Неделя 8 по Пятидесятнице.Святых отцов шести вселенских соборов.Глас 7 УТРЕНЯ (окончание) ЧАС ПЕРВЫЙ
30 ию́ля 2023 гóда. Недéля 8 по Пятидеся́тнице. Пáмять святы́х отцóв шестù Вселéнских Собóров. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 7
Хор: Пресвятáя Богорóдице, спасù нас.
Чтец: Свéтом рождествá Твоегó,/ страннолéпно вселéнную просвети́ла еси́, Богороди́тельнице,/ сýща бо вои́стинну Бóга на объя́тiях нóсиши Твои́х,/ просвещáюща вéрныя при́сно зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Поéм, Чи́стая, благочéстно Твоé чрéво,/ Бóга вмести́вшее несказáнно воплощáема,/ дáвшаго всем вéрным богоразýмiя просвещéнiе, при́сно зовýщим:/ вся делá Госпóдня Гóспода пóйте,// и превозноси́те во вся вéки.
Глас 6
Хор: Святíи отцы́, молúте Бóга о нас.
Чтец: Я́коже еди́наго кóрене óтрасли Богосáдны, Сын и Дух возсiя́вше:// и҆́бо Отéц Единовинóвен есть, Безлéтный, Безлéтным Ли́цам Единочéстен.
Хор: Святíи отцы́, молúте Бóга о нас.
Чтец: Из чрéва невещéственна безлéтно возсiя́л еси́,/ Единосýщное Слóво Отцý и Дýху,// но нас рáди в лéтнюю всели́ся вещéственную утрóбу еди́ныя Богорóдицы.
Хор: Святíи отцы́, молúте Бóга о нас.
Чтец: Разжжéнныя стрéлы огнéм духóвным/ в студéная сердцá врагóв вонзóшася еретикóв и на смерть удави́ша их// совокуплéнiи отéц седмочи́сленных и Божéственных.
Припéв: Пресвятáя Богорóдице, спасú нас.
Богорóдичен: Не ли́цы Еди́наго Хрїстá слáвим, не смешéнiем существá Сегó соединя́ем:/ Еди́н бо Сый и Тóйже Лицéм, раздвоя́ется естествы́,// Дéво, Твой Сын и Содéтель.
Глас 8
Хор: Святíи отцы́, молúте Бóга о нас.
Тропáрь: Да постыдя́тся ли́ца, и да заградя́тся устá,/ не проповéдающих во двою́ естествý/ несекóмо, непрелóжно же и несли́тно, Еди́наго Сы́на:/ благочести́вiи бо мы прославля́ем,/ и҆́нако ýбо и и҆́нако, дéйствовати же и хотéти Хрїстý,// не ýбо ли́цы, но во двои́х естествáх.
Хор: Святíи отцы́, молúте Бóга о нас.
Тропáрь: И҆́же Iáкова имýщiи Кентóна назвáнiе, тогóжде и҆́мя себé написýющiи, отвещáйте нам:/ áще в назвáнiи егó вы в купéли крести́стеся дрéвле?/ Тéмже сих рáди благодáти Хрїстá отступи́сте вои́стинну,// вóлею со лжи́вым сим безстýдствующе.
Благословúм Отцá, и Сы́на, и Святáго Дýха, Гóспода.
Трóичен: Трисвéтлую Божествá еди́нственную сiя́ющую зарю́ от Еди́наго Трiипостáснаго Естествá:/ Роди́теля Безначáльна, срáслена же Слóва Ѻ́тча и сцáрствующiй Единосýщный Дух,/ дéти, благослови́те, свящéнницы, воспóйте,// лю́дiе, превозноси́те Егó во вся вéки.
И ныне и прúсно и во вéки векóв. Аминь.
Богорóдичен: Богороди́тельнице Пречи́стая, души́ моея́ я́звы и грехóвныя соблáзны очи́сти,/ истóчником омывáющи из ребр Сы́на Твоегó и и҆́же из них истéкшими струя́ми,// к Тебé бо взывáю, и к Тебé прибегáю, и Тебé призывáю, Богоблагодáтную.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пещѝ/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпúмаго,/ Селó Невместúмаго Зиждúтеля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрїстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасú нас.
Богорóдичен: Не божéств Трóицу, но Ипостáсей,/ нижé еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 7
Хор: Пресвятáя Богорóдице, спасù нас.
Чтец: Рáдости нам вéчныя ходáтаица и весéлiя яви́лася еси́/ Приснодéво Отрокови́це, Избáвителя рóждши,/ и҆́стиною и Дýхом божéственным Тогó чтущих,// я́ко Бóга избавляющаго.
Хор: Пресвятáя Богорóдице, спасù нас.
Чтец: Поя́ Давíд, Твой прáотец, Пречи́стая, Тя/ ковчéг именýет Святы́ни божéственныя,/ преестéственне Бóга вмести́вшую,/ во Отéческих Седя́щаго нéдрех,// Егóже непрестáнно вéрнiи величáем.
Глас 6
Припéв: Святíи отцы́, молúте Бóга о нас.
Тропáрь: Не подобáет приложи́ти или́ остáвити что Свящéннаго Предáнiя правослáвныя нáшея вéры:/ в нéйже бо вéрно крести́хомся,// а и҆́же приложи́тели сея́ вéры впрáвду прéдани бýдут прещéнiю прокля́тiя.
Припéв: Святíи отцы́, молúте Бóга о нас.
Тропáрь: Рáдостiю сéрдца вси взыгрáим, свящéнныя Собóры отéц совокýпльше:/ тех бо рáди свет ви́дехом правослáвiя.// Свети́льницы бо яви́шася, вся наставля́юще к прáвым учéнiя обрéтенiем.
Припéв: Святíи отцы́, молúте Бóга о нас.
Трóичен: Душáм испрóсим очищéнiе и благочéстно житié препроводи́ти потщи́мся,/ я́ко да причáстницы бýдем святы́м отцéм,// и҆́же скры́ша прáвых учéнiй богáтство нам, чáдом их.
Припéв: Пресвятáя Богорóдице, спасú нас.
Богорóдичен: Бог от бокý Твоéю возсiя́, Мáти Бóжiя, и человéческiй род обожи́,/ и слáвы Своея́ сподóби, и наслéдники вся показá,// и҆́же Тя Богорóдицу вои́стинну при́сно проповéдающiя.
Глас 8
Припéв: Святíи отцы́, молúте Бóга о нас.
Тропáрь: Прешéд Севи́р Хрїстóву благослáвную Цéрковь льсти́вый,/ и отмщéнiе совéтом отéц благочести́вых хулéнiя рáди и хитростнослóвiя своегó прiя́т прáведно,// и отревáется учи́телей сослóвiя, осуждéнный.
Слáва Ѻтцý и Сы́ну и Святóму Дýху.
Тропáрь: Естествá Хрїстóва что сливáеши и смешéнiе ввóдиши и сли́тiе,/ Крéстную страсть и погребéнiе прилагáяй безстрáстному Божествý/ Единорóднаго Слóва Бóжiя, о окая́нне Севи́ре?// Тéмже вели́каго твоегó хулéнiя гнушáемся.
И ныне и прúсно и во вéки векóв. Аминь.
Богорóдичен: Брóви и дéрзость вкýпе враждéбных рождéйся от Дéвы низложи́/ и совéты злослóвящих Содéтеля,/ вéрных же Собóр утверди́ непоколéблем, я́ко Бог,// рог вознесы́й и вéрою укрепи́вый, да Тя вси величáем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный oсьмы́й: Два Áнгела ви́девши внутрь грóба, Марíя удивля́шеся,/ и Хрїстá не знáющи, я́ко вертогрáдаря вопрошáше:/ гóсподи, где положи́л еси́ тéло Iисýса моегó?/ Звáнiем же Тогó познáвши бы́ти Самогó Спáса,/ слы́ша: не прикасáйся Мне, ко Отцý отхождý,// рцы брáтiи Моéй.
Слáва Ѻтцý и Сы́ну и Святóму Дýху.
Светúлен св. отцéв: Отéц божéственных днесь пáмять прáзднующе,/ молéньми тех мóлим Всещéдре:/ вся́каго врéда ересéй избáви лю́ди Твоя́ Гóсподи,// и вся сподóби, Отцá Слóва слáвити, и Всесвятáго Дýха.
И ны́не и прúсно и во вéки векóв. Амúнь.
Богорóдичен из минéи (св. отцéв): Рáдуйся, Бóжiя палáто./ Рáдуйся, горó присéнная./ Рáдуйся, Неопали́мая купинó./ Рáдуйся, престóле слáвы./ Рáдуйся, Божéственная трапéзо./ Рáдуйся, рýчко всезлáтая./ Рáдуйся, свети́льниче всесвéтлый.// Рáдуйся, лéгкiй óблаче, Дéво Мáти Марíе.
ХВАЛИТНЫ
Хор, глас 7: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрїстóс из мéртвых,/ разрýш смéртныя ýзы:/ благовести́ землé, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрїстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрїстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Что воздáмы Гóсподеви о всех, я́же воздадé нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестé, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры св. отцéв, глас 6: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи// вои́стинну и богомýдрiи.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи// вои́стинну и богомýдрiи.
Благословéн есú, Гóсподи Бóже отéц нáших,/ и хвáльно и прослáвлено И҆́мя Твоé во вéки. (Дан.3:26)
Стiхúра: Все прiéмше ýмное сiя́нiе Святáго Дýха,/ преестéственнейшее благослóвiе,/ крáткими глагóлы, и мнóгим рáзумом/ богодухновéнно провещáша:/ я́ко Хрїстóвы проповéдницы,/ евáнгельских предстáтелiе учéнiй блажéннiи,/ и благочести́вых предáнiй,/ свы́ше прiéмше сих откровéнiе я́ве, и просвéщшеся,// изложи́ша вéру богонаучéнную.
Соберúте Емý/ преподóбныя Егó. (Пс.49:5А)
Все собрáвше пáстырское искýсство,/ и я́рость подви́гше ны́не прáведнейшую,/ отмсти́тельне тя́жкiя отгнáша и пáгубныя вóлки,/ прáщею Дýха извéргше от церкóвнаго исполнéнiя,/ пáдшiя я́ко к смéрти, и я́ко неисцéльно недýговавшiя/ божéственнiи пáстырiе,/ и я́ко раби́ и́стиннейшiи Хрїстóвы,// и божéственнаго проповéданiя таи́нницы свящéннейшiи.
Слáва Отцý и Сыну и Святóму Дýху.
Стiхúра св. отцéв, глас 8: Святы́х отцéв лик,/ от конéц вселéнныя стéкшiйся,/ Отцá и Сы́на и Дýха Святáго,/ еди́но Существó научи́ша и Естествó,/ и тáйну богослóвiя я́сно предáша Цéркви:/ и҆́хже похваля́юще вéрою ублажи́м, глагóлюще:/ о божéственный пóлче,/ богоглагóливiи орýжницы ополчéнiя Госпóдня,/ звéзды многосвéтлыя мы́сленныя твéрди,/ тáинственнаго Сióна необори́мiи столпи́,/ миродохновéннiи цвéти рáйстiи,/ всезлатáя устá Слóва,/ Нiкéйская похвалó, вселéнныя украшéнiе,// прилéжно моли́теся о душáх нáших.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Вóзглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская осьмáя, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрїстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 7: Разруши́л еси́ Крестóм Твои́м смерть, отвéрзл еси́ разбóйнику рай; мvронóсицам плач преложи́л еси́ и Апóстолом проповéдати повелéл еси́, я́ко воскрéсл еси́, Хрїстé Бóже, дáруяй мíрови вéлiю ми́лость.
Слáва Отцý и Сы́ну и Святóму Дýху.
Тропáрь отцéв, глас 8: Препрослáвлен еси́, Хрїстé Бóже наш, свети́ла на земли́ отцы́ нáша основáвый, и тéми ко и҆́стинней вéре вся ны настáвивый, Многоблагоутрóбне, слáва Тебé.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 7: Не ктомý держáва смéртная возмóжет держáти человéки: Хрїстóс бо сни́де, сокрушáя и разоря́я си́лы ея́. Связýем бывáет ад, прорóцы соглáсно рáдуются: предстá, глагóлюще, Спас сýщим в вéре, изыди́те, вéрнiи, в воскресéнiе.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу