Димитриевская родительская суббота. Прп. Евфимия Нового, Солунского, глас 3. УТРЕНЯ. КАНОН
28 октября́ 2023 гóда. Суббóта 21-й седмúцы по Пятидеся́тнице. Димúтрiевская родúтельская суббóта. Преподóбнаго Евфúмiа Нóваго, Солýнскаго. Глас 3. Заупокóйная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Твой есмь аз, спаси́ мя, я́ко оправдáнiй Твои́х взыскáх.
Припев: Спáсе, спасù мя. (На каждый стiх)
[Псалом 118 (Вторая статiя)]Менé ждáша грéшницы погуби́ти мя, свидéнiя Твоя́ разумéх. Вся́кiя кончи́ны ви́дех конéц, широкá зáповедь Твоя́ зелó. Коль возлюби́х закóн Твой, Гóсподи, весь день поучéнiе моé есть. Пáче враг мои́х умудри́л мя еси́ зáповедiю Твоéю, я́ко в век моя́ есть. Пáче всех учáщих мя разумéх, я́ко свидéнiя Твоя́ поучéнiе моé есть. Пáче стáрец разумéх, я́ко зáповеди Твоя́ взыскáх. От вся́каго пути́ лукáва возбрани́х ногáм мои́м, я́ко да сохраню́ словесá Твоя́. От судéб Твои́х не уклони́хся, я́ко Ты законоположи́л ми еси́. Коль сладкá гортáни моемý словесá Твоя́, пáче мéда устóм мои́м. От зáповедей Твои́х разумéх, сегó рáди возненави́дех всяк путь непрáвды. Свети́льник ногáма мои́ма закóн Твой, и свет стезя́м мои́м. Кля́хся и постáвих сохрани́ти судьбы́ прáвды Твоея́. Смири́хся до зелá, Гóсподи, живи́ мя по словеси́ Твоемý. Вóльная уст мои́х благоволи́ же, Гóсподи, и судьбáм Твои́м научи́ мя. Душá моя́ в рукý Твоéю вы́ну, и закóна Твоегó не забы́х. Положи́ша грéшницы сеть мне, и от зáповедей Твои́х не заблуди́х. Наслéдовах свидéнiя Твоя́ во век, я́ко рáдованiе сéрдца моегó суть. Приклони́х сéрдце моé сотвори́ти оправдáнiя Твоя́ в век за воздая́нiе. Законопрестýпныя возненави́дех, закóн же Твой возлюби́х. Помóщник мой и Застýпник мой еси́ Ты, на словесá Твоя́ уповáх. Уклони́теся от менé лукáвнующiи, и испытáю зáповеди Бóга моегó. Заступи́ мя по словеси́ Твоемý, и жив бýду, и не посрами́ менé от чáянiя моегó. Помози́ ми, и спасýся, и поучýся во оправдáнiих Твои́х вы́ну. Уничижи́л еси́ вся отступáющiя от оправдáнiй Твои́х, я́ко непрáведно помышлéнiе их. Преступáющiя непщевáх вся грéшныя земли́, сегó рáди возлюби́х свидéнiя Твоя́. Пригвозди́ стрáху Твоемý плóти моя́, от судéб бо Твои́х убоя́хся. Сотвори́х суд и прáвду, не предáждь менé оби́дящим мя. Воспрiими́ рабá Твоегó во блáго, да не оклеветáют менé гóрдiи. Óчи мои́ исчезóсте во спасéнiе Твоé, и в слóво прáвды Твоея́. Сотвори́ с рабóм Твои́м по ми́лости Твоéй, и оправдáнiем Твои́м научи́ мя. Раб Твой есмь аз: вразуми́ мя, и увéм свидéнiя Твоя́. Врéмя сотвори́ти Гóсподеви: разори́ша закóн Твой. Сегó рáди возлюби́х зáповеди Твоя́ пáче злáта и топáзiя. Сегó рáди ко всем зáповедем Твои́м направля́хся, всяк путь непрáвды возненави́дех. Ди́вна свидéнiя Твоя́, сегó рáди испытá я́ душá моя́. Явлéнiе словéс Твои́х просвещáет и вразумля́ет младéнцы. Устá моя́ отверзóх, и привлекóх дух, я́ко зáповедей Твои́х желáх. При́зри на мя и поми́луй мя, по судý лю́бящих и́мя Твоé. Стопы́ моя́ напрáви по словеси́ Твоемý, и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просвети́ на рабá Твоегó, и научи́ мя оправдáнiем Твои́м. Исхóдища воднáя изведóсте óчи мои́, понéже не сохрани́х закóна Твоегó. Прáведен еси́, Гóсподи, и прáви суди́ Твои́. Заповéдал еси́ прáвду свидéнiя Твоя́, и и́стину зелó. Истáяла мя есть рéвность Твоя́, я́ко забы́ша словесá Твоя́ врази́ мои́. Разжжéно слóво Твоé зелó, и раб Твой возлюби́ é. Юнéйшiй аз есмь и уничижéн, оправдáнiй Твои́х не забы́х. Прáвда Твоя́ прáвда во век, и закóн Твой и́стина. Скóрби и нýжды обретóша мя, зáповеди Твоя́ поучéнiе моé. Прáвда свидéнiя Твоя́ в век, вразуми́ мя, и жив бýду. Воззвáх всем сéрдцем мои́м, услы́ши мя, Гóсподи, оправдáнiя Твоя́ взыщу́. Воззвáх Ти, спаси́ мя, и сохраню́ свидéнiя Твоя́. Предвари́х в безгóдiи и воззвáх, на словесá Твоя́ уповáх. Предвари́сте óчи мои́ ко ýтру, поучи́тися словесéм Твои́м. Глас мой услы́ши, Гóсподи, по ми́лости Твоéй: по судьбé Твоéй живи́ мя. Прибли́жишася гоня́щiи мя беззакóнiем, от закóна же Твоегó удали́шася. Близ еси́ Ты, Гóсподи, и вси путié Твои́ и́стина. Испéрва познáх от свидéнiй Твои́х, я́ко в век основáл я́ еси́. Виждь смирéнiе моé и изми́ мя, я́ко закóна Твоегó не забы́х. Суди́ суд мой и избáви мя, словесé рáди Твоегó живи́ мя. Далéче от грéшник спасéнiе, я́ко оправдáнiй Твои́х не взыскáша. Щедрóты Твоя́ мнóги, Гóсподи, по судьбé Твоéй живи́ мя. Мнóзи изгоня́щiи мя и стужáющiи ми, от свидéнiй Твои́х не уклони́хся. Ви́дех неразумевáющiя и истáях, я́ко словéс Твои́х не сохрани́ша. Виждь, я́ко зáповеди Твоя́ возлюби́х, Гóсподи, по ми́лости Твоéй живи́ мя. Начáло словéс Твои́х и́стина, и во век вся судьбы́ прáвды Твоея́. Кня́зи погнáша мя тýне, и от словéс Твои́х убоя́ся сéрдце моé. Возрáдуюся аз о словесéх Твои́х, я́ко обретáяй коры́сть мнóгу. Непрáвду возненави́дех и омерзи́х, закóн же Твой возлюби́х. Седмери́цею днем хвали́х Тя о судьбáх прáвды Твоея́. Мир мног лю́бящим закóн Твой, и несть им соблáзна. Чáях спасéнiя Твоегó, Гóсподи, и зáповеди Твоя́ возлюби́х. Сохрани́ душá моя́ свидéнiя Твоя́ и возлюби́ я́ зелó. Сохрани́х зáповеди Твоя́ и свидéнiя Твоя́, я́ко вси путié мои́ пред Тобóю, Гóсподи. Да прибли́жится молéнiе моé пред Тя, Гóсподи, по словеси́ Твоемý вразуми́ мя. Да вни́дет прошéнiе моé пред Тя, Гóсподи, по словеси́ Твоемý избáви мя. Отры́гнут устнé мои́ пéнiе, егдá научи́ши мя оправдáнiем Твои́м. Провещáет язы́к мой словесá Твоя́, я́ко вся зáповеди Твоя́ прáвда. Да бýдет рукá Твоя́ éже спасти́ мя, я́ко зáповеди Твоя́ извóлих. Возжелáх спасéнiе Твоé, Гóсподи, и закóн Твой поучéнiе моé есть. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х.
По непорочных тропари глас 5
Благословéн есù, Гóсподи,/научù мя оправдáнiем Твоúм. (Пс.118:12)
Святы́х лик обрéте истóчник жи́зни и дверь рáйскую,/ да обря́щу и аз путь покая́нiем:/ поги́бшее овчá аз есмь,// воззови́ мя Спáсе, и спаси́ мя.
Благословéн есù, Гóсподи,/научù мя оправдáнiем Твоúм.
Áгнца Бóжiя проповéдавше,/ и заклáни бы́вше я́коже áгнцы,/ и к жи́зни нестарéемей святíи,/ и присносýщней престáвльшеся./ Тогó прилéжно мýченицы моли́те,// долгóв разрешéнiе нам даровáти.
Благословéн есù, Гóсподи,/научù мя оправдáнiем Твоúм.
В путь ýзкiй хóждшiи прискóрбный,/ вси в житiи́ крест я́ко ярéм взéмшiи,/ и Мне послéдовавшiи вéрою,/ прiиди́те наслади́теся,/ и́хже уготóвах вам пóчестей,// и венцóв небéсных.
Благословéн есù, Гóсподи,/научù мя оправдáнiем Твоúм.
Óбраз есмь неизречéнныя Твоея́ слáвы,/ áще и я́звы ношý прегрешéнiй:/ ущéдри Твоé создáнiе Влады́ко,/ и очи́сти Твои́м благоутрóбiем,/ и возжелéнное отéчество подáждь ми,// рая́ пáки жи́теля мя сотворя́я.
Благословéн есù, Гóсподи,/научù мя оправдáнiем Твоúм.
Дрéвле ýбо от не сýщих создáвый мя,/ и óбразом Твои́м Божéственным почты́й,/ преступлéнiем же зáповеди/ пáки мя возврати́вый в зéмлю, от нея́же взят бых,/ на éже по подóбiю возведи́// дрéвнею добрóтою возобрази́тися.
Благословéн есù, Гóсподи,/научù мя оправдáнiем Твоúм.
Упокóй Бóже рабы́ Твоя́,/ и учини́ я в раи́,/ идéже ли́цы святы́х Гóсподи,/ и пра́ведницы сiя́ют я́ко свети́ла,/ усóпшiя рабы́ Твоя́ упокóй,/ презирáя их вся согрешéнiя.
Слáва Отцý и Сыну и Святóму Дýху.
