Недeля 18 по Пятидесятнице. Преставление прп. Сергия игумена Радонежского, глас 1 УТРЕНЯ КАНОН
8 октября́ 2023 гóда. Недéля 18 по Пятидеся́тнице. Преставлéнiе прп. Сéргiя, игýмена Рáдонежскаго, всея́ Россíи чудотвóрца. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПСАЛОМ ИЗБРАННЫЙ
Терпя́ потерпéх Гóспода, и внят ми, и услы́ша моли́тву мою́:/ Постáви на кáмени нóзе мои́, и испрáви стопы́ моя́./ Се удали́хся бéгая, и водвори́хся в пусты́ни./ Уподóбихся нея́сыти пусты́нней./ Бдех, и бых я́ко пти́ца осóбящаяся на зде./ Колéна моя́ изнемогóста от пóста:/ И плоть моя́ измени́ся елéа рáди./ Слезáми мои́ми постéлю мою́ омочý./ Я́ко обыдóша мя пси мнóзи, сонм лукáвых одержáша мя./ Напрягóша лук свой вещь гóрьку:/ Состреля́ти в тáйных непорóчнаго./ Предзрéх Гóспода предо мнóю вы́ну, я́ко одеснýю менé есть, да не подви́жуся./ Вси язы́цы обыдóша мя, и И́менем Госпóдним противля́хся им./ Благословéн Госпóдь, И́же не дадé нас в лови́тву зубóм их:/ Да исповéдятся Тебé, Гóсподи, вся делá Твоя́:/ И преподóбнiи Твои́ да благословя́т Тя./ И увéдите, я́ко удиви́ Госпóдь преподóбнаго Своегó./ И утруди́ся во век, и жив бýдет до концá./ Храни́т Госпóдь дýши преподóбных Свои́х./ Восхвáлятся преподóбнiи во слáве, и возрáдуются на лóжах свои́х./ Честнá пред Гóсподем смерть преподóбных Егó.// Пóйте Гóсподеви преподóбнiи Егó, и исповéдайте пáмять святы́ни Егó, во всех лю́дех чудесá Егó.
Хор: Ублажáем Тя,/ преподóбне óтче Сéргiе,/ и чтим святýю пáмять твою́,/ настáвниче монáхов// и собесéдниче áнгелов.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрїстè Бóже,// подая́й мíрови вéлiю ми́лость.
СЕДАЛЬНЫ ПО ПОЛИЕЛЕИ
Глас 8 (по 1‑м стiхослóвiи): Весь освящéн и богонóсен показáлся еси́,/ мíра и богáтства свéтлости/ и вся ели́ка ви́димых добрóт маловрéменных преоби́дев,/ смирéнiем же и нищетóю Влады́це Хрiстý послéдовал еси́,/ собрáв монáхов мнóжества, и сих Правослáвiя учéньми просвети́л еси́./ Тем и по кончи́не нестарéемую благодáть прiя́л еси́/ и, во грóбе лежá, нетлéнен пребывáеши, Сéргiе богоблажéнне,/ моли́ Хрiстá Бóга согрешéнiй оставлéнiе даровáти// чтýщим любóвiю святýю пáмять твою́.
Глас 3 (по 2‑м стiхослóвiи): Éже к Бóгу мудровáнiе горè имéя, óтче,/ и я́же на земли́ остáвил еси́,/ и, мнóгими болéзньми свéтло твоè житiè изъясни́в,/ вся́кiя же божéственныя добродéтели оби́тель показáвся,/ в моли́твах и мольбáх и пощéнiих Гóсподу прибли́жился еси́.// Моли́ Хрiстá Бóга спасти́ся душáм нáшим.
Слáва Ѻтцý и Сы́ну и Святóму Дýху.
Седáлен прп. Сéргiя по полiелéе, глас 8: Егдá, блажéнне, божéственному желáнiю ум твой впери́в,/ тогдá остáвил еси́ вся дóлу влекýщая мудровáнiя,/ и, в пусты́ню всели́вся, я́ко крiн процвéл еси́ добродéтели прекрáсный,/ и, страстéй искорени́в тéрнiе, в нем насади́л еси́ плоды́ трудóв твои́х./ Тéмже и пожáл еси́ рукоя́ти, неотъéмлемо богáтство на Небесéх./ Сéргiе преподóбне, моли́ Хрiстá Бóга// согрешéнiй оставлéнiе даровáти чтýщим любóвiю святýю пáмять твою́.
И ны́не и прúсно и во вéки векóв, амúнь.
Богорóдичен из Минéи, глас тóйже: О Тебè рáдуется, Благодáтная, вся́кая тварь,/ áнгельскiй собóр, и человéческiй род,/ освящéнный хрáме, и раю́ словéсный: дéвственная похвалó,/ из Нея́же Бог воплоти́ся, и Младéнец бысть,/ прéжде век сый Бог наш:/ ложеснá бо Твоя́ престóл сотвори́,/ и чрéво Твоè прострáннее небéс содéла.// О Тебè радуется, Благодáтная, вся́кая тварь, слáва Тебè.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебè зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромè. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есù мя закóнов,// добродéтельми просветù, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Давíдове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещè сýщи тме, на гроб, и ви́де кáмень взят от грóба. Течè ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и́ма: взя́ша Гóспода от грóба, и не вем, где положи́ша Егó. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течè скорéе Петрá, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егó, и вни́де во гроб, и ви́де ри́зы еди́ны лежáща. И судáрь, и́же бе на главè Егó, не с ри́зами лежáщь, но осóбь свит на еди́ном мéсте. Тогдá ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себè ученикá.
[Синодальный перевод]В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещéнный с канóном Богорóдицы глас 1 и канóнами прп. Сéргiя, игýмена Рáдонежского, глас 8 и глас 1)
ПЕСНЬ 1
Iрмóс: Твоя́ победúтельная деснúца/ Боголéпно в крéпости прослáвися:/ та бо, Безсмéртне,/ я́ко всемогýщая, протúвныя сотрè,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестè,/ от земли́ взывáя тлéнное моè тéло,// éже от Дéвы прiя́л еси́.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л еси́ менè рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор:Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрїстá мíрови рóждшая.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Первый канон прп. Сергия Радонежского, глас 8
Хор: Преподóбне óтче Сéргiе, молù Бóга о нас.
Чтец: Хрiстá, нас рáди вóлею смири́вшагося дáже до рáбiя óбраза, подражáв,/ возлюби́л еси́ смирéнiе/ и, зéльным бдéнiем и моли́твами душегýбныя стрáсти умертви́в,// на гóру безстрáстiя возшéл еси́, Сéргiе пребогáте.
Хор: Преподóбне óтче Сéргiе, молù Бóга о нас.
Чтец: Я́ко свети́льник свéта,/ твою́ дýшу слéзными потóки украшáя,/ и другóго Iсаáка подóбно сам себè вознéсл еси́, преподóбне,// и сéрдце твоè Бóгу пожéрл еси́.
Хор: Преподóбне óтче Сéргiе, молù Бóга о нас.
Чтец: И́же во чрéве мáтерни трикрáты проглашéнiем/ Трóицы служи́тель показáлся еси́/ и, Трисóлнечным свéтом озаря́емь,// дéмонская ополчéнiя, я́ко паучи́ну, разори́л еси́, преблажéнне Сéргiе.
Хор: Пресвятáя Богорóдице, спасù нас.
Богорóдичен: Закóнов кромè естéственных родилá еси́ Законодáвца Бóга и Человéка бы́вша,/ Тогó, я́ко Блáга, моли́, Всенепорóчная,/ нáша беззакóнiя презрéти, вопiю́щих всегдá:// пои́м Гóсподу, слáвно бо прослáвися.
Второй канон прп. Сергия Радонежского, глас 1
Хор: Преподóбне óтче Сéргiе, молù Бóга о нас.
Чтец: Любóвiю Хрiстóвою утверди́лся еси́, преподóбне,/ и яви́лся еси́, я́ко рекá, оби́льно всю зéмлю напая́я слóвом учéнiя,/ богоблажéнне Сéргiе,/ тéмже пáмять твою́ любóвiю ублажáем.
Хор: Преподóбне óтче Сéргiе, молù Бóга о нас.
Чтец: Твоéю рукóю бысть благословéнiе божéственным мановéнiем:/ невлáжная бо земля́ твоéю моли́твою вóду источи́,// ю́же ны́не почерпáюще, исцелéнiе прiéмлем незави́стно,// преподóбне Сéргiе.
Слáва Ѻтцý и Сы́ну и Святóму Дýху.
Тропáрь: Весь от ю́ности Бóгу освяти́лся еси́,/ к Немý добродéтельми приближáяся,/ тлéнная бо, я́же на земли́, остáвив,// Небéсное обрéл еси́ богáтство.
И ны́не и прúсно и во вéки векóв. Амúнь.
Богорóдичен: Рáдуйся, благодáти истóчниче;/ рáдуйся, лéствице и двéре Небéсная;/ рáдуйся, свéщниче, и стáмно златáя, и горó несекóмая,// Я́же Жизнодáвца Хрiстá мíру родилá еси́.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Едúне вéдый человéческаго существá нéмощь/ и мúлостивно в не вообрáжся,/ препоя́ши мя с высоты́ сúлою,/ éже вопúти Тебè, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебè, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрїстè сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
Хор: Пресвятáя Богорóдице, спасù нас.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествè.
Глас 8
Хор: Преподóбне óтче Сéргiе, молù Бóга о нас.
Чтец: Благи́х óбраз тебè дав твои́м ученикóм,/ и привлéкл еси́ мнóги дýши во спасéнiе, отлучи́вшихся мiрскáго пристрáстiя,/ и́же утешéнiя улучи́ша рáйскаго наслаждéнiя.
Хор: Преподóбне óтче Сéргiе, молù Бóга о нас.
Чтец: Я́ко доброплóдная мáслина в домý Бóжiи, блажéнне, процвéл еси́,/ и елéем умащáя дýши любóвiю тя пою́щих, преблажéнне Сéргiе,/ и вéрою Хрiстý вопiю́щих:// несть свят пáче Тебè, Человеколю́бче.
Хор: Преподóбне óтче Сéргiе, молù Бóга о нас.
Чтец: Стрáсти душетлéнныя успи́л еси́ бóдренными бдéнiи, блажéнне,/ и сих рáди в чертóг Небéсный всели́лся еси́,// прiéм, богомýдре Сéргiе, благодáть исцелéнiй.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася еси́, Богорóдице:/ Ты бо еди́на прiя́ла еси́ невмести́маго Бóга во чрéве Твоéм, Несквéрная.// Тéмже Тя, вси вéрнiи, пéсньми, Чи́стая, ублажáем.
Глас 1
Хор: Преподóбне óтче Сéргiе, молù Бóга о нас.
Чтец: Тлéнную слáву презрéв, блажéнне,/ нетлéнныя и Божéственныя слáвы наслéдник бы́ти сподóбился еси́,/ всю бо попрáв житiя́ красотý,// со Áнгелы в Вы́шних Божéственныя слáвы наслаждáешися.
Хор: Преподóбне óтче Сéргiе, молù Бóга о нас.
Чтец: Рáлом моли́твенным, преподóбне, зéмлю сéрдца твоегó обнови́в/ и сiю́ насéяв сéменем трудóв твои́х,/ и яви́лся еси́ прекрáсная Слóва пшени́ца,// и дости́гл еси́ незаходи́маго Свéта селéнiе.
Слáва Ѻтцý и Сы́ну и Святóму Дýху.
Тропáрь: Дýха Святáго сiя́ньми почтéн, и светонóсным житiéм украси́лся еси́,/ трéбующим подавáя неоскýдно// и прiéмля с любóвiю монáшествующих чи́ны, óтче преподóбне.
И ны́не и прúсно и во вéки векóв. Амúнь.
Богорóдичен: Из Тебè прозябè, Чи́стая, Цвет неувядáемый,/ облаговóнствуя все человéчество Божéственным ми́ром естествá Своегó,// И́же и Отцý Собезначáльный, из Тебè бысть под лéтом, Дéво Всенепорóчная.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себè совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прп. Сéргiя, глас 8: Хрiстóвою любóвiю уязви́вся, преподóбне,/ и Томý невозврáтным желáнiем послéдовав,/ вся́кое наслаждéнiе плотскóе возненави́дел еси́/ и, я́ко сóлнце, Отéчеству твоемý возсiя́л еси́;/ тем и Хрiстóс дáром чудéс обогати́ тя./ Поминáй нас, чтýщих пресвéтлую пáмять твою́, да зовéм ти:// рáдуйся, Сéргiе богомýдре.
Íкос: Евáнгельскiй глас, óтче, услы́шав,/ вся остáвил еси́ плотскáя мудровáнiя,/ богáтство же и слáву, я́ко прах, вмени́в,/ и на стрáсти, я́ко безплóтен, подвизáвся,/ и безплóтных ликостоя́нiем чéсти сподóбился еси́./ Рáзума даровáнiе прiя́л еси́,/ éже и подáждь в пéснех пою́щим ти си́це:/ рáдуйся, Сéргiе преподóбне и богонóсе, Небéсный человéче, земны́й Áнгеле;/ рáдуйся, Дýха Святáго оби́тель;/ рáдуйся, моли́твами богодáнен дар прiéмый;/ рáдуйся, я́ко прéжде рождéнiя проглашéнiем прослáвив Святýю Трóицу, Я́же тя прослáви в жи́зни сей и по смéрти;/ рáдуйся, целомýдрiя стóлпе, и́мже вся́ка страсть попрáся;/ рáдуйся, я́ко от млады́х ногтéй послéдствовал еси́ Хрiстý;/ рáдуйся, притекáющим к тебè спасéнiя ходáтай;/ рáдуйся, свети́льниче многосвéтлый, возвéдши ко Хрiстý монáхов мнóжества;/ рáдуйся, похвалó Отéчеству твоемý;/ рáдуйся, прорóчеством украшéнный, во éже прорицáти, я́ко настоя́щая, бýдущая;/ рáдуйся, я́ко моли́твами твои́ми сопроти́внiи побеждáются;/ рáдуйся, правослáвному вóинству нáшему похвалá и утверждéнiе,/ егóже соблюди́ моли́твами твои́ми от враг ненавéтно, да зовéм ти:// рáдуйся, Сéргiе богомýдре.
Ин кондáк прп. Сéргiя, глас 8: Я́ко безплóтным равножи́тель,/ всех преподóбных превозшéл еси́/ пóстническими труды́ и бдéнiи моли́твенными, мýдре Сéргiе,/ тем воспрiя́л еси́ от Бóга исцели́ти недýги и прогони́ти бéсы,/ и тогó рáди вопiéм ти:// рáдуйся, óтче преподóбне Сéргiе.
Седáлен прп. Сéргiя, глас 4: Я́ко вои́стину тлéнных остáвив нестоя́нное,/ Хрiстý от души́ послéдовал еси́/ и болéзньми, и труды́, и зéльным воздержáнiем,/ я́ко безплóтен пожи́в, преблажéнне Сéргiе,// моли́ Хрiстá Бóга спасти́ся душáм нáшим. (двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 4: Херувíмов и Серафíмов превы́шши еси́, Богорóдице,/ Небесè же и земли́ прострáннейши,/ ви́димыя твáри и невиди́мыя яви́лася еси́ преимýщи/ несосýдным сосуждéнiем:/ Егóже бо прострáнствiя Небесá не вмещáют,/ в Твоéй утрóбе вмести́ла еси́, Чи́стая,// Егóже моли́ спасти́ся рабóм Твои́м.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорлúвыма Аввакýм/ усмотрúв очúма,/ из Тебè изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебè прозябè,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землè,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоè тáинство,/ премéрных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 8
Хор: Преподóбне óтче Сéргiе, молù Бóга о нас.
Чтец: Дýха Пресвятáго храм, óтче, был еси́ и жи́зненных вод рекá исполня́ема,/ основáнiе непоколеби́мо Цéркве, монáшествующих утверждéнiе,// Сéргiе досточýдне.
Хор: Преподóбне óтче Сéргiе, молù Бóга о нас.
Чтец: Прорóчески слéзными кáплями на всяк день постéлю омочáя, Сéргiе слáвне,/ дóндеже до концá страстéй пучи́ну изсуши́л еси́;// тéмже пáмять твою́ почитáем, присночестнýю и свящéнную.
Хор: Преподóбне óтче Сéргiе, молù Бóга о нас.
Чтец: Лицè Хрiстóво лицéм, преподóбне Сéргiе, зрéти сподóбился еси́,/ зерцáлом вои́стину разрéшшимся.// Сiè бо и от ми́ра отлучи́ тя к возлю́бленному желáнiю.
Хор: Пресвятáя Богорóдице, спасù нас.
Богорóдичен: Очищéнiе нáших дáруй невéденiй, я́ко безгрéшен,// и умири́ мiр Твой, Бóже, моли́твами Рóждшiя Тя.
Глас 1
Хор: Преподóбне óтче Сéргiе, молù Бóга о нас.
Чтец: Просвещáемь светолýчными заря́ми, преблажéнне,/ наслаждéнiе Небéсное прiя́л еси́, рáдуяся,/ я́ко вои́стину чистéйшiй хлеб Творцý был еси́, мýдре Сéргiе, Емýже взывáя:// си́ле Твоéй слáва, Человеколю́бче.
Хор: Преподóбне óтче Сéргiе, молù Бóга о нас.
Чтец: Стрáсти душетлéнныя прешéд и во глубинý безмóлвiя вшед,/ прéжде отрешéнiя телéснаго сою́за умéршее отрочá возстáвил еси́/ и пáче надéжди роди́телю егó рáдость сотвори́л еси́./ Тем, удиви́вся, Творцý вопiя́л еси́:// си́ле Твоéй слáва, Человеколю́бче.
Слáва Ѻтцý и Сы́ну и Святóму Дýху.
Тропáрь: Душéвный рáзум впери́в, слáвне, и чýвствiя окорми́в, мýдре,// святы́ню благочéстiя сýщим на земли́ возвести́л еси́ к Небéсному шéствiю.
И ны́не и прúсно и во вéки векóв. Амúнь.
Богорóдичен: Рáдость Тебè, Чи́стая, яви́, с Небесè пришéд, Архiстрати́г, благовести́, рек:/ Бог изы́дет Плóтiю из Тебè, Дéво Пречи́стая, во спасéнiе любóвiю пою́щих Тя:// слáва си́ле Твоéй, человéком Помóщнице.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, си́ле Твоéй.
ПЕСНЬ 5
Iрмóс: Просветúвый сiя́нiем пришéствiя Твоегó, Хрїстè,/ и осветúвый Крестóм Твоúм/ мíра концы́,/ сердцá просветù/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрїстé:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 8
Хор: Преподóбне óтче Сéргiе, молù Бóга о нас.
Чтец: В пощéнiих непреклóнен пребы́л еси́, мýдре,/ и до отшéствiя своегó храня́ сié опáсно,// и́мже сподóбился еси́ я́ве нетлéннаго блажéнства.
Хор: Преподóбне óтче Сéргiе, молù Бóга о нас.
Чтец: Остр ум имéя к Бóгу внимáти, стрáсти душетлéнныя успи́л еси́, óтче,/ и снопы́ благоплóдiя пожáл еси́,// питáя благочéстно восхваля́ющiя тя, преподóбне óтче Сéргiе.
Хор: Преподóбне óтче Сéргiе, молù Бóга о нас.
Чтец: Свéтло житié твоé, преподóбне Сéргiе, и извéстно всем концéм яви́ся,/ и божéственныя добрóты испóлнено,// моли́твами же, и пощéньми, и любóвiю, я́же ко Хрiстý Человеколю́бцу.
Хор: Пресвятáя Богорóдице, спасù нас.
Богорóдичен: Тя стéну имýще и заступлéнiем Твои́м соблюдáеми,/ Твоéю божéственною слáвою хвáлящеся, Тя ублажáем.// Ты бо, Пречи́стая, душáм нáшим источáеши весéлiе и рáдованiе.
Глас 1
Хор: Преподóбне óтче Сéргiе, молù Бóга о нас.
Чтец: Обветшáвшаго человéка я́ве, óтче, совлéклся еси́/ и, я́ко сквéрну ри́зу, отвéрг с грехóвными страстьми́,// в нóваго облéклся еси́, éже по подóбiю о Хрiстé, всечéстне. (Двáжды)
Слáва Ѻтцý и Сы́ну и Святóму Дýху.
Тропáрь: Стрáстныя ýзы растóрг высóким твои́м равноáнгельным житiéм/ и свы́ше прiи́м чудодéйствiя даровáнiе,// согрешéнiй нáших очищéнiе, Сéргiе, испроси́.
И ны́не и прúсно и во вéки векóв. Амúнь.
Богорóдичен: Кля́тву Éвы, всех прамáтере, Твои́м рождествóм, Дéво, упраздни́ла еси́,/ мíру благословéнiе возсiя́вши Хрiстá.// Тéмже Тя, рáдующеся, язы́ком и сéрдцем Богорóдицу и́стинно исповéдающе, величáем.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вменúхомся,/ я́ко óвцы заколéнiя,/ спасù лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрїстé:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 8
Хор: Преподóбне óтче Сéргiе, молù Бóга о нас.
Чтец: Пáмять твою́ творя́щим свящéнную, óтче,/ не престáй, моля́ Избáвителя даровáти согрешéнiй оставлéнiе// и Небéсное Цáрство воспрiя́ти, идéже глас прáзднующих весели́т вся.
Хор: Преподóбне óтче Сéргiе, молù Бóга о нас.
Чтец: О Хрiстé укрепля́емь,/ вся ковáрствiя лукáваго твéрдым умóм, Сéргiе,/ я́коже сеть, растóргнул еси́/ и пресвéтло свети́ло мíру, óтче, показáлся еси́.
Хор: Преподóбне óтче Сéргiе, молù Бóга о нас.
Чтец: Свéтом Божéственным осiя́емь/ и со Áнгелы ны́не на Небесéх водворя́яся,/ поминáй вéрою чтýщих пáмять твою́,// преподóбне Сéргiе приснопáмятне.
Хор: Пресвятáя Богорóдице, спасù нас.
Богорóдичен: Возвы́сила еси́ вои́стину пáдшее человéческое существó,/ и́же óбразом Божéственным и Отцá рáвенством,/ ви́димым Сы́ном неизмéнным, Богомáти,// без сéмене во чрéве поноси́вши.
Глас 1
Хор: Преподóбне óтче Сéргiе, молù Бóга о нас.
Чтец: Нас свы́ше, стáдо твоé, озаря́вши ми́лостивно, óтче,/ вóинству благочести́вому побéду подая́ моли́твами твои́ми, возвышáя рог правослáвных,// от нас же прiими́, áще и мáлое, приноси́мое тебé молéнiе. (Двáжды)
Слáва Ѻтцý и Сы́ну и Святóму Дýху.
Тропáрь: На недýзех разли́чных исцелéнiя благодáть тебé даровáся/ и на дýсех нечи́стых от Хрiстá власть, мýдре,// я́ко божéственный дóблественник, венéц прiя́л еси́ побéды от всех Цáрствующаго.
И ны́не и прúсно и во вéки векóв. Амúнь.
Богорóдичен: Весь лик прорóческiй, от Бóга научéн, Твоé провозгласи́ тáинство/ несказáннаго Божéственного зачáтiя éже из Тебé Слóва, Мáти Дéво:// Ты бо И́стинный начáльный Свет родилá еси́.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрїстé, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал еси́, Хрїстé, всем Воскресéнiе.
ПЕСНЬ 7
Iрмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасè три Превозносúмый,/ мiр обновù,/ во чрéве Твоéм всецéл,// хвáльный отцéв Бог и препрослáвлен.
Продолженiе здесь