимо от недельного гласа, и сразу после него тропари «Ангельский собор…». В приходской практике вместо Непорочных на воскресных всенощных бдениях обычно поется полиелей.
[НЕПОРОЧНЫ]Избраннии стихи из псалма 118: (глас 5 всегда): Блажéни непорóчнии в путь, ходящии в закóне Госпóдни. Блажéни испытáющии свидéния Егó, всем сéрдцем взыщут Егó, не дéлающии бо беззакóния, в путéх Егó ходиша. Ты заповéдал еси зáповеди Твоя сохранити зелó. Дабы испрáвилися путиé мои, сохранити оправдáния Твоя. Тогдá не постыжуся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научити ми ся судьбáм прáвды Твоея. Оправдáния Твоя сохраню, не остáви менé до зелá. В чесóм испрáвит юнéйший путь свой? Внегдá сохранити словесá Твоя. Всем сéрдцем моим взыскáх Тебé, не отрини менé от зáповедей Твоих. В сéрдце моéм скрых словесá Твоя, яко да не согрешу Тебé. Благословéн еси, Гóсподи: научи мя оправдáнием Твоим.
ПОЛИЕЛЕЙ
Хор: Хвалите Имя Госпóдне, хвалите, раби Гóспода.
Аллилуиа (трижды)
Благословéн Госпóдь от Сиóна, живый во Иерусалиме.
Аллилуиа (трижды)
Исповéдайтеся Гóсподеви, яко Благ, яко в век милость Егó.
Аллилуиа (трижды)
Исповéдайтеся Бóгу Небéсному, яко в век милость Егó.
Аллилуиа (трижды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн еси, Гóсподи,/научи мя оправдáнием Твоим.
Ангельский собóр удивися,/ зря Тебé в мéртвых вменившася,/ смéртную же, Спáсе, крéпость разоривша,/ и с Собóю Адáма воздвигша,/ и от áда вся свобóждша.
Благословéн еси, Гóсподи,/научи мя оправдáнием Твоим.
Почтó мира с милостивными слезáми,/ о ученицы, растворяете?/ Блистáяйся во грóбе Ангел миронóсицам вещáше:/ видите вы гроб и уразумéйте,/ Спас бо воскрéсе от грóба.
Благословéн еси, Гóсподи,/научи мя оправдáнием Твоим.
Зелó рáно миронóсицы течáху/ ко грóбу Твоему рыдáющия,/ но предстá к ним Ангел и речé:/ рыдáния врéмя престá, не плáчите,/ воскресéние же апóстолом рцыте.
Благословéн еси, Гóсподи,/научи мя оправдáнием Твоим.
Миронóсицы жены с миры пришéдшия/ ко грóбу Твоему, Спáсе, рыдáху,/ Ангел же к ним речé, глагóля:/ что с мéртвыми живáго помышляете?/ Яко Бог бо, воскрéсе от грóба.
Слáва Отцу и Сыну и Святóму Духу.
Поклонимся Отцу/ и Егó Сынови, и Святóму Духу,/ Святéй Трóице во едином существé,/ с Серафимы зовуще:/ Свят, Свят, Свят еси, Гóсподи.
И ныне и присно и во вéки векóв. Аминь.
Жизнодáвца рóждши,/ грехá, Дéво, Адáма избáвила еси,/ рáдость же Еве / в печáли мéсто подалá еси,/ пáдшия же от жизни / к сей напрáви/ из Тебé воплотивыйся Бог и Человéк.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Ипакои прáздника Триóди (Недéли Миронóсиц), глас 2: По стрáсти шéдша во гроб жены,/ во éже помáзати тéло Твоé, Христé Бóже,/ видеша áнгелы во грóбе, и ужасóшася:/ глас бо слышаху от них, яко воскрéсе Госпóдь,// дáруя мирови вéлию милость.
СТЕПЕННА, ГЛАС 2
1 АНТИФОН
На небо очи пущаю моего сéрдца, к Тебé, Спасé,// спаси мя Твоим осиянием. (Дважды)
Помилуй нас согрешáющих Тебé мнóго,/ на всякий час, о Христé мой,// и даждь óбраз прéжде концá покáятися Тебé. (Дважды)
Слáва Отцу и Сыну и Святóму Духу.
Святóму Духу, Еже цáрствовати подобáет,/ освящáти, подвизáти тварь:// Бог бо есть, Единосущен Отцу и Слóву.
И ныне и присно и во вéки векóв. Аминь.
Святóму Духу, Еже цáрствовати подобáет,/ освящáти, подвизáти тварь:// Бог бо есть, Единосущен Отцу и Слóву.
2 АНТИФОН
Аще не Госпóдь бы был в нас,/ кто довóлен цел сохранéн быти от врагá,// купно и человекоубийцы?(Дважды)
Зубóм их не предáждь, Спáсе, Твоегó рабá:// ибо львóвым óбразом на мя подвизáются врази мои. (Дважды)
Слáва Отцу и Сыну и Святóму Духу.
Святóму Духу живоначáлие и честь:/ вся бо создáнная,/ яко Бог сый силою,// соблюдáет во Отцé, Сыном же.
И ныне и присно и во вéки векóв. Аминь.
Святóму Духу живоначáлие и честь:/ вся бо создáнная,/ яко Бог сый силою,// соблюдáет во Отцé, Сыном же.
3 АНТИФОН
Надéющиися на Гóспода, уподóбишася горé святéй:// иже никáкоже движутся прилóги врáжиими. (Дважды)
В беззакóнии рук своих да не прóструт божéственне живущии:// не оставляет бо Христóс жезлá на жрéбии Своéм. (Дважды)
Слáва Отцу и Сыну и Святóму Духу.
Святым Духом тóчится всяка премудрость:/ отсюду благодáть апóстолом,// и страдáльчествы венчáются мученицы, и прорóцы зрят.
И ныне и присно и во вéки векóв. Аминь.
Святым Духом тóчится всяка премудрость:/ отсюду благодáть апóстолом,// и страдáльчествы венчáются мученицы, и прорóцы зрят.
ПРОКИМЕН
Чтец: Прокимен, глас вторый. Востáни, Гóсподи, Бóже мой, повелéнием, имже заповéдал еси,/ и сонм людéй обыдет Тя.
Хор: Востáни, Гóсподи, Бóже мой, повелéнием, имже заповéдал еси,/ и сонм людéй обыдет Тя.
Чтец: Гóсподи Бóже мой, на Тя уповáх, спаси мя.
Хор: Востáни, Гóсподи, Бóже мой, повелéнием, имже заповéдал еси,/ и сонм людéй обыдет Тя.
Чтец: Востáни, Гóсподи, Бóже мой, повелéнием, имже заповéдал еси.
Хор: И сонм людéй обыдет Тя.
Чтец: Гóсподу помóлимся.
Хор: Гóсподи, помилуй.
Слáва Отцу и Сыну и Святóму Духу, и ныне и присно и во вéки векóв, аминь.
Чтец: Всякое дыхáние да хвáлит Гóспода.
Хор: Всякое дыхáние да хвáлит Гóспода.
Чтец: Хвалите Бóга во святых Егó, хвалите Егó во утвержéнии силы Егó.
Хор: Всякое дыхáние да хвáлит Гóспода.
Чтец:Всякое дыхáние.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелия чтéние
Хор: Слáва Тебé, Гóсподи, слáва Тебé.
(Мк.зач.71)Во врéмя óно воскрéс Иисус заутра, в пéрвую суббóту, явися прéжде Марии Магдалини, из неяже изгнá седмь бесóв. Онá же шéдши возвести с Ним бывшим, плáчущимся и рыдáющим. И они слышавше, яко жив есть, и виден бысть от нея, не яша вéры. По сих же двемá от них грядущема явися инéм óбразом, идущема на селó. И та шéдша возвестиста прóчим: и ни тéма вéры яша. Последи же возлежáщим им единомунáдесяте явися, и поноси невéрствию их и жестосéрдию, яко видевшим Егó востáвша не яша вéры. И речé им: шéдше в мир весь, проповéдите Евáнгелие всей твáри. Иже вéру имéт и крестится, спасéн будет, а иже не имéт вéры, осуждéн будет. Знáмения же вéровавшим сия послéдуют: именем Моим бéсы ижденут; языки возглагóлют нóвы; змия возмут; áще и что смéртно испиют, не вредит их; на недужныя руки возложáт, и здрáви будут. Госпóдь же убо, по глагóлании Егó к ним, вознесéся на нéбо, и сéде одесную Бóга. Они же изшéдше проповéдаша всюду, Гóсподу поспéшствующу и слóво утвержáющу послéдствующими знáменьми. Аминь.
[Русский перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебé, Гóсподи, слáва Тебé.
Воскресéние Христóво видевше,/ поклонимся Святóму Гóсподу Иисусу,/ единому безгрéшному,/ Кресту Твоему покланяемся, Христé,/ и святóе Воскресéние Твоé поéм и слáвим:/ Ты бо еси Бог наш,/ рáзве Тебé инóго не знáем,/ имя Твоé именуем./ Приидите вси вéрнии,/ поклонимся Святóму Христóву Воскресéнию:/ се бо прииде Крестóм рáдость всему миру./ Всегдá благословяще Гóспода,/ поéм Воскресéние Егó:/ распятие бо претерпéв,// смéртию смерть разруши. (Трижды)
Псалом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавая пред Тобою сотворих; яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твой. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтáрь Твой тельцы.
Слáва Отцу и Сыну и Святóму Духу.
глас 6: Молитвами апóстолов,/ Милостиве, очисти// мнóжество согрешéний нáших.
И ныне и присно и во вéки векóв. Аминь.
Молитвами Богорóдицы,/ Милостиве, очисти// мнóжество согрешéний нáших.
Таже, глас 6: Помилуй мя, Бóже,/ по велицей милости Твоéй, / и по мнóжеству щедрóт Твоих,/ очисти беззакóние моé.
СТИХИРА ПРАЗДНИКА, ГЛАС 6
Воскрéс Иисус от грóба,/ якоже проречé/ дадé нам живóт вéчный// и вéлию милость.
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
КАНОН ( здесь)