Трисiя́тельное еди́наго Божествá, благочéстно поéм вопiю́ще:/ Свят еси́ Óтче Безначáльный,/ Собезначáльный Сы́не, и Божéственный Дýше:/ просвети́ нас вéрою Тебé служáщих,// и вéчнаго огня́ исхити́.
И ныне и прúсно и во вéки векóв. Амúнь.
Рáдуйся Чи́стая, Бóга плóтiю рóждшая во спасéнiе всех,/ Е́юже род человéческiй обрéте спасéнiе:/ Тобóю да обря́щем рай,// Богорóдице Чи́стая благословéнная.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помилуй. (12 раз)
Гóсподи, помилуй. (40 раз)
СЕДАЛЕН, ГЛАС 5
Покóй Спáсе наш,/ с прáведными рабы́ Твоя́,/ и сiя́ всели́ во дворы́ Твоя́,/ я́коже есть пи́сано:/ презирáя я́ко благ прегрешéнiя их/ вóльная и невóльная,// и вся я́же в вéденiи и не в вéденiи, Человеколю́бче.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
От Дéвы возсiя́вый мíру Хрїстé Бóже,// и сы́ны свéта Тóю показáвый, поми́луй нас.
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
КАНОН ПРЕПОДОБНОГО, ГЛАС 2
(совмещéнный с канóном Октóиха, глас 3)
ПЕСНЬ 1
Iрмóс: Грядúте, лю́дiе,/ поúм песнь Хрїстý Бóгу,/ раздéльшему мóре и настáвльшему лю́ди,/ я́же изведè из рабóты егúпетскiя,// я́ко прослáвися. (Двáжды)
Хор (припéв): Преподóбне óтче Евфúмiе, молù Бóга о нас.
Чтец (тропáрь): Рáдуйся, истóчниче, кипя́щiй струю́ спаси́тельную,/ от нея́же почерпáем вси целéбную благодáть прегрешéнiй,// любóвiю приходя́щим тебè, приснопáмятне. (Двáжды)
Хор: Преподóбне óтче Евфúмiе, молù Бóга о нас.
Чтец: Святы́ню прiéм от Хрїстá Бóга, от утрóбы, слáвне,/ и яви́лся еси́ избрáнный сосýд,// Дýха благодáть всю прiéмый, óтче Евфи́мiе. (Двáжды)
Хор: Преподóбне óтче Евфúмiе, молù Бóга о нас.
Чтец: Да жи́зни причáстник нетлéнный яви́шися,/ врéменныя, óтче премýдре, небрéгл еси́:// и Бóгу пристýпль, непрестáнно мóлиши спасти́ся всем нам.
Хор: Пресвятáя Богорóдице, спасù нас.
Богорóдичен: Глагóлу мýдрому Твои́х устéн послéдующе,/ рáдующеся, Пренепорóчная, Тя ублажáем,// бы́вшую нам винý неизречéннаго блажéнства.
Канон Октоиха, глас 3
Iрмóс: Дúвно, слáвно творя́й чудесá ты есù Бóже, бéздну оземленúвый, и колеснúцы потопúвый, и лю́ди спасы́й пою́щыя тебè, я́ко Царю́ нáшему и Бóгу.
Хор: Вси святíи, молúте Бóга о нас.
Чтец: Мучéнiя слáву, премýдрiи, обретóсте вси страдáльцы,/ мучéнiя многообрáзная дóблественне претерпéсте, страстотéрпцы:// тéмже слáвими естè при́сно.
Хор: Вси святíи, молúте Бóга о нас.
Чтец: Превы́шшiй имýще живóт яви́стеся Божéственнiи служи́телiе,/ премýдрiи священнотаи́нницы воплóщшагося слóва,// упáсше дóбре Госпóдне стáдо си́лою Божéственною.
Хор: Вси святíи, молúте Бóга о нас.
Чтец: Распéншеся мíрови преподóбнiи, плотски́х всѣ́х сластéй отвергóстеся, и сосýди Дýха я́вльшеся, дýхи прелéстныя божéственною си́лою погуби́сте вкýпѣ.
Хор: Слáва Отцý и Сы́ну и Святóму Дýху.
Покóин: И́же от земли́ повелéнiем Твои́м, Гóсподи,/ вéрою благочéстною щéдре престáвльшiяся,// жи́зни безконéчныя и свéта невечéрняго сподóбив, упокóй я́ко благ.
Хор: И ны́не и прúсно и во вéки векóв. Амúнь.
Богорóдичен: Я́ко Бóга рóждшую плóтiю, Пречи́стая,/ нрáвом благочéстным чтим Тя непрестáнно,/ с честны́ми женáми, постóм просiя́вшими,// и страдáньми врагá низложи́вшими.
ПЕСНЬ 3
Iрмóс: На кáмени мя веры утвердúв,/ разширúл есù устá моя́ на врагù моя́./ Возвеселù бо ся дух мой, внегдá пéти:/ несть свят, я́коже Бог наш,// и несть прáведен, пáче Тебè, Гóсподи.(Двáжды)
Хор: Преподóбне óтче Евфúмiе, молù Бóга о нас.
Чтец: Всесвéтлый показáлся еси́, Богомýдре, столп,/ наставля́я чи́ны монáшествующих,/ óблак же, осеня́ющь жрéбiй Бóжiй,// ли́ца неви́димых врагóв помрачáющь благодáтiю Всецаря́.(Двáжды)
Хор: Преподóбне óтче Евфúмiе, молù Бóга о нас.
Чтец: Стои́ши пред лицéм твоегó Влады́ки, неослáбным мановéнiем моля́ся/ избáвитися стáду твоемý от рабóты тьмы, преподóбне, и мучи́тельства страстéй,// и твои́х моли́тв послýшает Бог. (Двáжды)
Хор: Преподóбне óтче Евфúмiе, молù Бóга о нас.
Чтец: Плóти твоея́ двизáнiя умертви́в крéпким пощéнiем, Богоглагóльниче,/ был еси́ оби́телище Влады́ки.// Егóже умоли́ избáвитися скорбéй и страстéй смущéнiя к тебè прибегáющим.
Хор: Пресвятáя Богорóдице, спасù нас.
Богорóдичен: Сви́ток Тя прови́де Исáiя, в нéмже плóтски Слóво знáменася,/ раздрáв начертáнiе первоздáннаго, éже преступлéнiем подписá,// и подадè оставлéнiе рабóты нам.
Глас 3
Iрмóс: Неплóдная душè и безчáдная,/ стяжù плод благослáвный,/ веселя́щися возопíй:/ утвердúхся Тобóю, Бóже,// несть свят, несть прáведен, пáче Тебè, Гóсподи.
Хор: Вси святíи, молúте Бóга о нас.
Чтец: Си́лою Бóжiею укрепля́еми мýченицы слáвнiи,/ пагуборóдную си́лу, и́же в злóбе си́льнаго врагá, до концá погуби́сте,// и побéдныя прiя́сте Божéственныя венцы́.
Хор: Вси святíи, молúте Бóга о нас.
Чтец: И́же преподóбныя, Влады́ко, яви́л еси́ врагá победи́тели,/ и святи́тели помáзанiем пресвяты́м освяти́вый Хрїстè,// тех мольбáми освяти́ и просвети́ пою́щiя Тя.
Хор: Вси святíи, молúте Бóга о нас.
Чтец: Со прорóки всѣ́ми восхвáлим жен божéственных лик, я́же в постè просiя́вшыя, и вѣ́рою пострадáвшыя, и многокóзненнаго змíя попрáвшыя.
Хор: Слáва Отцý и Сы́ну и Святóму Дýху.
Покóин: И́хже от нас престáвил еси́ Божéственною вóлею, Хрїстè,/ со святы́ми учини́, я́же в житiи́ презрéв, Щéдре, тех прегрешéнiя, мóлимся,// моли́твами святы́х Твои́х.
Хор: И ны́не и прúсно и во вéки векóв. Амúнь.
Богорóдичен: И́же спасéни, Пречи́стая, Твои́м святы́м Рождествóм,/ глас Гаврiи́лов вопiéм Ти вéрно, éже рáдуйся,// и мóлимся: Твои́ми моли́твами, прегрешéнiй прощéнiе всем нам испроси́.
Катавáсiя (глас 3): Неплóдная душè и безчáдная,/ стяжù плод благослáвный,/ веселя́щися возопíй:/ утвердúхся Тобóю, Бóже,// несть свят, несть прáведен, пáче Тебè, Гóсподи.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прп. Евфúмiа, глас 3: Волнéнiй мнóжества невлáжно преходя́,/ безплóтныя врагѝ струя́ми слез твои́х/ крéпко погрузи́л есѝ,/ Богомýдре Евфи́мiе преподóбне:/ и, чудéс дар прiéм,/ исцеля́еши стрáсти вся́кiя,// моли́ непрестáнно о всех нас.
Íкос: Отвéрзи моя́ устá, треблажéнне,/ благопрiя́тными твои́ми моли́твами предстоя́ Бóгу, всеслáвне Евфи́мiе:/ да воспою́ Божéственное твоè житiè и возглагóлю достóйно добродéтели твоя́,/ я́же на землѝ Хрїстá рáди Бóга соверши́л есѝ преподóбно./ Столп бо яви́лся есѝ и прáвило монáхов светлéйшее, равноáнгельное стяжáв житiè,// в нехóдная и́стинно всели́вся, моли непрестáнно о всех нас.
Седáлен прп. Евфúмiа, глас 8: Отрéкся плóти Хрїстá рáди/ и духóвный яви́вся народоводи́тель,/ услы́шал есѝ словесá тáйных учéнiй;/ монáхов же яви́лся есѝ прáвило прáвости/ и стрáсти вся крéпко попрáл есѝ./ Тем и дéмонов ковáрство до концá испепели́л есѝ;/ к Немý зря всегдá, Богонóсе Евфи́мiе,/ молѝ Хрїстá Бóга грехóв оставлéнiе даровáти// чтýщим любóвiю святýю пáмять твою́.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 8: Сóлнца óблаче разýмнаго,/ Божéственнаго Свéта Свети́льниче златоковáнный,/ Несквéрная, Неблáзная, Всенепорóчная Влады́чице,/ омрачéнную дýшу мою́ ослеплéнiем страстéй,/ безстрáстiя зарéю просветѝ, молю́ся;/ и осквернéнное моé сéрдце омы́й потóки умилéнiя, покая́нiя же слезáми,/ и от тимéнiя мя очи́сти дел мои́х,/ да любóвiю зовý Ти:/ Богорóдице Приснодéво, молѝ Хрїстá Бóга прегрешéнiй оставлéнiе подáти ми,// Тебè бо имéю надéжду, раб Твой.
ПЕСНЬ 4
Iрмóс: Пою́ Тя, слýхом бо, Гóсподи, услы́шах и ужасóхся,/ до менè бо úдеши, мене ищá заблýждшаго./ Тем мнóгое Твоè снизхождéнiе, éже на мя,// прославля́ю, Многомúлостиве.(Двáжды)
Хор: Преподóбне óтче Евфúмiе, молù Бóга о нас.
Чтец: Желáнiе Божéственное тя распалѝ, разгрéяв твоè сéрдце,/ и желáнная пости́гл есѝ до концá, Богомýдре óтче,/ остáвль земны́х пристрáстiе,// единосéльник Вы́шних быв служи́телей. (Двáжды)
Хор: Преподóбне óтче Евфúмiе, молù Бóга о нас.
Чтец: Ласкáнiя сопрýжницы, преподóбне, попрáл есѝ всеобрáзно;/ вни́де бо рачéнiе Содéтеля в тя, Богомýдре, тéпле,// и содéянных мрáчная желáнiя до концá отри́ну.(Двáжды)
Хор: Преподóбне óтче Евфúмiе, молù Бóга о нас.
Чтец: На пáжить чи́сту возгнáл есѝ воздержáнiя стáдо твоè, óтче,/ и ко истóчнику привéл есѝ тóе немýтному безстрáстiя,/ мы́сленныя звéри побеждáя,// éже и ны́не моли́твами твои́ми спасáй.
Хор: Пресвятáя Богорóдице, спасù нас.
Богорóдичен: Се Тебè рóди слáвят родóв, я́коже прореклá есѝ, Отрокови́це:/ Создáтеля бо былá есѝ палáта и Божéственный храм,/ в нéмже всели́ся Высочáйшiй, плóтiю облóжся,// да спасéт нас.
Глаc 3
Iрмóс: Прiосѣнéнную гóру Аввакýм прозря́ше пречúстую твою́ утрóбу чúстая./ Тѣм взывáше: от ю́га прiúдет Бог,/ и Святы́й от горы́ прiосѣнéнныя чáщи.
Хор: Вси святíи, молúте Бóга о нас.
Чтец: Я́коже овчáта приведóстеся вси/ вóлею заклáвшеся я́коже áгнцы, мýдрiи страдáльцы,/ Áгнцу на Дрéве Крéстнем благоизвóлившему// Бóжiю Слóву заклáтися за род человéческiй.
Хор: Вси святíи, молúте Бóга о нас.
Чтец: Со преподóбными почти́м благослáвныя первосвящéнники,/ свети́льники бы́вшiя вéрным:/ éреси же разруши́вшiя, и страстéй тьму глубóкую,// и к Незаходи́мому Свéту вéрою прелóжшiяся.
Хор: Вси святíи, молúте Бóга о нас.
Чтец: Красотóю словéс, богоглáснiи прорóцы просвѣщáют вѣ́рных дýшы, пóдвигов же свѣтлостьмѝ, и чудéс востóками озаря́ют сердцá богонóсныя жены́.
Хор: Слáва Отцý и Сы́ну и Святóму Дýху.
Покóин: И́же житiè остáвльшiя, преми́рней слáве причáстники покажѝ, Слóве Бóжiй,/ прегрешéнiй избавлéнiе сим дáруяй Блáже,// я́же содéяша на землѝ в рáзуме и не в рáзуме.
Хор: И ны́не и прúсно и во вéки векóв. Амúнь.
Богорóдичен: Мýчеников слáву, святи́телей и преподóбных Божéственное удобрéнiе,/ и вéрных утверждéнiе, прорóков оглашéнiе,// Всепéтую воспои́м Госпóдню Мáтерь.
ПЕСНЬ 5
Iрмóс: Просвещéнiе во тьме лежáщих,/ спасéнiе отчáянных, Хрїстè Спáсе мой;/ к Тебè ýтренюю, Царю́ мúра,/ просветù мя сiя́нiем Твоúм;// инóго бо, рáзве Тебè, бóга не знáю. (Двáжды)
Хор: Преподóбне óтче Евфúмiе, молù Бóга о нас.
Чтец: Весь Бóгу прилежá, óтче,/ в пусты́нях мраз нощны́й претерпéл есѝ дóблественне,/ и дневны́й нося́ вар;/ и был есѝ дом мýдрости Бóжiя/ добродéтельным сiя́нiем многообрáзно украшáем. (Двáжды)
Хор: Преподóбне óтче Евфúмiе, молù Бóга о нас.
Чтец: Ю́ношески наступи́в на пощéнiе,/ чревонеи́стовства змíя не прiéм совéтника, óтче,/ но áлчбою, и моли́твами непрестáнными,/ и чистотóю соедини́вся Бóгу,// причáстник был есѝ слáдости лýчшiя. (Двáжды)
Хор: Преподóбне óтче Евфúмiе, молù Бóга о нас.
Чтец: Добродéтелей возшéд на óблаки,/ скрижáли прiя́л есѝ, блажéнне, напи́санныя рукóю Бóжiею,/ и монáшествующих мнóжества научи́л есѝ/ вещéственных всех ошáятися,// возводя́ на гóру Божéственнаго познáнiя.
Хор: Пресвятáя Богорóдице, спасù нас.
Богорóдичен: Яви́лася есѝ, Чи́стая, Богопрáотцу лéствица небесè высочáе,/ имýщи Создáтеля седя́ща./ Из Тебè бо Бог, воплóщся, показáся и совокупѝ разстоя́щаяся прéжде.// Тем Тя Богорóдицу вéрнiи слáвим.
Глаc 3
Iрмóс: Свѣ́том твоúм невечéрним Хрїстè/ озарù Бóже смирéнную мою́ дýшу,/ и настáви на страх твой,/ занè свѣт повелѣ́нiя твоя́.
Хор: Вси святíи, молúте Бóга о нас.
Чтец: Рáны вáша и я́звы, врагý ýбо яви́шася я́звы неисцéльныя:// я́звы же ны́не исцеля́ют всех вéрных страдáльцы Госпóдни.
Хор: Вси святíи, молúте Бóга о нас.
Чтец: Воспои́м преподóбных мнóжество, и ублажи́м святи́тели Хрїстóвы,/ и почти́м прорóки Егó,// ны́не о нас при́сно моля́щiяся.
Хор: Вси святíи, молúте Бóга о нас.
Чтец: Бóга воплóщшася нас рáди, лю́бящя всеслáвныя жены́, нрáвом прáвым пострадáвшя, и пости́вшяся, на Небесѣ́х ны́нѣ пребывáют.
Хор: Слáва Отцý и Сы́ну и Святóму Дýху.
Покóин: В рáйстей, Гóсподи, пи́щи, во странé живы́х,/ Хрїстè, идéже сiя́ет Твой свет,// вселѝ я́же престáвил есѝ от землѝ, вéрныя Твоя́ рабы́.
Хор: И ны́не и прúсно и во вéки векóв. Амúнь.
Богорóдичен: Из Тебè, Пречи́стая, Бог воплоти́ся,/ и вы́шшую Тя Áнгел показá ны́не,/ твáрей же всех преимýщую, Влады́чице:// тéмже Тя воспевáем.
ПЕСНЬ 6
Iрмóс: Ко Гóсподу от кúта Ióна возопù:/ Ты мя возведù из глубины́ áда, молю́ся;/ да я́ко Избáвителю, во глáсе хвалéнiя,// úстины же дýхом пожрý Тебè. (Двáжды)
Хор: Преподóбне óтче Евфúмiе, молù Бóга о нас.
Чтец: Пострекáемь Влады́чнею любóвiю,/ остáвил есѝ вся чýвственная/ и Томý послéдовал есѝ,/ на рáмена и́го лéгкое взем мýжески благодýшiя,// тезоимените. (Двáжды)
Хор: Преподóбне óтче Евфúмiе, молù Бóга о нас.
Чтец: Накáзан неизречéнных знáнiю, блажéнне,/ научи́л есѝ твоè стáдо Небéсная мýдрствовати// и страстéй нашéствiя отгоня́ твои́ми поучéньми. (Двáжды)
Хор: Преподóбне óтче Евфúмiе, молù Бóга о нас.
Чтец: Житiè твоè подóбно Вы́шних сил, óтче, бысть,/ дерзновéнiе тебè дадè, éже держáл есѝ всегдá,// страстéй избáвити твоè стáдо Хрiстá умолѝ.
Хор: Пресвятáя Богорóдице, спасù нас.
Богорóдичен: Разумéв Твоè неизречéнное, Чи́стая, тáинство,/ гóру приосенéнную Аввакýм Тя провозвестѝ;/ из Тебè бо Содéтель за милосéрдiе воплóщся,// дрéвнее отъя́т изречéнiе.
Глаc 3
Iрмóс: Глубинá страстéй востá на мя/, и бýря протúвных вéтров:/ но предварúв мя Ты спасù, Спáсе,/ и избáви от тли, я́ко спасл есù// от звéря прорóка.
Хор: Вси святíи, молúте Бóга о нас.
Чтец: Свети́льники честны́я цéркве,/ Áгнца и Пáстыря свящéннейшiи всеслáвнiи Хрiстóвы страдáльцы// да почтýтся свящéнными пéсньми.
Хор: Вси святíи, молúте Бóга о нас.
Чтец: Вознесéся преподóбных собóр вознесы́й Бóга во смирéнiи:/ и прослáвися мнóжество святи́телей в дéлех дóбрых,// прослáвивших Святýю Трóицу.
Хор: Вси святíи, молúте Бóга о нас.
Чтец: Чудéс показáнiи божéственных, и болѣ́зней терпѣ́нiем совершéнным, беззакóннующих враг, свящéнных жен лик уязви́, мýжески дóблествовавше.
Хор: Слáва Отцý и Сы́ну и Святóму Дýху.
Покóин: В вéре и́хже от землѝ прiя́л есѝ,/ святы́х сопричтѝ собóром, и в нéдрех вéрнаго Авраáма учинѝ, Хрiстè,// при́сно слáвити Твоè мнóгое благоутрóбiе.
Хор: И ны́не и прúсно и во вéки векóв. Амúнь.
Богорóдичен: Мýчеников, прорóков и преподóбных,/ и всех от вéка прáведных похвалá, Ты есѝ, Пречи́стая:// тéмже глáсы я́ве рáдостными чтим Тя с ни́ми, Богорóдице.
Катавáсiя (глас 3): Глубинá страстéй востá на мя/, и бýря протúвных вéтров:/ но предварúв мя Ты спасù, Спáсе,/ и избáви от тли, я́ко спасл есù// от звéря прорóка.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Октóиха, глас 8: Со святы́ми упокóй/ Хрїстè, дýши раб Твои́х,/ идéже несть болéзнь, ни печáль,/ ни воздыхáнiе,// но жизнь безконéчная.
Íкос: Сам еди́н есѝ безсмéртный,/ сотвори́вый и создáвый человéка:/ земнíи ýбо от землѝ создáхомся,/ и в зéмлю тýюжде пóйдем,/ я́коже повелéл есѝ, создáвый мя и рекíй ми:/ я́ко земля́ есѝ, и в зéмлю оты́деши:/ áможе вси человéцы пóйдем,/ надгрóбное рыдáнiе, творя́ще песнь:// аллилýїя.
ПЕСНЬ 7
Iрмóс: Купинá в горè огненеопáльная/ и росонóсная пещь халдéйская,/ я́ве предписá Тя, Богоневéсто;/ Божéственный бо Невещéственный/ в вещéственнем чрéве Огнь неопáльно прiя́ла есù./ Тéмже из Тебè Рóждшемуся// поéм: благословéн есù, Бóже отéц нáших. (Двáжды)
Хор: Преподóбне óтче Евфúмiе, молù Бóга о нас.
Чтец: Авраáмскiй стяжáв нрав, премýдре,/ от землѝ твоея́ пресéльник быв,/ и Бóга узрéл есѝ, обещавáюща ти воздая́нiе богáтно./ Тем, веселя́ся, усéрдно пел есѝ:// благословéн есѝ, Бóже отéц нáших. (Двáжды)
Хор: Преподóбне óтче Евфúмiе, молù Бóга о нас.
Чтец: Распаля́ем дýхом, преподóбне,/ кóзни врáжiя разори́л есѝ/ и побéды одолéнiя взял есѝ,/ орýжiем ограждéн нас рáди пригвозди́вшагося на Крестè Влады́ки./ Тем, веселя́ся, усéрдно пел есѝ:// благословéн есѝ, Бóже отéц нáших. (Двáжды)
Хор: Преподóбне óтче Евфúмiе, молù Бóга о нас.
Чтец: К горè моли́твы приступи́л есѝ,/ и, вшед во óблак Дýха, Бóжiя зáдняя ви́дел есѝ,/ и, слáву прiéм разсуждéнiя, быв, óтче, столп непоколеби́м.// Тем прилéжно молѝ избáвитися искушéнiя врáжiя пою́щим тя.
Хор: Пресвятáя Богорóдице, спасù нас.
Богорóдичен: Закóна Исполни́теля родилá есѝ,/ прéжде век Гóспода вся́ческих, / Сы́на, Мýдрость же и Си́лу,/ напослéдок, Пречи́стая, преестéственно плóтiю на обновлéнiе земны́м./ Тем благочéстно, Дéво Чи́стая,// благословéн, из Тебè Рóждшемуся зовéм, Бóже отéц нáших.
Глаc 3
Iрмóс: Трiè óтроцы в пещù Трóицу прообразúвше,/ прещéнiе óгненное попрáша,/ и пою́ще вопiя́ху:/ благословéн есù Бóже отéц нáших.
Хор: Вси святíи, молúте Бóга о нас.
Чтец: Стоя́ще посредè огня́, преслáвнiи страстотéрпцы Госпóдни,/ Божéственную рóсу прiимáсте с небесè,// и умертви́вшеся мýками, многокóзненнаго врагá мéртва содéласте.
Хор: Вси святíи, молúте Бóга о нас.
Чтец: Божéственнiи святи́телiе, я́ко корáбль испрáвивше Цéрковь Хрiстóву,/ непотопля́ему ту соблюдóша,// прéлести избéгше вои́стинну злых волн.
Хор: Вси святíи, молúте Бóга о нас.
Чтец: Умертви́вше плоть свящéнными пóдвиги пóстницы и́стиннiи, безстрáстiя наслѣ́довасте живóт несостарѣ́ющiйся, пою́ще: благословéн есѝ Гóсподи Бóже отéц нáших.
Хор: Слáва Отцý и Сы́ну и Святóму Дýху.
Покóин: Не покажѝ пови́нны на судè рабы́ Твоя́,/ я́же престáвил есѝ вéрныя,// но упокóй, Слóве, во свéтлости святы́х Твои́х, пéти благоутрóбiе Твоè.
Хор: И ны́не и прúсно и во вéки векóв. Амúнь.
Богорóдичен: Мýчеников и преподóбных, и прорóков, Всенепорóчная,/ и святы́х жен, и всех первосвящéнников священнопожи́вших,// ты есѝ слáва вои́стинну, с ни́миже чтим тя.
ПЕСНЬ 8
Iрмóс: В пещь óгненную, ко отрокóм еврéйским снизшéдшаго/ и плáмень в рóсу прелóжшаго Бóга,/ пóйте делá я́ко Гóспода// и превозносúте во вся вéки.
Хор: Преподóбне óтче Евфúмiе, молù Бóга о нас.
Чтец: Слез твои́х течéньми огнепáльныя слáсти испепели́л есѝ,/ геéнскаго плáмене страх отгнáл есѝ, óтче мýдре,/ совершéнною любóвiю Создáтеля твоегó сраствори́вся стрáхом,// во вся вéки. (Двáжды)
Хор: Преподóбне óтче Евфúмiе, молù Бóга о нас.
Чтец: Я́коже Енóх к Бóгу престáвлься, от Негó прiя́т был есѝ, óтче,/ и, с Вы́шними ли́ки водворя́яся, поéши:/ вся делá Гóспода пóйте// и превозноси́те во вся вéки. (Двáжды)
Хор: Преподóбне óтче Евфúмiе, молù Бóга о нас.
Чтец: Ны́не нетлéнных дарóв наслаждáяся и трисóлнечныя свéтлости исполняя́ся, блажéнне,/ певцы́ твоя́ страстéй и тьмы моли́твами избáви,// да достóйно Хрiстá славослóвим.
Хор: Пресвятáя Богорóдице, спасù нас.
Богорóдичен: Кля́тву разреши́ла есѝ дрéвнюю, Пречи́стая, земны́х,/ неизречéнным слóвом Бóга зачéнши,/ воплощéнна из Тебè за милосéрдiе, Пренепорóчная Влады́чице.// Егóже превознóсим во вéки.
Глаc 3
Iрмóс: Áнгельми немóлчно в вы́шних слáвимаго Бóга,/ небесá небéс, земля́, и гóры, и хóлми, и глубинá,/ и весь род человéческiй,/ пéсньми Тогó я́ко Создáтеля и Избáвителя благословúте,// и превозносúте во вся вéки.
Хор: Вси святíи, молúте Бóга о нас.
Чтец: Нанесéнiем ран, и болéзней приложéньми обдержи́ми зелó,/ не отвергóстеся и́стиннаго животá,// Госпóдни страстотéрпцы, ни истукáнным подáсте пóчести, прéлести лукáвей.
Хор: Вси святíи, молúте Бóга о нас.
Чтец: Свети́ла, я́коже на свéщницех положéни,/ честны́х добродéтелей, всех озари́сте дýши,/ вся́ку тьму отгнáвше страстотéрпцы священнодéйственнiи,// небéсным умовóм сожи́телiе.
Хор: Вси святíи, молúте Бóга о нас.
Чтец: Достохвáльнiи прорóцы, и преподóбных сослóвiе, и жен всѣ́х благоговѣ́йных мнóжество достослáвное, да воспоéтся достóйно, о нас моля́щеся Спасý и Бóгу.
Хор: Благословúм Отцá, и Сы́на, и Святáго Дýха, Гóспода.
Покóин: Ты и́же живы́ми обладáяй, я́же от землѝ престáвил есѝ вéрныя,/ со святы́ми во свéте лицá Твоегó учинѝ,// прощéнiе прегрешéнiй, мнóгаго рáди, Спáсе, милосéрдiя подая́ сим.
Хор: И ны́не и прúсно и во вéки векóв. Амúнь.
Богорóдичен: Многопéтая Дéва, прорóков оглашéнiе,/ святи́телей и страдáльцев, и преподóбных удобрéнiе,/ и жен святы́х рáдость,// да поéтся по дóлгу во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 3): Áнгельми немóлчно в вы́шних слáвимаго Бóга,/ небесá небéс, земля́, и гóры, и хóлми, и глубинá,/ и весь род человéческiй,/ пéсньми Тогó я́ко Создáтеля и Избáвителя благословúте,// и превозносúте во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: От Бóга Бóга Слóва/ неизречéнною мýдростiю пришéдшаго обновúти Адáма,/ я́дiю в тлéнiе пáдшаго лю́те,/ от Святы́я Дéвы неизречéнно воплотúвшагося нас рáди,// вéрнiи единомýдренно пéсньми величáем.
Хор: Преподóбне óтче Евфúмiе, молù Бóга о нас.
Чтец: Просвещéн добрóтою пóстничества, óтче,/ и одéян ри́зою нетлéнiя, Евфи́мiе,/ и увязéн венцéм дарóв пáче умá,// Влады́це всех предстои́ши, рáдуяся. (Двáжды)
Хор: Преподóбне óтче Евфúмiе, молù Бóга о нас.
Чтец: В пребывáлища присноживýщая всели́лся есѝ, блажéнне,/ идéже апóстол собóр и мнóжество мýченик, преподóбных собрáнiе, прорóков ли́цы,/ болéзней воздая́нiя от Бóга прiéм достóйно,// Богомýдре достослáвне. (Двáжды)
Хор: Преподóбне óтче Евфúмiе, молù Бóга о нас.
Чтец: Всесвéтел, Богоглагóльниче, был есѝ,/ заря́ми Свéта Трисóлнечнаго свéтло озаря́емь,/ испроси́ прегрешéнiй разрешéнiе,/ лю́тых избавлéнiе и злых отчуждéнiе// всем, любóвiю к тебè притекáющим.
Хор: Пресвятáя Богорóдице, спасù нас.
Богорóдичен: Воплоти́вся неизречéнно Влады́ка всех из Тебè, Богороди́тельнице Марíе,/ совершéн бысть Человéк,/ и, роди́вся, я́коже прéжде рождествá Дéву сохранѝ Тя Чи́сту.// Егóже молѝ спастѝ от бед дýши нáша.
Глаc 3
Iрмóс: На Сiнáйстей горè вúде Тя в купинè Моисéй,/ неопáльно огнь Божествá зачéншую во чрéве:/ Данiúл же Тя вúде гóру несекóмую,/ жезл прозя́бшiй,// Исáiа взывáше от кóрене Давíдова.
Продолжéнiе здесь