Неделя 8 по Пятидесятнице.Святых отцов шести вселенских соборов.Глас 7 ВСЕНОЩНОЕ БДЕНИЕ.УТРЕНЯ.КАНОН
30 ию́ля 2023 гóда. Недéля 8 по Пятидеся́тнице. Пáмять святы́х отцóв шестù Вселéнских Собóров. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрiстé Бóже,// я́ко Человеколю́бец.
СТЕПЕННА, ГЛАС 7
1 АНТИФОН
Хор: Плен Сióнь от лéсти обратúв,/ и менé Спáсе, оживù,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь созúждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, путù животá обрéтше,// ны́не и прúсно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрiстóви пастыреначáльнику. (Двáжды)
Слáва Ѻтцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.64): Во врéмя óно, Марíя стоя́ше у грóба вне плáчущи. Я́коже плáкашеся, прини́че во гроб и ви́де два Áнгела в бéлых ри́зах седя́ща, еди́наго у главы́ и еди́наго у ногý, идéже бе лежáло тéло Iисýсово. И глагóласта ей óна: жéно, что плáчешися? Глагóла и҆́ма: я́ко взя́ша Гóспода моегó, и не вем, где положи́ша Егó. И сiя́ рéкши обрати́ся вспять и ви́де Iисýса стоя́ща, и не вéдяше, я́ко Iисýс есть. Глагóла ей Iисýс: жéно, что плáчеши, когó и҆́щеши? Онá же мня́щи, я́ко вертогрáдарь есть, глагóла Емý: гóсподи, áще ты еси́ взял Егó, повéждь ми, где еси́ положи́л Егó, и аз возмý Егó. Глагóла ей Iисýс: Марíе. Онá же обрáщшися глагóла Емý: Раввуни́, éже глагóлется, Учи́телю. Глагóла ей Iисýс: не прикасáйся Мне, не у бо взыдóх ко Отцý Моемý: иди́ же ко брáтiи Моéй и рцы им: восхождý ко Отцý Моемý и Отцý вáшему, и Бóгу Моемý и Бóгу вáшему. Прiи́де же Марíя Магдали́на повéдающи ученикóм, я́ко ви́де Гóспода, и сiя́ речé ей.
В те дни, Мария стояла у гроба и плакала. И, когда плакала, наклонилась во гроб, и видит двух Ангелов, в белом одеянии сидящих, одного у главы и другого у ног, где лежало тело Иисуса. И они говорят ей: жена! Что ты плачешь? Говорит им: унесли Господа моего, и не знаю, где положили Его. Сказав сие, обратилась назад и увидела Иисуса стоящего; но не узнала, что это Иисус. Иисус говорит ей: жена! что ты плачешь? кого ищешь? Она, думая, что это садовник, говорит Ему: господин! если ты вынес Его, скажи мне, где ты положил Его, и я возьму Его. Иисус говорит ей: Мария! Она, обратившись, говорит Ему: Раввунù! - что значит: Учитель! Иисус говорит ей: не прикасайся ко Мне, ибо Я еще не восшел к Отцу Моему; а иди к братьям Моим и скажи им: восхожу к Отцу Моему и Отцу вашему, и к Богу Моему и Богу вашему. Мария Магдалина идет и возвещает ученикам, что видела Господа и что Он это сказал ей. (Ин.20:11-18)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещéнный с канóном Богорóдицы (глас 7) и канóнами святых отцéв, глас 6, глас 8)
ПЕСНЬ 1
Iрмóс: Мáнiем Твоúм/ на земны́й óбраз преложúся/ прéжде удоборазливáемое/ воднóе естествó, Гóсподи./ Тéмже немóкренно пешешéствовав Iзрáиль,// поéт Тебè песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебé не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебé прибли́жися,/ и зубы́ не возмóг стéрти тéло Твоé,/ челюстьми́ сокруши́ся./ Отню́дуже Спáсе, болéзни разрýш смéртныя,// воскрéсл еси́ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá еси́.// Отню́дуже я́ве Богорóдицу, Пречи́стая, вéдуще Тя, вси слáвим.
Канон Богородицы, глас 7
Хор: Пресвятáя Богорóдице, спасù нас.
Чтец: Бéздну рóждшая благоутрóбiя, Дéво,/ дýшу мою́ озари́ светонóсным Твои́м сiя́нiем,// я́ко да достóйно воспою́ твои́х чудéс бéздну.
Хор: Пресвятáя Богорóдице, спасù нас.
Чтец: Стрелóю грехóвною уя́звлены нас Слóво ви́дев,/ я́ко Благодéтель ущéдри:/ отню́дуже несказáнно соедини́ся, Всечи́стая, плóтiю,// и҆́же из Тебé Пребожéственный.
Канон первый святых отцев, глас 6
Хор: Святíи отцы́, молúте Бóга о нас.
Чтец: И҆́же от Нiкéи, я́коже от нéкоего небесé,/ всю́ду возгремéвше Слóво Живáго Ѻтцá и Сегó показáвше враги́, грóмом избiéны,// свящéнными словесы́ да почтýтся.
Хор: Святíи отцы́, молúте Бóга о нас.
Чтец: Духобóрцев дух лукáвый Святы́м Дýхом Хрїстóс от Своея́ Цéркве далéче отгнá,// вторы́м дéйством Собóра совокупи́в.
Хор: Святíи отцы́, молúте Бóга о нас.
Чтец: Хрїстобóрца прéлесть изгнá Нестóрiя Кири́лл, Собóра начáльник,// и҆́же я́сно Дéву Марíю исповéда, Бóгу Мáтерь Чи́стую.
Хор: Пресвятáя Богорóдице, спасù нас.
Богорóдичен: Несоздáнныя Трóицы Еди́наго Хрiстá во двою́ естествý и хотéнiю, Чи́стая, раждáеши,// соединéнiе человéком и Áнгелом Тебé рáди содéлавшаго.
Канон второй святых отцев, глас 8
Хор: Святíи отцы́, молúте Бóга о нас.
Чтец: Ѻтéц благочести́вое собрáнiе, стéкшееся иногдá на Евти́ха,/ вои́стинну Спáса проповéда в нераздéльных естествáх сугýбых,// Божéственнаго отцá Кирíлла учéнiем шéствующее я́ве и пребывáющее.
Хор: Святíи отцы́, молúте Бóга о нас.
Чтец: Числó шестьсóт тридеся́тое благочести́вейших мужéй,/ Евти́хову прéлесть и Севи́рову éресь низлóжше,/ достигóша воспéти си́це:/ Хрiстá во двою́ существý проповéдуем,// шéствующе речéнiем Кирíлла блажéннаго.
Слáва Ѻтцý и Сы́ну и Святóму Дýху.
Тропáрь: И҆́же не проповéдует, во двою́ естествý и дéйствiих Хрїстá, Слóво Ѻ́тчее,/ прiи́мет анáфему,/ четвéртый бо Собóр святы́х отéц единомýдренно си́це проповéда.// Вси ýбо их да ублажи́м.
И ныне и прúсно и во вéки векóв. Аминь.
Богорóдичен: Преслáвная о Тебé возглагóлашася в рóдех родóв,/ Я́же Бóга Слóва во чрéве вмести́вшая, чистá же пребы́вши, Богорóдице Марíе,// тем Тя вси почитáем, по Бóзе Предстáтельницу нáшу.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: В начáле Небесá/ всесúльным Слóвом Твоúм утверждéй Гóсподи Спáсе,/ и Вседéтельным и Бóжiим Дýхом,/ всю сúлу их,/ на недвúжимем мя кáмени// исповéданiя Твоегó утвердù.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрiстé,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менé совоскреси́л еси́.
Хор: Пресвятáя Богорóдице, спасù нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 7
Хор: Пресвятáя Богорóдице, спасù нас.
Чтец: Змiй поползы́й из Едéма,/ менé обожéнiя желáнiем прельсти́в, вéрже в зéмлю:/ но И҆́же ми́лостив, и естествóм благоутрóбен, ущéдрив богосодéла,// во чрéво Твоé всéлься, и подóбен мне быв, Мáти Дéво.
Хор: Пресвятáя Богорóдице, спасù нас.
Чтец: Благословéн плод Твоегó чрéва, Дéво Богорóдице, всех рáдосте,/ рáдость бо всемý мíру родилá еси́, и весéлiе вои́стинну// разгоня́ющее печáль грехóвную, Богоневéсто.
Глас 6
Хор: Святíи отцы́, молúте Бóга о нас.
Чтец: Твáри служи́тель я́влься Áрiй безýмный,/ и Македóнiй пáки мéрзок я́влься,// в геéнне óгненней рáвно мýчатся со éллины.
Хор: Святíи отцы́, молúте Бóга о нас.
Чтец: Седмiю́ Собóры свящéнными святы́х отéц/ честнýю Цéрковь уясни́л еси́, Хрiстé,// я́коже седми́х свети́льник свéтом прéлести тьму прогнáв далéче.
Хор: Святíи отцы́, молúте Бóга о нас.
Чтец: Стáдо Твоé, Слóве, погубля́ет многообрáзная крáста еретíк,// пáстырiе же Твои́х словéсных овéц учéнiем сié премени́ша.
Хор: Пресвятáя Богорóдице, спасù нас.
Богорóдичен: Еди́наго родилá еси́, Пречи́стая,/ от Несоздáнныя Трóицы во двою́ существý и хотéнiю,// Егóже óбразу честнóму покланя́емся, благодáти исполня́еми.
Глас 8
Хор: Святíи отцы́, молúте Бóга о нас.
Чтец: И҆́же Севи́ра безстýдно преклóншеся словесéм, я́да смертотóчнаго испóлненным,/ посрами́теся при́сно, отлучáющеся вси Цéркве,// я́коже вóлцы и пси хи́щнiи.
Хор: Святíи отцы́, молúте Бóга о нас.
Чтец: Ликóвственницы и вéрнiи, Вседéтеля и Спáса/ во двою́ нераздéльных существáх и хотéнiих сугýбых и дéйствiих почитáем,// тéмже Севи́ра прéлести вконéц отвращáемся.
Слáва Ѻтцý и Сы́ну и Святóму Дýху.
Тропáрь: Прiиди́те, Севи́ра и Iáкова неблагополýчных прéлесть,/ с си́ми Феодóсiя, Дiоскóра отмéщем я́ве,// четвéртый же Собóр благочести́вых отéц воспоéм пéсньми Божéственными.
И ны́не и прúсно и во вéки векóв. Аминь.
Богорóдичен: Херувíм и Серафíм яви́лася еси́ вы́шши, Богорóдице:/ Ты бо еди́на прiя́ла еси́ Невмести́маго Бóга во Твоéм чрéве, Несквéрная.// Тéмже Тя, вси вéрнiи, пéсньми, Чи́стая, ублажáем.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трижды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрїстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Íкос: Вострепетáша дóле преиспóдняя днесь,/ ад и смерть Еди́наго от Трóицы:/ земля́ поколебáся, врáтницы же áдовы ви́девше Тя, ужасóшася:/ вся же тварь со прорóки рáдующися поéт Тебé побéдную песнь,/ избáвителю Бóгу нáшему,/ разруши́вшему ны́не смéртную си́лу./ Да воскли́кнем и возопiи́м ко Адáму, и к сýщим из Адáма:/ дрéво сегó пáки введé.// Изыди́те, вéрнiи, в воскресéнiе.
Седáлен св. отцéв, глас 4: Свети́льницы пресвéтлiи и҆́стины Хрiстóвы ми́ру яви́стеся на земли́,/ вои́стинну блажéннейшiй, отцы́ Боговещáннiи,/ изсуши́вше éреси хýльных языковрéдiй/ и угаси́вше пламенови́дная злослáвных смущéнiя:// тéмже, я́ко святи́телiе Хрiстóвы, моли́теся спасти́ся нам. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 4: Обнови́ла еси́, Чи́стая, Божéственным Рождествóм Твои́м/ истлéвшее во страстéх земнорóдных мéртвенное существó/ и воздви́гла еси́ вся от смéрти к животý нетлéнiя.// Тéмже Тя по дóлгу блажи́м вси, Дéво Препрослáвленная, я́коже прореклá еси́.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрїстè Бóже,/ тáйну услы́шах смотрéнiя Твоегó,// и прослáвих Тя, Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегó и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егó хотéнiя.
Глас 7
Хор: Пресвятáя Богорóдице, спасù нас.
Чтец: Избрáнная вся и дóбрая,/ я́вльшися Бóгу прéжде создáнiя свéтлостiю, Всепéтая,// светоли́тiем Твои́м пою́щiя Тя просвети́.
Хор: Пресвятáя Богорóдице, спасù нас.
Чтец: Бóга человéком родилá еси́, Чи́стая,/ воплощéнна от чи́стых кровéй Твои́х,/ избавля́юща согрешéнiй мнóгих,// любóвiю слáвящiя и почитáющiя Тя, Мáти Дéво.
Глас 6
Хор: Святíи отцы́, молúте Бóга о нас.
Чтец: Врази́ Твои́ возшумéша, и ненави́дящии Тя главý воздвигóша, Спáсе, вмáле,// но áбiе падóша, не терпя́ще глáса труб духóвных.
Хор: Святíи отцы́, молúте Бóга о нас.
Чтец: Сóлнца Сóлнцы сугýбо озари́ша,/ Сын и Дух от Отцá, несоздáни, Собезначáльни:// Обои́м Отéц Еди́н винóвен вéруется.
Хор: Святíи отцы́, молúте Бóга о нас.
Чтец: Седмь ýбо духóв, и́же почи́ша на Хрiстé, Исáiя сié речé,// на седми́х же Собóрех почи́ Хрiстóс со Отцéм и Божéственным Дýхом.
Хор: Пресвятáя Богорóдице, спасù нас.
Богорóдичен: Бóга родилá еси́, плоть носи́вшаго,/ от чи́стых Твои́х кровéй, Отрокови́це Чи́стая,// Егóже, сугýба естествóм, во Ипостáси же еди́ней, отцы́ проповéдаша.
Глас 8
Хор: Святíи отцы́, молúте Бóга о нас.
Чтец: Рцы нам, безýмный Севи́ре и сýетный:/ еди́но естествó слóжно безначáльно, свет Слóво Ѻ́тчее и Сы́на?/ Áще бо си́це речéши, и другóе естествó знаменáл еси́:// плоть бо и Слóво, не еди́но существó, но сугýбо сýщее, окая́нне.
Хор: Святíи отцы́, молúте Бóга о нас.
Чтец: Еди́но рéкши естествó Слóва, наведé воплóщшееся естествó человéчества,/ кромé изменéнiя вся́чески и смешéнiя,/ александрíом учи́тель же и председáтель,// я́сно два естествá и хотéнiя научáя правослáвно мýдрствовати хотя́щих.
Слáва Ѻтцý и Сы́ну и Святóму Дýху.
Тропáрь: Два естествá Хрiстóва вси проповéдаем неслiя́нно,/ вся́кое нечéстiе Евти́хiя, вéрнiи, áбiе и Дiоскóра безýмнаго попирáюще,// послéдуем предéлу святы́х отéц и Кирíлла Божéственнаго речéнiем.
И ныне и прúсно и во вéки векóв. Аминь.
Богорóдичен: Херувíмское носи́ло Ты, Богомáти Чи́стая,/ Ты вмести́лище, Ты и прiя́телище Слóва Ѻ́тча и Бóга,/ от пречи́стых ложéсн в плоть облéкшагося.// Тéмже, во двою́ существý из Тебé Воплóщшемуся покланя́ющеся, непрестáнно слáвим.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Нощь не светлá невéрным Хрїстè,/ вéрным же просвещéнiе в слáдости словéс Твоúх./ Сегó рáди к Тебè ýтренюю,// и воспевáю Твоè Божествó.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрiстé,/ и по лани́те ударéнiе терпи́ши,/ свобóде ходáтайственно пою́щим:// к Тебé ýтренюю, и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрiстé,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилá еси́ Мáти чи́стая,/ воплощéннаго из Тебé боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 7
Хор: Пресвятáя Богорóдице, спасù нас.
Чтец: Лéствицу узрéв Iáков, к высотé утверждéну,/ óбразу научи́ся, неискусобрáчная Тебé:// Тобóю бо Бог человéком прiобщи́ся, Всечи́стая Влады́чице.
Хор: Пресвятáя Богорóдице, спасù нас.
Чтец: Избавлéнiе вéчное Тобóю, Дéво, ны́не обрéтше/ усéрдно зовéм Ти: éже рáдуйся, Богоневéстная:// и Твои́м свéтом возрáдовавшеся, Всепéтая, пéсньми Тя поéм.
Глас 6
Хор: Святíи отцы́, молúте Бóга о нас.
Чтец: Божéственный виногрáд Хрiстóв, и҆́же от Еги́пта пренесéн,/ тéмнаго отчáянна губи́теля звéрiе пéрвее поядáху,// прáщею же святы́х отéц далéче отгнáшася.
Хор: Святíи отцы́, молúте Бóга о нас.
Чтец: Божéственным сiя́нiем трисiя́нным ум просвéщше,/ честнíи отцы́ Еди́наго проповéдаша Честны́я Трóицы Хрiстá Гóспода,// сугýба естествы́ и хотéнiи.
Хор: Пресвятáя Трóице, Бóже наш, слáва Тебè.
Трóичен: В вéщных, я́коже в серафíмских, мýдрыми отцы́, о Трóице,/ Цéрковь онебеси́ся, Трисвятýю песнь при́сно Тебé пою́щи,// собирáет Трóическое Твоé Еди́но Божествó.
Хор: Пресвятáя Богорóдице, спасù нас.
Богорóдичен: Мáти и рабá Твоегó Сы́на бы́ла еси́, Чи́стая,/ и҆́бо И҆́же из Тебé прéжде Тебé бя́ше, я́ко Содéтель Твой,// Егóже во двою́ существý познавáем и соединя́ем Слóвом Ипостáсным.
Глас 8
Хор: Святíи отцы́, молúте Бóга о нас.
Чтец: О Севи́ре! Естéств Хрiстóвых не сливáй лю́те, законопрестýпне,/ и҆́бо жри́телiе и преблажéннiи учи́телiе вси,// во двою́ существý и во Еди́ном Хрiстóвом Лицé провозвести́вше, всем изложи́ша.
Хор: Святíи отцы́, молúте Бóга о нас.
Чтец: Прiя́т естествó человéческое я́ве Безначáльный, Ѻ́тчее Слóво,/ я́ко Человеколю́бец, хотя́ ущéдрити нас, поги́бших.// Тéмже Тогó проповéдую во двою́ существý и хотéнiю.
Слáва Ѻтцý и Сы́ну и Святóму Дýху.
Тропáрь: Низложи́в Севи́ра четвéртый Собóр и Дiоскóра, Хрiстá хýлящiя,/ извещáя сви́ток Леóнта, первоседáльника Ри́мскаго, зелó дóбре,// сугýба естествá Спáсова несекóмо явля́я.
И ныне и прúсно и во вéки векóв. Аминь.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся,// я́ко Тебé и еди́ну, хрiстiáне, ко Влады́це очищéнiе ми́лостивно предлагáем.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Плáвающаго в молвè житéйских попечéнiй,/ с кораблéм потопля́ема грехù,/ и душетлéнному звéрю приметáема,/ я́ко Ióна, Хрїстè, вопiю́ Ти:// из смертонóсныя глубины́ возведù мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебé спасéнiя моля́хуся:/ éже Крестóм, Хрiстé, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебé,// плоть из Тебé бысть.
Глас 7
Хор: Пресвятáя Богорóдице, спасù нас.
Чтец: Закóннiи Тя óбразы, и прорóческая проречéнiя я́ве предвозвещáху,/ хотя́щую роди́ти Благодéтеля, Чи́стая, всея́ твáри,/ многочáстне и многообрáзне благодéйствовавшаго// вéрно воспевáющих Тя.
Хор: Пресвятáя Богорóдице, спасù нас.
Чтец: Устрáншагося дрéвле навéтом человекоубíйцы, Адáма первоздáннаго/ рáйскiя божéственныя слáдости,/ Неискусобрáчная, пáки возвелá еси́,// рóждши и҆́же от преступлéнiя нас избáвившаго.
Глас 6
Хор: Святíи отцы́, молúте Бóга о нас.
Чтец: Бог богов Госпóдь, ‑ Дави́д, прéжде воспéв, глагóла/ и призвá от востóк, от конéц всея́ земли́, дáже до зáпад их,// Вселéнскiя Собóры отéц назнáменуя.
Хор: Святíи отцы́, молúте Бóга о нас.
Чтец: Седмь столпóв утверди́ премýдрость Бóжiя,/ Твою́ Цéрковь, Влады́ко, седмочи́сленными Собóры свящéнных отéц// неуклóнну соблюдáему от вся́ких ересéй.
Хор: Святíи отцы́, молúте Бóга о нас.
Чтец: Стыд лицá да покры́ет Евти́хiя и Дiоскóра, слiя́нiе буеслóвивших естествá Хрiстóва:// не в привидéнiи бо, но во обожéнiи естествó земнорóдных прiя́т.
Хор: Пресвятáя Богорóдице, спасù нас.
Богорóдичен: Да вóзмется Нестóрiй во еврéйскiя тéмныя собóры,/ и язы́к же отсечéтся хýльный:// Бóга бо роди́ Дéва Марíя, Плотонóсца нам.
Глас 8
Хор: Святíи отцы́, молúте Бóга о нас.
Чтец: Два послáнiя Кири́лла, я́же ко Си́нгелу пóсланная иногдá,/ востóку преобладáющу, обличáют Севи́рову всю прéлесть,// благочéстно Хрiстá проповéдующая. (Двáжды)
Слáва Ѻтцý и Сы́ну и Святóму Дýху.
Тропáрь: Кири́лл Хрiстá проповéдует во двою́ естествý и дéйствiих сугýбых,/ Севи́ра несмы́сленнаго éресь отсецáя.// Тéмже вси во учéнiих тогó пребýдем.
И ныне и прúсно и во вéки векóв. Аминь.
Богорóдичен: Дéву Тя и Чи́стую Преслáвную, Богороди́тельнице Мари́е,/ благочести́вiи, вои́стину проповéдуем,// заграждáюще безсту́дная устá Нестóрiя и Дiоско́ра зломы́слiе.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк отцéв, глас 8: Апóстол проповéданiе и отéц догмáты/ Цéркви еди́ну вéру запечатлéша,/ я́же и ри́зу нося́щи и҆́стины, исткáну от éже свы́ше богослóвiя,// исправля́ет и слáвит благочéстiя вели́кое тáинство.
Íкос: Высóким проповéданiем,/ Бóжiю Цéрковь услы́шим вопiю́щу:/ жáждай да грядéт ко мне и пiéт чáшу, ю́же держý,/ чáша есть премýдрости,/ сié питié и҆́стины слóвом почерпóх,/ вóду проливáющую не прекослóвiя, но исповéданiя,/ ю́же пiя́ ны́нешнiй Iзрáиль, Бóга зрит вещáюща:/ ви́дите, ви́дите, я́ко Сам Аз есмь, и не пременя́юся:/ Аз Бог пéрвый, Аз же и по сих,/ и рáзве Менé несть инóго отню́д./ Отсю́ду причащáющiися насы́тятся,// и восхвáлят благочéстiя вели́кое тáинство.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Едúнаго Бóга воспевáюще и глагóлюще:/ превозносúмый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрiстóвым пáки обновля́емь есть.// Менé бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебé воскрéсшаго, Хрiстé, из грóба, тварь вся воспé:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 7
Хор: Пресвятáя Богорóдице, спасù нас.
Чтец: Преиспещрéну, позлащéну ýтварь Тя имýщу/ возлюби́ Создáтель Твой, Дéво, и Госпóдь:// превозноси́мый отцéв Бог и препрослáвлен.
Хор: Пресвятáя Богорóдице, спасù нас.
Чтец: Очищáется, Отрокови́це, угль дрéвле Исáiа прiéм:/ знаменáтельне Твоé рождествó ви́дев,// превозноси́маго отцéв Бóга, и препрослáвлена.
Глас 6
Хор: Святíи отцы́, молúте Бóга о нас.
Чтец: Вавилóнскаго ýбо змíя разрази́ Данiи́л пéрвее,/ моли́твами же отéц прося́деся лю́тый еги́петскiй змiй,// я́ве Áрiй, поядáющiй Хрiстóво стáдо.
Хор: Святíи отцы́, молúте Бóга о нас.
Чтец: Непрощéным нечéстiем негодовá волк Македóнiй,/ прирази́вся Дýху, обожáющему человéки// и вся бáнею Крещéнiя на пéрвую добрóту воображáющу вéрныя.
Глас 8
Хор: Святíи отцы́, молúте Бóга о нас.
Чтец: Во двою́ ýбо естествý и дéйствiях исповéдающе Хрiстá,/ несли́тне, непрелóжне, прéлесть Севи́ра побеждáем,/ тéмже, плóти прiя́тiем страсть претерпéвшему, вопiéм Емý:// благословéн Бог отéц нáших.
Хор: Святíи отцы́, молúте Бóга о нас.
Чтец: Еди́наго разумéем, И҆́же на дрéве и в нéдрех Отéческих,/ я́ко Бóга в Вы́шних и во грóбе, я́ко совокуплéнна плóтiю./ Емýже поéм, соглáсно взывáюще:// благословéн еси́, Бóже отéц нáших.
Слáва Ѻтцý и Сы́ну и Святóму Дýху.
Тропáрь: Áрiево истощáнiе, пресечéнiе же, Бóга умаля́ющаго, вéрнiи,/ соединомы́слiе áбiе Савéллiево,/ Трóическiя враги́ возненави́девше, Трóице возопiéм:// благословéн Бог отéц нáших.
И ныне и прúсно и во вéки векóв. Аминь.
Богорóдичен: Всех ýбо Госпóдь, Еди́наго же тóчiю Единорóднаго Сы́на,/ правослáвно Отцá богослóвяще, Тя возвещáем,// и Еди́н вéдяще Твой исходя́щiй Дух, прав, срáслен и Соприсносýщен.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга явù медленоязы́чному и гугнúвому Моисéови,/ и óтроки рéвность Бóжiя/ три непреборúмыя во огнù певцы́ показá:/ вся делá Госпóдня Гóспода пóйте,// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромé прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
продолженiе зри здесь