Недeля 17 по Пятидесятнице, по Воздвижении. Попразднство Воздвижения. ОБЕДНИЦА (Изобразительные)
1 октября́ 2023 гóда. Недéля 17 по Пятидеся́тнице, по Воздвúженiи. Попрáзднство Воздвúженiя Честнáго и Животворя́щего Крестá Госпóдня. Прп. Евмéнiя, епíскопа Гортúнского. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 8): Помяни́ нас, Хрiстé Спáсе мíра,/ я́коже разбóйника помянýл еси́ на дрéве:/ и сподóби всех, Еди́не Щéдре,// Небéсному Цáрствiю Твоемý.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Слы́ши, Адáме, и рáдуйся со Éвою:/ я́ко обнажи́вый прéжде обоя́,/ и прéлестiю взем вас плéнники,// Крестóм Хрiстóвым упраздни́ся.
На 8. Хор: Блажéни мúлостивiи,/ я́ко тíи помúловани бýдут.
Чтец: На дрéве пригвождéн быв, Спáсе наш, вóлею,/ я́же от дрéва кля́твы Адáма избáвил еси́,// воздая́, я́ко Щедр, éже по óбразу, и рáйское селéнiе.
Хор: Блажéни чúстiи сéрдцем,/ я́ко тíи Бóга ýзрят.
Чтец: Днесь Хрiстóс воскрéс от грóба,/ всем вéрным подая́ нетлéнiе,// и рáдость обновля́ет мvронóсицам по стрáсти и Воскресéнiи.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Рáдуйтеся мýдрыя жены́ миронóсицы,/ пéрвыя Хрiстóво Воскресéнiе ви́девша,// и Егó возвести́вша апóстолом, всегó мíра воззвáнiе.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Дрýзи Хрiстóвы апóстоли я́вльшеся,/ сопрестóльни Егó слáве бы́ти имýще,/ со дерзновéнiем Томý нам предстáти,// я́ко ученицы́ Егó моли́теся.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры Крестá, глас 8): Тебè, приснопéтое Дрéво, на нéмже прострéся Хрiстóс,/ Едéм храня́щее обращáющееся орýжiе, Крéсте, устыдéся:/ стрáшный же Херуви́м уступи́ на тебè пригвождéнному Хрiстý,// подаю́щему мир душáм нáшим.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Подзéмных си́лы проти́вныя Крестá страшáтся/ начертáема знáменiя на воздýсе,/ по немýже хóдят Небéсных и земнорóдных рóди,/ колéна приклоня́юще Хрiстý,// подаю́щему мир душáм нáшим.
Хор: Слáва Ѻтцý и Сы́ну и Святóму Дýху.
Тропáрь: Стáростiю преклони́вся и неду́гом отягчéн, испрáвися Iáков, рýце премени́в,/ дéйствiе явля́я жизнонóснаго Крестá:/ и́бо вéтхость закóннаго сенóвнаго писáнiя новописá на сем Плóтiю пригвозди́выйся Бог// и душегуби́тельный недýг лéсти отгнá.
Хор: И ны́не и прúсно и во вéки векóв. Амúнь.
Тропáрь: На ю́ныя возложи́в длáни божéственный Iзрáиль, крестови́дно главы́ явля́ше,/ я́ко старéйшая слáва, законослужи́тели лю́дiе./ Тéмже, подмнéвся тáко испрельсти́тися, не измени́ жизнонóснаго óбраза:/ превзы́дут бо лю́дiе Хрiстóвы Бóжiи новоутверждéннiи,// вопiя́ху, Крестóм ограждáеми.
Тропари и кондаки
Тропáрь воскрéсный, глас 8: С высоты́ снизшéл еси́, Благоутрóбне,/ погребéнiе прiя́л еси триднéвное,/ да нас свободи́ши страстéй,// Животé и Воскресéнiе нáше, Гóсподи, слáва Тебé!
Тропáрь Крестá, глас 1: Спасѝ, Гóсподи, лю́ди Твоя́/ и благословѝ достоя́нiе Твоè,/ побéды правослáвным хрїстiáнам на сопроти́вныя дáруя// и Твоè сохраня́я Крестóм Твои́м жи́тельство.
[ц.ч.]Спаси́, Гóсподи, лю́ди Твоя́/ и благослови́ достоя́нiе Твоè,/ побéды грядýщему рýсскому Царю́ и правослáвным хрїстiáнам на сопроти́вныя дáруя// и Твоè сохраня́я Крестóм Твои́м жи́тельство.
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Слáва Ѻтцý и Сы́ну и Святóму Дýху.
Кондáк прп. Евмéнiя, глас 2: Свéтом Божéственным просвети́вся, всеблажéнне,/ просвещáеши ны,/ любóвiю пою́щiя твоè честнóе и слáвное/ и святóе, óтче, преставлéнiе,/ iерáрше Евмéнiе,// моля́ непрестáнно о всех нас.
И ны́не и прúсно и во вéки векóв, амúнь.
Кондáк Крестá, глас 4: Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрїстè Бóже,/ возвеселѝ нас си́лою Твоéю,/ побéды дая́ нам на супостáты,/ посóбiе имýщим Твоè орýжiе мíра// непобеди́мую побéду.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен воскресный, глас 8
Чтец: Прокíмен, глас осьмы́й: Помоли́теся и воздади́те Гóсподеви Бóгу нáшему. (Пс.75:12А)
Хор: Помолúтеся и воздадúте Гóсподеви Бóгу нáшему.
Чтец: Вéдом во Iудéи Бог, во Iзрáили вéлiе И҆́мя Егó. (Пс.75:2)
Хор: Помолúтеся и воздадúте Гóсподеви Бóгу нáшему.
Прокимен по Воздвижении, глaс 7
Чтец: Прокíмен, глас седьмы́й, псалóм Давíдов. Возноси́те Гóспода Бóга нáшего и поклоня́йтеся поднóжiю нóгу Егó, я́ко свя́то есть. (Пс.98:5)
Хор: Возносúте Гóспода Бóга нáшего/ и покланя́йтеся поднóжiю нóгу Eгó, я́ко свя́то eсть.
АПОСТОЛ
Чтец: К Галáтом послáнiя святáго апóстола Пáвла чтéнiе.
(Гал.зач.203): Брáтiе, увéдевше я́ко не оправди́тся человéк от дел закóна, но тóкмо вéрою Iисýс Хрiстóвою, и мы во Хрiстá Iисýса вéровахом, да оправди́мся от вéры Хрiстóвы, а не от дел закóна, занé не оправди́тся от дел закóна вся́ка плоть. Áще ли, и҆́щуще оправди́тися о Хрiстé, обретóхомся и сáми грéшницы, Хрiстóс ýбо грехý ли служи́тель? Да не бýдет. Áще бо, я́же разори́х, сiя́ пáки созидáю, престýпника себé представля́ю. Аз бо закóном закóну умрóх, да Бóгови жив бýду. Хрiстóви сраспя́хся. Живý же не ктомý аз, но живéт во мне Хрiстóс. А éже ны́не живý во плóти, вéрою живý Сы́на Бóжiя, возлюби́вшаго менé и предáвшаго Себé по мне.
[Русский синодальный перевод]Братья, однако же, узнав, что человек оправдывается не делами закона, а только верою в Иисуса Христа, и мы уверовали во Христа Иисуса, чтобы оправдаться верою во Христа, а не делами закона; ибо делами закона не оправдается никакая плоть. Если же, ища оправдания во Христе, мы и сами оказались грешниками, то неужели Христос есть служитель греха? Никак. Ибо если я снова созидаю, что разрушил, то сам себя делаю преступником. Законом я умер для закона, чтобы жить для Бога. Я сораспялся Христу, и уже не я живу, но живет во мне Христос. А что ныне живу во плоти, то живу верою в Сына Божия, возлюбившего меня и предавшего Себя за меня.(Гал.2:16-20)
Аллилуиарий недели по Воздвижении, глас 1
Чтец: Аллилýїа, аллилýїа, аллилýїа, глас пéрвый, псалóм Давíдов.
Хор: Аллилýїа, аллилýїа, аллилýїа.
Чтец: Помяни́ сонм Твой, егóже стяжáл еси́ испéрва. (Пс.73:2А)
Хор: Аллилýїа, аллилýїа, аллилýїа.
Чтец: Бог же Царь наш прéжде вéка, содéла спасéнiе посредé земли́. (Пс.73:12)
Хор: Аллилýїа, аллилýїа, аллилýїа.
Аллилуарий воскресный, глас 8
Чтец: Аллилýїа, аллилýїа, аллилýїа, глас осьмы́й, псалóм Давíдов: Прiиди́те, возрáдуемся Гóсподеви, воскли́кнем Бóгу Спаси́телю нáшему.(Пс.94:1)
Хор: Аллилýїа, аллилýїа, аллилýїа.
Чтец: Предвари́м лицé Егó во исповéданiи, и во псалмéх воскли́кнем Емý.(Пс.94:2)
Хор: Аллилýїа, аллилýїа, аллилýїа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.37): Речé Госпóдь: и҆́же хóщет по Мне ити́, да отвéржется себé, и вóзмет крест свой, и по Мне грядéт. И҆́же бо áще хóщет дýшу свою́ спасти́, погуби́т ю, а и҆́же погуби́т дýшу свою́ Менé рáди и Евáнгелiя, той спасéт ю. Кáя бо пóльза человéку, áще прiобря́щет мiр весь, и отщети́т дýшу свою́? Или́ что даст человéк измéну на души́ своéй? И҆́же бо áще постыди́тся Менé и Мои́х словéс в рóде сем прелюбодéйнем и грéшнем, и Сын Человéческiй постыди́тся eгó, eгдá прiи́дет во слáве Oтцá Своегó со áнгелы святы́ми. И глагóлаше им: ами́нь глагóлю вам, я́ко суть нéцыи от зде стоя́щих, и҆́же не и҆́мут вкуси́ти смéрти, дóндеже ви́дят Цáрствiе Бóжiе пришéдшее в си́ле.
[Русский синодальный перевод]Сказал Господь: кто хочет идти за Мною, отвергнись себя, и возьми крест свой, и следуй за Мною. Ибо кто хочет душу свою сберечь, тот потеряет ее, а кто потеряет душу свою ради Меня и Евангелия, тот сбережет ее. Ибо какая польза человеку, если он приобретет весь мир, а душе своей повредит? Или какой выкуп даст человек за душу свою? Ибо кто постыдится Меня и Моих слов в роде сем прелюбодейном и грешном, того постыдится и Сын Человеческий, когда приидет в славе Отца Своего со святыми Ангелами. И сказал им: истинно говорю вам: есть некоторые из стоящих здесь, которые не вкусят смерти, как уже увидят Царствие Божие, пришедшее в силе. (Мк.8:34-9:1)
Хор: Слáва Тебè, Гóсподи, слáва Тебè.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк Крестá, глас 4: Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрїстè Бóже,/ возвеселѝ нас си́лою Твоéю,/ побéды дая́ нам на супостáты,/ посóбiе имýщим Твоè орýжiе мíра// непобеди́мую побéду.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (Задостóйник)
Припéв: Величáй, душè моя́,/ пречестны́й Крест Госпóдень.
Iрмóс (глас 8): Тáин есù, Богорóдице, рай,/ невоздéланно возрастúвшiй Хрїстá,/ И҆́мже крéстное живонóсное на землù насадúся Дрéво./ Тем, ны́не возносúму,// покланя́ющеся Емý, Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сыне Бóжiй, моли́твами пречи́стыя Своея́ Мáтере, си́лою Честнáго и Животворя́щаго Крестá, преподóбных и богонóсных отéц наших и всех святы́х, поми́лует и спасéт нас, я́ко Благ и Человеколю́бец.