Неделя 3 по Пасхе, св. жен-мироносиц. ВСЕНОЩНОЕ БДЕНИЕ (окончание утрени) КАНОН.Служба мирским чином
16 мая 2021 года. Неделя 3 по Пасхе, св. жен-мироносиц. Глас 2. Всенощное бдение для домашнего (келейного) совершения состоит из Великой вечерни, утрени с чтением евангелия, также канона и первого часа. Вся служба праздника (по Триоди).
Канон утрени. Начало здесь ( великая вечерня), здесь ( утреня) и здесь ( продолжение утрени)
ПЕСНЬ 1
КАНОН ПАСХИ, ГЛАС 1 (совмещенный с каноном праздника Триоди (недели Мироносиц) глас 2)
Ирмóс:Воскресéния день,/ просветимся, людие./ Пáсха, Госпóдня Пáсха:/ от смéрти бо к жизни,/ и от земли к небеси,/ Христóс Бог нас преведé,// побéдную поющия. (Дважды)
Припéв: Христóс воскрéсе из мéртвых.
Тропáрь: Очистим чувствия, и узрим неприступным свéтом Воскресéния, Христá блистáющася, и рáдуйтеся, рекуща, ясно да услышим, побéдную поюще.
Припéв: Христóс воскрéсе из мéртвых.
Тропáрь: Небесá убо достóйно да веселятся, земля же да рáдуется, да прáзднует же мир, видимый же весь и невидимый: Христóс бо востá, весéлие вéчное.
Припéв: Пресвятáя Богорóдице, спаси нас.
Богорóдичен: Умерщвлéния предéл сломила еси, вéчную жизнь рóждшая Христá, из грóба возсиявшаго днесь, Дéво Всенепорóчная, и мир просветившаго.
Припéв: Пресвятáя Богорóдице, спаси нас.
Богорóдичен: Воскрéсшаго видевши Сына Твоегó и Бóга, рáдуйся со апóстолы Богоблагодáтная Чистая: и éже рáдуйся пéрвее, яко всех рáдости винá, восприяла еси, Богомáти Всенепорóчная.
Припéв (глас 2): Слáва Тебé, Бóже наш, слáва Тебé.
Тропáрь: Распялся еси пло́тию, безстрáстный естество́м Отчим: прободе́н был еси в ре́бра, источивый ми́рови кровь и во́ду: Ты Бог наш, и прославля́ем Тя.
Припéв (глас 2): Слáва Тебé, Бóже наш, слáва Тебé.
Тропáрь: Крест Твой почитаю, и погребе́ние сла́влю Бла́же, и пою́, и покланя́юся воста́нию Твоему́, и взыва́ю: Ты Бог наш, и прославля́ем Тя.
Припéв (глас 2): Слáва Тебé, Бóже наш, слáва Тебé.
Тропáрь: Аще и вкусил еси же́лчи, сла́досте церко́вная, но источи́л еси́ нам нетле́ние от ребр Твои́х: Ты Бог наш, и прославля́ем Тя.
Припéв (глас 2): Слáва Тебé, Бóже наш, слáва Тебé.
Тропáрь: Вмени́лся еси́, Спа́се, с ме́ртвыми, ме́ртвыя воздви́гнувый, вкуси́л еси тли: истле́ния бо вся́ко не позна́л еси: Ты Бог наш, и прославля́ем Тя.
Припéв (глас 2): Слáва Тебé, Бóже наш, слáва Тебé.
Тропáрь: Да веселится Сио́н, да ра́дуется и не́бо, воскре́се Христо́с, ме́ртвыя воздви́гнувый, песносло́вящия: Ты Бог наш, и прославля́ем Тя.
Припéв (глас 2): Слáва Тебé, Бóже наш, слáва Тебé.
Тропáрь: Предвари́вшия у́тро жены́, ви́деша Христа́, и боже́ственным вопия́ху ученико́м: вои́стинну Христо́с воскре́се, прииди́те с на́ми воспо́йте Его́.
Слáва Отцу и Сыну и Святóму Духу.
Трóичен: Всесвята́я Тро́ице, еди́но Божество́, безнача́льная Еди́нице, Отче и Сыне и Боже́ственный Ду́ше, спаса́й мир: Ты Бог наш, и прославля́ем Тя.
И ныне и присно и во вéки векóв. Аминь.
Богорóдичен: Дре́внюю кля́тву разреши́вши, Чи́стая, во утро́бе Твое́й/ возрасти́ла еси́ нам благослове́ние, Младе́нца роди́вши:// Сей бо Бог, а́ще и плоть но́сит.
Катавáсия: Воскресéния день,/ просветимся, людие./ Пáсха, Госпóдня Пáсха:/ от смéрти бо к жизни,/ и от земли к небеси,/ Христóс Бог нас преведé,// побéдную поющия.
ПЕСНЬ 3
Ирмóс: Приидите, пиво пиéм нóвое,/ не от кáмене неплóдна чудодéемое,/ но нетлéния истóчник/ из грóба одождивша Христá,// в Нéмже утверждáемся. (Дважды)
Припéв: Христóс воскрéсе из мéртвых.
Тропáрь: Ныне вся испóлнишася свéта,/ нéбо же и земля, и преиспóдняя:/ да прáзднует убо вся тварь/ востáние Христóво,// в нéмже утверждáется.
Припéв: Христóс воскрéсе из мéртвых.
Тропáрь: Вчерá спогребóхся Тебé Христé,/ совостаю днесь/ воскрéсшу Тебé,/ сраспинáхся Тебé вчерá,// Сам мя спрослáви Спáсе во Цáрствии Твоéм.
Припéв: Пресвятáя Богорóдице, спаси нас.
Богорóдичен: На нетле́нную жизнь прихожду́ днесь/ бла́гостию ро́ждшагося из Тебе́, Чи́стая,// и всем конце́м свет облиста́вшаго.
Припéв: Пресвятáя Богорóдице, спаси нас.
Богорóдичен: Бо́га, Его́же родила́ еси́ пло́тию,/ из ме́ртвых, я́коже рече́,/ воста́вша ви́девши, Чи́стая, лику́й,// и Сего́ я́ко Бо́га Пречи́стая возвелича́й.
Припéв (глас 2): Слáва Тебé, Бóже наш, слáва Тебé.
Тропáрь: Дла́ни на Кресте́ просте́рл еси́ Иису́се,/ язы́ки вся от пре́лести собра́в,// к позна́нию Твоему́ созва́л еси́ Спа́се.
Припéв (глас 2): Слáва Тебé, Бóже наш, слáва Тебé.
Тропáрь: Иуде́йстии лю́дие Пила́ту вопию́т:/ отпусти́ нам злоде́йственнаго разбо́йника,// возми́, возми́, распни́ Безгре́шнаго.
Припéв (глас 2): Слáва Тебé, Бóже наш, слáва Тебé.
Тропáрь: Распе́ншуся Тебе́, Христе́, помрачи́ся свет, земля́ потрясе́ся,// и из гробо́в ме́ртвии воста́ша мно́зи, стра́хом держа́вы Твоея́.
Припéв (глас 2): Слáва Тебé, Бóже наш, слáва Тебé.
Тропáрь: Предстоя́щи Кресту́ А́гница Твоя́, Иису́се, пла́чем вопия́ше:/ ка́мо и́деши, Сы́не;// ка́мо гряде́ши, А́гнче, за всех закла́выйся?
Припéв (глас 2): Слáва Тебé, Бóже наш, слáва Тебé.
Тропáрь: Воскре́сшу Тебе́, Христе́,/ сокруши́шася вереи́ и врата́ а́дова,// и сме́ртныя у́зы разруши́шася, а́бие стра́хом держа́вы Твоея́.
Припéв (глас 2): Слáва Тебé, Бóже наш, слáва Тебé.
Тропáрь: Да ра́дуется с на́ми ученико́в двоенадеся́тица,/ с мироно́сицами жена́ми и Ио́сифом,// и со други́ми ученики́ и учени́цами Христо́выми.
Слáва Отцу и Сыну и Святóму Духу.
Трóичен: Со Отце́м и Сы́ну и Ду́ху Пра́вому,/ еди́ному Естеству́ покланя́юся и воспева́ю,// Ли́цы разделя́я, и Существо́м соединя́я.
И ныне и присно и во вéки векóв. Аминь.
Богорóдичен: Блаже́нна еси́, Чи́стая, из ко́рене Иессе́ова су́щая,// из него́же жезл и цвет Христа́, по пло́ти нас ра́ди возрасти́вшая.
Катавáсия: Приидите, пиво пиéм нóвое,/ не от кáмене неплóдна чудодéемое,/ но нетлéния истóчник/ из грóба одождивша Христá,// в Нéмже утверждáемся.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Кондáк, глас 8: Аще и во гроб снизшéл еси, Безсмéртне,/ но áдову разрушил еси силу,/ и воскрéсл еси, яко победитель, Христé Бóже,/ женáм мироно́сицам вещáвый: рáдуйтеся,/ и Твоим апóстолом мир дáруяй,// пáдшим подаяй воскресéние.
Икос: Еже прéжде сóлнца Сóлнце зашéдшее иногдá во гроб,/ предвариша ко утру, ищущия яко дне миронóсицы дéвы,/ и другá ко друзéй вопияху:/ о другини! Приидите, вонями помáжем тéло живонóсное и погребéное,/ плоть воскресившаго пáдшаго Адáма, лежáщую во грóбе./ Идем, потщимся якоже волсви, и поклонимся,/ и принесéм мира яко дáры, не в пеленáх, но в плащанице обвитому,/ и плáчим, и возопиим: о Владыко, востáни,// пáдшим подаяй воскресéние.
СЕДАЛЕН ТРИОДИ, ГЛАС 2
Ми́ра те́пле гро́бу прино́сят жены́, Спа́се,/ А́нгела све́тлостию ду́ши веселя́ху,/ и Бо́га Тя всех пропове́даху, и ученико́м вопия́ху:// вои́стинну воскре́се из гро́ба всех Жизнь.
ДРУГОЙ СЕДАЛЕН ТРИОДИ, ГЛАС 2
Ученико́в Твои́х лик с мироно́сицами жена́ми ра́дуется согла́сно:/ о́бщий бо пра́здник с ни́ми пра́зднуют,/ в сла́ву и честь Твоего́ Воскресе́ния./ И те́ми вопие́м Ти, Человеколю́бче Го́споди:// лю́дем Твои́м пода́ждь ве́лию ми́лость.
ПЕСНЬ 4
Ирмóс: На Божéственней стрáжи/ богоглагóливый Аввакум/ да стáнет с нáми, и покáжет/ светонóсна Ангела,/ ясно глагóлюща:/ днесь спасéние миру,/ яко воскрéсе Христóс,// яко всесилен. (Дважды)
Припéв: Христóс воскрéсе из мéртвых.
Тропáрь: Мужеский убо пол,/ яко развéрзый дéвственную утрóбу,/ явися Христóс:/ яко человéк же,/ Агнец наречéся:/ непорóчен же,/ яко невкусен сквéрны,/ нáша Пáсха,/ и яко Бог истинен// совершéн речéся.
Припéв: Христóс воскрéсе из мéртвых.
Тропáрь: Яко единолéтный áгнец,/ благословéнный нам венéц Христóс,/ вóлею за всех заклáн бысть,/ Пáсха чистительная,/ и пáки из грóба крáсное// прáвды нам возсия Сóлнце.
Припéв: Пресвятáя Богорóдице, спаси нас.
Богорóдичен: Созда́вый Ада́ма, Твоего́ пра́отца, Чи́стая,/ зи́ждется от Тебе́,/ и сме́ртное жили́ще разори́ Свое́ю сме́ртию днесь,/ и озари́ вся// боже́ственными блиста́ньми воскресе́ния.
Припéв: Пресвятáя Богорóдице, спаси нас.
Богорóдичен: Его́же родила́ еси́ Христа́,/ прекра́сно из ме́ртвых возсия́вша, Чи́стая, зря́щи,/ до́брая и непоро́чная в жена́х и кра́сная,/ днесь во спасе́ние всех,// со апо́столы ра́дующися, Того́ прославля́й.
Припéв (глас 2): Слáва Тебé, Бóже наш, слáва Тебé.
Тропáрь: Кресто́м плени́л еси́ а́дово чре́во,/ и совоздви́гл еси́ ме́ртвыя,/ и сме́рти разруши́л еси́ мучи́тельство:/ те́мже и́же от Ада́ма покланя́ющиися,// пое́м погребе́ние Твое́ и воста́ние Христе́.
Припéв (глас 2): Слáва Тебé, Бóже наш, слáва Тебé.
Тропáрь: Благоволи́вый, Спа́се наш,/ за благоутро́бие ми́лости пригвозди́тися на Кресте́,/ и от пра́отчия изба́вити ны кля́твы,/ разреши́ у́зы мно́гих мои́х согреше́ний:// мо́жеши бо, ели́ка хо́щеши, твори́ти.
Припéв (глас 2): Слáва Тебé, Бóже наш, слáва Тебé.
Тропáрь: На Кресте́ пригвозди́вый мою́ дре́внюю кля́тву,/ и источи́вый мне, Спа́се, благослове́ние кро́вию от ребр Твои́х,/ разреши́ у́зы мно́гих мои́х согреше́ний:// мо́жеши бо, ели́ка хо́щеши, твори́ти.
Припéв (глас 2): Слáва Тебé, Бóже наш, слáва Тебé.
Тропáрь: Ад Спа́се, срет Тя в преиспо́дних, огорчи́ся/ помышля́я, я́ко я́же дре́вле пожре́ти возмоги́й,/ ны́не нево́лею отда́в, истязу́ется в до́льних,// и пленя́емь и обнажа́емь быва́ет ме́ртвых.
Припéв (глас 2): Слáва Тебé, Бóже наш, слáва Тебé.
Тропáрь: Вои́стинну постыди́теся беззако́ннии,/ Христо́с бо воскре́се, и совоздви́же ме́ртвыя, зовы́й:/ дерза́йте, аз победи́х мир./ Ве́руйте у́бо Ему́, или́ умолчи́те лестцы́,// отмета́ющиися Воскресе́ния Его́.
Припéв (глас 2): Слáва Тебé, Бóже наш, слáва Тебé.
Тропáрь: Ио́сифа благообра́знаго,/ ревни́теля благоче́стия, сове́тника и ученика́,/ с мироно́сицами почти́м, и апо́столами, зову́ще с ни́ми,// и ве́рно воспева́юще Спа́сово Воскресе́ние све́тло.
Слáва Отцу и Сыну и Святóму Духу.
Трóичен: Пресу́щнаго Божества́ неразде́льную сла́ву, кто возмо́жет изрещи́?/ Еди́но бо Естество́м су́щи Тро́ица пое́тся безнача́льная,/ сра́сленная я́ко Еди́ница,// в Тро́ице пева́емая Ипоста́сьми просты́ми.
И ныне и присно и во вéки векóв. Аминь.
Богорóдичен: Во чре́во Твое́ все́льшагося безму́жно ро́ждшая, Ма́ти Де́во Чи́стая,/ непреста́нно моли́, я́ко Богоро́дица,/ разреши́ти у́зы мно́гих мои́х согреше́ний:// мо́жеши бо, ели́ка хо́щеши, помощи́.
Катавáсия: На Божéственней стрáжи/ богоглагóливый Аввакум/ да стáнет с нáми, и покáжет/ светонóсна Ангела,/ ясно глагóлюща:/ днесь спасéние миру,/ яко воскрéсе Христóс,// яко всесилен.
ПЕСНЬ 5
Ирмóс: Утренюем утреннюю глубоку,/ и вмéсто мира песнь принесéм Владыце,/ и Христá узрим/ прáвды Сóлнце,// всем жизнь возсияюща. (Дважды)
Припéв: Христóс воскрéсе из мéртвых.
Тропáрь: Безмéрное Твоé благоутрóбие,/ áдовыми узами содержимии зряще,/ к свéту идяху Христé,/ весéлыми ногáми,// Пáсху хвáляще вéчную.
Припéв: Христóс воскрéсе из мéртвых.
Тропáрь: Приступим свещенóснии,/ исходящу Христу из грóба, яко жениху,/ и спрáзднуем любопрáзднственными чинми// Пáсху Бóжию спасительную.
Припéв: Пресвятáя Богорóдице, спаси нас.
Богорóдичен: Просвеща́ется боже́ственными луча́ми и живоно́сными/ воскресе́ния Сы́на Твоего́,/ Богома́ти Пречи́стая,// и ра́дости исполня́ется благочести́вых собра́ние.
Припéв: Пресвятáя Богорóдице, спаси нас.
Богорóдичен: Не разве́рзл еси́ врата́ де́вства в воплоще́нии,/ гро́ба не разруши́л еси́ печа́тей, Царю́ созда́ния:// отону́дуже воскре́сшаго Тя зря́щи, Ма́ти, ра́довашеся.
Припéв (глас 2): Слáва Тебé, Бóже наш, слáва Тебé.
Тропáрь: Ты пе́рвую оде́жду мою́,/ ю́же ми истка́, увы́ мне, се́ятель греха́,// совле́кл еси́, Спа́се мой, обле́кся в мя.
Припéв (глас 2): Слáва Тебé, Бóже наш, слáва Тебé.
Тропáрь: Ли́ствие смоко́вное сши мне грех мой, увы мне,/ не сохра́ншему, Спа́се мой, пречи́стую за́поведь Твою́,// змии́ным сове́том.
Припéв (глас 2): Слáва Тебé, Бóже наш, слáва Тебé.
Тропáрь: Уязви́вшуюся ду́шу мою́ разбо́йническими помышле́ньми мои́ми,// предста́вый и́же от Мари́и, и еле́й возлия́в, исцели́ Христо́с.
Припéв (глас 2): Слáва Тебé, Бóже наш, слáва Тебé.
Тропáрь: У Креста́ предстоя́щи Пречи́стая Богоро́дица, ма́терски взыва́ше:// оста́вил Мя еси́ еди́ну, о Сы́не Мой и Бо́же!
Припéв (глас 2): Слáва Тебé, Бóже наш, слáва Тебé.
Тропáрь: Где твое́, сме́рте, жа́ло;/ где твоя́, а́де, побе́да?/ Ада́м да свопие́т:// сокруши́лся еси́ оживле́нием воздви́гшаго ме́ртвыя.
Припéв (глас 2): Слáва Тебé, Бóже наш, слáва Тебé.
Тропáрь: Мироно́сицы жены́ гро́ба Твоего́ дости́гшия, оживи́вшаго до́льных,// глас слы́шаху глаго́лющий: воскре́се Христо́с.
Слáва Отцу и Сыну и Святóму Духу.
Трóичен: Тебе́, Бо́гу и Отцу́, и Сы́ну, и Ду́ху покланя́юся, трем Ипоста́сем,// и еди́но три ве́рую, Существо́м еди́нем.
И ныне и присно и во вéки векóв. Аминь.
Богорóдичен: Тя, безсе́менным Рождество́м роди́вшую па́че естества́// обнови́вшаго естество́, Христа́ еди́наго Влады́ку воспева́ем, ве́рнии.
Катавáсия: Утренюем утреннюю глубоку,/ и вмéсто мира песнь принесéм Владыце,/ и Христá узрим/ прáвды Сóлнце,// всем жизнь возсияюща.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
ПЕСНЬ 6
Ирмóс: Снизшéл еси в преиспóдняя земли,/ и сокрушил еси вереи вéчныя,/ содержáщия связанныя, Христé,/ и триднéвен, яко от кита Иóна,// воскрéсл еси от грóба. (Дважды)
Припéв: Христóс воскрéсе из мéртвых.
Тропáрь: Сохранив цéла знáмения Христé,/ воскрéсл еси от грóба,/ ключи Дéвы не вредивый в рождествé Твоéм,// и отвéрзл еси нам рáйския двéри.
Припéв: Христóс воскрéсе из мéртвых.
Тропáрь: Спáсе мой,/ живóе же и нежéртвенное заколéние,/ яко Бог Сам Себé/ вóлею привéл Отцу,/ совоскресил еси всерóднаго Адáма,// воскрéс от грóба.
Припéв: Пресвятáя Богорóдице, спаси нас.
Богорóдичен: Возведе́ся дре́вле держи́мое сме́ртию и тле́нием,/ воплоти́вшимся от Твоего́ пречи́стаго чре́ва,/ к нетле́нней и присносу́щней жи́зни,// Богоро́дице Де́во.
Припéв: Пресвятáя Богорóдице, спаси нас.
Богорóдичен: Сни́де в преиспо́дняя земли́,/ в ложесна́ Твоя́, Чи́стая, сше́дый,/ и всели́выйся и воплоти́выйся па́че ума́,/ и воздви́же с Собо́ю Ада́ма,// воскре́с от гро́ба.
Припéв (глас 2): Слáва Тебé, Бóже наш, слáва Тебé.
Тропáрь: Мертв есть ад, дерза́йте земноро́днии,/ Христо́с бо на Дре́ве ви́сяй,/ ве́рже ору́жие нань, и лежи́т мертв:// я́же бо имя́ше, плени́ся обнажи́вся.
Припéв (глас 2): Слáва Тебé, Бóже наш, слáва Тебé.
Тропáрь: Плени́ся ад, дерза́йте ме́ртвии, и гро́би отверзо́шася,/ воста́ните от а́да, вопие́т вам Христо́с,// вся прише́дый изба́вити от сме́рти и тли.
Припéв (глас 2): Слáва Тебé, Бóже наш, слáва Тебé.
Тропáрь: Ме́ртвыя я́коже возмо́г поже́рл еси́ иногда́, ны́не истязу́емь/ а́де, отда́ждь Ми, вопие́т тебе́ Жизнода́вец и Бог,// вся прише́дый изба́вити от несы́таго твоего́ чре́ва.
Припéв (глас 2): Слáва Тебé, Бóже наш, слáва Тебé.
Тропáрь: Жены́ мироно́сицы, что тщите́ся про́чее;/ что же живо́му ми́ра прино́сите,/ воскре́се Христо́с, я́коже предрече́.// Да преста́нут ва́ша сле́зы, преше́дшия на ра́дость.
Припéв (глас 2): Слáва Тебé, Бóже наш, слáва Тебé.
Тропáрь: Плащани́цею Тя, Христе́, обви́в Ио́сиф благообра́зный, во гро́бе положи́:/ миропома́зав же разоре́нный Твоего́ телесе́ храм,// привали́ ка́мень вели́кий ко гро́бу.
Припéв (глас 2): Слáва Тебé, Бóже наш, слáва Тебé.
Тропáрь: Госпо́дь воскре́се плени́вый врага́,/ и у́зники исто́ргнув, возведе́ вся,/ и первозда́ннаго Ада́ма, того́ возставля́я,// я́ко Благоутро́бен и Человеколю́бец Бог.
Слáва Отцу и Сыну и Святóму Духу.
Трóичен: Тро́ицу во Еди́нстве воспои́м ве́рнии,/ с Сы́ном Отца́ сла́вяще, и Ду́ха единосу́щна Сы́ну, и су́ща во Отце́// собезнача́льнаго и присносу́щнаго Бо́га.
И ныне и присно и во вéки векóв. Аминь.
Богорóдичен: Во чре́ве невозде́ланно зачала́ еси́, Чи́стая, нетле́ния грозд, я́ко лоза́:/ из нея́же безсме́ртия то́ки,// я́коже вино́ нам источа́ют ве́чную жизнь.
Катавáсия: Снизшéл еси в преиспóдняя земли,/ и сокрушил еси вереи вéчныя,/ содержáщия связанныя, Христé,/ и триднéвен, яко от кита Иóна,// воскрéсл еси от грóба.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
КОНДАК ПРАЗДНИКА ТРИОДИ (НЕДЕЛИ МИРОНОСИЦ), ГЛАС 2
Ра́доватися мироно́сицам повеле́л еси́,/ плачь прама́тере Е́вы утоли́л еси́/ воскресе́нием Твои́м, Христе́ Бо́же,/ апо́столом же Твои́м пропове́дати повеле́л еси́:// Спас воскре́се от гро́ба.
Икос: На гроб Твой, Спа́се, мироно́сицы иду́щия,/ к себе́ недоумева́хуся умо́м, и веща́ху:/ кто нам ка́мень отвали́т гро́бный?/ И воззре́вша ви́дят, я́ко ка́мень отвале́н бе,/ зра́ку же а́нгелову со одея́нием дивля́хуся:/ содержи́ми же бя́ху тре́петом, и бежа́ти помышля́ху./ И к ним ю́ноша возопи́:/ не бо́йтеся вы, Его́же и́щете, воста́,/ прииди́те, ви́дите ме́сто, иде́же лежа́ше те́ло Иису́сово,/ и ско́ро ше́дшия возвести́те ученико́м:// Спас воскре́се от гро́ба.
ПЕСНЬ 7
Ирмóс: Отроки от пéщи избáвивый,/ быв Человéк,/ стрáждет яко смéртен,/ и стрáстию смéртное,/ в нетлéния облачит благолéпие,/ Един благословéн// отцéв Бог, и препрослáвлен. (Дважды)
Припéв: Христóс воскрéсе из мéртвых.
Тропáрь: Жены с миры богомудрыя в след Тебé течáху:/ Егóже, яко мéртва, со слезáми искáху,/ поклонишася рáдующияся Живóму Бóгу,/ и Пáсху тáйную// Твоим, Христé, ученикóм благовестиша.
Припéв: Христóс воскрéсе из мéртвых.
Тропáрь: Смéрти прáзднуем умерщвлéние,/ áдово разрушéние,/ инóго жития вéчнаго начáло,/ и игрáюще поéм Винóвнаго,/ Единаго благословéннаго// отцéв Бóга, и препрослáвленнаго.
Припéв: Пресвятáя Богорóдице, спаси нас.
Богорóдичен: Умертви́в Сын Твой смерть, Всенепоро́чная, днесь,/ всем сме́ртным пребыва́ющий живо́т/ во ве́ки веко́в дарова́,/ еди́н благослове́нный// отце́в Бог и препросла́вленный.
Припéв: Пресвятáя Богорóдице, спаси нас.
Богорóдичен: Всем ца́рствуяй созда́нием, быв челове́к,/ всели́ся в Твою́, Богоблагода́тная, утро́бу,/ и распя́тие претерпе́в и смерть,/ воскре́се боголе́пно,// совозста́вив нас я́ко всеси́лен.
Припéв (глас 2): Слáва Тебé, Бóже наш, слáва Тебé.
Тропáрь: Ты, я́ко Человеколю́бец, хотя́й вся спасти́ от пре́лести, я́же созда́л еси́,/ претерпе́л еси́ пригвозди́тися на Кресте́:/ да погребе́нный о́браз страстьми́, сей пло́тию Твое́ю обнови́ши, Спа́се,// и ад низложи́в, воскреси́л еси́ и уме́ршия с Собо́ю.
Припéв (глас 2): Слáва Тебé, Бóже наш, слáва Тебé.
Тропáрь: На Кресте́ возвыша́емь, вся призва́л еси́/ к Себе́ Ще́дре, я́коже обеща́л еси́ Бла́же:/ я́ко вои́стинну вся сия́ грехо́в ра́ди на́ших пострада́ти благоволи́л еси́.// Те́мже и разбо́йнику ра́йская врата́ отве́рзл еси́, Спа́се.
Припéв (глас 2): Слáва Тебé, Бóже наш, слáва Тебé.
Тропáрь: Ты храм теле́сный воздви́гл еси́ разоре́нный,/ тридне́вно из гро́ба, я́коже обеща́л еси́ Бла́же:/ да вои́стинну ска́жеши сла́ву Твою́,/ ю́же нам источа́еши ве́рою,// у́зы разреши́в, и́хже держа́ше дре́вле ад свя́занных.
Припéв (глас 2): Слáва Тебé, Бóже наш, слáва Тебé.
Тропáрь: О иуде́йское безу́мие! О неи́стовство беззако́нных!/ Что неве́рное ви́девше, не ве́ровасте Христу́;/ я́ко немощны́я, не сло́вом ли воздви́же?/ Или я́ко весь мир Той не спасе́ ли,// да уверя́ют вас поне́ во́ини, или́ воскре́сшие из ме́ртвых.
Припéв (глас 2): Слáва Тебé, Бóже наш, слáва Тебé.
Тропáрь: Омертве́вшии стра́жие ны́не да глаго́лют,/ ка́ко укра́ден бысть, Его́же не ви́деша неразу́мнии всегда́?/ А́ще бо воскре́сша не ви́деша, ни ощути́ша,/ ка́ко укра́дена Сего́ разуме́ти можа́ху когда́?// Да уве́рит вы поне́ ка́мень сей, и погреба́льная Христо́ва
Припéв (глас 2): Слáва Тебé, Бóже наш, слáва Тебé.
Тропáрь: Что я́ко ме́ртва блюде́те;/ что печа́ти на ка́мени положи́сте евре́е, стра́хом боя́щеся краде́ния?/ Се вои́стинну гроб запечатле́ся:/ ка́ко у́бо воскре́се, а́ще не бы Бог был Христо́с?// Да уверя́ют вы воскре́сшии, и ви́дени бы́вшии мно́гими.
Слáва Отцу и Сыну и Святóму Духу.
Трóичен: Со Отце́м сла́вим Сы́на, и Ду́ха Свята́го,/ вопию́ще непреста́нным гла́сом:/ Тро́ице, еди́нственное Существо́, поми́луй, спаси́ вся,/ в трие́х Ли́цех Еди́нице, уще́дри ны,// препросла́вленный Бо́же, во ве́ки.
И ныне и присно и во вéки векóв. Аминь.
Богорóдичен: Во чре́ве Твое́м, Пречи́стая, ка́ко вмести́ла еси́ Младе́нца,/ Его́же трепе́щут си́лы а́нгельския я́ко Бо́га?/ Ра́зве я́коже восхоте́, я́коже весть всели́ся,/ вся спасти́ хотя́й от Ада́ма земноро́дныя,// разреши́вый Ада́ма кля́твы о́ныя, сне́дию го́рькою.
Катавáсия: Отроки от пéщи избáвивый,/ быв Человéк,/ стрáждет яко смéртен,/ и стрáстию смéртное,/ в нетлéния облачит благолéпие,/ Един благословéн// отцéв Бог, и препрослáвлен.
ПЕСНЬ 8
Ирмóс: Сей наречéнный и святый день,/ Един суббóт Царь и Госпóдь,/ прáздников прáздник/ и торжествó есть торжéств,// вóньже благословим Христá во вéки. (Дважды)
Припéв: Христóс воскрéсе из мéртвых.
Тропáрь: Приидите, нóваго виногрáда рождéния,/ Божéственнаго весéлия,/ в нарóчитом дни Воскресéния,/ Цáрствия Христóва приобщимся,/ поюще Егó// яко Бóга во вéки.
Припéв: Христóс воскрéсе из мéртвых.
Тропáрь: Возведи óкрест óчи твои, Сиóне, и виждь:/ се бо приидóша к тебé,/ яко богосвéтлая светила,/ от зáпада, и сéвера, и мóря,/ и востóка чáда твоя,// в тебé благословящая Христá во вéки.
Припéв: Пресвятáя Богорóдице, спаси нас.
Богорóдичен: Прии́де Тобо́ю в мир Госпо́дь, Де́во Богоро́дице,/ и чре́во а́дово расто́рг,/ сме́ртным нам воскресе́ние дарова́:// Те́мже благослови́м Его́ во ве́ки.
Припéв: Пресвятáя Богорóдице, спаси нас.
Богорóдичен: Всю низложи́в сме́рти держа́ву Сын Твой, Де́во,/ Свои́м воскресе́нием,/ я́ко Бог кре́пкий совознесе́ нас и обожи́:// те́мже воспева́ем Его́ во ве́ки.
Припéв (глас 2): Слáва Тебé, Бóже наш, слáва Тебé.
Тропáрь: Со́лнечныя зари́ спря́тахуся стра́хом Христо́вых страда́ний,/ и востая́ху ме́ртвии, и го́ры прекланя́хуся,// и колеба́шеся земля́, и ад обнажа́шеся.
Припéв (глас 2): Слáва Тебé, Бóже наш, слáва Тебé.
Тропáрь: В пещи́ су́щии иногда́ треблаже́ннии о́троцы/ возвыша́юще ру́ки, прообража́ху, Бла́же, пречестны́й Крест Твой,// и́мже низложи́л еси́, Христе́, вра́жию си́лу.
Припéв (глас 2): Слáва Тебé, Бóже наш, слáва Тебé.
Тропáрь: О иуде́е слепи́и преле́стницы и престу́пницы,/ Христо́ву Воскресе́нию неве́рующии, я́ко ло́жному:// что неве́рное ви́дите, я́ко воскре́се Христо́с, ме́ртвыя воздви́гий?
Припéв (глас 2): Слáва Тебé, Бóже наш, слáва Тебé.
Тропáрь: О иуде́е врази́, а́ще и нам не ве́руете,/ ва́ша во́ины вы вопроси́те, что пострада́ша они́?// Кто отвали́вый рука́ми ка́мень от гро́ба?
Припéв (глас 2): Слáва Тебé, Бóже наш, слáва Тебé.
Тропáрь: Зове́т ка́мень са́мый, печа́ти вопию́т, я́же вы положи́вше,/ поста́висте стра́жу храня́щую гроб:// вои́стинну воскре́се Христо́с, и живе́т во ве́ки.
Припéв (глас 2): Слáва Тебé, Бóже наш, слáва Тебé.
Тропáрь: Вои́стинну воскре́се Христо́с,/ плене́н бысть ад, умертви́ся змий,/ изба́вися Ада́м, потрясо́шася до́льнии:// что не ве́руете про́чее, врази́ и престу́пницы?
Блaгословим Отца и Сына и Святаго Духа, Господа.
Трóичен: Со Отце́м Сы́на, и Ду́ха Свята́го/ Святу́ю Тро́ицу в Божестве́ еди́ном прославля́ем, вопию́ще:// Свят, Свят, Свят еси́ во ве́ки.
И ныне и присно и во вéки векóв. Аминь.
Богорóдичен: Во чре́ве Твое́м, Чи́стая, присноживо́тный хлеб,/ смеше́ный несме́сно, смеше́нием на́шим,// родила́ еси́ непрело́жно еди́наго Христа́ Бо́га во двою́ существу.
Катавáсия: Сей наречéнный и святый день,/ Един суббóт Царь и Госпóдь,/ прáздников прáздник/ и торжествó есть торжéств,// вóньже благословим Христá во вéки.
ПЕСНЬ 9
Ирмóс: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó. (Дважды)
Припéв: Христóс воскрéсе из мéртвых.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси быти,/ до скончáния вéка Христé:/ Егóже, вéрнии,// утверждéние надéжди имуще, рáдуемся.
Припéв: Христóс воскрéсе из мéртвых.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Пресвятáя Богорóдице, спаси нас.
Богорóдичен: Согла́сно, Де́во, Тебе́ блажи́м ве́рнии:/ ра́дуйся, две́ре Госпо́дня:/ ра́дуйся, гра́де одушевле́нный:/ ра́дуйся, Ея́же ра́ди нам ны́не возсия́ свет,// из Тебе́ Рожде́ннаго из ме́ртвых Воскресе́ния.
Припéв: Пресвятáя Богорóдице, спаси нас.
Богорóдичен: Весели́ся и ра́дуйся боже́ственная две́ре Све́та:/ заше́дый бо Иису́с во гроб возсия́,/ просия́в со́лнца светле́е,/ и ве́рныя вся озари́в,// Богора́дованная Влады́чице.
Припéв (глас 2): Слáва Тебé, Бóже наш, слáва Тебé.
Тропáрь: И́же на Кресте́ разбо́йника, позна́вша Тя Бо́га,/ насле́дника соде́лал еси́ мы́сленному раю́,// е́же помяни́ мя, вопию́ща, Всеси́льне Спа́се.
Припéв (глас 2): Слáва Тебé, Бóже наш, слáва Тебé.
Тропáрь: Зауше́н нас ра́ди,/ и оплева́н был еси́, Иису́се, от беззако́нников,// скрижа́ли зако́на начерта́вый в Сина́и, уго́днику Моисе́ю.
Припéв (глас 2): Слáва Тебé, Бóже наш, слáва Тебé.
Тропáрь: О́цта и же́лчи, Спа́се, напое́н был еси́ нас ра́ди,/ да́вый нам те́ло и честну́ю кровь,// в снедь же и питие́ ве́чныя Твоея́ жи́зни.
Припéв (глас 2): Слáва Тебé, Бóже наш, слáва Тебé.
Тропáрь: В животво́рная ре́бра копие́м прободе́н быв, Христе́,/ пречи́стую Твою́ кровь, и честну́ю во́ду// источи́л еси́ ми́рови, я́ко присноживо́тный исто́чник.
Припéв (глас 2): Слáва Тебé, Бóже наш, слáва Тебé.
Тропáрь: Кто укра́дый ме́ртваго, па́че же и на́га?/ Что льстите́ся евре́е?// Христо́с воскре́се, и разруша́ются а́довы у́зы и вереи́.
Припéв (глас 2): Слáва Тебé, Бóже наш, слáва Тебé.
Тропáрь: Ио́сифа чу́днаго да восхва́лим ве́рнии,/ ку́пно с Никоди́мом, и мироно́сицами ве́рными,// вопию́щия: Госпо́дь воскре́се вои́стинну.
Слáва Отцу и Сыну и Святóму Духу.
Трóичен: Безнача́лен еси́ О́тче,/ несозда́нен еси́ Сы́не,/ сопресто́лен и Ду́ше Святы́й,/ еди́но [Сия́ три] Естество́м, и три Ли́цы,// еди́не Бо́же и́стинный.
И ныне и присно и во вéки векóв. Аминь.
Богорóдичен: Да весели́тся Иессе́й, да ликовству́ет и Дави́д:/ се бо Де́ва Богора́сленный жезл прозябе́,// цвет присноживо́тный Христа́.
Катавáсия: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Хор: Свят Госпóдь Бог наш (трижды)
Светилен Пáсхи, самоглáсен: Пло́тию усну́в,/ я́ко мертв,/ Царю́ и Го́споди,/ тридне́вен воскре́сл еси́,/ Ада́ма воздви́г от тли,/ и упраздни́в смерть:/ Па́сха нетле́ния,// ми́ра спасе́ние.
Слáва Отцу и Сыну и Святóму Духу.
Жены услышите глас ра́дования:/ мучи́теля а́да попра́вый, от тли мир воздви́же,/ тецы́те, друго́м рцы́те Мои́м благове́стия:/ хощу́ бо созда́ние Свое́ ра́достию озарити,// отону́дуже прии́де печа́ль.
И ныне и присно и во вéки векóв. Аминь.
Жены́ услы́шите глас ра́дования:/ мучи́теля а́да попра́вый, от тли мир воздви́же,/ тецы́те, друго́м рцы́те Мои́м благове́стия:/ хощу́ бо созда́ние Свое́ ра́достию озари́ти,// отону́дуже прии́де печа́ль.
ХВАЛИТНЫ
Хор: Всякое дыхáние да хвáлит Гóспода./ Хвалите Гóспода с небéс,/ хвалите Егó в вышних.// Тебé подобáет песнь Бóгу.
Хвалите Егó вси áнгели Егó,/ хвалите Егó вся силы Егó.// Тебé подобáет песнь Бóгу.
На 8.Чтец (стихиры Триоди, глас 2): Сотворити в них суд написан:/ сла́ва сия будет всем преподо́бным Его́.
Всякое дыха́ние и вся тварь,/ Тя сла́вит, Го́споди,/ я́ко Кресто́м смерть упраздни́л еси́,/ да пока́жеши лю́дем, е́же из ме́ртвых Твое́ Воскресе́ние,// я́ко еди́н Человеколю́бец.
Хвалите Бо́га во святых Его́,/ хвалите Его́ в утверже́нии силы Его́.
Да реку́т иуде́и, ка́ко во́ини погуби́ша стрегу́щии Царя́?/ Почто́ бо ка́мень не сохрани́ Ка́мене жи́зни?/ Или́ погребе́ннаго да дадя́т,/ или́ Воскре́сшему да покло́нятся, глаго́люще с на́ми:/ сла́ва мно́жеству щедро́т Твои́х,// Спа́се наш, сла́ва Тебе́.
На 6: Хвалите Его на силах Его, хвалите Его по множеству величествия Его.
Стихира: Ра́дуйтеся, лю́дие, и весели́теся,/ А́нгел седя́й на ка́мени гро́бнем,/ той нам благовести́, рек:/ Христо́с воскре́се из ме́ртвых, Спас ми́ра,/ и испо́лни вся́ческая благоуха́ния:// ра́дуйтеся, лю́дие, и весели́теся.
Хвалите Его во гласе трубнем, хвалите Его во псалтири и гуслех.
Стихира: А́нгел у́бо, е́же ра́дуйся,/ пре́жде Твоего́ зача́тия, Го́споди, Благода́тней принесе́;/ А́нгел же ка́мень сла́внаго Твоего́ гро́ба в Твое́м Воскресе́нии отвали́./ Ов у́бо в печа́ли ме́сто, весе́лия о́бразы возвеща́я:/ сей же вме́сто сме́рти, Влады́ку Жизнода́вца пропове́дуя нам./ Те́мже вопие́м Ти:// Благоде́телю всех, Го́споди, сла́ва Тебе́.
На 4: Хвалите Его в тимпане и лице, хвалите Его во струнах и органе.
Стихира: Возлия́ша ми́ра со слеза́ми на гроб Твой жены́,/ и испо́лнишася ра́дости уста́ их,// внегда́ глаго́лати: воскре́се Госпо́дь.
Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.
Стихира: Да похва́лят язы́цы и лю́дие Христа́ Бо́га на́шего,/ во́лею нас ра́ди Крест претерпе́вшаго,/ и во а́де тридне́вновавшаго,/ и да покло́нятся Его́ из ме́ртвых Воскресе́нию,// и́мже просвети́шася всего́ ми́ра концы́.
Слáва Отцу и Сыну и Святóму Духу.
Стихира евангельская, глас 2: С ми́ры прише́дшим я́же с Мари́ею жена́м,/ и недоумева́ющимся,/ ка́ко бу́дет им улучи́ти жела́ние,/ яви́ся ка́мень взят,/ и Боже́ственный ю́ноша утоля́я мяте́ж душ их,/ воста́ бо, глаго́лет, Иису́с Госпо́дь./ Те́мже пропове́дите пропове́дником Его́,/ ученико́м в Галиле́ю тещи́,/ и ви́дети Его́ воскре́сша из ме́ртвых,// я́ко Жизнода́вца и Го́спода.
И ныне и присно и во вéки векóв, аминь.
Глас 2: Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ сме́рть умертви́ся, и мы ожи́хом./ Тем воспева́юще вопие́м:/ благослове́н Христо́с Бог,// благоволи́вши та́ко, сла́ва Тебе́.
Слáва Тебé, показáвшему нам свет.