Недeля 17 по Пятидесятнице, по Воздвижении. Глас 8 Попразднство Воздвижения Креста. УТРЕНЯ КАНОН
1 октября́ 2023 гóда. Недéля 17 по Пятидеся́тнице, по Воздвúженiи. Попрáзднство Воздвúженiя Честнáго и Животворя́щего Крестá Госпóдня. Прп. Евмéнiя, епíскопа Гортúнскаго. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 8: Мvронóсицы Жизнодáвца предстоя́ща грóбу,/ Влады́ку искáху в мéртвых, Безсмéртнаго,/ и рáдость благовéщенiя от Áнгела прiéмша, апóстолом возвещáху:/ я́ко воскрéсе Хрiстóс Бог,// подая́й мíрови вéлiю ми́лость.
СТЕПЕННА, ГЛАС 8
1 АНТИФОН
Хор: От ю́ности моея́ враг мя искушáет, сластьмù палúт мя:// аз же надéяся на Тя, Гóсподи, побеждáю сегó. (Двáжды)
Ненави́дящiи Сióна,/ да бýдут ýбо прéжде исторжéнiя я́ко травá:// ссéчет бо Хрiстóс вы́я их, усечéнiем мук. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
И ны́не и прúсно и во вéки векóв. Амúнь.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
2 АНТИФОН
Сéрдце моé стрáхом Твоúм да покры́ется смиренномýдрствующее:// да не вознéсшееся отпадéт от Тебé, Всещéдре. (Двáжды)
На Гóспода имéвый надéжду, не устраши́тся тогдá,// егдá огнéм вся суди́ти и҆́мать, и мýкою. (Двáжды)
Слáва Ѻтцý и Сы́ну и Святóму Дýху.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
И ны́не и прúсно и во вéки векóв. Амúнь.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
3 АНТИФОН
Воззвáх Тебé, Гóсподи, вонмù,/ приклонù ми ýхо Твоé вопiю́щу, и очúсти,// прéжде дáже не вóзмеши менé отсю́ду. (Двáжды)
В мáтери своéй земли́ отходя́й всяк, пáки разрешáется,// прiя́ти мýки, или́ пóчести пожи́вших. (Двáжды)
Слáва Ѻтцý и Сы́ну и Святóму Дýху.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
И ны́не и прúсно и во вéки векóв. Амúнь.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
4 АНТИФОН
Се ны́не что добрó, илù что краснó; но éже жúти брáтiи вкýпе:// в сем бо Госпóдь обещá живóт вéчный. (Двáжды)
О ри́зе своéй, И҆́же кри́ны сéльныя украшáяй,// повелевáет, я́ко не подобáет пещи́ся. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
И ны́не и прúсно и во вéки векóв. Амúнь.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
ПРОКИМЕН
Чтец: Прокíмен, глас осьмы́й, псалóм Давíдов. Воцари́тся Госпóдь во век, Бог твой, Сióне, в род и род. (Пс.145:10)
Хор: Воцарúтся Госпóдь во век,/ Бог твой, Сióне, в род и род.
Чтец: Хвали́, душé моя, Гóспода, восхвалю́ Гóспода в животé моéм. (Пс.145:1-2А)
Хор: Воцарúтся Госпóдь во век,/ Бог твой, Сióне, в род и род.
Чтец: Воцари́тся Госпóдь во век.
Хор: Бог твой, Сióне, в род и род.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и҆́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и҆́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрїстý, и воскрéснути от мéртвых в трéтiй день, и проповéдатися во и҆́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Ѻтцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И҆ бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Синодальный перевод]В то время воскрес Иисус из мертвых, стал посреди учеников Своих и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицé Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 8
(совмещéнный канóном Богорóдицы (глас 8) вторым канóном Крестá (глас 8) и канóном прп. Евмéнiя, епíскопа Гортúнскаго, глас 2)
ПЕСНЬ 1
Iрмóс: Колесницегонúтеля фараóня погрузù/ чудотворя́й иногдá/ Моисéйскiй жезл, крестообрáзно поразúв,/ и разделúв мóре,/ Iзрáиля же беглецá, пешехóдца спасè,// песнь Бóгови воспевáюща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Всеси́льну Хрїстóву Божествý кáко не диви́мся;/ от страстéй ýбо всем вéрным, безстрáстiе и нетлéнiе точáщу,/ от ребрá же Святáго истóчник безсмéртiя искáпающу,// и Живóт из грóба Присносýщный.
Хор: Слáва, Гóсподи, Святóму Воскресéнiю Твоемý.
Чтец: Я́ко благолéпен женáм Áнгел ны́не яви́ся,/ свéтлыя нося́ óбразы естéственныя невещéственныя чистоты́,// зрáком же возвещáя свет воскресéнiя, зовы́й: воскрéсе Госпóдь.
Хор: Пресвятáя Богорóдице, спасù нас.
Богорóдичен: Преслáвная возглагóлашася о Тебè в родéх родóв,/ Бóга Слóва во чрéве вмéщшая,/ чистá же пребы́вши Богорóдице Марíе.// Тéмже Тя вси почитáем, сýщее по Бóзе заступлéнiе нáше.
Канон Богородицы, глас 8
Хор: Пресвятáя Богорóдице, спасù нас.
Чтец: Пречи́стая Богорóдице,/ воплóщшееся Присносýщное и Пребожéственное Слóво,// пáче естествá рóждши, поéм Тя.
Хор: Пресвятáя Богорóдице, спасù нас.
Чтец: Грозд Тя Живонóсен,/ всемíрнаго искáпающ слáдость спасéнiя,// Дéва, Хрїстé, роди́.
Канон Воздвижения, глас 8
Хор: Слáва, Гóсподи, Крестý Твоемý Честнóму.
Чтец: Óбраз дрéвле Моисéй пречи́стыя Стрáсти в себè самóм прообрази́,/ свящéнных средè стоя́:/ Крест же вообрази́в,/ простéртыми побéду длáньми воздви́же,/ держáву погуби́в Амали́ка всегуби́теля.// Тем Хрїстý поим, Бóгу нáшему, я́ко прослáвися. (2 рáза)
Хор: Слáва, Гóсподи, Крестý Твоемý Честнóму.
Чтец: Возложи́ Моисéй на столпè врачевствó,/ тлетвори́ваго избавлéнiе и ядови́таго угрызéнiя,/ и дрéву óбразом Крестá/ по земли́ пресмыкáющагося змíя привязá,/ лукáвный в сем обличи́в вред.// Тем Хрїстý пои́м, Бóгу нáшему, я́ко прослáвися.
Хор: Слáва, Гóсподи, Крестý Твоемý Честнóму.
Чтец: Показá нéбо Крестá побéду благочéстiя держáтелю и царю́ богомýдру,/ врагóв в нéмже злосéрдных низложи́ся свирéпство,/ лесть же преврати́ся,/ и вéра распрострéся земны́м концéм Божéственная.// Тем Хрїстý пои́м, Бóгу нáшему, я́ко прослáвися.
Канон прп. Евмения, глас 2
Хор: Преподóбне óтче Евмéнiе, молù Бóга о нас.
Чтец: Имéя Хрїстá, óтче богомýдре Евмéнiе,/ послýшающа твои́х моли́тв божéственных,// Егóже ти́ха, блажéнне, содéлай любóвiю хвáлящим тя.
Хор: Преподóбне óтче Евмéнiе, молù Бóга о нас.
Чтец: Высокотвóрное от ю́ности, преподóбне, возлюби́в смирéнiе,/ гóрдаго смири́л еси́ змíя// и дáром врачевáнiй я́ве обогати́лся еси́.
Слáва Отцý и Сы́ну и Святóму Дýху.
Тропáрь: Вмести́тельный Дýха оргáн был еси́,/ плóти мудровáнiя мнóгими посты́ души́ покори́в,// лýчшему гóршее ты порабóтив.
И ны́не и прúсно и во вéки векóв, амúнь.
Богорóдичен: Я́же о Тебè, ны́не прорóчествiя испóлнишася, Богороди́тельнице Влады́чице:/ Егóже бо провозвести́ша высокоглагóливо, во чрéво вмести́ла еси́,// во двух совершéнных естествáх.
Катавáсiя (глас 8): Крест начертáв, Моисéй/ впря́мо жезлóм Чермнóе пресечè,/ Iзрáилю пешеходя́щу;/ тóже обрáтно фараóновым колесни́цам, удáрив, совокупѝ,/ вопрекѝ написáв непобеди́мое орýжiе.// Тем Хрїстý пои́м, Бóгу нáшему, я́ко прослáвися.
ПЕСНЬ 3
Iрмóс: Утверждéй в начáле Небесá рáзумом,/ и зéмлю на водáх основáвый,/ на кáмени мя, Хрїстé, зáповедей Твоúх утвердù,/ я́ко несть свят, пáче Тебé// Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Осуждéна бы́вша Адáма вкушéнiем грехá,/ плóти Твоея́ спаси́тельною стрáстiю оправдáл еси́, Хрїстè:// Сам бо непови́нен смéртнаго искýса был еси́, Безгрéшне.
Хор: Слáва, Гóсподи, Святóму Воскресéнiю Твоемý.
Чтец: Воскресéнiя свет возсiя́/ сýщим во тьме, и сéни смéртней седя́щим,/ Бог мой Iисýс,/ и Свои́м Божествóм крéпкаго связáв,// сегó сосýды расхи́тил есть.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася еси́, Богорóдице:/ Ты бо Еди́на прiя́ла еси́ Невмести́маго Бóга в Твоéм чрéве, Несквéрная:// тéмже Тя вéрнiи вси пéсньми, Чи́стая, ублажáем.
Глас 8
Хор: Пресвятáя Богорóдице, спасù нас.
Чтец: Даждь нам пóмощь Твои́ми моли́твами, Всечи́стая,// прилóги отражáющи лю́тых обстоя́нiй.
Хор: Пресвятáя Богорóдице, спасù нас.
Чтец: Éве прамáтери Ты исправлéнiе бы́ла еси́,// Начáльника жи́зни мíрови, Хрїстá Богорóдице, рóждши.
Глас 8
Хор: Слáва, Гóсподи, Крестý Твоемý Честнóму.
Чтец: Я́ко испусти́, ударя́емь, вóду краесекóмый/ непокори́вым лю́дем и жестосéрдым,/ богозвáнныя проявля́ше Цéркве тáинство,// ея́же Крест держáва и утверждéнiе. (2 рáза)
Хор: Слáва, Гóсподи, Крестý Твоемý Честнóму.
Чтец: Рéбром пречи́стым, копiéм прободéнным,/ водá с Крóвiю истечè,/ обновля́ющая Завéт и омывáтельная грехá:// вéрных бо Крест похвалá и царéй держáва и утверждéнiе. (2 рáза)
Глас 2
Хор: Преподóбне óтче Евмéнiе, молù Бóга о нас.
Чтец: Претéкл еси́ тщáтельно, я́ко пчелá,/ цветники́ словéсныя, iерáрше,/ слáдкiй мед собирáя// и в сердéчныя сóты влагáя.
Хор: Преподóбне óтче Евмéнiе, молù Бóга о нас.
Чтец: Житiè чи́сто,/ слóво же сóлiю Божéственною, Евмéнiе, устрóив,// показýеши твою́, слáвне, сокровéнную и благодáть, и свéтлость.
Слáва Отцý и Сы́ну и Святóму Дýху.
Тропáрь: Возвы́сился еси́, добродéтельми украшáемь,/ и на высочáйшыя престóлы возшéл еси́, ми́ром Божéственнаго Дýха помáзався,// и Хрїстóво благовóнiе познавáешися.
И ны́не и прúсно и во вéки векóв, амúнь.
Богорóдичен: Марíе, златáя кади́льнице,/ страстéй мои́х отжени́ зловóнiе// и утверди́ колéблема прилóги льсти́ваго ратобóрца.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Крестá, глас 4: Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрїстè Бóже,/ возвеселѝ нас си́лою Твоéю,/ побéды дая́ нам на супостáты,/ посóбiе имýщим Твоè орýжiе мíра// непобеди́мую побéду.
Íкос: И́же до трéтiяго Небесè восхищéн бысть в рай,/ и глагóлы слы́шав неизречéнныя и Божéственныя,/ и́хже не леть язы́ки человéческими глагóлати,/ что галáтом пи́шет, я́ко рачи́телiе писáнiй прочтóсте и познáсте:/ мне, глагóлет, хвали́тися да не бýдет,/ тóкмо во еди́ном Крестè Госпóдни, на нéмже страдáв, уби́ стрáсти./ Тогó ýбо и мы извéстно да держи́м, Крест Госпóдень, хвалý вси:/ есть бо нам спаси́тельное сiè Дрéво,// орýжiе ми́ра, непобеди́мая побéда.
Кондáк прп. Евмéнiя, глас 2: Свéтом Божéственным просвети́вся, всеблажéнне,/ просвещáеши ны,/ любóвiю пою́щiя твоè честнóе и слáвное/ и святóе, óтче, преставлéнiе,/ iерáрше Евмéнiе,// моля́ непрестáнно о всех нас.
Седáлен прп. Евмéнiя, глас 5: Правослáвными сiя́я, óтче, учéньми,/ мрáчныя éреси вся умáлил еси́/ и, чудéс самодéлатель показáвся, Евмéнiе,/ пресловýщiй по всемý прóмыслом Божéственным был еси́:/ тем тя вéрою почитáем,// я́ко iерáрха и Áнгелов равночéстна.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Крестá, глас 5: Крест претерпéвый вóльным совéтом,/ и от тли человéки свободи́л еси́, Спáсе:/ воспевáем, вéрнiи, и покланя́емся Тебè,/ я́ко просвети́л еси́ ны си́лою Крестá,/ и вси Тя благослови́м, Человеколю́бче и Щéдрый,// я́ко Жизнодáвца и Гóспода.
ПЕСНЬ 4
Iрмóс: Ты моя́ крéпость Гóсподи,/ Ты моя́ и сúла,/ Ты мой Бог, Ты моé рáдованiе,/ не остáвль нéдра Ѻ́тча,/ и нáшу нищетý посетúв./ Тем с прорóком Аввакýмом зовý Ти:// сúле Твоéй слáва, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Ты врагá сýща мя зелó возлюби́л еси́:/ Ты истощáнiем стрáнным сошéл еси́ на зéмлю, Благоутрóбне Спáсе,/ послéдняго моегó досаждéнiя не отвéргся,/ и пребы́в на высотé пречи́стыя Твоея́ слáвы,// прéжде безчéствованнаго прослáвил еси́.
Хор: Слáва, Гóсподи, Святóму Воскресéнiю Твоемý.
Чтец: Кто зря, Влады́ко, ны́не не ужасáется,/ стрáстiю смерть разрушáему;/ Крестóм бежáщее тлéнiе,/ и смéртiю ад богáтства истощавáемый,/ Божéственною си́лою Тебè распя́таго;// чýдно дéло, Человеколю́бче!
Хор: Пресвятáя Богорóдице, спасù нас.
Богорóдичен: Ты вéрным похвалá еси́, Безневéстная, Ты Предстáтельнице,/ Ты и прибéжище хрїстiáн, стенá и пристáнище:/ к Сы́ну бо Твоемý мольбы́ нóсиши, Всенепорóчная, и спасáеши от бед,// вéрою и любóвiю Богорóдицу Чи́стую Тебè знáющих.
Глас 8
Хор: Пресвятáя Богорóдице, спасù нас.
Чтец: Клас возрасти́вшая животвóрный, неорáнная Ни́во,/ подаю́щаго мíрови жизнь, Богорóдице,// спасáй пою́щiя Тя.
Хор: Пресвятáя Богорóдице, спасù нас.
Чтец: Богорóдицу Тя, Всечи́стая, просвéщшiися вси проповéдуем:// Сóлнце бо прáвды родилá еси́, Приснодéво.
Глас 8
Хор: Слáва, Гóсподи, Крестý Твоемý Честнóму.
Чтец: Горькорóдныя преложи́ дрéвом Моисéй/ источники в пусты́ни дрéвле,/ Крестóм ко благочéстiю язы́ков// проявля́я преложéнiе.
Хор: Слáва, Гóсподи, Крестý Твоемý Честнóму.
Чтец: Глубинè внéдривый секýщую/ издадè Iордáн дрéву,/ Крестóм и крещéнiем// сечéнiе лéсти знáменуя.
Хор: Слáва, Гóсподи, Крестý Твоемý Честнóму.
Чтец: Свящéнно ополчáются/ четверочáстнiи лю́дiе, предходя́ще/ óбразом свидéтельства ски́нiи,// крестообрáзными чи́нми прославля́еми.
Хор: Слáва, Гóсподи, Крестý Твоемý Честнóму.
Чтец: Чýдно простирáемь,/ сóлнечныя лучи́ испущáше Крест,/ и повéдаша небесá// слáву Бóга нáшего.
Глас 2
Хор: Преподóбне óтче Евмéнiе, молù Бóга о нас.
Чтец: Дом был еси́ Дýха,/ в Божéственных хрáмех упражня́яся, iерáрше,// и честны́ми учéньми украшáяся.
Хор: Преподóбне óтче Евмéнiе, молù Бóга о нас.
Чтец: Iерáрх богопрiя́тен, óтче мýдре,/ и председáтель горти́нскiй быв,// чудéс лучý изблистáл еси́.
Слáва Отцý и Сы́ну и Святóму Дýху.
Тропáрь: Зiя́нiе вели́кое змíя/ твои́х моли́тв пожéгл еси́ лучáми,/ на тя устреми́вшагося, свящéннейшiй.
И ны́не и прúсно и во вéки векóв, амúнь.
Богорóдичен: Свящéннiи провозвести́ша дрéвле глáси/ Рождествá Твоегó глубинý,// и́хже ны́не сбытiè ви́дехом, Чи́стая.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоè Божествó.
ПЕСНЬ 5
Iрмóс: Вскýю мя отрúнул есù/ от лицá Твоегó, Свéте Незаходúмый,/ и покры́ла мя есть чуждáя тьма, окая́ннаго;/ но обратù мя,/ и к свéту зáповедей Твоúх// путù моя́ напрáви, молю́ся.
Хор: Слáва, Гóсподи, Святóму Воскресéнiю Твоемý.
Чтец: Одéятися претерпéл еси́ в багряни́цу/ прéжде стрáсти Твоея́, Спáсе, поругáемь,/ первоздáннаго покрывáя безобрáзное обнажéнiе:/ и наг пригвозди́лся еси́ на Крестé плóтiю,// совлачáя, Хрїстé, ри́зу умерщвлéнiя.
Хор: Слáва, Гóсподи, Святóму Воскресéнiю Твоемý.
Чтец: От пéрсти смéртныя,/ Ты пáдшее моè пáки наздáл еси́ существó, воскрéс:/ и нестарéющееся, Хрїстè устрóил еси́,/ яви́в пáки я́коже цáрскiй óбраз,// нетлéнiя жизнь блистáющ.
Хор: Пресвятáя Богорóдице, спасù нас.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тебè и Еди́ну хрїстiáне ко Влады́це очищéнiе ми́лостивно предлагáем.
Глас 8
Хор: Пресвятáя Богорóдице, спасù нас.
Чтец: Утоли́ нестерпи́мую бýрю страстéй мои́х,// Я́же Бóга рóждшая, Окорми́теля и Гóспода.
Хор: Пресвятáя Богорóдице, спасù нас.
Чтец: Слýжат рождествý Твоемý, Пречи́стая Богорóдице,// Áнгельстiи чи́нове, и человéков собрáнiе.
Глас 8
Хор: Слáва, Гóсподи, Крестý Твоемý Честнóму.
Чтец: Тебè, приснопéтое Дрéво, на нéмже прострéся Хрїстóс,/ Едéм храня́щее обращáющееся орýжiе, Крéсте, устыдéся:/ стрáшный же Херувíм уступи́ на тебè пригвождéнному Хрїстý,// подаю́щему мир душáм нáшим.(Двáжды)
Хор: Слáва, Гóсподи, Крестý Твоемý Честнóму.
Чтец: Подзéмных си́лы проти́вныя Крестá страшáтся/ начертáема знáменiя на воздýсе,/ по немýже хóдят Небéсных и земнорóдных рóди,/ колéна приклоня́юще Хрїстý,// подаю́щему мир душáм нáшим.
Хор: Слáва, Гóсподи, Крестý Твоемý Честнóму.
Чтец: Заря́ми нетлéнными я́влься Божéственный Крест/ омрачéнным язы́ком, заблуждéнным в прéлести,/ Божéственный свет облистáв,/ усвоя́ет на нем пригвождéнному Хрїстý,// подаю́щему мир душáм нáшим.
Глас 2
Хор: Преподóбне óтче Евмéнiе, молù Бóга о нас.
Чтец: Рáзум имéл еси́, я́ко умири́в от страстéй, преподóбне, ум и дýшу:/ тем разрушáеши свáры вéрно цáрствующих// и дóбре покаря́ющихся тебè.
Хор: Преподóбне óтче Евмéнiе, молù Бóга о нас.
Чтец: Слýхи подложи́в тебè царéй, вéрный/ разруши́ дóлгую враждý, пáгубу родя́щую,// и брáтское единоýмiе лю́бит, богомýдре Евмéнiе.
Слáва Отцý и Сы́ну и Святóму Дýху.
Тропáрь: Я́коже свети́льник, пришéд, Рим просвещáеши, совершáя чудесá/ и во глубинé страстéй ныря́ющiя// ко пристáнищу ти́ху врачевствá, блажéнне, я́ве призывáя.
И ны́не и прúсно и во вéки векóв, амúнь.
Богорóдичен: Ю́на я́ко Младéнца нам, Превéчнаго же Сы́на родилá еси́,/ воли́тельными двемá дéйствы сýща сугýбаго,// я́ко Человéка кýпно же и Бóга, Всенепорóчная.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Очúсти мя, Спáсе,/ мнóга бо беззакóнiя моя́,/ и из глубины́ зол возведù, молю́ся:/ к Тебé бо возопúх, и услы́ши мя,// Бóже спасéнiя моегó.
Хор: Слáва, Гóсподи, Святóму Воскресéнiю Твоемý.
Чтец: Дрéвом крéпко низложи́ мя началозлóбный:/ Ты же, Хрїстè, вознéсся на Крестè,/ крепчáе низложи́л еси́, посрами́в сегó,// пáдшаго же воскреси́л еси́.
Хор: Слáва, Гóсподи, Святóму Воскресéнiю Твоемý.
Чтец: Ты ущéдрил еси́ Сióна, возсiя́вый от грóба,/ нóваго вмéсто вéтхаго соверши́в, я́ко Благоутрóбен, Божéственною Твоéю крóвiю:// и ны́не цáрствуеши в нем во вéки, Хрїстè.
Хор: Пресвятáя Богорóдице, спасù нас.
Богорóдичен: Да избáвимся от лю́тых прегрешéнiй,/ мольбáми Твои́ми, Богороди́тельнице Чи́стая,/ и да улучи́м, Пречи́стая, Божéственное сiя́нiе,// из Тебè неизречéнно воплощéннаго Сы́на Бóжiя.
Глас 8
Хор: Пресвятáя Богорóдице, спасù нас.
Чтец: Храм Тя Бóжiй и Ковчéг,/ и чертóг одушевлéнный, и дверь Небéсную,// Богорóдице, вéрнiи возвещáем.
Хор: Пресвятáя Богорóдице, спасù нас.
Чтец: Трéбищ разруши́тель, я́ко Бог,/ бы́вшее рождествó Твоè, Марíе Богоневéсто,// покланя́емо есть со Отцéм и Дýхом.
Глас 8
Хор: Слáва, Гóсподи, Крестý Твоемý Честнóму.
Чтец: Стáростiю преклони́вся и недýгом отягчéн, испрáвися Iáков, рýце премени́в,/ дéйствiе явля́я жизнонóснаго Крестá:/ и́бо вéтхость закóннаго сенóвнаго писáнiя новописá на сем Плóтiю пригвозди́выйся Бог// и душегуби́тельный недýг лéсти отгнá. (2 рáза)
Хор: Слáва, Гóсподи, Крестý Твоемý Честнóму.
Чтец: На ю́ныя возложи́в длáни божéственный Iзрáиль, крестови́дно главы́ явля́ше,/ я́ко старéйшая слáва, законослужи́тели лю́дiе./ Тéмже, подмнéвся тáко испрельсти́тися, не измени́ жизнонóснаго óбраза:/ превзы́дут бо лю́дiе Хрїстóвы Бóжiи новоутверждéннiи,// вопiя́ху, Крестóм ограждáеми. (2 рáза)
Глас 2
Хор: Преподóбне óтче Евмéнiе, молù Бóга о нас.
Чтец: Дéтельное сокрóвище неиждивáемое имéя в сéрдцы твоéм, Хрїстá, Евмéнiе,/ я́коже брéнiе вмени́л еси́ злáто,// éже царь подадè тебè.
Хор: Преподóбне óтче Евмéнiе, молù Бóга о нас.
Чтец: На высóцем седáлищи сел еси́, óтче,/ ми́ра глагóл привещáв Цéркви свы́ше,// я́же ны́не призывáнiем твои́м хвáлится.
Слáва Отцý и Сы́ну и Святóму Дýху.
Тропáрь: Не омочи́вся грехми́, преплы́л еси́ житiя́ бýрю многоболéзненную/ и в пристáнища дости́гл еси́,// идéже собóр преподóбных весели́тся.
И ны́не и прúсно и во вéки векóв, амúнь.
Богорóдичен: На Тя сшед, Небéсный Дождь/ оляденéвшую зéмлю, Приснодéво, богознáнiя водáми напои́в,// многоплóдну показá.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, ами́нь.
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Íкос: Áдова цáрствiя плени́вый, и мéртвыя воскреси́вый, Долготерпели́ве,/ жены́ мvронóсицы срéтил еси́, вмéсто печáли рáдость принесы́й:/ и апóстолом Твои́м возвести́л еси́ победи́тельная Спáсе мой знáменiя Живодáтелю,/ и тварь просвещáеши, Человеколю́бче.// Сегó рáди и мiр срáдуется, éже из мéртвых востáнiю Твоемý, Многоми́лостиве.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá./ Сегó рáди óтроцы в пещù рáдованною ногóю,/ я́ко во цвéтнице ликýюще поя́ху:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрїстè, удивля́ет Áнгелы,/ на Крестè зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебé.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебè исходя́ща Дýха Прáваго,// Соестéственна и Соприсносýщна.
Глас 8
Хор: Пресвятáя Богорóдице, спасù нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасù нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 8
Хор: Слáва, Гóсподи, Крестý Твоемý Честнóму.
Чтец: От дрéва вкуси́в, пéрвый в человéцех в тлéнiе всели́ся:/ отвержéнiем бо жи́зни безчéстнейшим осуди́вся,/ всемý рóду телотлéнен нéкiй я́ко вред недýга преподадè;/ но, обрéтше, земнорóднiи, воззвáнiе крéстным Дрéвом, зовéм:// препéтый отцéв и нас Бóже, благословéн еси́. (Двáжды)
Хор: Слáва, Гóсподи, Крестý Твоемý Честнóму.
Чтец: Разруши́ повелéнiе Бóжiе преслушáнiе,/ и дрéво принесè смерть человéком,/ еже неблаговрéменно причáстно бы́вшее;/ во утверждéнiе же зелó честнáго/ оттýду жи́зни дрéво возбраня́емо бе,/ éже разбóйнику злоумéршу отвéрзе, благоразýмно зовýщу:// препéтый отцéв и нас Бóже, благословéн еси́.
Хор: Слáва, Гóсподи, Крестý Твоемý Честнóму.
Чтец: Жезлá объéмлет край Ióсифова,/ бýдущая зря, Iзрáиль,/ Цáрствiя держáвное,/ яко возымýществит преслáвный Крест, проявля́я:/ сей бо царéй победонóсная похвалá и свет вéрою зовýщим:// препéтый отцéв и нас Бóже, благословéн еси.
Глас 2
Хор: Преподóбне óтче Евмéнiе, молù Бóга о нас.
Чтец: Мéртвых пóмыслов усéрдiем дýши похваля́яся,/ во глубочáйшей стáрости, преподóбне,/ стрáнствованiя твори́л еси́ на благодея́нiе вéрою прiéмлющих, Евмéнiе,// тя, сéятеля свящéнных и чéстных учéнiй.
Хор: Преподóбне óтче Евмéнiе, молù Бóга о нас.
Чтец: Рим твои́х наслади́вся дóбрых,/ дар люби́мый не хотя́ща, óтче Евмéнiе, Фиваíде отсылáет;/ идéже быв, востягáеши сухоты́ посуплéнiе// надождéнiем честны́х моли́тв твои́х, преподóбне.
Слáва Отцý и Сы́ну и Святóму Дýху.
Тропáрь: Сосцы́ воспитáвся воздержáнiя, чистоты́ млекó ссал еси́/ и вóзраста мéру дости́гл еси́, вшед на высотý, óтче, добродéтелей,/ и сóлнца возсiя́в светлéе богознáменьми// нóщiю объя́тым страстéй.
И ны́не и прúсно и во вéки векóв, амúнь.
Богорóдичен: Невещéственнаго Свéта селéнiе Твоè чрéво бысть,/ светлостьми́ божéственнаго знáнiя безбóжiе умáлившаго,/ Пречи́стая Богоневéсто Отрокови́це, Éйже, пою́ще, взывáем:// благословéн Плод Твоегó чрéва.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Седмерúцею пещь/ халдéйскiй мучúтель Богочестúвым неúстовно разжжé,/ сúлою же лýчшею спасéны сiя́ вúдев,/ Творцý и Избáвителю вопiя́ше:/ óтроцы, благословúте,/ свящéнницы, воспóйте,// лю́дiе, превозносúте во вся вéки.
Продолженiе здесь