СВЕТЛОЕ ХРИСТОВО ВОСКРЕСЕНИЕ. ПАСХА. ЗАУТРЕНЯ. 2 мая 2021 года. Служба мирским чином.
Светлое Христово Воскресение. ПАСХА. Последование полýнощницы, заýтрени, часов и обедницы для домашнего (келейного) совершения.
СВЕТЛАЯ ПАСХАЛЬНАЯ ЗАУТРЕНЯ
Возжигаем свечи и держим их в руках до хвалитных стихир.
Стихира, глас 6: Воскресéние Твоé, Христé Спáсе,/ Ангели поют на небесéх,/ и нас на землú сподóби/ чистым сéрдцем/ Тебé слáвити. (Трижды)
Молитвами святых отéц нáших, Гóсподи Иисусе Христé, Бóже наш, помилуй нас.
Хор: Аминь.
ПАСХА́ЛЬНОЕ НАЧА́ЛО
Хор, тропáрь, глас 5: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв. (Трижды)
Стих 1: Да воскрéснет Бог, и расточáтся врази Егó,/ и да бежáт от Лицá Егó ненавидящии Егó.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Стих 2: Яко исчезáет дым, да исчéзнут,/ яко тáет воск от лицá огня.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Стих 3: Тáко да погибнут грéшницы от Лицá Бóжия,/ а прáведницы да возвеселятся.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Стих 4: Сей день, егóже сотвори Госпóдь,/ возрáдуемся и возвеселимся вонь.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Чтец: Слáва Отцу и Сыну и Святóму Духу.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Чтец: И ныне и присно и во вéки векóв. Аминь.
Хор: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
И паки: Христóс воскрéсе из мéртвых,/ смéртию смерть попрáв/ и сýщим во гробéх живóт даровáв.
Гóсподи, помилуй, (12 раз.)
Слáва Отцу и Сыну и Святóму Духу, и ныне и присно и во вéки векóв, аминь.
КАНОН ПАСХАЛЬНЫЙ, ГЛАС 1
Пасхальный канон поется полностью хором: и ирмосы, и припевы, и тропари, и катавасии.
ПЕСНЬ 1
Ирмóс: Воскресéния день,/ просветимся, людие./ Пáсха, Госпóдня Пáсха:/ от смéрти бо к жизни,/ и от земли к небеси,/ Христóс Бог нас преведé,// побéдную поющия.
Припéв: Христóс воскрéсе из мéртвых.
Тропáрь: Очистим чувствия, и узрим/ неприступным свéтом/ Воскресéния, Христá/ блистáющася,/ и рáдуйтеся, рекуща,/ ясно да услышим,// побéдную поюще.
Припéв: Христóс воскрéсе из мéртвых.
Тропáрь: Небесá убо достóйно да веселятся,/ земля же да рáдуется,/ да прáзднует же мир,/ видимый же весь и невидимый:/ Христóс бо востá,// весéлие вéчное.
Катавáсия: Воскресéния день,/ просветимся, людие./ Пáсха, Госпóдня Пáсха:/ от смéрти бо к жизни,/ и от земли к небеси,/ Христóс Бог нас преведé,// побéдную поющия.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
ПЕСНЬ 3
Ирмóс: Приидите, пиво пиéм нóвое,/ не от кáмене неплóдна чудодéемое,/ но нетлéния истóчник/ из грóба одождивша Христá,// в Нéмже утверждáемся.
Припéв: Христóс воскрéсе из мéртвых.
Тропáрь: Ныне вся испóлнишася свéта,/ нéбо же и земля, и преиспóдняя:/ да прáзднует убо вся тварь/ востáние Христóво,// в нéмже утверждáется.
Припéв: Христóс воскрéсе из мéртвых.
Тропáрь: Вчерá спогребóхся Тебé Христé,/ совостаю днесь/ воскрéсшу Тебé,/ сраспинáхся Тебé вчерá,// Сам мя спрослáви Спáсе во Цáрствии Твоéм.
Катавáсия: Приидите, пиво пиéм нóвое,/ не от кáмене неплóдна чудодéемое,/ но нетлéния истóчник/ из грóба одождивша Христá,// в Нéмже утверждáемся.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Ипакои, глас 4: Предварившия утро яже о Марии,/ и обрéтшия кáмень отвалéн от грóба,/ слышаху от Ангела: во свéте присносущнем Сущаго,/ с мéртвыми что ищете, яко человéка?/ Видите грóбныя пелены, тецыте и миру проповéдите,/ яко востá Госпóдь, умертвивый смерть,// яко есть Сын Бóга, спасáющаго род человéческий.
ПЕСНЬ 4
Ирмóс: На Божéственней стрáжи/ богоглагóливый Аввакум/ да стáнет с нáми, и покáжет/ светонóсна Ангела,/ ясно глагóлюща:/ днесь спасéние миру,/ яко воскрéсе Христóс,// яко всесилен.
Припéв: Христóс воскрéсе из мéртвых.
Тропáрь: Мужеский убо пол,/ яко развéрзый дéвственную утрóбу,/ явися Христóс:/ яко человéк же,/ Агнец наречéся:/ непорóчен же,/ яко невкусен сквéрны,/ нáша Пáсха,/ и яко Бог истинен// совершéн речéся.
Припéв: Христóс воскрéсе из мéртвых.
Тропáрь: Яко единолéтный áгнец,/ благословéнный нам венéц Христóс,/ вóлею за всех заклáн бысть,/ Пáсха чистительная,/ и пáки из грóба крáсное// прáвды нам возсия Сóлнце.
Припéв: Христóс воскрéсе из мéртвых.
Тропáрь: Богоотéц убо Давид/ пред сéнным ковчéгом скакáше игрáя,/ людие же Бóжии святии,/ образóв сбытиé зряще,/ веселимся Божéственне,/ яко воскрéсе Христóс,// яко Всесилен.
Катавáсия: На Божéственней стрáжи/ богоглагóливый Аввакум/ да стáнет с нáми, и покáжет/ светонóсна Ангела,/ ясно глагóлюща:/ днесь спасéние миру,/ яко воскрéсе Христóс,// яко всесилен.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки вeкóв, аминь.
ПЕСНЬ 5
Ирмóс: Утренюем утреннюю глубоку,/ и вмéсто мира песнь принесéм Владыце,/ и Христá узрим/ прáвды Сóлнце,// всем жизнь возсияюща.
Припéв: Христóс воскрéсе из мéртвых.
Тропáрь: Безмéрное Твоé благоутрóбие,/ áдовыми узами содержимии зряще,/ к свéту идяху Христé,/ весéлыми ногáми,// Пáсху хвáляще вéчную.
Припéв: Христóс воскрéсе из мéртвых.
Тропáрь: Приступим свещенóснии,/ исходящу Христу из грóба, яко жениху,/ и спрáзднуем любопрáзднственными чинми// Пáсху Бóжию спасительную.
Катавáсия: Утренюем утреннюю глубоку,/ и вмéсто мира песнь принесéм Владыце,/ и Христá узрим/ прáвды Сóлнце,// всем жизнь возсияюща.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
ПЕСНЬ 6
Ирмóс: Снизшéл еси в преиспóдняя земли,/ и сокрушил еси вереи вéчныя,/ содержáщия связанныя, Христé,/ и триднéвен, яко от кита Иóна,// воскрéсл еси от грóба.
Припéв: Христóс воскрéсе из мéртвых.
Тропáрь: Сохранив цéла знáмения Христé,/ воскрéсл еси от грóба,/ ключи Дéвы не вредивый в рождествé Твоéм,// и отвéрзл еси нам рáйския двéри.
Припéв: Христóс воскрéсе из мéртвых.
Тропáрь: Спáсе мой,/ живóе же и нежéртвенное заколéние,/ яко Бог Сам Себé/ вóлею привéл Отцу,/ совоскресил еси всерóднаго Адáма,// воскрéс от грóба.
Катавáсия: Снизшéл еси в преиспóдняя земли,/ и сокрушил еси вереи вéчныя,/ содержáщия связанныя, Христé,/ и триднéвен, яко от кита Иóна,// воскрéсл еси от грóба.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Кондáк, глас 8: Аще и во гроб снизшéл еси, Безсмéртне,/ но áдову разрушил еси силу,/ и воскрéсл еси, яко победитель, Христé Бóже,/ женáм мироно́сицам вещáвый: рáдуйтеся,/ и Твоим апóстолом мир дáруяй,// пáдшим подаяй воскресéние.
Икос: Еже прéжде сóлнца Сóлнце зашéдшее иногдá во гроб,/ предвариша ко утру, ищущия яко дне миронóсицы дéвы,/ и другá ко друзéй вопияху:/ о другини! Приидите, вонями помáжем тéло живонóсное и погребéное,/ плоть воскресившаго пáдшаго Адáма, лежáщую во грóбе./ Идем, потщимся якоже волсви, и поклонимся,/ и принесéм мира яко дáры, не в пеленáх, но в плащанице обвитому,/ и плáчим, и возопиим: о Владыко, востáни,// пáдшим подаяй воскресéние.
Воскресéние Христóво видевше,/ поклонимся Святóму Гóсподу Иисусу,/ единому безгрéшному,/ Кресту Твоему покланяемся, Христé,/ и святóе Воскресéние Твоé поéм и слáвим:/ Ты бо еси Бог наш,/ рáзве Тебé инóго не знáем,/ имя Твоé именуем./ Приидите вси вéрнии,/ поклонимся Святóму Христóву Воскресéнию:/ се бо прииде Крестóм рáдость всему миру./ Всегдá благословяще Гóспода,/ поéм Воскресéние Егó:/ распятие бо претерпéв,// смéртию смерть разруши. (Трижды)
Воскрéс Иисус от грóба,/ якоже проречé,/ дадé нам живóт вéчный// и вéлию милость. (Трижды)
ПЕСНЬ 7
Ирмóс: Отроки от пéщи избáвивый,/ быв Человéк,/ стрáждет яко смéртен,/ и стрáстию смéртное,/ в нетлéния облачит благолéпие,/ Един благословéн// отцéв Бог, и препрослáвлен.
Припéв: Христóс воскрéсе из мéртвых.
Тропáрь: Жены с миры богомудрыя в след Тебé течáху:/ Егóже, яко мéртва, со слезáми искáху,/ поклонишася рáдующияся Живóму Бóгу,/ и Пáсху тáйную// Твоим, Христé, ученикóм благовестиша.
Припéв: Христóс воскрéсе из мéртвых.
Тропáрь: Смéрти прáзднуем умерщвлéние,/ áдово разрушéние,/ инóго жития вéчнаго начáло,/ и игрáюще поéм Винóвнаго,/ Единаго благословéннаго// отцéв Бóга, и препрослáвленнаго.
Припéв: Христóс воскрéсе из мéртвых.
Яко воистинну свящéнная,/ и всепрáзднственная сия спасительная нощь,/ и светозáрная,/ светонóснаго дне,/ востáния сущи провозвéстница:// в нéйже безлéтный Свет из грóба плóтски всем возсия.
Катавáсия: Отроки от пéщи избáвивый,/ быв Человéк,/ стрáждет яко смéртен,/ и стрáстию смéртное,/ в нетлéния облачит благолéпие,/ Един благословéн// отцéв Бог, и препрослáвлен.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
ПЕСНЬ 8
Ирмóс: Сей наречéнный и святый день,/ Един суббóт Царь и Госпóдь,/ прáздников прáздник/ и торжествó есть торжéств,// вóньже благословим Христá во вéки.
Припéв: Христóс воскрéсе из мéртвых.
Тропáрь: Приидите, нóваго виногрáда рождéния,/ Божéственнаго весéлия,/ в нарóчитом дни Воскресéния,/ Цáрствия Христóва приобщимся,/ поюще Егó// яко Бóга во вéки.
Припéв: Христóс воскрéсе из мéртвых.
Тропáрь: Возведи óкрест óчи твои, Сиóне, и виждь:/ се бо приидóша к тебé,/ яко богосвéтлая светила,/ от зáпада, и сéвера, и мóря,/ и востóка чáда твоя,// в тебé благословящая Христá во вéки.
Припев: Пресвятáя Трóице, Бóже наш, слáва Тебé.
Трóичен: Отче Вседержителю, и Слóве, и Душе,/ треми соединяемое во Ипостáсех Естествó,/ Пресущественне и Пребожéственне,/ в Тя крестихомся,// и Тя благословим во вся вéки.
Катавáсия: Сей наречéнный и святый день,/ Един суббóт Царь и Госпóдь,/ прáздников прáздник/ и торжествó есть торжéств,// вóньже благословим Христá во вéки.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды, поскóру)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Припев: Величит душá моя воскрéсшаго триднéвно от грóба, Христá Жизнодáвца.
ПЕСНЬ 9
Ирмóс: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Припéв: Величит душá моя/ воскресшаго триднéвно от грóба// Христá Жизнодáвца.
Тропáрь: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Припéв: Величит душá моя/ вóлею страдáвша, и погребéна,// и воскрéсшаго триднéвно от грóба.
Тропáрь: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Припéв: Христóс нóвая Пáсха,/ Жéртва живáя,/ Агнец Бóжий,// взéмляй грехи мира.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси быти,/ до скончáния вéка Христé:/ Егóже, вéрнии,// утверждéние надéжди имуще, рáдуемся.
Припéв: Ангел вопияше Благодáтней:/ Чистая Дéво, рáдуйся!/ И пáки реку: рáдуйся!/ Твой Сын воскрéсе/ триднéвен от грóба,/ и мéртвыя воздвигнувый:// людие, веселитеся.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси быти,/ до скончáния вéка Христé:/ Егóже, вéрнии,// утверждéние надéжди имуще, рáдуемся.
Припéв: Возбудил еси уснув мéртвыя от вéка,// цáрски рыкáвый яко от Иуды лев.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси быти,/ до скончáния вéка Христé:/ Егóже, вéрнии,// утверждéние надéжди имуще, рáдуемся.
Припéв: Магдалина Мария притечé ко грóбу,/ и Христá видевши,// яко вертогрáдаря вопрошáше.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси быти,/ до скончáния вéка Христé:/ Егóже, вéрнии,// утверждéние надéжди имуще, рáдуемся.
Припéв: Ангел облистáяй женáм вопияше:// престáните от слез, яко Христóс воскрéсе.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Христóс воскрéсе, смерть попрáвый,/ и мéртвыя воздвигнувый,// людие веселитеся.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Днесь всяка тварь веселится и рáдуется:// яко Христóс воскрéсе, и ад пленися.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Днесь Владыка плени áда,// воздвигнувый юзники, яже от вéка имяше люте одержимыя.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Величит душá моя// Триипостáснаго и Нераздéльнаго Божествá держáву.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Рáдуйся, Дéво, рáдуйся,/ рáдуйся, Благословéнная,/ рáдуйся, Препрослáвленная!// Твой бо Сын воскрéсе триднéвен от грóба.
Тропáрь: О Пáсха вéлия и свящéннейшая, Христé!/ О мудросте, и Слóве Бóжий, и сило!/ Подавáй нам истее Тебé причащáтися,// в невечéрнем дни Цáрствия Твоегó.
Припéв: Величит душá моя/ воскрéсшаго триднéвно от грóба// Христá Жизнодáвца.
Тропáрь: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Припéв: Величит душá моя/ вóлею страдáвша, и погребéна,// и воскрéсшаго триднéвно от грóба.
Тропáрь: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Катавáсия: Светися, светися,/ нóвый Иерусалиме:/ слáва бо Госпóдня/ на тебé возсия./ Ликуй ныне/ и веселися, Сиóне./ Ты же, Чистая, красуйся, Богорóдице,// о востáнии Рождествá Твоегó.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (трижды)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Ексапостилáрий: Плóтию уснув,/ яко мертв,/ Царю и Гóсподи,/ триднéвен воскрéсл еси,/ Адáма воздвиг от тли,/ и упразднив смерть:/ Пáсха нетлéния,// мира спасéние. (трижды)
ХВАЛИ́ТНЫ ПСАЛМЫ́, ГЛАС 1
Хор: Всякое дыхáние да хвáлит Гóспода./ Хвалите Гóспода с небéс,/ хвалите Егó в вышних.// Тебé подобáет песнь Бóгу.
Хвалите Егó вси áнгели Егó,/ хвалите Егó вся силы Егó.// Тебé подобáет песнь Бóгу.
На 4. Чтец (стихиры праздника, глас 1): Хвалите Егó на силах Егó, хвалите Егó по множеству величествия Егó.
Поéм Твою, Христé, спасительную страсть,// и слáвим Твоé Воскресéние.
Хвалите Егó во глáсе трубнем,/ хвалите Егó во псалтири и гуслех.
Крест претерпéвый, и смерть упразднивый,/ и воскресый из мéртвых,/ умири нáшу жизнь, Гóсподи,// яко Един Всесилен.
Хвалите Егó в тимпáне и лице,/ хвалите Егó во струнах и оргáне.
Ада пленивый и человéка воскресивый,/ Воскресéнием Твоим, Христé,/ сподóби ны чистым сéрдцем,// Тебé пéти и слáвити.
Хвалите Егó в кимвáлех доброглáсных, хвалите Егó в кимвáлех восклицáния,/ всякое дыхáние да хвáлит Гóспода.
Боголéпное Твоé снизхождéние слáвяще,/ поéм Тя, Христé:/ родился еси от Дéвы,/ и неразлучéн был еси от Отцá:/ пострадáл еси яко человéк,/ и вóлею претерпéл еси Крест,/ воскрéсл еси от грóба яко от чертóга произшéд,/ да спасéши мир,// Гóсподи, слáва Тебé.
СТИХИРЫ ПАСХИ, ГЛАС 5
Да воскрéснет Бог,/ и расточáтся врази Егó.
Пáсха/ свящéнная нам днесь показáся;/ Пáсха нóва святáя;/ Пáсха тáинственная;/ Пáсха всечестнáя./ Пáсха Христóс Избáвитель;/ Пáсха непорóчная;/ Пáсха великая;/ Пáсха вéрных./ Пáсха двéри рáйския нам отверзáющая.// Пáсха всех освящáющая вéрных.
Яко исчезáет дым,/ да исчéзнут.
Приидите/ от видéния жены благовéстницы,/ и Сиóну рцыте:/ приими/ от нас рáдости благовéщения, Воскресéния Христóва:/ красуйся, ликуй/ и рáдуйся, Иерусалиме,/ Царя Христá узрéв из грóба,/ яко женихá происходяща.
Тáко да погибнут грéшницы от Лицá Бóжия,/ а прáведницы да возвеселятся.
Миронóсицы жены,/ утру глубоку,/ предстáвша грóбу Живодáвца,/ обретóша Ангела/ на кáмени седяща,/ и той провещáв им,/ сице глагóлаше:/ что ищете Живáго с мéртвыми;/ что плáчете Нетлéннаго во тли?// Шéдше, проповéдите ученикóм Егó.
Сей день, егóже сотвори Госпóдь,/ возрáдуемся и возвеселимся вонь.
Пáсха крáсная,/ Пáсха, Госпóдня Пáсха!/ Пáсха всечестнáя/ нам возсия. Пáсха,/ рáдостию друг друга обымем./ О Пáсха!/ Избавлéние скóрби,/ ибо из грóба днесь,/ яко от чертóга/ возсияв Христóс,/ жены рáдости испóлни, глагóля:/ проповéдите апо́столом.
Слáва Отцу и Сыну и Святóму Духу, и ныне и присно и во вéки векóв, аминь.
Воскресéния день,/ и просветимся торжествóм,/ и друг друга обымем./ Рцем брáтие,/ и ненавидящим нас,/ простим вся Воскресéнием,/ и тáко возопиим:/ Христóс воскрéсе из мéртвых,/ смéртию смерть попрáв// и сущим во гробéх живóт даровáв.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды) И после пения стихир Пасхи христосуемся друг с другом.
СЛО́ВО ОГЛАСИ́ТЕЛЬНОЕ ИОА́ННА ЗЛАТОУ́СТОГО
Аще кто благочестив и боголюбив, да насладится сегó дóбраго и свéтлаго торжествá. Аще кто раб благоразумный, да внидет рáдуяся в рáдость Гóспода своегó. Аще кто потрудися постяся, да восприимет ныне динáрий. Аще кто от пéрваго часá дéлал есть, да приимет днесь прáведный долг. Аще кто по трéтием часé прииде, благодаря да прáзднует. Аще кто по шестóм часé достиже, ничтóже да сумнится, ибо ничимже отщетевáется. Аще кто лишися и девятаго часá, да приступит, ничтóже сумняся, бояся. Аще кто тóчию достиже, и во единонадесятый час, да не устрашится замедлéния: любочестив бо Сый Владыка, приéмлет послéдняго якоже и пéрваго: упокоевáет в единонадесятый час пришéдшаго, якоже дéлавшаго от пéрваго часá. И послéдняго милует, и пéрвому угождáет, и óному даéт, и сему дáрствует, и делá приéмлет, и намéрение целует, и деяние почитáет, и предложéние хвáлит. Тéмже убо внидите вси в рáдость Гóспода своегó: и пéрвии и втории, мзду приимите. Богáтии и убóзии, друг со другом ликуйте. Воздéржницы и ленивии, день почтите. Постившиися и непостившиися, возвеселитеся днесь. Трапéза испóлнена, насладитеся вси. Телéц упитáнный, никтóже да изыдет áлчай, вси насладитеся пира вéры: вси восприимите богáтство блáгости. Никтóже да рыдáет убóжества, явися бо óбщее Цáрство. Никтóже да плáчет прегрешéний, прощéние бо от грóба возсия. Никтóже да убоится смéрти, свободи бо нас Спáсова смерть. Угаси ю, Иже от нея держимый. Плени áда, Сошéдый во ад. Огорчи егó вкусивша плóти Егó. И сиé предприéмый Исáиа возопи: ад, глагóлет, огорчися, срет Тя дóле. Огорчися, ибо упразднися. Огорчися, ибо поруган бысть. Огорчися, ибо умертвися. Огорчися, ибо низложися. Огорчися, ибо связáся. Прият тéло, и Бóгу приразися. Прият зéмлю, и срéте Нéбо. Прият éже видяше, и впадé во éже не видяше. Где твоé, смéрте, жáло; где твоя, áде, побéда? Воскрéсе Христóс, и ты низвéрглся еси. Воскрéсе Христóс, и падóша дéмони. Воскрéсе Христóс, и рáдуются Ангели. Воскрéсе Христóс, и жизнь жительствует. Воскрéсе Христóс, и мéртвый ни един во грóбе. Христóс бо востáв от мéртвых, Начáток усóпших бысть. Тому слáва и держáва, во вéки векóв. Аминь.
[русский перевод]Кто благочестив и боголюбив, - тот пусть насладится этим прекрасным и светлым торжеством. Кто раб благоразумный, - тот пусть, радуясь, войдёт в радость Господа своего. Кто потрудился, постясь, - тот пусть возьмёт ныне динарий. Кто работал с первого часа, - тот пусть получит сегодня должную плату. Кто пришёл после третьего часа, - пусть с благодарностью празднует. Кто успел придти после шестого часа, - пусть нисколько не беспокоится; ибо ничего не лишится. Кто замедлил до девятого часа, - пусть приступит, нисколько не сомневаясь, ничего не боясь. Кто успел придти только в одиннадцатый час, - пусть и тот не страшится за своё промедление. Ибо щедрый Владыка принимает и последнего, как первого; успокаивает пришедшего в одиннадцатый час так же, как и работавшего с первого часа; и последнего милует, и о первом печётся; и тому даёт, и этому дарует; и дела принимает, и намерение приветствует; и деятельности отдаёт честь и расположение хвалит. Итак, все войдите в радость Господа нашего; и первые и вторые получите награду; Богатые и бедные, ликуйте друг с другом; Воздержные и нерадивые, почтите этот день; Постившиеся и непостившиеся, веселитесь ныне. Трапеза обильна, - насыщайтесь все; Телец велик, - никто пусть не уходит голодным; все наслаждайтесь пиршеством веры; все пользуйтесь богатством благости. Никто пусть не жалуется на бедность, ибо открылось общее Царство. Никто пусть не плачет о грехах, ибо из гроба воссияло прощение. Никто пусть не боится смерти, ибо освободила нас смерть Спасителя. Он истребил её, быв объят ею; Он опустошил ад, сошедши во ад; Огорчил того, который коснулся плоти Его. Об этом и Исаия, предузнав, воскликнул: «Ад, - говорит он, - огорчися, срет тя доле». Он огорчился, ибо стал праздным; Огорчился, ибо посрамлён; Огорчился, ибо умерщвлён; Огорчился, ибо низложен; Огорчился, ибо связан. Он взял тело и нашёл в нём Бога; Взял землю и увидел в ней небо; Взял то, что видел, и подвергся тому, чего не видел. «Где ти, смерте, жало? Где ти, аде, победа?» Воскрес Христос, - и ты низложился; Воскрес Христос, - и пали бесы; Воскрес Христос, - и радуются ангелы; Воскрес Христос, - и водворяется жизнь; Воскрес Христос, - и мёртвого ни одного нет во гробе. Ибо Христос, воскресший из мертвых, - «Начаток умершим бысть». Ему слава и держава во веки веков. Аминь.
Тропарь святаго Иоанна, глас 8: Уст твоих, якоже свéтлость огня/ возсиявши, благодáть вселéнную просвети:/ не сребролюбия мирови сокрóвища снискá,/ высоту нам смиреномудрия показá,/ но твоими словесы наказуя, óтче Иоáнне Златоусте,/ моли Слóва, Христá Бóга, спастися душáм нáшим.
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
Утверди, Бóже, святую правослáвную вéру, правослáвных христиáн во век вéка.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (трижды)
ОТПУСТ
Христóс, воскресый из мéртвых, смéртию смерть попрáвый и сущим во гробéх живóт даровáвый, истинный Бóже наш, молитвами Пречистыя Твоея Мáтере и всех святых, помилуй и спаси нас, яко Благ и Человеколюбец. Аминь.
Христóс воскрéсе! Воистину воскрéсе!
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (трижды)
И нам даровá живóт вéчный, покланяемся Егó триднéвному Воскресéнию.
[МНОГОЛЕТИЕ]Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!
И глаголи часы с обедницей