Недeля 18 по Пятидесятнице. Преставление прп. Сергия игумена Радонежского. УТРЕНЯ(ок-ние) ЧАС ПЕРВЫЙ
8 октября́ 2023 гóда. Недéля 18 по Пятидеся́тнице. Преставлéнiе прп. Сéргiя, игýмена Рáдонежскаго, всея́ Россíи чудотвóрца. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестè бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л есѝ,/ и держáвною рукóю совоскреси́л есѝ,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Пресвятáя Богорóдице, спасù нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на землѝ яви́ся,/ и с человéки поживè, я́ко благоволѝ,// Хвáльный отцéв Бог и Препрослáвлен.
Хор: Пресвятáя Богорóдице, спасù нас.
Чтец: Рáдуйся, Чи́стая, из Тебé прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 8
Хор: Преподóбне óтче Сéргiе, молù Бóга о нас.
Чтец: В пещи́ искушéнiй разжжéнiя/ Божéственная благодáть оросѝ тя, преподóбне,/ и многосвéтла Трóическим желáнiем показá, зовýща:// благословéн Бог отéц нáших.
Хор: Преподóбне óтче Сéргiе, молù Бóга о нас.
Чтец: Мiр преоби́дев, слáвне Сéргiе,/ на землѝ, я́ко безплóтен, пожи́л есѝ/ и áнгельским ликостоя́нiем сподóбился есѝ.// Тем тя вéрою почитáем, досточýдне.
Хор: Преподóбне óтче Сéргiе, молù Бóга о нас.
Чтец: В пристáнище ти́хое вшед, богомýдре,/ житéйских плáванiй отбéгл есѝ/ и волнýющимся житéйскими спаси́тельное окормлéнiе был есѝ, воспевáющим:// благословéн Бог отéц нáших.
Хор: Пресвятáя Богорóдице, спасù нас.
Богорóдичен: Жезл прорастé, Дéво, из кóрене Iессéева,/ всеблажéнный Плод, Цвет нося́щи спаси́тельный/ вéрою Сы́ну Твоемý вопiю́щим:// отцéв нáших Бóже, благословéн есѝ.
Глас 1
Хор: Преподóбне óтче Сéргiе, молù Бóга о нас.
Чтец: Другóе Нéбо на землѝ/ божéственным мановéнiем, преблажéнне, показáлся есѝ,/ воспитáл есѝ словéсное стáдо,// я́ко Áнгел живы́й с плóтiю, богомýдре. (Двáжды)
Слáва Ѻтцý и Сы́ну и Святóму Дýху.
Тропáрь: Имýще тя к Бóгу, чáда твоя́, крéпка моли́твенника, блажéнне,/ и утéшителя печáльных, побóрника же, и предстáтеля, и ходáтая благочéстiя,// от вся́ких бед спасáемся, преподóбне Сéргiе.
И ны́не и прúсно и во вéки векóв. Амúнь.
Богорóдичен: Рáдуйся, чи́стая Адáмова Дщи,/ из Тебè бо произы́де Пáстырь, облéкся и́стинно во всегó мя, человéка,// превозноси́мый за милосéрдiе непости́жное отцéв Бог благословéнный.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есѝ.
ПЕСНЬ 8
Iрмóс: В пещù óтроцы Iзрáилевы,/ я́коже в горнúле,/ добрóтою благочéстiя чистéе злáта блещáхуся, глагóлюще:/ благословúте, вся делá Госпóдня, Гóспода,// пóйте и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебè непрестáнно вся делá Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л еси́ сокрушéнiе, Хрїстè, и окая́нство,/ во вратéх и тверды́нях áдовых,/ воскрéс из грóба триднéвен./ Тебè непрестáнно вся делá, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасù нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрїстá, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Глас 1
Хор: Пресвятáя Богорóдице, спасù нас.
Чтец: Чертóг светови́дный, из негóже всех Влады́ка,/ я́ко Жени́х произы́де Хрїстóс,/ воспои́м вси вопiю́ще:/ вся делá Госпóдня, Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрїстóс,/ Тебé блажáщим, и вопiю́щим:/ вся делá Госпóдня, Гóспода пóйте,// и превозноси́те во вся вéки.
Глас 8
Хор: Преподóбне óтче Сéргiе, молù Бóга о нас.
Чтец: Светонóсный твой прáздник, преблажéнне Сéргiе,/ испóлни рáдости и весéлiя духóвнаго, благоухáнiя же и просвещéнiя// тя имýщим застýпника и прáвило монáшествующим.
Хор: Преподóбне óтче Сéргiе, молù Бóга о нас.
Чтец: Моли́твою непрестáнною к Бóгу востéкл еси́/ и оттýду Трисóлнечными сiя́нiи озари́лся еси́,/ на враги́ борéнiя постáвив, приводя́ пóстников собóры нóвым житiéм, Хрiстý вопiю́щим:// дéти, благослови́те, свящéнницы, воспóйте, лю́дiе, превозноси́те Егó во вéки.
Хор: Преподóбне óтче Сéргiе, молù Бóга о нас.
Чтец: В пощéнiих крéпкое, в моли́твах нелéностное/ терпéнiе в искушéнiих, Сéргiе, на земли́ показáл еси́, зовы́й:// дéти, благослови́те, свящéнницы, воспóйте, лю́дiе, превозноси́те Егó во вéки.
Хор: Пресвятáя Богорóдице, спасù нас.
Богорóдичен: Богороди́тельнице Чи́стая, души́ моея́ я́звы грехóвныя и соблáзны очи́сти,/ ко истóчником примешáющи, я́же из ребр Рождествá Твоегó, и́же от них потéкшим струя́м;// к Тебè бо взывáю, и к Тебè прибегáю, и Тя призывáю, Богоблагодáтную.
Глас 1
Хор: Преподóбне óтче Сéргiе, молù Бóга о нас.
Чтец: Прилéжно пою́ще мóлим тя:/ моли́ся, преподóбне, побéды даровáти на враги́ вóинству нáшему,// и Цéркви благолéпiе, и мíру мир.
Хор: Преподóбне óтче Сéргiе, молù Бóга о нас.
Чтец: Дýха Святáго благодáть в тя всели́ся,/ лукáвых духóв прогони́теля содéла,/ монáшествующих же настáвника показá, зовýщих:// благослови́те, вся тварь, Гóспода и превозноси́те Егó во вéки.
Благословúм Отцá, и Сы́на, и Святáго Дýха, Гóспода.
Тропáрь: Трисóлнечным свéтом издалéча сiя́я,/ твои́м певцéм свет дáруй и спасéнiе и мíру мир,/ в твоéй пáмяти, преподóбне óтче, зовýщим:// да благослови́т вся тварь Гóспода и превознóсит Егó во вéки.
И ны́не и прúсно и во вéки векóв. Амúнь.
Богорóдичен: И́же áнгельскими пéсньми Прославля́емый,/ богáтное Слóво нас рáди обнищá,/ Тя Мáтерь, добрóту Iáковлю, Благословéнная, избрáв./ Тéмже, воспевáюще, поéм:// да благослови́т тварь вся Гóспода и превознóсит Егó во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пещѝ/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Óбраз чúстаго рождествá Твоегó,/ огнепалúмая купинá/ показá неопáльная;/ и ны́не на нас/ напáстей свирéпеющую угасúти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спáсе Áгнче Непорóчне,/ И҆́же мíра грехѝ взéмый,/ Тебè слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: Пресвятáя Богорóдице, спасù нас.
Богорóдичен: Спасѝ лю́ди Твоя́, Гóсподи,/ и҆́хже стяжáл есѝ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
Хор: Пресвятáя Богорóдице, спасù нас.
Чтец: Из кóрене Давíдова прозяблá есѝ прорóческаго, Дéво, и богоотéческаго:/ но и Давíда я́ко вои́стинну Ты прослáвила есѝ,/ я́ко рóждши прорóчествованнаго Гóспода слáвы:// Егóже достóйно величáем.
Хор: Пресвятáя Богорóдице, спасù нас.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвè Тебè приноси́мое прiимѝ, Богорóдице,// со усéрдiем пéнiе похвáльное.
Глас 8
Хор: Преподóбне óтче Сéргiе, молù Бóга о нас.
Чтец: Светоявлéнiя духóвнаго испóлнен быв, преподóбне Сéргiе,/ свети́льник, сiя́я издалéча, яви́лся есѝ,/ словéсныя зари́ нам облистáя,// и Пребожéственныя Трóицы жили́ще показáлся есѝ.
Хор: Преподóбне óтче Сéргiе, молù Бóга о нас.
Чтец: Вои́стину тя вели́ка учи́теля, мýдре Сéргiе, Россíйским стрáнам Хрiстóс даровá,/ нелóжным правлéнiем прáвяща отéчество своè/ и учéнiя сладчáйша мéда изливáюща,// и́хже, я́ко от окрíна, и мы, вéрнiи, почерпáем незави́стно.
Хор: Преподóбне óтче Сéргiе, молù Бóга о нас.
Чтец: Душетлéнныя стрáсти победи́в,/ я́ко пáстырь и́стинный, упáсл есѝ словéсное Хрiстóво стáдо,/ éже вы́ну благодáтiю Дýха, я́ко цвéты рáйскiя, питáя, преподóбне.
Хор: Пресвятáя Богорóдице, спасù нас.
Богорóдичен: Псалмы́ Тя воспевáем, Обрáдованная,/ и немóлчно Ти, éже рáдуйся, вопiéм:// Ты бо источи́ла есѝ всем рáдованiе.
Глас 1
Хор: Преподóбне óтче Сéргiе, молù Бóга о нас.
Чтец: Любóвiю Хрiстóвою, мýдре, просвещáемь и добродéтельми облистáемь,/ не оскверни́л есѝ душѝ твоея́ добрóту,/ ко отцéм престáвился есѝ в дóбрей стáрости// и Бóгу со Áнгелы, Сéргiе, предстои́ши. (Двáжды)
Слáва Ѻтцý и Сы́ну и Святóму Дýху.
Тропáрь: Очи́сти нáша согрешéнiя, Слóве, и просветѝ óчи сердéчныя,/ éже чи́сто зрéти Твою́ свéтлость Божéственнаго светоли́тiя,/ моли́твами твоегó угóдника Сéргiя,// да Тя вси величáем.
И ны́не и прúсно и во вéки векóв. Амúнь.
Богорóдичен: О, стрáннаго Твоегó чудесè!/ Ты бо, Дéво Богорóдице,/ тáинство, прéжде векóв и родóв сокровéнное в Бóзе, вся создáвшем,// рóждши Бóга Слóва несказáнно, яви́лася есѝ.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный седьмы́й: Я́ко взя́ша Гóспода, Марíи рéкшей,/ на гроб течáста, Сíмон Петр,/ и другíй таи́нник Хрiстóв, егóже любля́ше:/ течáста же óба, и обретóста плащани́цы еди́ны внутрь лежáща,/ и главны́й же бе судáрь кромè их./ Тéмже пáки умолчáста,/ дóндеже Хрiстá ви́деста.
Слáва Ѻтцý и Сы́ну и Святóму Дýху.
Светúлен прп. Сéргiя: Процвéл есѝ, я́ко фíнiкс, Давíдски, óтче,/ и оби́тель яви́лся есѝ Дýха Всесвятáго,/ И́же слáвна тя вселéнней показá,/ о нас непрестáнно Хрiстá молѝ,/ почитáющих вéрою пречестнýю пáмять твою́,// преподóбне Сéргiе.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Вéлiя и преслáвная менè рáди содéял есѝ,/ Хрiстè мой многоми́лостиве:/ от Дéвы бо Отрокови́цы роди́лся есѝ несказáнно,/ и Крест подъя́л еси́, и смерть претерпéв,/ воскрéсл есѝ во слáве,/ и нáше естествó от смéрти свободи́л есѝ./ Слáва, Хрiстè, слáве Твоéй,// слáва си́ле Твоéй.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 1: Поéм Твою́, Хрїстè, спаси́тельную страсть,// и слáвим Твоè Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстè,/ сподóби нас чи́стым сéрдцем// Тебè пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Боголéпное Твоè снисхождéнiе слáвяще,/ поéм Тя, Хрїстè./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебè.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры прп. Сéргiя, глас 4: Егдá Божéственное звáнiе/ нáйде на тя, пребогáте,/ тогдá все плотскóе мудровáнiе/ дýху повинýл еси́,/ пощéнiя страдáньми утверди́вся,/ и, я́ко злáто, в горни́ле искушéно, сiя́я, яви́лся еси́./ Прiя́телище был еси́ Дýха Пресвятáго,/ собрáв монáшествующих мнóжества/ и учéнiи твои́ми, я́ко нéкоею небовосхóдною лéствицею,/ на высотý добродéтелей возводя́./ Поминáй нас, Сéргiе, чтýщих пáмять твою́,// спасти́ и просвети́ти дýши нáша.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Возсiя́ днесь пресвéтлая/ и всепрáзднственная пáмять твоя́, преслáвне Сéргiе,/ созывáющи многочи́сленное пóстников сослóвiе/ и преподóбных ликостоя́нiя,/ в нéйже Áнгели слáвят/ в Трóице покланя́емаго Бóга нáшего,/ человéцы же, притекáющiи/ к свящéнней рáце мощéй твои́х,/ исцелéнiя дáры прiéмлют;/ и тя венчáвшаго/ Хрiстá прославля́ем,// Спáса душ нáших.
Честнá пред Гóсподем/ смерть преподóбных Егó. (Пс.115:6)
Стiхúра: Богонóсе и преблажéнне/ óтче Сéргiе,/ ты прорóчески/ постéлю слезáми измывáл еси́,/ не дал еси́ сна твои́м очесéм,/ ни вéждом дремáнiя,/ сердéчное желáнiе éже ко Хрiстý явля́я,/ Егóже измлáда возлюби́в,/ вся́кiя добродéтели вид испрáвил еси́./ Тéмже тя ублажáем,/ Хрiстá величáюще,// тя прослáвльшаго.
Блажéн муж, боя́йся Гóспода,/ в зáповедех Егó восхóщет зелó.(Пс.111:1)
Глас 2: Преподóбне óтче,/ измлáда воздержáнiю прилежáв, пости́вся,/ оргáн был еси́ Святáго Дýха./ Тем и чудéс даровáнiя прiéм,/ человéки научи́л еси́ преоби́дети маловрéменная./ Ны́не же неизречéнным свéтом свéтле сiя́еши,/ просвети́ нáша мы́сли ходáтайством твои́м,// мýдре Сéргiе.
Слáва Отцý и Сыну и Святóму Дýху.
Стiхúра евáнгельская седьмáя, глас 7: Се тьма, и рáно, и что у грóба, Марíе, стои́ши,/ мнóгую тьму имéющи в рáзуме,/ в нéйже, где положéн бысть вопрошáеши, Iисýс?/ Но виждь сри́щущася ученики́,/ кáко плащани́цами и сударéм воскресéнiе обретóша,/ и помянýша я́же о сих Писáнiя./ С ни́миже и и́миже и мы вéровавше,// воспевáем Тя жизнодáвца Хрiстá.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоè, воскрéсл еси триднéвный, Спáсе, дáруяй мíрови жизнь. Сегó рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстè, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь прп. Сéргiя, глас 4: И́же добродéтелей подви́жник, я́ко и́стинный вóин Хрiстá Бóга, на стрáсти вельми́ подвизáлся еси́ в жи́зни врéменней, в пéнiих, бдéнiих же и пощéнiих óбраз быв твои́м ученикóм, тéмже и всели́ся в тя Пресвяты́й Дух, Егóже дéйствiем свéтло укрáшен еси́; но, я́ко имéя дерзновéнiе ко Святéй Трóице, поминáй стáдо, éже собрáл еси́, мýдре, и не забýди, я́коже обещáлся еси́, посещáя чад твои́х, Сéргiе, преподóбне óтче наш.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк прп. Сéргiя, глас 8: Хрiстóвою любóвiю уязви́вся, преподóбне, и Томý невозврáтным желáнiем послéдовав, вся́кое наслаждéнiе плотскóе возненави́дел еси́ и, я́ко сóлнце, Отéчеству твоемý возсiя́л еси́; тем и Хрiстóс дáром чудéс обогати́ тя. Поминáй нас, чтýщих пресвéтлую пáмять твою́, да зовéм ти: рáдуйся, Сéргiе богомýдре.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу