Димитриевская родительская суббота. Прп. Евфимия Нового, Солунского. УТРЕНЯ (окончание) ЧАС ПЕРВЫЙ
28 октября́ 2023 гóда. Суббóта 21-й седмúцы по Пятидеся́тнице. Димúтрiевская родúтельская суббóта. Преподóбнаго Евфúмiа Нóваго, Солýнскаго. Глас 3. Заупокóйная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( вседнéвная вечéрня), здесь ( ýтреня) здесь ( продолжéнiе ýтрени с канóном)
Хор: Вси святíи, молúте Бóга о нас.
Чтец: Я́коже овчáта приведóстеся заклáвшемуся нас рáди,/ и Божéственныя ли́ки Áнгел испóлнисте рáдости, страстотéрпцы Хрiстóвы./ Тéмже моли́твами вáшими всех утверди́те,// и от врагá врéдныя прéлести всех избáвите.
Хор: Вси святíи, молúте Бóга о нас.
Чтец: Я́ко свети́льницы живóтное слóво имýще,/ просвети́сте дýши, первосвящéнницы Хрiстóвы свящéннейшiи,/ Божéственныя слáвы причáстницы:/ я́ко огнь прiи́мше Дýха преподóбнiи,// стрáсти попали́сте, и и́дольское разжизáнiе погуби́сте.
Хор: Вси святíи, молúте Бóга о нас.
Чтец: Со прорóки святы́ми почти́м преподóбных мнóжество, прéжде закóна, и в закóнѣ возсiя́вших житiéм чи́стым, жен же святы́х ли́ки восхвáлим, и возопiи́м: Гóсподи, моли́твами их спаси́ всѣ́х нас.
Хор: Слáва Отцý и Сы́ну и Святóму Дýху.
Покóин: Погребéнiе Твоé, Хрiстé, и воскресéнiе, всем бысть живóт./ Сегó рáди дерзáюще вопiéм Ти:/ со всéми избрáнными вéрныя, я́же прiя́л еси́ рабы́ Твоя́// упокóй сих согрешéнiя вся прощáя, я́ко Бог Преблаги́й.
Хор: И ны́не и прúсно и во вéки векóв. Амúнь.
Богорóдичен: Стрáшно мéсто сié, возопи́,/ егдá Iáков Твоé воображéнiе в лéствице ви́де, Богорóдице, нелóжне:/ мýчеников слáво, и преподóбных похвалó,// Áнгелов украшéнiе, и всех прорóков, и вéрных спасéнiе.
Катавáсiя (глас 3): На Сiнáйстей горè вúде Тя в купинè Моисéй,/ неопáльно огнь Божествá зачéншую во чрéве:/ Данiúл же Тя вúде гóру несекóмую,/ жезл прозя́бшiй,// Исáiа взывáше от кóрене Давíдова.
Достойно есть
Хор: Достóйно есть я́ко воúстинну блажúти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, поми́луй. (3 рáза)
Ексапостiлáрiй суббóты из Октóиха: И́же и мéртвыми и жи́выми обладáяй я́ко Бог,/ и святы́ми Твои́ми всю зéмлю просвети́вый,// Содéтелю всех, пою́щiя Тя спасáй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен суббóтнего ексапостiлáрiя: Мы о Тебé хвáлимся, Богорóдице,/ и к Бóгу Тя и́мамы Предстáтельство;/ простри́ рýку Твою́ необори́мую/ и сокруши́ враги́ нáша,// Твои́м низпосли́ рабóм пóмощь от Святáго.
ХВАЛИТНЫ
Псалом 148
Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Псалом 149
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными: сотвори́ти в них суд напи́сан. Слáва сiя бýдет всем преподóбным Егó.
Псалом 150
Хвали́те Бóга во святы́х Егó, хвали́те Егó в утвержéнiи си́лы Егó.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Мýченичны Октóиха, глас 3: Святы́х мýченик пáмять,/ прiиди́те, лю́дiе, вси почти́м,/ я́ко позóр бы́ша Áнгелом и человéком/ и побéды венцы́ от Хрiстá прiя́ша,/ и мóлятся о душáх нáших.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Царéй и мучи́телей страх отри́нуша Хрiстóвы вóини,/ и благодерзновéнно и мýжески Тогó исповéдаша,/ вся́ческих Гóспода Бóга и Царя́ нáшего,// и мóлятся о душáх нáших.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: Си́лы святы́х Áнгел удиви́шася му́ченическим страдáнiем,/ я́ко плóтiю смéртною обложéни,/ о му́ках неради́ша, подóбницы бы́вше страстéм Спáса Хрiстá,// и мóлятся о душáх нáших.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Я́ко свети́ла в ми́ре сiя́ете,/ и по смéрти святи́и мýченицы,/ пóдвигом дóбрым подви́гшеся:/ и имýще дерзновéнiе, Хрiстá умоли́те,// поми́ловатися душáм нáшим.
Слáва Отцý и Сы́ну и Святóму Дýху.
Мéртвен Октóиха, глас тóйже: Человéцы, что всýе мятéмся?/ Путь крáток есть, тецéм:/ дым есть житié, пáра, персть и пéпел:/ вмáле явля́ется, и вско́ре погибáет./ Тéмже Хрiстý Безсмéртному Царю́ возопiи́м:/ престáвленныя от нас упокóй,// идéже всех есть веселя́щихся жили́ще у тебé.
И ны́не и прúсно и во вéки векóв, амúнь.
Богорóдичен: Без сéмене зачалá еси́ от Дýха Святáго,/ и славослóвяще воспевáем Тя:// рáдуйся, Пресвятáя Дéво.
Славословие вседневное
Чтец: Слáва Тебè, показáвшему нам свет.
Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя. Благословéн есѝ, Гóсподи, научѝ мя оправдáнiем Твои́м. Благословéн есѝ, Влады́ко, вразумѝ мя оправдáнiем Твои́м. Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри: Тебé подобáет хвалá, Тебé подобáет пéнiе, Тебé слáва подобáет, Отцý, и Сы́ну, и Святóму Дýху, ны́не и при́сно, и во вéки векóв, ами́нь.
Гóсподи, помилуй. (12 раз)
СТИХИРЫ НА СТИХОВНЕ
Мéртвены Октóиха (глас 3): Сла́влю Крест Твой честны́й,/ и́мже живóт дарова́ся,/ и пи́щи наслаждéнiе,/ вéрою и любóвiю Тя пою́щим,/ Еди́не Многоми́лостиве./ Тéмже вопiéм Ти, Хрiстé Бóже:/ преста́вльшiяся от нас упокóй,/ идéже всех есть веселя́щихся жили́ще у Тебé.
Стiх 1: Блажéни, я́же избрáл и прiя́л есù Гóсподи.
Стiхúра: Еди́не Ми́лостиве и Благоутрóбне,/ имéяй непостижи́мую бла́гости пучи́ну,/ свéдый естествó человéческое, éже содéлал еси́:/ Тя́ мóлим, Хрiстé Бóже,/ преста́вленныя от нас упокóй,// идéже есть всех веселя́щихся жили́ще у Тебé.
Стiх 2: Дýши их во благúх водворя́тся.
Стiхúра: Усну́в во грóбе я́ко Человéк,/ си́лою же непобеди́мою я́ко Бог воскреси́л еси́,/ я́же во гробéх спя́щiя, немóлчныя пéсни Тебé принося́щiя./ Тéмже мóлим Тя, Хрiстé Бóже:/ преста́вленныя от нас упокóй,// идéже есть всех веселя́щихся жили́ще у Тебé.
Слáва Отцý и Сыну и Святóму Дýху.
Прп. Евфúмiа, глас 2: Преподóбне óтче,/ из младéнства добродéтель прилéжно испра́вив,/ орга́н был еси́ Свята́го Ду́ха;/ и от Тогó прiéм чудéс дéйство,/ увеща́л еси человéки преоби́дети сла́дкая;/ ны́не же Божéственным свéтом чистéе облиста́ем,/ просвети́ и на́ша помышлéнiя,// óтче Евфи́мiе.
И ныне и прúсно и во вéки векóв. Амúнь.
Богорóдичен Октóиха, глас тóйже : Прiиди́те, Ма́терь Свéта, пéсньми немóлчными зову́ще,/ вси просла́вим,/ Та бо роди Спасéнiе на́ше,/ и ра́дуйся принесéм, я́ко Еди́ной, рóждшей всех Нача́льнейшаго,/ И́же прéжде век Бóга;/ ра́дуйся, Я́же Е́ву па́дшую па́ки назда́вшая;// ра́дуйся, Пречи́стая Дéво, Неискусобра́чная.
Чтец: Блáго есть исповéдатися Гóсподеви, и пéти И҆́мени Твоемý, Вы́шнiй: возвещáти заýтра ми́лость Твою́, и и́стину Твою́ на вся́ку нощь.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Тропáрь, глас 2: Апóстоли, мýченицы и прорóцы,/ святи́телiе, преподóбнiи и прáведнiи,/ дóбре пóдвиг соверши́вшiи и вéру соблю́дшiи,/ дерзновéнiе имýще ко Спáсу,/ о нас Тогó, я́ко Блáга, моли́те// спасти́ся, мóлимся, душáм нáшим.
Слáва Ѻтцý и Сы́ну и Святóму Дýху.
Тропáрь, глас 2: Помянѝ, Гóсподи, я́ко Благ, рабы́ Твоя́,/ и ели́ка в житiѝ согреши́ша, простѝ:/ никтóже бо безгрéшен, тóкмо Ты,// могíй и престáвленным дáти покóй.
И ны́не и прúсно и во вéки векóв. Амúнь.
Богорóдичен, глас 2: Мáти Святáя Неизречéннаго Свéта,/ áнгельскими Тя пéсньми почитáюще,// благочéстно величáем.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
И СРАЗУ ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь, глас 2: Апóстоли, мýченицы и прорóцы,/ святи́телiе, преподóбнiи и прáведнiи,/ дóбре пóдвиг соверши́вшiи и вéру соблю́дшiи,/ дерзновéнiе имýще ко Спáсу,/ о нас Тогó, я́ко Блáга, моли́те// спасти́ся, мóлимся, душáм нáшим.
Слáва Отцý и Сы́ну и Святóму Дýху.
Тропáрь, глас 2: Помянѝ, Гóсподи, я́ко Благ, рабы́ Твоя́,/ и ели́ка в житiѝ согреши́ша, простѝ:/ никтóже бо безгрéшен, тóкмо Ты,// могíй и престáвленным дáти покóй.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Октóиха, глас 8: Со святы́ми упокóй/ Хрїстè, дýши раб Твои́х,/ идéже несть болéзнь, ни печáль,/ ни воздыхáнiе,// но жизнь безконéчная.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу