Недeля 17 по Пятидесятнице, по Воздвижении.Попразднство Воздвижения Креста УТРЕНЯ(ок-ние) ЧАС ПЕРВЫЙ
1 октября́ 2023 гóда. Недéля 17 по Пятидеся́тнице, по Воздвúженiи. Попрáзднство Воздвúженiя Честнáго и Животворя́щего Крестá Госпóдня. Прп. Евмéнiя, епíскопа Гортúнского. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Глас 8
Хор: Пресвятáя Богорóдице, спасù нас.
Чтец: Сопроти́вных разжжéнныя и пламенови́дныя на нас угаси́ стрéлы:// я́ко да поéм Тя во вся вéки.
Хор: Пресвятáя Богорóдице, спасù нас.
Чтец: Преестéственне Содéтеля и Спáса,/ Бóга Слóва родилá еси́, Дéво:// тéмже Тя поéм, и превознóсим во вся вéки.
Глас 8
Хор: Слáва, Гóсподи, Крестý Твоемý Честнóму.
Чтец: Воздвизáему Дрéву,/ окроплéну Крóвiю воплóщшагося Слóва Бóга,/ пóйте, Небéсныя Си́лы;/ земны́х воззвáнiе прáзднующе, лю́дiе,/ поклони́теся Хрiстóву Крестý,// и́мже мíру востáнiе во вéки. (Двáжды)
Хор: Слáва, Гóсподи, Крестý Твоемý Честнóму.
Чтец: Земнорóднiи, длáньми, строи́телiе благодáти,/ Крест, на нéмже стоя́ше Хрiстóс Бог, возноси́те священнолéпно/ и копié, Бóжiя Слóва Тéло пробóдшее,/ да ви́дят язы́цы вси спасéнiе Бóжiе,// слáвяще Егó во вéки.
Хор: Слáва, Гóсподи,Крестý Твоемý Честнóму.
Чтец: Божéственным судóм предызбрáннiи, весели́теся,/ хрiстiáнстiи вéрнiи цáрiе,/ хвали́теся победонóсным орýжiем,/ прiéмше от Бóга Крест честны́й:/ в сем бо колéна брáней, дéрзости и́щуще,// разсыпáются во вéки.
Глас 2
Хор: Преподóбне óтче Евмéнiе, молù Бóга о нас.
Чтец: Победи́в врагá и течéнiе дóброе соверши́в,/ в глубочáйшей стáрости ко отцéм твои́м прешéл еси́,/ я́ко пшени́ца зрéлая,// на стрáнней земли́ прiéм житiя́ конéц.
Хор: Преподóбне óтче Евмéнiе, молù Бóга о нас.
Чтец: Никáкоже пóмняще твои́х, óтче, дóбрых,/ дéти Фиваíдстiи, отéчеству и пáстве,/ свящéнную твою́ рáку, лéпотно держáщiи, предпосылáют,// ея́же возвращéнiем чудéс тóчат благодáть.
Благословúм Отцá, и Сы́на, и Святáго Дýха, Гóспода.
Тропáрь: Рáка Кирíллово честнóе и многострадáльное прéжде содержáше тéло/ и твоé ны́не скрывáет преи́скренно, мýдре,/ совокупи́в житiéм единомýдренныя,// и́хже гóрнее отéчество имéет во вéки.
И ны́не и прúсно и во вéки векóв, амúнь.
Богорóдичен: Свящéннейшiй прорóков честны́й лик/ Тя прописýет кiвóт и несекóмую гóру,/ жезл и дверь, éюже, я́ко весть, прóйде Вы́шнiй,// пáки заключéну остáвив Тя, Дéво.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ужасéся о сем Нéбо,/ и земли́ удиви́шася концы́,/ я́ко Бог яви́ся человéком плóтски,/ и чрéво Твоé бысть прострáннейшее Небéс./ Тем Тя, Богорóдицу,// Áнгелов и человéк чиноначáлiя величáют.
Хор: Слáва, Гóсподи, Святóму Воскресéнiю Твоемý.
Чтец: Божéственным и Безначáльным Естествóм прост сый,/ сложи́лся еси́ прiя́тiем плóти, в Тебè Самóм Сiю́ состáвив, Слóве Бóжiй,/ и пострадáв я́ко человéк, пребы́л еси́ кромè страстéй, я́ко Бог.// Тéмже Тя во Двою́ Существý нераздéльно и неслiя́нно величáем.
Хор: Слáва, Гóсподи, Святóму Воскресéнiю Твоемý.
Чтец: Отцá по Существý Божéственному,/ я́коже естествóм быв человéк,/ рекл еси́ Бóга Вы́шнiй, рабóм снизходя́,/ воскрéс от грóба, благодáтiю Отцá/ земнорóдным полóж, и҆́же по естествý Бóга же и Влады́ку,// с Ни́мже Тя вси величáем.
Хор: Пресвятáя Богорóдице, спасù нас.
Богорóдичен: Яви́лася еси́, о Дéво Мáти Бóжiя,/ пáче естествá рóждши плóтiю Бóга Слóва,/ Егóже Отéц отры́гну от сéрдца Своегó прéжде всех век, я́ко Благ,// Егóже ны́не и телéс превы́шша разумéем, áще и в тéло облечéся.
Глас 8
Хор: Пресвятáя Богорóдице, спасù нас.
Чтец: Рáдости и весéлiя испóлнь есть пáмять Твоя́,/ приступáющим исцелéнiя точáщи,// и благочéстно Богорóдицу Тя возвещáющим.
Хор: Пресвятáя Богорóдице, спасù нас.
Чтец: Псалмы́ Тя воспевáем Благодáтная,/ и немóлчно, éже рáдуйся, принóсим:// Ты бо источи́ла еси́ всем рáдость.
Глас 8
Хор: Слáва, Гóсподи, Крестý Твоемý Честнóму.
Чтец: Гóрести убíйственныя, я́же от дрéва, не остáвив, Гóсподи,/ Крестóм бо сiю́ совершéнно истреби́л еси́./ Сегó рáди и дрéвом услади́ иногдá гóресть вод Мéрры:/ прообразýющее Крестá дéйство,// éже вся Си́лы Небéсныя величáют. (2 рáза)
Хор: Слáва, Гóсподи, Крестý Твоемý Честнóму.
Чтец: Непрестáнно гружáемыя мрáком прáотца, Гóсподи,/ Крестóм возвы́сил еси́ днесь,/ я́ко бо лéстiю весьмá неудержáнно естествó прéжде сведенó бысть,/ всерóдне ны пáки испрáви свет Крестá Твоегó,// егóже, вéрнiи, величáем.
Хор: Слáва, Гóсподи, Крестý Твоемý Честнóму.
Чтец: Да óбраз покáжеши мíру покланя́емый, Гóсподи, Крестá,/ во всех я́ко преслáвный, на небесéх изобрази́л еси́,/ свéтом безмéрным озарéн,/ царю́ всеорýжiе непобеди́мое.// Тем Тя вся Си́лы Небéсныя величáют.
Глас 2
Хор: Преподóбне óтче Евмéнiе, молù Бóга о нас.
Чтец: Я́ко Хрiстóв iерáрх,/ от си́лы, óтче, в си́лу прешéл еси́ чýдно,/ идéже ли́цы свящéннейшiи слýжат во стрáсе Трóице Честнéй,// со всéми Небéсными, всеблажéнне Евмéнiе, Си́лами.
Хор: Преподóбне óтче Евмéнiе, молù Бóга о нас.
Чтец: Устáви ны́нешнюю бýрю отéчества, Божествó твои́ми умилостивля́я моли́твами:/ вáрварское, блажéнне, нахождéнiе низложи́, нас мýчащее,/ искушéнiе, срéющее злых во глубинý погибéли,// приснопáмятне Евмéнiе.
Слáва Отцý и Сы́ну и Святóму Дýху.
Тропáрь: Твоя́ всесвящéнная пáмять созывáет пáстыри преподóбныя и лю́ди благочести́выя,/ освящéнiе всем нося́щи:/ ю́же совершáющiя, богáтно озари́ ны сiя́ньми, сýщими в тебé благодáтьми,// всехвáльне Евмéнiе.
И ны́не и прúсно и во вéки векóв, амúнь.
Богорóдичен: Нóсиши Нося́щаго вся Божéственною си́лою/ и питáеши, Всечи́стая, от сосéц все дыхáнiе Питáющаго,/ пáче умá Твоé чýдо удивля́ет А́нгелы и человéки,// при́сно Тя пою́щiя и любóвiю блажáщiя.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрїстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный шесты́й: Показýя, я́ко человéк еси́ Спáсе, по существý,/ посредé став воскрéс от грóба,/ и брáшна сопричасти́лся еси́,/ учи́л еси́ крещéнiю покая́нiя./ Áбiе же к Небéсному вознéслся еси́ Ѻтцý,/ и ученикóм Утéшителя послáти обещáл еси́, Пребожéственный Богочеловéче.// Слáва Твоемý востáнiю.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Попрáзднства: Светозáрными сiя́нiи Крест Госпóдень/ на воздви́женiе егó всех желáнiем Божéственным, предлежá, созывáет:/ прiиди́те, сегó вси рáдостiю, и любóвiю, и стрáхом целýим вéрно// и прослáвим Еди́наго Творцá и Влады́ку.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 8: Гóсподи, áще и суди́лищу предстáл еси́ от Пiлáта суди́мый,/ но не отступи́л еси́ от престóла со Отцéм седя́:/ и воскрéс из мéртвых,/ мiр свободи́л еси́ от рабóты чуждáго,// я́ко Щедр и Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, орýжiе на дiáвола/ Крест Твой дал еси́ нам:/ трепéщет бо и трясéтся, не терпя́ взирáти на си́лу Егó:/ я́ко мéртвыя возставля́ет, и смерть упраздни́./ Сегó рáди покланя́емся// погребéнiю Твоемý и востáнiю.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, áще и я́ко мéртва/ во грóбе iудéи положи́ша,/ но я́ко Царя́ спя́ща вóини Тя стрежáху,/ и я́ко животá сокрóвище, печáтiю печáташа,/ но воскрéсл еси́,// и пóдал еси́ нетлéнiе душáм нáшым.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел Твой, Гóсподи,/ Воскресéнiе проповéдавый,/ стрáжи ýбо устраши́,/ женáм же возгласи́, глагóля:/ что и́щете Живáго с мéртвыми;/ воскрéсе Бог сый,// и вселéнней жизнь даровá.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Воздвúженiя, глас 2: Пéсньми тáинственными/ воспои́м соглáсно/ Крест Госпóдень,/ на нéмже Спас распя́тся,// всех Воскресéнiе.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Прiиди́те, монáшествующих/ мнóжества, сошéдшеся,/ воспои́м божéственне/ живонóсное Дрéво,// на нéмже Хрiстóс распрострéся.
Возносúте Гóспода Бóга нáшего/ и покланя́йтеся поднóжiю нóгу Eгó, я́ко свя́то eсть. (Пс.98:5)
Стiхúра: Прослáвим, вéрнiи,/ Крест Госпóдень,/ на нéмже излiя́ся/ Кровь Влады́чня,// во всех избавлéнiе.
Бог же Царь наш прéжде вéка, содéла спасéнiе посредé землù.(Пс.73:12)
Глас 4: Светосiя́нен звездáми óбраз/ предпоказá, Крéсте, побéду одолéнiя/ благочести́вому царю́ вели́кому,/ егóже мáти Елéна изобрéтши,/ ми́ру явлéнна сотвори́,/ и, тя днесь воздви́жуще, вéрных ли́цы, зовéм:/ просвети́ ны свéтлостiю твоéю,/ Крéсте живонóсный,/ освяти́ ны крéпостiю твоéю,/ всечестны́й Крéсте,/ и утверди́ ны воздви́женiем твои́м,// воздвизáемый ко ополчéнiю врагóв.
Слáва Отцý и Сыну и Святóму Дýху.
Стiхúра евáнгельская шестáя, глас 6: И҆́стинный мир Ты, Хрїстè, к человéком Бóжiй,/ мир Твой дая́, по востáнiи ученикóм,/ пристрáшны показáл еси́ я́,/ мня́щiя дух ви́дети:/ но ути́шил еси́ мятéж души́ их,/ показáвый рýце и нóзе Твои́./ Обáче не вéрующим ещè,/ брáшен причащéнiем, и учéнiй воспоминáнiем,/ отвéрзл еси́ их ум, éже разумéти Писáнiя:/ и҆́мже и Ѻ́тческое обетовáнiе обещáв, и благослови́в я́,/ отступи́л еси́ на нéбо./ Тéмже с ни́ми покланя́емся Тебè,// Гóсподи, слáва Тебè.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 8: С высоты́ снизшéл еси́, Благоутрóбне,/ погребéнiе прiя́л еси триднéвное,/ да нас свободи́ши страстéй,// Животé и Воскресéнiе нáше, Гóсподи, слáва Тебé!
Слáва Отцý и Сы́ну и Святóму Дýху.
Тропáрь Крестá, глас 1: Спасѝ, Гóсподи, лю́ди Твоя́/ и благословѝ достоя́нiе Твоè,/ побéды правослáвным хрїстiáнам на сопроти́вныя дáруя// и Твоè сохраня́я Крестóм Твои́м жи́тельство.
[ц.ч.]Спаси́, Гóсподи, лю́ди Твоя́/ и благослови́ достоя́нiе Твоè,/ побéды грядýщему рýсскому Царю́ и правослáвным хрїстiáнам на сопроти́вныя дáруя// и Твоè сохраня́я Крестóм Твои́м жи́тельство.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Крестá, глас 4: Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрїстè Бóже,/ возвеселѝ нас си́лою Твоéю,/ побéды дая́ нам на супостáты,/ посóбiе имýщим Твоè орýжiе мíра// непобеди́мую побéду.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу